شنو خطتكم بالنفاس؟ شاللي ناوين تسوونه ؟ ابي افكاركم

[ام حمود@22]

السلام عليكم
أنا حامل وانشالله ناويه استغل وقت نفاسي يشغلان تفيدني من خلطات للجسم او الويه او الشعر او التضيق والتنظيف
لان كلكم عارفين ان هالفتره الوحده تتبهدل فيها من لهوم واكل وسوالف لنفاس لفرسه اجرب الاشياء الي ماكنت اجربها مالي خلق الويه وتاريخه وماعندي وقت
لوسمحتوا ابي نصايحكم بأشياء جربتوها مو بس سامعين عنها ابي استأنس من النتيجه واطلع بنيو لوك وتعبي ماراح بلاش
شكرًا مقدما

 

[فاطمه محمد]

والله انا كلللش ما اعابل بنفسي.الا بعد 20 يوم تعرفين الم الخياط ويالله البيبي تجابلينه فبعد 20 يوم استخدم كريمات طبيه لتبيض الرقبه والويه كانت كاتبتها لي دكتورتي ما احب خلطات وكريمات حريم بشرتي حساسه واخاف ، وكل يوم امسح رقبتي وويهي بقطنة فيها اسكينول ليمووون عجييب يبيض وحمامات تركيه ومغربيه بعد 35 يوم وبرنامج نفس العروس من حف وهالسوالف وقص وصبغ وبس

 

[ام حمود@22]

يزاج الله خير حبيبتي على جوابج وصاجه اول اسبوعين مالج خلق شي من لخياط



بعد ابي مشاركات وينكم بنات
على الاقل اب

 

[ام شيوخه~~]

هلا حبيباتي الله يسهل على الكل ويرجعكم حور بعيون ازواجكم :yaaaaaarb:

انا ولادتي عقب كم يوم وقيصريه وخاااااااااااااااااايفه موووووووت

بس موكله امري لله سبحانه .. وانا بكريه وله اعرف شلون القيصريه تهتم بروحها و شنو الاشيا الي تاكلها والي تبعد عنهاااا
سمعت ان نفاس القيصري فيه شغلات غير.. الي عندها علم ياليت تفيدني

 

[مواصله]

انا بخلي الطبيبه تكتبلي ع كريمات وتحاميل وادويه صراحه انا مو مالت خلطات واعشاب

وبعد اضمن لي وأأمن انه مايضر المولود لما ارضعه

وبعد شهر اسوي نيولوك وميك اوفر

 

[مألوفة]

والله عاد انا الصراحه ناوية اطلب برنامج النفاس من عند ام خالد خبيرة الاعشاب

وبالنسبة للخلطات للحين ما قررت مع اني اتكيسل حييييييييييييل بس جني راح اطلب خلطات من المنتدى على وعسى ارد نفس قبل لاني صايرة سمرا وخدودي كلف وخمشي الله يستر اذا ما رااااااااح

 

[انجبر قلبي]

آنا راح امشي على برنامج ادوية النفاس انشاءالله​

مع حمامات مغربية اكيد ... و بسوي ليزر لاني قطعته بسبة الحمل و انشاءالله برجع له​

و برنامج خلطتي حق الشعر حنة مع سدر كل اسبوع​

و طبعا كريمات تفتيح و خلطات هالشي لازم ،،،، بس ما ندري شلون راح انظم وقتنا​

بس بسألكم يعني اقدر اسوي تمارين رياضيه بفترة النفاس ؟​

ودي ارجع للتمارين يا سلام​

مع الحزام او المشد مادري شالفرق بس المهم شي حق البطن خخخ​

 

[حرم_طيار]

طلبت كورس نفاس من ام خالد
طلبت صابونه القهوه والزنجبيل من مس انجل
يبت رداده ام جاسم واربطت بطني بشماغ وكشكول
قاعده استخدم صابونه+ كريم المره والكركم للتبيض من الحواي
من ٢٠ بديت اشرب كوب زنجبيل + كمون للتنحيف
حاطه لي مره بخاخ بالحمام وبكل دخله ارشه على المنطقه
استخدم سنفره المشمش للويه+ سنفره العروسه للجسم
سويت ماسكات يوم روب يوم هرده
استخدم لزقات كرست لتبيض الاسنان
الاسبوع الياي ببلش حمام مغربي وشيره وبدكير منكير وليزر
اليوم صبغت شعري

 

[mannawy]

حرم طيار : كفو وعفيه عليج ايه جذي رفعي معنوياتنا وحسسينا انا نقدر نسوي وايد اشياء بهالفتره. الله يتمم عليج ويحقق لج اللي تتمنينه

 

[حرم_طيار]

حرم طيار : كفو وعفيه عليج ايه جذي رفعي معنوياتنا وحسسينا انا نقدر نسوي وايد اشياء بهالفتره. الله يتمم عليج ويحقق لج اللي تتمنينه

تسلمين بعد عمري
انا انتحز الفرصه اي وقت اتنام في الصغيره اروح الحمام واعابل بنفسي
شنسوي وانا اختج الريال يحب الزين ومن حقه يشوفنه بأحسن صوره بعد 9 شهور مظلمه

 

[mannawy]

هههه اعجبتني ( 9 شهور مظلمه)

ايي والله وانتي الصاجه بعد روحي شايفين الهوايل وساكتين علينا يستاهلون الله يخليهم لنا.

 

[ام حمود@22]

حرم الطيار تبارك الرحمن شطوووووووره الله يحفظج ويتمم عليج ويزيدج
بس ما قلتيلي شنو الشي الي استخدمتيه وصج تحسينه ينفع وله مفعول وشنو الي تحسفتس ضيعتي وقتج فيه؟ يعني ابي النتايج الي اعجبتج وبهرتج بنفس الوقت


مشكووووووووووورين حبايبي كلكم الي رديتوا علي وشاركتوا ولي ماشاركوا يالله لاتبخلون علينا ناطرينكم

 

[ام حمود@22]

انا بالنسبه لي اهم شي الكوسيه او المشد او لحزام حسب تسمياتكم المهم البطن ينلف كثر ما اقدر اعصر عمري
وطبعا الهوم لااااااااازم وغسول ماي وملح على طول كل دشة حمام وانتوا بكرامه مع ادوية الدكتوره
واهم شي لبتعاد عن الممنوعات بالاكل الباميه الروب البن الحوامض
وناويه استخدم انشالله كريم نيفيا غودباي سليوليت من كثر ما مدحتوه طبعا غير الشيره وقص الشعر
بس ابي افكار اكثر بليييييز
هذي الحمله الثالثه ابي اطلع غير انشالله والله يحلينا بعيون رياييلنا يارب

 

[قلبي معاك]

للرفع لعيونكم

 

[خشف العوازم]

بالتوفيق للكل


انا بالسايع للحين ما فكرت بالخلطات بس انا احب اسويها بنفسي ما اشتري من الحريم
مشالله قسم البشره متروووس خلطات وتجارب البنات اكبر برهان وما احب احط شغلات غريبه واخربط واجد


اهم شي ابهالفتره تربطين بطنج لاااااازم بعد اسبوع من الولاده كثر ما تقدرين اربطي بطنج بحزام بمشد وكورسيه اي شي

انا استخدم بولاداتي اللي طافت المشد الاندونيسي وحيل مرتاحه عليه شكلي بشتري الحزام الحفيف اللي يخلي المعده تتنفس بستخده بفترة النوووم

بنات اصعب منطقه تقدرين تضعفينها البطن لا تهملونها وتقولون بعد النفاس بدش نادي وما ادري شنو ماراح ينفع كثر ربط البط بالنفاس لاني اعرف ناس اهملت نفسها بفتره النفااااس والله تحسفوا اشكبر الكرشه وهم توووهم بنات


بيوم 25 حلووو تبدين بالحمام المغربي سويه ثلاث مرات بفترة الحماله زين واخر شي قبل طلوعتج حمام ملكي



بالفتره الحمل استخدم ماي الورد لوجهي الحمدالله خفت الحبووووب بشكل كبير وبشتري صايره احسن من اووول وناعمه

 

[سكرة هانم]

اول عشرين يوم بركز على الادويه والعلاج لان عندي اهم من الخلطات لاحقه عالتفرك

من ثالث يوم بربط بشماغ ومن الخامس ببلش بالاندونيسي وبدهن بطني بخلطه

عقب العشرين بحط خلطات تبييض وبستخدم الخلطه الصابونيه تهبل وبشتري ميبو عشان مكان الجرح وبسوي مغربي

بدهن شعري وشايفه تونك بالصيدليه لتقويه وتطويل الشعر<<انشالله يطول على طلعتي من النفاس

ويهي ماراح اجيسه لان بسوي تقشير بعياده

بشرب جاي اعشاب وزنجبيل لزوم الرشاقه

هذا اللي ببالي الحين وانشالله اقدر اسوي هالشغلات وارد مثل قبل

 

[manoolita]

مشكورين بنات على الافكار فعلا في اشياء الواحد ينساها و ماتخطر على باله خصوصا ادا كان عليمي واول تجربه له
وااااااااااااااااااااااااي احس نفسي حايسه وماني عارفه راسي من ريولي و شنو ابدي و شنو أاخر المشكله اني بروحي وماعندي احد يساعدني و يشجعني وكل اللي حوالي مايسون شي ولا يهتمون اشياء عاديه و سطحيه و بسيطه ماتنفع لانهم مومهتمين وايد الله يرحمج يايمه و يغمد روحج الجنه حدي محتاجه نصيحتها و دعوتها و كل شي منها ):
يلا الله كريم ويخليكم يا (كويتيات) و نستفيد من تجاربكم و خبراتكم كل التحيه لكم ​

 

[غروب شمس و قمر]

سلام عليكم يا حاملات
بالنسبة للنفاس أنا لحمالي الي طاف كان النفاس كآبة و بجي من الاكل و اللهوم و ريحة الحلبة و صياح ولدي و الجرح و الرضاعة


آآآآآآخ شقول شنو اخلي و هالمرة بحارب موضوع الكآبة هذا و يحاول ارفه و ارفع لنفسي كثر ما اقدر
و بالنسبة للعناية بهتم و باخذ خلطات و كريمات التبييض و بدهن شعري يوم و ترك و الكورسيه رفيق الدرب البسه و أنام على بطني اخيييه
و سنفرة
و تقشير للأباطرة لان صار بالحمال شي عجيييب
و وأراح اخلي الفيتامينات لان الشعر يحت بشكل مو طبيعي ورأ الولادة

وي تعبت و بس و الله يقدرنا نطبق هالاشيا مع لوية الربا و حنة الياهل*

 

[تبطي عظم!]

اممممم واجد شغلات بسويها لووول

بشتري سنفرات ن صج جلدي يبيله سمكره لوووووول

وبشرتي اخر 35 بسوي لها تنظيف بشره

وبستخدم لبطني الشماغ ورقبتي الاسكينول لان مجربته بعرسي وفعلا يبيض

اباطي بخلي دكتورة جلديه تصرفلي شيء للتبيض مايضر الرضاعه لان حييل مسمر من الحمال وشكله ارف

وشعري بستخدم زيوت تطويل وتكثيف وتلميع ههههههه كلووو مع بعضوو

انا ماراح اصبغ ولا اقص ابيه يطول والصبغ مايناسبني لان بصيلات شعري تعبانه !


واممممم بعد ما ادري شبسوي بس اكيد شغلات واجد بسويها لوووول*

 

[ام حمود@22]

موناليتا الله يرحم امج ويدخلها جنة الفردوس ويجمعنا معاها ومع الانبياء والصالحين والمسلمين والمسلمات والمؤمنين والنؤمنات الاحياء منهم والاموات
حبيبتي اهم شي اللي صج انصحج فيه ربط بطنج باللي تبين المهم ما تقعدين جذيه والشي الثاني وهم مهم كثر ماتكلين لهوم احسن لج ينشفج وينظفج ويضيجج طبعا اهما نوعين واحد اول عشرين يوم يكون مخلوط معاه حلبه علشان يقوي الظهر والثاني اخر عشرين يوم يكون معاه رشاد علشان ينظفج يعني مايصير تزيدين الايام على كيفج واي شي تبينه انا والبنات حاضرين لايضيق خلقج




خشف العوازم انا سمعت عن الميبو زين حق الجرح ويطيح لخيوط صج؟ وانتي منو مدحه لج
بصراحه انا احب كلام الدكاتره ما احب خبرات جدتي وكل وحده تسوي روحها فاهمه وتفتي
وليش تقولون تلفون بطنكم بشماغ حتى حرم الطيار تقول شماغ وكشكول؟ شنو الفرق بينه وبين انواع الكورسيهات والمشدات والحزم اللي موجوده
انا خابره الاولين يربطون بشماغ وكشكول لان ماكو تطور وانواع كورسيهات ( يعني طريقه بداءيه) بس مو عارفه انتوليش للحين تستخدمونه؟ هل شايفين نتايجه احلى؟ وشنو احسن كرسيه استخدمتيه؟
انا استخدمت الاندونيسي بس ياذي بالبس مع القعده والقومه يتلفلف مايقعد مكانه