شتسوين لو صارلج هالموقف ؟؟

[*الحالمه*]

السلام عليكم و رحمة الله و بركاته


بنات ديرتي

خوااااااااااتي

حبيباااااااااتي

احنا ليش صرنا جذيه !!!

ليش ما قمنا نحترم بعض .... ليش صرنا وقحين و تصرفتنا اوقح

بتقولون شسالفه ؟

آنا أقولكم

امس كنت رايحه البنك بسحبلي جم فلس و منها عالسوق ^_^

و طبعا كالعاده روحة السوق تونس و تخلي البسمه شاقه الحلج ===<< بنااااات ما ننلام هههههه

المهم كان في كذا واحد تقريبا شخصين و انا و اختي وراهم

خلصوا هالاثنين و توني بدش جاااان اشوف وحده بمنتهى الوقاحه

تقول لرفيجتها او اختها اللي وياه " اوووف منج دشي ما عليج منهم "

بالله على اي اساس تطوفين الدور و تلطعين الناس اللي وصلو قبلج

لا و بكل قلة ادب تعلين صوتج و تقولين هالحجي !!!!!!!!!!!!!!!!!!!!!!!!!!!!

و الله شي يغث و يبط الجبد

طبعا انا ما سمعت شي من اللي قالته بس اختي سمعتها و قالت لي

و بعد ما سحبت و خلصت و احنا طالعين عطيتها ذيج الخزه اللي تعجبها ==<< عن تجربه النظره

تكفي و توفي عن مليون كلمه تهز البدن ^_^

السؤال اللي يطرح نفسه ؟

وين الاخلاق ..... وين التعامل الحلو ....... وين الاحترام

انا ما اعمم بس هالشي صار لا يطاااااق

شراااااااااايكم باللي صار لي ؟

و هل صادفتوا مواقف مثل جذي ؟

و شنو كانت ردة فعلكم ؟ و شلون تصرفتوا ؟

 

[روزالكويت]

مشاركة: شتسوين لو صارلج هالموقف ؟؟

الحالمه موبس بالاماكن اللي تصفين فيها دور لو تلاحظين حتى الموظفات بالدوائر الحكوميه معاملتهم زفت طبعا مانعمم بس مادري ليش الحريم صايرين اي شي حتى مره وحده قطت كلمه وقحه ماتنقال ابدا جدامى على زميلتها عبالج سكتت لا وربي رحت لمسؤواتها وشكيت على الفاظها شنو هذيلا شوهوا سمعة بلد كامله عيب احنا كويتين ولازم نعطى صوره راقيه وحظاريه عن ديرتنا واتمنى انج ماسكتى ووقفتيها عن حدها اذا هى اهلها ماربوها عادى نربيها احنا مره ثانيه ولا نسمح حق هالسلوكيات تنتشر مفروض فشلتيها عشان تاخذ درس
لو ماخذتنى معاج جان سنعتها اخخخخخخخخخخخ هههههههههههههاى

 

[اخت نااني]

مشاركة: شتسوين لو صارلج هالموقف ؟؟

اختي دايم الاحظ هالتصرفات وانا عدي اقطها بالوجه عادي


ما يهمني لان اذا اهي مو محترمه الناس ليش احنا نحترمها...............!

 

[on line]

مشاركة: شتسوين لو صارلج هالموقف ؟؟

سبحان الله نفس المواقف تتكرر مع الكل بس تدرين يعني شنو هالحركات الواحد لمن يصير ضعيف شخصيه يحب يثبت انه قوي بهالحركات يعني تتفيخر الوحد لمن تدش بوموعدها مثل تقول زرقت قبلهم استغليت فرصه وسحبت اودخلت علي الدكتور بسرعه ولا وقفت بالدور ذكرتيني مره بموقف بالاتصالات رايحه ادفعمكالماتي وجان يصير دوري الا هالادمي اللي نفز جدامي ويقوله الموظف الاخت قبلك تو الناس علي رقمك قال اخذ بس ادفع مكالماتي انا مستعجل
قاله الموظف لا ماراح ادفع احترم الدور تخيلي موقفي انا
طبعا استحيت لولانطقت قالي الموظف لازم اهي قبلك
سالني قالي ممكن ادفع قبلج قلته تفضل عصب الموظف ليش وافقت وشوي يطقني وقالي ليش خفتي
قلتله شتبيني اسوي خل يدفع بس حسيت احرجته لانه قاله لاماراح اخلصك واخذي من هالسوالف
ولوتلاحظين النفسيات اعوذ بالله صايره شراره عسي محد تكلم بيتهاوش صراحه مواقف محلرجه واجد بس اللهم المستعان

 

[حبنا الله عليه]

مشاركة: شتسوين لو صارلج هالموقف ؟؟

اي والله وانتي صاجه اكثرت هالسوالف بالدوامات بالأسوقه بالطبيب أبد ماكو ذوق تتكلمين تتحلطمين تزفين ماكووووو احساس وخاصةً الحريم طبعا موكلهم في ناس ذوق وتحترم <<<< مثلي

 

[لازوردي]

مشاركة: شتسوين لو صارلج هالموقف ؟؟

انا اذا شفت ريال كبير او مره كبيره اخليهم يوقفون جدامي ويخلصون امورهم قبلي احتراما لهم ولسنهم وحتي لو اهم ماقالوا انهم يبون يوقفون مكاني اسألهم انهم يروحون يخلصون قبلي و لوكان جدام ناس موكبار ويدرعمون لا عادي اطنش واعاند واروح اكمل دوري واذا سألوا انهم يبون يخلصون قبلي ارد عليهم واقول لهم كل واحد و دوره وبس واطنش ولا اخلي احد منهم ياخذ مكاني اعاند.............. كيفي نحيييسه

 

[شهدQ]

مشاركة: شتسوين لو صارلج هالموقف ؟؟

صاجه حبيبتي بالمستوصفات باماكن الانتظار

وايضا الناظرات قاثاتني وباطين جبدي صج ماودك تولاك مره <<<<<<<<<<حلوه ايضا

 

[*الحالمه*]

مشاركة: شتسوين لو صارلج هالموقف ؟؟

الحالمه موبس بالاماكن اللي تصفين فيها دور لو تلاحظين حتى الموظفات بالدوائر الحكوميه معاملتهم زفت طبعا مانعمم بس مادري ليش الحريم صايرين اي شي حتى مره وحده قطت كلمه وقحه ماتنقال ابدا جدامى على زميلتها عبالج سكتت لا وربي رحت لمسؤواتها وشكيت على الفاظها شنو هذيلا شوهوا سمعة بلد كامله عيب احنا كويتين ولازم نعطى صوره راقيه وحظاريه عن ديرتنا واتمنى انج ماسكتى ووقفتيها عن حدها اذا هى اهلها ماربوها عادى نربيها احنا مره ثانيه ولا نسمح حق هالسلوكيات تنتشر مفروض فشلتيها عشان تاخذ درس
لو ماخذتنى معاج جان سنعتها اخخخخخخخخخخخ هههههههههههههاى

زين سويتي فيها خل تتأدب شوي ^_^

خلاص روز اي مكان اروحلها راح اخذج وياي ههههه

يعطيج العافيه حبيبتي على ردج الحلو

 

[*الحالمه*]

مشاركة: شتسوين لو صارلج هالموقف ؟؟

اختي دايم الاحظ هالتصرفات وانا عدي اقطها بالوجه عادي


ما يهمني لان اذا اهي مو محترمه الناس ليش احنا نحترمها...............!

و الله ساعات يكون الحل الأفضل جذي

و ساعات لأ خصوصا اذا كان المكان في شباب و زحمه

شاكره لج هالرد حبيبتي

 

[*الحالمه*]

مشاركة: شتسوين لو صارلج هالموقف ؟؟

سبحان الله نفس المواقف تتكرر مع الكل بس تدرين يعني شنو هالحركات الواحد لمن يصير ضعيف شخصيه يحب يثبت انه قوي بهالحركات يعني تتفيخر الوحد لمن تدش بوموعدها مثل تقول زرقت قبلهم استغليت فرصه وسحبت اودخلت علي الدكتور بسرعه ولا وقفت بالدور ذكرتيني مره بموقف بالاتصالات رايحه ادفعمكالماتي وجان يصير دوري الا هالادمي اللي نفز جدامي ويقوله الموظف الاخت قبلك تو الناس علي رقمك قال اخذ بس ادفع مكالماتي انا مستعجل
قاله الموظف لا ماراح ادفع احترم الدور تخيلي موقفي انا
طبعا استحيت لولانطقت قالي الموظف لازم اهي قبلك
سالني قالي ممكن ادفع قبلج قلته تفضل عصب الموظف ليش وافقت وشوي يطقني وقالي ليش خفتي
قلتله شتبيني اسوي خل يدفع بس حسيت احرجته لانه قاله لاماراح اخلصك واخذي من هالسوالف
ولوتلاحظين النفسيات اعوذ بالله صايره شراره عسي محد تكلم بيتهاوش صراحه مواقف محلرجه واجد بس اللهم المستعان

حرام احرجتي الموظف ...

لو انا بمكانج جان ما طوفته ابد

بس مثل ما قلتي الناس صارت نفسياتها زفت

تشكراااااااات افندم على ردج

 

[*الحالمه*]

مشاركة: شتسوين لو صارلج هالموقف ؟؟

اي والله وانتي صاجه اكثرت هالسوالف بالدوامات بالأسوقه بالطبيب أبد ماكو ذوق تتكلمين تتحلطمين تزفين ماكووووو احساس وخاصةً الحريم طبعا موكلهم في ناس ذوق وتحترم <<<< مثلي

مو اهي المصييييبه انها من الحريم بس شنقووول

الله يهديهم بس

شكريااا خيتو اسعدني تواجدج

 

[*الحالمه*]

مشاركة: شتسوين لو صارلج هالموقف ؟؟

انا اذا شفت ريال كبير او مره كبيره اخليهم يوقفون جدامي ويخلصون امورهم قبلي احتراما لهم ولسنهم وحتي لو اهم ماقالوا انهم يبون يوقفون مكاني اسألهم انهم يروحون يخلصون قبلي و لوكان جدام ناس موكبار ويدرعمون لا عادي اطنش واعاند واروح اكمل دوري واذا سألوا انهم يبون يخلصون قبلي ارد عليهم واقول لهم كل واحد و دوره وبس واطنش ولا اخلي احد منهم ياخذ مكاني اعاند.............. كيفي نحيييسه

اكيد حبيبتي اذا كان الشخص كبير بالسن من الذوق ان نخلي

يطوف الدور او نساعده اذا كان بحاجه لمساعده

اما غيرهم فلا شاللي يجبرني على هالشي

وين احترام الناس و احترام الدور !!

مادري الناس شصاير فيها " مو الكل طبعا "

مشكوره خيتو على مرورج

 

[*الحالمه*]

مشاركة: شتسوين لو صارلج هالموقف ؟؟

صاجه حبيبتي بالمستوصفات باماكن الانتظار

وايضا الناظرات قاثاتني وباطين جبدي صج ماودك تولاك مره <<<<<<<<<<حلوه ايضا

و الله بكل مكان صاير هالشي

الله يهدي الناس ..صايريين جبارييت :d

شكرا شهووده

 

[نفنوف كشكش]

مشاركة: شتسوين لو صارلج هالموقف ؟؟

موبس جذيه ايبط الجبد اكو بنات مادري شيصير فيهم لمه ايشوفون بنات ثانين تستنفر اتقط كلام نفس ويهها ذاك اليوم راحه مركز سلطان وله وحده توقف جدامي اتقول حق ارفيجتها ويييييييييه طاع هاذي امصدقه روحها !!!!!! رديت عليها كلميتن ابعظمها لا اكثر هلقت فيها اشسوت عليج الحين !!!!!! معني ماحب ارد بس خليت كلامي بذونها ذكرا عشان كل ماتبي تتعرض حق بنت تذكر كلامي
وهم شغله اتبين شنو هالشخص ماعنده ذوق لمه ايسكر عليج ابسيارته او بالزحمه يطلع عليج من اللفه وغيرهاا من اشياء اتلوع الجبد

 

[كويتية أمورة]

مشاركة: شتسوين لو صارلج هالموقف ؟؟

اف انا شنو يبطون جبدي اللي جذي استغفرالله
ولا سالفة البنات اللي تسوي نفسها اسكت تتبع نظرية
خدوهم بالصوت قبل مايغلبوكو
لسان شطوله وصوت عالي ماجنها بنية قطع لا وتلقين كل شله فيها وحده هي الزعيمة عشتو هههههههههه
وفي حريم كبار جذي
والله ذاك اليوم انا مع اختي بالمارينا ولا نمر يم محل كامايو مانسمع الا وحدة تصارخ تزف الموظفين وتحذف البدي بويوههم!! اي شالسالفه لو هو شنو ماتصارخين جذي على كبر المجمع!!! وين الحيا مره شكبرج تصارخين وتزاردين شخليتي للهيلق؟؟

 

[همسات ليالي]

مشاركة: شتسوين لو صارلج هالموقف ؟؟

صاجه والله
الكل صاير متنرفز ونفسه عند خشمه

الله يعيني لا اطيح بهالمواقف لاني ما اعرف اتصرف

 

[bnt q8 in usa]

مشاركة: شتسوين لو صارلج هالموقف ؟؟

شنقول غير التربيه للاسف \ ناس ماعندهم شي اسمه اتيكيت ولا احترام

صارت فيني وايد بس انا من النوع الي اقطها اشكره اقولها في شي اسمه دور وجدامج اوادم

 

[تولين]

مشاركة: شتسوين لو صارلج هالموقف ؟؟

وووععععععععع هلاقه هالبناات .. الشباااب جنتل وصارووا احسن منهم ..

يا كثر ماصادفت من هالمواقف .. انا ساعات اطنش علشان مااخرب يومي على هالأشكال ..

 

[HoNeY_GirL]

مشاركة: شتسوين لو صارلج هالموقف ؟؟

واي اشكثر ناس جذي لا ذوق ولا اخلاق ولا احترام للي جدامهم قطيييييعه يبطون الجبذ
واشكثر صار فيني جذي انا ناطره دوري خاصه بالجميعه والمستوصف وتييه حرمه اشكبرها جنها ياهل وتدش قبلي لا احم ولا دستور ولو شنو مااخليها اصير نحيسه واحاسب قبلها لانه هالاشكال مو مال احترام كلش
ولا بالمواقف انتي طاقه اشاره وناطره انج بتوقفين اهني وتتيه وحده حقيره ابسرعه تصفط مكانج صج قله ادب
بس صج اذا انا عربانتي بالجميعه متروسه وراح اطول وشفت اي احد وراي كبير او صغير بيده بس جم شغله اخليه جدامي وفيه ناس بعد ذوق يسون جذي يخلوني قبلهم اذا بس عندي شغلتين واهم ايد

تخيلو بنات مره شفت حرمتين كبار مو صغار والله قاعد يتهاوشون عند الكاشير ليش هذي خذت مكاني عند النصر بالجميعه وصاحب المحل لووول قاعد يهديهم ويفجهم عن بعض واهم يتهاوشون والجميعه مترووووووووووسه اوادم والله اليهال احسن منهم فشششششششششله

وسوري على الاطاله بس منبطه جبذي من هالاشكال

 

[زيـنـه]

مشاركة: شتسوين لو صارلج هالموقف ؟؟

و الله يعتمد على الموقف بس قبل كل شي لازم الاستئذان .. يعني مثلا اذا شايب و الا عيوز اخليهم احتراما لسنهم .. واذا انا معاي شوية اغراض و ساعات غرض واحد وواقفه على الكاشير في جمعيه و الا محل استئذن اللي جدامي انا احاسب اول و اذا رضوا اوكي و اذا ما رضوا عادي اوقف بالدور .. يعني على حسب الموقف بس في ناس الله يهديهم بالهم مو طويل و يبيون يخلصون امورهم بدون مراعاة شعور الاخرين و بدون احترام و لو انا من اللي يخلصون لهم اشغالهم جان اردهم بالدور عشان يعرفون الادب ..

اي و ذكرت ساعات اللقافه لا حاسبتي بجمعيه مو جمعيتكم و ما عندج رقم مساهمه و لما تقولين للمحاسب ماكو رقم ينقز اللي وراج و يقول رقمه .. دام انه ما انطلب منك ليش اللقافه .. هالحركه كلش ما احبها .