^^^^عدت بقصتي الثانية (( بنات بو محمد في مهب الريح )) ^^^^

[سارووونه22]

مشكووووووووووووووورة ريحتيني نفسيتي تعبت وانا انطر بس ماقصرتي

 

[انجاد الكويت]

القصه روووعه تسلم ايدج انا كنت متابعه مذكرات مريم بس للاسف ماكملتها لاني سافرت وطولت بالسفر ونسيت وين واصله والحين ودي اكملها بس باي صفحه القاها

المهم كملي القصه رووووعه روووعه وانشالله نصيب رقيه مثل نصيب اختها

ناطره البارت

 

[سارووونه22]

اب اب اب اب

 

[MaFaZ]

انطق الباب على رباب واهي تبدل ثيابها .. لبست هدومها بسرعه بسرعه وبطلت الباب

رباب: خالتي ؟؟
ام شهاب: صباح الخير يمه .. صباح الخير يا عروسة (( تبوسها ))
رباب: صباح النور (( تنزل راسها مستحية ))
ام شهاب: ها يمه شلونج شخبارج ؟؟
رباب: بخير خالتي تفضلي

دشت ام شهاب وقعدت عالغنفة ..
ام شهاب: ها يمه . قولي
رباب: (( مستحية )) شقول خالتي
ام شهاب: ههههه شتقولين بعد صار ولا بشري . والله اني احاتيج جنج انتي بنتي م واهو ولدي
رباب: صار شنو (( تعومست )) ما فهمت خالتي (( خنقتها العبرة ))
ام شهاب: (( لمتها )) وي يا بعدي .. شفيج انخبصتي خلاص يمه انتي صرتي زوجة الحين ومرة .. وهذا ريلج ونتي حلاله .. وهذي سنة الحياة كلنا كنا بنات ماندري بالدنيا شي وتزوجنا ....
رباب: اي خالتي

بهاللمة رباب حست بامان ما بعده امان .. حست طول عمرها كانت تتخبط ... تقعد من النوم ما تدري هاليوم شلون بيمر بالرغم ان اختها معاها .. بس الحين شعور غير شعور حلو شعور بالامان والاطمئنان .... حست انها من زمان امها مو لامتها وكانها الحين لمتها .. ام شهاب وايد طيبة ويا رباب وحنونة .... شلمتها بعطفها وحنانها لسببين مهمين اول سبب انها تاخذ الاجر في هالبنت المسكينة اليتيمة وثاني سبب عشان راحة ولدها واستقرار البيت ..

شوي ولا غالية مرت ماجد درعمت

غالية : ها عمتي انتي اهني ؟؟؟؟؟؟؟؟؟؟
ام شهاب: هلا يمه ما سمعتج ونتي داخلة
غالية : ادورج ما لقيتج . رباب شلونج مبروكين ان شاء الله
رباب: الله يبارك بعمرج ..
ام شهاب: شبغيتي يمه ؟؟ في شي ؟؟
غالية :لا عمتي اسال عنج بس شكلج نسيتي لما رباب دخلت علينا
ام شهاب: لا انا انسى بنت اخوي . .بس انتي مرت ولدي واهي مرت ولدي وربوبة عروستنا ...
غالية: انا مو بس مرت ولدج يا عمة لا تنسين انا بنت اخوج الغالي ولا ليش سموني غالية
ام شهاب: اي اي كلكم غاليين يا قلبي علي . ها في احد جانا ....
غالية : مادري يمكن
ام شهاب: خل اقوم اشوف . يالله يمه خلصي لبس ونزلي

طلعت ام شهاب من الغرفة واهني توحدت غالية برباب
غالية: بس هذا لبسج ؟؟ ليش ما كشختي وين ذهبج
رباب: (( متوترة )) في بيت اهلي
غالية: شيسوي في بيت اهلج هههههههههههه يسوونه طرشي جيبيه المرة الجاية وياج عشان لا عمتي تقول انج فقر خاشته هناك واهني تلبسين خلاجين

رباب: اي ان شاء الله ..
غالية: اوكي اخليج خلصي لبسج

نزلت غالية وكان بودها تقول وتسوي وتزلغ بس غالية ذكية وراسمتها صح ما حبت تقط اللي بقلبها مرة وحدة حبت انها تخرب على رباب شوي شي عشان لحد يحس .. يعني مثل ما نقول حية رقطة او عقرب رمل تلدغ وتنخش .. اول شي تلعب بنفسيتها وعقب تزلغ لها .... وهالشعور ما تولد بقلب غالية الا لما شافت عمتها لامة رباب

طبعا غالية مو ناقصها شي جمال وجسم واسلوب وكشخة ... غير انها اسم على مسمى غالية ابوها ... لما ماجد خطبها ابوها وخوالها كسروا ظهره بالمهر والشروة والطلبات .. فمو معقول وحدة مثل رباب تيي تاخذ مكانها ؟؟ مستحيل .



في بيت بو محمد

رقية قاعدة بالحوش بهالحر تبجي .....

محمد: امبيه رقية شفيج
رقية: مافيني شي
محمد: لا تبجين . اهي قالت بتزورنا
رقية: منهي
محمد: رباب
رقية: اي ان شاء الله ...
سعد: احسن خلها تبجي امي تقول رقية بتخيس اهني
رقية: (( تفصخ اللي بريلها وتحذف فيه سعد )) عما بعينك انت واللي قال هالحجي خاست بطونكم
محمد: لا تبجين مالج شغل فيه .
رقية: حمودي حبيبي واللي يسلمك خلني بروحي اللي فيني مكفيني

شوي ولا صوت الهام شايل تنادي رقية

رقية: نعم خير شفيج ؟؟ ينيتي ؟؟ قاعدة تطلقين ؟؟ شالصراخ ؟؟
الهام: لانج صمخة .. شفيج ما تسمعين؟؟
رقية: لا ما اسمع شبغيتي
الهام: روحي غيري لجوري حفاظتها
رقية: نعم نعم نعمممممممممممممممممممم ليش ان شاء الله اغير حفاظتها ونتي شنو مهنتج في الحياة ؟؟
الهام: قومي غيري لها وبلا حجي زايد مهنتي اتحملج واتحمل طولة لسانج
رقية: اها اوكي دام ان مهنتج تتحمليني ماني مغيرتلها ويالله لا تناديني عندي شغل
الهام: لا بتغيرين لها وريلج فوق رقبتج
رقية: اي يصير خير . (( ومشت خلت الهام ))
الهام: اييييي عيونج حمر يالعانس قاعده تبجين على حبيب القلب لا قاطج ولا داري عنج .... من عذره ولا منو بياخذ وحدة تفرفر وراه
رقية: شوفي يا الهام ... الطبجة الاولى راحت على سعيود ولدج وشكلها الثانية بتتقطع عليج


وجان تهجم رقية على الهام .. وهات يا طق .. طقتها طقق سنة بساعه .. والهام تصرخ من قمة راسها ... اي اكيد بتطقها البنت انفجرت على تعليقات الهام الوقحة وقلة ادبها ... ما فجت رقية ايدها من الهام الا لما دخل ابوهم على صوت الصراخ اللي حتى الخدامة ما قربت صوب الهوشة احمد تم يضحك على شكل امه واهي تنطق ومحمد يفاكك وسعد يطق برقية وجوري تبجي .

رقية: والله وربي بسماه محد يفكج مني يا بنت اللذينا (( تمجع بشعرها حيل ))
الهام: هديني اقولج هديني والله لاعلمج يا بنت ......
رقية: بنت ... انتي يا اللي موم تربية ... الشرهة مو عليج .. الشرهة على ابوي يوم ناسب اهلج وخذاج منهم ولا انتي كفو تاخذين مكان امي ((( تكفخها وتمجعها ))

بو محمد : @@ شصاير . رقيوووووووووو ووجعة قومي يا بنت ال ... قومي شقاعده تسوين

يفاككهم من بعض

رقية: هدني يبه هدني عليها (( تصارخ ))
بو محمد: (( يطق رقية طراق )) الله يلعنج اسكتي ولا كلمة لا ادوس ببطنج
رقية: (( طالعت ابوها وعينها مغورقة )) تطقني عشان وحدة مثل هذي
الهام: (( تبجي )) هذي مرت ابوج يالمو متربية
رقية: صحححححححححححح ...... ونتو تستاهلون بعض ...
بو محمد: (( رفع ايده بيطقها ))
رقية: طقني يبه طق .. انا شباقي فيني اصلا .. طقني واذبحني .. انا كل يوم اموت مليون مرة ..... كانت امي الله يرحمها اهي اللي مصبرتنا على طريقة تعاملك معانا ومهونة علينا ظيم الدنيا . الحين شنو اللي مهون علينا .. انته من صوب وهذي من صوب والدنيا من صوب .. طق .. طقني لما تموتني عشان افتك وارتاح انا عمري 23 بس همومي هموم الدهر كله ...بس قبل لا تكمل علي ... حبيت اقولك ان سبب طقي حق مرتك المصون انها غلطت علي وعلى شرفي .. واذا انته مو عارف تردها عن الشي الوحيد الباقي لنا انا اردها ... مو انا اللي ينقاللي الكلام اللي قالته
بو محمد: شنو قالت
رقية: اسالها
بو محمد: قلت لج شنو قالت (( يصارخ ))
رقية: كنت ابجي على رباب وشلون مكانها خالي نادتني اغسل جوري قلت لها ما راح اغسلها بيدي شغل .. قالت لي عيونج حمر يالعانس قاعده تبجين على حبيب القلب تبجين وراه قاطج ولا يدري عنج لانج تفرفرين وراه ... انا بعرف منو هذا ؟؟؟ تتهمني بشرفي وانا ليل ونهار اكرف واغسل وان جان عالتلفون كاهو مقطوط قط وان جان عالدار عيالها ليل ونهار يدعمون علينا وكاهم اسالهم وان جان عالفرع لا عدت اطلع ولا اشوف السكة وانا الحمدلله اصلي واخاف ربي لو ابي هالشغلة جان مو هذا حالي .... جلدي مقشف وناشف ... هاملة نفسي .... لو ما النصيب جان محد طق باب بيتنا وخطب ربوبة ... انا من اليوم يبه واللي تبون تسوونه سووه لاني مشتغلة في هالبيت ولاني كارفة ولاني مسوية شي واللي تبونه سووه . بتطقوني بتكفخوني بتجوعوني اللي اهو ولا اني انهان بزود ...



بو محمد: رقية روحي دارج ..... ولي كلام معاج بعدين


طبعا اول مرة بو محمد يسمع رقية ورقية ما قصرت طلعت كل اللي بقلبها على الهام وعلى ابوها وعلى حالها في هالبيت ... راحت رقية غرفتها شوي ولا تسمع صوت الهام تصرخ من قمة راسها ... وتسمع صوت تلشط الخيزرانة وهات يا طق فيها ... احمد ومحمد وجوري والخدامة دخلوا عندها الدار الا سعد ما تدري وين راح ..


في بيت ام شهاب المغرب

ام جراح: ها يا رباب شلونج ؟؟؟ شخبارج
رباب: بخير خالتي الحمدلله
انتصار: ها خالة ام جراح شرايج بثوب ربوبة بالعرس ؟
ام جراح: يجنن مثلها
انتصار: انا وربوبة نقيناه
خلود : رباب ونتي ما عندج راي مخلية انتصار تنقيه
انتصار: انا معاها نقيناه مو انا بروحي شفيج انتي
ام جراح: خلود الثوب يجنن هي نقته ولا انتصار
خلود : ما قلت شي شفيكم كليتوني ..
غالية: عاد انا شفته عادي .. يعني ثوبي بعرسي ماعتقد في مثله تذكرونه جبته من الخبر خيال الكل سالني عنه وليمكم رفيجاتي يتحجون فيه
انتصار:كان حلو بس اوفر
غالية: لام يكون اوفر عشان يكون مميز ويتمي عن اي موديل عادي ولا انتي شرايج رباب
رباب: ها ... مادري
انتصار: وي ربوبة مو معانا كلش
خلود : اللي واخد عئلك
رباب: : ) لا والل هافكر باختي
انتصار: اي خلودة لا تشوفين رقية تهبل سوالفها وقعدتها والله ما تملين منها
خلود: رقية !! اختج اسمها رقية !!
غالية: اسم غريب
انتصار: ليش غريب ؟؟
خلود: مادري ما توقع في احد من جماعتنا بهالاسم
رباب: امي الله يرحمها سمتنا هالاسم
خلود: اي الله يرحمها ان شاء الله
غالية: بس غريب وبصراحة يضحك من غير زعل


انتصار حست بتصرفات غالية السخيفة .. واستهزاءها فحبت انها تردها لها خاصة انها تعرف ان رباب ما عندها لسان وما راح تقدر على غالية

انتصار: اي عادي ليش ما يسمون يعني امج م واسمها صبيحة ؟
خلود : ههههههههههههههههههههه اي صح صح وخالتج اسمها فليحة
غالية : اي وشفيها اسامي قديمة وحريم كبار بس م وبنت صغيرة اسمها رقية (( اهني غالية فورت شلون انتصار تحرجها ))
رباب: كلهم الخير والبركة وكل واحد وذوقه ... عاد اختي تحب اسمها وما تفكر تغيره ابدا واحنا خلاص تعودنا عليها .. عن اذنكم
انتصار: وين
رباب: شهاب ياشر لي
انتصار: اي اوكي
غالية: شعندكم تتساسرون
انتصار: ولا شي

رباب: هلا شهاب ...
شهاب: يا حلاتج . .يالخايسة تهبلين اشتقت لج
رباب: ههههههههههه اوكي
شهاب: شنو اوكي ؟؟ تعالي فوق
رباب: لا فشلة والرياييل بالديوانية
شهاب: ما علي منهم .. ما يخلصون هالشياب شكلهم بيسهرون عندنا وانا خلاص ماني قادر اشتقت لج اقولج .. انتي ما اشتقتيلي ؟
رباب: شهاب !!
شهاب: يا عيون شهاب وقلب شهاب تعالي تعالي ...

شوي ولا ام جراح تجكه

ام جراح: ها يا شهاب ... تعالي يمه ادخل ما شفناك
شهاب: ولين جكتني ام شهاب زين لج الحين .. هلا يمه ام جراح شلونك خالة
ام جراح : هلا فيج تعال يمه
شهاب: درب درب
تغطت غالية ودخل شهاب سلم على ام جراح
ام جراح: زين ما اخترت يمه زوجتك عسل
شهاب: تسلمين خالة . والنعم فيج والنعم بعمي بو محمد
ام جراح : ها مو تطول علينا نبي نشوف الصغير بسرعه تراك ابطيت علينا بالواج ولا تبطي بالخلفة
شهاب: الله كريم ان شاء الله .... شلون جراح بشري شلون اوضاعه هناك
ام جراح: لا بخير الحمدلله ... من فضل الله ...
شهاب: الحمدلله امانة ليه اتصل سلموا عليه وايد
ام جراح: يوصل يمه . وهو دوم يسال عنك وعن ماجد وبدر ...
شهاب: تسال عنه العافية .. يالله خالة تامرين بشي
ام جراح : ابيك سالم ...
ام شهاب: يمه ترا تجوري رباب ما ينفتح واهي ما تعرف تبطله ولا تحط الرقم السري بطله لها واللي يعافيك (( وغمزت حق ولدها ))
شهاب: ان شاء الله كاني رايح . ...

اهني رباب طقتها البوهة واستغربت .. لان اهي لا بطلت تجوري ولا سوت شي والتجوري مالها في بيت ابوها .... فليش ام شهاب جذي قالت


وغالية النسرة اهني بسرعه استوعبت ... اذا رباب مساع تقولها التجوري مالي في بيت ابوي .. شلون الحين عمتها تقول عكس هالكلام ؟؟؟ اي اكيد رباب وعمتها خاشين عليها وما يبونها تدري او تشوف ... واهني غالية حطت في بالها ان رباب خبيثة وتلف وتدور ...


لكن اللي لا غالية ولا رباب يعرفونه ... ان ام شهاب ما شاء الله عليها مرة فطينة وتفكر وتعرف وبسرعه تستوعب الامور وتحللها ... اي شافت ان رباب قامت حق شهاب ... وان شهاب ما طلع م نبين الرياييل بهالحزة وناداها الا ان يبيها ... وما شاء الله على ام شهاب بفطنتها اهي تدري ان شباب وتوه متزوج وتوه داخل دنيا فاكيد وده بمرته .. عشان جذي مهدت الطريج حق ولدها ان يصعد عشان محد يفكر بذاك الفكر اذا نادا رباب تصعد له فوق ....


شوي ولا شهاب منادي رباب .... اهني رباب انحرجت وتخزبقت خافت الناس تتحجى عليها فسوت عمرها ما تسمع ... ولا احد فيهم نبهها لانهم حسوا بتوترها ....

شوي ولا تيي الخدامة ..
لجمي : ماما بابا شهاب قول هوا ما يئرف رقم مال تجوري
رباب: اوكي اكتبه لج بورقة
ام شهاب: لا يمه . من صجج هذول لو شنو قاعدين عندنا سنين ما يتامنون روحي قوليله شفيج ..

رباب: ان شاء الله خالتي ..



صعدت رباب واول ما دخلت الغرفة

رباب: نعم .. شهاب ؟؟ شهاب؟؟؟؟؟ وينك

شهاب: (( طلع لها من ورا الباب وخمطها ))) طحت عليج
رباب: واي خرعتني بسم الله الرحمن الرحيم
شهاب: سمعيني بسالج سؤال
رباب: شنو
شهاب: انتي منو قالج تصيرين حلوة
رباب: وي شهاب فشلة خالتي ام جراح تحت شتقول
شهاب: بتقول ان رباب قاعده تقول الرقم السري مال التجوري اللي مو موجود اهني ... شفتي ام شلون شيطانة
رباب: استح ههههههه امبيه خالتي شلون عرفت
شهاب: يا يبه قلت الام شفيج حست فيني وبشوقي حق مرتي اللي ما استانست معاها
رباب: بس الناس يروحون
شهاب: لا اسف ما اقدر ما اتحمل ما ابي
رباب: : ( شلون الحين شيقولون عني ؟؟
شهاب: خل يقولون اللي يقولون
رباب: لا شهاب وخر عني فشلة والله
شهاب: يا يبه انا لو اقدر اتحمل لي هالليل وليه عقب ما الناس تسري واتعشى ويا ابوي جان صبرت بس جد ماني قادر اصبر ... انا ابيج 24 ساعه معاي وعندي ابي اقفل باب الغرفة وما ابطله الا لما اشبع
رباب: وان شاء الله متى بتشبع ؟؟ واي حسرتي
شهاب: بعد 10 بعد اسبوعين ويمكن مو اكيد
رباب: واي شهاب شناوي علي
شهاب: ليش ؟؟ اذيتج امس
رباب: ها ....
شهاب: اذيتج ؟؟
رباب: لا يالله خلني شهاب ...
شهاب: يبه ماني مخليج لا تخليني الم اغراضج واغراضي ونروح فندق
رباب: لا شهاب الله يخليك والله فشلة شيقولون عني
شهاب: يا يبه خل يقولون اللي يقولون انتي مرتي وحلالي وانا ابيج الحين شلون ؟؟ بعدين انتي اللي قاعده تطولينها ... ماني مسوي شي
رباب: اكيد ؟
شهاب: اكيد



وعقب ساعه .. راحت ام جراح ... وتموا البنات وغالية وام شهاب بالصالة

غالية: كل هذا رقم سري
انتصار: رقم سري شنو
ام شهاب: بعد رقم سري ولا مو رقم سري مرة ويا ريلها وتوهم متزوجين عادي تذكرين انتي وماجد
غالية: ولا الله عمتي انا ولا مرة خليت ضيوفي وخمرت مع ماجد
ام شهاب: اي يمه لانج سافرتي ورحتي فندق يعني شبعتوا . اهي خلف الله عليها
غالية: اي صح اهي مسكينة


ام شهاب ما عجبها طريقة غالية بالكلام ولا تصرفاتها .. يعني البنت توها ما صارلها وايد وهذي ياية تغثها وتقط عليها كلام .. بعدين ام شهاب مرة عاقلة وواعية وتعرف الله ما تبي هالنوعية من التصرفات تصير في بيتها وبين الجناين ... اهي تتمنى حالها حال اي ام سنعه الاستقرار بين عيالها وبين حريمهم وعيالهم وبناتها

خلود : انا يوعانة يمه ماكو عشا ...
ام شهاب: الا في شنو تبون اسويلكم
شهاب: احم احم

تغطت غالية
ام شهاب: هلا يمه ...
شهاب: هلا فيج ... ها وين خالتي ما جراح .
ام شهاب: راحت ....
شهاب : ما طولت
انتصار: ها بشر شهوب صلحته
شهاب: شنواهوا
غالية : (( باستهزاء )) التجوري
شهاب: اي صلحته ...عابلنا فيه مني مناك .. دخلنا جم مرة ارقام غلط لين صابت معانا
ام شهاب: صج !!!
شهاب: (( يبتسم ابتسامة شطانة )) اي صج
ام شهاب: يا مالك العافية يا شهاب ههههههههههههههههههههههههههههههههههههههههه
شهاب: ها ام شهاب طلعتي منتي هينة مو اقولج شيطانة ؟؟
ام شهاب: هههههههههههههههههههههههههههههههههههههه
خلود: شفيكم تضحكون ضحكونا معاكم
غالية: لا خليهم اصلا من توج شهاب والوضع تغير
شهاب: اشوه اني توني متوج يا بنت خالي ... ولد ويتغشمر مع امه فيها شي ليش تتليقفون انتو ؟؟؟؟
خلود: عشتو ... مو مشكلة مردي بعرف
شهاب: عاد الا هذي اللي اتحداكم تعرفون مو صح يمه
ام شهاب: اي صح ههههههههههههههههههههههههههههههههههههههه
شهاب: ها يمه امري شنو تبين تتعشين
ام شهاب: ما ابي شي .... عندي لك شور ..
شهاب: تدللي
ام شهاب: يا بعد عيني ... اخذ مرتك وروح طلعها عشها برة في مطعم مشيها عالبحر ....
خلود: واي شهاب يسلم عمرك خذني معاك
ام شهاب: انتي انثبري من طق طبله قلتي انا قبله رجال وبيروح مع مرته توهم بشهر العسل انتي وين
غالية: اي اي ودها الواجهة يمكن مو شايفتها من قبل وريها الدنيا

تضايق شهاب من كلام غالية وسخافتها

شهاب: اصلا انا ما توجتها الا انها بنت اصل وسنعه ومو راعية هالسوالف يعني انا شكثر استانست لما دريت انها بتشوف الدنيا معاي ... يعني هذا يزيد من قدرها ما يقلل

ام شهاب: شفيك يمه بنت خالك ما تقصد
قام شهاب من يم امه
شهاب: تقصد ولا ما تقصد الواحد لام يثمن كلامه قبل لا يقطه مثل السم على الاوادم

طلع شهاب من الصالة واهو منغث من طريقة غالية بالاستهزاء بس اهو في قرارة نفسه يدري انها ما قالت هالحجي الا لانها ميتة من القهر والحرة من مرته

غالية: واي عمتي شفيه ولدج ما يتحاجى وانا شقلت بالله
انتصار: اي ولو .. ما يصير تتكلمين على مرته جذي وبعدين رباب خوش بنية يعني مو عيب انها ما طلعت ولا راحت يعني مو شي انج تعايرينها فيه
غالية: وي وايد كبرتوا الموضوع
ام شهاب: لا كبر ولا شي يمه .. الحجي اصلا كله ماله داعي (( وقامت ام شهاب ))

اهني حست غالية ان الكل ضدها وتحسفت ليش قالت هالكلمة وتمت تتحلطم
انتصار: شوفي غالية نصيحة ... ماله داعي تتحجين وتقولين هالكلام جدم رباب ولا غيرها ... لان الغرور والتكبر مو حلو والواحد ما يتكبر على الناس اللي اقل منه وصدقيني اذا اهي اقل من مستوانا بالطلعات والروحات فانا اعتقد لو تعرفتي عليها عدل والله بتشوفين انها اعلى منا بطيبتها ... وايد طيبة فوق ما تتصورين


صعد شهاب حق رباب
شهاب: قومي بدلي
رباب: ليش ؟
شهاب: من غير ليش بدلي بنطلع
رباب: صج وين
شهاب: نتمشى
رباب : اوكي ...

بدلت رباب لبست عباتها و خذت جنطتها وطلعت .. كانت تهبل بمنتهى النعومة والرقة والسنع و الحشمة .... كانت كل لحظة تكبر بعين شهاب وشهاب يتعلق فيها واهما بالسيارة

شهاب: ها وين مشتهية تتعشين
رباب: مادري كيفك .. اصلا انا مو يوعانة
شهاب: قولي يا يبه لا تقعدين تستحين ومادري شنو خلاص انا ريلج ونتي مرتي تعودي علي
رباب: ان شاء الله
شهاب: يالله وين
رباب: __ سكتت )
شهاب: شفيج سكتي
رباب: بصراحة !!
شهاب: اي
رباب:انا ولا مرة تعشيت برة مادري شنو اسامي المطاعم
شهاب: ولا مرة ولا مرة ؟؟
رباب: ولا مرة ..
شهاب: اها ... حلو
رباب: فانته وين تبينا نروح عادي
شهاب: (( مسك ايدها )) فديتج
رباب: ( (ابتسمت ))
شهاب: انين سولفيلي عن نفسج عن عمي بو محمد وين تروحون شنو روتينكم اليومي وين يطلعكم مع منو تروحون وتيون .. منو رفيجاتج
رباب: ههههههههههههه
شهاب: شفيج تضحكين شنو يضحك
رباب: على اللي قلته
شهاب: كلامي ما يضحك
رباب: امبلى بالنسبة لي يضحك اولا انا ماعندي رفيجات رفيجتي اختي وبس وعلى سالفة وين تروحون وين تيون احنا ما نروح ولا نيي الا اللهم كل اربع خمس شهور واحيانا ستة نروح السوق نشتري الللي ناقصنا يا مع مرت ابوي او مع خالتي وبسسس
شهاب: انزين شنو روتينج اليومي
رباب: اوقل بس ما تضحك
شهاب: ليش اضحك رباب انا ريلج وابيج ومتقبلج مثل ما انتي
رباب: لا مو عن شهاب بس ترا احنا يمكن مافي مثلنا ..
شهاب: وشدراج ماكو مثلكم
رباب: لان لما نزور بيت خوالي او نشوف اهل مرت ابوي ما نشوف احد مثلنا و احنا الحمدلله امي الله يرحمها وابوي مربينا احسن تربية واحنا طالعين على امي مو نوعنا نتمرد او نتطلب عشان جذي راضيين بعيشة بيت ابوي
شهاب: شلون
رباب: ممممممم يعني احنا يومنا كله شغل في البيت احنا اللي نغسل ونكوي ونسبح ونطبخ وندرس وننوم ونخم ونعين وكل شي كل شي
شهاب: اوف .. ومرت ابوج
رباب: ممممممم
شهاب: ما تسوي شي صح
رباب: ها لا احيانا تعاونا
شهاب: اخي هبعد عمري ربوبة حبيبتي .... ما توقعت هذا كله
رباب: عادي الحمدلله على كل حال ....
شهاب: ان شاء الله حياتنا مع بعض تعوضج عن كل اللي فاتج ونعيش انا وياج مرتاحين
رباب: ان شاء الله
شهاب: شوفي انا اليوم عازمج على مطعم لبناني ... ووعد مني كل يوم نروح لنا مطعم شكل لين نخلص كل المطاعم اللي بالكويت
رباب: اولله اولله نصير متان
شهاب: لا لا .. ناكل شوية اوكي
رباب: ههههههههههههه اوكي

 

[so_what]

يسلمووو على البارت ، ويع غاليه ما تنبلع ، كملي بلييز

 

[6amni bs]

رد : ^^^^عدت بقصتي الثانية (( بنات بو محمد في مهب الريح )) ^^^^

يعطيج العافيه
كملي

 

[fato_kw]

واخييرا ردت القصه :>

اول شي الحمدلله ان ضروفج عدت وقدرتي تدشين تكملين لنا البارتات
وماتقصرين صرااحه صج صج ماقصرتي

وثاني شي البارتات روووووووووووووووووووعه
ورباب ماشاءالله ربي عوضها كل خير
وياحلو خالتها عسل والله ولا مووزة(اللي بمسلسل زوارة خميس)هههههههههه
والبنات ما شاءالله انتصار واايد متعاطفه معاها وحقانيه توقف ما الشي الصح
الله يستر من غاليه بس ماراح تقدر تسوي شي لان شهاب وام شهاب وانتصار واقفين مع رباب فديتها وفديت طيبتها
اممم رقيه الله يعيينها ويستر عليها خطو جريئة وحلوة منها انها واجهه ابوها وقالت اللي بقلبها وبردت قلبي بطقها حق خالتها

ووو اممممممممم مادري بعد شنو اقول

بس جد مشكوورة

وناطره البارت اليديد

waiting

 

[MaFaZ]

مر يومين ورباب حدها مشتاقة حق اختها وحق البيت ولوية اليهال ... قعدت العصر تفكر والحيرة بويهها ماتدري شتسوي .. مستحية تقول حق شهاب وبنفس الوقت الشوق ماكل قلبها ... والمشكلة كل ما تتصل على رقية تلفونها مغلق ...

طلع شهاب من الحمام عزكم الله ينشف شعره

شهاب: ها ربوبة شفيج
رباب: مافيني شي .. نعيما
شهاب: ينعم بحالج .. ها قولي اليوم وين تبينا نروح
رباب: مممم مادري
شهاب: قولي حبيبتي شفيج ...
رباب: ميخالف توديني بيت ابوي
شهاب: ليش ؟؟ صاير شي ؟؟
رباب: لا لا مو صاير شي بس مشتاقتلهم
شهاب: ما صارلج طالعه منهم الا يومين
رباب: اي بس ...
شهاب: اوكي خلاص من غير بس ولا شي نمرهم
رباب: صجج
شهاب: اي صج .. قومي بدلي عشان يمدينا عقب ما نخلص منهم نطلع نروح سينما
رباب: شنو سينما اللللللللله
شهاب: هههههههههههههههه حبيبتي والله لا تقولين مو رايحة ولا مرة (( قاعد يمشط شعره ))
رباب: اي
شهاب: خلاص دخليها وياي يا حبيبتي انتي .... رباب انا كل يوم احبج نتفة


بدلت رباب وطلعت اهي وشهاب .... واول ما وصلت بيتهم استغربت ان البيت كان صخة مافيه حس .... ولا صوت اليهال يلعبون بالحوش ....

رباب: هدوء
شهاب: ليش غريبة ؟؟
رباب: لا مو غريبة بس مو عادة اليهال هدوء هالحزة ....

طقت الباب وبطلها محمد
محمد: (( يلم رباب )) ربااااااااااااااااااااااااب ... اختي
رباب: هلا حبيبي حمودي شلونك شخبارك
محمد: ربووووووووب لا تروحين بعد خلج معانا
رباب: واي حبيبي .... ان شاء الله كل اللي تبيه بيصير بس لا تبجي حبيبي سلم على شهاب
محمد: السلام عليكم بو احمد
شهاب: هلا والله هلا فيك يا بو جاسم

محمد : درب درب ... رباب وشهاب يو

شهاب: يحليله والله رجال محمد
رباب: اي فديته اخوي ريال البيت من عقب ابوي

دخلت رباب البيت والوضع ما يطمن ...
طلع بو محمد من غرفته

رباب: يبه شلونك شخبارك (( باست راسه وباسته ))
شهاب: عمي بو محمد شلونك ؟؟؟ عساك بخير .
بو محمد : هلا فيكم ... بخير ما قصرت تفضلوا .... ها بنتي شلونج ؟؟ وشلونك شهاب
شهاب: بخير عمي
بو محمد: دوم دوم ان شاءالله ... الا اقولك مسفر امس شفيه وجهه مو زود
شهاب: اييييي والله مادري شقولك يا عمي .... جماعته مخونين فيه وماكلين عليه فلوس
بو محمد: افا ... منو اخوانه ؟؟ خبري باخوانه مو اهني
شهاب: لا مو اخوانه ... عيال عمه ...
بو محمد: لا حول ولا قوة الا بالله
رباب: انا استاذنك يبه بشوف اختي


دخلت رباب على رقية الغرفة ولا نايمة
رباب: رقية قومي .. شفيج
رقية: (( قامت من النوم ولمت رباب )) ربااااااااااااااااااب حبيبتي انتي من متى اهني ما حسيت فيج
رباب: توني ياية ... شلونج شخبارج شصاير مو عادتج تنامين الحين ؟؟ والبيت هدوء وين الهامو
رقية: شدراني عنها عمى بعينها
رباب: شصاير صاير شي ؟؟
رقية: بلعنتها .... انتي شلونج عمري ... شلون الزواج
رباب: تمام بخير وناسة .. امس طلعنا واليوم بنطلع بعد ... تعشينا وتمشينا واليوم بيوديني السينما
رقية: واي وناسة يا بختج الفال لي ربوب ... حلم حياتي اروح السينما ...
رباب: ان شاء الله يارب .. بيت خالتي ام شهاب وناسة البنات ما يقصرون ... وخالتي طيبة وايد تعاملني مثل انتصار وخلود ...
رقية: وشلون مرت ماجد وياج ؟؟
رباب: زينة بس احس مهي بالعتني اخاف انها حاس ةاني خذيت مكانها
رقية: وييي طاع هذي ... من اولها خو خل تنطر شوي وتشوف مايتج
رباب: مادري ... يمكن يتهيأ لي بس هذا اللي حسيته
رقية: شوفي ربوب حقريها خل تولي ... صدقيني وبتفتكين من شرها
رباب: ان شاء الله .. انزين قوليلي شصاير
رقية: واي .. شقولج شسولف لج
رباب: واي رقية تحجي شصاير .... وايو الله قلبي حاس ان صاير شي اللي ما تحملت وقلت حق شهاي اييبني
رقية: طقيتها
رباب: شنو ههههههههههههههههههههههههههههههههههههههههههههههههههههههههههههههههههههههههههههههههههههههههههههههههه امبيه رقية ههههههههههههههههههههههههههههههههههههههههههههههههه حلفي
رقية: والله ..
رباب: وشفيج مغلدمة مو هذا حلم حياتج ؟؟ انج تطقينها ؟؟؟
رقية: اي بس ابوي يا وطقني
رباب: امبيه شنو ؟؟ واي ليش يا يبه الله يهداه ابوي شفيه انين ليش طقيتيها وشنو صار
رقية: ماكو ما تعرفين حقارتها ونذالتها .... قاعدة فارشة عمرها وانا بنص شغل البيت نادتني تبيني اغسل جوري .... قلت لها مابي ... جان تقوم وتقط علي كلام والله شنو انتي عانس واللي تفترين وراه ما يبيج لان محد ياخذ بنية مثلج
رباب: حقيرة ... وايد تعدت حدودها .... حسبي الله عليها الله يرد لج حوبتج حبيبتي ولا تزعلين
رقية: بيني وبينج ابوي ما قصر فيها بعد طقها طقققققققققق غسل شراعها
رباب: هههههههههههه بعد عرمي ابوي زين يسوي فيها حل فيها انزين ليش الحين انتي علانة ومكتئبة
رقية: لان بس خلاص والله مافيني اتحمل بعد والله .... قبل انتي عندي الحين منو يصبرني والله احس الدنيا مسكرة فيني ماني قادرة اتاقلم مع بعدج عني ....
رباب: والله يا رقية وانا بعد ... لا عالاكل ولا عالقعدة ولا عالقومة كله انطرج تدخلين تقعدين يمي .... جان زين يخطبونج حق بدر وتيين تسكنين معانا في البيت
رقية: يمعوده خليها على الله
رباب: ام صار شي على زيد ؟؟ ما كلمج .... ما قالج شي
رقية: لا خلاص لو الحين اييني يقوللي امي تحبج وتبيج وبتيي تخطبج ماني راضية خلاص ... اهو لو يبيني جان زسوا شي مو فص ملج وذاب .....
رباب: ولا تتضايقين يا قلبي ....

انطق الباب
رقية: منو ؟؟؟؟
محمد: رباب .... شهاب يقول يالله ....
رقية: واي ربوب لا تروحين توج ياية
رباب: ما عليه رقية راح احاول ايي باجر او عقبه بالكثير
رقية: اخاف ريلج ما يرضى
رباب: راح احاول . شسوي رقية لازم اروح والله ما ودي اروح ودي انام عندكم
رقية: جان زين ...
رباب: انين بطلي جهازج خل اكلمج
رقية: انا استحيت ادق عليج ربوب والله خفت تكونين مشغولة او مع ريلج
رباب: ما عليه رقية انا ادق عليج كل ما لقيت لي فجة ادق عليج اوكي
رقية: اوكي
رباب: ولا تتضايقين صدقيني الله بيفرجها .... امنتج الله يا اختي وديري بالج على نفسج وعلى اليهال وما عليج منها اوكي
رقية: اوكي حبيبتي سلمي على انتصار وخلود ووخالتي ام شهاب اوكي
رباب: اوكي حبيبتي ... مع السلامة
رقية: مع السلامة


طلعت رباب من بيت ابوها وقلبها معلق مع اختها اللي كان ويهها اصفر وتعبان ومع اخوانها الصغار أشتاقت حق فراشها حق اللوية حق ازعاج اليهال حق تدريسهم ... حق الصغيرة وشلون كانت تنام بحضنها

شهاب لاحظ ان ويه رباب تغير لما طلعت من بيت ابوها

شهاب: ها ربوبة شلون اخوانج ان شاء الله بخير
رباب: الحمدلله بخير
شهاب: عيل شفيج جذي تغيرتي مرة وحدة ولا جنج رباب اللي دشت عليهم توها
رباب: شسوي يا شهاب ما تعودت اخليهم
شهاب: افا وانا ما تبيني
رباب: لا ما قلت جذي ... بس
شهاب: اختج جم عمرها ؟؟؟
رباب: اصغر مني بسنة
شهاب: اها .... يالله لا تحاتينهم .. ان شاء الله اييلها نصيب ين وتتزوج وترتاح
رباب: ان شاء الله ....يارب مع اني ماعتقد
شهاب: ليش ؟؟؟ شالحجي
رباب: لا مو قصدي بس اختي دايما في البيت ما تطلع وان يو حريم حق مرت ابوي اهي ما تجابلهم عشان جذي محد يشوفها .. يعني بالعربي مدفونة
شهاب: اذا الله كاتب لها نصيب بتاخذه صدقيني ...
رباب: صح كلامك ... الحمدلله والشكر على كل حال ... بس انا من خوفي ومحتاتي عليها بس
شهاب: ان شاء الله ماكو الا كل خير لا تحاتين ..
رباب: ان شاء الله
شهاب: انا قومتج عشان انا حاجز سينما وخفت لا يبدي الفيلم واحنا ما وصلنا ...
رباب: مو مشكلة

راحوا السينما وبعدها طلعوا وتعشوا واستانسوا لكن رباب نص الوقت كانت تفكر باختها وبحالة اختها يعني مو معقولة لانها توجت حالتها تنعفس . رقية كانت بحاجة رباب وبنفس الوقت ما كانت تقدر تسوي شي ولا تبين حق شهاب .... لانها لحد الحين ما تدري عن شهاب شي

مرت الايام على رباب واهي نص مستانسة كل شي تاكله تتشهاه حق اختها كل شي تسويه تتمنى رقية وياها .... وكل ما لقت نفسها فاضية دقت عليها ولا دزت لها مسج تتطمن على احوال البيت وتتطمن عليها ..

وفي يوم نادت ام شهاب رباب


ام شهاب: ها ربوبة حبيبتي شلونج ؟؟؟ ان شاء الله مرتاحة ؟
رباب: الحمدلله خالة مرتاحة ....
ام شهاب: الحمدلله الحمدلله انزين قوليلي شلون ولدي معاج ؟؟ انشاء الله مو مقصر بشي ...
رباب: الحمدلله خالتي ما من قصور ... انتي ان شاء الله مرتاحة مني
ام شهاب: يا بعد عمري انتي ...اكيد مرتاحة اكو احد تكون ربوبة عنده وما يرتاح ؟؟شلون اهلج ؟؟ ان شاء الله طيبين
رباب: الحمدلله بخير .... اختي رقية كل مااكلمها تسال عنج وعن البنات
ام شهاب: تسال عنها العافية ما قصرت .. وام محمد شلونها
رباب: بخير الحمدلله كلهم بخير
ام شهاب: يا عساكم دوم ان شاء الله ... والله يا بنتي مادري شلون ابدي معاج الموضوع واكلمج
رباب: خير خالتي صاير شي
ام شهاب: مو صاير الا كل خير ان شاء الله بس احنا كنا ناويين نخطب حق بدر بنت الحلال .. هو من مان يحن يبي مرة ...
رباب: على خير ان شاء الله الله يوفقه ويرزقه ببنت الحلال
ام شهاب: ان شاء الله عاد انا فكرت وقلت ماعتقد ان هو واحنا بنلاقي احسن من رقية
رباب: اي رقية
ام شهاب: اختج
رباب: صج خالتي ؟؟؟ واي جان زين اختي طيبة وحنونة وهبة ريح وانا من اول ما تزوجت شهاب وانا ادعيلها انها تتزوج واحد مثل شهاب والله يرزقها بخالة مثل امي الله يرحمها مثلج خالتي
ام شهاب: يا بعد عمري يا رباب والله انتي اللي طيبة وعلى نياتج ....واخلاقج عالية ..... انا كلمت عمج بو شهاب ان ما يكلم ابوج الين ما نعرف راي اختج اخاف لها راي ثاني

رباب: لا خالتي وين بتلاقي اختي مثلكم ولا مثل طيبتكم ....
ام شهاب : ما عليه يمه هم ساليها هذا حق من حقوها
رباب: ان شاء الله خالتي ... راح اسالها
ام شهاب: خلاص انا ناطرة منج رد .... عشان نحدد وقت العرس مبجر لان انتصار جايين لها خطاب وهم يبون العرس مبجر ...
رباب: صجج وناسة ...
ام شهاب: اي يا امج .... عاد جيرانكم
رباب : صج منو خالتي
ام شهاب: ام عيد
رباب: شنو ؟؟؟؟ حق منو ؟
ام شهاب: حق زيد هو في غيره ........ شفيج انعفستي يمه .... فيهم شي ؟؟ قولي يا امج هم جيرانكم وانتوا دارى فيهم ... وانتصار بحسبة اختج اذا في شي نورينا من الحين

رباب: لا حشى خالتي انا مالي شغل فيهم واهم ما عليهم .... واحنا مالنا اختلاط الا بام عيد .... صديقة مرت ابوي
ام شهاب: اييي ..... هي تقول وتمدح فيكم والله انتي واختج وبمرت ابوج
رباب: جزاها الله خير ما قصرت خالتي ام عيد .... الله يهني انتصار ان شاء الله وان شاء الله يكون زوج صالح لها .. انتصار بحسبة رقية
ام شهاب: يا قلبي ما قصرتي ان شاء الله يارب نفرج باختج وفيها .......
رباب: ان شاء الله ...

 

[only pink]

رد : ^^^^عدت بقصتي الثانية (( بنات بو محمد في مهب الريح )) ^^^^

وااي كملتيها...
اهلين فيج...وثانكس انج قدرتي تكملينها رغم الظروف
والبارتات وااايد حلوة
تستهال رقية ..بدر مادري احسن انه احسن من زيد بوااااااايد
ورباب وشهاب عسى الله لا يغير عليهم
وناااطرين ...

 

[Miss.blue berry]

رد : ^^^^عدت بقصتي الثانية (( بنات بو محمد في مهب الريح )) ^^^^

ثيــنكيو على البارت حبيبتي ~~
اممم و الله يوفق رقيه مع بدر انشالله
و هذا زيد صج صج ما يستاهلها و مو كفو ~~

 

[هنادي 2010]

رد : ^^^^عدت بقصتي الثانية (( بنات بو محمد في مهب الريح )) ^^^^

يعطيج العاافيييه والبارت روووووعه
وكملي

 

[miss disaster]

واي امبيه استانست حق رقيه وهم كسرت خاطري

يسلمو ناطرين الياي

 

[سارووونه22]

واااااااااي مشكووورة بعد جبدي انج نزلتي لنه بارتين

 

[عشيقة ريلها]

كملي كملي معاااااااااااااج

 

[so_what]

يسلموو على البارت بليز كملي

 

[fato_kw]

رد : رد: ^^^^عدت بقصتي الثانية (( بنات بو محمد في مهب الريح )) ^^^^

وااااي حده عجييب البارت

كملي لو سمحتي

 

[Babya Doll]

رد : ^^^^عدت بقصتي الثانية (( بنات بو محمد في مهب الريح )) ^^^^

وااي اخيرا رديتيييي
تسلم ايدج حبيبتي على الرواية الروعة

 

[MaFaZ]

رد : ^^^^عدت بقصتي الثانية (( بنات بو محمد في مهب الريح )) ^^^^

احتارت رباب بعمرها شتقول شتخبص حق رقية ... معقولة يا زيد تنسى حبك حق رقية و بعد ما قالت لك عن كل شي وتوعدها تروح ولا ترد عليها ؟؟ ليش اذا ما تبيها قول وخلك ريال مو تروح وتختفي واخر شي تطلع خاطب ومنو حمات اختها يعني مردها السالفة بتنكشف .... بس عادي حسين اللي اهو ولد خالي سواها ليش يد الغريب ما يسويها ... احسن بعد خل يولي ... ام عيد ما كانت راح ترحم رقية ولا راح تدللها مثل ما خالتي مدللتني وان شاء الله بتدللها مع بدر ... واللي مبين ان بدر خووش صبي ... واكيد مثل شهاب ....


تفكير رباب اغلبه صح .... بس مو شرط يكون بدر يشابه اخوه صح ولا انا غلطانة ؟؟


المهم توكلت رباب على الله ومسكت التلفون ودقت على رقية

رباب: الو رقية
رقية: لا شريهان هههههههههههه ها ولج شلونج
رباب: بخير جبح ويه وتنكتين
رقية: انا ادري عنج .... يعني داقة علي منو بيرد
رباب: اي صح انا شفيني
رقية: شفيج مو على بعضج متلخبطة
رباب: ها شدراج ؟؟ شنو شايفة ويهي
رقية: لا من غير لا اشوف ويهج من طريقة كلامج مبين شفيج قولي طيحتي قلبي ببطني
رباب: اف واحنا شفينا كله خايفين ومتوترين وعلى اعصابنا
رقية: بعد عايشين مع الجيش الشعبي ابوج ومرته لازم نكون دايما في حالة تاهب
رباب: هههههههههههههههههههه يالخبلة .... اقولج تعاليلي
رقية: شنوووووووووووووووو هههههههههاي ضحكتيني شلون بييلج ان شاء الله
رباب: اكلم ابوي واخليه يقطج عندي
رقية: واي ربوب من صجج جان زين
رباب: خلاص خليني اكلمه وارد ادق عليج اوكي اي تعالي ان سالج انتي تبين تروحين قوليله لا البنات يحنون على رباب يبون يشوفوني انا مالي شغل
رقية: طاع هذي تعلمني شي اكيد جي بقوله
رباب: اوكي خلاص نطري مني الو
رقية: خلاص يالله باي
رباب: باي



دقت رباب على ابوها وترجته ان اييب رقية لهم وان البنات يحنون يبون يشوفونها ومن هالحجي لين وافق ..
رباب: الو قومي بسرعه يالهبلة بدلي
رقية: وافق !!
رباب: اي قومي بسرعه يالله لا يطنقر
رقية: اوكي اوكي بس نطري شلبس ؟؟؟؟؟
رباب: عباتج اللي شريتيها لما جهزت
رقية: اي صح اوكي خلاص يالله اشوفج هناك
رباب: اوكي انا بنطرج تحت بالصالة اوكي
رقية: اي حلو


راحت رقية بدلت وتعدلت وركبت مع ابوها لا حس ولا وكلمة ....لين وصلها يم بيت اهل رباب ... اتصلت على اختها سوولها درب ودخلت البيت ولا رباب باستقبالها

رباب: رقيوووووووو (( تلمها )))
رقية: ربوووب الله يخسج لج وحشة التلفون ما ينفع
ربا[: ما عليه ان شاءا لله تسكنين عندنا عن قريب
رقية: ليش قررتوا تاجرون دور حق ابوي ههههه
رباب: اشش سكتي . خالتي ياية
ام شهاب: هلا والله هلا باللي دخل علينا هلا ببنيتي رقية
رقية: السلام عليكم خالتي شلونج ؟؟
ام شهاب: (( تبوسها )) هلا فيج انتي شلونج وشلون ام محمد والعيال
رقية: كلنا بخير الحمدلله
ام شهاب : يا هلا برقية يا هلا باخت جنتي
رقية: هلا فيج خالتي (( مستحية ))
ام شهاب: تفضلي يمه شفيج واقفة ... تفضلي حياج الله ...
رقية: مشكورة
ام شهاب: ربوبة نادي البنات تراهم ما يدرون ان رقية وصلت
رباب: ان شاء الله خالتي
ام شهاب: لجمي تعالي

ساسرت ام شهاب لجمي ... وجابلت رقية تسولف معاها لين دخلت رباب ومعاها انتصار

انتصار: هلا هلا باللي جانا هلا برقية . عاش من شافج عليج حق ترا
رقية: هلا فيج شلونج ... شخبارج (( تبوسها ))) ليش ؟
انتصار: ليش ما تجينا ... خلاص ؟؟؟؟ نسيتينا خذينا اختج وخلاص ...
رقية: لا مو عن بس ....
ام شهاب: وي يا انتصار شفيج هم ما يطلعون ولا يروحون لا تتشرهين عليها امرها بيد ابوها .....
انتصار: يمه ما اتشره الا من غلاتهم وربي شاهد ....

طبعا اللي ما تعرفه رباب ولا رقية ان ام شهاب متفقة مع انتصار وبدر عشان يشوف رقية ... عشان جذي ضبطوا الموضوع .... لكنهم ناطرين اللحظة المناسبة واللحظة المناسبة يت لحد عندهم لما رباب قالت :

رباب: عن اذنكم بروح اييب تلفوني من غرفتي
ام شهاب: اخذي رقية وياج خل تشوف جناحج اهي ما شافته صح
رباب: صح خالتي ما شافته تيين رقية تشوفينه
رقية: مادري على راحتكم
انتصار: قومي قومي خنروح نشوفه ...
ام شهاب: يالله انا بقوم اروح الصالة الثانية

قامت ام شهاب بسرعه ونادت بدر
ام شهاب: يمه ... قوم بسرعه البنية بتمر الحين شوفها عدل مو تقول ما شفتها
بدر: فشلة يمه شتقول
ام شهاب: قوووووم وما عليك خلصنا
بدر: يالله


انتصار: وين امي راحت يالله قوموا شكلها دخلت ما راح ترد
رباب: يالله رقية قومي ...
رقية: يالله

واهما توهم بيمرون بالممر اللي يفصل بين الصالة والدري ... ولا بدر بيمر وصار وجها بوجه مع رقية طاحت عيونه بعيونها وبسرعه رقية نزلت عينها وردت ليه ورا يعني ردت دخلت الصالة

رقية: امبيه فشلة
انتصار: ويييييي بدر شفيه ما يدري ان احنا بنمر
رباب: واي اشوه ان حجابي على راسي اشوه
رقية: امبيه واي واي شلون جذي
انتصار: يالله ما عليه الحين ازفه لج : )


طبعا انتصار على ويهها ابتسامة كببيرة ... صعدوا فوق ... ودخلت رقية جناح اختها ... كان املكان يهبل بنظر رقية ... لان ولا عمرها شافت مثل جذي لكن بنفس الوقت ما تحجت جدام انتصار عشان لا تقول مو شايفين خير ...

رباب كانت مستانسة ان اختها قاعدة في بيتها ومكانها ... ورقية كانت مستانسة حق اختها وتمنت الله يرزقها بمثله ... وانتصار كانت مستانسة ان اخوها شاف رقية وكان احساسها ان الامور اوكي ......


انتصار: يالله عن اذنكم
رباب: وين رايحة
انتصار: خلكم شوي سولفوا افتكوا مني ... بروح الجمعية محتاجة شوية اغراض وان رجعت وخلود رادة برد اصعد لكم
رباب: اوكي بس مو تطولين
انتصار: ان شاء الله ورقية مو تروحين مبجر ترا ما تطلعين الا لما تتعشين معانا
رقية: ان شاء الله

طلعت انتصار .. سكرت رباب الباب وراها
رقية: واي ربوب عليج بالعافية مكانج يهبل والاثاث واي يزوغ القلب .. و خالتي والبنات شكلهم وايد طيبين
ربا[: اي الحمدلله وحتى شهاب مو مخليني محتاجة شي
رقية: يا عساه دوم ان شاء الله والنسرة غالية وينها
رباب: اشششش لا يسمعون
رقية: وي خل تولي
رباب: رقية سمعيني بقولج سالفة بس امانة عليج ولا تزعلين
رقية: شنو ؟ ابوي قايلج شي
رباب: لا لا
رقية: عيل خلاص قولي شنو بيزعلني يمعوده اهي تمت على سالفتج الدنيا بكبرها علاقتها مو اوكي يت عليج انتي قولي قولي
رباب: من جم يوم خالتي قالتلي سالفة كدرتني بكثر ما فرحتني يعني مادري اتكدر عليها ولا افرح
رقية : شنو
رباب: والله رقيو مادري شقولج شوفي انتصار يايين لها خطاب والسالفة شبه منتهية
رقية: اوكي وشنو اللي يزعل .. اهاااااااا عبالج يعني عشان اهي بتتزوج وانا بعدي بزعل لا شفيج ربوب انا مو جذي ونتي تدرين فيني بالعكس الله يهنيها
رباب: لا والله حشى خو ادري انج مو جذي الحمدلله بس مو اهني السالفة ... السالفة اللي تزعل ان انتصار خاطبينها بيت ام عيد حق زيد
رقية: شنو ( فزت من مككانها )) شتقولين
رباب: اي والله رقية امانة لا تضيقين خلقج والله خل يولي باللي ما يحفظه
رقية : وشلون عرفتي ان زيد
رباب: خالتي ام شهاب فاتحتني بموضوع يخصج ... بصراحة خالتي ام شهاب تبيج حق حماي بدر
رقية: انزين وبعدين
رباب: اي وقالت عشان نفرح فيها وفي انتصار واهني قالتلي
رقية: الواطي الحقير النذل ... اشوفه غط ولا درى عني ... هانت عليه السنين اللي بيننا هان عليه حبنا ... هان علي التشحطط اللي تشحططته بين الفرع والسكيك (( خنقتها العبرة

رباب: وييييييييييييي رقية لا تبجين يا قلبي خل يولي انتي قلتيها حقير
رقية: ياما تحجيت بس كنتي كله تدافعين عنه وتقولين حرام ولا ماتدرين شنو ظروفه وكاهي هذي ظروفه ..... اي مقيولة شيبي فيني بدون والدهر حاكني حك انا وين وانتصار وين ... مال وجمال و دلال

رباب: ونتي مو ناقصج شي جمال وادب واخلاق
رقية: والله يا رباب لو شنو تقولين ما راح اللي بقلبي يبرد
رباب: رقية يا عمري كل شي قسمة ونصيب ويمكن ام عيد اهي اللي خطبت له وحتى لو اهو رضى بمحض ارادته كاهو حسين مو ولد خالي ؟؟؟ نجلني ولا جني من دمه ولحمه وبنت عمته حتى ما كلف على خاطره ان ينهي علاقتنا نفس الاوادم والبشر غط مرة وحدة وما شفته الا وهو مرته بيده تحمدي ربج ما كنتي تدرين مع ام عيد شلون بتكون حياتج شلون بتكون عيشتج وعسى ان تكرهوا شيئا وهو خير لكم صح

رقية: صح كلامج يا رباب .. بس انا احبه احبه لو شنو اطيح حظه احبه .........
رباب: ما عليه يا حبيبتي .... شنو نهاية هالحب غير اللي قلتيه تشحطط وتمرمط بالسكيك جنكم بواقين ..... وليه متى بيوقف يم دريشتج مردها الناس بتشوف وتطالع ومو حلوة باجر الناس تتحجى عليج اهو ريال ما يعبيه شي بس انتي بنية والم ما علينا سمعتنا وسمعة ابونا

رقية: صح كلامج
رباب: والحين شنو بتسوين
رقية: ولا شي ما راح انزل من نفسي حقه اكثر .......... اللي علي سويته والوجه بالوجه ابيض انا بلغته واهو حر غط ولا دريت وين اراضيه ما يشوف شر والقلب اللي يحبه بدوس عليه بشحاطتي

رباب: رقية ترا صدقيني الحب والعواطف والمشاعر ما تيي الا عقب الزواج شوفيني انا شلت وحطيت واحب حسين واموت بحسين واخر شي شنو والله كل اللي كنت احس فيه ولا شي مقابل اللي الحين احسه اتجاه شهاب

رقية: يعني حبيتيه
رباب: وليش ما احبه حنون وطيب ومحتويني ..... اخلاقه عالية ورجال ينشد في هالظهر .....
رقية: يا عيني يا عيني ها ولج قمتي تشعرين
رباب: جبي جبي ههههههههههههه احرجتيني انزين قوليلي شنو رايج
رقية: بشنو
رباب: ببدر حماي
رقية: مادري مادري ... وبعدين شلون تبيني اتزوج حماج وهالغبر زيود جدامي واي ما اقدر لو شنو ما اقدر ......واخاف ام عيد تكون قايلة حق خالتي ام شهاب شي ما شيات ما تدرين

رباب: لا من هالناحية تطمني لو قايلتلها شي جان ما تكلمت عليج غير ان ام عيد مادحتنا عند خالتي وايد

رقية: عششششششششششششتو من متى ؟؟
رباب: هههههههههههههههههه مادري بس الظاهر يومها كانت ليالي القدر
رقية: هههههههههههههههههههه يمكن ........ الله يعين انتصار على ام عيد وسوالفها ....... امحق حمولة
رباب: امانة فكري رقية ترا بدر وايد خوووش انسان ومحترم
رقية: شدراج قاعدة معاه
رباب: لا بس اللي اشوفه تعامله مع خواته ين وسوالفهم تهبل عنه غير ان كله مع شهاب وترا هو اصغر اخوانه يعني فرق العمر بينه وبين شهاب كبير بس لان خووش ولد علاقته بعمي واخوانه زينة
رقية: و بصراحة مزيون
رباب: هاااااااا اشوف نسيتي البريعصي بسرعه
رقية: ههههههههههههههههههههههههههههه اخيه عالبريعصي اخيه والله ترا انا لحد الحين مو مستوعبة ان خاطب انتصار

رباب: والله شوفي مصلحتج وكملي طريجج ترا انتي مو صغيرة ..... توجي وارتاحي وريحي . ارتاحي من الهامو و من قمتة بيت ابوي .....

رقية: استخير وافكر وان شاء الله خير .........
رباب: ان شاء الله خير

انطق الباب اهني ...... قامت رباب تفتحه ولا خلود

خلود : ها رقية اهني
رباب: اي تفضلي
خلود : دام فضلج لا انا تحت اذا خلصتوا ناطرتكم
رباب: ليش دخلي
خلود :لا خلكم على راحتكم وبعدين غالية بروحها وين انتصار ادق عليها ما ترد
رباب: راحت الجمعية
خلود: اها اوكي خلاص انا تحت تبين شي
رباب: لا ابيج سالمة

سكرت الباب رباب وردت قعدت يم اختها
رقية: خلود ؟؟؟
رباب: اي ....... سكتي شكلها خالتي قايلتلهم عنج الكل يبي يشوفج
رقية: ليش مو شايفيني ؟؟؟؟؟؟؟؟
رباب: امبلى بس وناسة ههههههههههههههههههههه
رقية: جبح ويهج هههههههههههههههههههه الساعه جم الحين ابوي اليوم ناسيني
رباب: خلج وين رايحة تعشي وروحي اذا تبين انا وشهاب نقطج
رقية: يصير خير

قعدوا سولفوا وطالعوا صور العرس وقرقوا لين رن تلفون رباب
رباب: الو
شهاب: الوين هلا بام احمد
رباب: هلافيك شلونك شخبارك
شهاب: بخير .... مشتاقلج اليوم ما شفتج فيه رقية باقتج مني
رباب: ما عليه بس اليوم
شهاب: انزين مو تروح الا لما تتعشى ترا كلمت عمي
رباب: صججججججججججج واي مشكور مشكور مادري شقولك .
شهاب: لا تقوليلي . لما تروح رقية سويلي
رباب: واي شهاب بس عفية
شهاب: هههههههههههه فديت الحيا كله ... انزين لا تروح ها انا طلبت عشا وكاني يايبه
رباب: مشكور وما تقصر الله لا يخليني منك
شهاب: الا تقولين جذي اهلج اهلي واي شي يونسج يونسني انين قوليلي ولا تبينين حق اختج شي شنو ردها على اخوي
رباب: ماكو شي
شهاب: ولين هذا ذابحني من يوم ما شافها واهو يحن ويرن
رباب: صج
شهاب: اي بس مو تقولين لها
رباب: لا ان شاء الله
شهاب: خلاص شوفي شنو يصير وياج وبلغيني اوكي
رباب: اوكي
شهاب: وترا انا شاريلج ماعون ريش بس حقج انتي عشان تصيرين متبتبة واقرص فيج تالي الليل
رباب: شهااااب
شهاب: هههه يالله روحي قعدي مع اختج
رباب: اوكي الله وياك مع السلامة
شهاب: مع السلامة



رباب: شهاب يقول ما راح تروحين الا لما تتعشين كلم ابوي
رقية: صججججججج يحليله امبيه حبيته
رباب: هههههههههههههه ترا اغار
رقية: حلفي
رباب: انزين بقولج شي بس مو تقولين اني قلت لج
رقية: يعني بقول حق منو
رباب: انزين ...... يقول بدر مستخف عليج
رقية: صججججججججج
رباب: اي والله يقول يحن من لما شافج يبي يعرف رايج



وبين بدر وشهاب بالسيارة

بدر: ياخي ما شاء الله ...... سبحان من رسم ملامحها ........ وفيها طيبة مو طبيعية وحيا ذباح
شهاب: هوب هوب كل هذا شفته خطف متى مداك
بدر: اسكت يا شهاب عيني طاحت بعينها وفجاة نلت عينها وركضت داخل مستحية انا شنو خقيييييييييييييييت بغيت اييب الملاج ونملج
شهاب: ههههههههههههههههههههههه ايا الخفيف اثقل وانا اخوك
بدر: انته شرايك فيهم شهيب امانة انا اخوك الصغير مابي اتلعوز وانصدم كافي صدماتي باخوك ماجد
شهاب: والله يا بدر انته شايف عمي بو محمد والنعم منه رجال سنافي يعرف بالاصول ما عليه كلمة وبناته بعد ...وخل اقولك شي دايما حطه جدام عينك دايما خلك واثق باختيار امك ...... وام شهاب اعرف العارفين
بدر: صدقت يا شهاب امي ما مثلها .......انزين ما قالت لك متى بترد خبر
شهاب: هههههههههههههههههه ردينا عالخفة انطر يا ولد شفيك
بدر: خلاص خلاص بنطر وامري لله ياخي ابي اكمل نص ديني واتزوج
شهاب: علينا يا بو ناصر ؟؟؟؟؟؟؟ علينا
بدر: ههههههههههههههههههههههههههههههههههه

 

[MeeMeeYoo_2]

رد : ^^^^عدت بقصتي الثانية (( بنات بو محمد في مهب الريح )) ^^^^

ايوااا قام حظها رقيه


انشالله توافق

ثنكيووووو

 

[miss disaster]

رد : ^^^^عدت بقصتي الثانية (( بنات بو محمد في مهب الريح )) ^^^^

واااي يونس هالبدر وصج على نياتكم ترزقون


الله يوفقهم ويكفيهم شر غاليه


يسلمو وناطرين الياي