سمبووووسه ادري بتذبحيني بس خلاص بنروح فينا زلمسي ميونخ جواب نهائي

[حاااايره]

مرحبااااااااااااااااااااااااا


انا هالسنه سالفتي لا عالبال ولا عالخاطر

اول شي العام ماسافرت وكنا مخططين هالسنه لسفره حلوه ولدت وزوجي خون فيني قال ماعندي الا 1500 انا هني توهقت قلت ياربي اروح وين وييين ويييييييييييييييييييين نزلت موضوع استفسر اللي اهو هذا
http://q8yat.net/showthread.php?t=163807


عقبها الميزانيه زادت اللهم بارك صارت 2000 وكنت ناويه اروح بوكيت وبانكوك وهم نزلت موضوع استفسر اللي هو هذا
اhttp://q8yat.net/showthread.php?t=166316

بس زوجي مايبي تايلند حر وخيسه وبوكيت مفاصيخ على قولته >> وهم انا اغااار عشتووووو:dddds:






المهم يا طويلات العمر الحين هم الميزانيه زادت مو احنا بالقطاره صارت 3000 >>> ماكان من الاول:ggdw:



وقررنا نروح فينا زلمسي ميونخ 14 ايام >>> والله ان قلتو ما يكفي بذبحكم:eh_s(14):

مو تعقدت كلا مايكفي اول ال 2000 اوووووووووووووه الحين تايلند ماتودي


الله يسلمكم التذاكر والسكن حصلناه اثنينا 1200

بقى 1800 للصرف قولو يوميا 100 اذا الاكل فاست فوود يبقى 400 تشري شغلات بسيطه صوغه ماصوغه



لااااااااااااااااا تصدموني بكلمة مايكفي ترا عقدتني هالكلمه وخلاااص هذا قصى حد مانقدر نزيد عليه بسااااااااااااافر مليت

وعطني رايكم وين اروح والاماكن الحلوه


شدي حليج يا سمبوسه ومشكوووووووووووووووووووووووره حبيبتي على تفاعلج مع مواضيعي الله يوفقج وينولج اللي فبالج ياااااااااااااااااااااااااااااااااارب



سلاااااااااااااام حبايبي

 

[سمبوسة]

ههههههههههههه
يالله على البركة حياتي قوليلي كل ديرة كم يوم عشان أقولج الأماكن بس أرد أقولج فيينا وزلمسي غاليين شوي وشلون الفنادق انشالله زينة؟ أنا أعتقد يكفون انشالله واذا عندج شك قللي الأيام أو خليها كلها ميونخ تصير الفلوس رااهية وما قلتيلي المواصلات الداخلية يعني القطارات محسوبة مع الباكيج والا عليكم؟

 

[حاااايره]

الله يبارك فيج حبوبه

شوفي هالعرض لقيناه بسفريات الرابيه اليوم اهو بس تذاكر وسكن وريوق والفنادق مدحهم اخوي لنا كان ساكن فيهم العام يقول قريبه ومستواها حلو

بس القطارات والله مادري اتوقع علينا لان زوجي مفكر يأجر سياره كل ربعه جذي يقولون سهله معني اتوقع العكس لان الحبيب ميييييييح بالانجليزي لا ويقولون اللوحات مو بالانجليزي اخذ خريطه >> يبي يوهقنا

والايامقالي زوجي ناسيه بس كأن 4 زلمسي 4 فينا والباجي ميونخ

اهو الحين نايم لاقعد تأكدتلج منه


انتي عطيني رايج وهم قسمي الايام شتشوفين احسن والاماكن بعد

واذا المده واجد عالميزانيه مو مشكله نخليها 10 ايام

 

[سمبوسة]

ما أدري شفيه السايت يفصل بالليل!!!
شوفي السيارة بتنفعكم أكيد بس مو في المدن لأن كل شي قريب وياخذون فلوس على المواقف وما تحصلون أصلا مسافط يعني اخذوها لطلعة من فينا لما زلمسي وتحتاجونها بزلمسي وبعدين اول ما توصلون ميونخ سلموها هناك وخلكم على القطارات أرخص بس اذا ما تعرفون انجليزي مشكلة كبيرة!! ويقدر ياخذ معاه جهاز أو ينزل من الانترنت خريطة بالعربي لأوربا حق الجيرمن أو الجي بي اس بس ما أدري ما أفهم وايد بهالسوالف وسألوا عن الأسعار لأن أعتقد ان اجار السيارة وايد والبنزين التفويلة توصل ثلاثين دينار!! القطارات وايد أرخص وبعض السفريات تحطها بالباكيج
شوفي فيينا ما فيها طبيعة بس تمشي وأسواق
أول يوم روحوا ساحة ستيفينز وشارع كارتنر انا ما أدري وين فندقكم بس اذا قريب روحوا مشي واذا بعيد بالاندرقراوند لااازم تتعلمون عليه شوفي ريلج اذا عنده فكرة عنه
المهم هالساحة فيها سوق ومطاعم وكافيهات وراح تكون وجهة يومية للغدا أو العشا فيها طبعا مكدونالدز ومحلات شاورما ومطعم سي فود اسمه نوردسي وتلاقين فيها عروض طول اليوم وايد ونيسة تمشي فيها واخذي لفة بالحنطور يمشيج على الأماكن التاريخية و شوفي الكنيسة وبالليل روحوا مدينة ملاهي اسمها براتر فاتحة لما 11 بالليل بس لا تطولون خلوا ردتكم على العشر آمن لكم طبعا الروحة بالاندرقراوند حجزوا تذاكر يومية أو 3 أيام ب13 يورو للشخص هذي اللي احنا خذيناها أو فيه تذكرة اسبوعية على حسب قعدتكم وتستخدمونهم قد ما تبون باليوم
ثاني يوم روحي برج الدانوب الصعدة ب5 يورو للشخص وفيه مطعم فوق وتحته حديقة كبيرة تمشوا فيها لما العصر بعدين روحوا شارع ماريا هلفر عبارة عن سوق تمشوا وتعشوا
اليوم الثالث روحوا قصر الشنبرون اذا بتدخلين تشوفين القصر من داخل قصي تذكرة واذا تبين بس تتمشين بالحديقة بلاش وتقدرين تركبين قطار يلفج فيها ومعاه حديقة حيوانات اذا بتروحين ولما تخلصين روحي ستيفنز للغدا أو العشا وهذا اللي اذكره بفيينا فيها بعد حديقة شتاد بارك مثل الهايد بارك المهم تقدرين تتمشين بساحة ستيفنز كل يوم ما تملين عروض وزحمة
واذا بتروحون زلامسي بالقطار حجزوا قبلها بيوم من محطة القطار وشوفوا الرحلة دايركت والا تغيرون القطار بمكان ثاني واذا بالسيارة بعد أكيد أونس

زلامسي طبيييعة وزحمة خليجييييين بتشوفين نص الكويت هناك أول يوم خليه تمشي على البحيرة وركبوا مركب ومروا مركز المعلومات اخذوا مواعيد الباصات حق الرحلات وبالنسبة للأكل فيها مكدونالدز ومطاعم ثانية تركية بس غالية شوي
ثاني يوم روحوا كابرون القمة الثلجية ياما بالسيارة اذا كانت معاكم أو بالباص تحجزين من الباص نفسه لبسي عدددل برررررررررررد موت واخذي معاج دسوس وجاكيت وشمسية لأن اذا ما خذتيهم فيه محل هناك يبيعهم ناااار وتوصلون مكان تركبون منه بالتلفريك للثلج آخر تلفريك الساعة 5 فانتوا طلعوا من الصبح ولما تردون تمشوا على البحيرة لما الليل
ثاني يوم روحي الزحلاقية الصيفية مو بعيدة يمكن عشر دقايق وناااسة تركبين على ريولج وتنزلين فيها من الجبل بتشوفين الحريم بنقاباتهم راكبين
ثالث يوم روحي الشلال كريملر شلال كبير وتمشي بالطبيعة
شوفي زلامسي صراحة طبيعتها خيال بس عيبها شوي غالية لأن مستغلين سالفة العرب فحاولي تخلين أكلج فيها فاست فوود وشوفي الرابط هذا وطبعيه وحطيه بفايل وخليه معاج انا وااااايد فادني يزاه الله خير
http://travel.maktoob.com/vb/travel131495/
وميونخ قلتلج سابقا جدولها وبعدين انشالله بشوفلج الأشياء الثانية اللي نسيتها ولزم تتعلمون على الاندرقراوند وباوربا كلها اذا عرفتي حق واحد راح تعرفين الكل نفس الفكرة
ومثل ما قلتي خلي مصروفكم ما يتجاوز ال100 دينار باليوم يعني حدود 300 يورو فيه أيام بيقل عن جذي بوايد خاصة اللي بتكون داخل المدن الأكل ما يتعدى 30 يورو وتذكرة الاندرقراوند وشغلات بسيطة ما تتعدى ال100 باليوم وفيه أيام مثل اللي فيها رحلات وتنقلات بين المدن بتزيد عن هالمبلغ يعني انتي وازني الأمور وخلي التسوق آخر شي بميونخ اذا زادت الفلوس

 

[سمبوسة]

شوفي سألت ريلي عن الأكل اليوم وقاللي الوجبة بمكدونالدز أو برجر كينج 7 يورو للشخص يعني حدود 3 دنانير الاثنين 6 دنانير واذا بتزيدون سلطة وغيره قولي عشر دنانير غدا وعشرة عشا هذي عشرين دينار باليوم للوجبات والريوق طبعا بالفندق تأكدي أول اذا مع الريوق والاندر قراوند 13 يورو بفيينا حق 3 أيام يعني شخصين 26 يورو هذي عشر دنانير للمواصلات بفيينا طول الوقت باستثناء التاكسي من المطار لما الفندق أعتقد بأربعين يورو والباجي راح يكون مصاريف بسيطة من تذاكر متاحف وملاهي شي بسيط يعني ولا تتسوقين من فيينا الا بس كاكاو لأن ما فيه مثله بميونخ
أول ما توصلين فيينا أو أي مكان روحي الجمعية بفيينا اسمها بيلا اشتري كولا وعصير وخفايف وخليهم معاج بالفندق والا الرحلات على فكرة بفيينا ما يعطونج كيس بالجمعية لازم تشترينه بس ميونخ لأ عادي والماي بالنمسا فيه غازات فلازم تعرفين اللي ما فيه لما تقرين الموضوع اللي قتلج عليه بتعرفين الفرق وانا أفضل تاخذين كم بطل من الكويت حق النمسا لأن مايهم مو حلو وما يروي بس ميونخ لأ فيه افيان وفولفيك النمسا ما عندهم غير مالهم واول ما توصلين الفندق خليهم يفضون الثلاجة وحطي أغراضج أريحلج
ضروري تسوين نسخة للحجوزات سبحان الله ساعات يزيدون عليكم الفنادق أو يقولون مو مع الريوق فانت خلي معاج نسخة للضرورة
وبعد نسخة للجوازات فيه بعض المحلات يطلبون صورة للجواز مثل محلات التليفونات اذا بتفتحون خطوط
في ميونخ ضروري تروحين الأماكن اللي قلتلج عنها مثل قارميش والبحيرة الثانية والقصر والا ما راح تحبينها لانها مدينة عادية اللي يميزها الطبيعة اللي حواليها فلازم تشوفين هالأماكن
الجمعيات بميونخ موجودة بمحطة القطار الرئيسية اسمها hoptbanhof هي اصلا يم السوق وما تسكر الا على ال11 بالليل وبالسوق المحلات الكبيرة تكون فيها جمعية بالسرداب ويم محطة القطار مطاعم تركية الشاورما على 3 يورو
أكثر مكان بياكل الفلوس زلامسي لأن كلها رحلات بس تسوى بصراحة وانا أفضل تقللون الأيام عشان ما تحاتون الفلوس بس انشالله تكفي من غير سوق ومو تكاسي ,التكاسي بس من والى المطار وبببس ولا تركبون مع العرب ترى بيتلقفونكم بالمطار روحوا مكان التكاسي العادية ,العرب بياخذون 80 يورو والتكاسي 35 يورو حرااام
اخذي معاج هدوم شتوية العام كان برد ومطر وقبل العام كان حر فالله عالم السنة شلون بس اخذي احتياط عموما بالليل برد
مثل ما قلتلج طبعي الروابط اللي حطيتهم وايد مفيدين بتحسين كأنك رايحة من قبل وما تضيعين
خلي جناطج متوسطة مو كبيرة علشان ما تعابلون بالقطارات
اول ما توصلون فيينا وميونخ اخذوا خريطة الاندر قراوند من الفندق من(الكونسيرج) وكل يوم سالوا عن المكان اللي بتروحون له وهو يأشر لكم على الخريطة وين تنزلون من الاندرقراوند (الله يعينج لاااازم انجليزي عدل)
فيينا عندهم شي اسمه فيينا كارد تزيدين شوي على تذكرة الاندرقراوند وتحصلين خصومات على تذاكر الدخول بأماكن ثانية انا ما فادتني وايد وانت كيفج
وهذا رابط بعد مهم طبعييييه
http://travel.maktoob.com/vb/travel42263-2/
وهذا بعد وترى اذا فهمتي على الاندرقراوند من شرحهم راح تعرفين حق ميونخ لأن نفسالفكرة بالضبط
http://travel.maktoob.com/vb/travel53153/

وهذا اللي أذكره ألحين

 

[LUXURY]

هلا الحايره
ازيييييك يا بت؟؟ يا رفيقة درب الحمال لوووول والله ايام حلوه

شكلنا الظاهر كلنا ماكلين رياييلنا عالسفر
انا بعد حملت اول زواجي وزهقققققت الحين من الديره عقب النساة والثقل والنفاس
فكرت اروح زلمسي بس ميزانيتنا ما اعتقدر تكفي
فراح ارضى باسبوعين ماليزيا مع باكيج شهر العسل عشان اتدلل واونس عمري لان ماسافرت شهر عسل ولا عرس ولا استقبال ولا استقبال ولاده مهضووووووم حقي لووووووول

الله يوفقكم ويسهل دربكم
بس ماقلتي بتاخذين صيفي والا تخرجتي؟؟ واذا ماتخرجتي بتروحين قبل الصيفي والا بعده؟؟
انا ا شاء الله عقب الصيفي

 

[MissChoco]

حااااايره حبيبتي بلا بتكفيج .. بس ليش ماتشوفون سفريات لانه ارخص التذاكر بالاسبوعين


وشوفي حبيبتي مو كل يوم تاكلين ماك وهالسوالف .. وساعات يصير غداج اهوا عشاج


واذا بتاخذون سياره احسلكم انتو الي بتستفيدون ..

 

[تمر حنا]

ماشاء الله بسبوسه قالت لج كل شي والمصروف صدقيني بيكفي وزياده والباجي باخر يوم طلعي حرتج فيه بالتسوق بس تاكدو متى تخلص مباريات كاس اوروبا لانها بالنمسا ورحله سعيده ولاتغيرون رايكم بعد

 

[غيـ الناس ـر]

السياره وااااااااايد مفيده بس هناك سياقتهم غير عننا ..

ولا ينسى يطلع رخصه دوليه من الكويت وله ما يخلونه يأجر ..


ولا تنسون بعد تتعاملون معاهم من الكويت خل يدش سايت التأجير مال بره ويحجز السياره ويشوف اسعارهم ..


والله يسعدج يا وخيتي

 

[ChOcoLaTe 'n MarShMaLlOw]

المانيا حلوة خاصة ميونيخ ...

اول شي لا تأجرون سياره الا حق المطار بالروحة و الرده .. و خلي الباجي بالاندرقراوند اشتريليج انتي

و ريلج تذاكر مفتوحه حق اسبوع كامل شامله الاندقراوند و الباصات

و اخذي الخريطة من محطة الاندقراوند ز ضبطي طريجج .. متى تنزلين من الاندقراوند و تروحين محطه ثانيه اول شي

راح تحسينه صعب بس و الله عادي سهاله و اذا ظيعتوا سألوا اي اح وياكم بالاندقراوند راح يساعدكم ترا الناس حدهم

فرندلي و طيبين ...

شوفي المناطق اللي تقدرين تروحيلها سالزبرق و قارميش بعد شنو و الله هذا اللي ذاكرته

الاماكن : اوليبك بارك .. ليقو لاند حق يهال بس هم تقدرون تروحولها تونس .. دتش ميوزيم حده يونس و كبير

روحي ارينا (( ملعب )) .. وايد قصور عندهم .. لا تروحين انجليش قاردن الناس هناك يسون صن باث .. بعد روحوا كهف

الملح صج وناسه

روحي ال Outlet هذا اشوي بعيد .. بس كله استوكات الماركات و عليهم خصم .. مولاتهم مو كبيره ..

عندهم بوتيكات و محلات اللي تصير يم بعض ب (( MarinPlatz )) و الشارع الي يمه سطرة محلات ماركات

ديو .. ر قوتشي.. ال في .. فالنتينو .. جي اف فري .. الخ

مطاعمهم .. الالمانيه .. مو شي كلش لا تجربينهم ... اما على الفاست فود برجر كنج و ماك و هالسوالف يعني

الوجبه تطلعلج على 3 - 4 دنانير .. روحي مطعم تركي في اخر الشارع مال مارين بلاتس عندهم شاورما لذيذه بالاودين بلاتز

و على الماي عندهم فولفيك و ايفيان .. مايهم لازم فيه ستيم .. قوليلهم STILL WATER


و اذا بتروحون النمسا (( زل ام سي )) روحوا بالقطار .. ميونخ وايد ارخص من النمسا بس روحوا مصنع سواروفسكي

و روحوا رحله الشلالات .. و الله نسيت ما اذكر بعد شنو

هذي خريطة الاندقراوند مالت ميونخ

U: Underground

S: Subway

شوفيها و المربعات البيض هذول المحطات اللي راح يوقف فيها الاندقراوند

و اي سؤال انا حاظره

 

[حاااايره]

وااااااااااااااااااي بعد عمري سمبوسه من صج ما قصرررررتي كل اللي قلتيه طبعته وبخشه لا سافرت ----->> انشالله

وترا زوجي ميييح انجليزي بس انا انجليزتي جيده جدا مو ممتازه بس افهم عدل الحمدلله لكن الاندرقراوند جنه جنه بوهقنا



لاكسري شفتي شلون

لا انا ماتخرجت باقيلي صيفي واول ميداني والسفره لى اول 8 انشاءالله


مس كاكا انشاءالله تكفي
بس ليش السياره احسن برايج؟


ضحى اي والله ماقصرت سميوسه بعد مري

ولاتخافين ماراح نغير انشاالله بس صج بزيد ؟؟؟

مااعتقد بس ياليت




غير الناس يسلمووو يا عسل اي قالولنا عن الرخصه الدوليه مني مو مقتنعه بالسياره







شوكالاتا يسلمووووووووووووووووووووووووو ياعسل صج استفدت منج وبسجل الاماكن اللي قلتي عنها
بلس الاندر قراوند صعب على الله ما نتوهق معني اعرف انجليزي انشاالله نتعلم له بسرعه

واسألتي حاليا ماكو بس بعدين ممكن أسألج


يسلمووووو حبايبي

 

[سمبوسة]

شدعوة يا قلبي انا ما سويت شي والناس للناس
بحاول أشرح لج للأندرقراوند بس انا مو زود بالشرح أشوة ما صرت مدرسة بس اللي أقدر عليه بقوله وانت اقري الروابط من منتدى العرب المسافرون حاطين الشرح مع الصور والاخت شوكيت اند مارشميلو ماااا قصرت على الخريطة انا ما كنت عارفة أحطها
أول شي تقدرين تاخذين تذكرة حق اسبوع عائلية وتفكين روحج أو تذكرة يومية ب9 يورو , من وين تشترينها؟ يا اما من شباك التذاكر من محطات الاندر قراوند أو من ماكينة تلقينها في كل مكان في محطات القطار ماكينة زرقة كنها مالت البنك تروحين عندها تختارين اللغة الانجليزية بعدين هم حاطين الخطوات يختارين اللي تبين وتحطين فيها الفلوس وتطلع لج التذكرة بعدين لااااااازم تختمينها من جهاز أزرق صغير موجود عند دخلة الدرج (موجودة صورته بالرابط اللي قلتلج عنه) عقب حطيها بجنطتج وما احد يسأل عنها
طريقة الاندرقراوند بسم الله
أول شي طبعي الخريطة وخليها جدامج ومشي معاي ولازم تقرين هالكلام مرة ومرتين وثلاث يالله تدش الفكرة

فيه خطوط كثيرة للاندرقراوند فيه خط u وخط s والفرق بينهم انه واحد فوق وواحد تحت وواحد يروح أماكن معينة الثاني ما يروح لها فانت تشوفين وين بتروحين وتسألين الفندق وهو يقولج أي خط
عقب لازم تعرفين انت موجودة بأي محطة يعني خل نقول موجودة بمحطة القطار الرئيسية اسمها بالخريطة DB شفتيها؟هذي اللي عندها كل الألوان لأن كل القطارات تمر فيها. وتبين تروحين بحيرة شتانبيرج stannberg هذي بتلقينها على خط s 6 الأخضر شفتيها؟اسم الخط مكتوب بنهاية كل خط اوكي شلون تعرفين انه القطار رايح لها شوفي اللوحة اللي على الدرج قبل لا تنزلين يكتبون المسارات كلها وفيه درج ينزل حق اللي رايح ودرج ينزل حق الاتجاه المعاكس . طيب انتي شلون تفرقين بينهم؟ انا أقولج كل خط يتسمى بآخر محطة فيه يعني خلينا على ال s 6 مشي بصبعج على الخريطة معاي يكون اللي رايح اسمه S6 KereuzstreBe هذي آخر محطة فيه والاتجاه المعاكس اسمه S6 Tutzingاللي هي آخر محطة بالاتجاه المعاكس والمربعات البيضة الصغيرة اليي يمها كلام هذي المحطات اللي بيوقف فيها بالطريج فانت مثلا موجودة في محطة الDB اللي بنص وبتروحين البحيرة شتانبيرج اسم محطتها Stannberg فانت راح تركبين خط S6 Tutzing الأخضر وبيوقف بكل المحطات اللي مكتوبة جدامج بس انت ما راح تنزلين الا لما يوصل محطة شتانبيرج فهمتي؟ وبالردة راح يكون اسم الخط S6 KreuzstreBe وراح تنزلين في محطة DB اللي أصلا جيتي منها
ونفس الفكرة حق كل مكان , تسألين اللي بالفندق عن أي مكان بتروحين لها وهو يأشر عليه بالخريطة فتشوفين على أي مسار ونفس الفكرة بعدين

طيب فيه أماكن لازم تغيرين محطة شلون يعني ؟ انا أقولج مثلا فيه مكان خل نقول حديقة الانجلش جاردن يروح لها قطار اسمه u3 مثلا وانت المحطة اللي انت فيها ما فيها قطار u3 شتسوين؟ تركبين أي قطار يودي على محطة ثانية فيها u3 وتنزلين بهالمحطة وتاخذين القطار u3 حق الحديقة

أدري يا قلبي بتحسين انه صعب وبتتعقدين بس والله من أول مرة بتعرفينله وبتشوفين انه سهل ومنظم وسألي أي احد اذا ضيعتي الألمان حليوين ويساعدون حتى لو ما يعرفون انجليزي
مثل ما قلتلج اقري أكثر من مرة بشويش واقري الروابط ملوت العرب المسافرون معاهم صور فراح تفهمين أكثر
وبحط لج المحطات المهمة الي فيه

marinplatz هذي السوق وتمر فيها كل الخطوط يعني ما تضيع ركبوا اي واحد وبيمر عليها
olimpic zentum هذي الحديقة الاولمبية على خط u3
والبحيرة اللي قلتلج s6
والقصر نيفينبيرج راح يكون بالترام اللي هو جنه باص معلق بوايرات بنفس التذكرة ونفس الفكرة بس مو اندرقراوند لأ على الأرض بالترام
قارميش وسالزبورج بالقطار مو الاندرقراوند تذكرته غير تحجزون من كشك التذاكر مكتوب عليه information والقطارات بتشوفينها بالمحطة الرئيسية كنها مطار كلهم واقفين وعندهم أرقام يعني مثل البوابات بالمطار يقولون لكم مثلا قطار 22 وتروحون على مكانه وتركبون والله يسهل عليكم انشالله

 

[سمبوسة]

حبيبتي حايرة شخبارج؟؟؟
سكتي يا وخيتي اليوم قاعدة أوري حماتي شريط الفيديو مال ميونخ لأنها ناوية تروح الله يسهل عليها والا أتذكرج تدرين ليش؟ شفت الانجليش قاردن بنات منسدحين على العشب بالبكيني!!وتذكرتج على طول:dddds: قلت ويي لا تروح وتدعي علي بعدين :0bee2e8d89:
انا ما أدري شلون ما شفتهم انا من النوع اللي ما يلفتون انتباهي كللش <<<زين ما انسدح يمهم :dddds:

المهم خلاص شيليها من الخطة مع انها حلوة وببلاش بس يالله

المهم لقيت لج بدالها أماكن ثانية انا ناسيتهم عندج بحيرة tegrensee ساعة وشوي بالقطار من ميونخ طبيعتها روعة ولااازم تركبين مركب تحجزين منه لما تركبين ويمشيج بين الجبال وفيه جاي ويرد وهالسوالف

وعندج مصنع شواروفيسكي هو بالنمسا بس تروحين له من ميونخ ساعتين بالقطار حق مدينة innsburug أو شي جذي ومنها باص خاص بالمصنع يوديج له وااايد حلو

وريلي نبهني لنقطة تذاكر الاندرقراوند صح العايلة 5 أشخاص ب 9 يورو باليوم بس الشخص الواحد بروحه ب3 يورو يعني لو تاخذين انت وريلج كل واحد تذكرة بروحه بتطلع عليكم 6 يورو يعني أرخص من العائلية وانت سألي أول ما توصلين أحسن
وبس لي تذكرت شي ثاني أرجعلج

 

[حاااايره]

ههههههههههههههههههههههههههههههههههه
هههههههههههههههههههههههههههههههههههههههههههه


والله ضحكتيني لا ماعليج بروووووح عادي


وثانكس على كل شي كتبتيه ياااااعسل انتي