طلبتج ..لاترديني

[ضوى العيون]

غاليه هاللحظة احمر ويهها وقامت من ع القنفة وادخلت غرفتها
خالد:آه منكن يا البنات
دخلت غاليه غرفتها وظهرت البوم الصور اللي حافظتنه في السده
ويلست تجلب الصور وتتذكر المواقف الحلوة اللي صارت
وفجأة طاحت عينها ع واحد يلست تتأمل الصورة لمدة طويله
كانت صورة احمد ولد عمها سالم كانت متصوره معاه جدام البحر
ظهرت الصورة من الغلاف ،كانت بتاريخ 1993
غاليه:اللي مايبغيك لاتصيح تبغيه..ودر هواه ويوز عنه
اليوم الثاني
انطلق خالد للشغل اليديد وكله امل وتفاؤل،بركن سيارته ودخل

خالد:صباح الخير
انطوان:صباح النور..ممكن ساعدك؟
خالد: انا اسمي خالد
انطوان:تشرفنا
خالد:الله يخليك..انا ياي من طرف الاخ عمران
انطوان:انت الشب اللي راح تشتغل هون
خالد:نعم
انطوان:يا اهلا وسهلاا..تفضل ..من هون المكتب
خالد:بغيتك تساعدني ..
انطوان:من عيني
خالد:تسلم..(ودخل المكتب ويلس ع الكرسي)
:مااشوف الملفات؟
انطوان:في المكتبة..لحظة...تفضل
خالد:هذي الحسابات؟
انطوان:لا..هذي اسامي الشركات اللي عم نتعامل معهن
خالد:اهاااا
يلس انطوان يعلم خالد اصول الشغل حوالي ساعتين وطبعا الشغل محتاج ممارسة اكثر من النظر للملفات والبحث فيهم

الساعة 2 الظهر سيف يالس فمكتبه متملل تام ع الدوام ساعة،شل موبايلة من ع الطاولة واتصل بربيعه
سيف:مرحبا بوخالد..جيف حالك؟
وليد:الحمدالله بخير ويسرك الحال
سيف:شورايك تمر عليه الشركة؟
وليد:اسمحلي سيف..ريلي تعورني
سيف:عسى ما شر؟
وليد:الشر ماييك..اتخيل كنت اركض فحديقة الممز(الاخ رياضي)
وبحركة سريعة التوت ريلي
سيف:هههههه..يمكن حد ظربك بعين
وليد:ههههه..اشك فيك
سيف:حرام عليك..إنت في البيت؟
وليد:نعم..حياك
سيف:عقب ساعة ونص بتشوفني عندك
وليد:حياك الله
سيف:الله يحيك
سيف ووليد اصدقاء من ايام الاعدادية، صحيح ان وليد على قد حاله لكن هذا الشي مافرق مابينهم بل بالعكس سيف يرتاح فبيت وليد رغم صغر حجمه.

عقب ساعة ونص سيارة سيف واقفة جدام البيت

سيف:مرحبا الساع..جيف حالك؟ان شاالله احسن
وليد:الحمدالله..مثل ماتشوف،امشي بالعكاز
سيف:الله يعينك
وليد(بابتسامة):شو اخبار معرسنا؟
سيف:بعدني..لين الحين ماملجت
وليد:ياريال لاحج ع العرس وصدعته
سيف:اللي يسمعك يقول ماخذ اربع
وليد:ههههههه
سيف:وين رايح؟انا ماابغي شي
وليد:والله انا يوعان وابغي اتغدى
سيف:ما اقدر اقول شي..خذ راحتك
ظهر وليد من الميلس وراح لاخته عليا
وليد:عليوه ..انجبيلنا الغدا
عليا:اففف..انا هب متفيجة وبعدين وين لاتوه
وليد:تعرفين انه اليوم لاتا فبيت عمي..
عليا:مب حاله هاي..عنبوه مايرومون ييبولهم شغاله
وليد:عن الرمسه الزايده،سيف في الميلس..لاتفشليني
عليا:سيف..جيه ماتقول من الصبح
وليد:عليا استعيلي شوي
عليا:ان شا الله ان شا الله
سيف:جيه معذب نفسك يا ريال انا ياي اطمن عليك مب اتعبك معايه
وليد:تعبك راحة
سيف:اممم..اروح ريحة المجبوس
وليد:ههه..توك تقول ماتبغي شي
سيف:شو أسوى،مجبوسكم لايقاوم
عليا هالوقت طايره من الفرحة وراحت المطبخ انجبتلهم الغدا وسوتلهم عصير برتقال طازج وحطت الصينية عند الباب ودقت الباب ورجعت للمطبخ اللي مجابل الميلس
تنتظر طلعت سيف من الميلس بس فهاللحظة عمتها زكرتها
عليا:افففف..هذا مو وقته...يايه
عمتها انسانه طيبة لكنها مريضة ،صحتها تدهورت عقب وفات اخوها من 3 سنين،وهي عايشه معاهم عقب طلاق امهم وابوهم من 18 سنة ،فامهم من جنسية عربيه عقب طلاقها سافرت بلادها وتزوجت،وعمتهم رفظت الزواج من كل اللي تقدمولها حتى تربي عيال اخوها.

عليا:نعم؟
العمه:منو في الميلس؟
عليا:هذا سيف ربيع وليد
العمه:اهاا..الله يحفظة
وبعد عشر دقايق دخل وليد غرفة عمته
عليا بنبرة حزن:راح؟
وليد:هيه
عليا فخاطرها:ياخسارة
وليد:ياي يطمن عليه
العمه:فيه الخير..متى عرسه
عليا(بدقات قلب سريعة):هو بيعرس؟
وليد:هيه..ان شا الله عقب اربع اسابيع ملجته
العمه:الله يسعدهم
وليد:آمين
عليا(فخاطرها):مستحييييييل..
واظهرت من غرفة عمتها معصبه والشرار بيظهر من عينها
قبل اذان العصر بساعة خالد ظهر من مكتبه اليديد وركب سيارته يبغي يوصل البيت باسرع وقت ويحطي راسه ع المخده ويروح فسابع نومه
خالد(بصوت عالي): لله يا وقت مضى وأيام مرت وين ..أيام عهد الوفى ويقال ياعونك...تغنم زمانك وأكسبه دام وقتك زين...تراى العمر يفنى مثل زرعاً يحشونه

ووقف عند الاشارة حوالي دقيقة كامله
خالد:يلا ارجوج يلااا ..احسن لي اذكر الله ويلس يستغفر وطاحت عينه على شي تحت الكرسي..شو ممكن يكون؟؟؟؟

 

[ضوى العيون]

الجزء العشرون



كانت مثل العلبة طايحه تحت الكرسي اللي حذال خالد،حاول خالد ان يمسكها لكن الهرنات اللي وراه مارحمته
خالد:الحين تفيجتي
وانتظر الى ان وصل البيت،شاف كيس مجوهرات منخش تحت الكرسي وحذاله علبه،فتحها خالد،شاف داخلها
خاتم رقيق
خالد وهو يتذكر اليوم اللي اشترى فيه عبدالله هالخاتم
(وهو يتنهد):الله يرحمك..الله يغفر لك
صك الباب وشل الكيس،ودخل البيت وسلم
بوخالد:تغديت؟
خالد(فعالم ثاني):لاا
ام سلطان:انجبلك الغدا؟
خالد:ياريت
ام سلطان:ان شاالله
بوخالد:انا بعد ..اغرفيلي شوي
ام سلطان:توك متغدي
بوخالد:الله اكبر عليج..قبل شوي غرفتيلي ملاس واحد بس
ام سلطان:انت اللي قلت ..ماتشتهي
بوخالد :الحين اشتهي
سلطان:يالله الحين بتسوون سالفة ع غدا؟الله يستر هذي بوادرالشيخوخة
بوخالد:شيخوه تاخذك ان شاالله
سلطان:هههههههههههه...
ام سلطان:استح ..خيل،هذا ابوك
سلطان وهو يحب راس ابوه:سامحنا بوخالد
بوخالد:روح ذاكرلك كلمتين تنفعك
سلطان:ان شاالله
بوخالد:يلا خالد ،قوم نتغدا
خالد:ان شاالله..
ع الغدا
بوخالد وخالد بس يالسين ع الطاولة
قام خالد وبلح لابوه ولعمره السمج وجدم صحن التمر لابوه ويلس
بوخالد وعينه ع الصحن:انا زعلان منك
خالد باستغراب:ليش يابويه؟
بوخالد:اسمع من الناس انك اشتغلت وانا ياغافلين لكم الله
خالد:انا ماقصدت
بوخالد:الحين عرفت معزتي عندك
خالد:يابويه لاتكبر السالفه..انا قلت اذا عيبني الشغل واستقريت عليه بخبركم
اخاف افرحكم وبعدها اطلع من الشغل
بوخالد:كم صارلك وانت فهالشغلة؟
خالد:هذا الاسبوع الثاني
بوخالد:مرتاح؟
خالد:الحمدالله
بوخالد بابتسامه خفيفه:الله يوفقك
خالد:امين اجمعين..بعدك ماخذ ع خاطرك مني؟
بوخالد:لاا..بس كنت اتمنى اني اكون اول واحد يعرف
خالد:والله يابويه كل شي صار فجأة
بوخالد:اخافك تعرس من ورانا وتقول صار فجأة
خالد:هههههه..لاعاد ماتوصل لهذي الدرجة..باين انه بعدك زعلان
بوخالد:لا انا هب زعلان
خالد وهو يقوم من كرسيه:وهذي بوسه ع الراس
بوخالد:بعيد عني..ريحتك هسس
خالد:ههههه

دخل خالد غرفته وظهر الخاتم ويلس يتامله

ودي اموت اليوم واعيش باجر..
واشوف منهو بعد موتي فقدني..
ومنهو حملني لين ذيج المقابر..
واشكر كل من كرمني ودفني..
شخص تعنالي مع انه مسافر..
وشخص قريب للأسف ماذكرني..
ومنهو يرتب غرفتي والدفاتر..
وان شاف صورة لي صاح وحضني..


عقب صلاة المغرب
خالد و غاليه يالسين ع الطاولة ياكلون بقسم مع حليب
غاليه:شواخبار الشغل اليديد؟
خالد:ماشي حاله
غاليه:شو سالفتك اليوم؟كله سرحان
خالد:انا؟؟؟
غاليه:هيه ..انت..اللي ماخذ عقلك يتهنابو
خالد:آآه ..انا وين وانتي وين
غاليه:ههههه
خالد:اليوم صارلي شي عجيب
غاليه:شو؟
خالد :اليوم وانا واقف عند الاشارة شفت ....الخ
غاليه:سبحان الله!!
خالد:شو اسويبه؟كيف اوصل الامانه لمرت عبدالله
غاليه:احسن شي تسويه انك تروح لاخوها وتعطيه الامانه
خالد:بس انا ماعرف رقم اخوها
غاليه:اسال مايد اخ عبدالله
خالد:هيه والله..كيف راح عن بالي
غاليه بخبث:اقولك انا... اليوم بالك مب عدنا
خالد:هههه...اقول...صبيلي حليب
غاليه:خلصت الحليب كله ...ماتم شي في الدله
خالد:الله اكبر عليج..سلطون شارب كوبين
بدخلةام سلطان البيت:شبلاه سلطان؟
خالد(قلبه وقف):ما مافيه شي..اقصد سلطان ولد عمي
ام سلطان:هييه
غاليه:هههههههه

بعد اسبوعين

عليا: الو...سبيت
سبيت بدون نفس:نعم... شو تبغين؟
عليا بدلع:سبيت بليييييز ابغيك فخدمة
سبيت:اففف..هذا مب وقته انا في البيت بعدين بتصل فيج
عليا:اوكي..لاتنسى
سبيت:اوكي اوكي..باي
عليا:باي
عليا فتاة في 23 من عمرها ،متوسطة الجمال عقب الثانوية يلست في البيت
لانها مش فالحة في الدراسة ،حاول معاها اخوها تكمل دراستها لكن ماشي فايده،عنيده وراسها يابس..

فيوم الجمعه الكل تجمع فبيت ام عبدالرحمن...البنات وام سلطان بن عبدالرحمن وام سلطان بن سالم...
عاشه وغاليه يالسين فغرفة ام عبدالرحمن يسولفن..غرفة اليدة غرفة بسيطة مفروش فيها سجاده خمريه حرير واثاث خشبي من الزين وتنتشر في الغرفة ريحة العود والطيب..

 

[ضوى العيون]

عاشه:غليوه
غاليه:نعم
عاشه:متى ملجتج؟
غاليه:الخميس الياي
عاشه:يالله..قريب
غاليه:لاتذكريني
عاشه:اونج عاد مب مستعيله
غاليه:عاشوه..اقبظي لسانج احسن لج...بنشوفج شوبتسوين؟
عاشه:فديتني انا..اصلا خطبتي وملجتي كلها فيوم واحد
غاليه:ههههههههه..خسج الله انتي المستعيله ع العرس هب انا
عاشه:اسولف حرام حد يسولف؟
غاليه:خذي راحتج حبيبتي
عاشه:شو بتلبسين في الملجه..فستان جاهز او تفصيل؟
غاليه:انا اتفاجأت يوم جدموا الملجه عسب جيه اشتريت جاهز
عاشه:ماخذتيني معاج..الله يسامحج
غاليه:ان شا الله يوم بفصل فستان العرس باخذج معايه..كله ولازعلج يا الشيخة
عاشه بابتسامه عريضه:وناسه اسمينا بنحوط حواطه
غاليه:هذا اللي هامنج
عاشه:بالعكس ..آخذ خبرة
سلامة (بابتسامه):غليوه..محلوة
غاليه:اووه..جان استحي
سلامة:ههههه..غليوه متى العرس؟
غاليه:ان شاالله عقب شهرين
سلامة:امسات عقب صلاة الفجر ييتي(جئتي) فبالي
غاليه:عسى دووم اطري ع البال
عاشه:ياللي على البال تطري وانت ماتدري...وش ذنبه اللي يحبك وانته خليته
سلامة:متفيجه..غليوه عقب ماتعرسين لاتقطعينا
غاليه:ههههههه..جيه انا وين سايره؟
ام عبدالرحمن: قوموا يابنيات الغدا زاهب
الكل:ان شا الله امي...
ام عبدالرحمن(وهي تصد وراها والبنات يسولفن ):ماشبعتوا من هاللغوة الزايده؟
عاشه(وهي حاطه ذراعها ع جتف غاليه):نتشبع من العروس يام عبدالرحمن
ام عبدالرحمن:فديتها وفديت ريحتها
غاليه وهي تحب راس يدتها:فديت روحج..
ام عبدالرحمن:حبيبتي
عاشه(وعينها ع السقف):آه ..متى اعرس ؟وشوف هالحب
ام عبدالرحمن:خسج الله ياعويش صدق مافيج خير..على منو بتظهرين ؟ابوج جدامج
عاشه:ههههههه...بخبر ابويه
ام عبدالرحمن:خبريه..
سلامة:شو مسوين غدا؟
ام عبدالرحمن:مالح وصالونة دياي
سلامة:واااااااو..يلا يلا قوموا
غاليه:قمنا
يوم الملجة

فبيت بوسالم عاشه فغرفتها يالسه تتزهب بتروح عند غاليه
سلامة(وبيدها الكتاب):ياحظج..
عاشه:ذاكري احسن لج الحين الرياييل يبون وحده تشتغل وتكد عليهم
سلامة:الله ياخذ الثانوية
عاشه:تعرفين شو احلى شي في الثانويه
سلامة:شو؟
عاشه:الهدايا اللي بتحصلين عليها
سلامة:آآآآآه..هذا اللي مصبرني
عاشه:سلموه..وين حلقج اليديد؟
سلامة:أي واحد؟
عاشه:الأزرق..
سلامة:داخل الصندوق
عاشه:الحمدالله ..اتجهزت قبل الوالده
سلامة:امي بتسير؟
عاشه:اكيد
سلامة:حرام عليكم..كلكم بتستانسون الا انا
عاشه:افففف...اذا سرتي شو بتسوين؟بتغرفين العيش؟
ام سلطان:عاشه...عاشه
عاشه(بصوت عالي):يااايه
ونزلت عاشه وراحت غرفة امها
عاشه:انا زاهبه
ام سلطان:اخوج في البيت؟
عاشه:مادري..ليش؟
ام سلطان:التاير فاش..
عاشه فخاطرها:كله من عينج ياسلموه
فهاللحظة دخل سلطان البيت
ام سلطان:سلطان
سلطان:نعم
ام سلطان:الغالي ..بغيتك توصلنا بيت عمك

ام سلطان:التاير فاش
سلطان:انا ماروم..اتصلي بولدج سيارة موقفة عند بيت يدتي
عاشه:هذي امك اللي ربتك ..تردلها طلب؟
سلطان:انتي اسكتي يالسوسه..مافيج خير
ام سلطان:عطنا مفتاح سيارتك بخلي الدريول يوصلنا
سلطان:عطيني عشر دقايق وبوصلكم
عاشه:نفسي اعرف شوهالحب للسيارة
ام سلطان:صخي..ماصدقنا

في السيارة
ام سلطان:الله يوفقج يا غاليه ويسعدج
عاشه:آمين
سلطان(فخاطره):بحظر زفافك ياحبيبي ..بحظر زفاف اللي هويته
سلطان:وصلنا
ام سلطان:مابتنزل؟
سلطان:لا
ام سلطان:عمك بيفرح ان شافك
سلطان:راسي مصدع مااقدر
ام سلطان:ع راحتك
سلطان هالوقت حس بظيجه فقلبه،نزلهم وراح الريف مول
يلس فأحد المطاعم وطلبله عصير ليمون يبرد ع قلبه
عاشه:غليوه...الفستان يجنن عليج
غاليه:شكرا حياتي
عاشه:بس مكياجج وايد خفيف
غاليه:احسن...حتى اكون مختلفه وانا عروس
عاشه:ياعيني
غاليه:ههههه
عاشه:اليازية يايه معاهم؟
غاليه:لا..اتصلت فيني قبل ساعة واتعذرت
عاشه:غريبه؟ملجت اخوها وماتحظر
غاليه:ريلها امريظ
عاشه:الله يعافيه...مادام جيه خلها تيلس مع ريلها
غاليه:هههههه..انتي داهيه
عاشه:حرام عليج
فهاللحظات مريم وام سلطان في المطبخ يزهبون العشا
مريم:شو يام سلطان...ماخطبتي لولدج؟
ام سلطان:لا والله..كان بخاطري ايوزه لميره..لكن الله ماكتب
مريم:الله يفرحج فيهم...

 

[ضوى العيون]

في بيت بوسيف

بوسيف وهو يعدل سفرته:وين ولدج؟اتأخرنا عن العرب
ام سيف بتوتر:ممكن تيلس حتى افهمك؟
بوسيف:شو اللي صاير يا فاطمه؟
ام سيف (وهي ماسكه طرف شيلتها بالقوو):ولدك مايبا يعرس
بوسيف وهو غير مستوعب:نعم؟شوقلتي؟
ام سيف:الزواج قسمة ونصيب
بوسيف(بصوت عالي):سيف..سيف..سيفوه
ام سيف:ولدك مو في البيت
بوسيف:الجبان..وين شرد؟..ارمسي(بصوت عالي)
ام سيف(وهي تبلع ريجها):ماعرف؟
بوسيف والشرار بيظهر من عينه:وين ولدج؟؟؟؟
ام سيف:والله العظيم ماعرف وين مكانه
بوسيف:الله ياخذك الله ياخذك...وين اودي ويهي عن العرب
ام سيف:لاتدعي عليه..حرام
بوسيف:حرمت عليه عيشته
ام سيف وهي تصب له كاس ماي بارد:اشرب..برد ع فادك
بوسيف:مالي نفس...حسبي الله ونعم الوكيل..اتصلي بولدج
ام سيف(السماعه ع اذنها):...مغلق
عقب ثلاث دقايق من الصمت
بوسيف:فاطمه
ام سيف:نعم؟
بوسيف:انتي جبرتي الولد ع غاليه؟
ام سيف:لا والله ابد..هو بنفسه مختارنها
بوسيف:انتي شرتي عليه يجدم يوم الملجه؟
ام سيف:لا..
بوسيف:عيل ليش مايباها؟هو ع باله بنات الناس لعبه؟؟؟
ام سيف:اكيد فيه سبب
بوسيف:هذا اصعب موقف اواجهه فحياتي...كيف ابلغهم بهذا الخبر السعيد؟ولديه خلاص مايبا بنتكم..
ام سيف:لاحول ولا قوة الا بالله العلي العظيم
بوسيف(وهو يشل موبايله من ع الطاوله الزجاج):مب عارف بشو انطق؟...
فهاللحظة بوخالد واخوه سالم وخالد يالسين في الميلس ينتظرون بوسيف وسيف
سالم:صلينا العشا وهم بعدهم ماوصلوا
بوخالد:الغايب عذره معاه...
وبعد خمس دقايق رن موبايل بوخالد
بوخالد:مرحبا بوسيف
بوسيف:مرحب باجي...شحالك بوخالد؟
بوخالد:بخير ونعمه...عسى ماشر وينكم؟
بوسيف وهو حاط يده اليمين ع يبهته :..........

فغرفة غاليه
عاشه:اتأخروا..
غاليه:واايد
عاشه:من الحين اتحاتينه؟
غاليه وهي تبتسم من ورا خاطرها:....
وفجأة سمعوا بو خالد يدق ع الباب:غاليه؟؟؟
غاليه:تفضل ابويه
بوخالد وهو يبتسم لعاشه ابتسامه باهته:عاشه..امج تبغيج
عاشه وقلبها مب مطمن:ان شاالله
غاليه (بضربات قلب متسارعه):ليش واقف يابويه؟تفضل
بوخالد:غاليه
غاليه (وهي تبلع ريجها): نعم؟؟

 

[ضوى العيون]

الجزء الحادي والعشرين

في المسيد وعقب صلاة العشا في الريف مول
كانت عين سلطان ماتفارق هالشاب اللي يالس يذكر الله واللي البسمة ماتفارق ويهه رغم اعاقته اللي جعلته اسير للكرسي المتحرك..
سلطان وهو يتقرب للشاب:السلام عليكم(وهو ماد يده)
الشاب :وعليكم السلام والرحمة
سلطان بابتسامه:عندي سؤال اذا ممكن؟
الشاب:تفضل..
سلطان:تقدر تقول اني فضولي لكني بسالك
الشاب:هههه..تفضل يا الغالي..شو ...سؤالك؟
سلطان:شو سر هالابتسامة اللي فويهك؟حتى اكون صريح معاك..انا انسان ولله الحمد كل شي متوفر لي لكن ..مش سعيد ،وانت رغم اعاقتك سعيد؟
الشاب:تبغيني اقولك اياها وباختصار؟
سلطان:ياريت
الشاب:الامل..
سلطان : الامل؟؟
الشاب:نعم..الامل

وفجاة وصله مسج من عاشه يقول: تعااال حالا
سلطان:دريول ابوج يا عويش
سلطان وهو يوقف سيارته جدام بيت عمه حذال سيارة ابوه:الوالد موجود!!
واتصل باخته عسب تطلع
سلطان هالوقت يحاول يلهي عمره حتى مايتذكر غاليه ،فيلس يلعب في الموبايل...لكن
سلطان فخاطره:لين متى بتظل كابت ؟لين متى؟؟؟خلاص يا سلطان
غاليه راحت ..راحت الى الابد
بصوت عالي:مستحيييييل..مستحيل(وضرب السكان بييده).
وحرك السيارة ورجع للشارع العام مرة ثانية،بس هالمرة بسرعه جنونية وطاف الاشارة الحمرا
عاشه وهي تفتح باب الحوي:وين راح؟ قبل شوي متصل بي يقولي اظهري
ام سلطان:اتصلي به مرة ثانيه..
عاشه:ان شاالله...
سلطان (بعد ما ارتاحت نفسيته):اوووه..عاشه
عاشه:اخيرا وصل
ام سلطان:وين رحت؟
سلطان:خذتلي لفه ورجعت

في السيارة
سلطان فخاطره:الله ياخذك ياسيفووه..الله ياخذك
فهاللحظات كان سلطان مستغرب من امه وعاشه،طول الدرب محد رمس فيهم،بس عقب دقايق لاحظ من المنظرة العاكسه دموع تنزل من عين العاش..
فخاطره:هذي دموع الفرح يا عاشه..بس انا دموعي حزن وقهر ع فراق الغاليه..
قطع هالصمت صوت الام المتحسر
: حسبي الله عليه..مايستاهلها هالخايس
سلطان من سمع هالكلمة ضرب بريك :شو؟؟؟
عاشه(قلبها وقف):شبلاااك؟جيه وقفت السيارة؟؟؟
سلطان وهو يصد لامه اللي يالسه حذاله: شواللي صار؟
ام سلطان :ماصار نصيب
سلطان بذهول:كيف ..يعني؟
عاشه:الاخ..هون..مايباها
سلطان:..............
وحرك السيارة بكل برود وعقله في عالم ثاني...

ثاني يوم الكل عرف بالسالفة وتلفون بيت عبدالرحمن ماسكت
واليدة طايحه سب بسيف واهله وغاليه صاكه ع نفسها الباب وماتبغي حد يكلمها

بوخالد وحرمته يالسين في الصاله عقب الغدا
بوخالد(وقلبه حزين ع بنته):نحن تسرعنا..ماسالنا اكثر عن الولد
مريم:لاتقول جذيه ..انت سويت اللي عليك وزياده وهذا نصيب
بوخالد:بس ..
مريم:انت ماتدري وين الخير الله حاطه..ويمكن اللي صار خير لغاليه والنا جميع
بوخالد:الحمدالله على كل حال
خالد وهو يفتح باب الصاله:السلام عليكم
بوخالد ومريم:وعليكم السلام والرحمة
خالد بابتسامه:وين غاليه؟
بوخالد:فغرفتها
مريم:ماتغدت
خالد:ليش؟
مريم:مب طايعه تاكل ولاتشرب
خالد:عن اذنكم بسير الها
مريم:ارجوك اقنعها تاكل ولو لقمة
خالد:ان شا الله ..بحاول
توجه خالد صوب غرفة غاليه ودق الباب ثلاث مرات ودخل
خالد:السلام عليج..
غاليه(بصوت واطي):وعليكم السلام والرحمة
خالد:شكلج يقول خسرانه في الاسهم
غاليه وهي تصد بويهها للصوب الثاني:افف
خالد:ليكون خسرانه مليون؟؟؟
غاليه:مالي نفس لسوالفك البايخة
خالد:افااا..اصبحت انسان بايخ
غاليه:.....
خالد:بسالج سؤال وجاوبيني بصراحة
غاليه وهي تلبس ساعتها الزرقا:نعم؟
خالد:انتي خسرانه شي؟
غاليه(بنظرة استغراب):...
خالد: غيرج عنده عيال وتطلقوا شوتقولين عنهم؟وانتي لاملجتي ولاعرستي..
غاليه بعصبيه:بس اهان كرامتي
خالد:بصراحة اسمحيلي اقولج انتي انسانه غبية وبايخة و..
غاليه:نعم؟انت الحين ياي تخفف عني والا تزيدني؟
خالد:شوفي يلستج فهالحجرة من البارحة وعدم اكلج يدل على شي واحد وهو انج تبينه ومتمسكه فيه
غاليه(بصوت عالي):يخسي الا هو..بنت عبدالرحمن ماتنزل عمرها لها المستوى
خالد:اذا تبغين تقنعيني بكلامج قومي تغدي وتيلسي معانا في الصالة
غاليه:اوكي..بس بغيت حبة بندول لهالصداع
خالد:اليوع مسولج صداع ..قومي تغدي
غاليه:ان شاالله
خالد وهو يفتح باب الحجرة:تفضلي الشيخة
غاليه:ههههه...دام فضلك
بوخالد من شاف بنته قام وحبها ع راسها:فديت ابنيتي
خالد:هيييها ..منو قدج يا غليووه...الكل مدلعنج
مريم:تغار؟؟؟
خالد:جيه ماغار؟ ..تراني انسان حالي حالكم
مريم:انت عرس وان شا الله حرمتك بتدلعك
خالد: ع خير ع خير ...يلا بخليكم بحطي راسي وبرقد
مريم:عفانا الله من يسمع طاري العرس يشرد
بوخالد:عفانا الله
سلطان من سمع بالخبر وهو طول الوقت سرحان ومب عارف كيف يعبر عن فرحته
ولكن اخته سلامه قطعت عليه سرحانه
سلامه: شو رايك باللي صار؟
سلطان: مايستاهلها
سلامة:واايد عليك
سلطان:المهم .. عرفناه ع حقيقته ..وهي تستاهل اللي احسن عنه
سلامة:اكيد..بس..بخاطري اعرف شي واحد..شو سر رفض سيف لغاليه فآخر لحظة وهو اللي جدم يوم الملجه؟
سلطان:تصدقين هالسؤال مايا في بالي..بس يمكن الاخ معرس وحرمته الاولى هددته
سلامه: افكارك عجيبة..تنفع محلل اجتماعي
سلطان:هههه..اقول سيري ذاكري..ماتم شي ع الامتحانات
سلامة:لو سمحت انا اعرف مصلحتي اكثر عنك
سلطان:نعم؟؟؟هذا ويهي ان ظهرتج مكان مرة ثانيه يا سلموووه
سلامة:الحمدالله عدنا دريول
سلطان:دريول؟؟الحين صار عندج دريول؟؟ماعليه ياسلموه ..براويج
سلامه:عن اذنك
سلطان:اذنج معاج..بنشوف عاد كم نسبتج؟يا عبقرينو زمانج
سلامة:ان شا الله 99 و9 من عشرة
سلطان:اتحداج... محد فيكم وصلني الى الان..عويش1. 78%واحمد 67% وانا اعلى نسبة فيكم
سلامة:ذكرني بنسبتك؟
سلطان:88.4%
سلامة:خلاص عيل بدا التحدي وبتشوف اني بطوفك
سلطان:بنشوف ولج مني 1000 درهم
سلامة:اوووكي..جهز الالف من الحين
سلطان:جاهزه من الساعه
تركته سلامه وخلته يرجع مرة ثانيه بفكره لغاليه..ونزل للصالة وشاف امه ترمس يارتهم ع التلفون فيلس جبالها
سلطان فخاطره:هالمرة لازم اتشجع واقول لامايه ان قلبي اختار غاليه ،غاليه وبس..
بعد 3دقايق والام بعدها ترمس وماصكرت عن الحرمة
سلطان(فخاطره):يلا عاد..بسكن رمسه
واخيرا انتهت المكالمه
سلطان:اممم..ام سلطان
ام سلطان:نعم..
سلطان:ابغي اكمل نص ديني
ام سلطان:الحممممدالله..اخيرا نطقت..من باجر اقصد من اليوم بدور لك
سلطان:امايه..ماله داعي انا حاط فبالي وحده واتمنى انج تخطبينها لي
ام سلطان:ماشاالله..يلا ريحتني ومنو سعيدة الحظ؟اقصد..اعرفها
سلطان:البارحة كنتي فبيتهم
ام سلطان(صابتها حالة من الذهول): تقصد ..غاليه؟؟؟
سلطان:هييه..غاليه بنت عمي..وانا اولى بها من الغريب
ام سلطان:صحيح..بس
سلطان:بس شو؟؟
ام سلطان: استحي اكلمهم من الحين والبنت ماصارلها يوم من فجة خطوبتها
سلطان:انزين...شورايج بالاسبوع الياي؟؟؟
ام سلطان:يصير خير..بكلم ابوك عسب يكلم اخوه...واللي ايي من الله حياه الله
سلطان:بس شورايج باختياري يا ام سلطان؟؟؟
ام سلطان:هذي جوهرة يا سلطان..جوهرة غاليه
سلطان:وهي غاليه..
(هذا كله كان تخيلات وبمجرد الام انتهت من مكالمتها الهاتفيه اكتفى سلطان بالصمت)
سلطان فخاطره:لا لا..انا احسن شي اسويه اخبر العاش اللي فبالي
وهي تسال الغلا عن رايها عسب مااحرجها ولااحرج نفسي جدام عمي والاهل
في المسا
غاليه ماسكة قلم حبر جاف ودفتر مذكراتها الوردي ويالسه ع المريحانه اللي فآخر حديقة بيتهم...
غرور
انا شخصٍ كبير ماني من اصغر العرب والانذال
انا شخصٍ عزيز ومستحيل انزل لمستواك ياصغير الشان..
انا لاجلي القمرة تهين الليل ولاجل عيني تذل الذليل
وحتى الكرامة نفسها تنسى عمرها وتنهان..بس من ينطرى اسمي بأي مكان..
وانت تجي تتقرب لي وتبيني بحبك انهان..لاحشى لا انت ولا عشرة من امثالك يا فلان..
قول عني مغرورة ..قول عني اللي بتقول..
والله لاانته ولا الكرامة وبجنبها العزة ولا حتى الغرور..تسوون التراب اللي تحت رجلي منثور...
(بقلم صديقتي (...

 

[ضوى العيون]

بعد يومين في مكتب خالد
خالد بصوت عالي:انطوان..انطوان
انطوان:نعم استاز
خالد:شو اخبار الشغل اليوم؟
انطوان:الحمدالله ...ماشي حاله
خالد: كم واحد يشتغل في المحل؟
انطوان:خمسه..لا سته..ايه سته
خالد: انا صممت ثلاث تصاميم وابغيك توزعه ع الموظفين واكثر تصميم يعجبهم راح ننشره في الجريده
انطوان:فكره كتير حلوة
خالد:هو عباره عن عروضات للبضاعة اللي في المخزن ..مب اليديد
انطوان:حلوو
خالد:بس في البدايه ابغيك تبعث لي الخبير المالي حتى اعرف مقدرتنا للنشر
انطوان: حاضر..شي تاني استاز خالد؟
خالد: لا شكرا
خالد فخاطره:كيف اتصرف بفلوس المحل؟لازم اشاور عمران في البدايه..
وقام خالد من مكتبه وراح يدور انطوان
خالد:انطوان
انطوان:نعم؟
خالد:عندك رقم عمران؟
انطوان وهو يظهر موبايله من جيبه:ايه..لحظة ..رقمه ......442
خالد:شكرا..
ورجع خالد لمكتبه واتصل بعمران
خالد:الوو
عمران:الو
خالد:السلام عليكم
عمران:وعليكم السلام والرحمة
خالد:معاك خالد من محل الاثاث
عمران بصوت مستعجل:نعم خالد فيه شي؟
خالد:ااا..والله بغيت اخذ رايك بموضوع
عمران:واللي هو؟
خالد:ممكن ناخذ مبلغ من ربح المحل عسب انزل اعلان في الجريده؟
عمران:اللي تشوفه في مصلحتنا سوه ..يلا مع السلامه
خالد:مع السلامه
خالد فخاطره:شبلاه؟؟؟انسان غريب..يمكن مشغول..يمكن؟
غاليه يالسه مع مريم (ام سلطان) يشوفون المسلسل السوري ليالي الصالحيه الحلقات الاولى لما رجع المخرس للحاره ع قناة سما دبي

وفجاة يرن موبايل غاليه ومن شافت اسم المتصل ماحبت ترد

ام سلطان:جيه ماتردين؟
غاليه:ابغي اشوف المسلسل مالي نفس اكلم حد
ام سلطان:حالات عجيبة فهالبيت
غاليه:الله يخليج خالتي علي عالصوت
ومرة الثانيه رن الموبايل

ام سلطان:لاحول ولا قوة الا بالله
غاليه من دون نفس:ان شا الله برد
وشلت غاليه موبايلها وراحت حجرتها
غاليه(بصوت متظايج):الو
اليازيه:اهلين غاليه..شحالج؟
غاليه:الحمدالله بخير ويسرج الحال
اليازيه: ادري انج متظايجه... وتقولين فخاطرج هاي بعدها إلها ويه ترمس
غاليه:اكيد اللي صار مو شوي بس ماتوصل لهالدرجه
اليازيه:غاليه
غاليه:ماله داعي تتكلمين في الموضوع وانا خلاص نسيت السالفه
اليازيه:ادريبج..قلبج ابيض
غاليه:شكرا ع الاطراء
اليازيه:بس انا بغيت اقولج شي ولازم تسمعينه...
غاليه:نعم؟؟؟
اليازيه: انا ماابغي ادافع عن اخويه ..لكن بغيتج تعرفين..
غاليه:اعرف شو؟خلاص مااعاد يهمني امر اخوج ولا غيره
اليازيه:غاليه..نحن كلنا متفاجئين باللي صار..وسيف متغير وايد
غاليه:...
اليازيه:اتخيلي كله ظايج وماله نفس يكلم حد ومستوي عصبي..حتى الشغل تركه
غاليه:وشو المطلوب مني؟
اليازيه:غاليه..سيف اخويه مش طبيعي والاعراض اللي فيه تقول ان مسوايله عمل
غاليه:ههه....هاي مشكلتكم من يغلط الواحد تقولون عنه مسحور
اليازيه:ماقص عليج وابويه حاول يوديه عند المطوع يقرا عليه وهو هب طايع...غاليه
غاليه:نعم
اليازيه:ابغيج تصبرين عليه شوي..
غاليه:نعم؟
اليازيه: ارجوج ..سيف يحبج ويباج
غاليه باستهزاء:بااين ..ع العموم حتى لو رجع و طلبني مرة ثانية انا مابغيه..خلاص النفس عافته..بس اتمنى ان هالشي ماياثر ع صداقتنا
اليازيه بنبرة حزن:اكيد..اطلب منج طلب اخير
غاليه:آمري...
اليازيه:ادعيله..مع السلامه
غاليه(وقلبها متقطع): مع السلامه

عقب اسبوع
وصل المسج العجيب لغاليه ومثل كل مرة من دون رقم

ياروح روحي هزني
الشوق مابات...
غلاك سكن في الجوف
ظاهر وخافي..
مهما تباعدنا وطالت
مسافات..
وافي ورب الكون مازلت
وافي..
عندي تراك اغلى من
العمر والذات..
اهديت لك "قلبي"وهذا
اعترافي...
غاليه من شافت المسج على طول حذفته ومااهتمت

بعد منتصف الليل
في بيت سالم وبالتحديد فغرفة البنات،عاشه يالسه ع النت وتقرا قصة وسلامه راقده ويدخل سلطان..

سلطان :عاشه
عاشه:شووو؟
سلطان:ابغيج شوي
عاشه:افف..ماتشوفني مندمجه في القصة اللي اقراها
سلطان:من البارحه وانتي تقرين ..لو مصحف جان ختمتيه
عاشه:استغفر الله العظيم..نعم طلباتك؟؟
سلطان: ابغيج فموضوع مهم..
عاشه:تفضل..
سلطان:فحجرتي احسن
عاشه فخاطرها: ليكون حد خطبني
ودخلوا الحجرة ،يلست عاشه ع القنفة وهو يلس ع السيكل الثابت
سلطان:عاشه..
عاشه والرقاد واصل حده:شوووه؟
سلطان:انا قررت اتزوج
عاشه:نعم؟؟؟..ههههه
سلطان:شواللي يظحك؟
عاشه:وهي تتذكر اللي كان فبالها..لاماشي..هذي الساعة المباركه
سلطان:اكيد بتسالين نفسج ..ليش خبرتج باللي فبالي
عاشه:ليش؟
سلطان:ابغيج تسالين البنت اللي ابغيها عن رايها وان رفضت محد يعرف بالسالفه فلا احرجها ولاتحرجني
عاشه وهي مندهشه من الكلام اللي تسمعه:صعبه..استحي..الا اذا كنت اعرفها
سلطان بابتسامه:تعرفينها
عاشه والفضول بياكلها:صدق؟؟
سلطان:واقل من شهر كنت فبيتهم
عاشه:منو هاي؟؟؟
وشهقت شهقه عاليه:غليوووووووووووووه؟
سلطان:تقصدين ..غاليه
عاشه:احلف..تبغي غليوه
سلطان:اقولج غاليه
عاشه:وااااااااااااو..احلى خبر سمعته فحياتي..سلطان انت انسان ذويق وتعرف تختار
بس..
سلطان:بس شو؟
عاشه:حرام تاخذك ..اشفق عليها
سلطان:نعم؟؟
عاشه:غاليه يناسبها واحد رقيق المشاعر...مو مثلك دفش
سلطان:قومي قومي احسلج ..بغيتج عون صرتي فرعون وبعدين يالحبيبة انتي ماتعرفين من يكون سلطان
عاشه:يا عيني ..
سلطان:شورايج من باجر اوديج عندها وتسالينها؟؟؟
عاشه:لا ...مااقدر..
سلطان وهو عاقد حواجبه:جيه؟
عاشه:ربيعتي ميسون عازمتني فبيتهم
سلطان:اتولي..بوديج باجر بيت عمي...اوكي
عاشه:امري لله..كله ولازعلك
سطان:فديت العاش ..اختي الغاليه
عاشه:آآآآه ..الحين استويت غاليه..
سلطان:يلا يلا وايد دلعناج...اظهري ونيمي الباب
عاشه:ان شا الله ...يامعرسنا
سلطان:الله..محلات الكلمه..معرس

 

[ضوى العيون]

اليوم الثاني ..الساعة ثنتين الظهر

عمران:مرحبا خالد
خالد:مرحبتين..ياهلا وسهلا..تفضل
عمران:دام فضلك
خالد:ماخبرتني انك ياي حتى نستقبلك بالورود والياسمين
عمران:ههههه...اول مرة ادري انك مسولفي
خالد: بعدك مااكتشفت شي...شوتشرب؟
عمران:عصير لومي
خالد(وهو يهوس ع الجهاز):جميل جيب اثنين عصير لومي
عمران بهدوء:يوم الخميس اللي طاف مريت ع المحل
خالد:....
عمران:واكتشفت انك اهل للثقة ويعتمد عليك
خالد بابتسامه:اشكرك ع ثقتك بي وان شاالله اكون عند حسن ظنك
عمران:اكيد...
لاحظ خالد ان عمران في عالم ثاني وباله مب معاه
خالد:شورايك اعزمك ع الغدا؟
عمران:مالي نفس
خالد:ليش؟عسى ماشر
عمران:انا تعبان ..تعبان ياخالد
خالد:سلامتك..شو اللي متعبنك؟
عمران:مشاغل الحياة وهمومها
خالد:الكل تعبان... مافيه حد مرتاح
عمران: انت متزوج؟
خالد:ههه..لا بعدني
عمران:ليش ماتزوجت لين الحين؟
خالد:والله ..مالي خلق لعوار الراس
عمران:هههه...
خالد:وانت متزوج؟
عمران:لا
خالد:غريبه؟
عمران:وشو الغريب؟
خالد:يعني..واحد مثلك بهالعمر وعنده خير(ماشاالله) ومب متزوج ...غريبه؟
عمران:لا تستغرب ..شورايك نتمشى بالسيارة؟
خالد:اوكي..
عمران:باخذك بسيارتي وبرجعك للمحل مرة ثانيه
ركبوا السيارة
عمران وهو ماسك السكان ومن دون مايصد لخالد:خالد
خالد:نعم؟
عمران:انا قلبي ارتاحلك
خالد:ههه..نفس الشعور
عمران:تدري ليش اخترتك من دون الخلق؟
خالد:ليش؟
عمران:تذكرني فعمري
خالد:كيف يعني؟
عمران:حسيت في اشيا مشتركه..مثل نظرة الحزن اللي فعينك
خالد:اهاا..
عمران:قبل تسع سنين لما كنت فبدايه العشرينات خطبت بنت عمي وكنت اعتبرها اغلى مااملك وهي كذلك كانت تبادلني نفس الشعور وانتظرتها سنتين حتى تخلص دراستها وبعد ماخلصت دراستها ملجنا وبعدها كنا نجهز ترتيبات العرس ..نصبنا الخيمة وماتم غير يوم ع العرس واتخيل شو اللي صار
خالد:شو اللي صار؟
عمران: يوم العرس امها سارت توعيها لصلاة الفجر لقتها ..(وهو يتنهد) ميته
خالد (وهو مصدوم):ماتت؟
عمران:هيه..ومن يومها قررت اني ماتزوج
خالد:هالكثر تحبها؟
عمران:تدري ليش
خالد:..ليش؟
عمران:هي اللي شجعتني اكمل دراستي واكون نفسي واللي انا فيه الحين هو بفضل الله ومن ثم هيه
خالد:بس اللي اعرفه عنك انك تاجر ولد تاجر
عمران:صحيح بس مو كل تاجر غني يكرم اهله انا ابويه ما ساعدني بشي وبدايه هالخير هو مهرها
خالد:من مهرها؟؟؟
عمران:هذا الشي الوحيد اللي ساعدني فيه الوالد وهي رجعتلي نص مهرها وبالسر والى الساعه محد يعرف حتى اهلي عبالهم سلفه من البنك
خالد:بصراحة ماكنت اتوقع ان في ناس فيهم هالصفات الاصيلة
عمران:الله يرحمها
خالد:الله يرحمها..ويرحمنا اذا سرنا اليهم
وفجأة رن موبايل خالد..
غاليه:الو خالد
خالد:نعم؟
غاليه: تعال بسرعه
خالد: ليش ؟؟شومستوي؟؟؟

 

[ضوى العيون]

الجزء الثاني والعشرين




غالية بكل بروود:شبلاااك؟بغيتك تولع لي الكز..هذا مافي الامر
خالد:شوووو؟
غاليه بدلع:خالتي مريم اظهرت مع الشغالة ومحد غيري في البيت...بليز تعال..هاي اول مرة اسوي كيك..
خالد بعصبية:فاااضيه..وصك فويهاا
عمران لاحظ عصبية خالد
عمران:هدِ اعصابك...وظهر من ثلاجة السيارةغرشه ماي
خالد:هههههه
عمران:تخبل الريال...شبلاك؟
خالد:ع بالي شي صاير في البيت...اتاري الاخت مسويه كيكة و تبغيني اولع الها الكز
عمران:ههههههه...هييه يا ريال صرنا نعيش ع اعصابنا
خالد:صدقت...
وبعد مدة من الحواطة اذن العصر وادخلو اقرب مسيد فطريجهم

وهم ظاهرين..
عمران:شو رايك اوصلك البيت؟
خالد:فكرة حلوة...منها تجرب الكيكة ومنها تعرف موقع البيت
عمران:تصدق ،انا بخاطري أغير جو لذلك..يلا دلني ع البيت
خالد:توجه الى الراشديه
عقب عشر دقايق وصلوا.. ودخل عمران سيارته داخل البيت باوامر من خالد

خالد:حياك الله
عمران:الله يحييك ويبجيك
وادخلوا الميلس وعقبها ظهر خالد وراح لاخته
في المطبخ
غاليه:اتاخرت ..خلاص ولعت الكز
خالد:اصلا انا مب ياي عسب كيكتج..بغيت اخبرج..ربيعي عمران في الميلس
غاليه:منو ها بعد؟
خالد:انتي شلج؟عمران اللي مشغلني معاه
غاليه:هههه..قول ارباب..حتى افهم
خالد وهو يشوفها بطرف عينه:باايخه..بسرعة زهبي القهوة والعصير و الكيكة بعد
غاليه:خيييبه..كل هذا؟
خالد:اللي يسمع يقول مشاوي..وين سونيا؟
غاليه:خالتي مريم خذتها معاها..
خالد:وين؟؟تونا مصلين العصر
غاليه:اصلا هيه من الضحى ظاهره..امها تعبت شوي
خالد:هيه..الله يعافيها
غاليه:امين
خالد:يلا عاد..استعيلي..
غاليه:ان شا الله..من حظكم الحلو انكم راح تاكلون اول كيكة بيد الشيف غاليه
خالد:هههه..
غاليه:شواللي يضحك؟
خالد:انتي بنت يعني شيفه مب شيف
غاليه:ه ه ه ضحكتني..الشيف تقال للبنات بعد
خالد:كيكة شو هاي؟
غاليه:كيكة نيدو
خالد:اهاا..يلا خمس دقايق وراجعلج
غاليه:اوكي..عرفنا

الساعة خمس العصر سلطان اتجهز ولبس اعربيه بيج وسفره بيضا
وشغل سيارته ودخل البيت مرة ثانيه وتوجه لغرفه البنات

سلطان:عوييييش..يوو عوشه
وشاف باب الغرفه مفتوح وعاشه يالسه اتمشط شعرها
عاشه:اففف...اصبر شوي مااتجهزت
سلطان:حسبي الله ع بليسج ..الساعة 5 ..متى بتخلصين؟؟؟
عاشه:عطني نص ساعة
سلطان:خيييبه..ثرج وين سايره؟ البسي عباتج وشيلتج ..يلاا
عاشه:حرام عليك ..توني قايمه من الرقاد وعيوني منتفخه..اصبر عليه شوي
سلطان:تستاهلين..حد يرقد العصر؟ماتعرفين انه منهاي عنه..يخلي الواحد يتخبل
عاشه:مرة في الاسبوع ماياثر
سلطان:يلا بسرعة ما روم اصبر زياده
عاشه:اوكي اوكي..هد اعصابك
سلطان(وهو يتلفت يمين ويسار):وين سلموه؟؟؟
عاشه:راحت تذاكر عند ربيعتها
سلطان:جيه..ماعندها بيت تذاكر فيه؟
عاشه: ربيعتها يايبه مدرس وراحت تستفيد
سلطان:اهااا..سلموه تعرف عن السالفه؟
عاشه(بنظرة استخفاف):طبعا لا
سلطان:مجرد سؤال وي هالعين
في السيارة
سلطان:عاشه...
عاشه:نعم
سلطان:ليش معصبه؟
عاشه:ماتلاحظ انك زودتها..من ظهرت من البيت وانت ماسكت؟
سلطان:المهم..عرفتي شوبتقولين؟
عاشه:هييه..عرفت
سلطان:يلا تفضلي...عقب صلاة المغرب باخذج
عاشه:فمان الله
سلطان:فمان الكريم

غطت عاشه ويهها بالغشوة ونزلت من السيارة وتحرك سلطان
سلطان(من خاطره):يااااااااااااااارب
عاشه كانت تمشي حذال اليدار متوجهه للباب وفجاة اظهرت سيارة فويهها
عاشه وهي حاطه ايدها ع ويههاامييي)
عمران تفاجا وقلبه وقف .... بينه وبين عاشه شعره
عمران وهو ينزل من السيارة:سلمتي...شي يعورج؟
عاشه(ولسنانها متلعثم هالساعه):ل لا
عمران:تبغيني اوديج المستشفى؟استوالج شي؟
عاشه:...........
كملت عاشه طريجها ولاعبرته
عمران عينه ع الغشوة اللي طايحة ع الارض:الله ستر

 

[ضوى العيون]

هالوقت غالية في المطبخ ترجع الادوات اللي اسنخدمتها لمكانها
عاشه وهي تدخل المطبخ: وين الماي
غاليه:بسم الله ...متى ييتي؟؟
عاشه وهي تناهي:الحقيني بكاس معاي بسرعة
غاليه باستغراب:ان شاالله ان شا الله..انتي بس تفضلي جيه واقفة
عاشه(وهي تشرب الماي):السلام عليكم
غاليه:الحين تفيجتي..وعليج السلام..شبلاج تناهين؟
عاشه:منو كان عندكم؟؟؟
غاليه:هذا عمران ..ربيع خالد
عاشه: كان بيدعمني..بيني وبينه شعرة
غاليه :كيف؟؟؟
عاشه: آآآآه..كنت امشي حذال اليداروبدخل البيت..وفجأة ظهر هذا فويهي
غاليه:الحمدالله ع سلامتج
عاشه:الله يسلمج من كل شر
غاليه:الله يابج
عاشه:ليش..شوصاير؟
غاليه: اليوم سويت كيكة نيدوو
عاشه:سبحان الله !!غاليه تدخل المطبخ ماصدق
غاليه:لاحبيبتي صدقي..يلا حبيبتي نشي خلينا ندخل الفيلا
عاشه:اه ..مارووم قلبي لين الحين يدق بالقوو
غاليه:قومي يا بنية..قومي عاد..الحمدالله جت سليمه...ههه
عاشه:تضحكين؟؟انتي مافيج احساس
غاليه: حرام عليج بس شكلج يضحك
عاشه:يزاج الله خير انا مادري شواللي يابني عندج
غاليه:عفانا الله الواحد مايقدر يسولف معاج....يلا عاد قومي
عاشه:حشى..قمت
غاليه(وهيه شاله صحن الكيك لعاشه):افتحي باب الصالة
عاشه:ان شا الله ..
غاليه:افتحي باب حجرتي
عاشه:موجنج مصختيها احيدني انا الضيفة ؟
غاليه:لاحبيبتي نحن الضيوف وانت رب المنزل
عاشه:ياسلااام
غاليه:وبعدين مابتاخذين راحتج الا فحجرتي..خلود في البيت
عاشه:اهااا...
غاليه بابتسامة:يلا شو اخر الاخبار؟انخطبتي ؟سلموه انخطبت؟؟
عاشه:تخسي سلموه تعرس قبلي
غاليه:ههه... كلتيني..
عاشه(فخاطرها:هذا وقته): انتي شو اخبارج؟
غاليه:والله مثل ماتشوفين..انش الصبح اتريق وعقبها اقرا الجريدة و..
عاشه:تقرير يومي
غاليه:آآآآه...هذي اخباري يا عاشه..لا جديد
عاشه:مب ناويه تشتغلين؟
غاليه:بصراحة احس انه الوالد راح يغير رايه فموضوع الشغل..بس تدرين حتى لوقالي اشتغلي مابشتغل
عاشه:مسالة عناد؟؟
غاليه:لا طبعا..بس انا فبالي فكرة وابغي انفذها
عاشه:وشو هيه؟
غاليه:فكرتي ماتحتاج اني اظهر من البيت ..بس تحتاج خياط وغرفتين صغار
عاشه باستغراب:خياط؟؟
غاليه:هيه ..انا عندي افكار حلوة للعبي وان شا الله تنجح
عاشه:ومن متى بدت هالهوايه؟
غاليه:من سنتين..بس كنت ارسم ع الورق
عاشه:اهاا..بس تحتاج في البدايه لميزانيه
غاليه:ههههه...الله يخلي بوخالد وخالد
عاشه:فديت عمي
غاليه:فدييته
عاشه:وبس هاي اخبارج؟
غاليه:شوتقصدين؟
عاشه وحركاتها:احم احم..
غاليه:لاتخافين محد خطبني واذا حد خطبني انا برفض
عاشه:ليش ترفضين؟؟؟
غاليه:كيفي..
عاشه:بكل صراحة في ناس موصيني
غاليه:شو؟؟
عاشه:ربيعتي جميلة انتي ماتعرفينها ..تبغيج لاخوها
غاليه:هههه..والله ؟؟وهاي ربيعتج متى شافتني؟
عاشه:مو المهم وين ..المهم انها شافتج
غاليه:قوليلها مشكورة ويزاج الله خير وانا مابغي اخوها
عاشه:انتي جيه مستعيله؟؟اصبري بخبرج مواصفاته وصفاته
غاليه:افف
عاشه:انتي شوخسرانه
غاليه من غير نفس:تفضلي...
عاشه:شوفي حبيبتي ..اخوها فاواخر العشرينات،يشتغل موظف في احدى الوزارات،راتبه عشرتالاف وشي.. ويحب السيارات و هو انسان رياضي
غاليه:ماخليتي شي
عاشه:اما عن مواصفاته ...فهو اسمراني طويل و بعد شو؟
غاليه:خلصتي
عاشه بابتسامة عريضة:هيه.. شورايج؟
غاليه:شوفي حبيبتي،انا عقب سالفتي مع سيف اتغيرت وايد
عاشه:كيف يعني؟
غاليه:تغيرت افكاري ...الحين اصبح همي هو كيف ابني غاليه
عاشه:شوهالخرابييط بعد؟؟
غاليه:انتي تشوفينها خرابيط بس انا لااا
عاشه:اللي يسمعج يقول مطلقة.. وبعدين لاتنسين انج صغيرة
غاليه:انتي مب فاهمتني
عاشه بعصبية:ولا ابغي افهم
غاليه باستغراب:انتي ليش معصبه؟
عاشه:انتي مب غاليه اللي اعرفها استويتي مثل هذولا اللي يطالبون بحقوق المراة
غاليه:حقوق المراة؟؟؟
عاشه:حبيبتي البنت مصيرها بيت ريلها ولا اذكرج بكلام ام عبد الرحمن
غاليه:لا حبيبتي حافظتنه..بس مب شرط.. فيه وايد بنات عوانس فالبلاد
عاشه:بس..
غاليه:بس شو؟الله يخليج عواش غيري السالفة
عاشه:مالت عليج ..لا مالت عليه انا اللي افكر فيج وانتي ماتستاهلين
غاليه:اقول..كلي هالكيك
عاشه:شبعت..كلامج شبعني
غاليه:والله تاكلين والا بزعل
عاشه بمزاج متعكر:اوكي بس لقمة عن خاطرج

في المسيان
عاشه يالسه مع غاليه في الصالة يشوفون مسلسل درس خصوصي على قناة فنون وبعد لحظات يرن موبايل عاشه
عاشه:الوو
سلطان: عاشه
عاشه: انت عند الباب؟؟
سلطان: لا ...بغيت اقولج انتي مابيي باخذج..فارجعي مع الدريول
عاشه:شو؟؟ليش؟؟
سلطان: منصور رجع من امريكا ..وقررنا نتعشى مع بعض اليوم
عاشه:ماشا الله ..متى رجع؟
سلطان:البارحة...المهم انا قلت لايفيلين تاخذج مع الدريول
عاشه:اوكي
سلطان:يلا سلاااام...
عاشه: مع السلامة

 

[ضوى العيون]

وبعد ما اظهرت عاشه عن غاليه الساعة ثمان ونص، ادخلت غاليه الميلس حتى ترتب المكان وتشل صينية القهوة والفناييل، ولحظتها تذكرت غاليه الموقف اللي صارالها مع سيف ..فابتسمت غاليه ابتسامة باهته... وهي تشل القهوة تذكرت الكلام اللي قالته عاشه عن الريال اللي رايدنها....وفجأة نزلت صينية القهوة بالقو ع الطاولة
غاليه (بدقات قلب سريعة):مستحييل
فخاطرها: كل كلمه نطقتها عاشه تنطبق ع سلطان...موظف في الدايرة الاقتصادية...وفاواخر العشرينات ورياضي ....ويحب السيارات...........هذاا سلطان
ومن ساعتها وغاليه متلخبطة وفكرها فعالم ثاني لانها مااتخيلت في يوم من الايام سلطان يخطبها

ولما اجتمعت العايلة ع العشا
بوخالد: عاشه كانت عدنا؟
غاليه:هيه ابويه
بوخالد: سلطان يايبنها؟
غاليه بصوت متغير: هيه
بوخالد: من فترة طويلة ماشفت سلطان
غاليه وهي حاطه يدها ع قلبها:.....(فخاطرها:ليكون الوالد يعرف بالسالفه..)
بوخالد بحزم: خالد
خالد: نعم ابويه
بوخالد:اعزم ولد عمك ع الغدا هالاسبوع
خالد:ان شا الله
غاليه باستعجال:الحمدالله
مريم:ماكلتي شي
غاليه:اليوم ماكله كيك وغاث ع جبدي

وفي الحقيقة غالية خايفه يكون ابوها عارف بسالفة سلطان فقررت تنش عنهم ،قبل لا يطيح الفاس بالراس..

في اليوم الثاني ماقدر سلطان يصبر وقبل لاتظهر عاشه من البيت زكرها ووقف معاها عند سيارته
سلطان:عوااش
عاشه:صباح الخير
سلطان باستعجال:صباح النور والسرور..بشري
عاشه فخاطرها:هذا شواقوله؟
سلطان:تبغي وقت تفكر؟
عاشه:بصراحة...هي ماتفكر بالزواج حاليا
سلطان وضربات قلبه بدت تتسارع:شو؟؟
عاشه:هيه مارفضتك..وبعدين انا ماقلتلها سلطان يبغيج
سلطان:عيل شو قلتيلها؟
عاشه: قلتلها اخ ربيعتي حتى امهد للموضوع
سلطان وهو يحس بغصه فقلبه:يمكن تبغي تاخذ فترة راحة نفسية عقب اللي صار
عاشه:يمكن..
سلطان وهو مافقد الامل:شورايج بعد شهر تكلمينها عني؟
عاشه:مادري يا سلطان..بس هيه شكلها ماتبغي تتزوج ابداا
سلطان:شو هالتشاؤم؟
عاشه: مادري...حسيت من كلامها انها تبغي تعتمد ع نفسها
سلطان باستغراب:كيف يعني؟؟
عاشه:تبغي تكون بزنس وومن وهي في البيت؟
سلطان:ياسلام..واذا وافقت تاخذني انا مابمنعها
عاشه:مثل ماقلت.. يمكن محتايه وقت تفكر وترتاح
سلطان وهو متظايج:يالله....اللي فعمري متزوجين وعندهم 3من العيال
عاشه:ههه..اتخيل... انت عمرك ثلاثين وولدك سنة فيوم يستوي عمرك ستين ولدك ثلاثين..اسميك شيبه
سلطان:خسج الله يا عويش...انا روحي مهموم وتزيديني هم
عاشه:هههه...انت الحين روح دوامك واللي الله كاتبنه بصير
سلطان:صح كلامج..يلا مع السلامة
عاشه:مع السلامة
الشارع مزدحم والسيد مايتحرك
سلطان:ناقصنكم اناا...لوامشي بريلي بوصل الدايره
وعقب ربع ساعة وصل الدوام
حمدان(زميل سلطان في الشغل):وينك يا ريال ؟؟؟اتاخرت
سلطان:تعرف الشارع كيف زحمة..سنة لاوصل
حمدان:يا ريال اظهر من وقت
سلطان:الرقاد حلو يا حمدان..ماتعرف المثل اللي يقول النوم سلطان؟
حمدان: سلطان بعد!!!...بس الراتب احلى يا..سلطان
وعقب ساعة
المدير(بوعوظ): مرحبا
سلطان وحمدان:مرحبتين.تفضل
بو عوظ: دام فضلكم..بغيت اسالكم...الموظف اليديد وصل والا بعده؟
حمدان:موظف؟؟لا بعده
وفجأة ظهر واحد واقف ورا المدير ابيضاني وعيونه صغار
الموظف:مرحبا بوعوظ
بوعوظ:مرحبتين...وينك؟من اول يوم متاخر؟؟
الموظف: لا انا وصلت في الوقت المحدد بس ماكنت اعرف أي مكتب
بوعوظ:حصل خير(والتفت لسلطان وحمدان):اعرفكم ع بعض ..سلطان،حمدان...وزميلكم يوسف
حمدان:يامرحبا وسهلا
سلطان من اول ماشافه وهو مو بالعنه
سلطان فخاطره: يالله صباح خير
واول مايلس هالموظف اليديد ماسكت من الاسئلة،وحمدان يجاوبه..حمدان من النوع اللي يطول باله بعكس سلطان اللي يالس يشتغل ع الكمبيوتر ولاعاطي ويه ليوسف
وقبل ماينتهي الدوام بساعة ظهر حمدان من الدايره عسب ياخذ بنته من المدرسه
فاضطر سلطان انه يكلم يوسف
يوسف وهو يقوم من مكتبه واقف حذال كرسي سلطان
يوسف:أي فولدر تفتحونه؟
سلطان وهو ياشر فكمبيوتره:افتح الديكيومنت وبعدها بتحصل فولدر مكتوب عليه.. Bc
يوسف:مشكور اخوي
سلطان:العفو والمسالة ماتحتاج شكر..ع فكرة..كلنا كنا شراتك في البدايه حريصين ع العمل ومازلنا لكن دايما في البدايه نكون متحمسين ولكن مع مرور الشهور والسنوات ..الواحد منا يحس بالروتين والملل..
يوسف:ان شاالله كل الايام اللي اداوم فيها احس بهالحماس
سلطان بابتسامة:ان شاالله

وانتها الدوام ورجع كل واحد لبيته

سلطان:انا يوعان با ام سلطان
ام سلطان:غداك جاهز ياالغالي
سلطان:شومسوين؟
ام سلطان:مالح تحت العيش
سلطان:يا سلااام
ام سلطان:بالعافيه عليك
سلطان:ع قلبج
ام سلطان كانت متغديه مع البنات لكنها يلست مع سلطان ع الطاوله
وصبت لولدها عصير ليمون بارد
سلطان وهو يشرب عصير الليمون:الله...بارد ع القلب
ام سلطان:آآه ياالغالي متى افرح فيك واشوفك يالس تتغدى مع حرمتك
سلطان فخاطره:هييه يا الولده..خليها ع الله
:جريب ان شاالله..جريب
ام سلطان:ان شاالله...

 

[ضوى العيون]

فبيت بوخالد مريم (ام سلطان)يالسه تشرب شاي مع غاليه

غاليه وهي ترجع الاستكانه مكانها ع الصينية:خالتي مريم
مريم بابتسامة:نعم غاليه الغاليه؟
غاليه:انعم الله عليج ...شورايج نروح السوق؟
مريم:شوتبغين من السوق؟
غاليه:ماعندي شي محدد بس ابغي اغير جو
مريم:هييه..وين تبين تسيرين؟
غاليه بابتسامة:امم ابغي اسير مول الامارات
مريم:مول الامارات؟ريلي تعورني ماروم ع المشي فهالمول
غاليه:الله يخليج ابغي اسير...اوكي.. بس بدخل ثلاث او اربع محلات ونرجع ..شورايج؟
مريم:ع راحتج
غاليه:فديت ام سلطان
مريم:ههه..فديت روحج
غاليه:شورايج نصلي العصر ونظهر
مريم:يكون احسن
واذن العصر وصلوا واركبوا السيارة
مريم وعينها ع عباة غاليه
مريم:شوهالعباة؟
غاليه:شوفيها خالوه؟
مريم:وايد لافته
غاليه:لافته؟؟؟شواسوي العباة الساده مقرفصة يبالها كواي وسونيا راقده
مريم:عنبوه....وهالعبي اللي مصطفه في الكبت وين راحن؟
غاليه:خلاص خلاص..بغيرها وبرجع
ورجعت غاليه ولابسه عباة فيها تطريز خفيف باللون البني الغامج
مريم:هيه..جيه
غاليه:ههه..انا ماصدقت اظهر فلبست اللي جدامي
مريم:فديتج..احلى مافيج انج تسمعين الكلمة مو شرات شمسوه بنت اختي موزه من تقولها امها كلمة البقت شرا الظو
غاليه:الله يهديها ويهدينا اجمعين
مريم:امين..محي الدين
محي الدين:نعم..ماما
مريم: روح مول الامارات
غاليه:هالايام احسن ايام الواحد يظهر فيها
مريم:ليش؟
غاليه:الناس لاهيه في الامتحانات
مريم:ذكرتيني ماوعيت سلطان يذاكر
غاليه:ماعليج الاولاد يفتحون الكتاب فدقيقه ويصكونه وهم حافظينه صم، مو شراتنا نذاكر ونحفظ كل كلمة وماشي فايده نشوف ورقة الامتحان فننسى كل شي
مريم:قولي ماشاالله ...بتاكلين ولدي
غاليه:من زين ولدج..ماااشاالله

وعند الباركنات

مريم:محي الدين...الساعة 6 تعال
محي الدين:زين ماما
وادخلو المول
غاليه:ابغي اخذ لي بدلة من محل حلو اسمه اكسناكا
مريم:يلا..
وفي هالوقت خالد ومنصور وسلطان يالسين مع بعض في ميلس بيت بومنصور
منصور:وهاي اخباري..وانت ياخالد شومسوي فشغلك؟؟
خالد: ماشي حاله..مرتاح
منصور:عسى دووم
خالد:وياك..الا ماقلتلي متى بتعرس؟
منصور:هالخميس الملجه والثلاثا العرس
خالد:الف مبرووك
منصور:الله يبارك فحياتك..وانتو الاثنين متى ناوين تعرسون؟
خالد:جريب
منصور:متى ؟؟
خالد:عقب ثلاث سنين
منصور:هذا جريب؟؟؟
خالد:هههه
منصور وهو صاد صوب سلطان:وانت يا حكيم زمانك؟متى ناوي اشاالله؟
سلطان:لاتزيد المواجع يا ريال
خالد:ههه..خله ...يوم بغى يتزوج اطلعت العروس اخته بالرضاع...هههه
منصور:ههه..لاحول ولاقوة الا بالله
سلطان:اظحكوا..شو وراكم...
منصور:لا جد..متى ناوي يا بومايد؟
سلطان:يوم اللي ابغيها... توافق
منصور:يعني حاط فبالك وحده؟
خالد:ومنو هاي..تعيسه الحظ
سلطان فخاطره :اختك ياالحبيب
: تقصد سعيدة الحظ...وبعدين انت مايخصك

في المول

غاليه:الله يخليج يا خالتي مريم ..اخر محل
مريم:بسج عاد
غاليه:بليييييييز
مريم بيأس:اخر محل اخر محل
ويرن موبايل غاليه
غاليه وهي تحاول تظهر موبايلها بصعوبة من الشنطة لانها شاله ثلاث اكياس:وينووه؟
:الوو
سلطان بن عبدالرحمن:الو غلويه
غاليه:نعم
سلطان:انتي فالامارات مول؟
غاليه:هيه..
سلطان:سالت سونيا عنكم قالتلي انكم في المول
غاليه:شو المطلوب الحين؟
سلطان:ماعليج امارة..ابغي ماكدونالد
غاليه:مارووم..شاله يميع الاجياس
سلطان:الله يخليج ..ارئفي باخوج
غاليه:مع السلامة
مريم:منو هذا؟
غاليه:ولدج
مريم:شو يبا؟
غاليه: يبغي ويبه كاملة من ماكدونالد...وانا مارووم اروح واشتريله
مريم:حرام عليج..قومي ناخذله
غاليه:اكيد هذا ع قلبج ..
مريم:صدق مافيج خير ياغليوه ..يايه معاج ولاتشكرين
غاليه:اسولف معااج..يلا عيل بتصل بمحي الدين وبنروح لماكدونالد
مريم:ليش تتصلين انا قايلتله 6 والحين 6 وعشر
غاليه:اوكي يلا نسير
وعند ماكدونالد..صوب الكافيهات

مشت غاليه بخطوات ثجيله وهي شاله الاكياس لكن في شي خلاها توقف وتتجمد مكانها ...ويطيح جيس من يدها ع الارض..

 

[ضوى العيون]

الجزء الاخيييييييييييييييييييييييييييير



خالتها مريم:شبلاج؟؟؟بسم الله عليج
غاليه:ماعرفت كيف تتصرف واظهرت من المول بدون ماتلتفت لخالتها مريم
مريم:غاليه ...غاليه
وفي السيارة
مريم:شبلاااج؟مااشترينا ماكدونالد لاخوج
غاليه:.....
مريم ماعرفت شوسالفتها..بس ما رامت تسكت....يعورج شي؟
غالية:لااا....محي الدين
محي الدين:نعم؟
غاليه:مر ع ماكدونالد فطريجك
مريم: لاحول ولاقوة الا بالله

ومن وصلو البيت ادخلت غالية غرفتها واقفلت الباب
غالية فخاطرها:ما صدق اللي شفته...مستحيل..مستحيل يكون...
وطاحت ع السرير ونامت من الصداع الشديد اللي صابها وويهها كله دموع

مريم يلست في الصالة تتنظر وصول بوخالد او خالد حتى يعرفون شو فيها..

ولما دخل خالد البيت زكرته مريم وسلم عليها
مريم:وعليكم السلام والرحمة ..ابويه بغيتك بسالفه
خالد:خير؟
مريم:اليوم وانا رايحة مع غاليه مول الامارات .....الخ
خالد:ماعليه الحين بسير بشوفها وبطمنج...لا تحاتين
مريم:هيه بويه قوم وشوفها
وتوجه خالد لغرفة غالية ودق الباب ولما دخل كات توها قايمة من الرقاد
غاليه:نعم خالد
خالد: ياي اعرف شواللي صارلج اليوم؟
غالية:خالتي مريم خبرتك؟
خالد:تحاتيج
غاليه: ماصار شي
خالد:لا ..صار..قولي احسن لج
غاليه:شفت شي وانصدمت منه
خالد:شو؟؟
غاليه:شفت ...حتى ماحب اطري اسمه
خالد؟سيف؟؟؟
غاليه:هيه
خالد:وشويعني؟
غاليه: معاه وحده
خالد:اهاا..
غاليه:كانو يالسين مع بعض في المطعم... والوناسة باينه فويهه
خالد:انتي بعد ان شالله تتزوجين ولد الحلال اللي يسعدج
غاليه:....

وبعد مرور عدة اسابيع
سلطان توجه الى شغله ولما وصل
يوسف:اتاخرت
سلطان بدون نفس:تعرف الزحمة
يوسف:سو مثلنا..اظهر من البيت من وقت
سلطان(مااتحمل اسلوبه الجاف):والحين شوالمطلوب مني
حمدان صد صوبهم:يالله صباح خير
ويلس سلطان ع مكتبه وبدا شغله ، وبعد ربع ساعة المدير مر حذال مكتبهم متوجه للمكتب اللي حذالهم ويوسف من لمح المدير سار صوبه
سلطان وهو يلتفت لحمدان:بدينا..
حمدان:طنشه يا سلطان..ولاتاكل قلبك
سلطان:انا المنقهر منه... انه شاطر وهو مايستاهل
حمدان:انت اشتغل ومالك شغل فغيرك
سلطان:آآآآه..طنش تعش
حمدان:واشرب ميراندا وانتعش
سلطان:هههه..شهيتني فيه
وقبل لا يخلص الدوام بساعة طلب المدير سلطان فمكتبه
سلطان(فخاطره):ان شاالله ترقيه عقب خمس سنين شغل فنفس القسم
وفي مكتب المدير
سلطان:مرحبا بوعوض
بوعوض:مرحبتين...تفضل يا سلطان
سلطان:دام فضلك
بوعوض:سلطان
سلطان:نعم؟؟
بوعوض:من كم سنة وانت موظف عدنا؟
سلطان فخاطره :الترقيه
:من خمس سنين
بوعوض:خمس سنين ماشاالله...يعني نحن عارفينك وانت عارفنا
سلطان:.....
بوعوض:قصدت...فهالخمس سنين يا سلطان كسبنا واحد من احسن الموظفين عدنا
سلطان:تسلم
بوعوض:ولاني اعزك وابغيك دايما تكون في الصدارة... عندي ملاحظة وحده بس حتى تكون مثال للموظفين
سلطان:.....
بوعوض:لا تتاخر...الدوام يبدا 8 وانت توصل 8 ونص كل يوم...واذا تقول زحمة فكلنا نواجه نفس المشكلة والحل بسيط ..اظهر من البيت من وقت
سلطان فهااللحظة عينه ع الارض..وفخاطره:سويتها فيني يا يسوووف..
وظهر سلطان من مكتب المدير من دون ما يسلم قبل لا يظهر...وفهاللحظة سلطان نسى ان الدوام ماخلص فظهر من الدايره وركب سيارته
ومثل كل مرة ظهَر عصبيته ع السيارة وساق بسرعة جنونية ولكنه ماراح للبيت مباشره لكنه توجه لخالد في المحل...
سلطان:السلام عليكم
خالد:وعليكم السلام ورحمة الله وبركاته ..يا مرحبا و سهلا فبومايد..نور المحل...اليوم مريت ع بالي يا ريال
سلطان وعينه ع يده اللي تتراقل من العصبية:عندك عصير
خالد:حاظرين للطيبين...جميل هاتلنا اثنين عصير مانجو
سلطان:.........
خالد:شبلاك اليوم..مو ع طبيعتك
سلطان:واحد حرقلي اعصابي
خالد:خله يولي
سلطان:اتخيل عقب خمس سنوات وانا اشتغل في الدايره ايي واحد ماكمل شهرين يتكبرعليه
خالد:لاتحرق اعصابك واشرب هالعصير
سلطان:اتخيل يا خالد انه كل يوم يروح للمدير يواشي علينا
خالد:افف..هذا داهية
سلطان:الغصة انه يوصل من الوقت ويخلص شغله من وقت وهو عفريت في الشغل..هالقاهرني..مااقدر امسك عليه شي
خالد:اصبر يا سلطان..مالك غير الصبر
سلطان:اصبر؟تعرف اني صبرت عليه وايد ..تصدق انهم شهرين لكن بالنسبة لي كانهم سنتين..اتخيل من ثاني يوم وهو في الدايره ينتقد شغلي ويظهر لي اخطاء وكل يوم يخبر المدير اني ياي متاخر واليوم المدير طلبني عسب هالسالفة
خالد:وانت الله يهديك ويصلحك ضروري تتاخر..انت هالمرة اسمحلي اقولك اياها..انت غلطان
سلطان:ادري اني غلطان لكن لو المدير مكلمني من دون مواشاة الاخ كانت بتفرق..والله اني بتقبل الموضوع
خالد: الحل انك اداوم من وقت حتى مايقدر هالموظف يمسك عليك شي
سلطان:انا خلاص بفنش
خالد:ليش؟انت ع بالك كل يوم بتحصل وظيفة
سلطان:عادي..بشتغل معاك
خالد:احلف انت
سلطان:آآآآه..ياخالد استويت اكره اسير الشغل واجابل ويهه
خالد:تعوذ من الشيطان
سلطان:هو بكبره شيطان
خالد:ههههه...استغفر الله العظيم..ياخذ اجرك
سلطان: حسبي الله عليه مغصص عليه دنيا واخره
وفجاه يسمعون صوت الموظفين اللي بدا يعلى بالسلام
خالد:اكيد هذا عمران
سلطان:عمران؟؟

 

[ضوى العيون]

في نفس الوقت كانت غاليه تكلم ربيعتها اليازيه ع الموبايل
ومافيه قلب غاليه لليازيه الا كل خير
اليازيه:انتي مشغولة هالخميس؟
غاليه:ابدا..
اليازيه:عيل انا يايتنج
غاليه:حياج الله..متولهة عليج وااايد
اليازيه:ياربي احس اني من سنة ماشفتج
غاليه:نفس الشعور
اليازية بصوت حزين: آآآه ياغالية انا ظايجه واحس حياتي كئيبة
غاليه:بسم الله عليج..ليش عاد
اليازيه:امي غامظتني حالتها...... تعبانه من الهم
غاليه:لاحول ولاقوة الا بالله
اليازيه:ادري انج بتتظايجين لاني بفتح موضوع سيف لكن مالي غيرج اظهرله همومي
غاليه:لا..عادي..انا ...خلاص نسيت الموضوع
اليازيه:بخبرج بخبر مركالصاعقة ع بيتنا..
غاليه:...
اليازيه:سيف فاجئنا وتزوج من دون علمنا
غاليه وهي تتذكر الموقف اللي مرت فيه في المول:حسبي الله ونعم الوكيل
اليازيه:تقريبا من شهر و نص...اتخيلي لايزورنا ولاحتى يكلمنا في التلفون...بس شواقول غير حسبي الله عليها..كله منها هي السبب
غاليه:وانت شدراج؟ تحطين فذمتكج
اليازيه:حبيبتي نحن سالنا عنها ..وبالتحديد سالنا عمتها وطلعت اللي ماتنذكر مسويه عمل لاخويه حتى عمتها سمعتها مرة تكلم واحد عن العمل
غاليه:اعوذ بالله ..اعوذ بالله..ليش ماتقرون عليه..تصرفوا
اليازيه: مانقدر ..بالله عليج يعني نسحبه ونوديه عند المطوع مثلا..هو هب راضي
غاليه:مالج الا الدعا ادعيله
اليازيه:والله ياغاليه من اصبح لامسي وانا ادعيله

وبعد ماانتهت المكالمة يلست غاليه ع الكنبة وهيه تفكر باللي يصير
فخاطرها:معقولة اكون ظلمته؟الله يعافيه ويرجعه سيف الاولي واحسن



وفي مكتب خالد وبعد السلام وكل واحد اتعرف ع الثاني

عمران: انا ياي اشوف الكشوفات
خالد:دقايق وبتكون جاهزه
صد عمران لسلطان: وين تشتغل يا بومايد؟
سلطان:في الدايره الاقتصادية
عمران:مرتاح؟
سلطان:الحمدالله..
فخاطره:اسميني مرتاح!!
عمران:شكلك مرهق
سلطان:واايد
ودخل خالد وبيده الكشوفات:تفضل
سلطان:اسمحولي..بسير البيت بريح راسي شوي
خالد:ع راحتك
سلطان:مع السلامة..
عمران:مع السلامة..
ورجع سلطان للبيت من دون مايتغدى وصرط حبتين بندول ورقد من التعب والاعصاب
في المكتب
خالد:هههه...محد خبرني بالسالفه
عمران:تضحك؟اقولك وقف قلبي ...زين مادعمتها
خالد:الحمدالله ع كل حال
عمران :هيه اختك؟
خالد:لا..بنت عمي
عمران:اهااا
خالد:اخت سلطان
عمران:بصراحة يا خالد..انا مب عارف شو اقولك..بس مثل ماتعرف انا انسان مايحب اللف والدوران...لذلك..انا ...انا حب اناسبكم
خالد بذهول:بهالسرعة؟
عمران:هيه بهالسرعة...خير البر عاجله
خالد بابتسامة:فاجأتني...
عمران بصوت متفاعل:هيه تدرس او تشتغل؟؟حد متقدم الها؟
خالد:شوي شوي يا ريال..البنت بعدها تدرس فاخر كورس..ولاتخاف محد متقدم الها
عمران:واذا عمك عنده أي سؤال عني انا جاهز للاجابه
خالد:والله يا عمران ما ظن يلاقي احسن عنك
عمران:تسلم
العصر
نش سلطان من النوم وهو يحس بدوخة قوية ودقات قلبه متسارعة واول ماقام من السرير حس بدوره فيلس دقيقتين وبعدها قام مرة ثانية ..فنزل تحت وراح صوب امه
سلطان بصوت مرهق:ام سلطان
ام سلطان:عيونها
سلطان:انا تعبان
ام سلطان:سلامتك..كله من اليوع..تبغيني انجبلك الغدا
سلطان:لاا مو مشتهي
ام سلطان:قبل شوي سويت خبيصة غاوية تبغيني اغرف لك منها؟
سلطان:هيه..خبيصتج لاتقاوم
ام سلطان:بالعافية الغالي
سلطان:ع قلبج..عيل وين البنات؟
ام سلطان:سلامة تذاكر في الميلس باجر اخر يوم في الامتحانات و عواشه فبيت خالك..ميرة عازمتنها
سلطان بابتسامة:مانخطبت؟
ام سلطان:هيه... خطبها واحد من العين لكنها مابغته
سلطان:نصيب..
ام سلطان:صدقت ..


بعد اسبوع...
الساعة 3 ونص الفجر
سلطان:غاليه..هالصيف عرسنا
فتحت غاليه عينها بالقوو
غاليه وهيه تبلع ريجها:كان حلم...
غاليه سمعت صوت سلطان في الحلم من دون ماتشوفه ومن لحظتها ماقدرت ترقد..فظهرت من السدة ورقة وقلم ازرق جاف ورسمت خط راسي فنص الورقة، وكتبت ع الناحية اليمين اسم سلطان وعلى الناحية اليسار اسم سيف وقررت تكتب ايجابيات كل واحد،وبدت بسلطان
كريم..يصلي..يزور ارحامه..مرح وفيه روح النكته والسوالف..يعين ويعاون..راحم امه..يحب خواته ومايردلهم طلب..خلوق..فيه وسامه..اجتماعي
اما سيف فكفايه انه جرح مشاعري..ادري انه مش طبيعي لكني اصبحت مااشوف فيه الا ايجابية وحده ..انه عايش قريب من بتنا..وتركت مساحة سيف فاضية
غاليه فخاطرها:ولد عمي شوفيه..مايعيبه شي..بس انا طول عمري اشوفه ولد عم وبس ومعزته مثل معزة خالد...يالله ...احسن شي استخير
وصلت صلاة استخارة وبعدها رجعت لسريرها ونامت وهي موكله امرها للوكيل

 

[ضوى العيون]

في وقت الظهيرة فبيت بو سلطان..

سلامة:انا مو مصدقة...am free
عاشه:اللي يسمعج مايقول من اسبوع مخلصه وبعدج حبيبتي باقيلج سنوات الجامعه
سلامة:المهم..انا ارتحت من مسمى يطلق عليه المدرسة...الحمدالله الحمدالله انا افتكيييت..بس ان شا الله اييب نسبة اعلى من نسبة الاخ اللي حذالج
سلطان:بنشوف يا عبقرينوو
سلامة:انت بس جهز اللي اتفقنا عليه
سلطان:هيه جاهزة بس انا متوقع الف بالميه انج مابتيبين نسبة اعلى من نسبتي
سلامة:يبق آبلني
سلطان:ههههه...نشوف
وبعد ساعة اظهروا من البيت وراحو بيت يدتهم
سلطان دخل ميلس الرياييل والبنات وامهم ادخلن البيت واتفاجؤو بغالية اللي كانت يالسه في الصالة فحظن يدتها وحذالها خالتها مريم تشرب استكانة شاي ويالسه تتصفح الجريده
عاشه:شوهالمفاجأة الحلوة؟؟
غاليه:شفتي عاد..شفنا الغدا زهب من وقت قلنا نشله ونتغدا جماعة
سلامة:شوغداكم؟
غاليه:كشري
سلامة:يا سلاااام
ام عبدالرحمن:وانا مسوتلكم صالونة دياي ومشواي
عاشه:الله!!!..شوالغدا الفاخر..
ام عبدالرحمن: غاليه..امّي..قولي للبشكارة تنجب الغدا حق الرياييل
غاليه:ان شا الله
ام سلطان:خليج انا بزكرها
غاليه:لا والله ..ارتاحي خالو
ام سلطان:فديتج
ام عبدالرحمن: غاليه حبيبتي..بتحصلين في الثلاجة رطب ..اغسليه وخلي البشكارة توديه للرياييل
غاليه:ان شاالله...
ام سلطان:ماشا الله طاح الرطب؟
ام عبدالرحمن:هذا ميوب من عمان
ام سلطان:هيه..ما شا الله
وفي ميلس الرياييل
العايله ملتمة ع السماط(السفرة) الدائرية من اليمين أحمد وخالد وبوخالد وسلطان وحذاله يالس بو فيصل يارهم من سنين
بوخالد وهو يوجه الكلام لسلطان: وين ابوك؟من اسبوع ما شفته؟
سلطان:مسافر..من يومين تقريبا
بوخالد:وين ماشا الله؟
سلطان:ساير قطر
بوخالد:شوعنده؟
سلطان:عازمينه ع عرس...
بوخالد:اخاف الا ابوك ماخذله الثالثة ويقول انه ساير قطر
سلطان:ههههه..لا ..لاتخاف عمي بطاقة العرس موجودة فبيتنا
بوخالد:الله يهديه ويصلحه
بوفيصل:شورايك يابوخالد نسير العمرة؟
بوخالد:تصدق يا بو فيصل يبالنا نسير ونريح اعصابنا
سلطان:خذوني معاكم..بريح اعصابي شوي
خالد:بعدك تعاني؟؟
احمد:من شو؟
سلطان: من هالعنز اللي عدنا في الدايره
احمد:توك تلبي بالعمرة والحين تسب الريال
سلطان:استغفر الله العظيم..لاتذكروني فيه
وبعد ماتغدوا الرياييل وكلوا اليح و البطيخ المقطع يلسوا الشواب يسولفون
اما الشباب يلسوا يلعبون ورقه ودلةالشاي حذالهم
احمد:منو يتحداني
خالد:انا اتحداك
احمد:بنشوف...ههه ربحت
خالد:اففف
سلطان:بسكم عاد..
خالد:شبلاك..اذا مزاجك متعكر فلا تعكر مزاجنا
سلطان:خلوود...
خالد:نعم
سلطان:من يومين خذت لي حدايد يديدة..لكن شو؟ثجال(رفع الاثقال)
خالد:ابغي اشوفهم
سلطان:تعال بيتنا
احمد:انتو سيروا... انا فيني رقاد
خالد:يلا..مشينا
وفي ملحق سلطان الرياضي
سلطان:شورايك؟؟
خالد:اشوفني كل اسبوع بمر ادرب عندك
سلطان بابتسامة خبيثة:الغالي مافي شي ببلاش هالايام
خالد:ياالبخيل..مادري ع منو طالع
سلطان:اسولف ياريال
خالد بجدية:سلطان...فيه موضوع ابغي اكلمك فيه
سلطان:شو؟؟
خالد:تعرف عمران؟عمران اللي شفته في المكتب
سلطان:هيه ..شبلاه؟
خالد بابتسامة عريضة: الريال وده يناسبنا
سلطان(مصدوم):عمران؟؟
خالد:هيه ..ريال والنعم فيه...
سلطان(فخاطره): مالي امل فيج..ياغاليه
خالد:انا ابغيك تكلم اختك في الموضوع وان وافقت خبر ابوك بالموضوع ..مافينا يجبرها ع واحد ماتبغيه
سلطان بحيره:واختي شلها بالسالفه
خالد:سلطان..اقولك عمران يبغي يناسبنا ..الريال يبغي يخطب عاشه
سلطان:الحمدالله..اقصد وهو شعرفه انه عندي اخت؟
وخالد ماقصر قال لسلطان كل اللي صار
سلطان:بصراحة مابنلاقي احسن عنه..يلست معاه مره وحده لكن كأني اعرفه من سنين..ريال واضح
خالد:متى بتشاور اختك؟
سلطان:اصبر خلني اسال عنه في البدايه..صح نحن نعرفه لكن بعد بنسال

ثاني يوم بعد اذان الظهر
غالية يالسه في الصالة اتجلب القنوات
ادخلت ام سلطان الصالة بعد ما القت نظرة ع الغدا: غاليه
غاليه:نعم خالو
ام سلطان: الغاليه سيري وعي اخوج سلطان عن اتطوفه الصلاة
غالية:ان شاالله
واتجهت غاليه لغرفة اخوها ودقت الباب مرتين وادخلت
غاليه:سلطان...سلطان..قوم اذن الظهر
سلطان وهو يغطي راسه: شووو؟؟
غاليه:اذن الظهر..قووم
سلطان:اطلعي برع
غاليه:بدت الاجازة وبدا الفساد
سلطان:افففف...
غاليه:قوم احسن لك
سلطان:قمت قمت..كلتيني
غاليه:هذا يزاتي؟
سلطان من دون نفس:يزاج الله خير...رضيتي
غاليه:قوم اتسبح ..قوم
سلطان:ان شا الله
ودخل سلطان عزكم الله الحمام يتسبح ويلست غالية ترتب غرفته..افتحت الدرايش(النوافذ) ورتبت السرير وهي ترتب المخده طاح موبايل سلطان ع الارض
غاليه:الله يستر
وشلته من ع الارض ولله الحمد ماصار ع الموبايل شي
غالية فخاطرها: يمكن عنده مسجات حلوة..بطرشها ع موبايلي
ويلست غاليه ع الكرسي تنتقل من مسج للثاني
غاليه:ظهرت هب هين يا سلطان شوهالمسجات الرهيبة..كله حلوو
ولما وصلت للمسج الواحد والعشرين:هذا مش غريب عليه...واصلي
ولما وصلت للمسج السته والعشرين:هذا بعد قارتنه..
اظهرت غاليه من غرفة سلطان وراحت للصالة وشلت موبايلها من ع الطاولة
ويلست تدور ع نفس المسج اللي واصللها
غاليه:هذوو..بس هالمسج ماله اسم..انا ماحيدني طرشته لسلطان
ويا فبالها تشوف المسجات اللي توصللها من دون اسم هيه صحيح حذفت كذا واحد لكن فيه مسجات نست تحذفهم..

 

[ضوى العيون]

وظهر سلطان من حجرته:غاليه..شفتي موبايلي؟؟؟
غاليه بنظره حاده:.............
سلطان:شبلاج..بتاخر عن الصلاة..شفتي موبايلي؟
غاليه:هيه..بس مابعطيك اياه
سلطان باستغراب:ليش؟؟
غاليه:عقااااب
سلطان باستغراب:ليش..انا شو مسوي؟
غاليه:ماتعرف شومسوي؟
سلطان:ههههههههه...افاااا صدق المثل اللي يقول حبل الجذب قصير
غاليه:يا...شواقول عنك..طول هالمدة وانت اتجذب عليه..
سلطان:ههه..بس حلوو
غاليه:انت من وين متعلم هالحركة؟
سلطان:من رباعتي
غاليه:رفقاء السوء..
سلطان:لا حرام عليج...بس انتي ليش ماحاولتي تعرفين اقصد ليش ماخبرتي خلود
غاليه:خفت تصير مشكلة... ياالسخيف
سلطان وهو يمد يده:عطيني اياه..
غاليه:انا قلت عقاب وهذا يعني شهر كامل مابتشوفه
سلطان:بلييييييييز
غاليه:اذن الامام الاذان الثاني..روووح
سلطان:افف..لما برجع باخذه
غاليه:ههه..في الاحلام يا حبيبي
سطان:بخبر عليج امايه
غاليه:عادي..انا بخبر ابويه ..بخليه يطيح فيك ظرب بالعقال
سلطان:لا لا ..كله ولا العقال..يلا سلام
غاليه:مع السلامة..يا ..يا خطير..بس ليكون مسوي هالحركة فغيري بعد؟
سلطان:بس انتي بغيت اسويها فربيعي بس ماقدرت عرفني من ثاني مرة..
غاليه:اهاا..يلا ابويه ..توكل
فخاطرها:حسبي الله ع بليسك..فعمري ماشكيت فيه..صدق اللي قال تحت السواهي دواهي..

اما في الشارجة وبالتحديد عند سلطان في الشغل
حمدان:شكلك تعبان ومرهق..سير بيتكم وارتاح
سلطان:لا انا بخير ومافيني شي..وبعدين ماتم ع الدوام غير ساعه
يوسف:اذا عندك شغل وما خلصته عطني اياه انا بسويه عنك
سلطان:لا شكرا..تاملي شغل بسيط
وبعد ماخلص الدوام ظهر سلطان من الدايره وركب سيارته وفنص الطريج وبالتحديد امام الاشارة الحمرا،سلطان ماقدر يتحمل الصداع الشديد الفظيع اللي صايبنه..
سلطان وهو يفتح سدة السيارة: وين البندول؟؟؟وينووه؟
لما ظهر ورقة البندول ماحصل فيه ولاحبه...
سلطان:حسبي الله ونعم الوكيل
وصارت الاشارة خضرا ، لكن سلطان ماتحرك..هالمرة ريله (رجله) مو مساعدتنه..ودقات قلبة متسارعة..ويحس بدوخة قوية..
بصوت خيفان:يارب ...مااقدر اسوق ..
الهرنات ماسكتت

لحظة شوي..ياناس ..لحظة..الهرنات ماوقفت..ودقات قلبه تتسارع وتتسارع...نزل الدريشه...لااله الا الله..لااا اله الله محمد رسول الله ..ابغي ماي..ريجي ناشف..
طلع واحد من سيارته وراح لسيارة سلطان..
الريال :ياالاخ..يالاخ
وسلطان مايرد......
الساعة اربع ونص
فبيت بوخالد العايله مجتمعه ع الكيكة النسكافيه اللي يايبنها خالد باستثناء ام سلطان(مريم) اللي رايحه بيت اختها
خالد بدون صبر:يلا عاد استعيلي..قصي بسرعة
غاليه:مب يووع هذا؟
خالد:يلا عاد..ان ميت من اليوع
بوخالد:وين القهوة؟؟هذا وقتها
غاليه:اصبر ابويه بقطع الكيك وبصبلك القهوة
ويرن موبايل خالد
خالد:الو...نعم خالتيه...شو؟؟فأي مستشفى؟؟شوفيه بالضبط..يلا يلا ياي..انا في الطريج
بوخالد:شو صاير؟؟
خالد:سلطان ولد عمي في المستشفى؟
بوخالد وهو يقوم من ع الكرسي: بسم الله عليه..شوصايرله؟
خالد:ماعرف..الحين بسير له
بوخالد:ثواني وبلبس ثيابي..اترياني
خالد:ان شاالله..بسير اشغل السيارة
غاليه وقلبها يدق بالقوو:سلطان..شي فيه؟
خالد:والله ماعرف..امه ماقالتلي شي
غاليه:لاحول ولا قوة الا بالله
وادخلت غاليه غرفتها وشلت موبايلها من ع السرير ويدها ترتجف من الخوف..واتصلت بعاشه
غاليه:الو...عاشه؟
عاشه بصوت تعبان:الو
غاليه:خير..شو فيه سلطان؟
عاشه:حصلوه مغما عليه في السيارة
غاليه بهلع:لا تقولين
عاشه:والدكتور بعده ما يا يطمنا
غاليه:الله يبشركم بسلامته
عاشه:امين...غاليه..ادعيله وبدت تصيح
غاليه:عاشه..شبلاج؟؟اذكري الله ..الصياح ماينفع
عاشه:انتي ماتعرفين شكبر معزة سلطان فقلبي
غاليه:حسبي الله ونعم الوكيل
عاشه:بخليج الحين الدكتور ياي
غاليه:طمنيني..لاتنسين
عاشه:ان شاالله
وبعد نص ساعة اتصل خالد
غاليه بلهفة:الو خالد.شو قال الدكتور؟؟
خالد:يقول استواله هبوط شديد في الضغط،وسببت له دوخة ودقات قلب سريعة..
غاليه:لاحول ولا قوة الا بالله..والحين؟
خالد:الحمدالله..الحين هواحسن...راقد وحاطيله مغذي
غاليه:متى بيظهرونه؟؟؟
خالد:اتوقع باجر...الدكتور يقول هبوط الضغط اقل ضرر من ارتفاعه
غالية:الحمدالله
خالد:خالتي مريم رجعت البيت؟
غاليه:لا بعدها ..وانا ماخبرتها
خالد:احسن..
وبعد ما صكرت عن خالد شلت المصحف من ع الطاولة ويلست تقرا سورة مريم
وبعد ما خلصت قرايه رجعت المصحف مكانه ويلست ع الكرسي وحطت راسها ع الطاوله..واتذكرت ايام الطفولة وبالتحديد فبيت ام عبدالرحمن
كانو كل جمعه يجتمعون فبيت يدتهم من الصبح لبعد صلاة المغرب..اتذكرت الدكان اللي كانو يسيروله كل عصر ويشترون منه بفك وكاكاو هوبي...كان سلطان هو اللي ياخذهم للدكان يحسب عددهم قبل لايظهرون من البيت وبعد مايرجعون..
واتذكرت غاليه موقف مر عليها وهي تقريبا بنت 8 سنين،لما عاشه طلبت من الدكان ونسوا يشترولها بفك ولما وصل راعي الدكان كل واحد خذ اللي له ويلست غاليه بعيد عنهم والدمعه فعينها فسارلها سلطان وعطالها البفك اللي كان شارنه لعمره،وراح لعاشه ونشع اذنها وقال:مرة ثانية لاتنسين غالية
طاحت دمعه من عين غالية وهيه تتذكر الموقف..فتحت سدة الطاولة وحصلت عشرين درهم ...مباشرة شلتهم وراحت لشغالتهم سونيا ..بنية دفع بلا عن سلطان

 

[ضوى العيون]

ثاني يوم ظهر سلطان من المستشفى ومباشرة راح بيت ام عبدالرحمن اللي حلفت انه يرتاح فبيتها...ولما دخل البيت
ام عبدالرحمن:فديت الغالي..يالله عسى فعدوينك ولا فيك
احمد:آآآه لو ادري جان مرضت عمري
ام عبدالرحمن:خسك الله مافيك خير...خوز عني
سلطان:انا يوعان...ام عبدالرحمن وين رايحة؟
ام عبدالرحمن:بسير انجب لك الغدا
سلطان:خلي الشغاله تنجب الغدا انتي ارتاحي
ام عبدالرحمن:لا والله..مسويه صالونة لحم اللي تحبها
سلطان:الله!!!
ام عبدالرحمن:بس الحين اشرب هالكاس
سلطان:شوهذا بعد؟
ام عبدالرحمن:ماي وشكر
سلطان:بعدين..بعدين بشربه
ام عبدالرحمن:عن الدلع..اشرب
سلطان:ان شاالله ان شا الله..وين ام سلطان؟
احمد:ابويه بيرجع اليوم فراحت البيت اتجهز الغدا
ام عبدالرحمن:اقرب
سلطان:بسم الله
ام عبدالرحمن: لا والله انا بغديك بيديه
احمد:سلطان..لاتطول اليلسه
سلطان:هههه..تغاار
عبدالرحمن:كلكم واحد..وبعدين هذا مب وقته تغار..ماتشوف اخوك كيف غادي
احمد:هيه ..اشوفه..حبيبتي ام عبدالرحمن..انا بعد لقميني
عبدالرحمن:عندك ييد..كل ابها
احمد:وشمعنا سلطان السي سيد تغدينه؟
عبدالرحمن:حشى..افتح حلجك انت الثاني
سلطان:خلاص انا مابغي اتغدى...انا ما كل ورا حد
ام عبدالرحمن:اللهم طولج يا روح
وبعد صلاة العصر قرر خالد يزور سلطان في بيت الجدة وغالية راحت معاه حتى تونس عاشه وسلامة
وفي بيت الجدة البنات يالسين في الغرفة اللي حذال الصالة ..سلامة يالسه ع اعصابها لان النتايج باجر..وعاشه وغاليه ياكلون بفك الامارات ويشربون كندراي الاسود
خالد وسلطان واحمد واليدة يالسين مع بعض واليدة يالسه ترمس يارتها عالتلفون
خالد:شوقررت تسوي في الشغل؟انا اقول خذلك اجازة احسن
سلطان:لا ..شوف مافيه شي فالدنيا اهم من صحتي وانا قررت انافس هاليوسف واكون احسن عنه وان شا الله يرقوني..
وفي الجهة الاخرى....
سلامة:ياحظكم مرتاحين
عاشه:الله اكبر
غاليه:انتي شوتحاتين ؟
سلامة:احاتي النسبة...
غاليه:حبيبتي اخرتها بتدرسين في الجامعه وتحصلين الشهادة وتيلسين في البيت تتريين ولد الحلال
عاشه:جيه حبيبتي انتي ع بالج كل الناس مثل عمي...نحن ابونا عادي عنده نشتغل بس عاد مايكون المكان مختلط
غاليه:هههه..ضحكتيني حتى ابويه نفس الشي لكن الغالية وين هالمكان اللي مافيه اختلاط؟خبريني واذا فيه فمافيه شاغر
عاشه:عادي..انا اصلا ماافكر بالشغل..انا ابغي ارتااااااااح
سلامة:مالت عليج...انتي انسانة بلا طموح
عاشه:خليت الطموح لج
وفجأة يسمعون ضحكة قويه
غاليه:بسم الله..منو هذا؟
سلامة:هذا اكيد احمد
ويسمعون صوت اليدة اللي تفاتن ع الشباب
ام عبدالرحمن:وانتو متى بتعرسون؟
خالد:ان شاالله قريب
ام عبدالرحمن:قريب؟؟وانت يا الغالي متى ناوي تخطب؟
سلطان:انا؟؟والله شو اقولج يا ام عبدالرحمن؟ اشورايج انتي تخطبين لي
ام عبدالرحمن: وشله اتعب عمري والبنت موجوده...خذ بنت عمك غاليه..ماراح اتلاقي احسن عنها
وغاليه كانت بتاكل البفك الثاني لكنها من سمعت الرمسه اتيبست وويها غدا احمر، وعاشه وسلامة يشوفونها ويضحكون

 

[ضوى العيون]

سلطان: والله اذا بتوافق انا ماعندي مانع(وكان متعمد يعلي صوته)
خالد سكت واكتفى بابتسامة
سلطان فخاطره:طلبتج ياغالية لاترديني.........طلبتج
غاليه بعصبية :سلموه..قومي افتحي التلفزيون هذا وقت مسلسلي
عاشه:اونها عاد مستحية
غاليه:عواش..اسكتي احسن لج
اليوم الثاني الساعة عشر الصبح سلامة يالسه حذال عاشه اللي اتحاول اتظهر نتيجة اختها لكن الزحمة ع الموقع مخلية الموقع بطيء
سلطان وهو يدخل الحجرة...شو الاخبار ؟
سلامة بتوتر:بعدني ماشفتها ..
عاشه:فتح..فتح
سلامة:بطني يعورني...ما بشوف...بشري
عاشه:انتي خمني
سلامة:عواش..قولي
عاشه:84و6 من عشرة
سلطان:هههه...قلت لج محد يقدر يطوفني..انا اشطر واحد فيكم
عاشه:سلموه..تصيحين؟؟اعلى عني يا ذكية
سلامة:مب حلوة النسبة
سلطان:ياالعنز غيرج يتمنى ينجح..قولي الحمدالله
سلامة:الحمد الله
سلطان وهو يقترب من اخته اتفضلي
سلامة(وهيه تمسح دموعها ):شوهذا؟
كان ظرف ابيض
عاشه:يلا عاد افتحيه
سلامة:هذي الفين درهم..بس انا
سلطان: اصلا في كل الاحوال كنت بعطيج اياها
سلامة:شكرا بس الاتفاق كان الف
سلطان:شو اسوي ؟اخوج راهي
عاشه:شمعنا؟؟وانا يوم نجحت يبتلي مسجل مع dvd بخمسمية درهم بس
سلطان:اففف..اوه اتذكرت شي مهم..يلا مع السلامة
سلامة بابتسامة: شكرا ..ماتقصر يا بومايد
عاشه :انا بعد عندي هديه...(قامت من ع الكرسي وحبتها ع خدها) هذي هديتي
سلامة: تصدقين هذي احلى هدية حصلتها(بسخرية)
عاشه:ادري
ويرن موبايل عاشه
غالية:بشري
عاشه:84 و6 من عشرة
غاليه:الف الف مبروك...عطيني اياها بباركلها
عاشه:اندوج
سلامة:الوو
غاليه:الف مبروك حبيبتي
سلامة:الله يبارك فحياتج
غاليه:خالو حذالج بباركلها
سلامة:ام سلطان اظهرت من البيت راحت الجمعية
غاليه:اكيد تشتريلج كيكة
سلامة:هههه..يمكن..
عاشه:غليوه صكري بنبشر امنا
غاليه:يلا مع السلامة
عاشه:عطيني مو بايلي
سلامة:اندوج
عاشه:الو...ام سلطان..بنتج انجحت
ام سلطان:الحمدالله..بشري كم النسبة
عاشه:60 وصفر من عشرة
سلامة بصوت عالي:اتقص عليج لا تصدقينها
ام سلطان:عطيني سلموه
سلامة:الو ..يبت 84 و6 من عشرة
ام سلطان:الف مبروك حبيبتي الف الف مبروك..الحمدالله الحمدالله

وفي بيت بوخالد ...ع العشا
غالية حست بشي غريب ..الكل ياكل وهو ساكت وعينهم ع بو خالد
بوخالد:خلصي عشاج وتعالي غرفتي
غاليه:ان شاالله
خلصت غالية عشاها وراحت لابوها..دقت الباب وادخلت
بوخالد:غاليه
غاليه:نعم ابويه
بوخالد:تعالي حذالي
غالية بابتسامة:ان شا الله
بو خالد :تتذكرين حميد بن راشد؟
غاليه:هيه ..شو سالفته بعد؟
بوخالد:مازال عنده امل..شوتبغيني ارد عليه؟
غاليه:نفس الرد اللي دايما يسمعه
بوخالد وهو يمسك ييد بنته:فيه شخص ثاني متقدم لج
غاليه وقلبها بدا يدق بسرعة:..........
فخاطرها ليكون...
بوخالد:شوفي مهما يكون ردج فأنا بكون معاج
غالية:...
بوخالد:سلطان ولد عمج رايدنج..شورايج ؟
غاليه :لاا
بوخالد:لا؟ليش لا؟عطيني سبب مقنع للرفض..غالية حبيبتي ..البنت مو كل يوم بيخطبها ريال متربي واخلاقه عاليه..وانا ماامدحه لانه ولد اخويه...لكن عارفينه وعارفين اطباعه والكل يمدحه ويشكر عليه...واذا عندج سبب مقنع فأنا معاج
غاليه:هيه ..عندي سبب
بو خالد:وشو هو السبب؟
غاليه:انا ماركب الا فرويل واضحكت..واظهرت من غرفة ابوها
بوخالد:خسج الله..هذا سبب؟هههه
سلطان يالس حذال التلفون ينتظر الرد ع احر من الجمر وعاشه يالسه حذاله تجلب مجلة لها
ام سلطان:سلطان..قوم هات سلامة من بيت خالك
سلطان:ماقدر..
ام سلطان:انت ع بالك الرد يكون فنفس اليوم؟...اصبر شوي..
سلطان:محد كثري صبر..
ام سلطان:يلا عاد رووح
سلطان:ان شاااااااااا الله
راح سلطان لسلامة وماكمل عشر دقايق الا وهو راجع البيت
ام سلطان:بسم الله..مسرعك
سلامة:طار فيني
سلطان:بشري..اتصلوا؟؟؟
سلامة:منو؟
عاشه:رفضت
سلطان:جذابه
ام سلطان:عاشوه..حرام عليج....وافقت العروس
سلطان:عيدي اللي قلتيه...انا ماسمعت؟
عاشه:وااافقت
سلطان:ام سلطان..قوليلهم هالخميس الملجة
ام سلطان:اتخبل هذا؟
سلطان:ياالله...يالله..ماعرف شواسوي..(شوي وبيطير من الفرحة)
عاشه:بسم عليك...وين رايح؟
سلطان:بروح اشتريلي نعال من انطونيو بشيوتي وبفصلي ست كنادير من عند الغواص..يا سلاام..انا مو مصدق....مو مصدق

غاليه رفضت تكون الملجه عقب اسبوع فملجوا بعد شهر..وسلطان من ملج وهو يوميا يطرش لها وردة بيضا بعروق حمرا
اما عاشه فخذت مدة طويلة حتى تفكر لكنها في النهاية وافقت ع عمران واشرطت يكون عرسها بعد رمضان..اما خالد فظل ع حالته بدون عرس هو صحيح عيبته عليا لكن مستحيل يخطبها لانه مايحب الا البنت الحشيم اللي تستحي اما الجمال فهو مش كل شي..وخالد فعمره مانسى صديق عمره عبدالله وقرر هالسنة يحج عن ربيعه عبدالله..
وسيف ظل ع حالته وحرمته احملت لكن بعد محاولات من الام انها ترد ولدها مثل ماكان استغلت سفرهم في الصيف فدخلت بيتهم وحصلت العمل اللي مسواي له
ولله الحمد بقدرة الله رجع سيف لطبيعته ولما عرف المكيدة اللي مسوتنها حرمته فيه طلقها وبعد ماربت خذا بنته لانها ماتستحق تكون ام لكن امه اقنعته انه متى ماحبت عليا تشوف بنتها تقدر تزورها فاي وقت...

 

[رفود]

مشكوره حبيبتي على القصه الحلوووه

 

[نااناا]

يـعــطـيـج العـــــــافيــه حــبيبتي على القصــهـ..

 

[***ريماس***]

يسلموووووووووو ضوى العيون
وتسلم أنااااملك