ســــاعدوني خوف رجفة رهاب ارتباك

[رقية // الكويت]

السلام عليكم ورحمة الله وبركاته

والله يابنات اكتبلكم ودموعي اتصب ابي نصيحة او مساعده تكسبون فيني اجر

ياعباد الله اللي فيني شئ موطبيعي احاول اشغل نفسي بمواهبي وحفظ القرآن إلا إني ماقدر اسيطر على هالشئ استغفر الله العلي العظيم انا بنت عمري بالثلاثينات وملتزمة وهذ ا من فضل ربي ولا ازكي على الله احد

مشكلتي اللي موقادرة اتخلص منها اعاني من الرهاب بشكل موطبيعي وفيني حياء زايد لدرجة كأني خبله اللي يشوفني ورب الكعبة اللي يمدحني او ينتقدني ارجف وعروقي احسها ناشفه ويحمر ويهي


رجفة في يدي وبراطمي وتسارع في ضربات القلب ماانزل اي مكان مع خواتي ورب الكعبة ماروح مجمعات ولا إسوقه ولا يمعات فيني رهاب احس الناس اطالعني زادت حالتي اكثر من شهرين لدرجة

الحبس والله ورب الكعبة حبست نفسي في البيت و سويت بضاعة وحجزت بافكاري وكنسلت امس ماقدر اروح رقعه ورجفة وحالتي مايعلم فيها غير الله سبحانه لولا القرآن وتمسكي بالله عز وجل وخوفي منه


وكانوا خواتي امباشرين بس انشغلوا الحين يحاولون يساعدوني لكن ايأسوا مني
بنات الله لايوريكم اللي احس فية يرتفع ضغطي وحبة تحت للسان ومره هبوط قوي ماادري شسوي والله

في اليمعات انحاش في غرفتي وماروح ماقدر اتكلم عدل كلامي مو مفهوم احسه اشهالحاله يمكن عشان هملت نفسي وانا صغيرة زادت الحاله عندي كنت اقول انا ماراح اتزوج لأني لايمكن اعيش مع ريال مستحيل انا اخواني ماقعد معاهم ولا آكل وياهل استحي حيل منهم

والله يابنات احس ربي خلقني غير وإبتلاني استفغر الله واتوب إليه سامحني ياربي ومن همي طلع بهاق في جسمي من 20 سنه تقريبا وماقلت حق احد لأن موباين عليي وعشان ماغث اهلي المهم
اشلون اعالج هالحالة ابي اطلع ابي اتكلم مع الناس ابي اسافر العمرة مااااقدر قلبي محروق حيييل ابي اقعد باليمعات ابي اروح المجمعات ودخل محلات واشتري اللي بخاطري مليت من الطلب بالنت ابي اعيش حاله طبيعية عادية الى ان ياخذ الله أمانته .................

وجزاكم الله خير

 

[لمى الهاجري]

اقري المعوذات وتسبحي بسدر و وملح خشن كل يوم بعد صلاة العصر

 

[-فلانة-]

حبيبتي هذا نوع من أنواع الفوبيا..
لازم علاج نفسي يا غالية..
حاولي تضغطين على نفسج و تروحين طبيب نفسي وبإذن الله تروح منج هالحالة..
عسى ربي يفرج همج و يزيح عنج كربج..​

 

[معي احلى]

انا كمان احتاج حل لنفس المشكلة... بس لاختي ..

 

[الله أكبـر]

الحبس والله ورب الكعبة حبست نفسي في البيت و سويت بضاعة وحجزت بافكاري وكنسلت امس ماقدر اروح رقعه ورجفة وحالتي مايعلم فيها غير الله سبحانه لولا القرآن و تمسكي بالله عز وجل وخوفي منه

أردت أن أعقب على العباره المعلمه في الأعلى قبل أن أرد عليك

لولا الله ثم القرآن وليس لولا القرآن والله فلا يساوى أي شيء مع الله فنقول الله ثم لأن الله
فوق كل شيء لا تعرف الكثير من الاخوات هذا الأمر لذلك فضلت ان ابين ذلك لتسفيدي
وجميع الاخوات الفاضلات من ذلك

والله يابنات احس ربي خلقني غير وإبتلاني استفغر الله واتوب إليه سامحني ياربي ومن همي طلع بهاق في جسمي من 20 سنه تقريبا وماقلت حق احد لأن موباين عليي وعشان ماغث اهلي

أختي الغالية والحبيبة إن الله إذا أحب عبدا ابتلاه ما أدراك لعل في ذلك خير لك فيكون تكفيرا عن
بعض ذنوبك وخطاياك ...

أختي الكريمة إن الله يحب العبد الصبور الذي يصبر على البلوى بدون تذمر وتسخط فقولك لماذا
خلقني الله هكذا او بما معناه فيه تسخط واعتراض على ماقدره الله لك والله تبارك وتعالى لا يحب
هذا من عبده، كيف ننسى نعم الله الكثيره التي لا تعد ولا تحصى علينا بينما نتسخط عندما يبتلينا
الله ببلوى ليختبر صبرنا علما بأن هذه البلوى لا تعد نقطه من بحر النعم التي انعم الله بها علينا
أنا اعلم بحجم معاناتك وأسال المولى جل في علاه ان يكشف ضرك وكل مسلم مبتلى عاجلا غير آجل ولكن نصيحتي لك نابعة من محبتي لك فانا لا ارضى لك ولا لنفسي ولا لأي أخت مسلمة
أن ننطق بما يسخط الله تبارك وتعالى لذلك وجهت هذه النصيحة لك ولنفسي أولا ولكل اخت فاضلة ..

ما أود ان اقوله لك ختاما أيتها الغالية أن تداومي على طاعة الله وأن تكثري من الدعاء تضرعي
إلى الله بأن يكشف ضرك ويجب أن تتأني في دعائك وأن يكون هذا الدعاء نابع من اعماق قلبك
بثي شكواك لمفرّج الكربات لقد مررت بأوقات عصيبة وكنت أشتكي للناس ولم أجد منهم اي استجابة بل كانوا يعرضون عني ولا يعيرونني أي اهتمام فلجأت إلى الرحمن الرحيم الذي يعلم بمعاناتي وتضرعت إليه بأن يكشف ضري وفعلا فرجت بفضل الله اصبري أختي الحبيبة فالصبر مفتاح الفرج ونصيحتي بأن تشتكي لرب العباد بدلا من العباد فالشكوى لله معزه والشكوى للناس مذلة واتمنى ان تتقبلي كلامي بصدر رحب وأسأل الله في هذه الساعة المباركة ان يكشف ضرك وضر كل مسلم عاجلا.

 

[امـل لاينتهي]

اختي اللي فيج اسمه رهاب اجتماعي انا قريت قصة واحد مثل حالتج التزم وتقرب لله كثيير وتغيررت شخصيته واايد صار حتى يلقي خطبة ماعندي الرابط جان وريتج القصة بس نصيحة مني كثري الاستغفار وحاولي تبتعدين عن الذنوب والزمي الدعاء وربي مابيخيبج

وحاولي بعد تجوفين دكتور نفسي شاطر

 

[هيبة ملك]

ضروري تشوفي دكتور

 

[حلا الزين]

كثري استغفار و حاولي تشوفين طبيب نفسي

 

[بنوته مو صج]

اول شي ما من عبد يقول ( الحمدلله رب العالمين حمدا كثيرا طيبا مبارك فيه ) الا و صرف الله عنه سبعين نوعا من البلاء و ادناها الهم

شوفي اول شي احمدي ربج كل البلاء الي مرتي فيه اجر و حسنات كثيره في ميزانج باذن الله عزوجل

وثانيا انتي اكيد بالبدايه كانت عندج هذي الحاله و زادت وتأزمت فالحل راح يكون بالتدررررررررررررريج و ان شاء الله راح تتعالجين و تتحسنين
حاولي بشيء بسيط كبدايه مثلا اذا انتي كان عندج خوف من انج تقعدين مع اهلج و تقعدين مع ناس غريبين حاولي انج تقعدين بدون ما تتكلمين بس استمعي لهم راح تحسين بتوتر بس عادي مره مرتين ثلاثه راح يروح الخوف والتوتر تدريجيا .... بعدين حاولي انج تتكلمين و تفتحين حوار بشيء بسيط و شوي شوي راح تتحسنين و دايما لا تنسين تقولين دعاااااااااء قبل اي زواره أو اي شي بتسوينه و تحسين بتوتر او التلعثمين بالحجي قوليه ( ربي اشرح صدري ويسر امري و احلل العقده من لساني ليفقهوا قولي )


وثالثا علييييييييييييييج بالصدقه ( داو مرضاكم بالصدقه )


و بالأخير حاولي تشغلين نفسج بشيء مفيد و ممتع لان الفراغ هو باب الوسواس لشيطان اعوذ بالله منه


والحياه حلوه بطاعة الرحمن وخلج ايجابيه و استانسي و انا دعيتلج من قلبي بالشفـــــــــــــاء

 

[راديو]

اختي .. الحمدالله ع كل حال .. ماتضيق إلا تفرج
ومشاءالله اهنيج ع. االتزامج وصبرج ع المرض
ولبهاق اختي فيها ولحمدالله تعالجت وخف منها حيل
واذا تبين رقم اللي عندهم العلاج راسليني وابشري

وبلنسبه للخووف افضل تستشيرين مختص بيساعدج حيل

وهذي بعض نصايححاولي وحطي ابالج انه تكونين افضل
وانه لي متا بتكونين جذي ..؟!! حطي حد للمشكله وابتدي من اليوم
خلج مع اهلج طول اليوم حاولي /.

والحمدالله خواتج بيساعدونج خلج وياهم وطلعي وشوي شوي بتنحل


اتمنئ اكون ساعدتج

 

[nour el denya]

حبيبتي هذا إلي فيج مرض و في علاج للمرض بالأدويه على ما أعتقد مافيها شي روحي طبيب نفسي و عالجي ترى حاله حال أي مرض عضوي
ليش تحرمين نفسج من لعلاج إذا متوفر لعلاج بحد ذاته نعمه
أنا مره سمعت بالتلفزيون الدكتور يقول الرهاب الإجتماعي علاجة سهل و بسيط
لا تتركين نفسج و لعلاج موجود و متوفر بكل مكان

 

[ajeeba_21]

ماعندي شي اقوله
والبنات ما قصروا معاج
طبقي كلام لمى الهاجري وان شاء الله حالتج تتحسن

 

[رقية // الكويت]

مشكورين يابعد راسي وجزاكم الله ألف خير
على نصايحكم واللي دعتلي الله يوفقها دنيا وآخره وانا بدعيلكم كلكم بضهر الغيب

واتقبل كل كلامكم انا ادري انكم تعتبروني مثل اختكم ومحترين علشاني من جذي تنصحوني من كل قلبكم الله لايوريكم مكروه يارب العالمين

انا فعلا ماعرفت اكتب الموضوع وفيه شئ من السخط والعياذ بالله استغفر الله واتوب إلية شفتوا حتى موضوعي ماعرفت اكتبة استغفر الله و الله عالم بالنوايا
والله ياخواتي مادري اشصار فيني مره وحدة
انا مااترك المصحف من يوم كنت صغيرة يوميا واختم المصحف على طول اقيم الليل حافظة 5 اجزاء وقاعدة اكمل الختمة
استغفار مستمر عمري مااسمع اغاني بحياتي كلها قرآن لا ازكي على الله احد الله يزكينا
عمري ماطلعت بروحي إلا معاي امي ولا خواتي
هذا ابتلائي في الدنيا بصبر واجري على الله

رحت حق دكتورة معاها دكتور عالجوني بالليزر وقالت ماتحسين بحراره الليزر قلتلها لأ قالتلي انتي محصنة ولا شنو
ثاني يوم انتفخت ريولي وصار معاي اكسدة ورمه وشقوا ريولي بجراحة
تعقدت واستغفرت ربي
قالي مستشفى اسعد الحمد هذا قديم ومايروح لأن ابوي كان فية الله يرحمة

اللي عندها رقم دكتورة شاطره اتقولي وجزاكم الله ألف خير يارب
بس الأهم عندي هذا الرهاب امسببلي مشكلة كبيره بحياتي والله اكثر من البهاق طبيب نفسي صعبه مافي شئ ثاني

استغفر الله واتوب إلية استغفر الله واتوب إلية

 

[ajeeba_21]

الله يرحم الوالد
لعيونج
up

 

[صمت المرافئ]

ضروري تراجعين الطب النفسي
العلاج سهل وبسيييييط جدا
وفاعليته كبيرة ...
لا تخافين والله لو تدرين اشكثر مثل حالتج
وعالجوا وعاشوا حياة طبيعية تتعجبين
​

 

[dalo0oa121]

اللي تعانين منه هو الرهاب الاجتماعي وهو اللي ذكرتيه اعراض
وبسالج اختي متى حسيتي بهالاعراض يعني بعد 18 ؟ ولا حديث؟
وهل تعانين من نقص الثقة بالنفس؟
ودي اساعدج

 

[blue ocean]

اسمله عليج يالغاليه ليش ماتروحين طبيب نفسي؟ ترى مافيها شي​

وماعليج من الناس واللي يقولونه عن الطبيب النفسي احنا هني عندنا شوية جهل بهالامور​

بس عند الغرب روتين عادي .. انا حاسه فيج انا فيني درجات من الرهاب الاجتماعي مع الناس بس ماتبين عدل​

تحكمت فيها على مر السنين وتصارعت معاها ونجحت .. بفضل تقوية ثقتي بنفسي بس ليلحين اتوتر​

من مواقف عاديه .. وسخيفه بس مايبين عدل عند الناس .. مع الوقت قمت اقول شسالفه انا ليش جذي ؟​

ليش اخاف من الناس واحاتي ؟ مع ان شكلي مايبين اني حاسبه للناس حساب مريحه نفسي ومعتنيه بعمري ​

وواثقه بنفسي بس قلت لج مابينت حق العالم ان عندي مشكله صغيره معاهم .. لازم ينبع التغيير من نفسج​

يمكن انا عالجت هالشي في نفسي لأنه ماكان قوي لكن دام الموضوع كبير عندج انصحج بطيب نفسي​

ولاتنسين اللي اهم من هذا كله .. وكلي امرج لرب العالمين وادعي بصلاتج ولاتيأسين من الدعاء ابد ..​

ربي يشافيج ان شالله ويريحج ويطمن قلبج ..​

 

[جلكسي بالمكسرات]

العلاج:

يتمثل علاج الرهاب الاجتماعي فيما يلي:

1- جلسات العلاج النفسي، وخصوصاً العلاج المعرفي السلوكي


والعلاج العقلاني الانفعالي، حيث يتم فيه تصحيح المفاهيم الخاطئة

لدى المريض وتدريبه على بعض الأساليب وطرق المواجهة


والحديث أمام الآخرين، والتي تشمل التدريب على مهارات التغلب

على الضغوط النفسية وكذلك تمارين الاسترخاء.

ويتم تطبيق هذا اللون من العلاج في جلسات فردية (المريض

المعالج) كما يمكن تطبيقه في جلسات جماعية (المعالج مع


مجموعة من المرضى).

2- بعض الأدوية النفسية التي أثبتت نجاحها في علاج هذا


المرض، كما يمكن استخدام بعض الأدوية لعلاج أي مرض نفسي.

أ . د. طارق الحبيب/استشاري الطب النفسي مركز النخبة الطبي ​

 

[جلكسي بالمكسرات]

يا حبيبتي أصبري (وبشر الصابرين)وما بعد الصبر إلا البشرى
يقولج المؤمن يُبتلى بقدر إيمانه
هالأبتلاءات دليل بإذن الله على قوة إيمانك
شوفي ابتلاءات النبي أيوب وابتلاءات رسولنا محمد صلى الله عليه وسلم
تحملي يلعب عليك الشيطان وتزل أقدامك بعد الثبوت
يمكن هالأبتلاء يكون سبب في دخولك الجنة وألي ربي معطيهم العافية يمكن يحسدونك في الآخرة على هالأبتلاء
الأبتلاء = أجر وثواب وطهارة وتقريب
العلاج يا حبيبتي نفسي لازم طبيب معاج ولازم حبوب
المشكلة أعرف شعورك تحسينها صعبة تروحين دكتور نفسي وأهلك بيعارضون
بس إذا تقدرين تتفقين مع وحده من خواتك وتروحين بالسر وصدقيني بإذن الله حالتك بتتحسن
أختم كلامي ب :
( واستعينوا بالصبر والصلاة وإنها لكبيرة إلا على الخاشعين )

 

[ماكواسم2]

حبيبتي علاجج سهل ياليتج يمي
اول شئ ابدي روحي اماكن بسيطة مثل فرع الجمعية واشتري اغراض واستمري فترة ..بعدين روحي الجمعية واستمري فتره وبعدين السوق واستمري المهم تكسرين حاجز الخوف .شوي شوي من تجمعات بسيطة الى الاكثر ودايما حطي في بالج اسوا الاحتمالات راح تصير وعادي تفشلي مره مرتين شنو المشكله