شفيها لغتى العربيه او لهجتى الخليجيه والانجليزى داخل عرض

[sereen]

يابنات انا ماتكلمت عن اللى ظروفه حدته يتكلمها وانا وكنديه منهم , ولا اللى ابوها او امها امريكيه او اروبيه ولا مدارس اجنبيه ولا بالبيت يتكلمون اجنبى على انى ترى اعرف عوايل تتكلم انجليزى داخل البيت , انا كلامى عن اللى يقطون كلام وهم دارين بواقع الحال ان هالشى اللى يسوووونه فقط لكون اللغه اكثر تاثيرا على العالم من خلال النت , النت تعالى دورى فيه شى بالعربى ماتلقين كثر ماتلقينه بالانجليزى , بالاضافه ان البنات اللى يتكلمون للغه الانجليزيه , لغرض الكوووول , وانا اعرف على الرغم لو تفكر فيها شويه ترى العرب اصل كلشى بالعلوم , ليش صرنا نخش الكلام استغرب لما انزل الكويت واشوف هالبنات يقطون كلام انجليزى ترى ماكنا جذيه قبل شنو اللى غير ,؟ انا اللى افكر فيه تاثير الدوله القويه علينا يعنى الدول القويه تفرض سيطرتها من خلال تاثير ها على الثقافه واللغه الخاصه لاهل الدوله وهذى اهم مايميز الدول وجزء كبير من هويتها, خاصه ان احنا مو مثل دول المغرب اللى مساكين يشتكون من اجبار حكومتهم لهم لتعلم والتحدث باللغه العربيه , ايوونا امريكا قليل العربى واكثر الفرنسى وانجليزى ميح بالله شلون تتفاهمين مع وحدة عربيه مثلج ؟؟؟؟؟ اهم متحسفين على الوضع اللى اهم فيه

خاصه ان شبابنا زايد ومازال خاضع للثقافه الامريكيه بالتالى احنا كاكبار مالازم نماشيهم بالوضع اللى هم عليه غلط اشوى اشوى عيالنا ما را ح يتكلمون عربى عدل , انا من خلال مراقبتى للوضع لما انزل الكويت يحترمون اللى يتكلم انجليزى وتشوفين المعامله تتغير هذا انا من تجربتى
وشوف عينى , اشووف امريكان يتكلمون لغه غير لغتهم بينهم مابين بعض او داخل بيوتهم الا اذا فيهم عرج وهذا شى طبيعى جدا, ولا اوربين لا يمكن يكلمج لغه غير لغته حتى انجليزى مايرضى
دليل على ان تسمكهم باللغه يثبت وجودهم وهويتهم كا اوروبين ينتمون لدوله معينه

 

[Japanese]

همممممم راآآيي بان ممكن يكونون وايد متعودين يتكلمون انجلش او شي جي !

او مثلنا يعني تغربو ومب قادرين يردون ع موجه العربي ! << تصير وياي وايد :/ لآني عايشه مع اميركان

وايد صعبه علي هالسالفه ،، اني مثلا اقطع الخليجيات فتره وبعدين ارد اسولف معاهم !! اوبيه عدي وخربطي بالهحرقات

اخبر اول ماجييت اميركا بعد ماقمت اعرف اسولف عربي بعد فتره لان جد جد خلاص حياتي صارت كلها اميركان ! اي شسوي مب مني

اما هالناس اللي بس جذي عبالهم كول وحركات ،، صراحه مدري شاقول عنهم !

شكلهم مايعرفون قيمه العربي للآسف يعني ،، انا بعد فتره من غربتي قمت وايد افتخر بآني اتكلم عربي وصايره وايد افوشر بهالشي بعد

اي من حقي! العربي وايد صعب ع الاجانب وانا اتكلمه ك لغه اولى ! < يحقلي افوشر لوول

وبعد اي في شي وايد يضايق " الاهل اللي يدخلون عيالهم مدارس انجليزيه ويخلونهم ينسون العربي " اي ليشششش؟؟؟!!!

كلش مب شي

قلبي يعورني ع هالناس صراحه =( احسهم معيشين نفسهم بدنيا غير دنياهم

 

[Japanese]

وه وه توني اشوف ردج الاخير بآن قصدج مب عن الناس اللي حدتهم ظروفهم !

ردي : اوبيه ماعندهم سالفه وصج صج صج صج مب عايشين دنياهم صح :/

 

[sweet cake]

ادري ان قصدج اللي يتعمدون يتكلمون انقلش يعني شوفوني ترى انا كوول ومادري ايش.. بس انا قصدت غيرج.. يعني انتي فاهمه الوضع وعارفه ان غصبا عنج تطلع كلمات او شوي تحولين انقلش وهذا اسمه code switching
بس غيرج لما يشوفونج تتكلمين وتطلع منج كلمه انجليزي شوفي شيقولون عنج.. ولا شوفي نظرتهم لج.. طبعا انتي فاهمه وعارفه وما راح يهمج تفكيرهم لكن استغرب ليش يعني ؟؟
اعتقد عرفتي الفئه اللي اقصدها.. الفئه اللي عندهم ان الناس كلهم تصنع ويعممون

 

[غزلان]

بالعكس هذاا شي طيب ليش زعلانه !!
احد حاصله انه يكون عده لغه وخاصه قويه مثل الانقلش ؟؟
مافيها شي هويتنا عربيه رحنا طرنا متنا قعدنا بس اللغه ثقااافه ماله دعوى بالي تقولينه انتي
انا لو حاصلي حتى صيني اتكلم يختج الثقاافه حلووه ترزج ماتسوى عليج تروحين مطعم ولا شي تبين تحجين ماتعرفين ااتوهقين وخاصه احنا ابووقت انفتاااااااااااااااااااااااااااح يعني مدارس انقليزيه نوادي مطاعم كله اجانب فتاثرنا فيهم حيل
انا اقول هاذا شي طيب

 

[ام شيخوه]

احلى موضوع لاني مقهورة من وحدة مسوية روحها هاي كلاس وتقط كلمة وحدة انجلش والباقي عربي وهي ماتطلع برى بيتهم ماقول الا ياشين السرج

 

[PinKiSHo]

الي يتكلمون انجليزي تفلسف يبين من الاكسنت مالهم الي يكون ركيك او ويبين من طريقه كلامهم يعني الي تيي تقول نكتسب مور خبره !! يعني مور ماعرفتي تقولينها بالعربي وعرفتي تقولين خبره !! وفرق لما وحده تقول نكتسب مور اكسبيرينس

اما في ناس يتكلمون عربي وتطلع معاهم جم كلمه بالانجليزي لان مع التعود فا اللسان ياخذ عالكلام يعني وحده تسولف سالفه وطلعت كلمه انجليزيه عفويه مافيها شي انا ساعات لما اسولف في تعابير وكلمات انجليزيه تطلع بدون قصد او ساعات اتوهق اكون فاهمه الكلمه بس موعارفه اييب معناها بالعربي !!

وصراحة الانجليزي الحين صار لغه عالميه وتعليمها مهم والحين وين مانروح لازم نتكلم انجليزي بالمطاعم والمحلات وبحياتنا العمليه

واشوف ان الانجليزي يعطي برستيج للانسان يعني شخص رزه وحالته حاله ويتكلم انجليزي ركيك ومكسر موحلوه !

 

[كندية]

يابنات انا ماتكلمت عن اللى ظروفه حدته يتكلمها وانا وكنديه منهم , ولا اللى ابوها او امها امريكيه او اروبيه ولا مدارس اجنبيه ولا بالبيت يتكلمون اجنبى على انى ترى اعرف عوايل تتكلم انجليزى داخل البيت , انا كلامى عن اللى يقطون كلام وهم دارين بواقع الحال ان هالشى اللى يسوووونه فقط لكون اللغه اكثر تاثيرا على العالم من خلال النت , النت تعالى دورى فيه شى بالعربى ماتلقين كثر ماتلقينه بالانجليزى , بالاضافه ان البنات اللى يتكلمون للغه الانجليزيه , لغرض الكوووول , وانا اعرف على الرغم لو تفكر فيها شويه ترى العرب اصل كلشى بالعلوم , ليش صرنا نخش الكلام استغرب لما انزل الكويت واشوف هالبنات يقطون كلام انجليزى ترى ماكنا جذيه قبل شنو اللى غير ,؟ انا اللى افكر فيه تاثير الدوله القويه علينا يعنى الدول القويه تفرض سيطرتها من خلال تاثير ها على الثقافه واللغه الخاصه لاهل الدوله وهذى اهم مايميز الدول وجزء كبير من هويتها, خاصه ان احنا مو مثل دول المغرب اللى مساكين يشتكون من اجبار حكومتهم لهم لتعلم والتحدث باللغه العربيه , ايوونا امريكا قليل العربى واكثر الفرنسى وانجليزى ميح بالله شلون تتفاهمين مع وحدة عربيه مثلج ؟؟؟؟؟ اهم متحسفين على الوضع اللى اهم فيه

خاصه ان شبابنا زايد ومازال خاضع للثقافه الامريكيه بالتالى احنا كاكبار مالازم نماشيهم بالوضع اللى هم عليه غلط اشوى اشوى عيالنا ما را ح يتكلمون عربى عدل , انا من خلال مراقبتى للوضع لما انزل الكويت يحترمون اللى يتكلم انجليزى وتشوفين المعامله تتغير هذا انا من تجربتى
وشوف عينى , اشووف امريكان يتكلمون لغه غير لغتهم بينهم مابين بعض او داخل بيوتهم الا اذا فيهم عرج وهذا شى طبيعى جدا, ولا اوربين لا يمكن يكلمج لغه غير لغته حتى انجليزى مايرضى
دليل على ان تسمكهم باللغه يثبت وجودهم وهويتهم كا اوروبين ينتمون لدوله معينه

جنه طلع اسمي ههههه....
شووفي على ساالفة التكلم في البيت هذا اول قانون يقوولونه لج اذا تبين تتعلمين وانتي في الغربه لازم تتكلمين دائما في البيت....يعني احنا في المدرسه من 9 لي 4 تردين البيت مالج خلق احد ماعندج احد تكلمينه عربي...تطلعين كل انقلش فيعني مو تنسين العربي بس لسانج يصير ثقيل...وانا لما رجعت صج صج توهقت لان انا في الكويت اعتمادي على اهلي يعني ماسوي ولا شيء وابسط الشغلات مااطلب من مطعم وهالسواالف...فلما تردين تحسين انج في عالم ثااني حتى لو تقرين عربي الاستوااعب ماافي ....بس يبيلهاا تعوود او مثلا يظلوون يتكلموون انقش على شاان لا ينسووون اللي نفس حلاتي هههه...

وسالفة المعاامله فانا معااج لما يسموعنج تتكلمين وبذاات اذا تطلبين مثلا يعرفوون والمعامله تتغير ليش بصرااحه ماادري....

سرين انتي حطيتي المووضوع جنه حااسه ماافي داخلي
​

 

[قـہۈه فـرنسيـہ™]

مدري عآآدي ,,, مو سالفة أني أهااايط لا بس تعود لساني مثلا على بعض الكلماات مثل أوكي ,,, نو وي ,,, شسوي بعد

 

[Mazyoona]

ذيك المرة بعد انطرح نفس هالموضوع ‘

بوجهة نظري ما اشوف فيهآ شي .. كل وآحد وعلى حسب تعوده
ساعات اذا كنتي بمدرسة اجنبية او عآيشه برة او تدرسين برة مع الوقت يآخذ لسآنج على كلآمهم
ويخونج التعبير في بعض الكلمآت .. فيدخل الانجليزي بين الكلآم

وحتى الاوليين على ايام ما كانوآ البريطآنيين في ديرتنآ
خذينه منهم بعض الكلمآت وصآرت جزء من لهجتنآ مثل كلمة " ليت " < light بالانجليزي
" بلآك " << plug بالانجليزي
" تلفزيون " << Television بالانجليزي
وغيره وغيره لو تبحثين و تمحصين ..

كلنآ نفتخر بكونآ عرب وكويتيين ونفتخر بلهجتنآ وعروبتنآ
بس مآ احب هالربط بين اني اذا دخلت كلمة انجليزية او فرنسية او ايطآليه او او او و بيين اني مآآآ افتخر بلغتي او امحيهآ !
ماله علآقة بوجهة نظري ..

انا مع خوآني وخوآتي مرآت نقلب انجليزي بحكم ْ الدرآسة
ما اشوف هالششي تفآخر

بس مع الغييير .. اتحآششى نتكلم بالانجليزي جدآمهم
لانه نظرتهم لنآ >> مغرورين وشآيفين حآلهم @@ مثل ما شفت في بعض الردود بهالموضوع
ما ادري ليش هالربط !!
واظن انه هالنظرة جدآ ً سطحيــــــة !!

و لغتتنآ ان شاء الله دآيمآ ً في الطليعة
ومحد يقدر ينكر انه اللغة العربيـــــــــة من آهم واقدم اللغآت في العآلم ْ
وتعتبر لغة ثريـــــــــة بالمفردآت و الوصف ْ .. و لآآآآ يمكن ْ ينمحي هالتآريخ العريق لهآ

و ان شاء الله نحآفظ عليهآ **

أنا مع demera

~~

انا بمدرسه امريكيه و اتكلم اللغتين بطلاقه

لكن ما يمنع اني استخدم كلماتي الانقليزيه باللغلط !!!
و ما احب اللي يحسبونني اتكبر !!!!

يا ناااس ليش اتكبر
لغتي العربيه تاج على راسي و مستحيل ابدلها ~~

 

[ღ كحلاء العين ღ]

؛
الـــســلآمـ عـلـيـكـمـ و رحـمـة الله و بـركـآتـه

آنــآ يومـ كنت صــغيرهـ درســت ابـ أمريكــآ كـمـ ســنـــه و كــآنت من ثــآنيه روضى لــ 3 ابتدآئــي ..’,~

كــآن آبوي يكمــل و خــذآنــآ مــعــآهـ ...’,~

و لــمــآ رجعنــآ الكويت كــآن صعب علي حييييييل كــلآمـ العربي الفصيح و الكــلآمـ الكويتي ..’,~

حتى المدرسه كــآن الموآد كلهـآ فول مــآرك إلا العربي ســآقطه مــع مرتبة الشرف ..’,~

حتى ابــ حل الإمتحــآن كنت أكتب لغــه عــآميه أذكر إجــآبآتــي كلهــآ جذي و الأبــلات يطوفون ..’,~

بس طبعــاً بالعربي شديت حيلي و الحمدلله الحين زينه بالعربي و صرت أكثر شيء أحبه أقرأ متب بالفصحى ..’,~

و هــمـ أكتب بعد بس مــع كل هذآ لســىني مــآسك على الإنجليزي أكثر من مرهـ تكلمني بنت و أرد انجليزي ..’,~

بس هذآ صـآر نـآدر بس كثير يقولون هذي شــآيفه نفسهـآ ومتكبرهـ ..’,~

و بالنسبه للي تتصنــع مــآ تعحبني خلج على طبيعتج أحسن ..’,~

افتخري ابــ لغتــج و لآ يغرج الإنجليزي ترهـ أسهل لغه و مــآ في أصعب من العربي و الفيزيــآء ..’,~ < شكو

بس ودي أدخــل مدرســه أمريكيه لأني إن شــآء الله نــآويه أروح بعــثـه و أبي اعتــآد على الوضع هنــآكـ بس منو يقنــع آبوي ..’,~

و تسلمين قلبووو على الموضوع الحلو ..’,~

و مـــــع السلامــــه ,,,

|~|

 

[@رومانسيه@]

مادري شاللحكمه في ناس متعودين بس مودايم وموبكل مكان هاللغة

 

[sereen]

ان شاء الله و ضحت الصورة بنات , انا ماتكلم عن اللى ظروفهم حدتهم , لكن هالحريم الكبار وهالشباب الى عبالهم كشاخه ولا يدرون عنهم الامريكان او البريطانين عن هوى دارنا ,
انا حيل اقدر وافخر لمااشوف الى امهاتهم اجانب ويتكلمون كويتى كويتى ولا يحاولون يتشيحطون بالعكس قاعدين ياكدون اصلا انهم كويتين , ليش مجتمعنا صاير مخترع من اللغه الاجنبيه ويمارسها مع ابناء بلده , كانه يتعرى من كونه عربى , الحين احنا فى حرب ثقافيه كبيرة " العولمه " مثل ماقالت اختنا فعلا , مافيها شى اعرف اللغه وستخدمها بوقت الحاجه لها مو على الفاضى والمليان, اصلا مووولايق
انا رحت الامارات ماشفت امارتييين يتكلمون انجليزى بنفس الطريقة اللى بعض افرادنا مستهلكها ,تلقينه بليل انجليزى بس لا ماسك لهجته الحلوة الماراتيه .... افوووشر ياحلوج انتى
انا هذا اللى بووصله تمسكوا وخلوا عيالكم يفخروون باللغه العربيه, الشى الوحيد اللى بقى بعد الاهانات السياسيه اللى يوميا تتعرض لها دولنا