شنو هوايتج؟؟؟ تمارسينها والا لا؟؟ وين ؟ ومتى؟ خل نستفيد من بعض افكار جديده

[@حور@]

بنات شلووونكم :gathering:

بسالكم بصراحه كل وحده تقول لنا شنو هوايتها وشنو تحب تسوي وقت فراغها
وين تحبين تمارسين هوايتج وباي وقت يعني متى بالليل والا النهار والا الصبح وتحبين احد يشاركج والا بروحج؟oster_av1:

عاد والله ساعات نحس ان في اشياء ودنا نسويها بس مادري ليش نتكيسل ونقول ماكو وقت والا مايمدي والا ماعندي اغراض يعني جنه نطله اعذار حق روحنا وبعدين نقول حساافه ضاع الوقت والا ضاع اليوم والا ضاعت العطله وماسويت شي

انا عن نفسي احب الرسم بس ما اقعد عليه واجابله وبعدين اتحسف اقول مارسمت ولا لوحه هالفتره مثلا
واحب الطبخ بين فرته والثانيه اتعبث بالمطبخ واسوي كيك طبعا تاليف بالطرق ويطله لذيذ واحب اشتغل بروحي وغالبا يكون العصر
واحب ان اقوي لغتي الانجليزيه ادور مواقع امتحانات عالنت يعني احل شوي اساله ويصلح لي الموقع يعني تغيير
احب ادور موديلات جديده وافكار حق قمصان يعني حركات من الكلف وتركيبات على القميص يعني تغيير
يالله كل وحده تقولنا عن نفسها يمكن نكتشف شي جديد ونتعلم من بعض:33_1185028183::33_1185028183::33_1185028183:

 

[حمام شاقني فنه]

انا ابتدي

انا هوايتي الرسم


وامارسهاا بمرسميي ارسم لووحاات


وهم اموت على الرياضه




سعه او ساعتين باليوم

وبس




الي بعدي

 

[منارة الإيمان]

عزيزتي من هواياتي

احب الرسسسسم .. وتلاقيني أندمج بالرسم وأنسى كل شئ .. على فكرة الرسم يفرغج عاطفيا .. وترتاحيين .. لكن لكثرة المشاغل بالوقت الحالي ما عدت أمارسها .. مع أني أحبها جدا ..

أحب أمارس السبااااحة .. وتعلمتها بجمييييع أوضاعها .. مرييييحة للجسم المرهق .. وتحسين بعد السباحة باسترخاء وهدوء .. وتتنشط الدورة الدموية نحتاجها بالوقت الحالي بسبب جو الحياة المكهرب ..

كما أحب التدبر بالقرآن ... وأحس برااااحة عجييييبة .. وتتفتح لي معاني اياته العظيييمة .. ولا شك هو تهذيييب للنفس ..

المطااااالعة والأطلاع .. بالسابق كنت أشتري الكتب .. وخااااصة المفييدة .. ولكن ألحين النت يفي بجميييع المطلوب ..

الطبخ .. وكثييير من الناس يحبون طبخي .. وأحب أجعل الأكل يكون لذيذ .. وأتفنن فيه .. وبعدين .. ما شاء الله لا قوة ألا بالله أي أكلة أكلها بالخااارج ممكن أستنتج شنو مكوناتها .. وأسويها .. بدون ما يعطوني الطريقة ..

هذا ألي يحضرني ألحين .. ومشكووورة على الموضوع

 

[المتوكله على الله]

أحب احضر الندوات والدروس الدينيه سواء ع التلفزيون ولا بالملتقيات ولا بالمساجد جد قمة سعادتي لاحضرتها

أحب أقرا كتب دينيه (( خصوصا الزهد والرقائق واحوال السلف الصالح والاحاديث وتفسير القران )) فقط لاغير


(( أحب البر والكشتات ))


و (( القنص )) كنت اقنص معا ابوي الله يرحمه وراحت ايام القنص (( عزااااه ))

 

[@حور@]

حلو والله وين باجي البنات يالله ناطرينكم

 

[كوكب الدرر]

أنا اموت على شي اسمه موسيقى

أحب أعزف وأسمع موسيقى ( بس موسيقى من غير أغاني )

بس للأسف من سمعت ان الموسيقى حرااام هديتها

والحين ما عندي وقت لأي هواية

 

[Japanese]

هواياتي هممممممم ،،، القراه ،،، احب اقرا كتب تتكلم عن نفسيه الانسان وكتب التطوير النفسي : مثل السر هاي اخر كتاب قريته واقرا قصص بس مب وايد

والعاده لازم كل يوم اقرا ع الآقل ساعه

.<<< و مب قاعده اقرا الا قصص احين

مب وايد مستانسه عليهم لآني صج احببب الكتب اكثثرربس آآخخ شاسوي ناطره ارد دوحتي عشان اشتري كتب من جرير الحب الآبدي لول

وثاني هوايه الرياضه : الرياضه للياقه مب للمتعه وكل يوم اتمرن ع الاقل نص ساعه

بس ودي امارسها للمتعه مثلا العب تنس و لاكوره ،، ربعي شفقوووني ع التنس


بعد من هواياتي : التصوير ،،،، بس ماآمارس هالهوايه وايـد :/ يبيلي اهتم بالتصوير لآني صج صج صج صج استانس عليه

وبعد امووووووت ع اللغاات ودي اتعلم لغه ثالثه لكن صعبه احين

لآني مركزه ع الانجلش .... ف مآجله هالموضوع الين السنه الياي قـدني اتقنت الانجليزي بشكل يخليني ابتدي اركز ع لغه ثانيه

و احب الآعمال اليدويه لكن هالهوايه كلش ماآمارسها :/ مع اني اموت ع الشغلات اللي تتطلب شغل يدوي وجـي


و اي ع طاري الموسيقا :: ودي اقولكم معلومه بسيطه عنها ،،، دكتورنا يقول بآن العزف ع اي اله موسيقيه يخلي المخ يشتغل بفاعليه اكثر

والدليل العالم انشتاين كان فاشل بالمدرسه لكن من بدا يعزف ع الكمان تغيرت حياته // انا من قال جـي واانا حاطه ببالي

السمستز الياي اسجل لكلاسات بيانووو

// اوبييييييييه وعليه احس كلش مب معطه نفسي ويه يبيلي امارس هواياتي واسوي الاشيا اللي احبها صج:cxxxp: :cxxxp:
موضووووعجج ايننننننننن صج صج عجبنييي يعطييييج العاااااافيييه

 

[a7la tooota]

أحب التصوير بشكل مو طبيعي وأعتبر نفسي ليلحين مبتدئه ,, وكل يوم أكتشف أشياء يديده ,,

أمارس الهوايه هذي بأي وقت وخصوصا من الصبح لي وقت الغروب ,, ماجربت بليل ليلحين ان شاء الله لما يصير عندي كامرا احترافيه بجرب ,,

وأصور عالمزاج وبروحي عشان محد يأذيني ,,

ومشكوره حياتي عالموضوع

 

[Violet Reem]

انا كنت احب السباحه وايام المدرسة كنت احب الرسم بس مانميت ولا هواية للاسف
وحاليا احس ماعندي وقت وبعد احب اقرا بس مو معطية القراءة حقها من وقت لي وقت اقرا

 

[عيون ملكيه]

احب اصور بالاي فون

دايما اصور وانزل الصور بالاب توب
كل شي
حتى النمله خخخخخ
و احيانا تاير مقطوط

بالسوق الكاشي


ورقه جافه اصورها

يعني جذي

ودي اجرب كاميرات احترافيه بس ابي شي صغير اشيله كل مكان و مايحرجني اذا صورت فيه

 

[يـ منيتي ـا]

انا احب اكتب خواطر يعني اللي يجول في خاطري احب اكتبه واحب اقرى قصص احس اني اميل ل هالشي
احب اكتب بليل وانسج قصصي بهدوء والليل هو وقت راحتي وهدوئي
اكتب خواطري بروحي
بس مره شاركت ب وحده منهم باحدى المنتديات

للاسف ما امارس هوايتي احس اني مبتدء حيل وماعندي اللي يساعدني ع تطوير هالشي

 

[كنار]

كانت هوايتي القراءه وكان فعل ماضي
بما اني دارسه خياطه كنت اتمنى ان انا اخيط على طول بس يمكن لانها مو هوايتي استصعبها حيييييييييييييل
وان شاء الله يوم من الايام تكون الخياطه هوايتي

 

[أحلى من الخيال]

تربية القطط و عندي قطوتي و هي جزء مهم بحياتي
القراءة
الطبخ
تصميم الأزياء ​

 

[ترانيم القصيم]

هلا و غلا ,,

لي هوايات كثيرة كثيرة

أول هواية لي هي الرسم ,, أرسم من يوم كنت بأول إبتدائي ,,

أذكر رسمت مجموعة من الورود و أعجبت بهن أستاذة مادة الفنية ,, و شجّعتن على الرسم ,, و من يومها و أنـا أرسم

كان رآس كل أسبوع لازم أنتج رسمة ,, بس تركت الرسم لأسباب شخصية ^_^

الهواية الثانيـة : هواية الكتابة

بدايتها من أيام الإبتدائي ,, كنت أحب أألف قصص الأطفال ,, بعدين قمت أكتب شعر ,, بعدين تركت هذا و هذا و صرت أكتب أشياء ثانيـة

الهواية الثالثة : التصميم على الفوتوشوب + السويتش ماكس

بداية التصميم على الفوتوشوب كان عام 2007 ,, بس الحين خفت هالهوايـة ,, ما عاد لي مزاج أصمم زي أول ,,

أما السويتش ماكس فهو يتعب كثيير و يملل .. محتاج ذهن صافي و تركيز ,,

لأني أحرص يكون شغلي دقيق قدر الإمكان و أضبط حركة التأثير مع الصوت

<< باختصار .. شغلانة تجيب الهوجاس و تتعب العيون

الهواية الرابعة : القراءة

الهوايـة الأخيرة : أمممممممممممممممم .. بصراحة ودي تكون سر ^^

مشكورة حبيبتي ,, :eh_s(22)::eh_s(17):

 

[VET-Nour]

هوايتي < اخاف اقول تنقدون
بكل دوله اسافرلها لازم اروح حدايق الحيوان + سوق الحيوانات < متعه ههههه ,
و اصور كل شيء < حتا الناس اصورهاا هههههههههه ,
و قبل كنت احب الرسم بس يبيله ارسم مره ثانيه ,
و الخياطه كل فتره اخيط و افكر اخذلي دورة خياطه بس ماكو وقت ,
و الاخيييييره القراايه [ قراءه ] أحلاا هوايه , احب اقرى كل شيء حتا لو ماافهم معناه
و فيه وحده بس سر هههههه


يعطيج العافيه ؛)

 

[مريميات]

يعطيجً العافيه عً الطرحً الحلووووً مثلجً 

؛؛


هواياتي الله يسلمجً :

الرسم والكتابه وحيل هالشغلتين مرتبطين فبعض لأني ماارسم
الا لما اكتب ، اكتب خواطر ويومياتي من كان عمري ١١ سنه

أعزف بيانو ، واحب اللغات احب أتعلم اللغات ،

والرياضة بأنواعها ، بسً حاليا موقفه الرياضه بعد الولاده ان شاءًالله

وشكًراً قُلبووووو ...
​

 

[om.googi]

التصوير + المكياج + الأزيـاء + المساج + التسوق + الأكل +

ووواااااااااااااااااااايد أشيـاء هههههههه ,, اللي مطبقتهم تقريبا الكل ​

 

[Nanoosa]

احب الرسم (انمي + زخارف + مناظر طبيعية) بس مو باحتراف على قدي

ارقص هيب هوب (لااااازم كللل يوووم تعودت)

القراءة

اكتب خواطر بالانجليزي

اللغة اليابانية .. انا حاليا قاعدة ادرس ياباني مع اخوي و بالعطلة بندش دورة ان شاء الله

و قبل يوم كنت صغيرة كنت احب الحياكة .. بس ما نميتها فانا الحين نسيت شلون احيّك

احب الطبخ .. بس اللي اعرف اطبخه حيل محدود يعني ما اعرف وايد اشياء

التصوير

و بعد اكتشفت هوايه يديده اللي يعرفني راح ينصدم اني احبها

احب احط مكياج

لأن انا وحدة مااااا احط مكياج كلللش لما اطلع .. اللهم بس كحل و مسكره لأني استحي شحقه مادري

بس لما اقعد بداري احب اتفنن .. امي تقول اني اعرف احط (الله يعافي اليوتيوب )

و بس سلامتكم و تعيشون

 

[Mrs Al-Nasser]

التصوير :eh_s:

حبي الأول والأخير
وأمارسها على طول وبـ أي حزه وبـ أي ساعه وبـ أي يوم
والحمدلله يوم بعد يوم قاعده احترف فيه اكثر :rerrerek:

وهوايتي الثانيه قراءه الروايات
اتيلي فتره اقطعها وبعدين مره وحده اهجم عالكتب
والحين شاريه وايد كتب قاعده اقراهم واحد ورا الثاني

وهوايتي الأخيره الكتابه
بس للأسف مو وايد معطتها وقت من فتره لي فتره اكتب
​

 

[kuwait_queen82]

هواياتي القرئه و لازم قبل النوم (يس الحين ماكو وقت كله دراسه )
عندي هوايه قاعده اطورها و هي الكتابه و انشالله حابه يوم هل هوايه تكون مشروع للكتاب بالمستقبل
هوايتي الاخيره هيا السايكلنغ بس فيني مرض وراثي يمنعني امارسها