شسالفة الدم اذا انتي سالب وريلج موجب ولا العكس !؟؟

[tmtmt]

السلام عليكم

قريت مشاركه لوحده من البنات
تقول ان اذا تختلف فصيلة الدم بينها وبين ريلها
مثلا اهيا بي سالب وريلها بي موجب ولا العكس
هذا خطر على الحمال
ولازم تاخذ ابره للاجسام المضاده ومادري شنو ؟؟


ليييييش شسااالفه صجججج ؟؟

انا موجب وريلي سالب
طمنوني

 

[بندوله مصدعه]

اي صح سمعت عن هالشي
علشان لاولدتي مايختلط دمج مع دم الياهل مو زين
اذكر درست عن هالحاله بالجامعه
بس تاكدي من دكتورتج احسن

 

[mrs.perfect]

روحي سأليلج دكتور
لاتخربطين نفسج بالمنتدى
حاله تصير للمتزوجين ولها حل.....بس لا الحل ولا التشخيص ولا العلاج بتلقينه هني
اوكي ياقلبي انا اخاف من هالسوالف الللي بسيطه بس ممكن معلومه خاطئه تودي بداهيه

 

[انامل كويتيه]

لا تخافين انا نفسج انا ايه موجب وريلي او سالب
وعيالي كلهم موجب لو كنتي انتي سالب وزوجج موجب اهني المشكله
لازم ابرة اجسام مضاده بعد كل ولاده

 

[الحسن الرقيق]

اذا انتي موجب وريلج سالب ماكو مشكله ..
بس المشكله اذا ريلج موجب وانتي سالب ..

 

[الحلا و الزين كله]

انا اللي اعرفه انه المره اللي دمها سالب اهيا تاخذ ابره الاجسام المضاده بعد اي اجهاض او وولاده او اي عمليه.. مالها شغل بالزوج...اختي جذي و تاخذ الابره بالحالات اللي ذكرتها ماله شغل زوجها... واخوي سالب ومرته موجب ماعندهم اي مشاكل من هالنوع وعيالهم تبارك الله

 

[دلع حياتي]

انا او سالب وزوجي موجب واخذت بثاني حمل بثامن والاجهاض الاخير بعد العمليه اخذت الابره وبحملي الاول ماخذت لما ولدت كان ولدي نفس فصيلتي وماحتجت وهي تناخذ منع الاجهاض والتشوهات لانه الجسم يكون مناعه ضد اي جسم غريب ويحاربه والدكتوره ادرى بس اساليها

 

[اليزابيث]

هلا حبيبتي
انا سالب وزوجي موجب
واخذت هالابره بحمالي قبل كم شهر
اخذتها عند الستوصف بأول الشهر الثامن
انا كان عندي ملف ومارحت لهم من الشهور الاولى
دخلت على الدكتوره وشافت فصيلتي وهاوشتني قالت المفروض ماخذتها من الشهر السابع وعطتني اياها

ان شالله افدتج اختي >>قصت كل حياتها

 

[*Little**Angel*]

انا جذيه انا سالب وريلي موجب
اهوه خطر مو على الجنين اللي بطنج الخطر على الحمل اللي وراها اذا ماخذيتيهم راح ينزل لان يكون الجسم اجسام مضاده ضد الجنين
تاخذين بالحمال ابريتين بالاسبوع 28 والاسبوع 34 يعني اول السابع واول الثامن
واذا البيبي طلعت فصيلته موجب بعد الولاده تاخذين وحده

بس اذا الام موجب ماكو مشكله

 

[سكوتي اذلك فيه]

عادي حبيبتي انتي ماتاخذين ابرة الانتي دي

اما اللي دمها سالب وزوجها موجب هي تاخذ

انا اخذها اذا نزل علي بقع بنيه كبيرة شوي ومفعولها 6 اسابيع توقف الاجسام المضادة وعقبها اذا ردت يعطوني الابرة

اما اذا مافي شي فالمفروض بالشهر السابع والتاسع وعقب الولادة اذا دم البيبي سالب ماتاخذين الابرة اما اذا دمه موجب تاخذين الابرة

وطبعا بعد الاجهاضات لازم تنوخذ



واتمنى اني افدتج

 

[حبـ admant ـك]

اي رفيجتي هلون
وصارو يعطونها ابره ببدايه حمالها والحمدلله كل شي اوكي

 

[_Pure_]

بس اللي دمها سالب مشكله

اذا موجب عادي

 

[TeKaNa_Girl]

اصلا دكتوري قايل
اهم شي البنت
لازم تكون موجب
والريل مايهم سواء سالب ولا موجب


يعني اهم شي انتي موجب والحمدلله انتي موجب

لاتحاتين

 

[Miss Golden]

انا سالب وريلي موجب.. اخذت ابره بالرابع مبجر لان نزل علي دم فقالت لي الدكتورة اخذي اول وحده الحين..

الباجي اعتقد بالثامن والاهم بعد الولاده عشان مايأثر عالجنين الثاني

 

[mrs.perfect]

لا حظتي حبيبتي شلون عندج اراء متضاربه
لا وازيدج وحده من اهلي سالب وريلها موجب لازم بالسادس او السابع تاخذ ابره
فراي الدكتور اهو الصح
حتى اللي تمر بهالمشكله ممكن حالتها غير حالتج وظروفها غير ظروفج

 

[عـــزآآآآآهـ]

لا تخافين انا نفسج انا ايه موجب وريلي او سالب
وعيالي كلهم موجب لو كنتي انتي سالب وزوجج موجب اهني المشكله
لازم ابرة اجسام مضاده بعد كل ولاده

نفس اللي بقوله اذا انتي موجب اماااااااااان

 

[كـ غلا ــلي]

طالما انج موجب فانتي ما عندج مشكله باذن الله المشكله تصير بس اذاا كانت الزوجه سالب وزوجها موجب

فالجسم اهنيه ينتج اجسام مضاده تهاجم الجنين في حال كان دمه موجب لكن لو كان سالب مثل امه ما عليه خطر انشاءالله طبعا الاجسام هاذي

مع اول حمال ما تظهر الا بالحمال الثاني فالخطر اهنيه بكون عالجنين الثاني مو الاولاني فتلقين الاجسام هاذي تهاجم الجنين الثاني ويصير

الاجهاض فعشان جذي اهما يعطون الابره بالاسبوع ال 27 احتياط لانهم ما يعرفون اب هالفتره الجنين موجب ولا سالب وهمن يرجعون

يعطونها الام بعد الولاده اب 48 ساعه في حاله كان الجنين سالب

 

[Goth-Girl]

انا سالب وريلي موجب وكل عيالي على ابوهم موجب ولازم كل حمل اخذ ابره قبل وبعد ولادة عشان يا يتاثر الجنين والسالفة عادية حبوبة لا تحاتين

 

[([عطر رومانسي])]

شوفي الله يسلمج اذا الام سالب والابو موجب

وحملت واختلط دم البيبي مع الام

جسم الام يكون اجسام مضاده تطرد البيبي فيتوقف نبضه لانه تعتبره مرض او شي غريب دخل جسمها

فتاخذ ابر اجسام مضاده


اما العكس اذا الام موجب والابو سالب عادي مامنه خوف


على فكره في ناس دمهم نفس الشي بس تلقين من تحمل يصير فيها اجسام مضاده




انا دمي سالب وريلي موجب اجهضت مرتين وعقب كل اجهاض اخذ ابره اجسام مضاده للحمل اللي وراه

والحين بحمالي هذا الله يتمه على خير

خذيت الابره 3 مرات

بشهري الخامس والسابع والثامن

واذا ولدت والبيبي دمه موجب لازم اخذها بعد خلال 48 ساعه من الولاده

بس انتي اذا راجعتي سألي الدكتوره عشان تتطمنين

 

[([عطر رومانسي])]

طالما انج موجب فانتي ما عندج مشكله باذن الله المشكله تصير بس اذاا كانت الزوجه سالب وزوجها موجب

فالجسم اهنيه ينتج اجسام مضاده تهاجم الجنين في حال كان دمه موجب لكن لو كان سالب مثل امه ما عليه خطر انشاءالله طبعا الاجسام هاذي

مع اول حمال ما تظهر الا بالحمال الثاني فالخطر اهنيه بكون عالجنين الثاني مو الاولاني فتلقين الاجسام هاذي تهاجم الجنين الثاني ويصير

الاجهاض فعشان جذي اهما يعطون الابره بالاسبوع ال 27 احتياط لانهم ما يعرفون اب هالفتره الجنين موجب ولا سالب وهمن يرجعون

يعطونها الام بعد الولاده اب 48 ساعه في حاله كان الجنين سالب

حبيبتي اذا البيبي موجب يعطون الابره مو السالب

لان اذا سالب جسم الام يظل فيه مفعول الابره اللي خذتها قبل