شنو علاج اكزيما الاصابع اللي جربت تفيدني

[رولكس ذهبيه]

السلام عليكم بنات

انا اعاني من اكزيما بالاصابع بس اكثر شي السبابه والابهام وقاعده تنتقل للاصابع الثانيه واهيا قديمه فيني من عشر سنين واكثر

ماخليت كريم بالصيدليه بالكويت وبرا الكويت ماكو فايده

احد جرب كريم ونفعه الله يجزاكم خير

 

[شادن33]

اذا فطريات جربي تحطيين عليه عكبر السائل واذا اكزيما ممكن اتفييد زبده الشيا ولانسيني من الدعاء

 

[رولكس ذهبيه]

جزاج الله خير اختي ماقصرتي وعسي ربي يحقق كل اللي تتمنينه

بس شلون افرق بين الاكزيما والفطريات ومن وين احصل زبدة الشيا

 

[الفدنه]

عشان تفرقين لازم تروحين دكتور يسوي لج مسحه
بس اتوقع من مكانها انها اكزيما واتوقع بايدج اليمين من مسكة القلم او اي شي
تستعملينه
المهم اذا اكزيما في كريم اسمه كاب كريم ممتاز
بس بالنسه لي مانفع معاي الا ماي زمزم والحمدلله
والله يشفيج ويآجرج

 

[قصْر شآمخ~]

السلام عليكم

وي حبيبتي الله يعينج

حاسة فييييج ..

أنا أعاني من أكزيما مزمممممنة وشديييدة..
ومو بـ اصبع والا اثنين إيدي كلها .. وريولي .. وأحياناً ويهي ..

الحمدلله على كل حال ..

طبعاً جربت كل شي .. حتى زبدة الشيا ما فادتني وايد ..

والحل الوحيد .. الترطيييييييييييييييييييييييييييييييييييييييب ..
كل مرة تغسلين ايدج رطبي على طول ..
كل الدكاترة اللي رحت لهم قالوا لي هـ الكلمة ..
قللي من غسيل إيدج .. إذا موسوسة وما تقدرين رطبي .. وفعلاً بـ تلاحظين إنها يوم يومين وتخف ..

أنا استخدم مرطب uea من أسعد الحمد ..
وهم عندج مرطب نتروجينا للإيد مدحته لي الدكتورة حيل .. بس ما جربته ليما الحين .

الصابون بعععدي عن ديتول ولايف بوي وهـالسوالف ..
واستخدمي صابونة دوف .. أحسن شي ..

وما يحتاج أقولج .. المنظفات وهـ السوالف لا تستخدمينهم إلا وإنتي لابسة قلفز ..

الله يشفيييج ..

ولا تنسوني من دعواتكم بـ الشفاء ..

 

[رولكس ذهبيه]

هلا خواتي

اي صح اختي الفدنه اكثر شي اصابعي اليمين ووين احصله كريم كاب

وشلون طريقه ماي زمزم الله يجزاج خير

 

[رولكس ذهبيه]

مشكووره اختي قصر شامخ فعلا علي طول يقولون رطبي ايدج ولا يحوشها الماي بس الاكل والوضوء صعب

لازم ماي وخذيت صابونه طبيه بس مافادتني ونفس كريماتج جربتها

حتي لما اسافر ماني صوب سياحه ادور في صيدليات الدول اللي اروحهلها كريمات لايدي لوووووول

 

[n00nah]

حبيبتي انا نفس حالتج تقريبا وماخليت شي الا استعملته وكان السبب كنت اغسل ملابس بصابون تايد مع المبيض وايديني من النوع الحساس وقام يصيبها اكزيما خاصه السبابه والابهام تتشقق وجفاف وبعد الله سبحانه وكريم مدحوه لي وهو عباره اعتقد عن زيت زيتون وحبة البركه الحمدلله يارب اختفت وارتحت حيل غليه وطلعت اكزيما بولدي وهو صغير واستخدمته له وماشاء الله اختفاااا


انا مابي الا الدعوه الطيبه لو استخدمتيه وشفتي النتيجه

واسمه كريم جاد ( 99666872)

ودايما رطبي ايدينج لان الاكزيما تنتشر بالجفاف والله يشفيج ان شاء الله :eh_s(17):

 

[شادن33]

حبيبتي رولكس العكبر من اللي يبيعون عسل وزبدة الشيا من محلات لوكستيان في المراكز التجاريه الكبيره

 

[مجنونه هواهـ]

حبيبتي دهنيه فكس وفازلين ولبسي جونتي ونامي واستمري لاسبوع وبتشوفين النتيجه اذا ما فاد راح اعطيج دواء عشان تاخذينه

 

[شندوخه]

انا فيني اكزيما بكوعي ورحت لاسعد الحمد
وصفلي الدكتور نوعين كريم
واحد اسمه ايليكوم هذا حلو احط منه طبه رقيقه مرتين باليوم والحمدالله تخف بس ماتقطعها نهائي ترجع