^^^^عدت بقصتي الثانية (( بنات بو محمد في مهب الريح )) ^^^^

[مجنونه A]

رد : ^^^^عدت بقصتي الثانية (( بنات بو محمد في مهب الريح )) ^^^^

وييييييييييييييينج

 

[eng.zainab]

رد : ^^^^عدت بقصتي الثانية (( بنات بو محمد في مهب الريح )) ^^^^

ناطرين التكمله على احر من الجمر

 

[نواارهـ]

 

[miss.l5bi6a]

رد : ^^^^عدت بقصتي الثانية (( بنات بو محمد في مهب الريح )) ^^^^

shkla mako part yay ?? .. :S

 

[حبيبه امي]

وايد طولتي
ناطرين

 

[JaN JaN]

عذروها بنات
هالاسبوع بدا دوام الجامعه واكيد اهي الحين مشغوله ,, ان شاءالله لي فضت اكيد بتيي

 

[DA3LOoOLA]

رد : ^^^^عدت بقصتي الثانية (( بنات بو محمد في مهب الريح )) ^^^^

waiting

 

[so_what]

طولتي وايد

 

[^^المهره^^]

افاااااا

ليلحين ماخلصت القصه؟؟
انتي ماتدرين شسويتي فيني
خليتيني اروح الدوام مواصله بديت اقرا بروايتج الساعه 12 بالليل و لا هديتها الا 6 الصبح وقلت برجع من الدوام اكملها
بس كانت الصدمه ان بس 3 بارتات وماكو نهايه

لا تأخرين حبيبتي
ناطرينج

موفقه

 

[عشيقة ريلها]

واااااااااايد طولتي علينا

باجر ويكند وان شاء الله تقدر تنزل شي

 

[miss.l5bi6a]

رد : ^^^^عدت بقصتي الثانية (( بنات بو محمد في مهب الريح )) ^^^^

nbiiiii part 7boba la t6wlen 3lena .. la t'6e3 al27dath min mu5i

 

[امواج الكويت]

متى التكمله؟

 

[روح الدنيا]

 

[دانة الكون]

واااااااااااااااااي أحسس القصه أحترقت نسيييتهاا وحلاتها حاار بحااار واااااااااااااايد طوولتيانشالله تكتبين بااارت اليوم او باجر

 

[^^المهره^^]

الله يهديج

 

[سارووونه22]

اب اب اب اب اب اب اب اب

 

[P!NKia]

ناطرينج

 

[امواج الكويت]

متى البارت؟

 

[MaFaZ]

حبيبااااااااااااااااااتي انا اسفة جدا جدا

بعد عمري jan jan كلامها صح

كنت مشغولة مع دوام الجامعه وولدي مريض حبيبي الله يشافيه والوقت الوحيد اللي افضى فيه عشان اريح وانام لي شوية

اشكر لكم انتظاركم وادري فيكم كلكم ذوق وبتتفهمون ظرفي

عالعموم عطوني ان شاءا لله دقايقو انزل البارت الاخير

فديتكم يا احلى واجمل والطف متابعات تشرفت بمتابعتكم لقصتي

ووجودكم اهو اللي حلاها وخلاها من اوائل القصص في هالقسم

لكم مني اجمل وارق تحية تستاهلونها



:eh_s(21)::eh_s(21)::eh_s(21)::eh_s(21):

 

[MaFaZ]

البارت الاخير

مشاعل: خالتي هذي كروت عرس اختي
ام شهاب: كروت ؟؟
مشاعل: اي كروت ... تدرين احنا ما نبي عرسنا يدخله من هب ودب احنا نبي عرسنا مرتب والحضور معروف
ام شهاب: عروسكم ؟؟ انتي عرسج في بيتنا واختج الكبيرة عرسها في صالة الفردوس و انتو ما شاءالله ما خليتوا احد ما عزمتوه زحمة والكل حضر العرس شمعنى الحين كروت ؟؟؟ حنا جماعه وحدة ومابينا فرق

مشاعل: امي تقول
ام شهاب: ايييييييييييه دام ان امج تقول يالله هاتي الكروت ومشكورين ما قصرتوا
مشاعل: خالتي شفيج علي تراني ما سويت شي ولا اقصد شي ليش انا تعامليني جذي ؟؟ ليش تفرقين بيني وبين باجي الجناين
ام شهاب: انا ما فرقت ولا شي وانا شسويت لج ؟؟ انا مو بحسبة امج ؟؟ يصير تكلميني جذي يا بنتي ؟؟
مشاعل: امبلى خالتي انتي تفرقين وانا ما كلمتج بطريقة مو زينة
رباب: شصاير خالتي ؟؟ شفيج مشاعل ؟؟
مشاعل: انتي مالج دخل لا تتدخلين اصلا كل البلا منج انتي واختج
رباب: (( بققت عيونها )) شصاير وانا شكو واختي شكو ؟؟
مشاعل: لا والله طردتو غالية والحين جايين تسوون لي سالفة انا بعد
ام شهاب: انجعمي ولا كلمة سكت لج واجد .. حدج عاد والزمي حدودج يا بنتي وخلي النفس عليج طيبة لا تزودينها تراها ماهي ناقصة
مشاعل: (( تبجي )) والله لعلم ماجد شنو هذا ترا احنا بنات ناس
رباب: اي قلتيها احنا بنات ناس .. من هب ودب جاي يتكلم علينا ويجرحنا .. كافي .. شسالفة مع حريم ماجد يا خالتي كل وحدة تجي وتقط علينا كلام
مشاعل: والله انتو ما خليتوا مجال للكلام
رباب: شقصدج ؟؟ حقيقة انج ما تستحين يا مشاعل هذا جزاء الاحسان
انتصار: شسالفة شفيكم ؟؟ يمه صاير شي
ام شهاب : تعالي شوفي هالصغيرة والله وطلع لها لسان تغلط على حريم اخوانج وعلي
انتصار: شنو ؟؟؟؟؟؟؟؟؟؟؟؟؟ مشاعل انتي جنيتي ؟؟؟؟؟؟ احترمي نفسج احسن لج كله ولا تغلطين على امي
مشاعل: انا ما غلطت على خالتي انا ما قلت غير الحق ... وبعدين اللي ما تدرون عنه ان كلامي ما فيه ذرة غلط .... رباب قولي الصج رقية مو كانت لزيد

اهني رباب انعفست فوق تحت مادرت شتسوي ... شلون وشدراها زبوط النقعه هذي عن هالسالفة الا ولا مرة تكلموا عنها وانطوت بمجرد ما رقية قالت نعم حق بدر ... رباب تعرف شنو شهاب بس ما تدري عن بدر شلون صاير كل الافكار دارت براس رباب بوقت واحد الدنيا افترت فيها وويها صار اصفررررر

شلون عرفت .. الحين شتقول الدم نشف بعروقها وريجها مافي شدة ينطق

ام شهاب : انتي شقاعد تخربطين شتقولين انتي يالله طسي دام هذي سوالفج روحي عن وجهي ولا تغثيني ولا تخلين مصيرج مثل بنت اخوي تراهي بنت اخوي وما رحمناها يوم انها تبلت على بنات الاوادم
مشاعل: لا خالتي انا مو قاعدة احذب زيد رفيج اخوي مبارك الروح بالروح .. واهو قاله ان سنين واهو يحبها واهي تحبه بس خالتي ام عيد مو راضية على زواجهم لانها بدون روحي سئليها روحي حلفيها بالقرآن وانا ان جان علي ما تبوني ردوني بيت اهلي ترا هم انا مو لعبة

ام شهاب: (( حطت ايدها على راسها وقعدت )) حسبي الله ونعم الوكيل .. الله واكبر على هالكلام لا حول ولا قوة الا بالله ياربي من وين جتنا هالمصايب ياربي من وين الله واكبر .. خافي ربج يا بنت الناس خافي ربج ..

انتصار : انتي هييييييي احترمي نفسج احسن لج ولا تتوقعين احنا بنسكت على هالكلام اللي تقولينه .. البنت تزوجت وانسترت وماله داعي هالكلام ..
مشاعل: انا رايحة بيت اهلي
ام شهاب: باللي ما يحفظج باللي ما يحفظج الله واكبر عليج .. الله واكبر عليج
يمه رباب لا تزعلين ولا يصير فيج شي .. هذي جاهل وما تفتهم
انتصار: اي ربوبة واللي يعافيج لا تتضايقين .. و الموضوع اعتبريه مسكر
رباب: وان وصل كلام لزوجها .. وان وصل كلام لبدر ؟؟ شنو بيصير ؟؟؟ اختي تتطلق ؟؟
ام شهاب: لا يا بنت الحلال شتقولين انتي بدر اصلا يموت بتراب رقية هالمرة يطلقها عشان كلام هالجاهل
رباب: خالتي اي جاهل .. اهي دخلت فيها رياييل تقولج زيد قايل حق مبارك تعرفين يعني شنو معنات هالكلام ؟؟ ان حتى الراييل يتكلمون علينا
انتصار: خل تولي والله ربوبة ما عليج منها احنا ندري انتو شنو وواثقين بشرفكم .. وسمعتكم ما ننطر فلان وعلان ايي يقولنا حسبي الله عليها يمه شبلاهم حريم ماجد تجننوا استخفوا
ام شهاب: الله واكبر عليها والله ان ضغطي ارتفع
انتصار: يمه ما عليج منها خل تولي والله جاهل وميتة من الحررة شافت ما عطيناها وجه قامت تفلت حجي
رباب: واي خالتي ماني قادرة اتحرك والله .. ترا هذي ثاني مرة يتكلمون علينا ليش احنا شسوينا شالكلام ؟؟
ام شهاب: الله يستر لا عمج يسمع بس والله يقلبنا ويعفسنا .. ويطلقها يردها بعباتها .. حرام والله حرام .. ولدي تمرمر مع هالحريم لا اللي من اهلنا سنعه ولا الغريبة سنعه لا الكبيرة زينة ولا الصغيرة زينة لا حول ولا قو ةالا بالله


صعدت رباب وماتدري شتقول حق رقية وخاصة ان اليوم طلعتها م نالنفاس .. شلون تقولها اللي صار كلام قوي .. مهي عارفة تتصرف وماتدري شلون تقول حق اختها

شتسوي شلون تتصرف شالدبرة ؟؟

استجمعت قواها ودخلت على رقية
رباب: ها شقاعده تسوين
رقية: ماكو توني سابحة .. والحين بتجهز حق الليلة
رباب: اها .. بتطلعين
رقية: اي بدر حاجز فندق
رباب: اها
رقية: شفيج وجهج مخطوف لونه صاير شي ؟
رباب: لا ماكو شي
رقية: اسمع لوية تحت قلت اكيد احد جانا ولا شي
رباب: لا ماكو بس احنا
رقية: اها
رباب: رقية
رقية: هلا ؟؟
رباب: (( ساكتة ))
رقية: (( التفتت عليها )) شفيج شصاير قولي
رباب: مصيبة ..
رقية: شنو ؟؟ شصاير ؟؟؟؟؟؟؟ شمصيبته بعد ؟
رباب: مشاعل قالت جدام خالتي ان زيد قايل حق اخوها مبارك ان كان يعرفج
رقية: @@ شنوووووووووووووووووووووووو ؟؟ شالحجي شالمصخرة ؟؟ شنو اللي فتح الموضوع ؟؟؟؟؟؟؟؟؟؟؟؟؟؟؟ جذي نزلت حق خالتي وقالت لها ؟؟؟ واي
رباب: رقية شفيج ؟؟
رقية: هبطت مادري شفيني ؟؟؟ امبيه رباب شقاعده تقولين
رباب: انزين هدي وانا اقولج

وقالت لها رباب كل السالفة .. رقية احنا خقت ماتدري شتقول حست انها انشلت مو قادرة تتحرك من مكانها ؟؟؟؟؟ شالسالفة البايخة حقيقة ان زيد طلع مو ريال .. وطايح حظ شلون يقول حق رفيجه عنها شلون ما خاف على سمعتها شلون خلى فلان وعلان والنطيحة والمتردية تتكلم عليها ؟؟؟؟؟؟؟؟؟؟؟؟؟؟؟ شلون وشلون وشلون والف شلون دارت براس رقية بلحظات
رباب: شفيج رقية لازم تهدين عشان نعرف نحل الموضوع
رقية: شلون نحله قوليلي شلون ؟؟؟ احنا ما تعودنا نجذب .. قوليلي شلون نرقع هالكلام اللي ما يترقع ؟؟ واي مصيبة وطاحت على راسي .. شسوي بدنيتي هذا خبز ايدي كله مني انا .. انا اللي ضيعت نفسي معاه انا لو خايفة ربي بنفسي جان ما صار اللي صار جان انا الحين الله ساتر علي مع ريلي وولدي وحمولتي اللي دخلت عليهم جني بنتهم مو جني مرت ولدهم قوليلي شسوي ؟؟ قوليلي
رباب: واي رقية بس لا تبجين خلاص .. ادعي ربج وصدقيني الله ما يخيب ظن احد وخاصة انج تزوجتي وانسترتي في بيت ريلج

واهني انطق الباب عليهم

رباب: منو ؟
انتصار: انا ..
رقية: تفضلي انتصار حياج
انتصار: مادري شقولكم بس مشاعل قالت حق ماجد وبدر سمع الكلام
رقية: شنوووووووووو (( ترجف وتبجي )) واي وبعدين
انتصار: مادري شقولج رقية اهو قاعد تحت امي بالغصب مسكته معصب
رباب: استغفر الله يارب .. رقية حبيبتي صدقيني بتنحل المشكلة
انتصار: رقية امانة قوليلي انا يمكن اعرف احل المشكلة
رقية: (( غطت ويهها بيدها )) شقول ؟؟؟ شتحجى واي قلبي قاعد يحترق نار شابة فيني
رباب: بس اختي بس صلي عالنبي
رقية: ربوب شسوي قوليلي دبريني ؟؟؟ بيتي بينخرب والسبة كلام ناس ما تخاف ربها


نزلت رقية واهي تح سان روحها طلعت من جسمها نزلت واهي م نغير روح
بدر كان قاعد واهو معصب .. النار يتطاير من عيونه .. وام شهاب قاعدة يمه

بدر: يمه طلعي وخليني مع رقية
ام شهاب : يمه مو اهني قوم اطلع غرفتك وهناك تفاهموا
بدر: يمه .. ما عليج امر طلعي
ام شهاب: لا حول ولا قوة الا بالله


طلعت ام شهاب من الصالة وسكرت وراها الباب .. رباب حست ان حكم الاعدام صدر وبدر راح ينفذه

بدر: انتي تعرفين زيد قبل لا اخذج ؟؟
رقية: بدر انت شقاعد تقول
بدر: ردي على قد السؤال ولا تردين على سؤالي بسؤال
رقية : ما راح ارد لان كلام باطل
بدر: عيل ليش نسيبنا المحترم يقول جذي ؟؟
رقية: روح اساله
بدر: شساأله ؟تدرين ان فتحنا هالموضوع فيها دم فيها ذبح ردي علي احسن لج وصدقيني يارقية (( حده معصب )) انا ما راح اتصرف تصرف مو زين لاني انسان عاقل وواعي ... والقلب اللي حبج بدوس عليه وعادي وبتردين بيتكم معززة مكرمة

رقية: بدر هذا مو سؤال .. كلامك وعصبيتك هذي (( ترجف )) تدل على انك متاكد ومصدق ...

اهني وعى بدر على نفسه ان العصبية والغضب عمت عينه .. واهو صج مصدق .. شلون يصدق واهو ما تاكد

بدر: يعني شنووووووووووووووو ؟؟؟؟ يعني شلوووووووووون(( على صوته ))
غالية تتبلى على رباب ومشاعل تتبلى عليج متفقين مثلا .. فهميني شلون تيي مشاعل وتقول هالحجي .. مني والطريج .. ؟؟ قوليلي شفيج ساكتة فهيمي نترا انا ما ظل فيني عقل يا مرة

رقية: شنو ؟؟ بدر انته عارف شنو قاعد تقول ؟؟ اختي شكو بالموضوع ؟؟ انته جذي مو بس مصدق علي انته مصدق على اختي ... وان جان على حريم اخوك لا مو متفقين .. احنا جذي

التفت عليها بدر وخزها خزززززة
رقية: لا تطالعني جذي (( نزلت راسها )) شوف بدر احنا صج بدون وعلى قد حالنا وصج مالنا بهالدنيا غير ابوي ... بس محد له الحق ان ياذينا جذي ولا ان يبيع ويشتري فينا ... شوف حتى لو .. لو اني مسوية شي غلط فمحد له الحق يحاسب ويطالب .. والحمدلله انا بنت سمعتي وشرفي محفوظين .. انا واختي ... لا تقعد تكلمني جنكم جاكيني ولا سامعيني عني كلام يقول اني بنت وصخة ولا لايثة مع الرياييل
بدر: رقية (( صرخ ))
رقية: كلمة الحق ما ينزعل منه .. بدر .. انا عندي ابو .. وعمام وخوال .. عندك شي انت واهلك قوله لهم .. لك كل الحق انك تشتكيني عند اهلي غير جذي انا ما اسمح لاي احد يكلمني بهالطريقة ويحسسني اني ارخص م نالرخص مثله .. انا طالعه الم اغراضي واللي يعافيك ردني بيت ابوي

بدر: رقية .. جنيتي ؟؟ تلوميني ... شي طبيعي بزعل وبعصب وبقلب الدنيا .. رقية انا مت وحييت يوم سمعت كلام هال... مبارك ... واخته .. ماني قادر اتصور .. شلون يتكلمون عليج جذي

رقية: بدل لا تدافع عني .. قلبت علي وجاي تحاسبني ولا متهمني وخالص انت
خلاص انا مالي قعدة اهني .. انته حتى على اختي غلطت
بدر: والله مو قصدي بس ماني قادر اطالع اللي جدامي لا تلوميني مافيني عقل
رقية: انا صاعدة الم اغراضي ..
بدر: قعدي ماكو طلعه قلت لج
رقية: لا في ... قلت لك حتى لو كان عندي ماضي اسود انا ما استحق احد يسوي فيني جذي .. انا ام ولدك و زوجتك وعلى اساس حبيبتك

نزل بدر وقعد عند ركبها ومسك ايدها
بدر: انتي حبيبتي وعمري واول بنت اشوفها بعيون قلبي .. انتي سكتي هالقلب وتربعتي يا رقية .. والله اني جنيت .. ما دريت شفيني وشنو بسوي .. والله ما توقعت في يوم اني بقعد هالقعدة جدام مرة .. انتي غير ..

رقية: (( تبجي وخرت ايدها وقامت )) ان ما وديتني انت بدق على ابوي يجيني
بدر: وتعصين امري تعصين امر زوجج
رقية: ما خليت فيها زوج يا بدر .. ما خليت .. اهون علي لو متقصي من مبارك ومواجهني ولا انك تقول اللي قلته .. وعالعموم مبارك وزيد موجودين روح تقصى عندهم

بدر: يخسون انا ادري شنو بنت بو محمد
رقية: لا بالله ما دريت ..

طلعت رقية من الغرفة واهي بقلبها سجينة مغروسة ... سالتها ام شهاب عن اللي فيها ما ردت وتمت تبجي ... لمت اغراضها واغراض ولدها .. وراحت حق رباب وقالت لها اللي قاله بدر ..

رباب: شهاب .. انا رايحة بيت ابوي
شهاب: شنو؟ شكو شكو ؟؟ الحين اهم في خلاف احنا شكو
رباب: لا باللله احنا كل الشكو .. الحين بدر شكو يجيب سيرتي انا بعد يعني الحين صارت سمعتنا لعبة .. الكل يحط ويشيل فيها
شهاب: خلج لا انتي ولا اختج بتطلعون خل اشوف شسالفة بدر

نزل شهاب وكلم بدر وتموا يتكلمون فوق الساعه لين سمعوا صوت لوية برة الصالة يوم طلعوا لقوا رباب ورقية واليهال بيطلعون
شهاب: انا شنو قلت ؟؟
رباب: ابوي ياي ياخذنا
شهاب: انتي شفيج يا بنت الحلال محد تكلم عليكم والولد معصب وانا قلت ماكو روحة عناد اهو
رباب: لا مو عناد بس خلاص ... زاد الموضوع عن حده
ام شهاب: يا بناتي لا تهدون بيتكم وتطلعون ... والله حرام اللي قاعد يصير .. مسيره الموضوع ينحل وان شاء الله كل شي يتعدل وينحل
رباب: خالتي مافيها حل عقب الكلام اللي انقال
شهاب: رباب لا تخليني اقول كلام انا وياج نندم عليه صعدي ردي اغراضج فوق

ولاول مرة رقية ورباب يعنادون بهالطريقة ويوقفون بويه اقرب الناس لهم .. يمكن الزمن اهو اللي قسى قلوبهم ويمكن الكلام اللي انقال عليهم والاتهامات وطريقة الحجي عليهم .. سبحان الله الظلم يحول ارق الناس الى اقسى ناس

بهالوقت العناد وابليس والظلم والضغط سيطر على عقل رقية ورباب وخلاهم ما يفكرون الا بنفسهم وبالطريقة اللي تعاملوا فيها معاهم

كملت رباب ورقية طريجهم ولا كان احد واقف ..
شهاب يحب رباب وتام على العشرة معاها عشان جذي كان يقدر ياخذ احمد منها ويقولها ان طلعتي مالج ردة .. بس ما كان هاين عليه اللي قاعد يصير .. وكان يدري ان كلمة اخوه غلط بحقها .. وان الكل تقريبا غلط بحق رباب ورقية .. لكن ما باليد حيلة

هم اهما يتمون اهله واخوانه .. وما يصير يكسر فيهم .. كان وده الموضوع ينحل بطريقة منطقية وبعقلانية اكثر لكن مثل ما قلت ان العناد والظلم اهو اللي خلا البنات يتصرفون هالتصرف

اما بدر فكانت دمعته على طرف عينه .. منظررقية واهيت خليه مع ولده قطعت قلبه مليون قطعه .. شلون تسرع وتجرا يحكم عليها ويجرحها بهالطريقة ؟؟ بنفس الوقت حبه لها ورجولته لا يمكن يسمحون له ان يتهاون بمثل هالكلام .. الف فكرة وفكرة مرت في راسه بهاللحظة ..


وبالطريج رباب ورقية قالوا كل اللي عندهم حق ابوهم .. وبالرغم من ان كان معصب عليهم .. وعلى اللي صار الا انهم ما توقعوا ان يوقف معاهم وان معاهم بكل اللي سووه ومن الاول كانوا لازم يقولون له على اللي صار مع غالية ..

والقرار الاخير كان ان اذا بو شهاب يبي يحل الموضوع ايي حق بو محمد ويسوون قعدة رياييل ويقولون اللي عندهم وغير جذي ماكو .. والبنات ما يردون الا بشروط ..

اما تصرف ام شهاب وبناتها فاهوا عالعين والراس .. لكن كل شي له حدود محد يرضى على بناته هالكلام ..

دخلت رقية غرفتها واهي تفكر .. شلون وليش ؟؟
شلون قدر زيد بعد كل هالحب والتضحية اللي كانت بينهم ان ما يحط بعينه فص ملح وتبين العشرة فيه ؟؟؟
شلون ينسى ... يرضاها على خواته ؟؟؟ يرضاها على اهله ؟؟ انا شسويت وياه غير حبيته حب شريف عذري ؟؟ اقرب مسافة بينا كانت لما كان يوقف برا عند الدريشة وانا افتحها ؟؟

شلون هان عليه ؟؟؟

اما من ناحية بدر مر عليه اسبوع ورقية وولده مو يمه .. لا قادر ينام ولا ياكل ولا شي .. يفتر على نفسه .. يفتر بالغرفة يحس ان ضايع ... مهو قادر يتحمل بعد رقية ..واولما يطلع من غرفته يحاول يكون طبيعي عشان لا يبين ضعفه جدام الكل ...
لكن ام شهاب حاسة فيه .. قلب الام .. وشلون ما تحس فيه .. فيه وفي شهاب ... قلبها معلق لا طايل ارض ولا طايل سما .. محروق قلبها على شوفة ناصر واحمد .. وعلى جناينها اللي عدتهم مثل بناتها وحبتهم حب ما حبته خالة لجناينها

وعلى عيالها اللي مبين عليهم لا نوم ولا راحة .. واللي يشيلون اللقمة بالقفشة ويردونها مثل ما اهي .. لا اكل لا شرب ... طول وقتهم بالديوانية ولا بغرفهم

من متى ام شهاب تشوف عيالها جذي ؟؟ ... وماجد لا ما سوى ولا شي ولا تكلم له كلمة .. يجبر خاطر اخوانه بعد سالفة مرته العوية ؟؟

ماجد: شتبيني اسوي ؟؟؟؟؟ اطلقها اهي بعد ولا اطلعها من البي تبشقة بروحها ؟؟
ام شهاب: ماجد ؟؟؟؟؟؟؟؟؟؟؟؟ انا امك ولا تنسى هالكلام
ماجد: استغفر الله يارب .. يمه انتو قلتولي طلع غالية وبرهن الاشارة طلعتها قلتولي تزوج مشاعل وتحت امركم تزوجتها بس ليه اهني وكافي انا رجال مان جاهل تعال تعال روح روح ؟؟؟

ام شهاب : لا منت جاهل بس الغلط غلط والصح صح .. ونت الظاهر الله بلاك بحريم يالله م نفضلك مافيهم سنعه

ماجد: يمه الحين حريمي مهم سنعات و حريم بدر وشهاب سنعات ...
ام شهاب: يعني انت عاجبك الكلام ؟؟؟ عاجبك هالكلام ينقال عن خواتك .. يمه حريم اخوانك من حسبة خواتك شرفهم شرفك وعرضهم عرضك

ماجد: يا يمه .. يا يمه
ام شهاب: خلص خلص مانبي منك شي يا ماجد .. ما نبي

قامت ام شهاب زعلانة .. ومتضايقة ومغثوثة من اسلوب ولدها .. وكان ودها تصعد وتفرك خشة مشاعل بالقاع .. ام شهاب حاسة بالذنب ان اهي السبب باللي صار كانت تقدر انها تلملم الموضوع بس سبحان الله اذا الله كاتب شي يصير ...


بدر تم يفكر ويفكر ويفكر وفجاة يتله فكرة.. ما قالها لاحد وقرر ان ينفذها بروحه . .لان لو قالها لشهاب .. ما راح يرضى ... يمكن الفكرة فيها تهور بس اهو فكر بينه وبين نفسه يمكن تصيب ويمكن تخيب خل يجرب مهو خسران وصج دق سيارته سلف وتوجه للاندلس .. ومر يم بيت رقية وتحسر على مرته ..

بدر يدري ان بحركته هذي يمكن يخسر رقية للابد لكن مثل ما قلت لكم كان محروق مستعد يسوي اي شي وبنفس الوقت يمكن ترد له واهي مرفوع راسها ..

لان بهالوقت قال ان طلعت رقية بريئة راح يشق شقوق ما تتخيط وراح يطيح مشاعل واخوها عدل ... لان هالكلام مو هين لا بحقه ولا بحق مرته لكن كان يبي يتاكد عشان يتكلم بعين قوية ولا تهتز رجولته جدام اي احد

طق بدر باب ام عيد ... طلع له عيد سلم عليه بما ان كان يعرفهم وطلب منه يناديله زيد ... طلع زيد .. وسلم على بدر وفاتحه بدر بالموضوع وتكلموا وايد
زيد: والله ياخوي بدر مدري شقولك .. بس كل اللي صار ماله داعي ومبارك جاهل ان راج وقال هالكلام وانا ومبارك مجرد سلام وعليكم السلام ولعب ورق .. و على كلامي هذا ديوانية سعد شهود .. انا مدري وش اللي خلاه يتكلم هالكلام .. عمي بو محمد والنعم منه وبناته خوات لنا ... ما نقدر نتكلم عليهم
بدر: والله مدري وشقولك يا خوي.... بس انت عارف هالكلام فيه دم وذبح والله شاهد علي كنت بروح اذبحه هالمبارك بس لو ما اني تعوذت من ابليس كنت قطعته
زيد: صادق يا بو ناصر .. وانا لي تصرف مع مبارك .. وان شاء الله بشوف لك ليش قال هالكلام


تشكر بدر من زيد وعلى صدق كلامه .. وبيني وبنيكم بتقولون شلون زيد يجذب ومن هالكلام ..

لكن موقف زيد صح امية بالامية .. الستر واجب وهالامور مافيها جذب واحتيال .. اهو ستر على بنت الناس وحفظ بيت من الانهيار والخراب .. والمغلوط الحين اهو مبارك طايح الحظ .. بس شنو اللي خلاه يقول نفس هالكلام ولا مشاعل كانت تجذب

مر بدر يم بيت بو محمد ... دز حق رقية مسج
(( عن قريب كل الامور راح تتعدل وتصير للاحسن .. السموحة منج يا حبيبتي ))

راح بدر البيت ... قعد بالديوانية .. قال لابوه ان عندهم سالفة وجمع اخوانه .. وقعدهم ..

بدر: شوف يبه انا اليوم رحت لزيد ولد عمي بو عيد ... وتاكدت منه عالكلام اللي قاله مبارك عن مرتي

شهاب: وبعدين ؟؟ انت ليش تروح له
بدر: لان ماكو حل غير جذي ولا تقولون لي غلطان .. انا روحتي ردتني بفايدة
ماجد: الا وهي
بدر: ان نسيبك خفيف ورقلة ومو رجال .. ولو رجال جان ما قال هالكلام
ماجد: شتخربط ؟؟ شقال زيد اخلص من الاخر
بدر: اي اخلص ليش ما اخلص .. يبه الرجال شهد عليه ناس وقال ان مستحيل يتكلم على بنات الناس هو عنده خوات ويخاف عليهم وان بنات بو محمد بحسبة خواته ومستحيل يتكلم عليهم .. وقاللي ان واجه مبارك ومبارك قاله ان سبب كلامه هذا ان شاف زيد مرة يطالع رقية لما كانت بالجمعية وعباله ان مواعدها ويحبها
ترا الموضوع كله كلام رجال ماهو برجال مبارك حرمة ولا ما كانت هذي سوالفه

شهاب: والله مثل ما تقول يا بدر .. والحمدلله ان الله بين الحقيقة . .. والله زين فكرت جذي ولا جان محد فينا فكر ان يواجه زيد ..
بدر: والله يشهد ان الرجال نشمي .. ولد اصل ولا جان ما قال اللي قاله ولا بين موقف بهالطريقة ...
شهاب: ماجد .. انته عارف شنو معنات الكلام اللي انقال ..
ماجد: والله مدري شقولكم .. هو مبارك من ناحية خفيف خفيف .. ومن ناحية الموضوع كله ماله داعي وانا بنت الناس طيحت حظها .. بس هم انتو ما ترضون اتركها واتزوج غيرها .. بس خلاص انا تعبت .. يعني شسوي اذا هذا حظي من الحريم ؟؟
ام شهاب: شوف وانا ابوك .. مشاعل ما راح تطلع من البيت بس هم ما اتم على سالفتها العوجة هذي .. تفتح المخرج الخارجي تطلع وتدخل منه وما تدش علينا الا يوم الجمعه تزور وتروح بيتها .. وقبل كل هذا تردها بيت اهلها اسبوع تتادب وترجعها .. وابيك يا ماجد تعطيها العين الحمرة ترا المرة ان ما انكسرت عينها تطغي
ماجد: ان شاء الله يبه
بو شهاب: ونتو الاثنين .. انا بتصل على بو محمد ولنا روحة لهم ..
بدر: ان شاء الله يبه ..




بو محمد : رقية .. رباب .. تعالوا ..
رباب: نعم يبه ..
بو محمد: شوفي .. انتي غلطتي يوم انج طلعتي من بيت رجلج .. كان لزوم عليج تطيعينه .. وتحترمين شنو يقول ..
رباب: بس يبه
بو محمد: ما عليه .. اخوه اللي غلط مو اهو .. وبعدين اخوه معصب وغلطان .. ومو شوية احد يتكلم عن اهله جذي .. صح ولا انا غلطان
رباب: صح كلامك يبه
بو محمد: يعني الحين انتي شتسوين ؟؟
رباب: ارد بيتي
بو محمد: بارك الله فيج .. ومابياسمع من هالسوالف شي ثاني .. ونتي يا رقية ..
رقية: نعم يبه
بو محمد : شوفي انتي الثانية انتو الحين عندكم عيال .. وحرام ان هالعيال يتمرمرون .. شفتوا حالكم عند مرت الابو .. وبعدين تتطلقين وتردين لحياتج قبل ؟؟ الناس تكمل حياتها ما ترد ليه ورا .. الولد غلطان وندمان عاللي قاله وبنت الناس ما قصروا معاها ردوها بيت اهلها .. وبيسنعونها .. وشوفوا ترا مثل بيت بو شهاب ما بتلاقون لا مثل الحجية ولا مثل اهو ولا مثل عياله وبشهادتكم صح ولا انا غلطان
رقية: صح كلامك يبه
ام محمد: خلاص الولد اعتذر .. وتاسف ومعترف بغلطته .. والغلط راكبه من فوق ليه تحت .. لموا حياتكم وستروا عليها وربوا عيالكم .. ولا توقفون عند كل كلمة تنقال .. لازم تكونو ناقوى وتشترون رجاجيلكم واهلهم لانهم صاروا اهلكم الحين .. وانا ادري ادري ... انكم انجرحتوا .. وان الكلام اللي انقال عنكم كبير .. بس انا ادري واعرف الانسا نالحقير اللي يقول هالكلام من جد واللي خذته العصبية والزعل .. و حماوة الدم ... ما عليه .. المرة لازم تتحمل زوجها واهل زوجها وتبرهم كانهم اهلها واكثر بعد ... مفهوم بناتي

رباب ورقية: مفهوم يبه

وقبل لا يقومون البنات .. قاموا لموا ابوهم حيل ودمعت عينهم وعينه اهو بعد .. اي عينه .. لان ما توقع ان بناته يكبرون .. ويمرون بهالمشاكل .. تمنى امهم تكون يمه تشيل عنه ويشيل عنها والكل يشيل ع نالثاني تمنى تكون ام رباب اهني تشوف بناتها كبروا وصارت عندهم بيوت .. وعيال ..

تمنى تكون موجودة تخفف عن بناتها هم الزمن اللي مو راضي يخف عنهم ..

رقية: ما توقعت زيد يقول هالكلام عني ..
رباب: اي والله .. والله طلع ريال على عيوبه .. وفيه الخير ان لم الموضوع والله
رقية: ايييي
رباب: صدقيني لو واحد ثاني جان صج تحجى بس ولدالناس طلع مو متكلم ولا قايل شي .. وموقفه جدام بدر يدل ان اصيل بصراحة الله يرزقه ببنت الحلال
رقية: اي والله ويبعده عن بيت مشاعل
رباب: اشتقتي حق بدر
رقية: مووووووووووووووووت انتي ما تدري شنو بدر بالنسبة لي تصدقين على كثر ما كنت احب زيدبس بدر ملك حياتي ودنيتي .. واهو ابو ولدي .. والله اني الايام اللي فاتت ذبحتني
رباب: اخيه .. وانا بعد تصدقين ياربي احب ريلي بس الكلام اللي انقال سخيف انغز بقلبي مثل السجينة
رقية: الحمدلله على كل حال .. والله يستر علينا وعلى امة محمد .. والله ما هان علي نخلي خالتي و بدور وانتصار و البيت كله
رباب: صدقتي يا رقية .. واما مشاعل فحسبي الله عليها ما ندري شسوينا لها
رقية: عشان تصدقيني لما اقولج ان وراها سالفة هالورعة
رباب: هههههههههههههههههههههههههههه من زمان مو ضاحكة ضحكتيني


مشاعل ردوها عقب شهر عقاب .. تم بو شهاب يماطل ماجد لين عقب الشهر سمح له يردها ... غالية لما درت تشمتت فيها لين قالت بس .. لدرجة انها نست حقدها على رباب ورقية ... من كثر ما عجبتها سالفة مشاعل ..

بما ان ماجد ما يقدر يحط شقة ويدفع اجارها حق غالية اقنع ابوه ان يجيبها ويبني لها شقة في البيت منفصلة مالها دخل باي احد في البيت .وعشان عياله يكونون يمه .. وافق بو شهاب وبناله الشقة

ومشاعل انقرصت عدل من عقب هالسالفة وحتى لما تزور تدخل بسكات وتطلع بسكات .. لان ما يسوا عليها عمرها 17 وتتطلق .. اللي حتى غالية مالها شغل فيها لو شنو تسوي ... حملت ويابت ولد سمته مساعد وعقب ما يابت من اليهال شي وتمت تعالج ليه يومكم هذا

خلود يابت ولدين سعود و شهاب .. وما كان بينهم الا سنة وحدة بس .. يابتهم ورا بعض
انتصار تزوجت ولد ام جراح .. وسكنت بفريج بيت اهلها .. واول حمل لها يابت توائم بنات الدانة والجوهرة ...

اما رقية ورباب عقب ردتهم حملوا ما كان بينهم الا اسبوعين
رقية يابت بنت وسمتها نادرة على ام شهاب .. ورباب يابت ولد وسمته نواف
وعاشوا مرتاحين .. لا لهم ولا عليهم وخاصة عقب هالسالفة .. ومرت السنين
على رباب ورقية .. تجنسوا وكملوا دراستهم .. ويابو عيال بنات وصبيان .. وسنة عن سنة محبة ام شهاب لهم تزيد لين صاروا مثل خلود وانتصار ويمكن اكثر ..

غالية ورباب تصالحوا على مر السنين .. وتمت علاقتهم عادية .. سلام وعليكم السلا واللي بقلب غالية عليها اهي واختها خف ويمكن اختفى ..

هالبنتين عاشوا ومروا بوايد امور وبظلم وايدبحياتهم ويمكن من اقرب الناس لهم ..

عاشوا تحت ظلم مرت الابو .. و جفاف الابو .. عاشوا واهم اهل امهم ما يبونهم مثل ما يبون الباجيين الا اللهم خالها فاضل وامل ..

عاشوا محرومين من الطلعه والدخلة والهدوم والراحة و من كل الاشياء اللي البنت العادية تتمناها و متوفرتلها ...

لكن الحمدلله ما ياسوا من رحمة الله .. ولا منو كان يفكر ان رقية ورباب حالهم بيتعدل وبيتزوجون وبيعيشون مرتاحين مع عيالهم وازواجهم اللي يحبونهم ويتجنسون ويتحولون من بدون الى كويتيات ويكلمون تعليمهم اللي انحرموا منه .. وانحكروا في البيت يخدمون على الهام واخوانهم ..

نهاية حلوة لحياة بنات بو محمد اللي كانوا في مهب الريح