صفات تحبين تكون موجوده بسيدة الاعمال الكويتيه في مول منتدانا الحلو؟

[FOZQ8]

احس المفروض موضوعي يكون بالمول
بس ماقدر لان ماعندي العضويه

بس حبيت بعد ما تعاملت مع وايد بنات من المول
اني انصح خواتي التاجرات وأفيدهم وتفيديونهم يابنات
عشان رزقهم يزيد
وانا احب بصراحه انهم يكسبون وتزيد تجارتهم
واحب اني اتسوق واستانس واستفيد من اللي يبيعونه

راح احط بعض الملاحظات اللي أحبها تكون في اي موضووع ينطرح لبيع منتج سواء ملابس والا اكسسوارات او اي شي

أولا : توفر الصوره الواضحه .. اذا كانت ملابس يستحسن ذكر السايز واذا كان متوفر مقاس محيط الصدر والخصر وغيره "لكن يكفي السايز العام" .. اذا كانت جنطه مثلا يفضل ذكر ارتفاعها وعرضها بالسانتي أفضل بوايد عشان ما تطلع تووومتش صغيره او تووومتش كبيره
وغيره من الاشياء حتى لو كريم يفضل عرض صورته ليش لأ ؟؟في وايد بنات ما يبون يشترون السمج واهوا في الماي .. ترى هالعامل يكون عامل جذاب لموووضووعج عزيزتي سيدة الأعمال :dddds:


ثانيا : ذكر السعر على العام افضل من الخااااص .. صدقوني وايد افضل .. لأن في ناس تتعيز حتى انها ترسل لج رساله خاصه او ترد على موضوووعج وبجذي ممكن تخسرين زباين أكثر


ثالثا : الدقه في توصيل الطلبات شي ضروري
وشرط يكون اللي يوصل مو نفسيه جربتها مع هندي حسيت اني اشتغل عنده ووالله مارديت عليه الا بالخير وعطيته كروته


امممم للحين هذا اللي عندي اذا يابنات عندكم ملاحظات على سيدات الاعمال
او نصائح تفيدهم وتزيد من تجارتهم لا تبخلون علينا



وأحب بعد من تاجراتنا انهم يضيفون ملاحظاتهم القيمه ونصايح وصفات يحبونها تكون متوفره في عميلاتهم اللي اهما احنا

وتقبل الرأي الآخر واحترامه شي مفروض على من ترد على موضووعي بدون غلط او تبلي وتجني
الموضوووع للافاده وليس للتشهير او التطنز

ناطرتكم يا أحلى كويتيات ......

 

[اللبـــوة]

ا

انا بشارك بالموضوع من ناحية مختلفة تماماً..
بتكلم عن اشياء يمكن يسوونها البنات بحسن نية او بدافع زيادة الربح وهي حقيقة غش وحرام..
معظم اللي قاعده اشوفه بالمول شايفته بره او بالانترنت وباسعار رخيصة حدها .. بس البنات يعرضونه باسعار خيالية ومومعقولة كلش وربحهم من غير مبالغة = 3 اضعاف راس المال .. هالشي حرام حرام حرام
يا بنات الرسول ما منع التجارة بس بالمقابل نهى الرسول عن (بيع الدرهم بدرهمين) وهذا المقصود فيه المبالغة في الربح.. هذا من ناحية شرعية
ومن ناحية قانونية .. هذا اسمه استغلال له احكامه بالقانون اللي جعله محظور..
بأمانه.. اللي يسوونه البنات مو شطارة .. اتمنى انهم يتقبلون كلامي بصدر رحب​

 

[FOZQ8]

امممم معاج حق في بنات زياده عن اللزوم
لكن بنفس الوقت محد يجبرنا نشتري ترى
فأهما حرين باختيار اسعارهم واحنا حرين في التشري والا شرايج؟؟

بس هم هذا مو موضووعنا

 

[اللبـــوة]

معاج حق فوز.. اهم حرين واحنا حرين..

 

[FOZQ8]

حياج ياللبوه بعد عمري انتي اللي عبرتيني لوووول
حياج قلبوو

 

[sKyLiTeGirL]

مشكورا اختي فوز على هالموضوع وايد ايفيد التاجرات بالمول واتمنى ايشاركون فيه

بالنسبه للاسعار صج فيه اشياء مبالغ بسعرها بس هم فيه اشياء تسوا ويرجع للزبونه بحرية شرائها>>يعني اذا موعاجبها مو مجبوره: )

ولاننسى تكلفة الشحن ومجهود تاجراتنا ووقتهم هم لازم انراعي هالشي

والنقاط اللي ذكرتيها وايد مهمه

 

[kuwaitya_zoGaa]

انا بقول رايي ...

التاجره لما تحط الاسعار تحسب حساب
راس المال + مصارف الشحن + الضريبه + سعر الطاوله + المربح .
ولها حريه الاختيار فى اسعارها
لانه السوق عرض وطلب ...
والمشتريه مخيره انها تشتري والا لا ...

بس فى نقطه مهمه ...
لومافى ناس تشتري وتدفع جان ماحطو هالقيمه ...

 

[ياشايل الظبى]

هلا والله انا ما احب التسحيب بالسعر .. يعنى السعر على الخااااااص شدعوا

وحلاته التاجره تكون مواعيدها مضبوطه

واهم شى عندها كسب الزبونه مو الكسب المادى

 

[أمواج البحر]

مثل ما قلتي افضل المنتج يكون معروض صورته و الاهم السعرررررررر

لاني صج اتعييز ادز رساله و ممكن السعر ما يناسبني

ومشكووره حبيبتي على الموضوع

 

[أساور]

ياريت كل التفاصيل عالعام ماله داعي الخاص ويمكن يعجبني ويمكن لا

 

[غرشة عطر]

مشكوره ياقلبي عالموضوع الحلوو انا عن نفسي ارجو من الزباين انهم اذا اطلبوا طلب وجاهم بالوقت المحدد لاتزرع المندوب بره ساعه وعقب كل هذا وعنوة المندوب وتضيع وقتي ووقته تدق تلفون تسفل وتقول كلام مايلوق والسبب انه اللوشن او العطر ماعجبها واهي داقه وطالبته واهي ماتعرفني بس عشان شافته وشمته وعجبها عند وحده وتبي نفسه قمت التناقض ا اما تعطيني امها تسفل وتهاوش وماتعطي المندوب الا نص فلوسه هذا عيب والله مايرضي وحرام

هم احنا نتعب ونحاول قد مانقدر ان نرضي زباينا بس لابد من الاسلوب الراقي بالتعااااامل وطبعا هذا الشي خلاني احط اكس علي ارسال شي لها او استقبل اي مسج او مكالمات من نفس الرقم

وجزاكم الله خير

 

[غرشة عطر]

السلام عليكم

 

[FOZQ8]

وي وي ياحسرتي هذا عيبي اكتب موضوع وانسى خصوصا هذا لأن ظل فتره محد يعبره لوووول


مشكوورين بنات اللي ردوا وللحين مفتوح الموضوووع للنقاش

غرشة عطر ,, شنو هذا شكو تسفل الاخت !! بعدين معروفه المندوب حتى لو ما عجبني الشغل لازم اعطيه
وعلى قولتج لازم ما تزرعه ..
الله يكون بالعون

حياكم بنات بعد بعد

:gathering:

 

[ذهب الروقي]

صحيح كلامك اختي فوز واحيانا تكون الصوره تبهر واللي يوصلج شي ثاني!!

يعني فيه اختلاف او فيه تغييييييييييييييييييييييييييييييير او فيه نقص ولما تتصلين الجهاز مغلق او محد يرد

واذا احد رد ماتاخذيين منهم لا حق ولا باطل يعني انقص عليج بالعربي بس بذرابه


يسلمووووووووا عالموضوع

 

[pretty86]

موضوع حلو بتابعه ...

 

[الإسراء]

موضوعج روووعة ,,,
وياريت يكون في التاجرات مصداقية وعدم الغش والكذب ,,,
وتحط نفسها في موقفنا ,,,
يسلمووو يالغالية عالموضوع الرائع جدا ,,

 

[a6o06 ^_^]

يعطيج العافيه عالموضوع الحلو من زمان كنت ابي احد يتكلم عن هالشي
لاني عضوه يديده تقريبا فعبالي ان كل التعامل يتم بالخاص مادري ان يصير بالعام p;

بالنسبه حق الاسعار صح احنا نقدر نشتري وما نشتري منهم بسبب الاسعار المبالغ فيها بس حرام يعني يكون بخاطري وابيه وسعره ما يسوى
وفوق هذا اشوف نفس البضاعه بالموقع الاصلي ماله يكون وايد رخيص واهيه تبيعه غالي.. شي يقهر

 

[دراهــم]

السلام عليكم

يعطيج العافية على الموضوع ..

وثاني شي .. الله يعطي تاجرات العافية .. وبصراحة سهلوا لنا روحة السوق .. وما قصروا صراحة

بس في شغلة صغيرة حبيت اوضحها

الالتزام بالمواعيد .. يعني يكون بينا موعد .. يا ليت إذا صار عندها ظرف وما قدرت تحضر .. عادي تطرش مسج .. مو تخلينا ننطر ونأجل مشاويرنا .. وتالي ما نحصل شي .. للأمانة هـ الشغلة صارت وياي مع ( 2 ) .. كنسلوا الموعد من كيفهم ولا طرشوا لي مسج .. من جد تضايقت

وغير هذا ماكو

ومعليش تحملوا الكلام .. والله هذا لمصلحتكم

ويعطيكم العافية

 

[رفرف]

خوش موضوع فوووز
وانا تعاملت مع كذا تاجرة من المول والحمدلله ماشفت منهم الا كل خير ..

احب يكون موعد التسليم والسعر واضح ..
يعني مثلا بييج المندوب اليوم الفلاني بالوقت الفلاني تقريبا ..
لأن مرات بس يحددون اليوم ومادري اي حزة بالضبط بيي ..
او يدق حزة الحزة يقول انا قريب ..
واضطر اكنسل كل مواعيدي علشام شغله ماتاخذ 5 دقايق ..
هم انا ما يرضيني اطلب الشغلة ويوصل المندوب ويتعنى وماكون بالبيت ..


وهم احب السعر يكون ع العام لأن مرات انحرج اطرش رسالة واخر شي السعر ما يناسبني ..

اذا تذكرت شي بعد بكتبه ..

 

[اطياب طيبه.أم عبدالله]

انا وياكم
وعن نفسي انا اسعاري كلها على العام
ليش السعر سر مثلا ؟؟؟؟؟؟

حياكم الله وبإنتظار انتقاداتكم