شلون اخلي ولدي ينام بروحه...؟؟؟؟

[حـور]

السلام عليكم

بنات ياريت تفيدوني شلون اعلم ولدي ينام بروحه..ولدي عمره سنه..والمشكله انه لما انومه في سريره يتقلب وهو نايم وايد ويبجي لمن السرير يضايقه مع انه مقاس السرير راهي بنتي نامت فيه لمن 4 سنين ماشالله عليها ..ماتتصورون شكثر اعاني من الموضوع خصوصا اني انتظر مولود جديد الحين يعني لازم اعوده خلال 7 شهور بس والله مشكله...والله متوهقه واحس اني مهمومه من الموضووع ..شلون بيكون عندي طفلين بالغرفه ؟؟؟؟؟....ياريت اللي عندها الحل تفيدني والله يوفقها ويخليلها عيالها ويسخر لها زوجها انشالله..​

 

[رنين]

أول شي استعيني بالله....

7 شهور وايد مو شويه لا تحاتين الياهل بظرف شهر واحد يفرق واااااااااااايد ..خصوصا بها العمر...


أول شي ركزي على ها الامور المهمه...

روتين النوم.
لازم تبدين تعودينه انه ينام الساعه الفلانيه عقب ما يسوي روتين معين و ان ينام بالمكان الفلاني....
يعني مو أمور قابله للنقاش.


مثلا الساعه 9 يشوف بباي معين.
9 و ربع يتعشى
عقب العشا تغسلين له أو تسبحينه .
يلبس بجامته و تاخذينه معاج الفراش(فراشه طبعا) و تقولين له قصة النوم(((وايد مهمه من ها العمر سنه)))
و تخففين الاضائه لين ينام....


في البدايه ممكن يصيح و ما يرضى و يلحقج لكن خلج مصره على ان ينام بالروتين الفلاني ...
يومين ثلاث و يبدي يتعود.


و من الاشياء اللي واااااااااااااايد تساعد عشان يدوخ و ينام هو حليبة الليل تدوخهم بشكل مو طبيعي






الحين نام؟

نجي حق اذا قعد تالي الليل.

أول شي دامه وايد يتحرك بنومه حاولي تتأكدين ان مافي بالفراش شي يضايقه(و يفضل لو تلبسين الفراش اذا كان خشب عن لا يرقع براسه أو تحاوطينه بمخدات صغار اريح له اذا تحرك)

و تأكدي ان مافي سبب صحي يخليه يقعد من النوم بالليل((مثل ولدي فيه لحميه فتتسبب انه يختنق بالليل و يقعد مخترع))

و انه يكون نايم شبعان .
و خلي يمه قلاصه الخاص بالماي لو قعد عطشان يشرب.(يمكن بعد عمر سنه صغير على ها السالفه انتي أدرى بولدج)


و اخير شي عوديه يقول بسم الله (على طريقته) قبل لا ينام..

و عسى الله يصلحه و يبارك لج باللمولود.












على فكره.... ولدي لما كان بعمر ولدج و كنت نفسج حامل و هو الله يحفظه حوووووووووووووووسه بنومته فلما شفت الفراش الخشب أذانا ترقع براسه و صيحه قمت انومه بالفراش الخام اللي يتصفط وااااااااااااايد ريحني اهو فراش و اهو بالنفاس نفعني حباس له.

 

[sHa6o0ra]

ولدي كبر ولدج وانا الحين بولد بس احس تو الناس انه يطلع غرفه
بروحه عالاقل لين يكمل سنتين او ثلاث

خليه معاج اصلن انتي ماترتاحين وانتي نايمه اذا اهوا بغرفه ثانيه
بس تقعدين وتحاتينه

 

[حـور]

اختي رنين...مشكوورة بس ولدي ما احس انه كبير كفايه انه اقوله قصه!!! لمن حتى لمن انشد له شي باسمه بالليل وتلقيني منعمه صوتي وبكل هدووووووء ابي يدوخ...اسمع واحد يصفق!!!!!! يقعد يصفق ..للحين بي يلعب وما يستوعب اللي ابيه منه...اهو عنده وقت معين ينام فيه يشرب الحليب وينام بس باللليل لازم يقعد..يتقلب مو اي تقلب....لالالالا ...يشيل نفسه ويحذف روحه بمكان ثاني ...وعلى هالحال طووول الليل اهو يحذف روحه وانا اعدله...والسرير حاطتله حوااجز بس مايكفي الحذفات!!! هم تسمعين صوت رقعت الراس بالسرير...مع انه السرير راهي...
والله محتارة حدي...شكلي بشتري جهاز الاسلكي واجرب الوضع شلون يصير...والله كريم


شطورة...
حبيبتي الله يقومج بالسلامه بس شلون بيصير الوضع عندج طفلين بالغرفه !!؟؟ يعني ترى انا الحين ادور لي حل عشان الطفل اليديد بس مو معناه اني مو متضايقه من وجوده حتى لو هو بروحه الله يخليه..لانه وايد متقيده فيه..
اسم عليها بنتي ماكانت جذي...
الحين اذا نام فيه طبع بايخ يحسس ويدور وهو مغمض اذا فيه احد يمه ولا لا وصرت اذا بقوم اشرب ماي او تكرمين ادخل الحمام احط مخدات واغطيهم مؤقت..على ما ارجع والا اذا قام وبجى بجيه عدله يستعسر ومايرد نام الا عقب جم ساع!!! >>الله يعيني بس!!!
واذا ريلي يرجع بالليل يلقاني حتى لو صاحيه بس بالغرفه ماقدر اهده ..الا ساعه بالكثير ..وارجع بسررررعه جنه علي تاخير!! وهم ريلي يتقيد واذا يبي ياخذ شي من الغرفه لازم هدوووووووء وحالتنا حاله لانه نومته خفيييييييفه حييييييييل.... >>>قلت قصة حياتي من ضيقتي والله وحيرتي صج مسبب لي ازمه هالتفكير..

 

[رنين]

اختي رنين...مشكوورة بس ولدي ما احس انه كبير كفايه انه اقوله قصه!!! لمن حتى لمن انشد له شي باسمه بالليل وتلقيني منعمه صوتي وبكل هدووووووء ابي يدوخ...اسمع واحد يصفق!!!!!! يقعد يصفق ..للحين بي يلعب وما يستوعب اللي ابيه منه...اهو عنده وقت معين ينام فيه يشرب الحليب وينام بس باللليل لازم يقعد..يتقلب مو اي تقلب....لالالالا ...يشيل نفسه ويحذف روحه بمكان ثاني ...وعلى هالحال طووول الليل اهو يحذف روحه وانا اعدله...والسرير حاطتله حوااجز بس مايكفي الحذفات!!! هم تسمعين صوت رقعت الراس بالسرير...مع انه السرير راهي...
والله محتارة حدي...شكلي بشتري جهاز الاسلكي واجرب الوضع شلون يصير...والله كريم
.

جنج توصفين ولدي بالضبط....مو بس يشيل و يشدخ بعمره...لا ينط من الفراش على راسه بره....مت من ها الحركه ما اسمع الا رقعات توقف القلب....

و هو كل ماشافني اروح له مخترعه كل مازاد.....

ما نفعني الا الفراش اللي يتسفط ماكان يقدر ينط منه فمنها انا متطمنه و منها ماكو شي خطر عليه. يرقع فيه راسه......

قام ينط يصرخ يصيح و طلع لي بطلعات عجيبه و انا أحقره و أطل عليه من بعيد بدون مايحس فيني اتطمن انه مافيه شي.....

معاه معاه تعود..... اهم شي لا تحسبينه مايفهم...
بس انتي خلي كلمتج وحده....

و القصه غير النشيده...يهال عالنشيده يطربون...بس القصه و قعدتج معاهم و الصور اللي تجذبهم غير...

لي يومج ولدي عمره سنتين و شي....اذا قلت له يلا نوم...يمشي و بكل سنع يا الله الجدوه....
بس اذا غيرت اسلوبي و قلت باسلوب مثل اللي اشاوره(شرايك حبيبي نروح نوم)
يتعنفق و يتنحر و مابييييييييييييييييييي


الله يذكرها بالخير مدربتي...عالسواقه.
كنت أتدرب بعز ما انا متأزمة بنومة عيالي....عاد تشوفني الصبح حدي مقفله معاها ....فسألتني و قعدت اسولفلها عنهم و اني مو قادره انومهم....
جان تقولي يعني ايه مش قادره تنوميهم؟
عمرهم ايه ؟
قثلت لها ادون من السنتين....

قالت انتي امهم لازم تنوميهم...امال اذا كبروا حتعملي ايه؟

قلت يا بنت الحلال ماني قادره...
قالت تقدري انتي امهم.....


و الله ماقص عليج ...بس تغير تفكيري و تعاملت معاهم بطريقه اني أقدر انا امهم
ثاني ليله ناموا على سنع تقولين سحر!



بس لأ مو سحر...الياهل يحس اذا امه مستسلمه له و الا حازمه معاه...يعرفون من و هم كبر ولدج

 

[ضحـاوي]

سلم قلبه توه صغير على النومه بروحه

 

[بتبوتااا]

حبيبتي الله يقومج بالسلامه بس شلون بيصير الوضع عندج طفلين بالغرفه !!؟؟ يعني ترى انا الحين ادور لي حل عشان الطفل اليديد بس مو معناه اني مو متضايقه من وجوده حتى لو هو بروحه الله يخليه..لانه وايد متقيده فيه..

انا عندي بنتي عمرها اربع شهور سريرها لزق بسريري وانا سريري مترين بمترين تخيلي الوضع بنتي وبعدين انا يمها وبعدين ولدي الي عمره سنه و8 شهور << وهذا ما ينام الاحلجه بصدري لانه يرضع << حده دعله ويمه ولدي عمره اربع سنين وبعدين ريلي تخيلو كلنا بسرير ووواحد بس بيني وبينكم انا مرتاحه ومو مرتاحه الي مرتاحه منه انهم حوالي والي مو مرتاحه منه اني مختنقه ومنحكره وبعيده عن ريلي ولما ينامون كلهم مرات اخذ بنتي وانام بالصاله من الحكره وريلي ما يبي احد من عيالي ينام بروحه او بالغرفه مع الخدامه لاااااااازم يكون يمه وهالسالفه مسببتلي ازمه قولوووو انشالله اطلع من شقتي الصغيرونه واروح شقه اوسع علشان اعود عيالي ينامون بروحهم << قلت قصه حياتي >> وبالنسبه لج الله يعينج لا تنعاد قصتي وتصيرين مثلي عودت العيال انهم يكونون يمي :eh_s(14):

 

[sHa6o0ra]

بتبوتا زودتيها هههههههههههههههه خمسه بسرير ماينفع

لو انا منج اهدهم كلهم اروح انام بروحي ههههههههههههههههههه


=====

قبل جم يوم (عقب ماكتبت مشاركتي الي فوق) كنت قاعده بالصاله وولدي
نايم بالفراش (بفراشنا طبعا ماينام بفراشه معنه لازم بفراشنا) ما اسمع الا
دووووم !! جنه صوت طاوله طايحه على الارض ولا ولدي طايح على راسه
عالرخام (ياريت زل عالاقل) بغيت اولد من الخرعه وطرت فيه لي المستشفى
واشعه وقصه وولدي ساكت وانا ابجي

من عقبها قمت انومه بفراشه بس لا انام لا ليل ولا نهار كل دقيقتين يقوم
يبجي بس ماشيه على نصيحة رنين يزاها الله خير وبنطر هالشهر واشوف

 

[بتبوتااا]

وي وي وي نفس بنت اختي عاد ارتفاع سريرها يمكن متر من على الارض وجذي طاحت من السرير على الرخام بس الحمدللهه ماصار شي وحطي بالج خلي فراش ولدج عالارض احسن

 

[Brounzi_girlly]

عيل آنا بنتي لي الحين لازم أول شي تنام بحضني بعدين احطها بفراشها صراحة ودي اطلعها بغرفة بروحها عمرها سنة و9 شهور بس دعلة وعسرة ومصاصة لي الحين تعبت لنا الجنة
مع التحية............

 

[beauty-janash]

مرحبا بنات بصراحه خووووش موضووع
انا بنتي عمرها 3سنوات و4اشهر بالبدايه تنام معاي طبعا ما تنام اله وحاطه ايدها بصدري لازم
تعرفون كل ياهل وله حركه معينه لمن ينام لمن تعودت طبعا حملت ويبت بنتي الثانيه مسكينه ياحياتي انظلمت ليمن صار عمره 6شهور واهيه معاي مع بنتي الكبيره كلهم معاي بالغرفه ما قدرت استحمل فحاولت بالكبيره اعودها انها تنام برووحه ما انجحت العمليه لانها حييل متمسكه فيني فحولت على الصغيره فخليتها تنام مع الخادمه والكبيره الحين اشوه تنام بروحها
بس بنص اليل دش علي الغرفه اخذها واوديها غرفتها تنام وربع ساعه وتيني وهاذي حالتي
عاد مليت اليل راح وانا ما نمت قمت اخليها بنص اليل تيني مرات اردها ومرات اخليها و لين اليوم واهيه تكمل نومتها عندي
وسلامتكم

 

[Brounzi_girlly]

الله يعينج beauty-janash إن شاء الله مع الوقت تتغير
مع التحية.........