سلام عليكم بنات
مثل ما قلت راح اكتب لكم النتيجة لسؤالي
باختصار الاجابة
لا
السالفة بالتفصيل اللي صار بالضبط
رحت يوم الثلاثاء حق العاصمة التعليمية بالخالدية
استفسرت عن قسم تعليم الكبار دلوني عليه ما قصروا - لما وصلت لقيت مكان كبر المسرح المدرسي كله مكاتب ما فيه الا موظفتين قاعدين يم بعض - وحدة باين عليها قديمة بالمكان بس كانت مشغولة مع ولي امر فرحت حق الثانية شابة منقبة
قتلها استفساري بالضبط مثل ما انا كاتبته لكم - و انا اشرح لها ضحكتني كانت تسمع لي و عيونها بكل بطء تتفحص شيلتي و قميصي (وانا بعقلي قاعدة اقول :والله ماراح تعطيني اجابة شافية)
خلصت من سرد قصتي قالت المنقبة : و الله ماأدري (يا راجل) خل اسأل ام فلان
ولي الامر مشى جان التفت على ام فلان و اقولها سالفتي مرة ثانية - جان تقول ام فلان : لا مايصير لج حق تحسين نسبة مرة وحدة بس
انا : انا ما ابي احسن نسبة - انا ابي ادرس علمي
ام فلان: لا اهو عموما ما يصير الا مرة وحدة بس .. بس يمكن يصير تدرسينه منازل
انا: (ويهي قام يعطي الوان) أدرس علمي منازل!! (تكسير المجاديف شلون قايل بس على رايهم شيء احسن من لا شيء)
ام فلان : اي و همن هذا لج حق تاخذينه مرة وحدة بس .. بس اظمن لج سإلي فيها شئون الطلبة
دلتني على قسم شؤون الطلبة و رحت لهم - فوق ال3 مكاتب اقولهم السالفة يقولون لي :هاه!!! سإلي اللي يمنا - اللين ثالث مكتب كان فاضي (يتريقون كانوا) , قمت أنادي طلعت لي وحدة عودة قتلها سالفتي بالاضافة لآخر الاحداث اللي صارت مع قسم الكبار -
جان تقول لي الكلمة اللي متفقين عليها : لج حق تحسين نسبة مرة وحدة بس
انا: (يا صبر ايوب) أنا ابي ادرس علمي ما ابي احسن نسبة الادبي
الحجية: ما ظنتي يصير الا اذا يبتي لنا كتاب استثناء من الوزارة نفسها
انا : حلو (رفعت معنوياتي بشكل) وين اروح
الحجية : روحي مبنى 7 قسم السجلات الطلابية و سإليهم
رحت,دورت, صفطت ,لقيت, و سألت 4 بنات في مكتب واحد
رد 3 منهم كان : لا من قال اصلا يحق لج تعيدينها مرتين
انا : ( wtf!!!) مرتين؟؟؟!!!!!!!!!
اهم : اي ما يحتاج لا كتاب او يحزنون
انا : (موقادرة استوعب التضارب اللي قاعدة اسمعه من كل وحدة) الحين شسوي اخاف اروح اقولهم ابي شهادتي يقولون لي لا ما يصير
اهني الموظفة الرابعة شاركتنا الحديث -كانت مشغولة مع ولي امر و باين انها رئيستهم-
قالت : (عقب ما عدنا الشريط مع اخر المستجدات) احسن شي لج تروحين تسإلين رئيسة قسم الكبار س.المطيري
أنا : ووين مكتب الرئيسة.
الرابعة : مبنى واحد
ركبت سيارتي, رحت, صفطت, سألت,صعدت, لقيت المكتب فيه سكرتيرتين
أنا : سلام موجودة س.المطيري (نسيت اسمها موذاكرة الحين الا اول حرف)
السكرتارية : لا اهي الحين باجتماع
أنا : (هو يوم مش فايت انا عارفة) اقدر انطرها
السكرتارية : راح تطول بالاجتماع آمري يمكن نساعدج
انا : (اشك في هذا)عدت لهم الشريط - ضاعوا شوي معاي بس ظلوا يحليلهم يحاولون يفهمون مني
السكرتيرة 1 : اوكي يعني انتي ما تبين تحسين نسبة تبين تغيرين مسارج من أدبي لعلمي
انا : (شكلي وصلت خير) بالضبط اقدر و لا؟
السكرتيرة 1: والله سالفتج سالفة و ما اقدر اقولج اي او لا و الرئيسة باجتماع (والخروف ما يبي يعبر النهر) خليني اسأل لج فايز/فواز المطيري اهو ماسك تعليم كبار الفروانية
كلمت فايز/فواز المطيري بالتلفون و قالها : لا عادي مالها شغل فيهم خل تطلب شهادتها مالت ثانية ثانوي و تسجل بالمدرسة و لا تسأل فيهم - ليش ان السستم ما راح يدري إلا إذا كنت ساقطة, و انا ولله الحمد ماسقطت
المفروض على هالكلام اللي سمعته اتفائل - بس اللي صار اني جمدت من هالوزارة الحيص بيص اللي محد يدري فيها شنو القرار الصح و شنهو القرار الساري - لا العاصمة باقسامها يدرون ولا الوزارة تدري عن اقسامها او عن العاصمة و اقسامها, لا و السكرتيرة تقولي ليش قلتيهم سالفتج جان احذتي شهادتج - قلتلها مشكلتي إني ابي اكون على بينة
قلت لهم : على العموم هذا رقم تلفوني اتصلوا فيني اذا ردت س.المطيري لكم جواب (و أنا بقلبي ادري شنهو الجواب - خاصة إن السالفة صارت كلام مرة صاعد ومرة نازل ) واخذت منهم رقم مكتبهم
اتصلت عليهم امس شنو تتوقعون الاجابة؟
بالضبط
لا و اقول للسكرتيرة : أنزين اقدر اسوي كتاب استثناء ؟
علطول قالت : لالالا ما يصير.
اخاف صج سألتي رئيستج عن سالفة كتاب الاستثناء اللي انا ما يبتلج طارية - بس السالفة تسكير ابواب و بس
يعني لو سامعة كلام فواز/فايز المطيري وطلعت شهادة وسجلت بالمدرسة منو اللي كان راح يدري, اذا سستمكم بس مسجل الساقطين فيه؟!!
انا بغيت اعيد الثانوية مو علشان اي شي الا اني بغيت اشيل حاجز الخوف و الجهل اللي موجود عندي من سنين تجاة مادة الرياضيات و افهم و استوعب العلوم اللي حولي لا اكثر و لا اقل
منفعة شخصية بحتة لي أنا ... أنا و بس
أنا اللي ببتعب , أنا اللي بدرس , أنا اللي عمري قاعد يروح , شنهو الثقل اللي راح اضيفة عليكم بالله؟!
ليش هالتنكيد و التثبيط و التحبيط؟!! هذا و الرسول يقول اطلبوا العلم و لو بالصين و من مدارسكم عرفنا مقولات "اطلبوا العلم من المهد إلى اللحد"
شنهو الاساس اللي على كيف أمكم تقررون عن الواحد مقدار و عدد المرات المسموحة له بالتعليم؟!
بني آدم عنده إرادة و عزيمة أنه يواصل و ما يوقف منو انتوا حتى تقولون لأ حدك؟!
على العموم
ارجو انكن استمتعتوا برحلتي/قصتي المكوكية
