قصه خياليه و مافيها اي شخصيه حقيقيه و ردودكم و رايكم و تفاعلكم صج صج يسعدني و يشجعني فلا تقصرون بالرد لو بكلمه
في بيت عربي قديم بالجليب
سلمى و اهيه تبجي : يمه مابي اتزوج الله يخليج بخلص الثانويه
ام سلمى :ماادري عاد تبين تخلصين الثانويه شتبين اتصيرين حتى الجامعه ما تقدرين تدخلين ولا نسيتي يابنت الباشا انج بدون
سلمى: يمه انا عمري 15 سنه حرام عليكم
امها :وشنو يعني انا بعمرج عندي ياهلين
ابوها من الحوش يصارخ :سلموو اكلي تبن و عن البجي يلا عاد تحمدي ربج كويتي يبي يتزوجج باجر يرزج و يرزنا
سلمى تبجي و تطق على ويهها: مابي مابي
امها امسكتها من شعرها و سحبتها: سمعي تبين ما تبين هذا الي راح يصير تحمدي ربج الريال مرته ميته يعني ماعندج ضره و عنده خير ( بصوت واطي ) ياثوله باجر يشتريلج و يسويلج الي تبينه مو احسن ما تقعدين عند ابوج طاح حظه ما تقوليلي على شنو تبين تقعدين عنده يقومج بطراق و ينومج بطراق و 24 ساعه سكران تزوجي يايمه احسن لج من هالعيشه الوصخه
سلمى هدت شويه : يمه انا حتى ما شفته
امها :اتشوفيييينه و بتشبعين منه كلها يومين و تملجين صدقيني سلمو بوسالم ريال عنده خير انت تدرين هالبيت الي احنا فيه ماله و عنده بعد 4 بيوت غيره و عنده زرايب فيها خرفان و خير من الله تعوذي من ابليس و راح تعرفين ان هالزواج فيه مصلحتج و شدراج يمكن يخليج تكملين الثانويه مسائي و تدخلين الجامعه بعد لانج راح اتصرين كويتيه بعد جم سنه
بعد يومين بالمدرسه
سلمى تبوس رفيجتها حصه: راح تفقديني حصيص
حصه و اهيه تبجي: اكيد سلمى بس والله قلبي معورني عليج ادري انج مجبوره
سلمى :عادي بدنيتنا ما عندي خيارات وايد
حصه :و متى العرس
سلمى: باجر
سلمى بالغرفه دار مدارها خواتها ( عندها 5 خوات 3 متزوجات اكبر وحده عمرها 20 و باقي يهال عمرهم 7 سنوات و 5 سنوات )
لبسوها دراعه ضايعه داخلها و لبسوها عباة امها و ملفعها
ابو سلمى عند الباب :يلا خلصونا الريال ناطر بره
سلمى اطلعت من غرفتها و كل مافيها يرجف ما تدري شنو ناطرها
ارفعت راسها و صوت اليباب تارس البيت شافت شاوي غنم عمره 68 سنه يخرع و ريحته عفنه و لحيته طويله محنيه و دشداشه قديمه معفسه لونها اصفرو شماغ منتف حست ودها تنحاش بس مسك ايدها و طلعها من بيت ابوها و اهيه تحت الصدمه و الخرعه ركبها سيارته شفر قديمه مسكربه و بدون كلام مشت السياره مسافه طويله للصباحيه وقفت السياره عند بيت كبير مو جديد بس قصر بالنسبه لبيت ابوها
نزل من السياره و قالها :شناطره يلا نزلي
نزلت سلمى تمشي و تعثر بدراعتها الطويله و عباية امها
انفتح الباب باستقبالهم 4 حريم اصغر وحده عمرها 27 سنه و 4 رياييل
الراييل سلمو على بوسالم و قالوله :مبروك يبه
و الحريم قالوله :مبروك عمي
