أحلى همبه كويتية
**مشرفة قسم مائدتك**
غدانا في يوما ما
خميس من الخميسات اللي اطبخ فيها
صبور مشوي - مشخول مع الحاكوكة - اجار
المقادير :
سمك صبور حسب عددكم
بهارات سمك
ربع كيس صبار منقع بشوية ماء دافي ونتفة كركم+ 3 تمرات ( نقعيهم قبل بفترة )
ملح خشن
لومي ناعم
زيت
عصير ليمونة
الحشوة :
بصل مفروم ناعم او خشن حسب رغبتك
3 فصوص ثوم اما مدقوق او مفروم مع البصل
كزبرة أو شبنت مفروم
طماطة مقطعة صغار
بهارات سمك
كركم
لومي ناعم
ملح
شوية زيت
فلفل حار علوب ( حسب الرغبة )
ليمون معصورة وبعد العصر تقطعينا لأربع قطع
تخليطنهم مع بعض بماعون
الطريقة :
- سخني الفرن .
- تشقين السمكة من ظهرها مو بطنها وتطلعين كل الوصخ اللي فيها وتشيلين الخياشيم بعد مو تنسينهم
- تغسلين السمكة عدل من الداخل وتملحينها بملح خشن وتتركينهم على جنب ربع ساعة تقريبا
- تجهزين الحشوة بخلط جميع المكونات مع بعض في ماعون
- تغسلين السمك مرة ثانية عدل من الملح وترشيح ملح ناعم شوية مو وايد لأن الملح الخشن اثره بيظل بالسمك
- تصفين منقوع الصبار وتمسحين فيه السمكة من الداخل والخارج عدل ( غرقيها بالخليط من داخل طعمه يصير نااااااااطع )
صورته قبل لا اصفيه ( لازم يكون المنقوع شوي ثقيل )
- تعصرين ليمون داخل السمكة وترشينها بشوية لومي ناعم وبهار سمك
- تحشين السمكة بالحشوة اللي سوينها كثر ما تبين
- تصفينهم بصينية الفرن المفروشة بالقصدير ومدهونة بالزيت
وتدخلينهم الفرن تقريبا من ساعة إلى ساعة ونص على درجة 180 من تحت
ولما يستوي من تحت تشعلين الفرن من فوق شوي لما يتحمر
- ولو تودينه الخباز يشوووووووووويه لج بعد احلى وأحلى
مع المشخول والأجار والخضرة
الحمد لله على النعمة يارب احفظها من الزوال
طريقتة :
جيلة عيش التموين
غسليه ونقعيه بماء لمدة 10-15 دقيقة بس كافي عليه
- اغلي ماي على النار مع ملح ( لازم تذوقينه عشان تضبطبن ملحه )
بس يغلي شخلي العيش المنقوع وحطيه بالماي
- اتركيه يقلب 4-5 مرات بس واختبري اي حبة اذا مستويه لازم تشخلينه من الماء فورا عشان ما يصير لين ( لا تخلينه يستوي وايد )
- في جدر ضعي شوية بصل مفروم او شرايح ( نص بصلة كافي ) عشان نسوي الفرقاعة + زيت مو وايد ونتفة كركم وقلبيهم شوي
- شيلي نص كمية البصل والزيت بماعون واتركيها على جنب
- ضعي العيش المشخول في الجدر ورشي عليه الزيت والبصل اللي رفعناهم على جنب
- اتركي الجدر على نار هادئة لمدة ربع ساعة ( لا تنسين الحديدة تحت الجدر ) لما ينشف .
- وتمتعي بأحلى حاكوكة بالعالم
وعليكم بألف عافية
خخخخخ
