شرايكم بتخصص رياض الاطفال؟؟؟؟؟؟تكفون فيدوني ++(دمج المواضيع المتشابهه)++

[صايمه ومصليه]

رد: شرايكم بتخصص رياض الاطفال؟؟؟؟؟؟تكفون فيدوني

انصحج لاتدخلين هذا التخصص تعب حيل

 

[miamy]

رد: شرايكم بتخصص رياض الاطفال؟؟؟؟؟؟تكفون فيدوني

لو ادري جذي شغل الروضه جان مادخلت

واذا مليتي من الروضه ماتقدرين تحولين

لا تروحين تخصص رياض اطفال روحي علم نفس تقدرين تصيرين ابلة روضه وتقدرين مرحله ثانيه

الرياض مووو خوش مكان

 

[رومنسيه بس دلوعه]

رد: شرايكم بتخصص رياض الاطفال؟؟؟؟؟؟تكفون فيدوني

ابييييييييييييييييييييييييييييييييييه
لهدرجه رياض الاطفال خاايس
ليش هذا وانا منحاشه من تخصص العلوم والرياضيات وجايه رياض بس توني ماحولت له

انزيتن ممكن اللي تكتب توضحلي شنو الصعوبه بالضبط عشان نعرف
وصج ماترقين بسرعه وفي ناس يقولون رياض اطفال اهون من اشياء ثانيه
يالله مادري شسوي عقب ماكنسلت تخصصي القديم .........وين اروح ؟؟؟
هل انتو ماتحبون لوية الاطفال وماتحملونهم يعني انا احب الاعب الاطفال عادي اتحملهم
هل انتو جذي وبعدين مليتو بليييييييز فهموني ؟؟؟

مشكورين خواتي عالمرور والمشاركه واتمنى تجابوني بعد <<<<ادري طمااااااااااااعه ؟.؟؟؟

 

[miamy]

رد: شرايكم بتخصص رياض الاطفال؟؟؟؟؟؟تكفون فيدوني

رومنسيه دلوعه لا طماعه ولا شي

شوفي بالنسبه لي اللي مضايقني تخبط التوجيه والاداره، معروف بالادارات مثل لي حبتك عيني ما ضامك الدهر، تحبج دربج خضر، ما تحبج ياويلج ويلاه وينطرون عليج الزله، شي ثاني الرياض انتي ابلة كل شي اوكي نحب الاطفال ونلاعبهم بس انتي ابلة رسم ابلة العاب ابلة علوم ابلة حساب وكل شي، ابلة الفرصه ابلة المطعم، غير الوسايل والقش اللي بصير عندج ولااازم تكونين مشوقه للطفل وتجذبين انتباهه بألعاب ووسايل متجدده، بعد شقولج الرياض فيها حفلات ومناسبات وايد يعني غير شغلج لازم بتسويلج فنتق بالحفله انتي وفنج عاد من لبس الاطفال واغانيهم وشلون يمشون ووااايد اشياء وايد

انتي روحي تخصص ما يلزمج بالروضه، يعني اللي يروحون علم نفس يقدرون يدرسون رياض اطفال ويقدرون اجتماعيات وعلم نفس بالثانوي ف لا تحكرين نفسج في مجال واحد

 

[عهود الحب]

رد: شرايكم بتخصص رياض الاطفال؟؟؟؟؟؟تكفون فيدوني

البنت تخصصها ابتدائي
حرام جذي خرعتوها


حبيبتي الرياض اطفال تدريس وتعب
الابتدائي تدريس وتعب
المتوسط والثانوي كلهم بعد تعب



بالعموم عمل المدرسة متعب
بس في شي اهون من شي


لايضيق خلقج
ترى الناس قدرات
في ناس حابة تخصصها ومبدعة فيه وماخذه امتيازاتها ومرتاحة ماتبي تترقى على قولة البنات
وفي ناس بالابتدائي مايبون الترقية وهم بالثانوي والمتوسط يتحايلون عليهم مايبون يترقووووووون
اعرف مدرسات درسوا اختي ولازالوا يدرسون واختي ترقت واهمه كل سنة يرفضون الترقي لرئاسة القسم


هم المراحل الثانية لما تترقين تظلين تدرسين صف او صفين حسب النقص
اما بالرياض اذا ترقيتي ماتدرسين فقط يكون عملج اداري


يعني هم الرياض فيها مزايا والمراحل الثانية فيها عيوب


العلوم و الرياضيات اذا ماتبينهم ما الومج
المناهج تصعبت حيل والرياضيات توجيههم متخبط
ويكفي بس تسألين المدرسات عن هالنقطة




الابتدائي عندهم رعب { الملف الانجازي }
كراف ولعنة خير بصراحة ومشروع تافه وسخيف
بالاضافة للحصص الاضافي
والشغلات الثانية


يكفي تسألين أي مدرسة ابتدائي وبتشتكي لج من الهممممممم والويل والثبور ومعظمات الامور



المتوسط البنات كل مالهم يصيرون قليلات ادب والي تقولج المتوسط وناسة تقص عليج

الثانوي حدث ولاحرج ! مادري شنو فيها زين
امتحانات وكنترول وتأخير للمغرب والعشا وانتي بكنترووووووووول




شنو فيها حلو المراحل الثانية ؟؟؟؟؟؟؟؟؟؟؟؟؟؟؟؟؟؟
لا المناهج سهلة ولا التدريس يشوق ويونس !!



هم بحدد لج نقطة تناسيتوهااا
ترى اللحين الابتدائي امتحانات وكنترول وتصحيح وتعب


يعني المرحلة الوحيدة الي مافيها شغل شي اسمه امتحانات الرياض اطفال
والمرحلة الوحيدة الي يطلعون مبكر ساعة كاملة عن باقي المراحل هم الرياض اطفال
والمرحلة الوحيدة الي تعطل قبل اسبوعين عالاقل من بقية المراحل الرياض اطفال
والمرحلة الوحيدة الي مافيها درجات ونجاح وسقوط وهواش مع اهاليهم عند هالدرجات الرياض اطفال

والمرحلة الوحيدة الي عندج صف تقعدين فيه وتحسين مملكتج ماتقعدين تدابجين من صف لصف ورى البنات هي الرياض اطفال


المرحلة الوحيدة الي فيها المدرسة تدرس فترة تدريسية باليوم هي الرياض اطفال وهي يا يكون عليج الحلقة او اللاصفي
وباقي الدوااااااااام فرصة ومطعم واركان وانصراف يعني لعب وسهالات بسسسس بالرياض اطفال


المرحلة الوحيدة الي المشرفة الفنية تكون مومسؤولة عن التدريس هي الرياض اطفال

الرياض اطفال
مو جهنم !


لاتاخذين باراء البنات
وتتركين الامر لهم !
انتي تحبين الاطفال مافيها شي لو تدرسينهم
حتى لو كرهتي مع الوقت ماراح تندمين


احنا صج نتعب
بس شنو تعبنا مقابل باقي المراحل ؟
ترى لعب جهال !


انا كتبت كلامي هذا وطولت بالشرح
لأني حاسة فيج


انتي تحبطتي اكيد وانقهرتي اكيديييييييين
بس اهم نقطة انتي وضعج شنو مصلحتج شنو
صلي استخارة وفكري عدل وعقبها قرري شنو تبين



احب اضيف نقطة اخيرة
ان البنات الي هني ولاواحدة منهم تعبانة من التدريس نفسه اكثر من الادارات المدرسية والتوجيه في رياض الاطفال
والرياض اصناف وانواع تلاقين روضة زينة وروضة شينة
وانتي وحظج ونصيبج وهم لهم تأثير على نفسيتج
بس هالنقطة مشتركة بكل المراحل التدريسية وبكل وزارة التربية
ااذا كانت ادارتج زينة وقسمج زين وعلاقاتج زينة بتحسين براحة
اما اذا الجو العام محبط فتتعبين نفسيا
بس لاتفكرين بهالشغلات مو وقته هذي اشياء تترك للزمن مابيدج شي سوى انه اذا كنتي بمكان ومارتحتي

عااااااااااااادي قومي تسبحي ولا اغسلي وشك
< تتغشمر :eh_s(6):

لا لا صج ان ما ارتحتي
كتبي نقل ببساطة وبس :ada:

 

[رومنسيه بس دلوعه]

رد: شرايكم بتخصص رياض الاطفال؟؟؟؟؟؟تكفون فيدوني

ياااااااااااااااااااااااااابعد عمري والله عهووووووووووود فديتج هذا الشرح اللي كنت ابيه
مو لانج مدحتيلي رياض الاطفال بس لانج وضحتيلي اشياء وااااجد
وطبعا لا هانو كل البنات اللي دشوا وكتبو تجربتهم ورايهم
وهم الي عندها شي تضيفه

 

[عهود الحب]

رد: شرايكم بتخصص رياض الاطفال؟؟؟؟؟؟تكفون فيدوني

حبيبتي رومانسية
انا لي 15 سنة مدرسة روضة
يعني أكبر بالعمر وأكثر خبرة


حاشتني ايام كرهت التدريس بالرياض وبديت أكره كوني مدرسة روضة وبديت أمشي واتحلطم
واكره الدنيا وادور الغياب دورة بس بغيب


بعدين من كثر تعبي النفسي تعبت صحيا

قعدت مع نفسي قعدة مصارحة بس أنا و ذاتي المقصرة بعملي كمدرسة

حسيت بتأنيب الضمير صراحة ً

لقيت أن التدريس بالرياض مو بذاك السوء !
خصوصا أن عندي صديقات وشقيقات ومعارف واقارب مدرسات لمراحل مختلفة من الثانوي الى المتوسط الى الابتدائي


لقيتهم وقت الامتحانات كششهم طايرة واعصابهم مشدودة واول السنة مراكض واخر السنة مراكض ونص السنة مراكض

اخترعت حدي منهم تبين الصج وكل مابطلت حلجي وقعدت اتفلسف يزفوني
يقولون لي من صجج انتي !!
تبين التعب والشغل الي تتشكين منه تعالي شوفي تعبنا
نطبع امتحانات نصور نراجع مع الطالبات نراكض مع الادارة مع الاذاعة وكله الا اجتماع الامهات عالدرجات
كرتون بندول مايلحق على القسم روسنا تتتبطط


حسيت اني بعافية ومرتاحة بس كانت مشكلتي الوحيدة الاحباط من اشخاص كانوا مسؤولين عني

الموجهة ! المشرفات ! الناظرة !

تبين الصج انا شوي مرات استصعب شغلي واحس اوف قطيعة خاصة بأيام الضغط الزايد والاحتفالات الي مالها معنى
يعني شغل فوق عملج بس مومن صميم عملج عرفتي
بس ترى ولاشي عملنا واحنا لله الحمد بنعمة وخير عسى ربي يبارك لنا فيه



هالكلام كتبته لكل الابلات الي فوق بالردود
عشان تقرون تجربتي انا اختكم اقدم منكم بالعمل وصدقوني ماشفتوا شي اكثر من الي شفته
انا جربت اشياء كثيرة لو بسولف بتنصدمون
بس تعلمت اني اخلص لله في عملي واتوكل عليه
واحتسب الاجر عنده والحمدلله هالطريقة بالتفكير تخلي الواحد يبتسم من قلبه
والامور سهالات مافيها عقد
ولاشي


بس حطوا ببالكم الحياة حلوة
والرياض احلى
والتدريس كله اجر لنا بالدنيا وبالآخرة

وتذكروا انه الايات الي تحفظونها عيالكم تأجرون عليها مدى حياته كل ماقرى آية الاخلاص والفاتحة طول حياته
ينصب الاجر بميزان اعمالكم
وحتى لما يعلمها عياله او احد ثاني يرجع الاجر لكم
سبحان الله وبحمده

 

[الدلال]

رد: شرايكم بتخصص رياض الاطفال؟؟؟؟؟؟تكفون فيدوني

التعب مو بس من الاداره

التعب من مجابل اليهال وتحملج مسؤووليتهم

يهال وفي ويهج لو صار لهم اي شي

ومرات الام تغفل عن عيالها شلوون المدرسه!؟؟

والترقيه يمكن يشيب رااسج وتتقاعدين وللحين محلج سر.. اللي لها سنه وحده مدرسه واللي لها 15 سنه مدرسه ماكو فرق بينهم حتى لو كانت الخبره.. في ادارات مايهمهم هالشي

ريااض الاطفال مو بس تعب ولا مقدور عليها السالفه واغلب الوظايف تعب

رياض الاطفال تعب + قهر + احبااط + عدم تقدير

 

[عهود الحب]

رد: شرايكم بتخصص رياض الاطفال؟؟؟؟؟؟تكفون فيدوني

حسب الادارة
الظلم بكل مكان
انا حامل وثقيلة حدي وحملي دايمن يتعبني ومع ذلك بروحي مع معلمة قمة بالبرود
وفي بنات فطافيط ثلاثتهم بالصف وكل واحدة على حلقة او حلقتين
وانا 3 حلقات
وموهامني تدرين ليش؟
لأني أدري إني صابرة وماجورة عالصبر واحتساب الاجر


التقدير من الله يكفيني عن تقدير عباده
وصدقيني ماخاب من رجا رضا ربه



والترقية الي تخليني اراكض ورى الابلات واترجاهم يسوون شغلهم ومايجيبون لي الكلام كمشرفة مابيها
شدعوة المشرفات مرتاحين ولا المدرسات الاوائل مرتاحين ؟


بالنسبة لمجابل الاطفال ياحلوهم
ابرك من مجابل بنات مراهقات كل واحدة لسانها اطول منها
ويازين مشاكلنا ياخف دمها

وياشين مشاكل المراحل الثانية


الدلال الله المستعان حبيبتي
ماخاب من رجا ربه
ماخاب من رجا ربه

 

[رومنسيه بس دلوعه]

رد: شرايكم بتخصص رياض الاطفال؟؟؟؟؟؟تكفون فيدوني

مشكورين حبايبي
ومشكوره مره ثانيه عهووووووووووووووووووود تسلمين
والله مادري اغلبكم يذمونها واللي ماذمتها قالت انها اجر
ياربي مالي الا صلاة الاستخاره معااني مرتاحه للتخصص نوعا ما
وماتقصرون حبايبي كويتيات وخاصهعهود اللي تكتب بضمير
وسؤال اخير لها
هل الشغل نفسه متعب ولا لان الاداره سيئه صار متعب ؟؟؟؟

 

[مخروووشة]

رد: شرايكم بتخصص رياض الاطفال؟؟؟؟؟؟تكفون فيدوني

انا اقترحة انج تخصصين علم نفس عشان اذا ما اعجبج تقدرين تحولين

 

[وين مرساي]

عاجل

سلاام

اخبااركم واخباار الوضيفه معااكم

بطلب مسااعدتكم

تنصحووني ادخل تخصص ريااض اطفاال ولا لا

خريجه
و
نسبتي 79.67 علمي

بس نااس تقوول صعب ونااس تقوول رووعه


ابي راايكم ياا عالم


تكفوون لا تخلووني




تحيااتي: وين مرساااي

 

[^ليلاس^]

رد: عاجل

على حسب

اذا انتي حابه المجال راح ترتاحين واذا يت عالمشاكل والصعوبات كل المراحل جذي تعب في تعب ومافي احد مرتاح بشغله لازم نكررف اما اذا مو حابه الاطفال ولا هالمجال صعب تمشين بعدين

 

[متجولة *]

رد: عاجل

فكري بالوظيفة والراحة فيها مو الدراسة لانة الدراسة كلها اربع سنين وتعدي اما الوظيفة عمر

وظيفة معلمة لروضة كرااااااااااااااااااااف (طول الدوام قاعدة محبوسة مع الاطفال) عكس معلمات المراحل الثانية حصتها وبس
وهذا الشيء يضيق الخلق
اما مميزاتها طلعة مبجرونعطل قبل المراحل الثانية

 

[ضحكة بريئة]

ابي استشيركم؟؟؟

السلام عليكم
بغيت استشيركم في موضوع يخص اختي
هالسنة متخرجة من الثانوية وتبي تخصص رياض اطفال أو مكتبات
انا رياض اطفال ما عندي فكرة عشان افيدها
وقلت مالي الا ابلاتنا في كويتيات
هل تكون مطالبة بتحضير يومي والا اسبوعي ؟؟؟
وباستمرار تسوي وسائل ؟؟؟
وشنو السلبيات والايجابيات في رياض الاطفال ؟؟؟

ومشكورين
وفي انتظار ردودكم

 

[خمريه]

رد: ابي استشيركم؟؟؟

لا لا تتخصص رياض اطفال وربي تعبت مو طبيعي ومافي تقدير هذا غير اولياء الامور وقلت ادبهم مع المعلمه
اللهم بلغه اللهم فشهد
والله لو رجع فيني الزمن ما ادش رياض اطفال
خليها تستخير والله ان رياض اطفال اكبر مشكله ممكن تحطها بطريقها

 

[ضحكة بريئة]

رد: ابي استشيركم؟؟؟

لا لا تتخصص رياض اطفال وربي تعبت مو طبيعي ومافي تقدير هذا غير اولياء الامور وقلت ادبهم مع المعلمه
اللهم بلغه اللهم فشهد
والله لو رجع فيني الزمن ما ادش رياض اطفال
خليها تستخير والله ان رياض اطفال اكبر مشكله ممكن تحطها بطريقها

خمرية كلامج ما يشجع :0bee2e8d89:
ومشكووووووورة بعد عمري ما قصرتي

 

[cancel]

رد: ابي استشيركم؟؟؟

رياض اطفال يبي وحده تشتغل وبالها طويل مع الاطفال وعندها افكاار بس هذا المطلوب بس ع فكره قريت بجريدة الوطن خبر ان الديوان او الوزاره تطلب من التربيه الاساسيه والجامعه انها تصك هالقسم لان عندهم الي يكفيهم

 

[ضحكة بريئة]

رد: ابي استشيركم؟؟؟

رياض اطفال يبي وحده تشتغل وبالها طويل مع الاطفال وعندها افكاار بس هذا المطلوب بس ع فكره قريت بجريدة الوطن خبر ان الديوان او الوزاره تطلب من التربيه الاساسيه والجامعه انها تصك هالقسم لان عندهم الي يكفيهم

مشكوررره ما قصرتي

 

[خمريه]

رد: ابي استشيركم؟؟؟

ابرك خل يصكونه بايخ