[ صـديقـاتي والقـدر ] روايتي الأولى والواقعيـة[ روآيه مسمُوح بهآ ]

[m!ss nunu]

رد: رد : [ صـديقـاتي والقـدر ] روايتي الأولى والواقعيـة[ روآيه مسمُوح بهآ ]

لا عــادي حبــيــبــتي مــقــدريــن ظــروفــج ~~
و اخـذي راحــتــج ~~~
و احــنا ناطريـــنج ~~

:eh_s(17): فدييييتج مس بلووووو
والبارت ان شاء الله دقايق ونازل لعيونكم

 

[m!ss nunu]

رد: رد : [ صـديقـاتي والقـدر ] روايتي الأولى والواقعيـة[ روآيه مسمُوح بهآ ]

عـــادي حبووبـة اخـذي راحتــج ْْْْ
والوعــد انشاءالله ع صلـاه الفجـر ْْْْ
ناطريـــــنج ْْْْ

كاني حبيبتي خلصت البارت بس اظبطه وانزله ان شاء الله

 

[m!ss nunu]

سوري حبيباتي .. وسوري لكل الي نطرني وأخرته

وهذاني ان شاء الله بنزل البارت


وصباح الورد على الجميع

 

[m!ss nunu]

البارت الـ 13




ولما يات بتكتب .. وصلها مسج .. وانصدمت لما فتحته انه من مرت ابوها

.. وكانت كاتبة فيه ......




ملاحظة: ( ابو روان ومرته منفصلين عن بعض بالبيت ومقررين الطلاق من زمان وبينهم مشاكل كثيرة والي مانع طلاقهم ومأجله اهو ولدهم الصغير"علي" )





.. كانت رجاء كاتبة بالمسج



( روان شقصتج؟ انا مالي داعي في هالبيت يعني؟ )



.. روان انبطت جبدها زود .. صج فوق شينها قوات عينها





.. وردت عليها بمسج

( انا ماقلت جذي .. بس مو حلوة الحركة الي سويتيها)



.. واستمرت بينهم المسجات وراح احط لكم تقريبا شنو دار بينهم





رجاء:

( .. تراني مو ضرتج ياروان واذكرج اني للحين زوجة أبوج. وللحين البيت بيتي دام ولدي موجود فيه ، وانا لاحظت انج تغيرتي .. صرتي ماتاخذين رايي في شي .. كأني صفر ع الشمال ، واني انا وابوج على خلاف وفي مشاكل هالشي مايعني اني مو راعية البيت ، الا اذا هالشي تبينه من زمان .. لكت انا بخلي لكم البيت اسرحوا وامرحوا فيه على كيفكم ، انا باخذ ولدي وبطلع)



روان:

( خلي الولد مكانه .. لا تهدمين حياته .. لا تدخلينه بدوامة المشاكل)



رجاء:

( تهمج مصلحته يعني؟ )



روان:

(طبعا ، هذا اخوي ولد ابوي ، اكيد بتهمني مصلحته)


رجاء:

( انا بعمري ماضريتج بشي .. كنت دايما اعتبرج اختي الصغيرة .. ابد ماتوقعت انه يجي يوم تكلميني فيه بهالطريقة)



روان:

(لو فعلا معتبرتني اختج الصغيرة جان مابهذلتيني وسويتي كل هالسوات فيني .. حتى اهلي منعتيني من اني استقبلهم في بيتي ، وربعي أحيان تسوين لي مشاكل اذا اخليهم اييون عندي .. مرات اطلع من البيت بالليل ابجي من حركاتج وتصرفاتج .. لو انا اختج الصغيرة جان ماخليتي ابوي يجيب لي ثيابي لغاية بيت يدي ، بتقولين مو انتي السبب؟؟ جان ع الاقل منعتيه لو فعلا مو انتي السبب .. فوق كل الي سويتيه انا قطيت كل شي ورى ظهري وكنت اضحك معاج واتصرف عادي ، ورغم انج منعتيني من اني اتصرف بحرية في بيتي هم سكت وتحملت وكل هذا عشان ابوي .. وشكلج تبين ترجعين تتحكمين فيني .. لكن اسمحيلي .. انا ماعدت روان الي عرفتيها .. قبل كنت اسكت وامشي على نياتي لكن نيتي الزينة صورتيها في بالج على انها ضعف .. وانا مو ضعيفة .. لكن الحين ماراح اسكت عن حقي ابد)



رجاء:

( وانا مالي حق؟؟ طرطورة؟؟ )



روان:

(لا طبعا مو جذي ..بس انا لو كنت مرت ابو ماكنت بسوي في بنت ريلي الي انتي تسوينه فيني )



رجاء:

وانا شسويت فيج؟ الي يسمعج يقول ذابحتج .. انا دايما كنت مبتسمة بويهج وتاركتج على راحتج وما احب ازعجج .. ودايما كنت أوقف بويه ابوج وأدافع عنج اذا ماسوى لج الي بخاطرج وتقدرين تسألينه بنفسج .. وحسبي الله عليه لو انكر .. وانا آسفة اذا حاولت امارس حقي الطبيعي كزوجة .. والله يستر عليج وماتطيحين بزواج فاشل مثل زواجي



روان:

( ادري انج كنتي تبتسمين بويهي .. لكني كنت اعرف شنو تحسين ناحيتي .. وكنت اجوف أشياء واسكت)



رجاء:

(تقصدين اني كنت أنافقج؟)



روان:

(ع العموم انا بضل احترمج)



رجاء:

( انا قسم بالله عمري مانافقتج .. صج ماتوقعت انج هالكثر تكرهيني )



روان:

( انا ماكرهج .. وما أنكر الاشياء الحلوة الي سويتيها عشاني ، انتي فعلا سويتي لي اشياء ما انساها.. ومثل ماقلت لج بظل أحترمج )



رجاء:

( على فكرة مو حلوة حركة انج تقطين السشوار الي سلفتج اياه برة الغرفة .. انا عشان جذي طلعت الكراسي برة غرفتج بس مو عشان اخذهم منج .. بس بطيتي جبدي لما قطيتي السشوار برة وحبيت اعاملج بنفس اسلوبج .. رغم اني اقدر اخذهم منج بأي وقت لأني شاريتهم بفلوسي)





.. روان هني ماتت من القهر أول شي لأنها ماكانت تقصد ترمي السشوار برة الغرفة .. اهي كانت حاطته برة عشان لما تنزل تحت تنزله معاها لكنها نست .. وثاني شي لأنه مرت ابوها ماتيوز عن الجذب وقالت ان اهي الي شارية الكراسي .. وروان كانت حاطة في بالها ان رجاء راح تقول انها شاريتهم بنفسها عشان جذي تأكدت من أبوها



روان:

( انا ماقطيته برة .. انا نسيته .. وانتي تدرين ان مافيني هالطبع)



رجاء:

( العموم انا بخلي علوي هني حاليا.. ودام ورقة طلاقي للحين ماوصلت لي .. بيتم هذا البيت بيتي )



.. وروان ماردت على آخر مسج ، وقعدت تتعوذ من ابليس



أما رجاء فخذت أغراضها وطلعت من البيت ،، وتركت ولدها "علي" بالبيت لـ روان الي كانت له أخت وأم ثانية بنفس الوقت





مرّت الأيام وابتدت الدراسة .. البنات داومو بالجامعات بإستثناء لمياء ورؤى طبعا .. وروان كانت تداري دراستها من صوب وتداري اخوها الي دخل الروضة من صوب

كانت روان تهتم بأكله وتدريسه ونومه وبكل شي يخصه .. حتى لما كانت تروح بيت يدها تاخذه معاه عشان يغير جو مع اليهال ومايتم بروحه بالبيت

كانت ماتنام عدل لأنها كل شوي تطل عليه بالغرفة اذا نايم عدل والا لا .. صحيح كانت تحس ان على ظهرها مسؤولية كبيرة ، لكنها تحب اخوها وكل شي عندها يهون ولا انه يحس بالمشاكل الي حواليه

وكانت مرت ابوها بين فترة وفترة تمر تاخذ ولدها وتطلع معاه .. وأحيان تدخل البيت تنام بس ماتظل على طول موجودة

( للمعلومة .. مرت ابوها مو بحرينية .. وهي من جنسية عربية)



.. واستمر الوضع على ماهو عليه



وبيوم من الأيام ، روان كانت قاعدة بدارها تفكر براشد ، الي مر على سجنه سنة وشوي ، كانت تحاتيه لأنه للحين ماطلع ، كانت خايفة انه صار شي وخله مدة سجنه تطول وتتمدد ، قامت تحس انها مو قادرة تركز بالدراسة ولا بأي شي تسويه .. الأفكار توديها وتييبها .. وفكرة انها خسرته وممكن مايرجع صارت هاجسها..





روان: يارب طمن قلبي .. انا بدون راشد أضيــــــــع .. الي تحملته في غيابه أكبر من طاقتي .. يااارب صبرني وريّحني



بمكان ثاني ..

رؤى كانت قاعدة تكلم خالد..



رؤى: ياخالد خلاص زهقت من هالسيرة .. ماكو سيرة غير سيرة الزواج يعني



خالد: يارؤى ليش تأخرين الموضوع أكثر .. انتي ماتحبيني؟



رؤى: امبلى ياخالد .. الحب ماله علاقة بالموضوع .. له علاقة بالراحة النفسية



خالد: وانتي شنو الي مو مريحج للحين؟



رؤى: الزواج بكبره .. انا ابي اعيش سنّي وعمري ياخالد مابي ألتزم بزوج وبيت وعيال من الحين .. مابي باجر اندم اني ماسويت كل الي خاطري فيه



خالد: وشنو الي خاطرج فيه وماتقدرين تسوينه بعد الزواج؟



رؤى: كل شي .. السفر والطلعات وغيرها



خالد: من قالج ان هالاشياء ماتقدرين تسوينها بعد الزواج؟



رؤى: بسويها بس بقيود .. و بكون حاطة في بالي قبل لا اسوي اي شي اني متزوجة .. واني ماقدر اطلع بأي وقت ولا اسافر بأي وقت .. ولا أقدر اسوي اي شي براحتي لأن في شخص بيكون مشاركني بكل شي



خالد: تعبتيني يارؤى معاج



رؤى: خلاص ياخالد .. قلت لك متى ماكنت مستعدة راح اقولك بنفسي تعال اخطبني



خالد: (تضايق) خلاص خلاص .. كييييفج





.. رؤى ياها خط ثاني .. وأول ماشافت الرقم ارتبكت



رؤى: خالد شوي وأكلمك أوكي؟



خالد: اوكي



.. سكرت رؤى من عند خالد وردت على الي داقة

وكانت

(ام فهد)





رؤى: (بصوت مستغرب) ألوو؟



وفاء(ام فهد) :هلا يمه رؤى .. شلونج؟



رؤى: الحمد لله بخير خالتي .. انتي شلونج؟



وفاء: الحمد لله بخير .. ولهت عليج حبيبتي


رؤى سكتت..



وفاء: رؤى ، انا ادري ان الي ياج من ولدي مو هيّن .. وادري انه غلطته مو سهل على اي وحدة لو كانت مكانج انها تعديها له او تسامحه عليها .. بس يارؤى فهد ندماااان حيل .. مو قادر يشيلج من باله أبد



رؤى: خالتي .. فهد كان مرحلة من حياتي وعدّت .. والصفحة الي تنشق عمرها ماترجع مثل ماكانت



وفاء: حبيبتي رؤى ، كل انسان ممكن انه يغلط ، لكن الشاطر الي يتعلم من غلطته



رؤى: خالتي انا اكتشفت ان كل الي صار خيرة لي ،، انا وفهد ما نناسب بعض



وفاء: فكري يارؤى .. فكري زين .. ترى فهد شاريج ومايبي غيرج .. ولو توافقين من باجر انييكم البيت



رؤى: يصير خير خالتي



وفاء: يالله حبيبتي .. انا اخليج الحين .. مع السلامة



رؤى: مع السلامة



.. سكّرت رؤى من عند ام فهد واهي متضايقة حيل من المكالمة ، ليش يلاحقونها عقب مابتدت حياة يديدة ، ليش يبون يشغلون بالها ويخلونها تفكّر بكلامهم ، ليش يضايقـــووووونها



رؤى: ياليت يخلوووووني بحالي ويريحووووووني




بعد هالأحداث بإسبوع تقريبا..



عليا كانت داقة على لمياء..



عليا: لمووووووي حبيبتي شلونج .. وحشتيني .. ولهت عليج



لمياء: بسم الله .. شوي شوي مع ويهج كلتيني



عليا: مالت عليج .. يزات الخير اسأل عنج وولهانة عليج



لمياء: حياتي انتي .. شخبارج .. وشخبار الجامعة؟



عليا: ( بخجل) الحمد لله كل شي تمام



لمياء: وشفيج ان شاء الله تقولينها وانتي مستحية



عليا: لمووي بقولج شي بس مو تفضحيني .. لأن للحين ماكو شي يسوى

لمياء: زين قولي


عليا: ( بمياعة وهي تمد بالكلام) لمووووي معانا واااااااحد بالصف



لمياء: ايييي؟؟؟



عليا: انزيييييييين؟



لمياء: اييييييييي .. وويعي يا عليا خلصيني



عليا: لموي مادري شحس ، هذي أول مرة احس بجذي ناحية احد



لمياء: شلون يعني؟؟



عليا: احس استانس اذا اجوفه ، اهو وايد محترم وحبوب ، صج ما أحتكيت فيه ومانتكلم مع بعض الا نادر وطبعا يكون بخصوص الدراسة ، لكن عنده اسلووووب في التعامل يفزّز القلب



لمياء: علوووووي ليكوووووووووون؟؟؟؟؟؟



عليا: (استحت) مادري يالمياء .. اساسا مادري شنو معنى احساسي هذا



لمياء: انزين واهو شلون يعاملج؟ بطريقة خاصة؟ والا حالج حال الكل؟



عليا: (بضيج) ماشوف شي خاص بعاملته لي



لمياء: شوفي علوي ، انتي ماصار لج وايد من دخلتي الجامعة ، وانتي بتظلين معاه ليما تتخرجين ان شاء الله بنفس الصف لأن نظامكم جذي ،، فعندج كل الوقت انج تعرفين شنو يحب وشنو مايحب عشان تجذبينه بس بطريقة ماتقللين فيها من قدرج ولا ترخصين من عمرج ، يعني مع الوقت ممكن تعرفين اهو اي نوع من البنات يحب ، وتحاولين تكونين مثل مايحب عشان ينتبه لوجودج



عليا: تهقين؟



لمياء: اي لا تستعيلين ، وبنفس الوقت لا تتفائلين زيادة عن اللزوم عشان ماتنصدمين بعدين



عليا: ان شاء الله



لمياء: يلاااااااا انقلعي بنام الحين



عليا: انزييييين ، كله تهاوش وبس ،، باي



لمياء : باي





سكرت عليا من عند لمياء وتمّت تفكر بالكلام الي قالته لمياء، كلامها حده منطقني ،، بس كل شي يحتاج لوقت ، وهي وراها 4 سنين دراسة ، يعني بتكون معاه بنفس المكان لمدة 4 سنين ،، ممكن فيها تقدر تجذبه لها بالطريقة الي قالت عنها لمياء




عليا: يارب اذا كان في هالشي خير لي قربه مني .. واذا كان فيه شر بعده عني يااارب



في بيت روان..


كانت روان قاعدة مع اخوها بالصالة يطالعون تلفزيون لما رن تلفونها..

روان اول ماسمعت الرنة حست انه قلبها وقف وان حواسها كلها تعطّلت..

مسكت تلفونها بيد ترجف وتمت تطالع الشاشة وتشوف الاسم الي الي اشتاقت تشوفه بموبايلها ،، نزلت دمعة حار على خدها ، خذت موبايلها وصعدت دارها بخطوات ثقيلة ، كانت تدري انها طوّلت بالرد وانها على ماتوصل دارها بيكون قطع الاتصال ،، بس مو قادرة ترد ،، رجفتها مانعتها..



وفعلا لما وصلت روان دارها انقطع الاتصال..



وثواني ورجع رن موبايلها..



وبقلب يرتعش ردّت..



.. روان فتحت الخط وتمّت ساكتة ، والطرف الثاني كان ساكت بعد

كانت مغمضة عينها تسمع انفاسه ودموعها تنزل بدون ماتحس فيهم



وبصوت مبحوح قالت ..



روان: حبيبي؟







لهني وخلص البارت .. واتمنى مايكون وايد قصير



وسامحوني بنات على القصووور



ناطرة ردودكم
​

 

[Dalal.E]

ثاااااااااااااانكس عالباااااااااااااااارت

وايد قصير

 

[rayona]

Mashkora galbii 3aLa iLpart .. Na6riniich ;**

 

[bnt-elghali]

ثانكس عالبارت

 

[ام حمادي309]

ممكن سؤاااااااااااال

ليش الاحداث بالبحرين انتي بحرينيه يعني ؟؟؟؟؟؟؟؟؟

ومشكورة على الرواية رووووووووووووعه

 

[Riooma]

laaaaaaaaaaaaaaaaaaaaaaaaaaaaaaaaaa2 mostaaaaaaaaaaaaaaaaaaaaaaaaaaaaaaa7el abi part 7adi ta3alaqt plzzzzzzzzzzzzzzzzzzzzzzzzzzzzzzzzzzzzzzzzzzzzzz

 

[MisS Rawan]

انـــــــــــــــــــــــــــــــا بعد آبـــــــــــــــــــــــي بارت ههههههههههههههههههههههههه

 

[بيـــشو17]

يسلمووو البارت حلو

 

[غلاهالكون]

يسلموووو حبيبتي
عالبارت

 

[DALLY]

تووووونس الاحداث

شوقتينا

كملي حبوبه ناطررررينج

 

[ملكية للابد]

رد : [ صـديقـاتي والقـدر ] روايتي الأولى والواقعيـة[ روآيه مسمُوح بهآ ]

يسلموو حبيبيتـي ع البـارت
وحددددددده يشوووق
لاتطووليـن علينـا
نوووبي بـاارت

 

[ام بشبش]

يسلموووو على البارت ياعمري

 

[so_what]

يسلمووو ناطرينج

 

[ملكية للابد]

رد : [ صـديقـاتي والقـدر ] روايتي الأولى والواقعيـة[ روآيه مسمُوح بهآ ]

ويـــــــتنق ،،

 

[Miss.blue berry]

رد : [ صـديقـاتي والقـدر ] روايتي الأولى والواقعيـة[ روآيه مسمُوح بهآ ]

نبي بارت

 

[m!ss nunu]

بنات انا قاعدة اكتب البارت ان شاء الله ماراح اتأخر عطوني شوية وقت

 

[so_what]

ناطرينج :eh_s(9):