شلون اتميز عند اهل زوجي وبين حريم حمواني ؟؟؟

[الام المحبه]

مرحبا حبيباتي
سؤال اعتقد تفكر فية كل وحده حديثة بالزواج ويمكن الاخوات الي متزوجين من فترة طويله او قصيرة
)))))))))))))
الوضع عند اهل الزوج خاصة اذا كان هناك حموات ( خوات الزوج ) او حريم الحما ( زوجت حماك ) يكون في تحدي من نواحي وايد ..... على سبيل المثال :
الابداع في الاطباق ( حلو او سلطة او طبق رئيسي )
الحوارات ( النقاش في اخر الاخبار المحلية من سياسة وموضة والبرامج التلفزيونة يعني انتي تعرفين كل شئ واول باول )
الستايل ( ستايل لبسسك وستايل زوجك وعيالك وخدامتك أخر موديل ويكون ماركة )
كل وحده تحاول تثبت امام الخاله ( ام الزوج ) وامام زوجها ان اهي الاحلي والاجمل والستايل والمهمه بالقعده وان عيالها شطار ومتفوقين بالدراسة و....... الخ
اعتقد انكم فهمتوني ؟!؟!؟!؟

حبيباتي
عطونا افكار وكلمونا عن تجاربكم بطريقة تميزكم امام اهل زوجكم وامام ازواجكم بطريقة راقية وحلوة

 

[فلونة احلى وردة]

شلج بالتميز بيكرهونج وبيغارون منج
خلج على ستايلج لنفسج وتميزي لنفسج مو لهم تراهم يحسون باللي تبيهم يحترون منها
خلج طبيعية ومميزة باسلوبج
وكل انسان له شئ يميزة عن غيرة

 

[الام المحبه]

حبيبتي الصايبة مشكورة على ردج وكلامج عين العقل الوحده من تدخل على اهل الزوج لازم تكون على طبيعتها بدون تصنع او تمثيل لان اذا مثلتي راح تنكشف وتطيح من العين
لكن انا اقصد شئ ثاني
يعني مثلا للزوجات ...
خالتك لما تدخلين البيت حبيها على راسها كذلك العم ابو الزوج ( ملاحظة ان الفتيات في هذا الوقت ما ينتبهون لهالشئ ) وتعليم الاحفاد هذا الامر
السؤال على ( ام واب زوجك ) اذا كانوا مرضي سواء بالزيارة او بالهاتف والاطمئنان على احوالهم
ذكرهم بالمناسبات الخاصة مثل عيد الام احضار هدية لام الزوج واب الزوج تقديرا لهم ويقدمها الحفيد للجدين

كل هذي الامور تقرب من مكانة الزوج من الزوج واهله

 

[CUTE ENGINEER]

موضوعج واااايد حلو
بس أظن إن تميزج بعين خالتج أهم شي وما راح تتميز الوحدة بعين خالتها أللللللا
إذا شافتها مريحة زوجها اللي هو ولدها وقتها بتتميز عن كل حمواتها وحريم حموانها

 

[الام المحبه]

كلام جميل
يعني الاهم هو الزوج العناية باكله ونظافة ملابسة
( ممكن تشتري له دشاديش جديده وبدلات وتشيرتات وبنطلونات وكابات وعزكم الله جواتي ( والله مصرف )))))))))))))))
ايضا تهتم بالتفنن بالاكلات والاطباق اذا كان يحب الاكل الكويتي والعيوش او الباستات والستيكات ..... )
ممكن اعطائة الاهتمام والتقدير امام الجميع وخدمته امام ام الزوج مثلا اذا طلب ماء و شاي او عصير ..........الخ

شرايكم بهالكلام
؟؟؟؟؟؟؟؟؟؟

 

[كويتيه والماسه]

موضوعج وايد حلو
اولا الحمد لله المهم عندي زوجي علاقتنا زينه واهم شيء انه يحبني والكل يدري من جذي يدرون انه مرتاح معاي ويحب اكلي الحمدلله استايله
بس العيب اني مااهتم بستايله يعني ريلي مو من النوع اللي يروح السوق وايد ابي اعوده اشلون هذا العيب الاول
ثانيا اعيالي الحمدلله اكلهم لبسهم كله تمام ومدارس خاصه بس ماكو شيء كااااااااااامل ساعات مااتحكم بتصرفاتهم يعني الاعناد (مثلا اكل مضر الا يبون ياكلون بيبسي بطاط شبس)والنوم اااااااااااااااااااخ يالنوم متعب مع اعيالي ابي اتحكم اشلوووووون هذا العيب الثاني
ثاليا الحمدلله انا احب كل شهر اشتريلي لبس البيت والطلعه وقمصان النوم غير الجواتي تكرمين وشحطات البيت وكل شيء يديد والذهب خصوصا والساعات الماركه حقي وايد احب اكون كشيخه (اصلا اهما يقولون اعيالج كشخه عليج) يعني كل شهر شيء والعيب اني اخر الشهر اكون حدي مفلسه شسوي هذي اعيوبي ابي اوصل للتميز في كل شيء بس احس ماراح اقدر

 

[شوشو الشقيه]

تسلمين اختي
الناس لا تريد هدايا او تريد منك شيء
غير الكلمه الطيبه
خليج طيبه مع الناس
دايم الكلمه الحلوه الي تسر النفوس
الابتسامه على وجهك وغض النظر عند واايد هفوات من النساء ناتجه عن الغيره
ترحيب بالناس عندما يكونوا في بيتكي
الاحترام نفسك قبل الغير
كل شخص له احترامه وحسب السن
خليج واضحه وطبيعيه
عاديه مثل ما تكوني في البيت كوني نفس الشيء في بيت اهل زوجك
في ناس يعتمدون طرق اعداد الاطعمه
لانهم ما يحبون يروحون لاهل بيت ازواجهم خاليه اليد
وكل شخص طريقته
من اختج شوشو الشقيه
بعطيج خبرة امي دايم تقولها لي
يعني البنت تكون متربيه وبنت ناس
يعني مثلا يكون عندج ذوق
مثلا الحين بعد العزيمه تشوفين راعيه العزيمه تشيل الاغراض بروحها
يعني عيب انتي جالسه تشوفينها مسكينه ما تقدر تتشيله بروحها
المفروض تقومين تساعدينها لو مساعده قليله

بس اختي الاخلاق هي الشيء الدايم مع الناس
من اختج شوشو الشقيه

 

[اوووسه]

كل وحده تحاول تثبت امام الخاله ( ام الزوج ) وامام زوجها ان اهي الاحلي والاجمل والستايل والمهمه بالقعده وان عيالها شطار ومتفوقين بالدراسة و....... الخ
اعتقد انكم فهمتوني ؟!؟!؟!؟

حبيبتي الانسان اللي يطالع الامور بهالطريقه يبي يكون الاحسن والاهم على قولتج بالقعده...عمره مايتميز

لانه الحياة اخذ وعطا....الحياة محتاجه تتفاعلين مع اللي جدامك وتكونين انتي والطرف الاخر مستفيد لكن اذا كان بمثل طريقتج على قولة الاخت صايبه راح يكرهونج....تبين تتميز بعلاقاتج؟؟...اهتمي بالآخرين...وطالعيهم بتواضع...لاتحاولين تصنعين لنفسج برج عاجي جنه تقولين انا غير والباجي غير....ترا مرده بتلاقين نفسج قاعده بروحج!!!لانه الناس يحبون الشخص اللي يكون بينه وبينهم قواسم مشتركة


صدقيني اهم شي تكون نيتج صافيه وتحبين الخير للآخرين ...وبتكسبين قلوبهم....لانه اذا صرتي الاحسن على قولتج بكل شي هالشي مردوده لنفسج بس.....وعند الاخرين بيغارون منج وبالاخير يكرهونج....يعني منتي مستفيدة ...لكن لما يكون هدفج بكسب قلوبهم ويكونون لي اهل وعزوة ...انتي واهم مستفيدين ..فصدقيني بتكونين نمبر ون عندهم....وبالتوفيج خيتو

 

[أسرار الموسيقى]

أهتمي بنظافج و مظهرج و بنظافة ريلج و عيالج و بأكلهم و بلبسهم و بكل أمورهم و خليج طبيعية و لا تكونين بغير شخصيتج جدامه و إنتي تكونين كل حياته جذي,,,

و إرضاء الناس غاية لا تدرك,,,

الله يخليكم حق بعض,,,

 

[كريستال ليدي]

ما قصروا البنات ... خوش نصايح

 

[Judy abbott]

الوحده تتميز باخلاقها وسنعهاا وادبهاا
وتتميز لما تتعامل مع الناس بطبيعتهاااااا

 

[نتاشا الجميله]

الطبيعه ثم الطبيعه ثم الطبيعه
واذا كانت طبيعتج مكشره وقثيثه وجديّه <<<< إهني يبيلج نصايح



لكن البنيه البشوشه ودايم تبتسم بويه ريلها واهله
والمساعده تبادر فيها من غير تفكير
والهدايا تطلع منها من غير لاتحس .... يعني بالسوق اشتهت لخالتها شي وشرته بكل بساطه

اهني تحبها



لكن التصنع والتمثيل وانها تقرا بالمنتدى اهدي خالتج تروح ثاني يوم السوق وتشتري لها !!!
تحسين مو من قلبها ,, مالها طعم تكون !!

واذا على المناقشات والسوالف حلاتها سالفتها طبيعيه وبالي تفهم فيه

انا عن نفسي اذا تحجو بالسياسه انطرم << وماعندي حرج .... لاني مو مود سياسه كلش ولا لي شغل فيها بالمره ولا بنسبه 2%<<اشمعنه اثنين هههه
واذا تحجيت فيها وانا ما افهم فيها راح يكون شكلي غبي وحواري اغبى ^_^


المهم
اذا سالفه تفتهمين فيها داخلي وقولي رايج بكل رشاقه << يعني لا تدشين بدافشه وتصارخين لاااااااااااااااا هذا جذي صار وماصار
اهم شي الصوت المعتدل


واذا على البس
كل وحده وستايلها ... بس اهم شي بالمناسبات والجمعات بدلة حلوه او دراعه ... مو تصيرين عوبه وتنزلين ببرمودا ولا بديات ضيجه
تراج بنيه كويتيه منتي زلمه <<< ولا تقولون مافي وايد مرو علي بنات توهم متزوجين نازله ببرمودا؟؟؟؟؟؟؟؟؟؟؟
اسمالله ؟؟؟؟؟؟؟؟؟؟


اممممم وشنو بعد

والخاله تمووووووووت على الي تسمع كلمتها وتقدّرها
واذا عارضتي كلمتها خو مو من وراها ؟؟ لأ.... قعدي معاها وقولي بس ياخاله انا شايفه جذي وجذي احسن
ولا شرايج؟؟
مو تقولين لها انشالله ومن وراها تسوين عكس ديري بالج

واذا قالت لج تعالي معاي بيت فلانه ولا زواره روحي لا تقولين مابي وتصيرين منزويه وانطوئيه ومعقده هههههههههههههه
لا روحي حتى لو بيت ما تحبينهم كسبي خالتج فيهم
الخاله تحب تكشخ بحريم عيالها
تكشخي وتمكيجي وروحي معاها اذا عزمتج على زواره لا تتعززين وتصيرين مليقه روحي وخليها تفرح فيج
شصاير عليج كلها ساعه ساعتين تغيرين جو وتسمعين لج جم سالفه ..


اي وترى بوستها على طول براسها هذي معروفه من طلعت الدنيا .. اهي والعم
مادري ليش البنات هالأيام يسلمون على الخاله جنها رفيجتهم !!!





وإيااااااااااااااني ويااااااااااااااااااااااااااااااااااج تحشين فيها مع حريم حموينج
إياااااااااااااااني وإيااااااااااااااااااااااااااااااااااج ....<<< وصايه امي

هذي لو شنو ما تسوينها ... لو تجمعو حريم حموينج وحشو فيها بشي
حتى لو اهي مزعلتج ومنزله دموعج إيااااااااااااااااااااااج ثم إيااااااااااااج تحشين فيها

يا انج تنطرمين مره وحده بحاله الخاله غلطانه وكيفهم فخار يكسر بعضه <<< يا انج تدافعين عنها بغيابها اذا معاها الحق
او تحاولين تهدين الوضع لا اكثر
لكن تطبين بالحش وتنسين عمرج لاااااا ثم لااااااااااا


والله والله من كل قلبي هالنصيحه انصحها لان صدقووووووووووووووووووني
حتى الطوف لها اذاااااااااااااااااااان <<<< فلم رعب ^_^

اي ولله حتى الطووووووووفه لها اذان .... وماتدرين شلون راح تطلع السالفه تطلع قصد ولا بدون قصد
فإنتي امشي سيدا ويحتارون فيج



اممممم وبعد شنو ؟؟
مادري اذا تذكرت شي برجع



وشكرا لكم

 

[نتاشا الجميله]

تصدقين جنه مكان الموضوع غلط ؟؟؟
جنه لو بمنتدى العروس اظبط !!

 

[حكاية شهرزاد]

لاتبتدين حرب ... شيلي الافكار هذي من راسج ..

انتي حلوة حق ريلج ومرتبة ونظيفة عند نفسج .. وذوق بأخلاقج عند الناس ...

باجر بتشتكين انهما غارو منج وقلدوج وبعدين بتصير منافسة ثقيلة وعداوات ماتنتهي ..

امشي على الموضة باللي يناسبج وماعليج من ثيابهم .. جاملي شوي .. وخلج بارده .. ولا تعطين حجي ولا تاخذين حجي ..

تميزي بشخصيتج .. وراج ربى وعيال .. لايدخلون هذول براسج وتخترب نفسيتج ..

اكيد انج تعجبينهم وغصبن عنهم لانج زوجة ولدهم كرامته من كرامتج وبس ..

وتحملي انج تقلدينهم بأي شي لو يشترون الماس .. انتي خلج غير على ستايلج وشكلج وشخصيتج ..

 

[مشعلله]

تصدقين أنا غير عن اهل رجلي لبسهم غير عني ماحاولت البس مثلهم بالعكس هم وزوجة ولدهم اللي قلدوني مع ان لبسهم كان دراريع حتى فالمناسبات الكبيره والحين تعالي شوفي القصير والفساتين وين كانو وين صارو

 

[بسمة خجل]

حبيبتي خلي تميزج لزوجج و حياتج وعيالج وبس ولاتفتحين العيون عليج واهل الزوج مهما سويتي مايبين بعيونهم

 

[فلونة احلى وردة]

اي والله صاجة بسمة خجل
بس نصيحة لله اهم شئ الريل ثم الخالة والباقي عادي
المهم تفهمين شخصية خالتج وشنو تحب واي نوع خام تلبس او تحب الدهن العود ولا الفرنسي ووووو
ولا تيبين حجي ولا تودين حق ريلج ريحي راسها
والتوب يغارون منها فلا تصكين او تحاولين تصكين عليهم
هذي نصيحتي بس الانسان فعلا يحب يتميز بين اهل الزوج
انا متميزة باني مازلت مستمرة بكشختي غيري كشخ سنة سنتين وطخ

 

[خاشووقه]

البنات ما قصروا
و
(( حلي السانج تلاقين كل الناس خلانج ))

مووفقه

 

[انصاريه قمره]

مادري انا وحده احب اكون طبيعيه واحب كل شي يكون عفوي وهالشغله حلوووه والحمدالله اهل زوجي خوش ناس وزينين معاي وبالنسبه لهم انا الجنه الوحيده حاليا وحمواتي حبايب قلبي اهم خواتي واكثر والله يتمم علينا

 

[رفرف]

احب اكون طبيعية والحمدلله كلش مو همي اكسب احد واتحيلق انا طبيعتي جذي والحمدلله اهلي مربيني ع السنع عمرهم حمولتي ما سمعو مني كلمة تقث او شافو تصرف يكدرهم اظن هذا اللي يميزني ..
وهم ان حبوني فمن طيب اصلهم .. ما حبوني يسلم راسهم موبيدي اتحكم بقلوب ومشاعر الناس .. اهم شي المعاملة الطيبة بس مو ضروري يحبوني ..


ع الطبخ مرات اذا ظروفي زينة اطبخ واتنقص لهم اذا ماقدر لا والله عادي وجنه العيد ادش وايدي فاضية الناس ظروووف ..

الهدايا كنت اهدي خالتي اشياء عطور جناط ساعات ذهب وما تستعملها بطلت .. يمكن ذوقي ما يعجبها ,..
بس لي شفت شي وعارفة انه بيعجبها اماعين او اجهزة المطبخ او غيره بدون حجي اخذلها تستاهل والله ..


اللبس والكشخة ما اكلف على روحي لبسي بره نفس لبسي عندهم انا مو داشة منافسة ..
ولبس بناتي على طول حلو ومرتب جدامهم او من وراهم ارد اقووول مو داشة مسابقة ولازم افوز لا والله اللي بتتنافس عليها بالعافية انا همي بيتي وريلي وعيالي وبس ..
الباجي اكسبهم بطيب اخلاقي مو بلبس او طبخة او سالفة او تصنع ونفاق ..