السلام عليكم ورحمة الله وبركاته
شلونكم بنات ؟ إن شاء الله بخير ..
أدري لو أعتذر من اليوم لبكره ما راح يفيد إعتذاري بس وش اسوي قاعده اسوي اللي اقدر عليه بس هانت مابقي الا شوي وتخلص الروايه
واليوم جبت لكم جزء طويل إن شاء الله يعجبكم واعذروني عالقصور وربي متفشله منكم بس ما باليد حيله واخليكم الحين مع هالجزء واتمنى لكم قرأه ممتعه
بسم الله الرحمن الرحيم
الجزء الخمسون
في بيت ابو اصايل
دخلت اصايل على امها وسلمت عليها وخذت منها الاخبار والعلوم ودريت عن رفض العنود
اصايل : بروح اكلمها
ام اصايل : اقنيعها والله أنا متحسفه على بدر ما ودي يروح من بين يديها
اصايل : ولا يهمك يمه بحاول اقنعها ويا انا يا هي
ام اصايل : الله يعينك يارب ويلين راسها
راحت اصايل للعنود ودخلت عليها عقب ما طقت الباب
العنود اول ما شافت اصايل دارت وجهها وتغطت بالبطانيه وسوت نفسها نايمه
أصايل راحت وجلست عالسرير وسحبت البطانيه بقوه
العنود : وجع
اصايل : يوجع العدو , قومي كلميني ولا تتصددين
العنود : اطلعي برى ابي انام
اصايل : كلميني بعدين نومي
العنود : مابي اكلمك زين
اصايل :وليه ؟؟
العنود : بس غصب هو
اصايل : ايه غصب رضيتي والا مارضيتي بتكلميني وبتسمعيني بعد
العنود : منتب كفو من يتكلم معك
اصايل: ادري انك تحسبيني قايله لمشاري عن اللي قلتِ لي بس وربي ان بدر هو اللي معلمه عن كل شي قبل لا اروح لهم الله يحرمني من بدور ان بدر هو اللي قايل له هو وعبدالرحمن
العنود انصدمت من كلام اصايل : كذااااااااااااابه , بدر قال لأهله !!
اصايل :لا موب كلهم بس مشاري وعبدالرحمن
العنود : يا خزيااااه قاله قدام اخوانه يا فشيلتي قدام مشاري وعبدالرحمن وش بيقولون عني
اصايل : ماقالوا شي بالعكس مبسوطين علشان اخوهم
العنود : ولو اللي صار موب هين . هو علمهم بكل شي ؟
اصايل : اصايل علمهم بكل شي والا ما علمهم انتي وش فارقه معك ؟؟
العنود : ليه يابدر ليه قلت لهم
اصايل : العنود وش فيك موب اللي تبينه صار , ليش رافضه الحين ؟
العنود : بس ما ابيه
اصايل : صاحيه انتي والا مجنونه ليه ما تبينه
العنود : يوم تشوهت جاء يخطبني شفقان علي , مابي شفقته مابي شي منه , ماخطبني الا بعد ما عرف انه مستحيل احد يخطبني عقب اللي صار
اصايل عصبت من منطق اختها : يلله عاد وش هالكلام هو اول ما جاء من السفر كان يحسبك زوجة عبدالرحمن على اساس انهم خطبوك له ذيك الفتره ويوم درى انك ما تزوجتي كان ناوي يخطبك وربي انه كان بيخطبك ما درى عن خطبتك لنايف الا في نفس اليوم اللي صار فيه الحادث
أصايل : العنود لا تضيعين الفرصه على نفسك , من زمان و أنت تنتظرين بدر يخطبك ويوم خطبك قمتي تدلعين !!
العنود : أصايل المسأله موب مسألة دلع
أصايل : أجل وشهي ؟
العنود : مابي احد يشفق علي حتى لو كان بدر
أصايل : أي شفقه وأي كلام فاضي . تستهبلين أنت ؟؟ الرجال يقول أبيها بكل عيوبها أبيها وبس مهما كان شكلها , بعدين تعالي ترى السالفه ما يبي لها الا عملية تجميل وكم جلسة ليزر وترجعين مثل أول وأحسن
العنود سكتت وما قالت شي
أصايل : هاه وش رايك ؟
العنود بحيره : رأيي بوشو ؟
أصايل : بموضوع الزواج , انا من رأيي توافقين وعقب تسوين عملية تجميل وتخلينها مفاجأه لبدر يوم العرس
العود : سلامات يا أم مفاجأه أنت
أصايل : وأنا صادقه , هو يوم العرس بيتوقع انه يشوفك بوضعك هذا بس أنت إن شاء الله بتخلينه يشوفك مثل ما كنتي وذيك الساعه بيفرح ويخق وبتدعين لي
العنود : ما ابغى
أصايل : وشو ما ابغى. حلاو من البقاله بنروح نشتريه علشان تقولين ما ابغى , عنوده فكري تكفين لا تعذبين نفسك وتعذبين بدر معك وش ذنبه المسكين . عنود صلي واستخيري بعدين قرري لا تستعجلين فكري بعقلك وش بيضر لو سويتي عملية تجميل ؟ بينقص من قدرك او قيمتك شي
سكتت العنو وماردت
أصايل : انا بأخليك الحين ومعك يومين تفكرين فيها , بدر السكر لاعب بأعصابه لعب من كثر ما هو خايف تردينه
العنود بدون ما تحس : يالبى قلبه
أصايل وهي تضحك : وبعد تقولين ما ابيه
العنود : انطمي بس
اصايل : أنا بروح اجلس مع أمي تعالي تقهوي معنا
العنود : طيب شوي ولا حقتك
*************************************************
بيت أبو صالح :
أم صالح : وش أخبارك يا ساره ؟
ساره : بخير الله يسلمك
أم صالح : أمك تقول أنك جالسه عندهم هالأيام عسى ما شر , لا يكون زعلانه أنت وسلطان
ساره في نفسها اعوذ بالله الله لا يجيب الزعل : لا يا خالتي بس سلطان مسافر عنده شغل الله يرده بالسلامه
أم صالح : هماه تاجر وهو راعي الحلال وراه يسافر بنفسه ورى ما ارسل أحد بداله ؟
ساره : فيه شغلات لا زم يسافر لها راعي الحلال بنفسه
أم صالح : أيه الله يعين
ساره رن جوالها وكان ابو عبدالعزيز ردت بسرعه وهي خايفه
أبو عبدالعزيز : آلو
ساره بخوف : هلا يبه , شفيكم سلطان فيه شي
أبو عبدالعزيز : وش بلاك مرتاعه ؟ محد فيه شي بس حبيت اتصل واسلم عليك واشوف وش أخبارك
ساره : آسفه يبه بس خفت ان سلطان فيه شي لأنه اليوم ما كلمني
أبو عبدالعزيز : لا مافيه الا العافيه , المهم وشلونك وأنا أبوك وش أخبارك ؟
ساره : بخير يبه انت شلونك ؟ وش اخبار الضغط والسكر معك ؟
أبو عبدالعزيز : الحمدلله وانا أبوك انا بخير وصحه
ساره : عساه دوم يبه
أبو عبدالعزيز : وراك وأنا أبوك علينا ؟ معد تنشافين ؟ من سافر سلطان وأنت غاطسه
ساره : معليش يبه حقك علي , بس ظروفي مدري شلون صايره
أبو عبدالعزيز : أنت في بيتك ؟
ساره : لا انا في بيت اهلي , أهلي يقولون لا تجلسين لحالك
أبوعبدالعزيز : وترى حنا بعد أهلك كل ما قمتي فتره تعالي أجلسي عندنا ترى بيتنا هو بيتك
ساره : تسلم يبه ما تقصر الله يخليك لنا ويطول لنا في عمرك
أبو عبدالعزيز : يلله أجل ما اطول عليك بس قلت أتصل واسلم واشوف إذا محتاجه شي
ساره : الله يسلمك يارب ما أبي الا سلامتك ورضاك يبه
أبو عبدالعزيز : الله يرضا عليك , يالله أجل فمان الله وسلمي عالاهل
ساره : فمان الكريم يبه سلم على اللي عندك
ساره بعد ماصكت الجوال : يسلم عليكم أبوي سعود
امها وخواتها : الله يسلمه
أم صالح بإستغراب : منهو ؟
ساره : ابوي سعود جد سلطان
أم صالح بدون نفس :أيييه الله يسلمك وإياه
أمل : أقول بنات قوموا نجلس برى دام الجو حلو اليوم
طلعوا البنات وجلسوا برىي يسولفون ويتقهوون رن جوال ساره وعرفت من الرنه ان المتصل سلطان خذت جوالها وبعدت عن البنات وردت
ساره : هلاااااا
سلطان وهو يبتسم عالطرف الثاني : هلااااوين
ساره : أخبارك سلطان ؟ علومك ؟
مشت ساره وهي تكلم لين وصلت لآخر الحديقه وجلست في زاويه
سلطان : بخير ياوجه أخبارك أنت ؟
ساره : دوم يارب , انا الحمدلله بخير وألحين زدت خير
سلطان : دوم يا بعدي
سار : تدوم انفاسك يارب
سلطان : ومن قال
ساره : الله يسلمك
سلطان سكت وساره بعد سكتت وكل واحد منهم مايدري وش يقول للثاني أخيرا تكلمت ساره
ساره : كيف كان يومك ؟
سلطان : مثل كل يوم قمت الصبح كالعاده
ساره قاطعته : أفطرت يوم قمت
سلطان ضحك : أيه وشربت قهوه بعد
ساره : آفاااا رجعت لقهوتك السوداء
سلطان : لا وربي قهوه عربيه
ساره : من صلحها ؟
سلطان بحياء : انا
ساره : هااااه , وش قلت ؟
سلطان : أي والله اشتهيت قهوه وقلت ادخل اصلح
ساره : من جدك ؟ والله منيب مصدقه سلطان يدخل المطبخ ويصلح قهوه
سلطان : وش اسوي متعب يوم شافني واقف احوس بغى ينجلط
ساره : ما ينلام . حتى انا بغى يوقف قلبي ما صدقت
سلطان : بسم الله عليك الرحمن الرحيم الله لا يحرمنا منك
ساره من جد بغى يوقف قلبها
سلطان كمل ولا كنه قال شي وبلهجه مثل لهجة الصغار : بس متعب فشلني
ساره : ههههههههههههه ليه ؟
سلطان وصوت ضحكتها يرن في أذنه تمنى انه جالس معها يشوفها وهي تضحك له يشوف عيونها ابتسامتها وغمازتها اشتاق لها اشتاق لكل شي فيها
سلطان : اللون والطعم شي يقول متيعب كنها غسال بيالات صايره خفيفه
ساره : هههههههههههههههههه شوي شوي وتتعلم ومنتب راجع للرياض الا وانت متعلم الكبسه
سلطان : تتمسخرين
ساره : لا وش دعوه كم سلطان عندي علشان اتمسخر عليه
سلطان : هههههههههههههههه ايه هين الحسي مخي بهالكلام
ساره حست بشي سد النور عليها رفعت راسها وانصدمت صدمة خلت الجوال يطيح على الارض ويتفكك
صالح : كيفك يا ساره ؟ اشتقت لك يالغاليه
ساره سحبت الشال اللي كانت لافته عليها وتغطت به ودنقت وجمعت قطع الجوال وراحت تركض ودخلت البيت ووقفت عند المجلس شافتها سوسن وسألتها : سوير وش فيك ورى وجهك اصفر ؟ لا يكون سلطان قالك شي ؟
ساره ونفسها مقطوع : ما فيني شي
سوسن انتبهت لجوال ساره المفكك في يدها : وش فيه جوالك ؟
ساره : طاح مني
سوسن : لا يكون هذا اللي قالب لونك ترى راس مالها جهاز بألفين ريال
ساره : خذي صلحيه بأدخل الحمام شوي
دخلت ساره الحمام وغسلت وجهها وحاولت تتماسك تعوذت من الشيطان ومسحت وجهها وطلعت ولقت سوسن تنتظرها
سوسن : خذي سلطان احرق جوالك 3 مكالمات في هالدقيقتين
ساره : زين ماخرب الجهاز
سوسن : لا بس الوجه انفك وركبته
ساره ردت على سلطان: آلو
سلطان بخوف : ساره وش فيك ؟ وش صار ؟
ساره : تطمن ماصار شي بس جهازي طاح مني وانفك وقعدت اركبه
سلطان : ساره تكلمي حاسك مو على بعضك وش فيك ؟
ساره : ولا شي سلطان , اسمع أنا الحين في عزيمه إذا رجعت للبيت بأكلمك طيب
سلطان ما حب يحرجها وهي عند الناس : خلاص لا تنسين انا أنتظرك ما راح انام الا لين تتصلين
ساره : تامر أمر من عيوني
سلطان : تسلم لي العيون وراعيتها
ساره : يلله فمان الله
سلطان : فمان الكريم
صكت ساره الجوال وشافت أمل ماره في الصاله
ساره : امل
أمل التفتت : ساره أنت هنا وأنا ادورك
ساره ابيك في موضوع
أمل : أنا اللي أبيك في موضوع بس مو هنا تعالي فوق
ساره : وين فوق ؟
أمل : تعالي فوق لا أحد يسمع
ساره طلعت مع امل فوق وجلست معها في الصاله
ساره : امل اسمعيني اللي قاعد يسويه صالح لا يرضي الله ولا خلقه
أمل : مو بكيفه غصب عليه هو يحبك
ساره : أنا وحده متزوجه واحب زوجي فاهمين وش معنى متزوجه , وحتى لو اني مو متزوجه اللي قاعد يسوي اخوك حرام ما يجوز
أمل : ساره
ساره قاطعتها وهي معصبه : اقسم بالله إن حاول يعيد اللي صار ورب العباد لا أفضحه عند العايله كلها واطربق الدنيا فوق راسه وعلى فكره سلطان إذا درى عن الموضوع ما راح يسكت وهو موب قليل شر
أمل : وأنت ناويه تعلمينه ؟؟
ساره : انا ما اخبي شي على سلطان
أمل : منتب صاحيه , مجنونه انت خلاص انسي اللي صار تكفين ووعد مني بأخلي صالح يبعد عنك ويشيلك من راسه نهائيا
ساره : بنشوف يا أمل بنشوف ونزلت بسرعه وهي معصبه
طلع صالح من غرفته عقب ماسمع الكلام اللي انقال من ساره
أمل : سمعت يا صالح تكفى ياخوي شل ساره من راسك البنت متزوجه وتحب رجلها فيه الف بنت تتمناك
صالح بعصبيه : وانا مابي هالالف ودخل غرفته وصك الباب بقوه
جلست ساره مع الحريم وعقلها وقلبها مو معها كانت تفكر في اللي صار وماتدري وش تقول لسلطان محتاره ما ودها تكذب عليه ولو كذبت ما راح يصدقها لأن آخر شي ممكن تبرع فيه هو الكذب وهو عارف هالشي
تعشوا في بيت ابو صالح واهلها جالسين ومبسوطين وهي بتحترق تبي تروح للبيت جلست جنب أمها ونغزتها
أم عبدالله بصوت واطي : وش فيك؟
ساره : يمه مليت خلينا نرجع للبيت
أم عبدالله : تو الناس
ساره : يمه الساعه 1
أمها : طيب شوي ونمشي
ساره بتكشيره : متى
أم عبدالله بإستغراب ونزقه : سويره
ساره : خلاص طيب
الساعه 2 الاربع وصلوا بيتهم وراحت ساره على طول لغرفتها وقفلت الباب وقبل لا تغير ملابسها اتصلت على سلطان
من اول رنه رد بسرعه : هلا
ساره : يا أهلين
سلطان : طولتي
ساره : وش اسوي حفرت جنب امي من كثر ما انغز فيها وأنا اقول يمه متى نرجع آخر شي نزقت علي وبغت تدبغني
سلطان : ههههههههههههههههههههه
ساره انبسطت يوم سمعته يضحك وكانت تدعي انه ينسى يسألها عن اللي صار
سلطان : ما قلتي لي وش صار يوم كنت اكلمك
ساره : ماصار شي
سلطان بنبره مميزه عرفت ساره منها أنه جاد ويبي تقول الصدق : سويره
ساره تنهدت وحاولت تبين أنها جاده وهي تتكلم : سلطان أنت تدري أن بنات عمي حاقدين علي عقب ما أخذتك وتركت أخوهم
سلطان : ايه
ساره : يوم كنت أكلمك مرت وحده من بنات عمي ونطلت علي كم كلمه موب زينه عصبت وطاح الجوال مني وانفك وعلى بال ما صلحته كلمتك المره الثانيه
سلطان حس ان السالفه مضايقتها وحب يغير الموضوع : متأكده ان الجوال طاح ما كفختيها به
ساره : ههههههههههههههههههه لو بأكفخها بأكفخها بالجزمه وأنت بكرامه وحدها زنوبه بخمسه ريال
سلطان : ههههههههههههههههههه ايه هذي ساره اللي أعرفها
ساره : تتمسخر ؟
سلطان : لا شدعوه كم ساره عندي
ساره : على فكره اليوم كلمني ابوي سعود
سلطان : كلمني انا بعد يقول بأشوف وش اخبارك وكأنه ما يدري أني بأنفجر من الملل
ساره : معليش تصبر هانت
سلطان : أي هانت باقي 3شهور وزياه ماراح الا اسبوعين
ساره : تروح وانت ما تحس
سلطان : الله يعين
سلطان : أخبار الدراسه ؟
ساره : ماشيه ما علي
سلطان : أيه امشي لا توقفين
ساره : هههههههههه الله لا يعوقني بشر
سلطان : ايه ما ابيهم يقولون مرة سلطان ما معها شهاده أبيك تخلصين وتكملين ماستر بعد
ساره من الطرف الثاني رافعة حواجبها وتفكر ماستر بعد نسى سالفة السنه الظاهر!! وانبسطت لهالفكره
سلطان : وينك وين رحتي ؟
ساره : مارحت مكان معك
سلطان بهمس وكأنه يكلم نفسه : أبيك دايم معي
ساره : ايش ؟ ما سمعتك
سلطان : ولا شي
ساره حست أنها معد تشوف من النوم بس ما ودها تسكر
سلطان : ساره
ساره : لبيه
سلطان : تلبين في بيت الرحمن إن شاء الله
ساره : ومن قال يارب
سلطان : شكلي طولت عليك وأنت بتنامين
ساره ابتسمت : نعست شوي
سلطان : متى صحيتي ؟
ساره : الساعه 5 ونص
سلطان : العصر ؟
ساره : لا الفجر
سلطان يناظر ساعته : يوووه أجل سهرتك , يالله يا أمي روحي سمي بالله وادخلي السرير ونومي
ساره : بروح أغير ملابسي أول
سلطان : ولا تنسين تفرفشين أسنانك على قول سحر
ساره : هههههههه على طاري سحور تسأل عنك أمس تقول وين عمي سلطان
سلطان : وش عندها لايكون انفتنت فيني آخر يوم رحت اسلم فيه على أبوك قبل لا اسافر جلست في حجري ومارضت تقوم الا يوم جيت اطلع عقب ما سحبها ابوها بالغصب
ساره بدون ما تحس : ما ألومها والله , وبغباء تبي تغطي اللي قالته : آآآآه لا , تكفى قل ما سمعتني
سلطان ماقدر يسكت : ههههههههههههههههههههههههههههههههههههههه ماسمعت شي
ساره جمدت عقب ما طلعت الكلمه من فمها تمنت ان فمها اندق قبل ما تقول كلام غبي دايم لسانها سابق عقلها
بلعت ريقها وهي تدعي على نفسها بسبب لسانها المنفلت
سلطان في نفسه والله وانفضحتي يا سويره
ساره بإحراج : مع السلامه انا قمت ا هلوس من النعاس
سلطان عارف انها متفشله : ههههههههههههه خلاص روحي , كل يوم بأكلمك هالحزه علشان اسمع هلوستك
ساره وهي ميته من الفشيله : فمان الله
سلطان : استودعتك الله نوم العافيه يارب
وقبل ما يسكر : ساره
ساره : هلا
سلطان : انتبهي لنفسك
ساره : وأنت بعد
سلطان : مع السلامه
ساره : فمان الكريم
*************************************
بعد اسبوع في بيت ابو أصايل
العنود اتصلت على أصايل اللي كانت كالعاده جالسه مع حمولتها تحت
أصايل : هلا عنوده
بدر رفع راسه بسرعه
مشاري وعبدالرحمن يناظرون بعض وكل واحد ماسك نفسه
العنود : أصايلوه تجين بكره ؟
أصايل : ليه ؟
العنود : أبيك في سالفه
أصايل : وشهي ؟
العنود : ما تنفع عالتليفون
أصايل : مدري لحظه بسأل مشاري , مشاري توديني لأهلي بكره
مشاري بعناد وهو يناظر بدر : لا
بدر يناظر مشاري بقهر
أصايل : ليه ؟
مشاري : بس مزاج
أصايل : عنوده ما تأجلين سالفتك لبعد بكره ؟
العنود بإحباط : ليه ؟
أصايل : مشاري عياني أجيكم
العنود : جعله المر
أصايل: وجع كلش الا مشاري
العنود : اصايل تكفين ابيك بسالفه تخص موضوعي مع بدر
اصايل كانت متحمسه بس مسكت لسانها قدام حمولتها : زين خلاص أكلمك بعدين طيب
مشاري ببجاحه يبي يقهر بدر : سلمي لي عليها واجد كثير حيل
أم بدر : سلمي لنا عليها وعلى الأهل
أصايل : اللي عندي يسلمون عليك
العنود : قاعده مع حمولتك !!
أصايل : أيه
العنود : ووجعيه ورى ما قلتي لي فشله
أصايل : وش أسوي إذا إنت غبيه
العنود بحياء ما قدرت تمسك نفسها: بدر معكم
أصايل وهي تبتسم : لا خذته الشغاله تنومه
العنود بعصبيه : اصايلوه اسأل عن عمكم
أصايل : ايه
العنود : لبى قلبه سلمي عليهم كلهم وإذا رحتي لغرفتك اتصلي علي
أصايل : يلله مع السلامه
أصايل بعد ما صكت الجوال : تسلم عليكم العنود
الكل الله يسلمها
مشاري : وش كانت تبي
أصايل : تبيني ..
مشاري قاطعها : خلاص خلاص موب لازم نعرف وش تبي
بدر مرتبك ومعصب ومقهور من حركات مشاري الاستفزازيه
اصايل بصوت واطي : حرام عليك خف عليه
مشاري : يستاهل خليه يتعذب شوي
بعد ما قامت ام بدر وأبو بدر ينامون
أصايل: مشاري تكفى ودني بكره لأهلي
مشاري وهو يهز راسه ويبتسم : نو
أصايل : تكفى
مشاري : والله انا منيب سواق عند العنود خانوم علشان اوديك لها كل ما بغت
بدر : خلي السواق يوديك أصايل
مشاري : ورى ما توديها حضرتك
بدر : ما عندي مانع
مشاري : لا ياشيخ ؟
عبدالرحمن : انا لو منك يا مشاري ما اخليها تعتب البيت اسبوع كامل
بدر : وأنت وش دخلك ؟
عبدالرحمن : وجهة نظر
بدر : محد طلب رايك
مشاري : معك حق يالدحمي
اصايل : يا سخفكم
بدر : اسفهيهم روحي مع السواق وما عليك
مشاري : مافيه روحه بدون شوري
عبدالرحمن : ايه ماعندنا حريم يطلعون بدون إذن رجاجيلهم
بدر : ورى ما تنكتم أنت
عبدالرحمن : آسف ما أقدر حاليا
مشاري : ينكتم بعدين يموت
مشاري وعبدالرحمن يضحكون بثقالة دم
بدر عصب وقام وراح لغرفته
أصايل : يا ويلكم من الله
مشاري : خليه لنا سنين نترجاه يتزوج وهو معيي خليه يعرف وشلون كان معذبنا معه
أصايل : طيب وش قلت بتوديني والا لا
مشاري : خلاص بأوديك لا ينهار علينا بدر
*******************************
اليوم الثاني :
في ألمانيا
سلطان كان جالس في وسط القاعه اللي كان فيها حوالي عشر رجاجيل من جنسيات اوروبيه
وعلى يمينه متعب
سلطان : وش يحترون ورى ما يبدون إجتماعهم ويخلصونا
متعب : يحترون رئيس الفرع الامريكي
سلطان : ومتى يشرف حضرته ؟
متعب : خلاص ألحين يوصل
عشر دقايق بالضبط وانفتح الباب ودخل رئيس الفرع الأمريكي ومع دخلته حس سلطان كأن أحد عطاه كف على وجهه من الصدمه والمكتب قام يدور فيه لأن رئيس الوفد الامريكي كان وراه وحده وهالوحده ماكانت الا فيونا حبيبة القلب وزميلة الدراسه
متعب بلع ريقه بصوت عالي والتفت على سلطان وشاف العضله اللي عند فكه ترتجف وأصابعه ماسكه مسند الكرسي بقوه لدرجة أن مفاصله مبيضه من قوة الضغط
فيونا ما كانت منتبهه جلست عى الكرسي اللي كان فاضي جنب رئيسها وكان مقابل لكرسي سلطان وبدى رئيس المجموعه يعرفهم على بعض ووصل لسلطان ورفعت راسها اول ما شافته انصدمت بعدين ابتسمت له
سلطان كان وجهه جامد وما عليه أي تعبير
بدى الإجتماع وسلطان كان ذهنه مشتت ومتعب كل شوي ينبهه علشان يركز
توقف الإجتماع عشر دقايق للراحه وأكثر اللي عالطاوله قاموا منهم اللي راح عند البوفيه الصغير اللي كان في احد اركان القاعه ومنهم من طلع من الغرفه وسلطان متسمر في مكانه
متعب سحبه بالقوه وخلاه يمشي معه عند الشباك اللي كان في آخر القاعه وراح وخذ كوبين كوفي وعطى سلطان كوب
خذ سلطان الكوب وهو ساكت وشرب وهو ساكت
متعب : سلطان وش فيك ؟
سلطان : ولا شي
متعب : سلطان انسى اللي راح يا خوي انسى علشانك وعلشان اهلك وعلشان ساره
سلطان تنهد وهو يتذكر ساره وبراءاتها وضحكها وهبالها
كيفك سلطان ؟
سمع الصوت من وراه وكان عارف انها فيونا ارتجف الكوب في يده بس قدر يتماسك والتفت بهدوء : الحمدلله , كيفك أنتي ؟
فيونا : أنا بخير , عرفت من رئيسي أن الشركه الألمانيه بتفتح فرع في السعوديه وبتكون انت الرئيس
سلطان هز راسه بالإيجاب
فيونا : تهاني
سلطان : شكرا
فيونا : أنا سكرتيرة الرئيس في الفرع الأمريكي
سلطان : توقعتك في الإمارات
فيونا : أوووه تركت الإمارات من زمان ما حالفني الحظ القصه طويله إذا حبيت تعرفها انتظرك في فندقي في أي وقت يناسبك وهذا كرتي وطلعت من جيب بنطلونها كرت ومدته لسلطان اللي خذه بتردد
فيونا ابتسمت بإغراء وعيونها تلمع : أتمنى اشوفك عندي قريب
متعب كان عارف ان ماله موقع من الإعراب بوقفته بينهم بس ما حب يخلي سلطان في هالوقت بالذات التفت على سلطان بإستغراب وشافه يحط الكرت بجيبه
فيونا : اشوفكم في الإجتماع وراحت وخلتهم
متعب بعصبيه : ليش خذت كرتها ؟؟
سلطان بهدوء : وش تبيني اسوي اقطعه في وجهها واسوي فضيحه عند العالم ؟
متعب : لا بس تقدر تقول بكل لباقه شكرا ما احتاجه
سلطان : امش الاجتماع بيبدأ
متعب : الله يعدي هالسالفه على خير
رجعوا للإجتماع وحاول سلطان أنه يركز على الكلام اللي قاعد يدور في الاجتماع قد ما يقدر وبعد الإجتماع طلعوا وراحوا لشقتهم ودخل غرفته وقفل عليه
ومتعب يناظر اللي قاعد يصير ومافي يده شي يسويه
*****************************************
في بيت أبو أصايل
دخلت أصايل على اهلها وسلمت عليهم
أصايل : أجل وين العنود ؟؟
أبو أصايل : في غرفتها
أصايل : بروح أشوفها
أبو أصايل : لحظه وأنا أبوك أبيك تكلمينها نبي نرد عالجماعه أدري أنك منحرجه منهم بس لا زم نشد على العنود شوي يكفي دلع يا تقول تبيه والا نخلي الرجال يشوف نصيبه
أصايل : يبه هم موب مستعجلين
أبو أصايل : تبينهم يقولونه في وجهك السالفه صار لها كم يوم
أصايل : يبه شوي شوي عالعنود هي عقب اللي صار لها صارت حساسه شوي
أبو أصايل : حساسه ما قلنا شي بس طولنا بردنا
أصايل : يبه خل هالموضوع علي وأنا بروح أكلمها ألحين وإن شاء الله ما تسمع الا كل خير وراحت لغرفة العنود
أصايل فتحت الباب ولقت العنود منسدحه عالسرير وقاعده تناظر نفسها في المرايه وتتلمس التشوهات اللي في وجهها
أصايل : السلام عليكم
العنود حست كأن أحد مسكها وهي قاعده تسوي شي موب زين حطت المرايه بسرعه من يدها وقعدت تعدل مفرشها : وعليكم السلام يا هلا
أصايل : كيف حالك اليوم ؟؟
العنود : بخير الحمدلله , أنتو شلونكم ؟
أصايل: كلنا بخير ومشاري يسلم عليك وغمزت لها تبي تقهرها
العنود مطت شفايفها بتكشيره
أصايل: الله وكبر وراك عضيت البرطم خلاص يا بنت الناس بدر يسلم عليك
العنود : صدق ؟؟
أصايل : لا كذب
العنود : انقلعي
أصايل : افهم من هالحوسه كلها انك موافقه عالموضوع ؟
العنود : مدري
أصايل وهي باديه تعصب : وشو اللي ما تدرين ؟ ومزعجتني من أمس وموضوع وسالفه مهمه في النهايه تقولين ما ادري
العنود : أصايل أنا اخاف العمليه ما تنجح وقربت جنب أختها شوفي وجهي زين شوفي الجروح شوفي الجلد وشلون صاير أسود ومنكمش وشلون بيتقبلني زوجه له ؟؟
أصايل: هو خطبك وهو عارف أنك مشوهه وما يدري انك بتسوين عملية تجميل ولا تقعدين تفترضين إفتراضات ما صارت
العنود : طيب خلينا نأجل السالفه لين ما اسوي العمليات وإذا نجحت وافقت
أصايل : ونخلي المسكين قاعد على أعصابه هو لو بكيفه كان جاء وخذاك بخلاقينك من ألحين , وعلى فكره ابوي معصب قبل شوي يقول خلي أختك تعلمنا هي تبيه والا نخلي الرجال يدور نصيبه عند احد غيرنا
العنود : غيرنا !!
أصايل: ابوي يقول
العنود : وأنت تظنين أني لو رفضته بيروح يخطب من ناس غيرنا
أصايل سكتت وما ردت
العنود : أصايلوه بيروح يخطب غيري لو رفضته
أصايل :لا يالعنود وأنت تعرفين هالشي الا إذا خالي وخالتي أجبروه
العنود : وفيه أحد يقدر يجبره ؟؟
أصايل: إذا رفضتيه أنت أتوقع أهله بينشبون له هم فرحانين انه وافق وأكيد إذا رفضتيه موب لاقي عذر يتعذر به قدامهم الا إذا قالهم القصه كامله وهالشي مستحيل يسويه لذلك ممكن ينجبر يأخذ وحده غيرك
العنود سكتت وهي تتخيل بدر متزوج من وحده غيرها تخيلت نفسها معزومه في زواجه وتشوف عيالها يلعبون مع بدر ولد أصايل وحست بنيران شابه في قلبها وبعصبيه ردت : خلاص انا موافقه
اصايل ابتسمت وحاولت تغطي فمها علشان ما تنتبه لها العنود وهي تكلم عمرها الغيره حرقتك يا عنيده لو اني داريه كان خليتك تغارين من زمان
أصايل : انا بروح أبلغ اهلي واتصل على مشاري أخليه يفرح ذاك المهبول
العنود : لا تقولين عنه مهبول
اصايل : والله وصرنا ندافع عنه بعد
العنود مدت لسانها بتكشيره لأختها
*******************************************
النهار خلص والدنيا ظلمت ومتعب جالس في الصاله ينتظر سلطان يطلع من غرفته آخر شي راح وطق عليه الباب
سلطان : نعم
متعب : ما ودك تطلع نروح نأكل لنا شي
سلطان : لا مالي نفس
متعب : طيب اطلع بأصلح شي خفيف نتعشاه
سلطان : متعب مابي شي خلني الله يخليك راسي يعورني وأبي أنام
متعب : زين لا تنسى تركد المنبه على الساعه 7 ورانا شغل واجد بكره
سلطان : طيب
بيت أبو بدر دخلت أصايل ومشاري البنات كانوا مجتمعين مع امهم واخوانهم سلمت عليهم وجلست معهم هي ومشاري
أم بدر : وش أخبار اللي جيتي منهم ؟
أصايل : بخير ويسلمون عليكم كلكم
بدر : الله يسلمهم
مشاري : يسلمون عالبنات وأمي انت وش دخلك
بدر : ورى ما تأكل تراب وتنطم
أصايل بوت واطي : وراه معصب ؟ ما علمته أن العنود وافقت ؟
مشاري بخبث : لا
أصايل : نجس
مشاري : مالك خص أخوي وأنا وهو نصلح
أصايل : تراه بيصير رجل أختي بعد
مشاري: انطمي طيب
مشاري : وراك معصب يا خوي
بدر : لو سمحت لا تكلمني
مشاري : ههههههههههههههههههههههه لا عاد تجلس مع البنات واجد
أم بدر : هاو ليه ؟
مشاري : صاير مثلهم إذا زعل كنه غاده على طول يكشر ويقول لا تكلمني
البنات : ههههههههههههههههههههههههههه
غاده وبدر يناظرون بعض وهم معبسين
بدر : ألحين تحطني مثل ذي ؟
غاده : خيييييير وأنا وش فيني ؟
بدر : قد سمعتي عن إختراع أسمه مرايا ؟
غاده : بالله
بدر : والله
غاده : يمه شوفيه
بدر يقلدها : يمه شوفيها
مشاري : سبحان الله غاده ما نقصها الا شنب وسكسوكه وبدر ما نقصه الا شعر وروج
فاتن وعهد : ههههههههههههههههههههههههه
أصايل: الحين انتوا قعدتوا تتهاوشون وتركتوا ساس البلا مشاري
مشاري : خبيثه
أصايل : مثلك
أم بدر : مدري متى تعقلون والله أنكم والبزران واحد
بدر وهو يستهبل : يمه شوفيهم هم اللي يضيقوني
فاتن : تكلم دلوعة امه ابعدوا عنه لا يصيح
مشاري : تبي حلاو بابا , أصايل معك حلاو في شنطتك من حق بدور ؟
أصايل : معي علوك تنفع
بدر بيأس :لا أنتوا عارفين وش أبي
أصايل فهمت عليه : جاك اللي بغيته يا بدر
بدر التفت وهو موب مصدق يحسب أصايل ما فهمت ناظر مشاري بإستفهام
مشاري هز راسه بالإيجاب وهو يضحك
بدر وهو موب مصدق قرب جنب مشاري : احلف
مشاري : والله العظيم
بدر : احلفي أصايل
أصايل : وربي صادقين
بدر : حمير ورى ما علمتوني اول ما جيتوا
مشاري : خييييير وش ذا الألفاظ ؟
بدر من الفرحه : آسف آسف والله مدري شلون طلعت اعذروني
البنات يناظرونهم وهم مستغربين
فاتن : وش السالفه ؟
غاده : وش عندكم ؟
بدر : ولا شي ولا شي وطلع لغرفته وراح يصلي ركعتين شكر
عهد : وش فيكم ؟؟
مشاري بصوت واطي الله يقلع أبليسك يا بدير ورطتني
أصايل : بروح اشوف بدوري
مشاري : وأنا بعد
غاده : لحظه وش السالفه ؟
مشاري : وشو وراكم مستغربين قايل لبدر بأسدد فاتورتك وماصدق
فاتن : لا يا شيخ وكل هالفرحه علشان فاتورة جوال ؟؟
مشاري : بدر بخيل وفاتورته مسطحه هالشهر ويلله بلا تحقيق وطلع من الصاله بسرعه
اليوم الثاني :
قام سلطان وهو مرهق لأنه طول الليل ما نام من السهر والتفكير في الفوضى اللي صايره في حياته والصدمات اللي تجيه ورى بعض من خطبته لهناء لحب فيونا ولتركها له ومن زواجه من ساره وحبه لها وقف تفكيره عند هالنقطه وهو يسأل نفسه معقوله حبيت ساره وإذا اللي قاعد يصير بيني وبينها موب حب أجل وشو؟ انتهى ليله واصبح وهو ما عرف الجواب .. قام صلى الفجر وتسبح وغير ملابسه وطلع ولقى متعب مجهز الفطور ومصلح قهوه عربيه رفع حواجبه وابتسم وذكر ساره وانعصر قلبه أمس أول يوم يمر عليه بدون ما يكلمها من وصل لألمانيا
متعب : وش فيك ؟
سلطان : ولا شي
متعب : شكلك ما نمت زين
سلطان رفع حواجبه
متعب : اعرفك زين إذا ما نمت
سلطان تنهد وسكت
متعب : ليش ما نمت
سلطان : مدري متعب قفل عالموضوع تكفى
متعب : ألحين بأقفل عليه بس أكيد بنفتحه في أقرب وقت
سلطان تقهوى بسرعه وراح لغرفته وراح يجهز أوراقه علشان يطلعون للشغل
طلعوا للشغل دخلوا الشركه الالمانيه قبل موعدهم بنص ساعه مشوا للغرفه المخصصه لهم وسلطان كان يمشي قدام متعب وهم يتكلمون وأول ما فتح الباب توتر ووقف مكانه متعب اللي كان وراه صدم فيه من وقفة سلطان المفاجأه ورفع راسه ولقى سلطان واقف قدامه وساد عليه الطريق
متعب : سلطان امش خلنا ندخل
سلطان سكت ومارد
متعب طل من ورى كتف سلطان وشاف فيونا جالسه وحاطه رجل على رجل بثقه وتبتسم
متعب بصوت واطي : الله يخسف بها
سلطان : اسكت متعب ومشى ووراه متعب
فيونا صباح الخير
متعب وسلطان : صباح النور
فيونا : كيفكم ؟
سلطان : تمام
متعب سكت ومارد
فيونا : ممكن تتركنا لحالنا متعب
متعب يناظرها بإستحقار : آسف عندنا كم شغله نبي نناقشها قبل الاجتماع
فيونا إلتفتت على سلطان وهي رافعه حواجبها بإستفهام
متعب : أنت وش تبين بالضبط
فيونا : أنا ابي اتكلم مع سلطان
متعب : علشان وشو ؟
فيونا : موضوع خاص
متعب : مابينك أنت وسلطان مواضيع خاصه
متعب يناظر سلطان بقهر يبيه يرد عليها
سلطان كان ساكت ويناظر اللي قاعد يصير بهدوء
فيونا التفتت تتأمل سلطان بكل وقاحه وقامت من مكانها وحاولت تقرب منه وهي تناظره بنظرات إغراء وتملك وإبتسامه أقرب ما ينقال عنها أنها إبتسامة وحده رخيصه وبايعه نفسها وتكلمت بصوت ناعم : شكل سلطان له رأي ثاني
متعب راح عند سلطان ومسك يده ورفعها في وجه فيونا وهو يأشر على الدبله : سلطان مو لك فاهمه
فيونا تغيرت ملامحها وابيض وجهها من الصدمه وعيونها شوي وهي تطلع من مكانها حاولت تتماسك ورفعت راسها بغرور وتكلمت : ولو بيننا أمور ما انتهت
متعب بعصبيه : ابعدي عنه احسن لك
فيونا : هو يقدر يقول هالكلام بنفسه
سلطان بهدوء : خلصتوا !! الإجتماع بيبدأ ومشى لقاعة الإجتماعات وفيونا ومتعب وراه وكل واحد يناظر الثاني بحقد ولو كانت النظرات تذبح كان متعب قد خلص على فيونا من زمان ودفنها بعد
طول الإجتماع أكثر من العاده وسلطان كان حاط كل تركيزه على الإجتماع لأنه آخر إجتماع قبل ما تبدأ فترة التدريب لرؤساء الفروع
وفيونا ومتعب طول الإجتماع يتبادلون النظرات بكل حقد وكره
خلص الإجتماع وطلع سلطان مع متعب ولحقتهم فيونا وهي تنادي : سلطان سلطان
سلطان : نعم
فيونا وهي تسوي نفسها متلهفه عليه : انتظر مكالمتك في أقرب وقت, فيه أمور ودي أكلمك عنها أنا بأجلس هنا لما تخلص فترة التدريب بس ما اقدر احضر فترات التدريب اللي في هالمبنى لأنها للرؤساء , بس أنت ارفع علي التليفون وأنا مستعده اجيك أي وقت
سلطان هز راسه ومشى وهو ساكت ومتعب يناظرها وهو وده يروح ويقلع عيونها من مكانها بس مشى ورى سلطان وهو كاتم عصبيته
سلطان مثل اليوم اللي قبله وصل للشقه وكان تعبان مره دخل غرفته وقفل على عمره وذب عمره عالسرير
اليوم الثاني
في بيت أبو عبدالله :
ساره كانت متوتره ومعصبه طول اليوم لأن سلطان ما اتصل عليها له يومين واليوم هو ثالث يوم وكانت قلقانه مره اتصلت عليه اكثر من مره و جواله مقفل , جوالها ما نزل من يدها وتكشيرتها ماليه وجهها واللي زاد ضيقها ان خواتها ووفاء زوجة عبدالله جايين عندهم من العصر وبينامون عندهم لأن اليوم خميس
جلست في الصاله مع أمها وخواتها كانت جالسه عالكنب واهلها جالسين على الأرض
أم عبدالله : تعالي تقهوي
ساره : مابي
وفاء : تعالي ذوقي ذا الحلا أنا اللي مصلحته
ساره ما حبت تفشلها : طيب صبوا لي فنجال
نجوى : اقربي طيب عمتي طلاله
ساره : طيب
هند : وش فيك عاقده الكشره ؟
ساره : مافيني شي مصدعه بس وما نمت أمس زين
سوسن : من السهر
نجوى : وش سهرانه عليه ؟
ساره : ماسهرت
سوسن : أكيد تكلم سلطان كالعاده
ساره بدون نفس وبعصبيه : يا كاشفتني يا قويه اصلا ما كلمني أمس
سوسن : وهذا اللي مخليك عصبيه
ساره : ورى ما تنثبرين
نجوى : وش فيك ساره ؟ كل هذا علشان سلطان ما كلمك أمس ؟
ساره : مافيني شي بعدين ليش تدخلون سلطان بكل سالفه أول مره تشوفون وحده مصدعه ومانامت زين
هند : يمه لا تحارشونها مستلجه اليوم اسفهوها لا تستنزل علينا
ساره : الشرهه على اللي يجلس معكم وقامت وراحت لغرفتها والدنيا مغيمه قدامها بسبب الدموع اللي غطت عيونها
دخلت غرفتها عقب ماصفقت بالباب بقوه نطلت عمرها عالسرير وهي تصيح ما تدري وش تسوي الخوف اكل قلبها على سلطان ولا عندها له رقم ثاني واستحت تتصل على أهله وتقولهم انه ما كلمها له كم يوم آخر شي اتصلت على العنود علشان تسولف معها وتسألها وش تسوي لعلها تلقى لها حل
العنود اول ما رن جوالها وشافت رقم ساره ردت بسرعه : هلاااا وغلااااا هلا بالقاطعه هلا بالغاليه
ساره ابتسمت : هلا بك زود يا بعدي
العنود : عندي لك خبر بمليون ريال
ساره : وشو
العنود : توقعي
ساره : فكيتي الجبس ؟
العنود : لا
ساره : أجل ؟
العنود بحياء : بدر خطبني ووافقت
ساره رحت لها من كل قلبها : من جدك ؟
العنود : لا من عمي
ساره : هه هه بايخه
العنود : ادري بس وربي من الوناسه مدري وش اسوي لو ما هالجبس اللي مسمرني بالسرير كان قعدت اناقز
ساره : مبرووووووك الله يسعدك ويهنيك ويوفقك ويتمم لك على خير يارب
العنود : وإياك يا قلبي وعندي خبر ثاني بعد
ساره : وشو لايكون تزوجتيه بعد وما علمتي
العنود : هههههههه لا وش دعوه
ساره : أجل وشو بعد ؟
العنود : الاسبوع الجاي بأفك الجبس بعدين بأبدأ اعالج وجهي واسوي عملية التجميل
ساره : وش هالاخبار الزينه وش هالعلوم لو اني داريه كان كلمتك من زمان
العنود : شفتي شلون اخباري كلها حلوه
ساره : عساها دوم يارب
العنود : يلله عاد هاتي أخبارك
ساره ما حبت تخرب فرحة العنود وماقالت لها شي سولفوا شوي بعدين سكرت منها وهي فرحانه للعنود قد ماهي متضايقه على سلطان آخر شي قررت تتصل أبو سلطان وتسأل عنه وعن سلطان
أبو سلطان رد عليها : هلا والله هلا ببنيتي هلا بمرة الغالي
ساره : الله يسلمك يارب , شلونك يبه
أبو سلطان : بخير وأنا أبوك أنت شلونك ؟ شلون الأهل عساكم بخير
ساره : الحمدلله يبه أنتوا شلونكم شلون أبوي سعود وخالتي والعيال طمني عنهم
أبو سلطان : والله كلهم بخير وما عليهم
ساره : عساه دايم يبه
ابو سلطان : وش اخبارك يا ساره معد شفناك من راح سلطان
ساره : والله يبه أدري أني مقصره بس مدري وشلون صايره ظروفي كنت ناويه أجي هالاسبوع بس قالت لي ريم انك في جده
أبو سلطان : أيه انا ألحين في جده وبكره إن شاء الله بأرجع تعرفين الشغل عقب ماراح سلطان صار أكثره علي وبيني وبينك فهد وناصر ماش منيب اعتمد عليهم مثل سلطان
ساره : الا وش اخبار سلطان عساه بخير له يومين ما كلمني
ابو سلطان : ايه هالايام مشغول أمس اتصلت عليه وجوال مقفل اتصلت على خويه متعب وقال هاليومين عندهم ضغط شغل وتدريب الا هو ما يتصل عليك
ساره : الا يتصل بس له يومين اكلمه وجواله مقفل
ابو سلطان بمزح : اها يالخبيثه أجل متصله علشان تسألين عن سلطان موب عني
ساره حست انها تفشلت : لا وش دعوه يا خال وربي أني اسأل عنك دايم حتى أسأل ريم وإن شاء الله الأربعاء بأجي أنام عندكم إذا بتتحملوني قالتها بمزح
أبو سلطان : وش دعوه لو ماشالك البيت تشيلك عيوننا كم ساره عندنا
ساره : الله يخليك لنا يارب ولا يحرمنا منك
أبو سلطان : ويخليكم لنا الا على فكره دريتي عن نواف
ساره : وش فيه ؟
أبو سلطان : ترى زواجه يوم الثلاثاء
ساره : بهالسرعه
ابو سلطان : عم البنت حدد الموعد
ساره : الله يوفقهم ويسعدهم يارب
ابو سلطان : بيحطون عرس رجال و بعد ما يجون من السفر جواهر وحنان وأم سلطان وباقي الحريم بيحطون عزيمه في حدى الفنادق للحريم
ساره : الله يتمم لهم يارب
أبو سلطان : آميييين
ساره : يلله أجل يبه ما أطول عليك قلت اتصل واتطمن عليك
ابو سلطان بمزح : تسلمين يبه ماقصرتي اتصلي دايم اسألي عني انا موب عن سلطان
ساره وهي تضحك : إن شاء الله يبه من عيوني
ابو سلطان : وإذا احتجتي شي والا بغيتي شي لا يردك الا سماعة التليفون
ساره : ما تقصر يبه عساك ذخر لنا
أبو سلطان : أجل سلمي عالوالد والا هل , فمان الله
ساره : فمان الكريم يبه
تطمنت ساره ان سلطان بخير على الأقل ارتاحت شوي بس كانت مشتاقه لصوته لحسه لضحكته لسوالفه قامت وغسلت وجهها ودخلت فراشها تحاول تنام لها ساعتين على الاقل منها تريح ومنا إذا نزلت تسهر مع أهلها تكون رايقه
سلطان في طرف ثاني من العالم كان جالس في قاعة التدريب وموب مركز وكل شوي يناظر ساعته وده يطلع بس ماكان عارف وش يسوي إذا طلع كان يبي يكلم أهله وساره وراحت أفكاره مع ساره وهو مايدري وش يسوي,, هاليومين اللي ما كلمها فيها حس أنه فاقد شي مهم حس انه كاره نفسه ونفسيته زفت وفيونا اللي طلعت له فجأه وماضيه حس ان مخه مشوش وضايع ما يدري وش يسوي تنهد وحاول يركز عالكلام اللي ينقال في القاعه
بعد ما انتهى التدريب طلع للشقه ولقى متعب سابقه للشقه
متعب كان يداوم في فرع ثاني لنفس الشركه
متعب : كيف كان يومك
سلطان : ماشي الحال . وأنت ؟
متعب : زين الحمدلله
سلطان : أنا بروح اتسبح وبكلم كم مكالمه بعدين نطلع نتمشى شوي و نتعشى
متعب : على أمرك يا ريس
سلطان : ريس في الدوام موب هنا
متعب : على أمرك سليطين
سلطان ابتسم وذكر ساره يوم تعصب عليه مره وتقول له سليطين
متعب : وش فيك ؟
سلطان : ولا شي وراح لغرفته غير ملابسه وتسبح بعدين طلع وفتح جواله واتصل على جده وابوه بعدين كلم أمه وبعد ما خلص من أهله تنهد ثمن اتصل على ساره
ساره اول ما شافت الرقم وهي تتتعشى مع اهلها فزت بسرعه وراحت لغرفتها
ابوها واخوانها يناظرون بعض وهم مستغربين والبنات يبتسمون ويعلقون بصوت واطي لأنهم عارفين أن ساره ما قمزت هالقمزه الا ان سلطان هو المتصل
ساره ردت وهي في تركض مع الدرج خايفه ان الخط ينقطع وهي تلهث ردت : آلو
سلطان : آلو
ساره وفيها الصيحه : سلطان
سلطان سمع صوتها وحس انه ضايع كانت اللهفه في صوتها واضحه لام نفسه ألف مره لأنه ما كلمها اليومين اللي راحو نسى سلطان نفسه وفيونا وكل شي صار له في اليومين اللي راحوا
ساره : سلطان
سلطان في نفسه عيون وقلب سلطان : لبيه
ساره وفي صوتها رنة عتب : وينك ؟
سلطان يكلم نفسه انا غبي ما استاهلها والا شلون قدرت اجلس يومين كامله بدون ما اسمع هالصوت
ساره : سلطان أكلمك
سلطان : معاك
ساره : وراك ما كلمتني اليومين اللي راحوا , ادري انك مشغول وربي عاذرتك بس على الاقل كان ارسلت لي رساله طمنتني عليك طول اليومين اللي راحوا وأنا قلقانه عليك وبالي مشغول عليك لين ما كلمت خالي اليوم وقال انه مكلم متعب وطمني عليك
سلطان : السموحه يا بعدي بس مدري وش اقولك
ساره : لا تقول شي أهم شي أني تطمنت عليك وارتاح بالي وكملت وهي تضحك حتى اتصلت على خالي وسألته عنك وفشلني
سلطان استحى وما يدري وش يقول والا وشلون يعتذر
سلطان : ساره تكفين سامحيني ما دريت اني بأسبب لك كل هالخوف والقلق أنا آسف
ساره : لا تعتذر بس ابيك توعدني انك إذا انشغلت تطمني عليك لو برساله على الاقل
سلطان : تأمرين أمر ما طلبتي شي
ساره عقب ما ارتاحت نزلت دموعها ما تدري هي من الراحه والا من صوت سلطان اللي اشتاقت له
سلطان : ساره
ساره وصوتها متغير : هلا
سلطان : وش فيك ؟؟
ساره : مافيني شي
سلطان : ليش صوتك تغير
ساره شهقت بصوت عالي وهي تصيح
سلطان بخوف : ساره تصيحين ؟؟
ساره : وربي غصب
سلطان : وش يصيحك ؟
ساره وهي تحاول تتماسك : مدري يمكن ارتحت يوم سمعت صوتك وتطمنت عليك
سلطان يالله وش سويت فيها أنا يارب سامحني وصبرني تمنى انه في هاللحظه معها يمسح دموعها ويعتذر منها ويأخذها في حضنه
سلطان وهي متنكد : ساره أبوي لا تصيحين تكفين والله تضيقين صدري , إذا لي خاطر عندك امسحي دموعك
ساره وهي تمسح دموعها : خلاص سكت
سلطان : سارونه ما ابيك تصيحين أبد مفهوم
ساره : مو بكيفي غصب وقسم
سلطان : كله مني أنا السبب
ساره تحاول تغير السالفه : لا تلوم نفسك بس أنا حزات ماقدر امسك نفسي والا نسيت انك مره قلت عني أم دميعه
سلطان تذكر الموقف : هههههههههههههه ذاك اليوم بس كنت أبي اقهرك
ساره تنهدت بفرح يوم سمعته يضحك : دوووم هالضحكه يارب
سلطان : تدومين لي يارب
ساره صارت فوق السحاب من كثر ماهي مبسوطه وبحياء ردت : وأنت بعد
سلطان وهو يبتسم ويتمنى يشوف وجهها لأنه عارف انها مستحيه : اخبارك سارونه
متعب كان واقف عند الباب توه بيدخل الغرفه وشاف سلطان يضحك وسمع آخر جمله ورجع للصاله وهو يبتسم ويكلم نفسه : عز الله طلعنا وتعشينا خلني اطلب بيتزا اصرف لأني لو بأحتري الباشا موب خالص الا بعد ثلاث ساعات
جلس سلطان يسولف هو وساره ومابقي شي ما تكلموا فيه كالعاده وكأنهم توهم يتعرفون على بعض كل واحد صاير يكتشف أشياء في الثاني ما كان يعرفها تكلموا عن طفولتهم ومواقفها مروا على مرحلة المراهقه وكل واحد يسولف للثاني عن حركاته
ساره : سلطان اعترف ما حبيت احد وانت في المتوسط ؟؟
سلطان : هههههههههه تغارين ؟
ساره : لا بس أسأل
سلطان : لا كنت مجتهد منيب راعي هالحركات وأنت ؟؟
ساره : تبي الصراحه
سلطان : أكيد
ساره : مابقي واحد وسيم يطلع في التلفزيون ما حبيته
سلطان : بالله
ساره : ههههههههههههههه كل اسبوع احب لي فنان والا لاعب والا مذيع
سلطان : ماشاء الله مدامتي حبت كل المشاهير الظاهر
ساره : الوسيمين بس
سلطان : وكم استمرت هالحاله عسى ما طولتي بس
ساره : لا ما طولت 3 سنين همن عقلت يوم خلصت المتوسط
سلطان : أوله 3 سنين ؟؟ معناها حبيتي كل واحد شهر موب اسبوع بس
ساره بهبال : لا كل اسبوع احب واحد من تبدأ السنه لين ما تخلص وإذا جاء السنه اللي بعدها كررت نفس السالفه لين ما حبيت كل واحد ثلاث مرات كل سنه مره
سلطان : ههههههههههههههههه حشى صار احتفال سنوي ذا موب حب
ساره : تغار ؟
سلطان : أبدأ
ساره : لأنك عارف انه حب خربوطي
سلطان : لأني عارف أنك ما تحبين أحد غيري ألحين
ساره : أحلى يا واثق
سلطان : صح والا لا
ساره ارتبكت : وشو اللي صح ؟
سلطان : ما تحبين الا أنا صح
ساره تبي تضيع السالفه : ماأكرهك
سلطان ابتسم على حركتها القديمه : ما قلت أنك تكرهيني أنت عارفه وش أقصد
ساره بإرتباك ؟ وش تقصد ؟
سلطان : أنت تحبيني
ساره بعصبيه لأن سلطان كشفها وخافت يستغل نقطة ضعفها خافت على كرامتها تنجرح : الثقه الزايده موب زينه ياجدي قال حب قال !! وقامت تضحك بأستهتار : أنا أحبك !! أوهامك واجده !
سلطان انصدم من ردها ويكلم نفسه: معقوله انا أتوهم طيب ولهفتها وخوفها علي ودموعها كل هذا وشو وش ينقال عنه !!
حس بإكتئاب مايدري وش يسوي مع هالبنت اللي بتسبب له الجنون مره بتموت من خوفها عليه ويوم جاب لها طاري الحب عصبت وقامت تتمسخر
ساره : أووه تأخر الوقت , آسفه سهرتك معي خالي يقول عندكم ضغط في الشغل المفروض انت داخل الفراش من زمان وراك قومه من الصبح
سلطان : أنا ألحين في الفراش بس مانيب مرتاح فيه
ساره : ليه ؟
سلطان : فاقد النومه جنبك
ساره بغى يطيح الجوال من يدها ومسكت الجوال وتناظر بإستغراب وكنها بتلاقي الجواب فيه حست أن سلطان متغير هالايام سوالفه وتلميحاته كلها متغيره معقوله الغربه تسوي كذا في الواحد !! والا يبيها تعترف له انها تحبه .. وهي تفكر لا تضعفين يا ساره اقضبي لسانك انت ما تدرين وش يفكر فيه يمكن يبي يستغلني إذا عرف ويخلي زواجنا يستمر بس علشان أهله والا هو وين والحب وين هذا هو له يومين منشغل ولا فكر فيني ولا لحظه , يارب وش الدبره وش أسوي حتى تفكير منيب قادره افكر زين
سلطان : ساره
ساره ما تدري ليه خافت من اللي بيقوله وتكلمت : سلطان أقرأ آية الكرسي وسم بالله وبتنام يلله ما أبي أعطلك وأسهرك أكثر وراك أشغال واجده بكره
سلطان بإحباط : طيب بس كنت بأقولك تصبحين على خير
ساره : تلاقي الخير
سلطان : فمان الله
ساره : فمان الكريم
ساره بعد ما صكت الجوال رمته جنبها وهي متكدره ما تدري وش اللي خلاها تتكلم وتقول اللي قالته حست انه زعل وقامت تكلم نفسها :غبيه وش سويت أنا وش اللي ما احبه قلبي يتقطع كل يوم عليه واقوله ما احبك وش جاني انا وشلون تتصلح ذي وش يرقعها وش خلاني اتكلم وش بتفيديني فيه الكرامه الحين هذا هو زعل كل ما قلت فرجت رجعت تتعقد يارب وش قاعد يصير معي ما اعرف اتكلم زي الناس وش خلاني ارد بهالعصبيه فيه ألف طريقه أغير بها الموضوع وسحبت المفرش بقوه وحاولت تغطي نفسها وتنام مع انها عارفه ان الشمس بتطلع قبل ما تغط في النوم
سلطان من جهه ثانيه : هالبنت يا مجنونه يا تكابر قبل شوي تصيح وشوي وتطلع من السماعه علشان تتطمن علي ويوم قلت تحبيني بغت تقطع الخط في وجهي من العصبيه تستهبل ذي والا وش قصتها هالإنسانه بتموتني ناقص عمر آه بس لو انها عندي ألحين كان مسكتها وهزيتها لين يرجع عقلها لمكانه وخليتها تقولي وش قصتها وحط حرته في المخده اللي جنبه وجلس يخبط فيها لين ما عورته يده وآخر شي نام وهو متنكد
***************************************
اليوم الثاني
بيت أبو بدر
أبو بدر دخل على عياله بعد صلاة الجمعه وهم كالعاده مجتمعين بعد الصلاة يتقهوون
أبو بدر جلس وقاموا عياله كلهم يسلمون عليه
أبو بدر : أتصل علي اليوم أبو أصايل وتراهم موافقين ويبون يأخذون رأينا في موعد الملكه
بدر ابتسم وهو يسمع اخوانه وخواته يباركون له
بدر : الله يبارك فيكم
أم بدر مثل كل أم قامت تصيح وهي تقول : الله يوفقك وأنا أمك مابغى يجي اليوم اللي أشوفك فيه متزوج
عبدالرحمن : يوه بدت حركات الدراما يمه بلا هالحركات تكفين
غاده : دحيم ووجع
عبدالرحمن : وأخيرا بنرتاح من بدر وأصير دلوع أمي ويرفع حواجبه يبي يقهر بدر
بدر : يلله عاد تخسي محد يحل محلي
عبدالرحمن : انت بتصير عندك حرمه تدلعك أما أنا مسكين مالي لا وليف ولا صاحب وراح عند امه وحط راسه على كتفها شفتي يمه محد بقي من عيالك إلا أنا مالناش غير بعض يا ام بدر
أبو بدر : ورى ما تقعد في حضنها أحسن
عبدالرحمن : هههههههههههههههه غار غار
مشاري : دحيم اسكت عيب تراه ابوك
عبدالرحمن وهو مستغرب ويناظر أخوانه : ابوي يغار مني وانفجر يضحك مره ثانيه وكمل يبه لهالدرجه تحب امي
بدر : صاحي انت ؟ اكيد يحبها موب حرمته
عبدالرحمن يناظر أمه وأبوه وشاف ابوه باين انه مستحي وامه مثله ورجع يضحك مره ثانيه : يا حليلهم طائر الكناري اثرهم يحبون بعض من ورانا
كل الموجودين بالصاله قاموا يضحكون على ام بدر وأبو بدر
ابو بدر بعصبيه : ألحين انت ورى ما تنطم وتصير راكد مثل الرجاجيل
عبدالرحمن حس ان ابوه عصب ومسك نفسه بالغصب وهو مستغرب أول مره يشوف ابوه وامه بهالحاله لأنه ما عمره سمعهم يطرون الحب والا هالكلام قدامهم
أبو بدر وهو يكلم بدر : اتصل على أبو أصايل وحدد معهم يوم الملاك علشان نعلم الجماعه
بدر : إن شاء الله يبه اليوم بأكلمه وأرد لك بالليل
غاده : بتملكون بهالسرعه اتفقوا أول عالمهر و العرس و السكن وهالأمور بعدين حددوا الملاك
فاتن : ايه والشوفه أكيد بتشوفها وتشوفك قبل
أصايل: انتوا عارفين أبوي مستحيل يحدد مهر أو يشرط سكن أو عرس هو يحب يخلي الرجال يسوي اللي يشوفه مناسب له حنا نشتري رجال الكفو
أبو بدر : ليت كل الرجاجيل مثل أبوك
أصايل : الله يسلمك يا خال
مشاري يبي يقهر أصايل : يوم عرسي ماأخذ من المهر الا عشره ألاف ورجع الباقي يعني لا تاخذ معك مبلغ كبير بناتهم رخيصين مره
أصايل تناظر مشاري بقهر
ابو بدر : تعقب ياللي ما تستحي بنات أبو أصايل ينشرون بالذهب ياقليل الأدب
أم بدر : صادق يا ابو بدر لو تلف الدنيا كلها ما تلقى مثل بنات ابو أصايل
مشاري : لا حول والله العظيم أمزح أدري اني لو احب الثريا منيب لاقي مثل أصايل بس لا تكبرون راسها علي عاد
أبو بدر بجديه لأنه حس ان مزحة مشاري موب في محلها: أصايل وحده من بناتي ومنيب أرضى عليها فاهم والا لا وإن شفتك مزعلها بكلمه والا قاعد تمزح عليها هالمزح السامج لا تلوم الا نفسك
مشاري : إن شاءالله يبه والله انها كانت مزحه والتفت على أصايل أنا آسف وحقك علي وربي لو ألف الدنيا منيب لا قي وحده تجي في نصف مواصفاتك
أصايل عارفه ان السالفه مزح ووتبي تبين أنها موب زعلانه : وش قالوا لك غساله ؟؟
مشاري : هااه قايلكم قلبها كبير وعقلها أكبر هذي هي وش حليلها موب زعلانه ولا شي
أصايل : بس لا تتعودها
مشاري : تأمرين أمر حبيبتي
عبدالرحمن : لا حول اركد عاد ترانا موجودين
عهد : وين ناوي تسكن بعد ما تتزوج يا بدر .؟
بدر : وين بعد بدي أسكن هون
عبدالرحمن وهو مسوي مكشر : هون هون
بدر : يس بأسكن هنا معكم عندك ما نع ؟
عبدالرحمن : لا أبد, غير أن بيتنا بيصير فرع لبيت أبو أصايل يعني إستعمار رسمي
أبو بدر : وش قلنا حنا
عبدالرحمن : يبه نمزح وش بلاك ؟
ابو بدر : هالأمور ما ينمزح فيها فاهمين والا لا
أصايل متعوده عالمزح : ماتبي نخطب لك وحده من جماعتنا يا عبدالرحمن علشان نكمل السالفه
عبدالرحمن : بعد !! لا يرحم أمك أنا أعتزلت كل أنواع الحريم مير انتوا خلصتوا والا عندكم اخت ما ندري عنها
أصايل : لا خلصنا ارتاح وارجهن
عبدالرحمن مسوي زعلان : لاااه خساره عاد كنت ناوي أصف مع أخواني ويصير الدرب واحد يوم الأربعاء وكان يقصد موعد زيارة اصايل لأهلها يوم الاربعاء
مشاري : ولا يهمك ندور لك وحده من جيرانهم
عبدالرحمن : لا جد أنا شلت سالفة العرس من راسي يكفي اللي جاني منه
أبو بدر : لين متى يعني
عبدالرحمن : للأبد
بدر : أصايل متى تتوقعين أبوك فاضي علشان أكلمه ؟
أصايل : كلمه ألحين لو بغيت أكيد ألحين جالسين يتقهوون مثل العاده
عهد : الظاهر كل السعوديين هذي حزة قهوتهم وجمعتهم
فاتن : لا تنسين بعد المغرب تراها الفتره الثانيه
بدر : أجل عن أذنكم وطلع يكلم
أم بدر قامت تشوف الشغالات في المطبخ وابو بدر قام يريح شوي قبل الغداء والجماعه تفرقوا وما بقي في الصاله الا مشاري وأصايل
مشاري : أصايل زعلتي ؟
أصايل : يحق لي أزعل صح
مشاري : صح وأنا آسف وربي كنت أمزح
أصايل : أنت عارف أن أبوي زوجني منك علشانك رجال موب علشاني رخيصه
مشاري : وقسم بالله أدري بس مثل ما قلت لك ما كنت قاصد المعنى بس كنت أمزح ولو كنت أدري أنك بتزعلين كان ما قلتها ليت لساني انقص قبل لا اقولها
أصايل : لا تدعي على نفسك
مشاري : اصايل تكفين سامحيني
أصايل : لا تتعودها
مشاري : خلاص والله ما أعيدها كلش الا زعلك تراك اغلى من روحي والله
اصايل : ايه العب علي بهالكلام
مشاري : وش دعوه اصول تدرين اني جاد
اصايل : زين دريت
مشاري : دام دريتي خليني اقولك شغله
اصايل : وشهي ؟
مشاري: وش رايك ندور لنا بيت ونطلع
أصايل بإستغراب : ليه !!
مشاري : بدر بيتزوج وبيسكن هو والعنود هنا والبيت بصير ضيق عاد قلت ندور لنا بيت ونسكن فيه
أصايل : لا تكفى وش يطلعنا بعدين خالتي معتمده علي ومتعوده علي صحيح العنود بتجي تسكن هنابس عنيده رفلا وميب راعية مطبخ وهالامور
مشاري : البيت بيصير ضيق علينا
أصايل : ماصار ضيق علي يوم سلوى فيه تبيه يضيق يوم جت أختي لا يا مشاري مستحيل أطلع وأخلي خالتي مسكينه وإذا على قولك البيت بيصير ضيق اتفق انت وبدر وخالي واشتروا بيت أكبر لنا كلنا , اما أني أطلع واسكن لحالي انسى أنا حتى إجتماعات البنات ما اقدر اخليها واعد لها من الا سبوع للأسبوع شلون تبيني أخليها
مشاري : على راحتك مع أني كنت ابي اريحك من التعب لا تحسبيني غافل ادري انك شايله البيت على راسك من جيتي حتى الطلعات ما قمتي تطلعين مثل أول لأنك ما تبين تتركين أمي لحالها والله اني حاس فيك وداري انك ما تلحقين بين وظيفتك وشغل البيت وبوي الله يهديه ما يبي الخدمات يلمسون الطبخ أبد
أصايل قاطعته : إذا عجزت اقوم عن شغل البيت ووظيفتي صدقني إن إستقالتي من وظيفتي هي الحل الاريح موب الطلعه من البيت
مشاري وهو موب مصدق : وشو إستقاله ؟؟
أصايل : إذا عجزت عن شغل البيت والوظيفه بأستقيل
مشاري: من جدك !! وتتركين وظيفتك علشان أهلي
أصايل : أهلك هم أهلي بعدين انت عارف اني منيب محتاجه للوظيفه وراتبي هذا هو في البنك ما ألمس منه شي مصروف وتعطيني وش ابي بالوظيفه أجل ؟؟
مشاري :والله مدري وش اقولك يا اصايل انتي ذهب الا ألماس مستحيل ألقى حرمه مثلك
اصايل بثقه : ادري
مشاري : يحق لك توثقين آه بس لو تعرفين وش كثر أحبك , احس قلبي بينفجر من كثر ما احبك
بدر وهو نازل مع الدرج : رح فجره برى الله يجزاك خير موب هنا تونا مأثثين الصاله
مشاري : لا حول وش جابك أنت ؟
بدر : جاي اشوفك وانت تتغزل في حرمتك ابي اتعلم
مشاري : تتعلم مني !! هه أنت تعلم ديره لحالها لعنبوا ابليسك سنتين وزياده وأنت تحب ولا قلت ولا كلمه ولا لمحت ولا بين عليك
أصايل : هو وذيك الخبيثه الثانيه اللي كل ما قلت لها وش فيك قالت مافيني شي مصدعه والا ما نمت سنتين مصدعه وما نامت وأنا المغفله اشوفها قاعده تقرى دوواين وشعر وقصص رومانسيه بس ما نتبهت لها أثاريها غرقانه من وراي
بدر ابتسم إبتسامه عريضه وهو يقول : لبى قلبها تعذبت مسكينه
مشاري : هي هي انت وشو لبى قلبها ترى ما صارت حرمتك لين ألحين
بدر : بتصير إن شاء الله يوم الأربعاء الجاي
أصايل : حددتوا الملكه الا سبوع الجاي ؟
بدر : الأربعاء إن شاء الله
أصايل : ما كأنك استعجلت
بدر بثقه : أبدا , أصلا أنا قلت الثلاثاء بس أبوك قال انه زواج نواف
أصايل : طيب اصبر يومين لين ما تفك العنود الجبس والله بتنهار إن درت أنها بتشوفك ورجلها مجبسه
بدر : من قال أني بأشوفها , أنا بأشوفها يوم العرس
مشاري : بدر لا اللي قاعد تسويه مو في صالحك ولا صالحها , انت المفروض تشوفها قبل وسكت وهو ما يدري وش يقول بعدين كمل
اصايل اسمحي لي في اللي بأقوله بس هذا من مصلحتهم هم الاثنين او بالاصح من مصلحة العنود أكثر ما نبي نعرضها لمواقف سخيفه نبي نجنبها الاحراج
أصايل : فاهمه عليك وأنا رايي من رايك
بدر : وش قصدكم ؟
مشاري : بدر المفروض تشوف العنود قبل الملكه أنت ما تدري عن اللي صار بوجهها ولا تدري كيف صار شكلها علشان كذا لازم تشوفها قبل,, لازم يا بدر تخيل إحساس المسكينه لو شفتها يوم العرس وانصدمت بمنظرها وش بيكون حالها ذيك الحزه
بدر : أنا ما ابيها علشان وجهها وبس تفهمون والا لا اللي احسه تجاه العنود أكثر من إحساس الجاذبيه والافتتان , اللي احسه شي ما اقدر اوصفه لكم أنا ما انكر انها جميله بس جمالها شي وحبي لها شي ثاني . أنا بس من اسمع اسمها قلبي يفز حتى صوتها يوم سمعته حسيت اني بدنيا غير دنياي العنود ملكت قلبي وعقلي تفهمون علي والا لا
مشاري التفت على اصايل وهو مستغرب بعدين التفت على بدر وهو يضحك : وتقول علمني وشلون اتغزل !! تكفى داخل على الله ثم عليك أنت اللي علمني
بدر ضحك : انقلع مناك فاضي لك أنا
مشاري : طيب يصير خير انت خلك تتزوج ان ما نكدت عليك انت وهي وطينت عيشتكم ما اكون ولد ابوي
أصايل : وأنا معك
بدر : أعوذ بالله كل ذا حقد
دخل عليهم عبدالرحمن وهو شايل ولده : ما خلص غداكم ؟
اصايل : الا خالص بس نحتري خالي يقوم راح ينسدح ومابعد قام
عبدالرحمن : فهود من قام ما أكل شي
اصايل : هاته بروح اغديه هو و بدور
عبدالرحمن : تعبتك معي ومع ولدي يا اصايل
اصايل : وش دعوه فهود ولدي الثاني الا قل ولدي الاول على اساس ان بدوري هو ولد العنود
مشاري التفت على بدر : افتح ازرة ثوبك بالله بأشوف قلبك فز والا لا
اصايل خذت فهد وراحت وهي تضحك
بدر : وانت ما ينقال كل شي ؟
عبدالرحمن : وش السالفه ؟
مشاري : اخوك يقول كل ما سمعت طاري العنود فز قلبي
عبدالرحمن موب عاقل قيس زمانه
بدر بعصبيه : ما اردى منك الا هو , إذا حطوا الغداء علموني
***********************************
اليوم الثاني : كلم سلطان ساره وطمنها عليها وما طول معها وسكر بسرعه
وساره اكتئبت وحالتها صارت دمار مثل أول
بدر و العنود فرحتهم ما توصف من الفرحه نواف بعد كان عايش فرحته أخذ زوجته وسافر قبل لا يحضر ملاك العنود أما ساره وسلطان او بالاحرى سلطان اكتفى بالمكالمات السريعه اللي ما تتعدى دقايق معدوده
يوم الاربعاء :
رجعت ساره من الجامعه ورتبت أغراضها وراحت بيت أبو سلطان علشان تطلع معهم لبيت أبو أصايل ويحضرون ملاك العنود وتنام عندهم هاليومين
في الليل اجتمعوا العوايل في بيت أبو أصايل وفرحانين بس العنود ضايق صدرها لأنها مسمره في سريرها وما تقدر تتحرك الا بمساعدة أحد من أهلها وبنات عمانها وعماتها يتمسخرون عليها وخذوا لهم أقلام وقاموا يكتبون ذكريات ملكتها على الجبس وهي قاعده تضحك عليهم وساره حبت تستهبل ورسمت وحده كأنها عروس وحطت لها رجل وحده بس وحطت سهم وكتبت عليها العنود والبنات يضحكون
منى: أثرك فنانه يا ساره
ساره : هههههههههه توك تدرين
هيفاء : ايه بياكسو متلثم وحنا ما ندري
أصايل : بالله ارسمي صورة المعرس المزيون جنبها
ساره : طيب ابعدوا ابعدوا وقعدت تشخبط لين ما رسمت واحد شكله غبي وحطت سهم وكتبت بدر قيس زمانه
جواهر : قسم بالله أنكم مهبل وش خليتوا للبزراين ؟
ساره : خلينا ننبسط
حنان : والله هالجبس صاير كنه جدار مدرسه من هالشخابيط اللي فيه
العنود : بكره إن شاء الله بأفكه خلهم يوسعون صدورهم
التفتت ساره ولقت وجود جالسه تناظرهم وهي مستحيه
ساره نادتها : وجود تعالي حطي بصمتك على رجل العنود
وجود كان ودها تروح بس متردده ومستحيه
البنات حسوا فيها ونادتها العنود : وجيد تعالي مابقى الا أنتي
ساره : بسرعه وجود ترى مابقي الا مساحه صغيره إذا ما جيتي بألعب أنا ومنى فيها x – o
جت وجود وهي مستحيه وكتبت كم كلمه ووقعت
أما ريم كل شوي تتصل عليهم وهي منقهره لأنها في الاربعين وماقدرت تحضر ملكة العنود
ساره كان مبين عليها أنها مبسوطه ومستانسه بس في داخلها مندمره ونفسيتها تعبانه بسبب معاملة سلطان الجافه لها رن جوالها وكان رقم سلطان وماردت عارفه وش بيقول وعارفه انه بخير دام اتصل عليها فضلت انها ما ترد لأنها تعرف نفسها ما تقدر تسيطر على عمرها من تسمع صوته وتشوف اسلوبه معهاتنزل دموعها غصب عنها علشان كذا حبت انها ما ترد احسن من انها تحوس فرحة العالم وتنزل دموعها قدام الناس قامت وحطت جوالها عالصامت ورمته بالشنطه وهي معبسه
سلطان استغرب عقب ما اتصل مرتين ورن التليفون لين ما انقطع ومحد رد عليه
بدر عقب ما تم الملاك ووقعت العنود تمنى انه يدخل عليها ويأخذها ويروح هو وإياها لمكان محد يعرفه كان وده يأخذها ويبعد عن الناس كلهم بس آخر شي رضخ للأمر الواقع وقضب ارضه
مشاري : هاه عساك مبسوط ألحين
بدر : ما راح ارتاح الا إذا صرت انا وإياها بمكان لحالنا
مشاري : أه يالخبيث
بدر : محد خبيث غيرك
مشاري بصوت عالي : أقول يا خال المعرس وده شوف حرمته
بدر انصدم لأنه ما طلب انه يشوفها أصلا
أبو أصايل استغرب لأنه يوم قال لبجر قبل الملاك لازم تشوف العنود رفض
أبو أصايل سكت واستئذن يبي يشوف رأي العنود
دخل على العنود وقالها : العنود تجهزي بدر بيدخل عليك
العنود بصدمه : وشو
أبو أصايل : اللي سمعتيه
العنود بعصبيه : لو تنطبق السماء على الارض مانيب طالعه له
ابو اصايل : ووجع قصري صوتك
العنود : منيب طالعه عليه بهالجبس وهالوجه لو تذبحوني لو تلغون العرس بكبره وتطلقوني منه
أم أصايل : العنود لا تفضحينا مع الجماعه
العنود : أنا قايله لكم من الاول مانيب متملكه وأنا بجبسي وأنتو اللي حددتوا بدون ما تعلموني تحملوا ذنبكم
أبو أصايل : العنود وأنا أبوك
العنود قاطعة أبوها بعناد : لا تحاولون طلعه منيب طالعه تفهمون والا لا
أبو أصايل يكلم خواته وحريم أخوانه والبنات اقنعوها بتفشلنا مع الجماعه
الحريم والبنات حاولوا يكلمونها وهي معانده وراكبه راسها
اصايل: خلاص يبه بأكلم مشاري أخليه يفهم بدر
أبو أصايل وهو معصب : أعوذ بالله من غضب الله
أم أصايل : انت خل الرجاجيل يقلطون عالعشاء ثمن خذ بدر على جنب وقل له
ابو أصايل : الله يعين بس , يالله لا تفضحنا
طلع أبو أصايل وقلط الرجاجيل عالعشاء بعدين نادى بدر وطلع معه للمجلس الثاني
أبو أصايل : والله يابدر مدري وش أقولك والله أني منحرج منك
بدر : خير يا خالي ؟
أبو أصايل : والله أنت عارف أن العنود لين ألحين مجبسه رجلها ومابعد فكتها ولا تتحرك من السرير واجد وعاد هي يوم قلت لها أنك تبي تشوفها استحت وتفشلت تقول ما ابيه يدخل علي وأنا عالسرير
بدر ابتسم : ما عليه يا خالي لا تجبرها أدري انها مستحيه وأنا مثل ما انت شايف ماقلت شيلأني عارف حالتها وما بغيت أحرجها بس مشاري الله يصلح هو اللي تكلم
أبو أصايل : عالعموم هي بكره موعدها بتفك الجبس إن شاء الله والله يحيك بعد العشاء تعال وشفها وأجلس معها لين يطيب خاطرك
بدر : زين يا خالي ماصار الا الخير لا تنحرج ولا شي السالفه ما تسوى
أبو أصايل وهو منقهر : من ألحين أقولك الله يعينك عليها تراها عنيده راسها يابس
بدر : ههههههههههه ولا يهمك يا خالي أنا بألين راسها إذا خذتها
أبو أصايل ابتسم : الله يقويك ويكون في عونك , يلله أمش خلنا ندخل مع الرجاجيل
بدر : اسبقني يا خال بأدق أبرتي وألحقك
سلطان في جهه ثانيه كان قلقان ونفسيته مو بعيده عن نفسية ساره وطلع وجلس في الصاله
متعب : وش فيك يا سلطان ؟
سلطان : احس اني تعبان تعبت من هالدنيا مدري متى بأرتاح
متعب : وش متعبك يا خوي فضفض تكلم طلع اللي في صدرك
سلطان : متعب أنت شايف عيشتي ضايع منيب عارف ارض من سماي علاقتي مع ساره متوتره وفيونا اللي مدري من وين طلعت لي
متعب : أنت لو تشيل الحقيره ذيك من راسك بتتعدل أوضاعك
سلطان : وش دخل فيونا بعلاقتي مع ساره
متعب : على بالك انا غشيم وما أحس فيك أنت من طلعت فيونا مره ثانيه وأنت مكالمتك مومثل أول مع ساره كل مكالمتك ما تتعدى الدقايق كلها كيف الحال واخباركم وتقفل بالله أمس مكالمتك حتى الخمس دقايق ما تعدت اول ما وصلنا كنت تكلمها بالساعات بس من طلعت اللي ما تتسمى وأنت متغير حتى نفسيتك تغيرت اول ما وصلنا كنت تسولف وتضحك وكل مما فضيت اتصلت على زوجتك أما الحين قبلك قافل على عمرك بغرفتك والا قابر عمرك بالشغل
سلطان : متعب انت ما تعرف وش اللي في قلبي صدقني فيونا ما غيرت شي فيني من ناحية ساره , المشكله في ساره نفسها بتجنني هالبنت يوم جلست يومين ما كلمتها بغت تموت من الخوف علي واتصلت على ابوي تسأله عني وأول ما كلمتها جلست تصيح من خوفها علي وعقب ما تطمنت علي وجلسنا نسولف مدري شلون دخلنا في سالفة الحب وهالامور وسألتها قلت لها تحبيني قالت لاتتوهم وشو حبه
متعب : طيب أنت قلت لها انك تحبها
سلطان رفع راسه وقام يناظر متعب بإستغراب وكأنه قاعد يتكلم بلغه ما يفهمها : أحبها ؟؟
متعب : أيه موب أنت تحبها
سلطان : وش قاعد تخربط أنت ؟
متعب : ليش أنت ما تحب حرمتك ؟
سلطان : احبها عاد ؟
متعب يناظر سلطان ووده يقوم يخبطه على راسه : إذا ما حبيت حرمتك من تحب أجل
سلطان سكت وقام يناظر متعب وما عنده رد
متعب : سلطان أنا أعرفك زين واكثر من أي أحد في هالدنيا أشوفك إذا جيت تكلم ساره ذيك الايام شلون تصير مبسوط ومستانس من تسمع صوتها والا بتسامه تشق وجهك وإذا صكيتها نها نفسيتك تتغير بالله عليك هذا وش يسمونه
سلطان : صحيح أحس بشي ناحية ساره بس ما يوصل للحب
متعب : أجل وش تسمي هاللي تحس به
سلطان : مدري
متعب وهي يبتسم : هذا اسمه حب يالحبيب
سلطان بعصبيه : حب في عينك , لا تنسى أني قد حبيت من قبل واعرف وشهو الحب
متعب : وتسمي معرفتك في ذيك الوقحه حب سلطان أنا عشت معك في التجربتين وصدقني ما عمري شفتك مبسوط كثر ما اشوفك مبسوط من تسمع صوت ساره حتى حرصك عليها وعلى مكالمتها وكل مره تكلم فيها ابوك وجدك توصي عليها وحزنك يوم سافرنا.. لا تقول إن كل ذا موب حب أنت حطيت في بالك أن اللي كان بينك وبين فيونا حب وخليت هالشي يرسخ في بالك وما عندك أي نيه تقتنع بغير هالكلام مع انه غلط من أساسه, اللي بينك وبين فيونا أبدا ما كان حب يمكن تفاهم ويمكن صداقه قويه بس أبدا ما كان حب.. انت اجلس مع نفسك واسأل عمرك هل الاحساس اللي تحسه مع ساره هو نفس إحساسك يوم كنت مع فيونا ؟ سوالفك حرصك وناستك نبضات قلبك لهفتك أسأل نفسك إذا كنت جربت كل هالاشياء يوم كنت مع فيونا والا لا .. بعدين أنت شلون تبي ساره تحبك وانت تعاملها هالمعامله عمرك قلت لها انك تحبها والا قلت لها انك تشتاق لها قد مر عليك يوم وخذتها بحضنك وقلت لها كلام حلو ؟؟
سلطان : قربت منها مره وحضنتها بس شكلها خافت مدري استحت وبعدت عني
متعب بإستغراب : وش قصدك استحت ؟
سلطان : ما بعد تعودت علي ولا تعودت اني اصير قريب منها
متعب متفاجأ : ليش انت ماقد لمستها ولا قربت منها ؟؟
سلطان سكت وطمن راسه
متعب بإستغراب : لا تقول ما بعد لمستها ولا قربت منها
سلطان هز راسه وهو ساكت
متعب : صاحي أنت ؟؟
سلطان سكت ما يدري وش يقول جلس يكلم نفسه آه بس ما تدري وشلون اتعذب إذا صرت جنبها كل مره اكون قريب منها واشم عطرها ودي اخذها واضمها وخليها بحضني ما تدري وشلون اتعب علشان اسيطر على عمري لأني ما ابي ما اخوفها
متعب : سلطان راجع حسابتك وفكر في حياتك وحياة البنت اللي ما تدري هي متزوجه والالا , إذا تبي تعرف ساره تحبك والالا فكر ليش هي تحملت وجلست معك ووافقت تعيش معك هالحياة حتى لو هي انكرت وقالت ما احبك ترى هي عندها كرامه ما اتوقع ان فيه بنت في العالم ترضى تنزل من قدرها وتقول احبك لواحد يتعامل معها بنفس اسلوبك ,ترى المبادره دايم تكون من الرجال لا تنسى أ المرأه بطبعها تستحي أنت ماسألتها هي تحبك والا لا إلا وانت متأكد من هالشي صح والا لا ؟؟
جلس سلطان وهو ساكت ومارد بكلمه ولا علق على كلام متعب
متعب حب يخلي سلطان لحاله وراح ودخل غرفته وهو يدعي أن الله يهدي سر سلطان ويطمن باله
اتصل سلطان مره ثالثه على ساره وماردت قام واتصل على خالد اخوها منها يسلم ومنها يتطمن
خالد : هلا حي الله النسيب
سلطان : الله يبقيك ويسلمك
خالد : وش اخبارك وش علومك وش الدنيا بك
سلطان : والله مشاغل الدنيا , أنت وش اخبارك وش اخبار الاهل بشرني عنكم
خالد : والله الحمدلله كلنا بخير
سلطان : الله يديم عليكم الخير يارب
خالد : انت وش اخبارك دايم اسأل عنك ساره واقولها سلمي عليه بس شكلها من تسمع صوتك تخق وتنسى
سلطان : هههههههه لالا تخاف وصلت لي سلامك مره
خالد : شف النكبه مره وحده بس وأنا كل يوم اقولها سلمي على سلطان
سلطان : حتى أنا دايم اقول سلمي عالاهل
خالد : ابشرك ما قد وصلت لنا سلامك أقولك من تسمع صوتك والا يحي طاريك تخق علينا
سلطان : ههههههههههههه يا حبك للكذب
خالد : أكذب !! أيه بلاك ما شفتها من رحت وهي صايره جلد على عظم ما تأكل ولا شي وصايره عصبيه حد ما تصارخ وهي داخله وطالعه وكل ما قلنا وش فيك قالت مافيني شي لين ما فضحتها سوسن وقالت انك السبب عاد تعال شف وجه سويره يوم فضحتها سوسن قدامنا بغت تقوم تذبح سوسن بس ربك ستر
سلطان استانس من كلام خالد : ههههههههههههههه ولو سمعتك الحين ذبحتك
خالد : عاد خلك رجال ولا تقولها اني علمتك
سلطان : لا توصي أصلا منيب قايل لها اني كلمتك تطمن يالخواف
خالد : خواف ! يا رجال ذي فيها قص رقاب وفيها لسان سويره اللي وش طوله
سلطان : يلله أجل ما اطول عليك بس قلت اسلم واتطمن عليك واشوف اخبارك
خالد : ما تقصر يابونسب
سلطان : الا اتصل على ساره من شوي وما ترد علي
خالد : ايه ساره في بيتكم تو اسأل امي عنها قالت انها راحت لبيت اهلك
سلطان: زين ما اوصيك عالمدام
خالد : تطمن لا توصي مدامتك في عيوني غصب علي طبعا
سلطان : ههههههههههه ايه خلها بعيونك دايم , يالله فمان الكريم
خالد : فمان الله , الله معك
***********************************
في بيت أبو أصايل : أم سلطان يلله يا ساره نمشي تأخر الوقت وريم لحالها في البيت
ساره ابتسمت : لا تخافين عليها فيصل معها
أم سلطان : هي قالت لك
منى : ايه يوم اتصلت على طارق قال ان فيصل تعشى وطلع بسرعه راح لريم
أم سلطان : بعذرها هجدت اشوف لها ساعتين ما اقلقتنا بمكالمتها
النود : لا أحد يروح تونا مستانسين
أصايل جت وجلست جنب العنود وبصوت واطي مشاري يقول ان بدر آخذ رقمك ويبي يكلمك
العنود : أصايل لا تكفين
أصايل : وشو اللي لا
العنود : مابي اكلمه ولا ابي اشوفه لين يوم العرس
أصايل: تستهبيلن انت والا جاده
العنود : لا والله جاده تكفين أصايل كلمي مشاري قولي له مابي أكلمه
أصايل: يلله عاد عن المصاخه والدلع الرجال بيموت علشانك وأنت ولا همك
العنود : حتى أنا بأموت علشان أكلمه بس إذا كلمته وقال بأشوفك منب قادره ارده
أصايل : اقول ورى ما تلفقينه وتتصرفين مثل الحريم
العنود : أصايل راعي مشاعري توني مالكه عليه مالي كم ساعه
أصايل: عنيده انثبري عاد أنا ملك علي مشاري وطلعت اجلس معه موب كلمته وبس
العنود انت ما تستحين انا استحي
أصايل تناظرها بعصبيه
العنود : علشاني أصول قولي له موب اليوم بكره عالاقل تكفين تكفين
أصايل : أمري لله موب جاي العرس الا وبدر طالع في راسه نخل بسببك
العنود : يالبى راسه بس
اصايل : بتجلطيني أنت
العنود : اللي يكرهونك يارب
أم أصايل : وش عندكم أنت وهي ؟
أصايل قامت من عند العنود وهي تقول : ولا شي يمه ولا شي
كلمت أصايل مشاري وقالت له وهي مبسوط لأنه صاير مرسال الغرام لبدر ووده يذله شوي
مشاري راح لغرفة بدر ودخل عليه
بدر : ما تعرف تطق الباب ؟
مشاري : لا
بدر : أجل تعلم بكره بيصير عندي حرمه تبي تدرعم وبس
مشاري : على طاري الحرمه اتصلت علي أصايل تو وتقول ان العنود تعتذر عن استقبال المكالمات الهاتفيه اليوم
بدر : وشو ؟
مشاري : اللي سمعته
بدر : مشاري عن الاستهبال ورفعة الضغط
مشاري : والله العظيم نيب استهبل ولا امزح تو كلمتني أصايل وقالت أن العنود مستحيه اليوم ومنحرجه وتقول لا يكلمني اليوم
بدر : من جدك أنت ؟
مشاري : أي والله حلفت لك
بدر : وش سالفتها ذي اليوم مارضت ادخل عليها ومكالمات ما تبي ترد علي لا تكون مغصوبه علي مثل ما انغصبت على نايف
مشاري : مغصوبه !! مستحيل العنود تحبك وتموت عليك انت داري أنك من خطبتها وهي كل يوم تتصل على اصايل بس علشان تسأل عنك
بدر : صدق ؟
مشاري : اسأل أصايل
بدر : أجل ليش تتصرف كذا
مشاري : يمكن صدق مستحيه ترى هي منطويه على نفسها شوي موب إجتماعيه
بدر جلس شوي يفكر وهو مستغرب حركة العنود وسالةف الحياء ما دخلت راسه
بدر : مشاري أبي منك خدمه
مشاري : وشهي ؟
بدر : أبيك تعرف متى موعد العنود بكره في المستشفى
مشاري : ليش ؟
بدر : أبي اروح معها للمستشفى
مشاري : ألحين مكالمه ما رضت تكلمك تبيها تطلع معك لا وللمستشفى ويكشفون عليها قدامك !! تحلم أنت ؟
بدر : مشاري ابيك تساعدني أنت وأصايل أبي أكلمها بأي طريقه تكفى مشاري طلبتك
مشاري بإبتسامه خبيثه : كم تدفع طيب
بدر : وأنت دايم مصلحجي ما تسوي شي لله
مشاري :اخلص علي تب اساعدك ادفع لي
بدر : طيب دبرني وابشر باللي تبيه خلني اشوفها اول
مشاري : بأكلم أصايل واتشاور معها وندبر لك حل
بدر : زين عطني خبر اول بأول تكفى
مشاري: الله يعينك على بلواك
***********************************
سلطان جلس يفكر في كلام متعب كان محتار يحس ان كلام متعب صحيح بس ما يدري وش اللي مانعه من الاعتراف لنفسه وللعالم بهالحقيقه
ساره طلعت مع ام سلطان لبيتهم ودخلت ولقت ريم في غرفتها وعندها فيصل
أم سلطان : تعالي ياساره أنا قلت للخدامات يحطون أغراضك في غرفة سلطان , ريم قالت أنك بتكونين مبسوطه في غرفته أكثر من أي مكان
ساره سكتت وما علقت مع أن ودها تنام في غرفة سلطان الا أنها عارفه انه بيزعل إذا درى أنها تطفلت على غرفته
دخلت ساره الغرفه وكان واضح ان الغرفه رجاليه من أثاثها والاغراض اللي فيها كان فيها بعض اغراض بسيطه من اغراض سلطان كم عطر عالتسريحه وفي الدولاب كم قطعه من ملابسه جت تفتح الاراج بعدين حست انها قليلة ادب لو فتشتها حطت ملابسها في الجهه الفاضيه من الدولاب وباق الا غراض حطتها عالتسريحه جنب اغراضه دخلت الحمام وغسلت وجهها واسنانها بعدين طلعت ولبست بيجامتها ودخلت السرير وهي ترتجف ما تدري ليه جلست شوي تسوتعب الوضع وهي منسدحه على ظهرها بعدين تذكرت انها تركد الجوال علشان تقوم الصباح وتنزل تفطر مع حمولتها طلعت الجوال وشافت مكالمات سلطان وترددت ودها تكلمه وتسمع صوته وودها تطنشه آخر شي اتصلت عليه
سلطان كان منسدح ويهوجس رن جواله وشاف رقم ساره ورد
سلطان : آلو
ساره : مرحبا
سلطان : يا هلا
ساره : صحيتك ؟
سلطان : لا ما بعد نمت
ساره : اشوى خفت اني صحيتك
سلطان : لا تطمني كنت صاحي
ساره : آسفه ما رديت على مكالماتك كان جوالي عالصامت
سلطان : خفت عليك
ساره تكلم نفسها حس بتأنيب الضمير يمكن !! والا قال كذا من باب الواجب
ساره : لا كنا في ملاك العنود اليوم
سلطان : ماشاء الله اليوم تملكت
ساره : أيه الله يوفقها يارب
سلطان : آمين
سلطان : رحتي مع أهلي ؟
ساره : أيه قبل كم يوم خالي قالي تعالي عندنا كم يوم واليوم رحت لبيتكم
سلطان : بتنامين في بيتنا ؟
ساره : أيه
سلطان : بتنبسط ريم أجل
ساره : لا ريم عندها فيصل يمكن ينام عندها
سلطان : وأنت وين جالسه أجل ؟
ساره بإحراج خالتي حطتني بغرفتك
سلطان : بغرفتي ؟
ساره وهي مستحيه : سلطان إذا ما ودك بأقول لخالتي تشوف لي غرفه ثانيه ادري أنه وقاحه مني استخدم غرفتك وأنت مو موجود بس خالتي هي اللي قالت لي اجلس فيها
سلطان : ساره وش هالكلام وش وقاحته أنت زوجتي وغرفتي هي غرفتك أنا وأنت واحد بالعكس أنا مبسوط عالاقل بأكون على بالك هاليومين
ساره كان ودها تصرخ وتقول ارسى لك على بر ما عمرها شافت واحد مزاجه يتقلب بسرعه مثل سلطان حست انها لو تعيش معه مليون سنه مستحيل تفهمه !!
سلطان حب يقطع الصمت : شلونك ساره ؟
ساره : الحمدلله بخير , أنت شلونك ؟
سلطان : بخير الحمدلله مع ان الاسبوع كان ضغط بشكل رهيب ,, سلطان كان وده يصلح اللي الامور ما بينهم وما يدري وش يسوي
ساره : الله يكون في عونك ويساعدك
لطان : كيف الاهل ؟
ساره : كلهم بخير ويسلمون عليك
سلطان ابتسم ما خقت على قول خلود يمكن زعلانه : الله يسلمك وإياهم
سلطان : أجل جالسه بغرفتي
ساره بحياء : أيه بس والله ما فتشت شي
سلطان : هههههههههه خذي راحتك حلالك سوي اللي تبين اصلا ما صارت غرفتي
ساره بإستغراب : أيش ؟
سلطان : أنا ما عندي الا غرفه وهي غرفتنا وفي بيتنا
ساره مسكت الجوال وتناظر فيه وهي ميب مصدقه اللي قاعده تسمعه ما تدري تضحك وتنبسط والا تزعل لأنها عارفه ان الامور ما تصلح بينهم الا لأنها بتتعقد بصوره أكبر وسكتت ما تدري وش تقول
سلطان : ساره وينك ؟
ساره : معاك
سلطان : أنا آسف الاسبوع اللي راح مكالمتي لك كانت قليله ومستعجله بس مثل ما قلت لك ضغوط
ساره : معذور يا بعدي
ساره تحاكي نفسها أعتذر والا لا كانت متردده ومحتاره ماتدري وش تقول والا وشلون تبرر موقفها ...
ساره : سلطان أنا آسفه
سلطان : على وشو ؟
ساره بإحراج : سلطان لا تعصب الموضوع علي
سلطان : ساره صدقيني ماني فاهم وش تقصدين ؟
ساره بإرتباك : سلطان ذاك اليوم يوم طريت الحب ومالحب تمسخرت وضحكت بس والله ما كنت اقصد اني اتمسخر
سلطان : أجل وش كنت تقصدين ؟؟
ساره : صدقني بيجي اليوم اللي تعرف فيه قصدي وتعرف ليش رديت بذاك الرد
سلطان : وليش ما تقولين لي ألحين وش اللي يمنع ؟
ساره : سلطان تكفى لا تضغط علي ألحين
سلطان ابتسم وما حب يسكر السماعه الا لين يخليها تقول كل اللي في خاطرها
سلطان : يعني أفهم من كلامك أنك تحبيني
ساره بخوف وارتباك وحياء : سلطاااان
سلطان : عيونه
ساره من كثر ما هي مرتبكه وخايفه ما انتبهت للكلمه اللي رد فيها عليها
ساره : قفل عالموضوع سلطان
سلطان : ساره قوليها
ساره سكتت وما ردت
سلطان : ساره تسمعيني ؟
ساره : أيه
سلطان : قولي احبك ابي اسمعها منك
ساره بإحراج : سلطان يكفي
سلطان : أدري انك تحبيني صح والا لا
بعد سكتت ساره وما ردت
سلطان : زين قولي أيه عالأقل
ساره وهي متفشله : أيه
سلطان : وأخيرا ما بغت تطلع زين يالله الكلمه الثانيه قوليها وريحيني ابي اسمعها منك
ساره : سلطان الله يخليك كافي
سلطان : ساره تكفين
ساره : إذا رجعت من السفر
سلطان : آه منك مستكثره علي كلمه وحده لو انت قدامي خليتك تقولينها بالغصب
ساره عقب ما اعترفت كانت تبي تغير الموضوع وسألته : كيف الحال سلطان
سلطان : لا تغيرين الموضوع وتعالي قولي ليش عصبتي ذاك اليوم مع انك تحبيني
ساره : خفت تزعل
سلطان بإستغراب : أزعل !! أنت ما تدرين وشلون أنا مبسوط ومستانس يوم عرفت أنك تحبيني
ساره : صدق ؟
سلطان : أي وربي حسيت أني اسعد واحد في الدنيا
ساره : بس يوم كنا في فرنسا تذكر يوم قلت نستمر سنه ..
سلطان قاطعها :ساره انسي كل اللي قلته من قبل وكل اللي صار فيه كلام كثير بأقوله لك وأشياء كثيره بتتغير أول ما ارجع إن شاء الله
ساره : وشهي ؟
سلطان : ياشفاحتك مافيك صبر لين ما ارجع ؟
ساره : لا
سلطان : أجل اجلسي كلي في عمرك لين ما ارجع
ساره : سلطاااان
سلطان وهو يبتسم : لا تحاولين
ساره : الله يخليك
سلطان : أبدا
ساره : وأنا وش يصبرني لين ما ترجع
سلطان : علمي نفسك
ساره بمزح : خبيث
سلطان بنفس الاسلوب : نجسه
استمروا على هالحال طول المكالمه وكل ما حاول سلطان يرجع للموضوع غيرت ساره السالفه لين ما سكت من نفسه وما حب يضغط عليها
أذن الفجر وحست ساره انها صدق طولت مع أن ما ودها تسكر بس الوقت تأخر ويمكن خالتها والا خالها يجون يطقون عليها الباب علشان يقومونها للصلاة
ساره : سلطان
سلطان : لبيه
ساره : آذن الفجر
سلطان : طولت عليك
ساره : لا بس ودي اسكر قبل ما يقومون أهلك
سلطان : زين يا بعدي روحي الحين صلي ونامي وبأكلمك قريب إن شاء الله
ساره : زين تصبح على خير
سلطان : تلاقين الخير
ساره : فمان الله
سلطان : في حفظ الله انتبهي لنفسك
ساره : وأنت بعد
سلطان : من عيوني , يلله مع السلامه
ساره : مع السلامه
********************************************
اليوم الثاني بيت ابو بدر
دخل مشاري على بدر
بدر : هاه بشر وش سويت بالموضوع ؟
مشاري : تدري على حالتك ذي المفروض نسميك بودرو على وزن روميو
بدر وكبده حايمه من مصالة أخوه : يا خف دمك
مشاري بأبتسامه عريضه : أدري
بدر : اخلص
مشاري : اتصلت على اصايل وقلت لها قالت خلاص بتخلي السواق يوديهم للمستشفى وانت خلك هناك قبل الموعد واول ما يوصلون بتقول أصايل للسواق يرجع للبيت وأنت عاد خلك معهم لين ما يخلصون بعدين رجعهم للبيت
بدر: طيب خالي يدري عن الموضوع ما ابي اخها معي وهو ما يدري
مشاري : ايه اصايل تقول قلت وقال احسن بعد علشان تتعود عليك بعد
بدر : طيب أنا ابي اسولف مع العنود لحالنا
مشاري : سولف من ساد فمك
بدر : حرمتك النشبه بتكون موجوده
مشاري : بعععد حرمتي صارت نشبه ؟
بدر : يا خوي قدر الموقف حط نفسك مكاني
مشاري : وش تبينا نسوي لك يعني
بدر : تجي معي للموعد وتأخذ حرمتك أول ما توصل
مشاري: لا والله مسخره على آخر عمري صاير أخدم عند البيه بدر ومدموزيل العنود
بدر : مشاري إذا ما فزعت مع اخوك الحين متى تفزع معه ؟
مشاري : آه بس تدري اني مقدر ارفض لك طلب
بدر نط عند اخوه وباسه
مشاري : الله يستر من عنيده هذي ما بعد دخلت بيتنا سوت فينا كذا أجل إذا شرفت وش بيصير ؟
بدر : موب صاير إلا كل خير إن شاء الله
*********************************************
العصر وصلت العنود مع اصايل للمستشفى وراحت أصايل وجابت كرسي علشان تدف العنود وتوصلها لغرفة الدكتور وأول ما وصلت لغرفة الدكتور وقبل ما تدخل رنت على جوال مشاري رنه وانتظرت شوي بعدين شافت بدر جاي من بعيد والعنود ما كانت منتبهه وصل بدر عندهم بعدين تكلم : السلام عليكم
العنود من قبل ما ترفع راسها وتشوفه عرفته بصوته وشهقت
أصايل ردت السلام وهي تنغز العنود علشان ما تقول شي
بدر : أصايل مشاري ينتظرك
أصايل : يلله أجل عن أذنكم
العنود مسكت في عباية أصايل وكنها بزر ماسك عباية امه
أصايل سحبت عبايتها بقوه وراحت بسرعه والعنود معصبه وما تدري وش تسوي ما توقعت أن اختها تسوي فيها هالمقلب ومع بدر يالذات
بدر : العنود وش فيك خايفه ؟
العنود سكتت وما ردت
بدر نزل لين ما صار في مستواها ومسك يدها : العنود لا تستحين ولا تخافين أنا ما صدقت أن هاللحظه تجي علشان اشوفك او اسمع صوتك عالاقل وتنهد بصوت مسموع بعدين كمل : آسف إذا ضايقتك بجيتي بس حبيت أكون معك في هاللحظه بس إذا أنت متضايقه أنا مستعد اروح واتصل على اصايل اخليها ترجع وتحرك من مكانه وجاء يسحب يده بس هالمره العنود اللي مسكته التفت عليها بدر وابتسم لها وسألها : تبيني أجلس معك ؟؟
هزت راسها وهي مستحيه
بدر : يلله أجل خلينا ندخل عالدكتور
دخل بدر وهو يدف كرسي العنود عالدكتور وقام الدكتور يسألها كم سؤال وهي تجاوب وهي منحرجه ومستحيه وبدر ساكت
والتفت الدكتور على بدر وسأله : أنت أخوها ؟
بدر ابتسم : لا زوجها
العنود حست بشي حلو يسري في جسمها يوم سمعت كلمة زوجها هالكلمه لها انبسطت ووحست ان لها طعم على انها كلمه بسيطه من كم حرف الا ان احساسها وهي تسمعها غير خصوصا وهي طالعه من فم بدر
الكتور حول سؤاله للعنود : مدام العنود انت حامل
العنود انحرجت واستغربت وودها تقوم تكسر المكتب على راس الدكتور مع ان سؤاله يعتبر عادي لأنه دكتور اولا ولانه ما يدري عن حياتها أصلا
ردت عليه : لا
الدكتور : متأكده
العنود كان ودها تقوم تصرخ في وجه الدكتور
بدر التفت عالدكتور وهو رافع حواجبه
الدكتور فسر لهم الموضوع : أنا بأحولها على قسم الأشعه علشان نتأكد من الجبر قبل ما نفك الجبس وجبيت أتأكد إذا المدام حامل أولا لأن الاشعه مثل ما تعرفون خطره عالحوامل
كتب لهم الدكتور التحويل وراحت وسوت الاشعه ورجعت وطمنها الدكتور أن رجلها جبرت وطلب منها تجلس عالسرير ونادى الممرضه تساعدها علشان يشيلون الجبس بس بدر قام معها وساعدها بدال الممرضه ومسك يدها ووقف جنبها
اول ما رفعت الممرضه الشرشف هي والدكتوره التفتوا على بعض يوم شافوا الرسومات اللي عالجبس والتواقيع , رفع الدكتور راسه لبدر وقعد يضحك هو وإياه
الدكتور علشان يلهي العنود عن منظر المقصات والمشارط اللي بتقص الجبس كمل سوالفه وهو يضحك : هذا رسمك يالعنود
العنود تمنت الارض تنشق وتبلعها من الفشيله قامت تدعي على بنات عمها وعلى ساره وعالساعه اللي خلتهم يشخبطون فيها ما تدري هي متفشله من الدكتور السعودي اللي قاعد يتمسخر والا من بدر اللي قاعد يضحك حتى الممرضه قاعده تضحك
الدكتور يتمسخر : ماشاء الله زوجتك موهوبه
بدر وهو يضحك : أيه أدري لها مستقبل مشرق في الفن التشكيلي
العنود ماتدري تضحك والا تصيح
الدكتور : تقدرين إذا خلصتي تأخذين الجبس معك وتحطينه لوحه في بيتكم
بدر حس ان العنود معصبه من مسكتة يدها بس ما قدر يسكت وقعد يضحك
الدكتور : بس لو أنكم استفدتوا من هالمساحه وخليتوا عيالكم يتعلمون فيها الكتابه كان افضل , وسأل بدر : عندكم عيال ؟
بدر : لا
الدكتور : الله يرزقكم الذريه الصالحه
بدر : اللهم آمين
الدكتور بعد ما خلص وفك الجبس : الحمد لله عالسلامه
العنود : الله يسلمك
الدكتور وهو يكلم بدر : طبعا ما اوصيك لا تتحرك كثير ولا تمشي كثير الا فضل ترتاح كم يوم قبل ما تمشي عليها
بدر : إن شاء الله يا دكتور
الدكتور : إذا تبون الجبس للذكرى تقدرون تأخذونه
بدر : ههههههههههههه أكيد بنأخذه وسلم عالدكتور وشكره بعدين راح ومسك العنود وطلع هو وإياها
بعد ماركبت العنود السياره التفت عليها بدر : اقول الحمدلله عالسلامه والا مبروك ملاكنا
العنود بحياء : الله يسلمك ويبارك فيك
بدر : شلونك يالعنود ؟
العنود : بخير الحمدلله , أنت شلونك
بدر : دامني معك فانا بألف خير
العنود : دوم يارب
بدر : تدوم أنفاسك يارب ومسك يدها ورفعه لفمه وباسها
العنود شعوهرا ما يوصف من الحياء
بدر : ليش مستحيه مني أنت زوجتي ألحين
سكتت وما ردت
بدر وهو ماسك يدها : عنوده حبيبتي تكفين عاد ابي اسمع صوتك ابي أسولف معك ما أبيك تستحين
العنود : أنت تأمر
بدر : الله لا يحرمني منك , وألحين وين نروح الدكتور ومانعك من المشي والبيت ما نبي نروح له
العنود : عادي ترى اقدر امشي
بدر : وتبيني أخليك أنا ما صدقت على الله قمتي بالسلامه , خلينا نروح أي كافي نجلس فيه
العنود خافت انهم إذا راحوا لكافي يقولها تكشف وجهها وهي ما تبيه يشوفها قبل لا تبدأ تعالج وجهها
العنود : خلنا ندور بالسياره أحسن
بدر : تأمرين أمر كم عنوده عني
العنود : يسلمك ربي
تمشوا شوي بعدين تكلم بدر : أمس خالي سألني قال متى تبي العرس وقلت الرأي راي العنود
العنود : وأنت متى تبيه
بدر : انا لو تقولين اليوم قلت هذي الساعه المباركه
ابتسمت العنود : مستعجل
بدر : لا تلومني العذاب اللي عشته موب سهل
العنود : الله لا يعيد ذيك الايام
بدر : آمين وكمل : وش رايك نخليه بعد شهرين ؟
العنود خافت ان الوقت ما يساعدها علشان العلاج : عطني فرصه كم كم يوم اشوف اموري واشوف كم الوقت اللي اقدر اجهز نفسي فيه بعدين ارد لك
بدر : العنود أنا أبيك بملابسك اللي عليك إذا اخذتك انا بأجهزك باللي تبين
العنود : بدر
بدر : يالبى من قال بدر عيونه وقلبه
العنود : تسلم لي يارب , عطني فرصه أدري انك مستعجل بس ما يصير ما اجهز نفسي
بدر : زين لا تطولين علي
العنود : لا إن شاء الله ما راح أطول
بدر : والعرس تبينه كبير والا مختصر
العنود : اللي يريحك
بدر : أنت تستاهلين أحسن عرس في الدنيا بس أشوف ان العرس الكبير بيأخر الموضوع زياده وش رايك نسوي عرس مختصر أحسن
بدر كان خايف على مشاعر العنود إذا حط عرس كبير عارف أن الناس ما راح يخلونها في حالها وبيوصلها كلام عن اللي صار بوجهها وعن تشوهها وهالشي خلاه يستعجل الامور ويكتفي بعرس مختصر
العنود : خلاص اللي يريحك
بدر : أجل العرس يكون مختصر والتاريخ أنت اللي تحددينه بس لا تأخرينا كثير
العنود : إن شاء الله
بدر : ليش أمس ما خليتني ادخل عليك
العنود بإحراج : ما كنت مستعده
بدر : ما يحتاج تستعدين
العنود تكلمت وهي مرتبكه : بدر ممكن أطلب منك طلب
بدر : انت تأمرين أمر مو بس تطلبين عيوني لك
العنود : تسلم العيون وراعيها , بدر أنا ما ابيك تشوفني قبل يوم العرس
بدر التفت عليها مستغرب : ليش ؟؟
العنود : من غير ليش تكفى قول تم
بدر ضاق صدره من طلبها ما يدري ليش طلبت هالطلب بس ما قدر يردها
بدر : مع أن طلبك صعب علي حيل واحبطني إلا أني ما اقدر أردك
العنود : مشكور ياقلبي الله لا يحرمني منك
بدر : ولا يحرمني منك بس إذا هذا طلبك لا تستغربين إذا كل يوم كلمتك وحاولت اقنعم تعجلين بالعرس
العنود : إن شاء الله موب صاير الا اللي يرضيك
بدر : آه يالعنود وربي منيب مصدق أني معك وانك صرتي زوجتي أحس اني أحلم
العنود : موب انت لحالك حتى انا
بدر : تحبيني يالعنود ؟؟
العنود بحياء : احبك أكثر من روحي
بدر : الله لا يحرمنا من بعض قولي آمين ويتمم علينا فرحتنا
العنود : آمييين
كملو سوالفهم وهم يتمشون مع بعض لين ما أذن المغرب ونزل العنود في بيتها وقلبه وعقله معها بس وعدته انها تكلمه في الليل وهالشي طمنه انها خذت عليه اكثر من أول ...
سلطان .. ساره .. فيونا .. ؟؟؟
بدر والعنود والمستقبل اللي ينتظرهم واللي ماكانوا متوقعينه ؟؟
يتبع ...
