سحابه صيف قصه روووووووووووعه

[الرقادي]

السلام عليكم ورحمه الله
جبت لكم قصه روعه اتمني انها تعجبكم وراح انزل كل يوم جزء
سحابة صيف..بقلم شوق بوظبي

الحلقة الأولى


في وحده من مؤسسات بوظبي عند البرنت واقفه ليلى تطبع اوراق للمدير ..وكل شوي توايج ربيعتها حصه تشوفها خلصت ولا لاء...ويوم ملت من زود ما تتريا سارت لها بنفسها...
حصه : عنبو شو تسوين هالكثر مب اوراق هاللي بتوصلينهن اللي يشوف تطبعين بطايق عرس.
ليلى وهي مبتسمه: وانتي شعليج ممكن افهم.؟
حصه: مليت وانا يالسه لروحي تعالي المكتب..
ليلى: بسج عاد عن الدلع بسير اوصلهن لنصوور وبرد..
حصه وهي مبتسمه: عشتوا..نصور بعد والله اللي يسمعج يقول اصغر عيال فريجكم..
ليلى: كيفي ادلعه انتي ليش محتره..
حصه: لا محتره ولا هم يحزنون بس تغمضيني لانج مقصه..
ليلى وتغير شكلها: ما قلنا بس من هالسالفه انا مب ياهل ولا تمين تسوين لي فيها الطيبه النصوح شوفي عمرج اول..
حصه مستغربه: ليلووه شو بلاج ..ليش انجلب حسج جي..ما قلت شي انا ارمس عن اللي الكل يشوفه..
ليلى وهي ترتب الاوراق وتدبسهن وشكلها معصبه على الاخر: خلاص فسري اللي تبينه على راحتج انا سايره وسارت ليلى عن حصه وطلعت فوق مكتب المدير الاول للقسم الاستاذ ناصر ..ودقت الباب ودخلت...
ليلى: السلام عليك استاذ.
ناصر رفع راسه مبتسم: هلا وغلا وعليكم السلام ويا هالاستاذ اللي قلنا نبطلها من زمان..
ليلى مبتسمه: وني مسويتنلك سالفه...
ناصر: مب مبين والله..
تضحك ليلى ويبتسم ناصر وتحط له الاوراق...
ليلى: لا تنزل تحت ولا شي انا خلصت كل الاوراق وباقي بس انك توقع وتسير البنك وتختمهن..
ناصر: الله يعطيج العافيه يا اخت ليلى..
ليلى: اسمع هذا شو يقول من متى انا اختك يالاخ...
ناصر:اقول سيري مكتبج بعدين يقولون المدير مسوي حق ليلى سالفه عشانها من اهلهم..
ليلى: يا حظي من درا فيك انت ولا درى اني من اهلك..
ناصر: جنه مب عايبنج..؟؟
ليلى وهي مبتسمه: هذا موضوع انتهينا منه ...الكبار حكموا علينا ما نكون من اسره وحده انت ليش مزعل عمرك...
ناصر ونش من مكانه: والله ما يخصني فيهم..انا عمري 29 اظن اقدر افكر واتخذ قراراتي بنفسي..
ليلى: احلى هناك يا بو قرارات انت...
ناصر:زين ممكن تشرفين وتطلعين..
ليلى: يعني طرده..؟؟
ناصر مبتسم: الله يهديج محد يروم يطرد روحه...جانج سمعتي حد يطرد روحه انا بطردج..
توردت خدود ليلى من المستحى وظهرت على طول...ويلس ناصر في مكتبه..يكلم نفسه..
" لو عطيتها كلمتين حلوات من اول جان ظهرت من وقت ..بدل الصدعه وويع الراس"..
سارت ليلى مكتبها وهي متخدره من كلمتين سمعتهن..وبغت تطير...ليلى من ايام دراستها بالجامعه وهي مولعه بناصر..اللي يكون ولد عمتها وناصر بعد يموت فيها ولو انه شوي غلس ودمه ثجيل بس يتم يحبها..ورغم محاولاته الفاشله انه يفهمها ان اللي بينهم حب مستحيل بس مب راضيه تقتنع وعنيده لابعد الحدود...
كانت علاقة ناصر في ليلى قمة في البساطه يعاملها مثل اخته بس بنفس الوقت ما يقدر يخفي شعوره الغريب في حبها..مع انه نفسه تمنعه مرات بحكم الظروف اللي مرت ولا زالت تمر بها العايلتين..من ايام الزيارات والعزبه وسوالف اليهال وهي صغيره لين ما كبروا ودخلت الاعداديه ومنعها راشد انها تظهر عليه بليا حجاب..وعقب من يوم دشت ثالث اعدادي وتوفى ابوها انقطعت علاقة العايلتين في بعض وما قامت تشوفه ابداً..رغم ان اللي في قلبها من الصغر ما كان حب بس من كبرت تولعت به وحبته اكثر من يوم غاب عن عيونها..وزاد هالشي في فترة دراستها بالجامعه..وعقب تخرجها ما اشتغلت الا في شركة مشترك ميراثها بينهم وبين بيت بو ناصر..والمشاكل بين العايلتين..هي سوالف الميراث بين ابو ليلى الله يرحمه واخته ام ناصر..ومشاكل لا اول لها ولا تالي فرقت بين البيتين وقامت ام ناصر ما تسير بيت اخوها من عقب ما توفى لا هي ولا عيالها...
ناصر بتفكير انسان عاقل يشوف ان ليلى بالنسبه له شي مستحيل خصوصا انه ابوه ما يطيق بيتهم خير شر...فكان تفكيره اكبر من مجرد الحب..ومرات يلعب الشيطان براسه وما يشوف في ليلى اكثر من تسليه وحب عابر يرطب فيه حرارة الاجواء مع انها بنت خاله
ليلى تلوي عليها بقو: فديت قلبج يا روحي وعمري كله..
شيخه تطالع ليلى بدلع وهي مبطله عيونها: وين حواوا..؟
ليلى: شتبين بالحلاوى ويا ويهج وانتي الحلاوه بكبرها...فديت قلبج وفديت امج اللي يابتج يعل قبرها وقبر ابوج نور على نور...
شيخه تبتسم ما تدري عمتها شو تقول..وتطلع لها بعض الحلويات اللي يابتهن وتسير تبند الليتات وترقدها حذالها لين ما نامت شيخه ..وليلى حطت راسها شوي لين ما يوون عيال اخوها....
وتفكر في حالهم هالمساكين اللي محد يعبرهم وابوهم وامهم مشغولين عنهم اربع وعشرين ساعه...وهم الاثنين مطيحين ببيت يدتهم ما يسيرون من عندها...مر الوقت وليلى بتموت من اليوع بس تكابر تتريا عيال اخوها يردون من مدرستهم الساعه اربع العصر..لانهم في مدرسة الشويفات الخاصه..غفت شوي لين 3:30 عقب نشت...ويلست تفكر مره ثانيه في عيال اخوها وفي الدوام..وفي شخص ساكن في حناياها...
...ولين ما وصلت ليلى لاخر حدود تفكيرها...قطع عليها حبل افكارها...صوت هبل عند الباب...وشوي الا حد يفتح الباب...
سلامة وهي شاله شنطتها في ايدها ولابسه ثياب المدرسه ووراها حمدان: سلام عليج يا احلى عمه بالدنيا....
حمدان من ورا سلامه: مرحبا عمووتي ....
ليلى وهي تطالعهم مثل اللي يقول يا حظي فيكم: وعليكم السلام ..قصري حسج انتي وياه شواخي راقده..
سلامه: ليش معتفس ويهج عمووه..؟
ليلى: يالله سيروا غيروا بسرعه بنتغدا رباعه انا اترياكم من الصبح مب رايمه ايود عصافير بطني...
سلامه وحمدان: ان شاء الله....
وعقب حطت لهم البشكاره الغدا ...وتغدوا حمدان وسلامه وعمتهم ليلى وكل واحد بعدها سار حجرته يرقد...لين المغرب..
-----
العصر حوالي الساعه 5:00 عقب ما رقدت ليلى ساعه ..نشت ونزلت تحت...
وفي الصاله... يلست مع خلود حرمة راشد...
خلود: اقول ليلوه وين سلامه ما شفتها اليوم...
ليلى بينها وبين نفسها(ومن متى تهتمين انتي ولا تدرين عنها شي):راقده في حجرة ختيه عويش هي وحمدان..
خلود: هيه زين بعد..
ليلى: اقول خلود انتي متابعه دراستهم...؟؟ لانها وايد صعبه وتبى لها متابعه من اهلهم...
خلود وهي ودها تصفع ليلى: ما يحتاي حمدان وسلامي ما ينخاف عليهم طالعين على خوالهم...
ليلى مبتسمه ابتسامه صفرا: هيه والله صدج ..
وبينها وبين نفسها( راحوا عيالك يا خويه دامها شبهتهم في خوالهم)
وعلى الساعه 6:00 ينزل حمدان من فوق وويهه كله رقاد ويسلم على امه وييلس عدال عمته...
حمدان يهمس : عمووه اباج بسالفه عقب...
ليلى: شو..الحين خبرني ما فيني صبر...
حمدان: شو الحين انا ما اريد امايه تسمع..
ليلى: زين يالله نقوم حجرتكم ولا حجرتي...
خلود ما انتبهت لانها ولا تهتم ابدا بالعكس فرحانه ان عيالها متعلقين بعمتهم..ومفتكه من صدعتهم...
وساورا حجرة ليلى....
-----
في بيت مبارك ابو خليفه...كانوا عقب صلاة المغرب يالسين في الخيمه برا في الحوي..يسولفون ويتقهوون خليفه وعبدالله اخوان حصه وبنات خليفه اللي هن عفرا وحمده وام خليفه وابو خليفه...
بو خليفه:بنتي عفرا وين عمتج حصه ما شفتها اليوم...؟
عفرا: في حجرتها مع عمتي سمر..
ام خليفه: حليلها تعبانه من هالشغل...
خليفه: كلنا تعبانين ما شفنا حد ترحم علينا..
عبدالله: البزا كله للبنات شتبى به انت..؟
خليفه: عفرا وحمده يالله كل وحده على حجرتها مب جنه باجر وراكن مدارس..
وقامن بنات خليفه ويلس يسولف ويا اهله واخوه...
وفي حجرة حصه يالسه ويا اختها سمر اللي عمرها 11 سنه...
حصه: ليش تطالعيني جي كم مره قلت لج ان حرف ال H ما تلفضينه بس تكتبينه...
سمر: زين كيف اكتبه ولا انطقه هاي صعبه عاد..انا اشدراني متى الكلمه لازم يكون فيها حرف ال H ولا انطقه..
حصه: يينتيني شو اسوي بج..كل ادوات الاستفهام فيهن هالحرف في البدايه او يكون الحرف الثاني بس بعضهن ترومين تنطقينه شرات who & how وبعضهن شرات why & what ما ترومين تنطقينه هاي قاعده عنبوهن من مدرسات ما يفهمنكن شي...
سمر : زين بقولج نكته...
حصه وهي بتموت من العصبيه: شو من نكته ويا راسج انتي...بتتصفعين والله...
سمر: ارجوج والله العظيم انها خبال بتموتين عليها..
حصه: قولي يالله وفكينا مبتلشه فيج وفي دراستج وفي ثقالة دمج بعد...
سمر بدلع وثقاله: مـــره فــي واحد..
حصه وهي قابضه راسها: والله لو بتقولين روايه جان خلصتيها ..يالله قولي النكته لا اقوم اجلب الحجره على راسج...
سمر: زين شفيج معصبه...سمعي بقولج..مره في واحد نذل يبى يعذب خدامته عطاها فرشة اسنان وقال لها خمي الحوش...
حصه وفقدت اعصابها: اااااااااخ لو الجتل مب حرام جان ارتكبت فيج جريمه نكراء..انتي من وين ييتي وشو هالنكت المغبره اللي تقولينها...
سمر: حرام عليج حصوه ليش جي تقولين عني والله اني مسكينه...
حصه وهي تبطل الباب بتطلع: انا شاللي كالفني ادرس عاهات ما تفهم والله ان ما عندي سالفه لو اني راقده ولا ارمس تلفون ابرك لي..
سمر ماده بوزها اونها زعلت : برايج بدرس لروحي...
طلعت حصه وسارت الصاله تتصل بليلى...وتمت تدق على البيت بس محد يرد..وبندت ودقت على الموبايل بس محد يرد بعد...
صكت السماعه" برايها عقب هي بتسوي...شو هالملل يا ربي وين اسير الحين"
وهي ترمس روحها مرت عفرا بنت اخوها في الصاله..
عفرا: عمتي حصه..
حصه لفت بسرعه: بسم الله منج انتي الثانيه طيحتي قلبي من وين طلعتي مثل ابليس..
عفرا: يدي مبارك يبغيج...
حصه وقامت من مكانها بسرعه: يا ربيييه ابويه فديته ما شفته اليوم مول والله اني نسيته...
عفرا: حد ينسى ابوه..؟
حصه: اقول فارجي لا افج حرة سمر اختي فيج...
عفرا: شفيج بسم الله شابه ضو..
وطلعت حصه وسارت تيلس عند ابوها واخوانها...
...................
في غرفة ليلى يالسه تلاعب شويخ..وتغير ثيابها..وشيخه تلحقها من مكان لمكان مثل العصفوره اللي توها بدت تتعلم تطير...ويلست ليلى على الشبريه وحطت شيخه فوقها...
ليلى وهي تكلمها بدلع: من سوالج غدا اليوم..؟
شيخه: ثرملا..( شرملى خدامتها)..
ليلى وهي تلوي عليها: فديتج انتي وكل طوايفج..اقول شواخي من الحلوه..؟؟
شيخه وهي تسوي عمرها مستحيه وتحط راسها فحضن ليلى: انا..
هناك في بيت بو راشد وفي غرفة ليلى بالتحديد يالسه ويا حمدان اللي كان يبغيها في سالفه ضروريه...صكت الباب وشيخه نشت وتمت تصيح..
حمدان: اوهووه شو هالحاله..انا مستعيل..
ليلى بعصبيه:يعني شو تباني اسوي..اخليها تصيح مثلا وايلس وياك...
سارت ليلى ودقت تلفون للبشكاره تحت وقالت لها تسوي حليب حق شيخه..ويلست تلاعبها..لين ما هدت شوي...ويلست تطالع حمدان وهي مبتسمه..وهو ميت من القهر..
حمدان: عمتي شو هاه ابا ارمس وراي دراسه..
ليلى وهي تتكلم بسخريه: ونك تدرس والله ما تدري شو الفرق بين كتاب هالسنه واللي قبلها..
ودخلت البشكاره وعطت ليلى الحليب اللي بدورها عطته شيخه بعد ما رقدتها على الشبريه..
ليلى: يلست يالله خبرني شو من مصايب مسوي يا مسود الويه..
حمدان يحك راسه ويطالعها بنص عين: مادري من وين ابدا..
ليلى: ابدا من أي مكان مب مهم بس ارمس..
حمدان: عمتي ليلى فديتج اباج بسالفه خطيره بس حلفي ما تخبرين حد...
ليلى: وليش شو قالوا لك فتانه..طب لسانك بثمك وما اريد اسمع شي...
حمدان: اسف عمووه بس عاد مب وقته والله..دخيلج والله لا يحتمل التأجيل...
ليلى وهي تخفي ابتسامتها: يالله يابو التأجيل انته...شو بعد ..شو مسوي من بلوى...؟؟
حمدان: والله عمووه مااعرف شو اقولج...بس مستحي اخبر حد وتعرفين محد يسوي لي سالفه غيرج انتي..ولا جنه عندي ام وابو...
ليلى: زين زين يالله لا تتمسكن..ارمس شو مستوي...
حمدان: عمتي لا تخبرين ابويه...بس انا سقطت...
ليلى وهي فاجه عيونها: شوووو؟؟؟ خيبه تخيبك يا مسود الويه..شو سقطت وتقولها بكل برود..؟؟؟
حمدان : عمتي قصري حسج مابى حد يسمع...
ليلى: وسلامه اختك...
حمدان: مب احسن عني كل درجاتها c و d
ليلى وهي ماسكه راسها: الله يغربلك يا حمدان والله بيجتلك ابوك...
حمدان: زين عمتي فديتج شو اسوي والله خايف ..امايه تتحراني من الاوائل..بس ما روم اقص على ابويه..وهاي اخر سنه وكل شي مكشوف...
ليلى وهي تهز راسها بأسف: والله ما ادري شو اقولك..بس تباني ارمس راشد..
حمدان: لا عمووه استريحي..ماله داعي...اذا بغيت ابويه يدري..انا بقوله..انا ياينج اباج تنقذيني من هالورطه..
ليلى وبدت تعصب: وبعدين وياك حمدان..كم مره بنخبي على ابوك..ما استوت حاله هذي..احس بالذنب انا ..وانا اشجع عياله على الرسوب من وراه..
ويلست ساعه تهزبه..وهو موخي راسه بس مب متندم انه خبرها لانه يعرفها مهما عصبت ماله غيرها..
حمدان: خلاص عمتي لا تعصبين والله بشد حيلي وعد..
ليلى: سمعت من هالرمسه وايد..حمدان انت وسلامي لازم شوي تحسون بالمسؤوليه...
حمدان: والله العظيم بدرس بس انتي ساعديني...
ليلى وقامت من مكانها وسارت تييب تلفونها: انا الحين بدق لحصه ..وبعرف منها شو مسويات بنات اخوها..
حمدان يوم طرت ليلى عفرا وحمده جدامه تغير شكله..
حمدان مرتبك: عمووه ماله داعي انا اعرف شو مسويات.
ليلى: وشو مسويات..؟؟
حمدان: عفرا كله A+ حمده كالعاده راسبه...
تحاول ليلى انها ما تبتسم بس ما قدرت وفجأة ضحكت...
ليلى: حمدان سير ادرس وانا بشوف حصه شو بتسوي ويا حمده لانها من نفس طينتكم..
حمدان: سلمي عليها..
ليلى شاله المخده بتفرها فيه: زين خلك من هالخرابيط وجابل دروسك..
واول ما طلع حمدان فرت ليلى التلفون على الشبريه..
" برايها ما فيه ادق لها الحين عقب يستوي خير..بنزل لامايه بيلس وياها شوي..."
وشلت شيخه وبدلت ثيابها...
ليلى: يالله حياتي بنسير عند يدووه..
شيخه:بلوح عند ددي..(يدتي)
ليلى وهي تبوسها: هيه فديت قلبج بنسير عند ددج..
ونزلت ليلى الصاله...ووياها شيخه...
بعد صلاة العشاء..كانت ام راشد في الصاله مع شمسه حرمة مبارك اخو ليلى الثاني وعمره 34 سنه...ومبارك ساكن في دبي عشان شغله..هو وحرمته وبناته...وولده عمر..
ام راشد: وين البنات يا شمسه..ليش ما يبتوهم وياكم..؟ يالسين لرواحهم في البيت..بغيت اشوفهم واسلم عليهم..
شمسه: والله يا خالتي مريم و ايمان وامل يدرسن..و عمر سار المعهد عند المدرس ما رضى ييه البيت...ومب لروحهم ما شاء الله البيت مب خالي..فيه البشاكير وخالهم بيخطف عليهم كل شوي...
ام راشد: الله يوفقهم..يا ليت عيال راشد مثلهم بس...
شمسه وبأسلوب الحريم المعروف تبى تسأل ام راشد عن عيال ولدها راشد...وسؤالها فيه شوية خبث...
شمسه: خالووه اليوم البنات وعمر يابوا النتايج ما شاء الله عليهم من الحسد..درجاتهم ترفع الراس..
ام راشد بطيبتها و هي مب عارفه شي: انزين والله الله يفتح عليهم..عيل ما خبرنا حمدان وسلامي شو مسووين..
شمسه بينها وبين نفسها(ساقطين كالعاده)
كانت سلامه نازله من فوق وتسمع عمتها شمسه شو تقول ليدتها وهي منقهره..وسلمت على عمتها وتخبرتها عن البنات..ويلست وياهم بس تمت تنغز مرة عمها مبارك بالرمسه..
سلامه وهي تهوي وتحب راس يدتها: هلا يدوووه ولهت عليج والله...
ام راشد وهي تلوي على سلامه وتقربها منها: هاه عمتج تقول طلعن النتايج اليوم شو مسويه انتي وحمدان..
سلامه وهي تطالع عمتها وحاطه راسها بحضن يدتها وهي تلاعب شعرها: ما مسويات شي ..اليوم طلعوا نتايج نص الفصول نحن بعدنا..يقولون الاسبوع الياي..وبعدين يدوه نحن وين وهل دبي وين..؟ التعليم غير وقته عن وقتنا ..شدخل بوظبي في تعليم دبي...
شمسه كانت تعرف ان سلامه تخرط على يدتها بس تمت ساكته ما فيها على لسان سلامه......
ويا مبارك وسلم على امه ويلسوا شوي استأذنوا من ام راشد بيردون بيتهم عشان العيال لروحهم..وطلعوا سايرين دبي..
سلامه: عقربه هذي...
ام راشد وهي مبطله عيونها: ليش ترمسين عن عمتج جي...
سلامه: سوسه نقالة رمسه..تبى تواشي علي عند امايه وابوي..
ام راشد: وليش شو مسويه انتي..؟؟
سلامه: ما شي يدووه بس هي تغار مني لاني احلى عن بناتها الخسفات...
ام راشد مستغربه: هذيل بنات عمج..ليش تقولين خسفات...؟
سلامه: لانهن خسفات صدق وشرات امهن خقاقات ونقالات رمسه...
ام راشد: غربل الله ابليسج من بنيه...شو خليتي في الحرمه وبناتها ما قلتيه...
سلامه وهي تلعب بشعرها بايدها: خقاقات وخقاقات ما دانيهن..ولا اداني امهن...
ويدخل حمدان وليلى ...ويسلم حمدان على يدته وييلس عندها من الجهه الثانيه..
وتلوي عليه هو سلامه...
ام راشد: هاه حمدان عمتك ام عمر تقول طلعت نتايج الامتحانات الشهريه..بشر شو مسوي..
ليلى وحمدان انصدموا وما عرفوا بشو يردون....وسلامه بترقع السالفه...
سلامه: امي غاليه وين ابويه راشد ما شفته اليوم..
وام راشد بطيبتها المعهوده نست الموضوع..
ام راشد: تغدا ورد الشركه على طول...
حمدان يطالعها ويغمز بعينه...علامة انتصار ومبتسم..
ليلى بينها وبين نفسها..
"يا حظي فيكم..واحد راسب والثانيه تخورط على امي..وانا ساكته لا حس ولا خبر.."
ام راشد: ليلى غناتي بلاج صاخه...
ليلى توها تنتبه: لا امايه ما شي بس الظاهر طاح كرتي..لابستني ويالسه مع احفادج نسيتيني...
ام راشد مبتسمه: لا بنتي من قال..انتي الاصل...
سلامه تقوم وتطالع يدتها: هيه امي غاليه انتي بس تحبين ليلى ونحن تكرهينا..
ام راشد:بسم الله يا بنتي لا تقولين جي ليش اكرهم وانتوا عيالي وعيال الغالي...
حمدان: هيه عمتي ليلى الاصل ونحن الفروع يعني وجودنا والعدم واحد..
ام راشد تضرب كف بكف..وتطالع ليلى ولسان حالها يقول "لحقي علي يا بنتي"
حمدان وليلى يضحكون....
وقامت ام راشد حجرتها بترقد..
ام راشد: انا بسير ارقد شبعوا وسووا اللي تبون مافيه على حشرتكم رفعتوا لي الضغط..
سلامه: تعبانه ولا مب طايقه تشوفينا ويوهنا..هاه اعترفي يدووه..قولي قولي يالله..
وتمت سلامه تغلس على يدتها...وكل ما يت ام راشد بتقوم تعلقت فيها سلامه..وتمسكها من ايدها..
ام راشد: قومي عني يا ام لسان الله يعينه اللي بيبتلي فيج...
سلامه: ليش ان شاء الله يا حظه فيني والله...وبعدين يدوه انا ما بعرس..بتم هني طول عمري ما استغني عنج..ولا تخيل حرمة حمدان تاخذج عني...
حمدان: حرمتي عمتج يالهرمه..
حمدان و سلامه ناقعين ضحك وليلى تبى تسوي عمرها معصبه..
ليلى: هاي امايه يعلكم فداها لا تطفرون بها...
ام راشد: لا غناتي عادي الا يهال ماخذ برمستهم...
ويوم سارت ام راشد كان حمدان و سلامه يغلسون على عمتهم ليلى وهي تسولف وياهم...ودخل راشد ابوهم...
راشد وهو معصب: حمدان...
حمدان وهو يسوي عمره ثابت: لبيه ابويه..
راشد وهو يطالعه بنظره غريبه: شو ميلسك عند البنات ..ليش ما تسير تدرس..وبعدين وين نتايج الفصل ما شفتها...
حمدان وهو ميت من الخوف: لا ابويه..ترا..
سلامه: ابويه نحن استاذنا عنده ظروف عسب جي ابطى بالنتايج...وقال نحن غير عن الفصول..
ليلى انتهبت ان راشد حس ان عياله يقصون عليه..واتداركت الموضوع بكذبه ثانيه..
وهي مستحيه: راشد انا بسير لهم باجر ان شاء الله وبشوف كل شي..
راشد هدا شوي: زين تسوين انا مشغول هاليومين...
تموا ساكتين..وسار راشد الفله مالته..وبعد ما طلع..
حمدان يتنهد: ااه كنت بموت من الزيغه...
سلامه: نجونا بإعجوبه..
وتضحك هي وحمدان..
ليلى: ما شي مسؤوليه ابد..الله يهديكم..كذب وكسل وفوق كل هذا ثقالة دم..
حمدان: عمموه حتى انتي تقصين على ابويه..يوم قلتي بييكم المدرسه..
ليلى: هيه والله العظيم بسير لكم باجر..وبشوف بلاويكم...
طالع حمدان سلامه..وابتسم عارف ان عمته مهما سمعت ما بتقول شي لانها الوحيده اللي فاهمتنهم...
وقامت ليلى بتطلع...
ليلى: حمدان وانتوا طالعين صكوا باب الصاله..
حمدان: لا عمتي ..ما بنسير البيت..بنرقد هني اليوم..بحجرة عمتي عايشه..
ليلى: ع راحتكم..
وكل واحد طلع حجرته بيرقد...
الحلقة الثانية..

اليوم الثاني الصبح في الشركه يالسه ليلى تعدل في اوراقها وتخلص اللي باقي لها..لانها بتطلع اليوم من وقت عشان تمر على مدرسة حمدان وسلامه..ولا مرت على مكتب ناصر ابداً...
حصه متملله: ليلووه دخيلج لا تروحين والله ملل...
ليلى: انا وعدت راشد ولازم امر اشوفهم..
حصه:اهون عليج ايلس لروحي...
ليلى: ما تهونين بس غصب عني..اليوم الاربعاء وابى اظهر من وقت...
حصه: زين ويا ويهج والله ماتحسين كيف اكون بغيابج..مالي معنى..
ليلى تعرف انه حصه ضايجه عشان حمد ما داوم اليوم بس حاولت انها ما تبين لها انها فاهمه...وكسرت حصه خاطرها..وابتسمت..
ليلى: شو رايج تيين وياي مب لازم نيلس لاخر الدوام...
حصه بفرح: هيه والله كيف ما يا على بالي...
حصه انسانه رقيقه وشفافه فوق التصور..خيالها واسع وأحلامها كبيره..وكبرياءها اكبر من الكون نفسه..وكل شي عندها يهون الا وقت الكرامه وعزة النفس..ناعمه لابعد الحدود ولو انها مرات دفشه شوي في البيت ويا اختها وبنات اخوها...
خلصت ليلى الشغل واستأذنت هي وحصه وطلعن وسارن مدرسة حمدان وسلامه..وفي الدرب..
حصه: يا سلام راحه نفسيه..
ليلى: شعليج يا ام راحه نفسيه انتي..الحين انا اللي بتتدمر نفسيتي من عيال اخويه...
حصه: برايهم ليش حارقه دمج..
ليلى: شعليج انتي عندج وحده حافظه المنهج اكثر عن اللي طابعينه..لو ييبون لها سؤال كم رقم الصفحه اللي فيها هالسؤال عرفته..
حصه: عوذ بالله من فالج..الحين اكيد بتسقط والله قلبي يقول لي..
ليلى تضحك..
حصه: قولي ما شاء الله...يالله قولي الحين جدامي ولا بنزل الشارع والله..
ليلى: برايج محد ميودنج انزلي...
حصه: ليلى..!!
ليلى: يا عيونها...وقلبها..
حصه تطالعها بعصبيه...
ليلى: بسم الله خلاص ما شاء الله ما شاء الله ما شاء الله....ارتحتي..
حصه: يالويه عوذ بالله منج..
ليلى: يا فنتكه انتي اموت عليج يوم تعصبين مول ما يليق عليج والله..
حصه: ع شو تحسديني يا حظي ..بيتنا محد فلحت فيه الا عفاري بنت اخويه خلوووف فديت قلبها والله انها فلتة زمانها...ولا تعالي شوفي حمدوه راسبه مع مرتبة الشرف..وكله بصوب واختي سمر بصوب ثاني والله انها تحفه كلما قلنا لها شي قالت بقولكم نكته..ما ادري شو سالفتها ويا هالنكت...
ليلى ميته من الضحك مب رايمه تيود عمرها..
حصه: اضحكي شعليج ما ابتليتي في اخت شراتي والله انها مثل العظم في البلعوم..وفوق كل هذا بليده ما تفهم..
ليلى وهي تضحك: صدقيني يمكن تتلاعن عليكم ومب غبيه بس تستغبي تحب ترفع ضغطكم..
حصه: ما يندرى بها والله..بس المصيبه يوم اسألها شي ماتفهم مول ولا يخصها في العالم..كيف تطلع من العشره الأوائل ما ادري..
تضحك ليلى...
حصه: والله البنت مب طبيعيه وانا اللي بعالجها...
ليلى تضحك: عيل اذا ما ماتت على ايدج ما كون بنت امي وابوي...
ووصلن المدرسه وقالت حصه للدريول لا يسير ويترياهن لانهن بيظهرن الحين...
وفي المدرسه دخلن الاداره وسارن يتخبرن عن اساتذة عيال اخوانهن وعقب ما نشدن عنهم وعرفن كل شي ردن الموتر...ووصلت حصه ليلى البيت وسارت عنها...
دخلت ليلى البيت وشافت شيخه ناشه من وقت ويلست تلاعبها..وشلتها وسارت صوب حجرة امها...
ليلى: السلام عليج امايه..
ام راشد وهي مبطله عيونها ومتفاجأة: هلا غناتي وعليج السلام عسى ماشر..ليكون تعبانه ولا شي...بسم الله عليج راده من وقت اليوم زيغتيني..
ليلى مبتسمه: لا امايه ما فيني شي بس ولهت على البيت وشواخي ورديت...
ام راشد: الحمدلله ولهت عليج العافيه والله يوم شفتج شي قبضني بقلبي...
ليلى: فديت قلبج يا احلى ام في الكون كله...
يلست ليلى عدال امها...وخلت شيخه تتعبث في الحجره لروحها...
وقفت شيخه عند المنظره اللي طول اليدار..ومسكت ثوبها ويلست تدور على عمرها..وسارت عند يدتها وتفتح عيونها وتير شيلة يدتها..
شيخه: ثوفي ثوفي..
بس ام راشد كانت ترمس ليلى وما اهتمت..
ليلى: امايا شوفي شواخي ترمسج ردي عليها...
ام راشد لفت على شيخه:عيوني شو تبين فديت حسج..
شيخه:إلوه ...إلوه..
ام راشد: والله مادري يا بنتي شو تقولين..
شيخه: انا إلوه..ثوفي فتاني...
ليلى تضحك:امايا تخبرج انها حلوه وتباج تشوفين فستانها...
ام راشد وتلوي عليها: حلوه فديت عمرج...
سحبت شيخه عمرها من حضن يدتها وسارت تسحب شيلة الصلاه مالها...وتشيلت بها بس غطت عمرها..وسحبت السجاده..ومدتها ونها بتصلي..
شيخه بصوووت عالي وجنها تصارخ وبكل براءه: الله نم نم..
ليلى بغت تموت من الضحك...وام راشد ترمس..
حرجت ام راشد: يا بنتي شو فيج ارمسج..وانتي تطالعين لي هالبنت..
ليلى: امايا فديت روحج سمعيها كيف تكبر......شواخي قولي مره ثانيه الله واكبر..
شيخه متعجبه وتسوي حركتها المشهوره تبطل عيونها على الاخير ونها متعجبه: تاني مله..
ليلى: هيه ثاني مره...قولي الله اكبر...
شيخه ونها عصبت وتعاند وتأشر بإيدها دليل انها رافضه: ماليد خلاث خلاث كم مله..ماليد..
ليلى بحده: كيفج هو...؟ قولي الله اكبر يالله...
شيخه بطلت عيونها اونها متعجبه: الله نم نم...
ضحكت ليلى وام راشد ابتسمت وردت تكمل سوالفها ويا ليلى...
حطت ليلى راسها ع ريول امها ليلى وهي تطالع فوق..وامها يالسه تمسح على راسها...
ليلى:امايه
ام راشد: لبيه غناتي..
ليلى: شيخه غامضتني...وايد..وايد..
ام راشد تنهدت: مب قلنا لج يا بنتي عطي البنت اهلها يربونها..ويوم تكبر يفهمونها كل شي..بس ما طعتي..وشوفي بعدج ما شفتي شي من اليهال..تتحرين انه بس صياح وحليب ورقاد..البنت بتكبر ويبى لها مسؤليات ودنيا..وباجر تبى المدرسه وانتي بتعرسين وين تبين بها..ليكون بتشلينها بيت ريلج..واي ريال هذا اللي بياخذ بنيه وعندها ياهل...
كانت ليلى تصيح بصمت في شي يصرخ داخلها..ويقول لها لا تخلين شيخه يا ليلى..دموعها خيسن ثوب امها...اللي حست بها...
ام راشد: ليش تصيحين يا بنتي هالكلام الصدج اللي يزعلكم..انتي ما قصرتي وسويتي اللي عليج واكثر..بس انتي صغيره وما شي كالفنج تتحملين مسؤليتها..هي بنت ولدي انا وانا ادرى منج بهالسوالف..والله لو انها بنت بنتي ما خليها في بيت اهل ريلها..واشلها واربيها انا..بس يوم ان اهل سعاد الله يرحمها راعين اصول وواجب خلو لج البنيه..ومن طيب اصلهم ..والله لو انهم عرب ثانيه ما ترضى..
ليلى: لاامايه انا ما افكر بهالطريقه..انا مب متضايجه من وجودها في حياتي لان هالشي برغبتي انا وعمري ما بندم عليه..بس قلبي يعورني عليها لا ام ولا ابو..وانا مهما سويت عمري ما بعوضها ولا حتى ابتسامة امها ولا عطف ابوها...
دمعت ام راشد يوم ذكرت ولدها سيف..وتقطع فوادها على شبابه اللي راح...وهو ما استوى له سنه من يوم عرس...وتجلبت بقلبها الذكريات وحست فوادها محترق حرة عليه...
قامت ليلى ولوت على امها ويلست تتفداها...
ليلى: امايه شو هاه انا يايه اشتكي لج واصيح عندج...تيين انتي تصيحين الحين من الام ومنو البنت..؟
ام راشد وهي تصيح: سيف يا ليلى الله يرحمه كان اكثر واحد بار فيني..
ليلى: افا يمه وين رحت انا وراشد ومبارك وين ساروا ولا نحن مالنا رب ..وشايفتنا مب بارين فيج...؟
ام راشد: لا يا بنتي بس البعيد يتم له غلا خاص..وسيف عمره ما ضيج بقلبي وطول عمره وانا راضيه عليه..والله اني كل ما شفت هالبنت احس بنار تحرق يوفي..
ليلى مبتسمه رغم كل اللي في قلبها من نيران: قولي الله يرحمه وبس تكفي وتوفي عن كل شي..
ام راشد: الله يرحمه يا بنتي ويجعل قبره روضه من رياض الجنه...
يت شيخه تركض وعقت عمرها بقو فوق ليلى..
ليلى: فديت قلبج يا بعد كل هلي وناسي..
ام راشد: شلي البنت من فوقج ولا تدلعينها ما بينجلب دلعها الا علي انا...يوم بتعرسين بتطيح فوق راسي..وانا تعرفيني ماتحمل البنت المبزايه..
ليلى وهي ما تشوف امها لان شيخه يالسه بحضنها وحاطه ويهها في رقبتها..
ليلى: ومن قالج بخليها عندج..يمكن بس اول شهر وعقب بشلها عندي..
ام راشد: زين ان شاء الله..اول شي حصلي الريل عقب تشرطي عليه..
ليلى وخرت شيخه عنها وطالعت امها: شو قصدج يعني مب حلوه ولا مب حلوه..ولا يعني عشان ما انخطبت للحين فيني شي..هاه قولي..
ام راشد مبطله عيونها:خلاص …خلاص..سلامه بنت اخوج ما بستغرب من وين يابت طولة اللسان هذي الا منج…كلتيني بسم الله منج..من قال انج شينه…بس يا بنتي العرس ستر للبنيه..
ليلى: زين امايه خليه المعرس يي اول وعقب قولي لي وافقي بس للحين محد ياني…
ام راشد: الله يرزقج كل خير وصالح…
شيخه تمسك ويه ليلى:ماما ماما..
تضحك ليلى وتستحي من امها…
ام راشد وشكلها متغير : وين ماما شو من بنت انتي ما تسمعين الرمسه..قلنا لج خلي البنت لاهلها…
ليلى يوم شافت امها صدج تضيجت من الموضوع…شلت شيخه وحبت امها على راسها..
ليلى: امايه هذا موضوع منتهي فديت قلبج انا بسير الحين..لا تضيجين بعمرج..
ام راشد: عقلج براسج وخلج معانده وشوفي اخرتها…
حصه بعد ما وصلت ليلى مرت على مدرسه سمر ويابتها قبل يخلص الدوام وكانت الساعه تقريباً 12:30 الظهر..وخذت لها اذن وطلعتها بس جي بدون سبب..وفي السياره...
سمر: فديت روحج والله اني بغيت اتفجج من الوناسه يوم ظهرتيني عندي كلاس math وما اريد احضر..
حصه: والله مب عشان سواد عيونج بس عشان اليوم اربعاء وخاطري نتغدى ويا بعض..من زمان ما تغديت وياج..
سمر: الله بنتغدى برا...
حصه تطالعها باحتقار: شو برا انتي بعد وين عايشين نحن..بنسير البيت نتغدا ويا امايه وابوي..واخواني لان شموس ختيه ردت من السفر وبتيينا باجر وجي يعني..
سمر: الله يا ليت ياخذني واحد شرات ريل شموس..كل يوم يوديني بلاد...
حصه: انتي ان حد فكر يخطبج اذبحيني ولا ارتكبي فيني أي جريمه..تبين سفير شرات ريل شمسه..قولي الحمدلله لو ياج بياع الجرايد...
سمر معصبه: لا والله وانا شو ناقصني..
حصه: زين زين سكتي الله يخليج اختج عانس ما رمست تيين انتي يا شبر ونص ترمسين هالرمسه يالله سكتي ولا كلمه ياهل وترمس عن العرس..
ابتسمت سمر وما ردت..وبعدهم في الدرب ساكتين وحصه تفكر في باجر والحشره اللي بتستوي في البيت والتجهيزات عشان اختها بتيي وتفكر منو بيي ومن بيعزمون وشكثر ناس بيوون..وكل هاه بصوب واحساسها المرعب انها بتشوف حمد باجر في بيتهم بصوب ثاني...تنهدت من الخاطر..
"الله يستر بس"
سمر: هييه ينيتي ترمسين روحج..؟؟
حصه انتبهت وانتفضت شوي: عوذ بالله منج مب ادميه والله انج من سلالة ابليس..
سمر: عوذ بالله منج انتي..
حصه سكتت مره ثانيه...
سمر: حصه
حصه:عله..
سمر مبتسمه: ابى اقولج نكته...
هني حصه ما رامت تيود عمرها ومسكت سمر من كتفها : طفرتي اهلي وطوايفي شو حياتج انتي كل شوي بقولج نكته وبقولج نكته...خلاص لاعت جبدي منج انتي ونكتج هاللي مثل ويهج..بس بس افففف كرهتج...
انصدمت سمر من رمسة حصه بس طنشت ويلست مكانها ولا تحركت لين ما وصلوا البيت ونزلت وسارن صوب حجرتهن وبدلن وانسدحت حصه على شبريتها وسمر طلعت عند امها...بتشوفها وتسلم عليها....
قامت حصه وبطلت دفتر عندها من ايام المراهقه..ويلست تجلب اوراقها اللي احال الزمن بياضها الى اصفرار مثل ما تعبث الفصول في اوراق الشجر وتبدل الاخضر للبني..وانسدحت على الشبريه ويلست تقرا وتجلب الصفحات اللي نصهن معلقات ويطيحن بمجرد ما تفتحهن..وتقرا رمسة ربعها في المدرسه الثانويه...
"عهدتك دوما صديقه وفيه لا تهزك الازمات..وفقك الله وسدد خطاك وجمعني واياك في جنات الفردوس/صديقتك امل"
ابتسمت حصه وجلبت الصفحه..
"حصوه الغاليه/يوم تقرين هالاسطر وعمرج 77 سنه تذكري ربيعتج وفوي شيخة البنات"
ضحكت حصه من خاطرها وتذكرت وفوي هاي كانت من شلة الهبل وياها في الثانويه..ذكريات عمرها ما تنساها...وجلبت على اخر صفحه بالدفتر وشافت شي كتبته لها ليلى اخر يوم في الثانويه العامه..
"غناة روحي حصه..عمر الايام ما تفرق الانسان عن انسان يحبه..ونحن دايما اللي نفرق اعمارنا عن اللي نحب..هذي فلسفتي في الحياة..صدقيني يوم نتم نذكر اللي نحبهم هذي هي قمة تواصلنا معاهم..وبمجرد ما ننساهم نكون نحن اللي حكمنا على بعض بالفراق..لا تعتبري فراق الاجساد هو الفراق..لكن الفرقا يا غاليه هي غياب من نحبهم عن بالنا"
تنهدت حصه وصكت الدفتر..
" صدقج يا ليلى والله بحياتي ما قريت جمله تأثر فيني شرات هالجمله لو شو ما اسوي واتم اعيدها عمري ما أمل منها...صدق بسيطه بس ياما تتضمن"
وردت حصه تجلب الدفتر وسحبت الدفتر اللي تحته وشافت فيه وايد اشياء مكتوبه بخط ليلى اشعار وخواطر كانت تكتبها لصديقتها شما اللي كانت تحبها وافترقت عنها ايام الدراسه يوم انتقلت للعين عقب العرس ....وكانت ليلى دوم تكتب في دفاتر حصه عشان اخوانها دوم ييودون دفاترها وما تعيبهم هالخرابيط...واحتفظت حصه بهالاشياء وتمت تغايظ فيها ليلى وتضحك على تفكيرهن يوم كانن مراهقات....
في واحد من الدفاتر مسكته حصه في قصيده كتبتها ليلى اول سنه لهن في الجامعه عقب ما التقت بناصر في صالة بيتهم يوم كان ياي يطالب اهله بحق امه بس راشد اخوه ما سوا له سالفه..
وكثر تردده هو وابوه على بيتهم وعرفته اكثر بعد وفاة ابوها وحبت في ناصر قوته وقسوته وشافت فيه ابوها الله يرحمه وهو تعلق بها رغم ان كل سبل الحياه بينهم مستحيله .....كانت ليلى كاتبه في اخر صفحه على الغلاف..
"تجّمل غض طرفك يا نعيم العود..تجمّل لا تعذب قلب مفتونك..انا من يوم ما شفت العيون السود..اسرني طرفك ولا اعيش من دونك..تبادلنا المحبه والقلوب شهود..عيوني ترجمت الاحساس لعيونك..احبك وانت في عيني نعم مفنود..حلفت اني اراعيك ولا خونك..انا مالي في غيرك يالغلا مقصود..انا لك انت بس عايش في كونك..غلاك بخافقي والله ماله حدود ..وكل الناس عندي ما يساوونك..دخيلك لا تناظر بالعيون السود ولا تذبح عيوني بنعّس جفونك.."
صكت حصه الدفتر وابتسمت ولفت على الساعه واستغربت شافتها 1:15 معقوله مرت ساعه الا ربع ما حست بها..؟؟
نزلت حصه على طول وسلمت على ابوها وخليفه وعبدالله وامها ويلست في الصاله...
حصه: وين ذياب ما شفته اليوم..؟
ام خليفه: سار دبي ويا ربعه وبيرد ان شاء الله باجر وقت العشا ويا قوم خلفان بن محمد واهله واختج..
حصه: هيه خير ان شاء الله...
خليفه: وين رحتي اليوم؟
حصه: الدوام ومدرسة عفاري وحمده..
خليفه: وليش قبل تسيرين ما تقولين حق حد ..
حصه: شو فيها المدرسه ما تحتاي اذن وبعدين انا قلت بسأل عنهن لانك مشغول وما ابى اتعبك..
خليفه: زين وشو قالوا لج...؟
حصه: عفرا مسوين لها رعايه خاصه يقولون من اوائل المدرسه هالسنه ان شاء الله..و..
سكتت حصه..
عبدالله: والتحفه الثانيه...؟
خليفه: احترم نفسك ولا ترمس عن بناتي جي..
يضحك عبدالله...
بو خليفه:شتبون بها هالصدعه وويع الراس يلسوا بناتكم بالبيوت الزمان تغير واول كان كل شي هين..بس الحين الدنيا تصعبت وتصعب معاها كل شي..
حصه: فديتك يا بويه حكيم في كل شي...
عبدالله يضحك: ابويه فديت روحه..ماعنده واحد اثنين علىطول اقطع الشك باليقين...
يضحكون ....
ام خليفه توها منتبهه: وين سمر..؟
حصه تذكرت انها واجعت سمر اليوم وكسرت خاطرها...
حصه: امايه بسير اشوفها اكيد في فلة خليفه ويا عفاري وحمدوه..
وقامت حصه من عندهم وطلعت الحوش بتسير فلة خليفه...
في حجرتها يالسه مع حمدان اخوها عقب ما ردوا من المدرسه وتغدوا لرواحهم.....وما ساروا بيت يدهم بو راشد...حمدان يالس يسولف وهي تبطل اوراق الامتحان..
سلامه: يا حظي ..
حمدان: بشو؟
سلامه: اليوم قالت لي المس اني بعيد صف ثاني ثانوي مره ثانيه..وقالت لي مستحيل انجح لو شو ما سويت..
حمدان: وشو الغريب في الموضوع...؟
سلامه: كيف بقول لابويه ان انا ساقطه وما شي امل من نجاحي..يعني يا فالح باختصار..كيف بيتقبل رسوبي اخر السنه وهو حاط بباله اني طول السنه got full marks..؟؟
حمدان: مشكلتج والله محد قالج تقصين عليه...
سلامه وهي تسحي شعرها: عدال يالصادق انت اللي مول ما تجذب...اصلا ابويه ما شي بيقهره في الدنيا كثر درجات عفاري بنت عمي خليفه..
حمدان:........
سلامه: بديت اكرهها والله...
حمدان: ليش ؟ عشان احسن عنج..
سلامه: احسن عني بشو؟؟ جمال ولا شو..؟
حمدان: هاللي تفكرين فيه بس..الجمال..فكري شوي بأشياء اكبر عن هذي...
سلامه: زين اطلع ابا ارقد..ممكن يعني...
حمدان: انا بسير بيت يدتي غاليه...يارب تكون عمتي ليلى موجوده...
سلامه: وين بتكون يعني اكيد في البيت...
حمدان: انخمدي ورقدي وانا بسير لهم مليت من هالبيت الكئيب عوذ بالله ..جنه سجن والله العظيم..
سلامه: زين شو نسوي مثلاً..نغير ابونا وامنا عشان نرتاح..مب بكيفنا اخترناهم هم اللي يونا...
حمدان: يا عيني على التفكير...!!! نبدل امي وابوي؟؟ روعه بصراحه انا ما ادري من وين تطلعين هالافكار..خاطري اعرف؟؟
سلامه: ما عليك انت تتمصخر وبنشوف اخرتها من يضحك...
حمدان طلع وصك الباب وراه وسلامه رقدت على طول وهو سار بيت يده بو راشد..واول ما دش الصاله شاف امه يالسه ويا يدته وسلم عليهن ..
ام راشد: حمدان ولدي ايلس ويانا شوي..
ام حمدان: مستعيل خله يسير عند عمته ...
حمدان: لا والله امايه هب مستعيل بس ما اعرف شو ايلس اقول وياكن..
ام راشد: فديت روحك يا حمدان غديت ريال ما شاء الله...
يبتسم حمدان..وامه تطالعه بفخر...
ام حمدان: فديته حمداني الحين بيتخرج وعقب بيسير كلية الشرطه ان شاء الله..
حمدان: لا امايه مابا الشرطه انا..
ام راشد: شو بلاها الشرطه ما شي اخير عنها...شحلاتك وان ضابط محد قدك..
حمدان وهو ينش من مكانه ساير فوق: خلوني انجح اول وعقب يصير خير وين بسير...
وسار حمدان فوق عند عمته ليلى..دق الباب ولقاه مبند وتم يدق...وبعدين فتحت له ليلى...
ليلى: هلا بالاستاذ...
حمدان: الله يستر شكلج يقول في مصيبه مستويه....
ليلى مبتسمه: ليش الاخ مستغرب..؟؟ انت المصايب بنفسها..يعني انت اذا ما سويت مصيبه عادي تختنق..ولا عادي يستوي بك شي..
حمدان يضحك: بطول وانا واقف برع...
ليلى: اتفضل يالغالي...
دخل حمدان وشاف شيخه يالسه تلعب في بعض العرايس اللي مازره الحجره...وتخربط الماي في كل مكان ونها تسبح عرايسها...
حمدان: والله ما شي شغله عندج الا هالبنت...
ليلى: وليش زعلان..؟
حمدان: ما شي بس مضيعة وقت..
ليلى: زين شو مسوي وكيف بترمس ابوك الحين...
حمدان: عمتي ..ترا سلامه اليوم قالوا لها انها ساقطه ومستحيل تنجح هالسنه مول...
ليلى: تستاهل هاللي اباه انا...
حمدان: ليش تكرهينا..؟
ليلى مستغربه: ليش اكرهكم ان شاء الله..انا بالعمد ودي انها ترسب عشان تتعلم..مب انها هامله عمرها طول السنه وعلى اخرها تبا تنجح..شو من تفكير عندك انت وهي..؟
حمدان: ليكون بس تدعين علي في صلاتج؟
ليلى وهي حاطه ايدها على كتفه وهو موخي راسه: يا غناتي انت ولد اخويه من لحمي ودمي ليش ادعي عليك..والله وحده العالم اني اكثر وحده تدور مصلحتك وما في شي شاغل بالي عقب شواخي الا مستقبلك انت وسلامه..
حمدان: عمتي والله خاطريه متضيج احس كل شي ضدي واحس بعمري ما روم اتنفس..بيتنا صدج شرات القبر..وين تبيني ادرس..وامايه كلما شافتني قالت لي يالله خلص وهات نسبه عدله عشان اتم ارفع راسي بك جدام الحريم..وابويه اربع وعشرين ساعه يقول لي ما منك فايده انت فاشل ويطلب مني انجح...يوم انه يدري اني فاشل كيف يباني انجح ممكن تفهميني؟؟
ليلى تنهدت وفي خاطرها" الحين هاه وقت هالسوالف يا حمدان الله يهديك تبى توهقني ويا ابوك"..
ليلى: ما عليه يا حمدان انت ريال وكم سنه وانت خريج وبعد فوقهن شوي وانت ريال بحرمه وبيت وعيال..وبيكون كل هاللي تسمعه وتشوفه ذكريات وخرابيط بتضحك عليها...
حمدان: والله اتمنى هالشي...
ليلى: انت ما رقدت عقب ما ييت من المدرسه..؟
حمدان: لاء فيني نشاط مب طبيعي..
وقام صوب شيخه
حمدان شلها وطالع ليلى: بشلها وياي العزبه...
ليلى: شو تقول انت وين تبى.؟
حمدان مبتسم: الله يخليج عمتي والله بتستانس..خليني الله يخليج..
ليلى عاقده حياتها: شو تقول انت والله انك مب صاحي..والله ما توديها..
شيخه مب فاهمه السالفه بس مبتسمه ويودت ويه حمدان وتأشر جهة الباب: بنلوح ددي..
ضحكت ليلى وضحك حمدان..
حمدان متشجع: هاه عمتي شوفيها موالفتني عادي هب زايغه...يالله عاد..
ليلى: زين بسير وياكم..
حمدان: لا استريحي فديتج ماله داعي..انا وهي والدريول باشا..
ليلى : لا ضحكتني تصدق..والله لو تموت ما خليك تسير بروحك العزبه وهي وياك ..ما شي شغله ضاع العقل..
حمدان: افا تشككين في رجولتي وقدراتي..يالله عاد عمتي ارضي فديت روحج...
ليلى: بفكر وأجلها لباجر عشان افكر عدل...
حمدان: لا لا باجر ما ريد..انا معزوم...
ليلى: وين ؟
حمدان: بيت يدي مبارك...
ليلى: منو ؟وليش؟ وشو مستوي ؟وليش ما خبرتني حصه...؟ شعندهم؟ وشو صار ؟ممن تفهمني وتوضح لي ليش انا اخر من يعلم ؟وبعدين كيف انت معزوم وانا لاء؟..ومن اللي عازمنك..؟ومن خبرك اصلا انه في عزيمه...؟
حمدان مبطل عيونه مب مستوعب شي..حط شيخه على الارض ويلس على الشبريه...
بعده مبطل عيونه على اخر شي: اقول ممكن ورقه وقلم بحل هالامتحان ؟ خيبه مستويه جورج قرداحي.. كم سألتيني سؤال والله ما حيد شي منهم الا اخر كلمه وهي عزيمه..
ليلى تضحك: بسم الله من ويهك ..زين لا تغير السالفه ارمس...
حمدان: ما شي عمتي شمسه بترد من بلجيكا هي وريلها انتهت الفتره اللي محدد فيها يكون سفير هناك..وعازمينهم..
ليلى: وشو اليديد في هذا..شموس من استوت وهي تسافر مب اول مره..ليش العزايم..
حمدان: ربج بعد...بنتهم متولهين عليها..وما عرفوا يفرون فلوسهم وين قالوا نسوي عزيمه...
ليلى: زين والله..ما عليه يا حصه الهرمه ولا ترمسين..
حمدان: خلينا بموضوع العزبه شو قلتي..؟
ليلى: زين قلت لك بفكر، اجلها ليوم الجمعه...
حمدان: عمتي شو هاه..اليوم الاربعاء الوحيد اللي بكون فاضي..والخميس معزوم..والجمعه بحضر للمدرسه...
ليلى: والله ما اظن انك بتسير العزيمه الساعه 10 الصبح...
حمدان: انزين برايج انا بسير البيت...
ليلى: ونك زعلت..؟
حمدان: لا والله..محد يزعل من اغلى الناس بحياته..
ابتسمت ليلى ولوت عليه: فديت روحك يا ربي..الله يوفقك دنيا واخره...
وسار عنها حمدان البيت..وهي دقت لحصه...
ليلى: مراحب اخت حصه..
حصه وصوتها رقاد: اهلين..
ليلى: عوذ بالله من أي مقبره طلعتي؟
حصه: يعلج فداي...شو تبين..
ليلى: مب منج من اللي يتصل بج...
حصه: زين عطيني خمس دقايق وبسوي لج تلفون..بسير اصلي المغرب ..
ليلى: اوكي برايج..مع اني اعرف ما بتدقين..
حصه: والله بتصل اصلا خاطري ضايج وابى ارمسج..
ليلى: اترياج...
نزلت ليلى وياها شيخه..وخلت شرملى توديها حديقة البيت تلعب شوي..وهي يلست ويا راشد وامها..
ام راشد: بتسيرون باجر بيت مبارك.؟
راشد: ان شاء الله اكيد..عازمينا وخلود مصره انها تسير..
ام راشد: هاه ليلى بتسيرين ولا لاء.؟
ليلى: محد عزمني..؟
راشد يطالعها بنظره غريبه: ليش انتي مب منا يعني..ولا لازم عزيمه خاصه...
سكتت ليلى..علاقتها براشد احترام فضيع بدون حدود..ما تبى تجادل في معركه بنظرها بتطلع منها خسرانه غصباً عنها لانها تعرف انها مستحيل ترضى تخليه يطلع غلط لو درت انها على صواب بس وتمت ساكته..ونشت بتطلع من باب الصاله الحوش..
ام راشد: وين سايره ليلى تعالي يلسي..
ليلى: بسير اشوف شيخه..
وطلعت ليلى..
ام راشد: زين جذي حرام عليك تكسر بخاطرها..ما تروم ترمس وانت هني..
راشد: شو تبين برمستها ما احب هالبزا اللي هي فيه..
ام راشد: يا ويلك من الله ..أي بزا اللي ترمس عنه؟؟ليلى هي الوحيده اللي انظلمت فيكم..وانحرمت من حنان ابوها..
راشد: ما عليج منها بتعرس وبتنسى..الا اقول ما رمستيها في سالفة شيخه بنت سيف الله يرحمه..
ام راشد تنهدت: يا ولدي رمستها بس مب طايعه..وانا امك طالبتنك طلبه ما تردني فيها..
راشد: افا عليج والله يالغلا لو تبين عيوني واصله...
ام راشد: علني افدا روحك يا ولدي..لا تضيج خاطرها ورمس اهل المرحومه وقلهم لا يستعيلون على البنت..لين ما نشوف لنا رمسه ثانيه ويا عمتها..ولا تعذر لهم بأي شي ..والله بيتقطع فوادها عليها..
راشد: والله مدري شو اقولج بس هم ما ادري بلاهم..اول شي رضوا والحين خوالها ردوا احشتروا يبون بنتهم..
ام راشد: لو يينا للحق البنت مفروض تتربى عند ام امها..بس شو نسوي ؟
راشد: البنت بنتنا ونحن اهلها واسمها شيخه سيف مب شيخه سعاد...وانا اول مره اشوف ليلى تعاند على شي صح..
ام راشد: الله يسهل اللي فيه خير وصالح...
راشد: ان شاء الله امايه...
ونش من مكانه وحبها على راسها..
راشد: امايه انا ساير الحين البيت بسبح وبسير اشوف لي كم شغله..تامريني بشي..؟
ام راشد: لا فديت روحك تحمل على عمرك والله الله بنفسك...
راشد: لا يهمج الغاليه..الحين بتييج خلود هي قالت لي تبى تيي تيلس عندكم الليله ما شي مدارس عند العيال وقالت بسهر ببيت الوالده..
ام راشد مبتسمه: الله يرضى عليكم يا ولدي...
في بيت مبارك الناس محتشره ولو ان العزيمه باجر..بس الكل يشتغل حتى بنات خليفه...وفي الممر اللي فوق بين غرفة ذياب وحصه...
عفرا: اقول سمر وين عمتي حصه حطت المفارش مال ميلس الحريم..
سمر وهي تاكل ايس كريم: ما اعرف..
عفرا بنظره تحتقر فيها سمر وهي سايره عنها: شو تعرفين انتي غير الاكل..
سمر: سمعتج !!
طنشت عفرا المتباهيه المتعاليه اللي بعمر حمدان ثانويه عامه..متفوقه بدرجات تبهر العقل والكل متأكد انها بتكون من اوائل المدرسه او المنطقه.... جميله جمال اكبر من الجمال نفسه..نظرة الشموخ اللي ماليه عينها مثل عمتها حصه..وكبرياءها اللامتناهي..وخطواتها الواثقه..غير عن كلامها الموزون..ومع هذا محد كان يحبها ولا يسوي لها سالفه..حتى في المدرسه..سلامه وحمدان اربع وعشرين ساعه ويا حمده اختها..حمده اللي اصغر من سلامه بسنه وفي اول ثانوي..راسبه وكل شهاداتها كيك احمر..بس على اخر السنه تنجح وعمرها ما عادت سنه..بس تصف الدواويح طول التقاويم....حمده اللي صح مب نفس جمالها لكن قمه في الربشه والحركه ..كلها على بعضها سوالف وضحك وماليه المكان بحشرتها..ورغم كل هذا انيقه بشكل بسيط يلفت لها النظر واللي يشوفها يحبها من ابتسامتها اللي صدق تحسس اللي يشوفها انها من القلب..
نزلت عفرا الصاله اللي تحت وسارت صوب المطبخ...وحصه واقفه تشوف شو يسوون..
عفرا: عمتي حصه وين كنتي حاطه المفارش اللي اخر مره كانن في فلتنا عقب عزيمة قوم خالي فهد..
حصه: ما ادري والله انشدي أي حد من البشاكير..
عفرا: كلهم يقولون انتي مستعملتنهن اخر مره...
حصه: زين والله ما حيد وين حطيتهن...خلني اتذكر...يا ربي وين حطيتهن..؟؟
دخلت حمده الحشره...تغني...
" يا عذابي سبة جروحي يا مصابي يا شقا حالي..ليش عني تصد وتروحي وانت قلبي حبك الغالي"
حمده: اووه شعندكم حاشرين البيت...؟
عفرا: نشتغل عندنا ناس بيون...انتي من وين ييتي..؟؟
حمده: كنت اكلم حمداني مسوي تلفون يتخبرني عن شي...
عفرا اللي انقهرت: شو هالشي...؟
حمده مبتسمه: لو اباج تعرفين بقوله من اول جمله بس اسرار...
عفرا وهي تطالعها بغرابه: وشو من اسرار بينج وبين حمدان..؟
حمده وهي تفتح الثلاجه وتصب لها عصير: نفس الاسرار اللي بينج وبين سعود...
انقهرت عفرا اكثر: احترمي نفسج..
حمده مبتسمه ببرود: محترمه من زمان....
حصه بصوت عالي وهي مبطله عيونها: اييييه انتي وهي..شو بلاكن ..احسن شي صفعيها وانتي الثانيه قومي ضربيها واسحبي شعرها..شو من مذهب عندكن انتن الثنتين انا واقفه هني وجي ترمسن عيل لا ظهرت شو بتسون؟؟؟
حمده: اسفه ابله حصه..
وطلعت..
عفرا تبا تسوي عمرها عاديه قد ما تقدر: ما تذكرتي المفارش وين؟؟
حصه منقهره من ثقة عفرا: لا ما تذكرت اذا ذكرت بطرش لج تينا تييبهن لج فلتكم..
عفرا: انا ما اباهن ولا امايه..نحن نبى نحطهن على طاولة الميلس فبيتكم انتوا..عشان الضيوف اللي باجر..
حصه: والله ما ادري عقب بشوف هن وين..انتي الحين سيري كملي شغلج...
عفرا: اوكي بسير ..
وطلعت عفرا وقلبها محترق..لا حب في حمدان ولا شي بس انقهرت..هي روحها مب عارفه ليش هالشعور..قهرتها حمده..وفي نفسها" ليش دايما هي تاخذ كل شي مع انها مب شي راسبه ومب حلوه بس الكل يحبها...احس بضيج...يا ربييه ليش هالمشاعر المختلفه..برايها المهم ابويه يحبني وبس..ما يهمني شي ثاني"
..........
في فلة خليفه...ابو عفرا يالس يرتب اوراقه ويحطهن في ملف الشركه وام عفرا يالسه عنده تسولف له عن باجر وشو بيسوون...
خليفه: ما ودي اسير لدبي احس ما فيني حيل اسوق لدبي...
ساره: كبر الريال خلاص ما يروم للمشاوير العوده..
يضحك خليفه: أي مشاوير عوده..بس والله احس ما روم اركز بالسواقه لين دبي..عيوني ما ادري بلاهن...
ساره: قلت لك لازم تروح المستشفى وتسوي فحص..ربك بعد يمكن تحتاي نظاره ولا شي..
خليفه: بنشوف ان شاء الله خير...
ساره: الله يعينا على باجر..
خليفه: هيه والله صدقج الله يعينا اسمينا بنحتشر حشره..الا اقول عزمتي اهلج...
ساره: وشمعنى يعني ما ذكرت اهلي الا يوم طرينا الحشره...
خليفه يضحك: هم الحشره كلها...
ساره: احلف انت بس...؟؟!!
خليفه: اقول سارونه وين البنات...ما شفت عفاري اليوم...؟
ساره: اييه وحمده بنت الحرمه الشينه محد يذكرها....
خليفه : حرام عليج..بس عفاري غير..عفرا الاولى وغناة قلبي..وبعدين ما شاء الله حمدووه محد فهالدنيا ما يحبها بس عفاري وحدانيه ما يخصها بحد وكل شي تسويه ما يعيب خلق الله..بس حمدووه شيطونه وحركيه تفرض نفسها فرض...
ساره مبتسمه: فديتها عفاري طالعه عليه وحدانيه...
خليفه يطالعها بغرابه: شو مثلج..؟؟ يعني لو قلت البنت شينه بتقولين شراتك...؟والله انكن الحريم مصايب...زين يالله سيري ساعدي قوم امايه في بيتهم تلاقين امايه مسويه يوم العمل العالمي...
ساره: انا قلت للطباخ هني يسوي الحلويات وطرشت لهم البشاكير كلهن..بعد شو تبى..؟
خليفه: سيري لهم انتي اكيد يحتايونج في شي...
ساره: ان شاء الله على هالخشم..
وظهروا كلهم من البيت وهم سايرين في الحوش بيت بو خليفه..شافوا عفرا تمشي لروحها يايه من بيت يدها موخيه راسها وتتكلم بصوت واطي ما ينسمع بس مبين انها تغني...
خليفه: علني افدا هالحس...
عفرا رفعت راسها ويوم شافت ابوها برد قلبها وسارت ولوت عليه..وحبته وسلمت على امها...
عفرا: ابويه ولهت عليك..
خليفه: فديت روحج من وين يايه وليش تمشين في الحر لروحج جان تميتي ببيت يدج لين ما يخف الحر شوي...
ساره مبتسمه: يالله يالله يالبزا...
عفرا : ما عليه ابويه انا سايره ادور مفارش ميلس الحريم ضيعناهن...
خليفه: ما بتردين ويانا ..؟
ساره: خلها يمكن يدتها مطرشتنها...
وسارت عنهم عفرا البيت وهم ساروا بيت بو خليفه..
...................
*للتنويه
الابيات للشاعر الاماراتي/ حميد بن سعيد النيادي

في الليل الساعه 12 وعقب ما رقدت شيخه...انسدحت ليلى ع شبريتها ويلست تفكر في ناصر..
" ناصر انشغلت عنه من يوم الثلاثاء ما شفته ولا سمعت حسه..يا ويل حالج يا ليلى كم بتعيشين..؟..اااه يا قلبي..حصوه الهرمه قالت بتدق وما دقت..اعرفها مسودة الويه جذابه من يومها..."
تتجلب على الفراش ما شي رقاد.." يالله شو هالحاله ابى ارقد...مب حاله هذي..".
ما ياها رقاد وقامت وشغلت الليت..وطلعت صور المدرسه ويلست تطالعهن وتضحك على شكلها هي وحصه وكيف كانت شعورهن..وتجلب في الدفاتر والاوراق..بس ما لقت شي يذكرها بأي شي ولا أي شي يشغلها..كل اوراقها وذكرياتها وكتاباتها في بيت حصه..وكلما فكرت تطلبهن منها تنسى..فتحت واحد من كتب الثانويه العامه وشافت توقيع شما ربيعتها الروح بالروح اللي عرست وسارت العين...
"ذكراي من ماضي غرامك وعودك...واحلى ليالي العمر سجات ماضيك..طبيعتي تفرض علي وجودك..لي غبت عن عيني..حناني يناديك"
ضحكت ليلى وذكرت شما ربيعتها اللي حتى ما قامت تدق ابداً..ولا حتى بالمسجات تتواصل وياها..وعذرتها..مشغوله بريلها وبيتها ومب نفس يوم انها بنيه وحياتها بتكون شوي فيها وقت فراغ...وهي سرحانه وتقرا بعض الاشياء في الكتب..صاح تلفونها...
ليلى وقلبها يدق بسرعه قبل تشوف اللي متصل: بسم الله الرحمن الرحيم من بيتصل لي الحين...؟
وشافت التلفون مكتوب" حصه"..
ليلى بهمس: شو فيج حصه شو مستوي بج ليكون تعبانه ولا حد استوى به شي..؟
حصه تقلدها ونها تهمس وياها وبصوت مبحوح: لا ما شي يا خبله بس ابى اسولف وياج..
ليلىبهمس: يالسخيفه طيحتي قلبي...
حصه وردت ترمس بصوت عادي: وليش تهمسين ان شاء الله.ليكون ريلج توه راد وما يباج ترمسين..؟
ليلى مبتسمه: وشاللي حارنج..؟ ما عندي ريل بس كيفي اتدرب من الحين ربج يمكن ابتلي فواحد ما يباني ارمس انصاص الليالي..
حصه: زين اقول بتيين باجر بيتنا...يوم نشدت خليفه قال لي انه رمس راشد خوج وعزم اهل بيتكم...
ليلى: مابا ايي...
حصه: وليش ان شاء الله مب من مستواكم ولا مب من مستواكم..؟
ليلى: لا الثانيه مب الاولى...
حصه: يالله عاد تعالي بكون لروحي..اباج تآزريني...
ليلى: مالي بارض والله .
حصه: الله يخليج...تعالي والله وناسه قوم شموسه واهل ريلها ربشه...
ليلى: بشوف اذا قدرت ...
حصه: شو كنتي تسوين قبل ادق لج..وليش يا الديايه ما رقدتي للحين...؟
ليلى: والله يالسه اطالع صورنا مال الابتدائي..وتذكرت شي..
تضحك ليلى..
حصه معصبه: ما يضحك كم مره قلتي هالسالفه..؟
ليلى وهي تضحك: مب رايمه انسى شكلج والله وانتي.....
قاطعتها حصه: باي والله مب منج من اللي يدق لج..
ليلى: حصوووه بس والله سوري ..بطني يعورني من الضحك..
حصه ونها عاديه: زين سامحتج...
ليلى تضحك: والله عادي شو فيها مب انتي اول ولا اخر بنت طلعوها عشان القمل...
حصه: والله انج نذله باي..
وبندت في ويهها....
ليلى: يا ويلي شكلها صدق عصبت...برايها...وطرشت لها مسج..
"تصبحين على خير يا عمري"
حصه طرشت مسج ثاني..
"جب ما يخصج فيني ولا تدقين على رقمي مره ثانيه"
ليلى تضحك...وطرشت مسج ثاني..
"زين حصوه بدق لج والله ملانه..شسوي ما حب حد الا انتي فديت روحج ردي علي"
ودقت ليلى...
ليلى: حصووه..
حصه: شو تبين...؟
ليلى: حرام لا تزعلين مني اهون عليج..
حصه: اكيد لاء...
ليلى: زين منو عازمين باجر...؟
حصه: والله كل حد من العايله ابويه عازمنه..
ليلى: الله يعينكم..
حصه: فديتج ليلوه تعالي مب حلوين هلج بدونج...
ليلى: خلاص فديت روحج بحاول والله...
حصه: فديتها يا ربي شو اسوي بعمري احبها احبها...
ليلى: من؟
حصه: من بعد اكيد انتي..
ليلى تضحك: يعني الحين تقولين لي هالرمسه..يعني لازم انتحر..هاه..؟؟ قولي لي يعني تبين الفكه مني وخلصي عمرج..تعرفيني ما روم اتحمل..شو اسوي بحياتي..اعق عمري من الدريشه مثلاً..؟ لا لا اقولج احسن شي اني اشرب لي ديتول وافتك نهائياً...
حصه مب رايمه ترمس ميته على رمسة ليلى من الضحك....
حصه: لا يا بوج خلاص استريحي مب متفيجين للفضايح صبري لين ما عرس وانتحري...
ليلى: هاه يعني تبين الفكه...قولي من اول...
حصه:ابى الفكه منج عقب العرس..ابا أأمن على حياتي وادور لي بديل بغيابج.....سمعي بخبرج شو استوى اليوم مع بنات خليفه...
ليلى: شو استوى....؟
وخبرتها حصه كل شي..وانقبض فواد ليلى..تعرف كل شي عن حمدان وعمره ما خبى شي عليها..كيف يرمس حمده وما يقولها...؟؟
حصه: وين وصلتي.؟
ليلى: هني والله بس افكر شوي ...
حصه: لا تفكرين وايد انا تعبت من كثر ما افكر...
ليلى: في شو.؟؟
حصه: اقول ليلى لحظه شوي....
وسمعت ليلى حصه ترمس حد دخل عليها...
حصه: باااك..
ليلى: احلى ولكم لاغبى حصه..
حصه: ارجوج يا حفيدة انشتاين...
ليلى: يالله بسير ارقد عيوني تعورني...
حصه: هيه وانا والله يايه ببند..سمر يت من عند امايه ما فيه تقول لها اني ارمس بالتلفون هالحزه...
ليلى: خلاص غناتي تصبحين على خير..
حصه: وانتي من اهله لا تنسين باجر..
ليلى: يالله مع السلامه مابا انسى....
ورقدت ليلى...على طول...
...............
في بيت بو خليفه حصه منسدحه ودخلت سمر..وشغلت الليت وغيرت ثيابها..وعقت عمرها على الشبريه تتحرىحصه رقدت...وحصه ما تروم ترقد والليت مبطل...
حصه: يعني ما بتصكين الليت لين ما نقول صكيه..
سمر:ما كنت اعرف انج واعيه تحريتج رقدتي...
وقامت سمر وبندت الليت وانسدحت وتلحفت...
حصه: سمر..
سمر بفرح ما صدقت حصه تبى ترمسها: هاه..
حصه: وليش مستانسه يعني..؟
سمر: لانج مب زعلانه...
حصه بينها وبين نفسها" الحين من اللي مفروض يزعل انا ولا هي..بس يالله فكه ريحتني من الاعتذار"
حصه بنذاله: زين احمدي ربج اني رضيت عنج..
سمر: زين شو تبين تقولين...
حصه: نسيت...
سمر بثقاله: لا دخيلج تذكري...
حصه: ما شي بس سكتي برقد...والله نسيت شو بقول...
سمر: حصوه..
حصه بعصبيه: مب اصغر عيالج..اسمي حصه...
سمر: حصه..
حصه:هاه..شو بعد..
سمر: بقولج نكته...
حصه ما عرفت شو ترد بس الظاهر هالمره ما رامت تيود عمرها وانفجرت ضحك...بصوت خفيف اخر شي اترفع صوت ضحكتها...
سمر ابتسمت ببلاده: ههههه ادري طفرتبج..
حصه وهي تضحك: زين يوم عرفتي..
سمر: اقولها ولا تبينها تم في خاطري لباجر..
حصه: قولي..
سمر:في واحد اول مره يرمس بنيه بالتلفون..قالها كم عمرج...؟قالت له:37..قال لها: الله مقاس نعالي..
حصه: مثل ويهج..تحريت شي يديد...
سمر: بقولج وحده ثانيه..
حصه: برقد اقولج يالله شكلج بتفتحين لي صندوق النكت...برقد الحق على عمري قبل لا تبدين ولا تسكتين..تصبحين على خير..
سمر: وانتي من اهله..
..............
اليوم الثاني الصبح..سلامه نشت من وقت عقب رقاد البارحه اللي من المغرب لليوم الثاني..وسارت بيت يدها مبارك وشافت يدتها ناشه ويالسه في الصاله وحاطه قناة المجد والمقرئ يقرا قرآن..وسلمت عليها ويلست عندها...
ام راشد:شو اللي موعنج الحين..؟
سلامه: رقدت من امس العصر لليوم..
ام راشد: خيبه...!!
سلامه: وين عمتي ليلى..؟
ام راشد: بتنش عقب شوي ..
سلامه: بسير اوعيها..
ام راشد: بس تحملي بتحرج عليج..
سلامه وهي سايره فوق: عادي..متعوده...
عند الحجره وعلى دق الباب نشت ليلى ودخلت سلامه عقب ما بطلت لها الباب..وقامت ليلى وصلت وقرت قراءن شوي ويلست ويا سلامه...
ليلى: ليش واعيه من وقت.؟
سلامه بطلت شعرها وانسدحت على الشبريه: ما اعرف راقده من امس العصر...ما فقدتيني..؟
ليلى: بالعكس ارتحت من حشرتج..
سلامه: برقد هني...
ليلى: يا سلام توعيني عشان ترقدين مكاني...
سلامه: يدتي غاليه تحت انزلي سولفي وياها..
ليلى: اعرفج لوتيه تبيني اظهر عشان توعين شويخ..
سلامه وهي تتثاوب: لا والله مب متفيجه لها..سيري عند امج وانا بنام...
ونزلت ليلى وسلامه ردت ترقد...وفي الصاله ما شافت امها بس لقت التلفزيون مثل كل يوم حاطينه على القراءن في قناة المجد..
وسارت الحوش وشافت امها في الزراعه تعابل فيها..سلمت عليها ويلست تسولف وياها..وشوي استوت الساعه 8 وشافن خلود ام حمدان يايه من صوب فلتهم هي والبشكاره اللي يايبه الريوق وياها...
ليلى: حليلها مرة اخويه ايهدناها...
ام راشد: الله يرضى عليها يا بنتي...
وقربت منهم خلود وسلمت على عمتها...
خلود: صبحج الله بالخير عمتي ام راشد...
ام راشد: الله يصبحج بخير وعافيه...
خلود: شحالكم اليوم ان شاء الله بخير..
ليلى: الحمدلله ناشين من وقت نتريض انا وامايه..
خلود تضحك: واعليه منها عموتي تخيليها رياضيه...
ام راشد: وليش شو بلاني .؟ ما تعرفني ايام الشباب ماشي احسن عن رياضتي..
خلود: اييه صح كنتي رياضيه درجة اولى...
ليلى: وحصلتي كم ميداليه ذهبيه..
ام راشد: ما عليج يالهرمه تضحكين عليه...وين ايامنا وايامكم ..فرق السما والارض..ايامنا ما شي اخير عنها...
خلود: زين عمتي تعالي داخل بنتريق يايبه لكم الريوق ويايه....
ام راشد: الله يعطيج العافيه بنتي..
وساروا داخل يتريقون....وياهم راشد ويلس وعقبه وصل حمدان ويلسوا كلهم يتريقون ويسولفون...
راشد: يالله برايكم انا بسير الوكاله موتري خربان بشوف شو سالفته...
ام راشد: الله وياك...
خلود: لا تنسى ترد بدري عشان تودينا بيت بو خليفه...
راشد: يا بيت بو خليفه هذا..اصلا لو افقد الذاكره ما بنسى انهم عازمينا اليوم من كثر ما حنيتي على راسي...
يضحكون كلهم على خلود..
حمدان: ابويه انا بسير العزبه اليوم...
راشد: ويا منوه..؟
حمدان يطالع عمته ورد يطالع ابوه: لروحي مع الدريول باشا...
ارتاحت ليلى لانها كانت ناويه توافق ان حمدان يشل شيخه وياه..بس ما تبى أي حد يعرف لانها تدري الكل بينصدم من هالحركه وكيف توافق انها يشلها العزبه لروحه..
بو راشد: سير محد قابضنك...
ابتسم حمدان..وسار بيتهم بيغير ثيابه..وقبل يطلع..
حمدان: عمتي ليلى تعالي وياي..
ليلى: ما فيه شده اسير هناك..
حمدان: يالله عيزت عمتي...
ليلى قامت على طول: لا والله شو بعد الحين بسير وياك..قال عيزت...؟
ضحكت خلود وام راشد...
حمدان يضحك: ما تيون انتوا الحريم الا بالنغزات..
ليلى وهي يايه صوبه: حريم في عينك انا بعدني انسه..
حمدان: زين سوري...
وساروا بيت راشد..
...........
في بيت بو خليفه كل شي مرتب ونظيف..من الصبح ريحة البخور والقهوه والهيل شاله البيت..من اول ما يدخل الضيف صوب الفلل والممرات اللي حواليها...و اخوان حصه وصلوا من دبي الصبح الساعه 9 عقب ما اتفقوا يمشون من هناك صوب بوظبي رباعه خوانها وحريمهم وخواتها ورياييلهن...اخت حصه العوده نورة عمرها 34 سنه هي وعيالها ميره 12 سنه ومحمد 15 سنه وهذي ما تيي البيت الا نادراً ريلها تاجر مشغول اربع وعشرين ساعه..وما عنده وقت كل يوم وهو عافد بوظبي...وعبدالله عمره 37عقب ما يلس عند اهله يومين في بوظبي رد دبي وسار ييب عايلته اللي هم حرمته بدريه بس وما عندهم عيال... سلمى 31 معرسه قريب وما عندها عيال...واخر واحد ذياب اللي ما يطلع من دبي مول وهذا اصغر واحد في الاولاد واصغر من حصه في البيت عمره 20سنه مب معرس بس يتصرف بطيش مثل اليهال وما يطلع من بيوت خواته ومستانس على القعده في دبي..لا شغل ولا مشغله....
استوت الساعه 9:30 وكل هالعايلات في البيت عدا قوم شمسه اللي قالوا ما بيوصلون الا الساعه خمس العصر عشان يرتاحون عقب رحلةالبارحه..
وفي الصاله الخارجيه للبيت ابوابها زجاجيه وتنشاف منها حديقة البيت...
حاطين ريوق من اول الطاوله لاخرها..وكلهم متيمعين و بو خليفه الدنيا مب واسعتنه يموت في اليهال..والبيت حشره وبيت خليفه كلهم في البيت العود..يدخل بو خليفه ياي من صوب الميلس هناك موصلين ريوق الرياييل يعني عيال بو خليفه و رياييل بناته...على عكاز يدخل من باب الصاله وينشن البنات يسلمن على ابوهن...
بو خليفه: انا ودرت ميلس الشباب وياي اتريق ويا بناتي...
سلمى: فديت ابويه يا ربي...
نوره: شو من ريوق بيكون هذا..احلى ريوق في الدنيا...من زمان فديت روحك ما يلست وياك...
بو خليفه: مب منج من ريلج هاللي جنه قابض تجارة دبي بإيده...
نوره: اسمحلي يا بويه ادري بعمري مقصره...
بو خليفه: لا بنتي لا قصور ولا شي الا اسولف وياج..الزم ما عليج بيت ريلج...
ام خليفه: ما بتقربون وتخلون السوالف..يالله متى بتتريقون...؟؟
ويلس بو خليفه وحواليه بناته ونزلت حصه ويت عفرا وحمده...وتموا يسولفون وكل حد يقول اخر اخباره...
سمر مب مصدقه من الفرحه ان حد على قدها موجود..كانت هي وميره بنت اختها نوره فوق ما نزلن حتى يتريقن من الوناسه...
كانت عفرا ساكته ما تتكلم ومتضيجه من موقفها مع حمده امس..على عكس حمده اللي ولا جنه شي صار تضحك وتسولف وحتى انها هي اللي ماسكه محور الحديث في القعده..ويدها ويدتها ميتين على سوالفها من الضحك...
نوره وهي تضحك: الله يغربلج يا حمدوه موتينا من الضحك...
بو خليفه: فديتها بنتي ملح اليلسه...
ام خليفه: فديت ابوها والله طالعه عليه...
سلمى: لا والله خلوف دمه ثجيل...حمده طالعه على خالتها سلامي فديت قلبي يا ربييه يوم كنت مثل عمرها ما كان للبيت طعم وانا محد..
ساره: نعم نعم...!! احلفي انتي بس..
سلمى توها انتبهت على ساره حرمة خليفه واستحت وحطت ايدها على ويهها وهي تضحك:اووه انتي هني ...؟؟
ساره مبتسمه: لا هناك...قالت لي دمه ثجيل...والله خليفه ما شي منه ما تحلى اليلسه الا بوجوده...
بدريه(حرمة عبدالله): عيل شو اقول انا عن عبدالله....
حصه: هيه والله يا ام سعيد صدقتي ما فيهم غير عبدالله خويه...ما شي منه اثنين ..عقل ورزانه وغير هذا حبوب..و..
ام خليفه قاطعتها: بو خليفه خلنا نسير الحديقه اللي برا...الحريم بييلسن يتغزلن في اخوانهن ورياييلهن..نحن شياب ما يخصنا...
بو خليفه يضحك: يالله قمنا...
نوره: ابويه تم الله يخليك ولهنا على حسك..
بو خليفه: ان شاء الله بس بسير اشوف شو مسوي هالمزارع في الزراعه والجو حار ما ادريبه صار لي يومين ما شفتها بشوفها وبسير ميلس الرياييل وبخطف عليكن عقب...
وطلع بو خليفه وحرمته الزراعه...
نوره طالعت عفرا اللي ساكته طول الوقت وخلصت ريوقها بس ما انسمع حسها ابد...
نوره: هاه اخت عفرا ما تبينا نسمع حسج..؟
ساره قلبها عورها يوم شافت عفرا..وحست انها تحترق من داخل...الكل مشغول بحمده وهي ولا حد يدري عنها...
عفرا وابتسمت ابتسامه باهته بس فيها ثقه وغرور: لا بس اتريق عقب ما خلص بسولف وياكم..
نوره: خلصنا من زمان....
ساره حست ان نوره تستفز بنتها وفي خاطرها" شو اسوي يا ربي وين اقول لها تسير عشان تفتك من حشرتهم"...
سلمى: هاه عفاري السنه من اوائل الدوله ان شاء الله...
عفرا: اكيد ان شاء الله...
بدريه اللي يالسه عدال عفرا لوت عليها وقربتها منها: فديتها يا ربييه هالبنت كل النعومه فيها...فديت اللي واثقه من عمرها...
عفرا ابتسمت "اخيرا حد تفداني..فديتج يا حرمة عمي"..
حمده: فديت اختي والله بتبيض الويه...يا سلام بنسوي لها حفله عوده..
حصه انفجرت ضحك: يا مسودة الويه انتي شعليج في اختج...انجحي وبيضي ويهج اول عقب تفاخري باختج...
حمده تضحك: فديتني يا ربي والله العظيم بتشوفون في الثانويه العامه اذا ما صكيت على الكل وخليت الوزاره تعيد حساباتها في هالمناهج ولا ما كون حمده بنت خليفه بن الشيخ مبارك...
ساره: هههه الشيخ مره وحده...
حمده: هيه فديته يدي الشيخ وشيخنا كلنا...وابويه ولي العهد...
ساره تضحك: غربلج الله من بنت..
ونزلت سمر وميره...
حصه: ميرووه الهرمه تعالي سلمي علي....
ويت ميره وسلمت على خالتها...
حصه: هاه شو اخبارج وشو مسويه...
ميره: زينه الحمد لله...
حصه: من وين ييتي..؟
ميره: من حجرة الالعاب...
حصه: زين زين..
ميره: خالوه بقولج نكته...
حصه وهي حست عمرها بتين من القهر: اختي نوره لحقي على بنتج..اختج سمر طلعتها فوق وسوت لها غسيل مخ..يتها عدوى النكت...
نوره: برايها خلها تطفر ابوها..
حصه وهي تسوي عمرها تصيح: لا يا ربي انا شو سويت ..تحل عليه لعنة النكت...
كلهم ميتين من الضحك على حصه..
حصه: اخت ميروه..قومي ما اريد اسمع أي نكته..انا حافظه كل النكت من اختي سمر..والله بتدخل جينيس هذي..
نوره: يالهرمه لا تكسرين بخاطر بنتي..سمعي شو بتقول...
ميره: مابا خلاص...
قامت ميره وسارت عند سمر وطلعن الحوي...
وين البشاكير وشلن سفرة الريوق...وقامن البنات وشلن اغراض خواتهن وودنها غرفهن وشلن اغراض حرمة عبدالله وودنها غرفة حصه...
وعقب يلسن يسولفن بدريه ونوره وسلمى وحصه وساره وعفرا وحمده..
..............
في بيت بو راشد..وفي غرفة ليلى..حمدان واقف...ومتلبس...
حمدان: شو قررتي...؟
ليلى: امم بعدني افكر...
حمدان: يا ربييه الثقه معدومه...
ابتسمت ليلى: فديت روحك يا ربي ..بس دخيلك حمدان انتبه عليها الله يخليك...
حمدان: وافقتي والله اني مب مصدق...يالله لبسيها لبس فنتكه على قولتج وييبيها لي الموتر وانا بترياج..
ليلى: وليش اللبس المفنتك..رايحين العزبه بتتخيس تراب ليش معذب روحك...
حمدان وهو طالع بيصك الباب: برايج أي شي انا بسير اخلي باشا يجهز الموتر...
لبست ليلى شيخه لبس عادي عشان تسير ويا ولد عمها حمدان العزبه ونادت على شرملى تسير وياها...ووصتها عليها وقالت لها لا تخلي حمدان يركبها الموتر بروحه...
حمدان لابس ومتجهز وبيسير العزبه...وليلى نزلت شيخه من الباب اللي ورا في الصاله..عشان محد يشوفها...
وعند باب السياره وهم طالعين...شيخه يالسه بحضن حمدان جدام وشرملى ورا...
حمدان متأفف: الحين هالبودي قارد لازم تسير ويانا يعني...؟
ليلى وهي تطالعه بخبث: وليش ان شاء الله تبغي تسير لروحك خبرني شو من مصايب ناوي لها..
حمدان يتمسكن: عمتي الله يسامحج دومج تحبطين من معنوياتي وتقللين من قيمتي وعمري ما اكبر بعينج ودومي ياهل...والدليل انج ما تثقين تخلين شواخي عندي ويايبه هالشيفه ويانا...
ليلى تضحك: اخ يا قلبي وايد أثرت فيني..شو بقيت حق الهنود من شغلات المسكنه واللعانه..
حمدان: بس يالله اخرتينا صكي الباب بنسير قبل يي حد ويخرب علينا...
ومسكت ليلى شيخه وباستها ولوت عليها..كانت شيخه دبدوبه ممتليه وبيضا بياض الثلج مثل امها الله يرحمها..وعيونها وساع وفيها جمال ياخذ العقل بالرغم من ملامحها الطفوليه ...طريقة رمستها تقربها من القلب اكثر..وصعوبة نطقها لبعض الحروف مخليتنها احلى واحلى ...
ليلى: حبيبتي شواخي خبريني اذا زعلج حمداني الدب..
شيخه وهي تطالعها بغرابه: انتي ما لوحين...؟
ليلى: لا حياتي انا ما بروح ...
حمدان: يالله عموه بعدي عن الباب بصكه..
ليلى: انتبه عليها..
حمدان: هاي المره العشرتعش الف اللي تقولين لي فيها هالوصيه..اللي يشوفج ترمسين جي يقول برهنها عند حد...
وقبل ترمس ليلى سلامه يايه من بعيد وويهها كله رقاد وعيونها منفخات...ولابسه بيجاما قصيره شوي..
سلامه وهي تفرك عيونها: وين بتروحون..؟
حمدان وهو يطالع عمته مستغرب: هاي من أي مقبره طلعت..
سلامه: حمدان وين بتروح؟
ليلى تضحك: العزبه...
ونطت سلامه السياره ويلست عدال شرملى...
حمدان معصب: عمتي نزليها...والله ما سرنا وهي ويانا...
ليلى: سلامه انزلي استحي ع ويهج وين رايحه بهاللبس..والله لو يشوفج راشد بيقطعج..
سلامه: انا ما بنزل لين ما تتريوني اغير ثيابي وبرد...
حمدان يطالع عمته...
ليلى: اوكي يالله سيري..وهم بيتريونج..
نزلت سلامه..وسارت البيت ركض عشان تغير..
حمدان: باشا يالله نروح...
باشا: ماما سلامه وين ما يجي..
حمدان: الحين انا الريال وانت بتمشي على شور الحريم؟ اقولك يالله...
باشا: ان شاء الله بابا..
حمدان: جي اباك تسمع الرمسه من اول مره...
سارت ليلى البيت وروح حمدان ويا شيخه العزبه...ونزلت سلامه من فوق تركض ويوم شافت الحوش خالي ومحد فيه..يلست تصيح...على الارض..
سلامه وهي يالسه على الارض تصيح: يالنذل والله بتشوف والله بخبر ابويه عليك...
وتصيح بصوت عالي..وطلعت لها يدتها ام راشد..
ام راشد وهي تمشي بسرعه تبا تشوف شو بلاها البنيه..
ام راشد خايفه وماسكه ايدها: بنتي سلامه شو فيج فديت روحج..؟ شي يعورج؟
سلامه وهي تصيح: راح عني والله بيشوف الخايس...
ام راشد : من اللي راح ووين راح؟
سلامه: حمدان سار العزبه وخلاني...
ام راشد: شتبين به خلاص باجر انا بوديج وبنسير كلنا الا هو...
سلامه: ماريد ابى اروح الحين..الحين...
بطلت ليلى الجامه اللي تحت في الصاله وتطل على الحوش...
ليلى: امايه تعالي ما عليج منها خلها تصيح..دلع بنات...
وقامت عنها ام راشد ودخلت البيت..وسلامه سارت فلتهم...
وفي الصاله في بيت بو راشد...
وصل مبارك اخو ليلى اللي اصغر عن راشد وحرمته و بناته مريم و ايمان وامل وولده عمر..سارن البنات فوق عند عمتهن ليلى ومبارك سلم على امه و يلس مبارك شوي معاهم قبل يظهر ويسير عند الشباب مثل ما وعدهم...وشمسه حرمته يلست عند ام راشد واتصلت بخلود مرة راشد عشان تييهم...
وفي غرفة ليلى...البنات يالسات مريم اكبر وحده ثاني ثانوي عمرها 17 سنه.. حلوه واجتماعيه بس شوي دلوعه وانيقه ومهتمه فوق التصور بمظهرها.... عمر في ثالث اعدادي عمره 15 وعقبهم ايمان وامل توأم في صف اول اعدادي اعمارهن 13 سنه..ايمان خبيثه وهاديه بس تسمع..وامل على نياتها هاديه وكل شي تقوله وتحب تسولف ومبينه براءتها في عيونها..
مريم: عمتي ليلى.. وين شيخه..؟
ليلى: سارت ويا حمدان العزبه..
مريم مستغربه: كيف خليتيها تسير وياه يمكن تتعور ولا يصير بها شي...
ليلى في خاطرها" يا ربيييه على رقتها ونعومتها هالبنت..يا ليت سلامه تاخذ منها شوي"
ليلى مبتسمه: لا عادي اصلا حمدان ريال ما ينخاف عليه...
مريم بكل نعومه: اتمنى والله..
امل: عمتي البارحه سرنا بيت خالي احمد ..ولدهم طاح من على الدراجه وتعور وانكسرت ايده وخالي احمد قاله ما يسوق الدراجه مول..وحلف بيبيعها..وامايه تمت زايغه وساروا المستشفى وحطوا له جبس ابيض..وما يروم يمسك شي..مسكين الحين كيف بيسير المدرسه..
ايمان عصبت وطالعتها بحقد: ليش تقولين لها..؟ امايه قالت لا تخبرون حد اسرار البيت..
ليلى مصدومه:امونه حبيبتي هذي مب اسرار عادي..نحن بيت واحد وانا اخت ابوج ما بينا اسرار..
وغمزتلها وكملت: اسرارنا وحده حبيبتي..
مريم:عمتي ودينا العزبه...مع حمدان وشواخي..
ليلى: والله فكره..
امل بفرح: الله يا رب امايه توافق...
ايمان: ما بتطيع بتقول بنخيس ثيابنا...
ليلى: عادي بنغير لج..ما شاء الله في لج ثياب هني غيري منها..
ايمان: ماباها انتهت موضتها..
ليلى في خاطرها" الله يعيني على اناقتكن يا بنات دبي"..
نزلت ليلى الصاله تحت وسلمت على شمسه حرمة مبارك..وعلى مبارك اخوها..ويلست وياهم يسولفون ويضحكون..وتمت مريم بنت مبارك تأشر لعمتها عشان ترمس ابوها..بسالفة العزبه..
ابتسمت ليلى: مبارك..!!
مبارك: يا عونج..
ليلى:اليهال يبون يسيرون العزبه..شو رايك..؟
مبارك: برايكم..ما عندي مانع..بس شاوروا ام عمر..
شمسه: ما عندي مانع..بس انتبهي عليهم..
ليلى:افا عليج مرة اخويه..
مريم ابتسمت بفرح...
امل ونشت من مكانها وتمت تتنطط: يعيش احلى ابو في العالم..
ايمان ساكته بس ما رامت تخبي فرحتها..
ايمان: واذا تخيست ثيابنا كيف نغيرها..؟
امل: اوووه انتي لازم تخربين علينا...؟
شمسه: ما عليه في لبس احتياطي يايبتنه وياي...وفي لكم لبس جديم في حجرة عمتكم عايشه...
في هاللحظه يدخل عمر ويسلم عليهم..
عمر: سرت بيت عمي راشد..وين حمدان وسلامي...
ليلى: حمدان سار العزبه..وسلامي راقده..عمر شو رايك تسير ويانا..
مبارك: بتتغدون هناك..؟
ليلى: هيه وبنرد الساعه 5 العصر..
شمسه: هيه فديتج...ردوا بسرعه..ابى البنات يلبسن عشان انسير عقب بيت مبارك بن عبدالله..
ام راشد متعجبه: حتى انتوا معزومين..؟
مبارك:هذيل تخبلوا امايه...ما خلوا حد ما عزموه...
ام راشد: الله يعينهم...
ليلى: انزين بنات قومن غيرن..بنسير عقب شوي..
وطلعن البنات فوق وبدلن ثيابهن في غرفة عايشه..وخذن اللي يبن وياهن..وعقب ما طلعت ليلى من حجرتها وشافت البنات واقفات في الصاله اللي فوق..اول ما شافتهن ليلى غصب ابتسمت..
مريم كانت لابسه مخور عنابي ولابسه شيله وشكلها كان بنتهى النعومه والرقه..
امل عدالها كانت لابسه جلابيه خضرا فاتحه قصيره وبكم قصير بعد..اما ايمان كانت مثل ما توقعت ليلى لابسه Body ابيض وقميص احمر وتنوره حمرا..قصيره وفيها ورد ابيض..ولافه شعرها بطريقه حلوه اشبه ما تكون تسريحه..
ليلى مبتسمه وهي تنقل نظراتها من مريم لين ايمان وبكل بساطه..
ليلى: ايمان حبيبتي..وين رايحه فديتج؟
ايمان وهي تلعب بخصله من شعرها: العزبه وياكم..
ليلى: وشو كل هالكشخه..؟
ايمان: وكيف تبين الناس يشوفوني..وشو بيقولون عني...
ليلى: أي ناس؟ محد الا انا وحمدان وخواتج..
امل: وسلامي.؟
ليلى تحط ايدها على ويهها: اووه نسيناها هذي؟؟
سارت ليلى فلة راشد..وزقرت سلامه اللي يتها على طول...
سلامه: شو تبين؟
ليلى: نحن سايرين العزبه..بتروحين ويانا...
سلامه: منو انتوا..؟
ليلى:انا وبنات عمج مبارك..
سلامه: وينهم...
ليلى: وصلوا من ساعه..
سلامه: وصلوا العقارب وهاللي نحن ناقصينه..
ليلى: بتروحين ولا لاء؟
سلامه: اكيد..عيل ايلس في البيت لروحي شو اسوي؟
ونزلت سلامه وسلمت على البنات وعمر وساروا ويا الدريول مجيد للعزبه...
في العزبه نزل حمدان وسار صوب الركاب ويلس يطالع بكرته (الجوهره)..وشاف ناقة عمته ليلى..وعقب انتبه ان شرملى وراه..شاله شيخه اللي كانت شبه مغطيه عيونها من الشمس مع ان الجو شوي مغيم وبارد..وفي نود خفيف..بس هي ما تحملت الضو...
حمدان وهو ياخذ شيخه من شرملى: مب منج انتي ..من عمتج اللي صاكه عليج الحجره اربع وعشرين ساعه..ما تعرفين الشمس..
وتمت شيخه تحط ايدها على عيونها من الضو ...
حمدان وهو شالها: اااخ يالدبه شو يأكلونج هالكثر متينه..
شيخه ببراءه ومافهمت شو يقول:هاه..
حمدان:شو تاكلين.؟
شيخه مبتسمه بفرح:حبيبه..
حمدان: شو هذي بعد..
شرملى مبتسمه: حليب بس هي قول حبيبه..
وتمت شيخه تغطي عيونها وتحط ويهها في حضن حمدان مب قادره تطالع الشمس..
شرملى: هي عينها في عور عشان شمس قوي..
حمدان مبتسم:الله اكبر..عاشت اللغه..وعاشت شرملى..الا اقول من مسمنج انتي..؟
شرملى: شو..؟
حمدان:من يسمي انتي شرملى؟
ضحكت شرملى: ماما انا قبل حبي كتير شوف فلم هندي...انت يعرف انا من سيريلانكا..في عيب واجد بنت حبي ولد في تلفزيون...
هي كل يوم بابا يضرب عشان حبي ولد في تلفزيون..هي في زعل روح فوق سطح..وبابا دور ما لاقي..ما شوف هي وين روح بعدين هو كل يوم نادي هي شرملى عشان هي سيم سيم جنيه ما شوف ابدا بسرعه روح..بعدين ماما سوي زواج جيب انا بابا هي موت سمي انا شرملى عشان بابا هي موت..يعني اسمي انا شرملى يعني جنيه..
حمدان: صح اني ما فهمت شي بس الظاهر ان معنى اسمج ينيه..والله ما كذب اللي سماج..
شيخه: وحث وحث..
وتأشر بإيدها على البوش في العزبه...
حمدان: هذا مب وحش على قولتج..باجر يوم تربي الجوهره..بعطيج بكرتها لج..
شيخه مبتسمه مب فاهمه شي..
ومر الوقت بسرعه وانتبه باشا ان موترهم الثاني وصل..وسار بسرعه عند حمدان...
باشا:حمدان حمدان..
حمدان: خير..
باشا: موتر بابا راشد مال العزبه يجي..
حمدان عاقد حياته: شو يايبنه ابويه..؟
سار حمدان من الجهه الثانيه وشاف ابواب الموتر تنفتح..وتنزل منها عمته ليلى واخته سلامه..بس منو هاللي وياهم؟؟
ما قدر يشوف من بعيد وقرب وشاف عمر وسلم عليه..
سلم على مريم والبنات وتم يطالع مريم ومبتسم وهي لاحظت ونزلت راسها..
سلامه: يالاخ لا تنسى الحركه..
حمدان توه منتبه: سلامي اختي حبيبتي..
ليلى: وين شواخي...
وقبل تكمل ليلى رمستها شافت شيخه يايه من بعيد حافيه تركض في الرمل وخدودها ورديه وتنافخ من كثر ما تركض وتلعب وهي مستانسه لين ما وصلت عند ليلى وشلتها..
شيخه مبطله عيونها على الاخر تبى تسوي روحها منصدمه من شي ونها شافت شي خطير..وبكل عفويه..
وبغصب تطلع منها الكلمات: هناك وحث وحث ..
تبتسم ليلى: حياتي انتي..
مريم: عمتي عطيني اياها شوي..
ليلى وهي تناول شيخه لمريم: يالله شواخي روحي عند مريومه..
تعلقت شيخه اكثر في ليلى وما طاعت..وحمدان استغل الموقف..
حمدان: مريم تعالي براويج الجوهره..
مريم بخجل: يالله نروح..
وسارت مريم وحمدان صوب البوش ويلسوا على التراب مع بعض...
حمدان: من زمان ما ييتوا بوظبي...
مريم: امايه تقول يوم تخلص المدرسه بنتم في بيت يدي ناصر لين ما نقول بس..بس الحين لاء عشان المدارس..
حمدان: هيه جي يعني..
سكتوا شوي..ومسكت مريم حطبه ويلست تخربش على الرمل..
مريم: حمدان..ان شاء الله نسبتك عاليه هالسنه..
حمدان: لاء انا كسلان...
مريم مبتسمه: ليش.؟
حمدان: الرياييل ما تهمهم الدراسه اهم شي الشخصيه القويه وانا بعدين بشتغل ويا ابويه يعني الشهاده بتكون شي ثانوي في حياتي...
مريم وهي مبتسمه ابتسامتها الطفوليه: كلام منو هذا,..؟
حمدان: انا...
كتبت مريم على الرمل كلمة "غلط"..واشرت لحمدان يشوفها...
حمدان: لا مب غلط..
مريم: الشخصيه القويه اللي يحبها الكل لازم تكون ناجحه في مجالات وايده اهمها العلم..اللي ما عند أي حد عذر انه ما يتعلم خصوصا ان كل شي موجود ومتوفر..وبعدين الناس الحين قامت تتنافس من يتعلم ومن يدرس اكثر..والله حمدان..اعرف وحده من جيرانا في دبي..ريلها شيبه عود ويسير هو وياها محو الاميه عشان يتعلمون..يعني ما شي عذر العلم صار مطلب الجميع..حمدان شد حيلك انت اكبر حفيد في العايله واكبر احفاد يدي ناصر الله يرحمه..واكيد نبغي شي مميز منك...
حمدان حس ان شي يغلي داخله مع انه سمع هالكلام اكثر من الف مره من ابوه وامه وعمته ليلى بس غير هالمره..ابتسم ونش من مكانه وهي يالسه مكانها ما قامت..
حمدان: قومي بنسير صوب الخيل....
مريم: لا حمدان اخاف..
حمدان: يالله مريامي قومي بنسير كلنا..خواتج وسلامي وعمر كلهم هناك...
احمرت خدود مريم من الخجل اول مره يناديها مريامي..حتى حمدان انتبه..وابتسم...وقامت مريم وياه وساروا صوب الخيل وشافوا امل وسلامي وايمان..وشرملى وليلى وشيخه يطالعون عمر وهو راكب الخيل ويدور به حوالين العزبه..
سلامه: يالله عمر الله يخليك انا بعدك...
عمر: لا لا انتي بنت...
امل: انا اريد بعد...
ايمان: وع عليكن..ريحته خايسه..
سلامه: محد قالج تيين..
ايمان: شو هاه ما شي ظل الشمس بتسمرني..
مريم: امونه غناتي سيري يلسي في ظل السياره..
ايمان مستنكره: في الرمل؟
ليلى بدت تعصب: محد قالج تلبسين احلى لبس في البيت وتيين العزبه..تتحرين سايرين حفله زين منج ما حطيتي ميك اب...
ايمان سارت صوب السياره وطنشت عمتها وفرشت جرايد ويلست عليها...اما الباقيين ساروا يتعبثون في العزبه وعقب سارت مريم مع سلامه ويلسن يسولفن عن المدرسه والبنات..
سلامه:بتسيرون بيت مبارك اليوم..
مريم: هيه..
سلامه: عيل بنكون شله كبيره هناك..انا وانتي وعفاري وحمدوه..
مريم: هيه وناسه وسمعت ان بنات سالم بن حمود هناك بعد..
سلامه: هيه يا فالحه اصلا العزيمه عشانهم هم وامهم اللي هي شمسه..
مريم: هيه خبرتني امايه..
سلامه: قومي نرد صوبهم..
وقامت مريم وسلامه وسارن عند الباقيين وهب هوا بارد وغيم الجو اكثر ونزل نفاف غير الجو..واستانسوا عليه..ودخلت ايمان السياره عشان ما تخيس ثيابها تطالعهم من الجامه... ويوم وقف المطر الخفيف كان الدريول باشا ساير ييب لهم غدا وعقب ما تغدوا يلسوا يسولفون ويا بعض ويستهبلون ويحشون في خلق الله..
عقب الغدا كلهم ردوا صوب الخيل الا ليلى وشيخه...
لوت ليلى على شيخه ولحفتها بوقايتها عشان ما تبرد مع انها كانت ملبستنها شي دافي..ويلست ليلى على الارض...وقامت شيخه من وراها وتعلقت في رقبتها من ورا..وعقت عمرها على ظهر ليلى..
شيخه: ثليني..
ليلى: وين اشلج..؟
شيخه تصارخ بشطانه: فوووووووق..
ليلى:مابا..
هدت شيخه رقبة ليلى ويت جدامها...وبطلت عيونها على الاخير: مابا ثليني..
ليلى مبتسمه: ماريد..
شيخه يلست على الارض وسوت روحها معصبه وما تبى تكلم ليلى..
ليلى مدت ايديها تبى تناديها: شوااخي تعالي حياتي..
مدت شيخه بوزها : مابا..
ونشت تركض..وقامت ليلى وراها تلحقها بس شيخه تمت تركض وقبل توصلها ليلى وقفت عدال يدار لحجره في العزبه وسندت ظهرها عليه وحطت ايديها ورا ظهرها ومدت بوزها ويلست تحرك ريولها على الارض بدلع اونها زعلت...
ليلى ما قدرت تتحمل وحست ان ودها تقطعها ويت لها وشلتها ولوت عليها بقوه وتمت مقطعتنها بوس..
ليلى: بعد روحي علني افدا هالويه ياربي...
وهي لاويه عليها وتبوسها...وترفعها لفوق واخر شي ابتسمت شيخه ابتسامتها اللي تذبح القلب..وتمت تضحك من خاطرها...
شيخه: ثليني ورا..
ويلست ليلى على الارض وخلت شيخه تتعلق فيها من رقبتها ويودتها عدل وقامت تمشي بها بدلع لين ما وصلت عند الباقين ويلسوا كلهم مع بعض يتحرشون في شيخه ويلاعبونها وهي تشرد عنهم ولين ما توصل عند ليلى وتعق عمرها بقو عليها وتتقبض فيها عشان محد يمسكها...
..........
الساعه صارت 3 الظهر في بيت مبارك بو خليفه..الكل راح عقب الغدا يستريح..في حجرته..
وحصه خذت بدريه حرمة عبدالله اخوها..وسارن حجرة حصه...بدريه هي بنت عم حصه واخت حمد اللي تحبه حصه..حرمة عبدالله اخو حصه معرسين من 6 سنين وما عندهم عيال بعد الفحوصات اللي سووها اول سنه طلع عبدالله هو اللي ما يقدر ييب عيال ..وعرض عليها الطلاق اول سنه ما يبى يحرمها من حقها في الامومه بس بدريه ولد عمها خذها عن حب...وما حبت تفرط فيه ورضت بقسمة الله فيهم..وصبرت على هالحال ..متخرجه من المدرسه بس عندها شهادة ثانويه عامه وما كملت دراستها لان عبدالله تقدم لها على طول وعرست ..علاقتها في حصه قويه بس زادت اكثر عقب ما خذها عبدالله..
صكت حصه باب الحجره ويلست بسرعه عدال بدريه...
حصه: حرمة اخويه حبيبتي فديت روحج...
بدريه: زين ما شاء الله شو هالمحبه جني الا اعرف سببها...؟؟!!
حصه: بدور يا بدر البدور يا حبيبة قلبي..تعرفين اني اكثر وحده احبج في العالم...واني متخبله عليج من زمان..واول وحده ابارك لاخوي عبود خطوبته عليج..
بدريه: يالمذله.!!! كم مره قلتي لي هالجمله التاريخيه؟
حصه: زين غناتي..ادخلي بالموضوع على طول..
بدريه: ليش مستعيله..؟ هو قال بيي اليوم وخلاص يوم بتشوفينه تفاهموا...
حصه بعصبيه: انتي محد ياخذ منج لا حق ولا باطل..بدريه احسج تخبين شي علي..
بدريه: لا شي ولا ما شيات ..شو بخبي مثلاً..حصوه بنت عمي..خلي عنج الخبال واعقلي..
حصه: اوكي بس ما قال لج ليش زعلان مني..
بدريه: لا والله ما قال...
حصه: كنت اعرف يالنحسه...
تضحك بدريه..
حصه: زين بترقدين ولا بتتريين حبيب القلب..؟
بدريه: فديته شو يبى بي الحين يالس عند الرياييل علني ما خلى منه..انا بحط راسي وبرقد من 7 وانا ناشه..
حصه: وانا بعد..
ورقدن كلهن في حجرة حصه..
..........
في العزبه كان حمدان كالعاده مفضوح باهتمامه المبالغ فيه في مريم..وخذته سلامه شوي بعيد...
سلامه: حمداني حركاتك واضحه..
حمدان مرتبك: شو من حركات..؟
سلامه: انت فاهم..
حمدان : جلبي ويهج...
سلامه وهي رايحه عنه: مره حمده ومره عفرا ومره مريوم...باجر الله يعلم منو...؟
حمدان مستحي وما عرف شو يرد: جب جب مالج خص...
سلامه: وايد عليك..
وردوا للباقين..
ليلى: يالله نروح صارت الساعه 4.
مريم: لا تموا بعد شوي..باجر بنرد دبي..وما بنيي هني الا يوم تبدا الاجازه..
ايمان: اووه انا ابى ارد..
امل: لا انا ابى اتم..
سلامه: مليت يالله نرد...
عمر: يالله عموه امايه بتحرج..
في هالوقت كان حمدان يشغل الموتر وعلى الصوت على الاخير وفتح المسجل وحط شريط عيظه وسار صوب الحطب اللي حذا العزبه وخذ وحده وكلهم صدوا صوبه وسار يعدل الاغنيه وحط اغنية عيظه " يا طارشي"...واستهبل ورزف...
البنات الصغار احتشرن...
امل وهي تصارخ بفرح: الله حمدان ولد عمي يا فنان...
ايمان ما قدرت رغم غرورها تخبي وناستها وحطت ايدها على خدودها: الله وناسه...
ليلى تطالعهم وتضحك وانجلب المكان حشره..
سلامه وعمر مبتسمين..بعدين عمر صفر وقال: عجيب ولد عمي..
سلامه طالعت عمر مستغربه:لا صراحه ولد عمي تعبت روحك..وايد عليك تصفر..بس وين الومك ولد دبي اشدراك بالبداوه..
عمر: وشو فيني يعني ..مب ريال ولا مب تارس عينج..
سلامه: زين زين اسكت خلني اشوف اخويه فديته..
شيخه متعلقه في ثياب ليلى: ثليني ثليني..
وشلتها ليلى وتمت تطالع وياهم...
تم حمدان يرزف والكل محتشر..وهو كل ما صد صوبهم شاف مريم مبتسمه..وكان هذا كل اللي يبغيه..وعقب الربشه والرزيف اللي ماله داعي..
حمدان: شو رايكم.
شرملى: سوي مره تاني..
يضحكون كلهم..
حمدان: عمر تعرف ولاء..؟
عمر: لا والله..
مريم: روعه حمدان...
امل: يااااي وناسه والله..الله يخليك حمدان بعد مره..
حمدان وهو يمسح ويهه في وزاره: لا لا الحين بنرد البيت وايد تأخرنا ورانا سهره..
ايمان: حمدان بعد مره ارجوك..
طالعها حمدان مستغرب..وابتسم: عشان الاميره ايمان تنازلت ورمستنا بويه حلو..وقررت ترحم مشاعرنا وتعطينا ويه شوي..برزف لكم مره ثانيه..
كلهم احتشروا..ويلسوا يصارخون بهبل..ويت شرملى تصفق وياهم..وهي متقطعه من الوناسه..
حمدان: شو من اغنيه تبون..؟
كلهم بصوت واحد: اللي توك حاطنها..يا طارشي..
ورزف حمدان وعقب ما احتشروا وقالوا بس اتفقوا كيف يتقسمون على المواتر...
وساروا كلهم ليلى وامل وايمان وشيخه وشرملى مع الدريول مجيد..وحمدان ومريم وسلامه وعمر مع باشا..
وردوا البيت وكل واحد سار حمام يتسبح وعقب يرتاحون عشان يسيرون بيت بو خليفه بالمساء..
........
وصلت شمسه بيت اهلها..واستقبلوها استقبال حافل ابوها وعبدالله وخليفه وساورا وياها لين الصاله وعقب ردوا ودخلت وشافت امها وحريم خوانها وخواتها وبناتهن..
دخلت شمسه هي وبناتها هنادي وافنان وريم ومها..بس الاولاد تموا برا ما دشوا صالة البيت..ويلسوهن في الصاله الاماميه وضيوفهم..
ام خليفه: الحمدلله على سلامتكم بنتي متى وصلتوا يا ام سعود..؟
شمسه: الله يسلمج امايه..شرا هالوقت البارحه وصلنا..
ام خليفه: عسى ما تعبتوا؟
شمسه: لا والله بس اجراءات المطار هني شوي اخرتنا والعيال هلكانين وتعبن البنات شوي..
ام خليفه: وين العيال ما حدروا..؟
شمسه:تموا عند ابويه والشباب..في الميلس..الا اقول سلمى جني شفت ريلج حادر من صالة الميلس وياي صوب الباب ويوم شافنا نسلم على ابويه انا والبنات رد داخل...
سلمى: فديته من يومه خجول..ما تترس عينه غير سلامي...
نوره:يقطع واعليه من المستحى...
سلمى: هاه شوفوا من اللي بدا..؟
ساره: لا عاد هالمره سلمى بريئه...
بدريه: مول ما يخصها في البراءه..ولا تليق عليها...اصلا اذا سلمى تيلس بمكان دون ما تضارب حد ما تكون بخير...
سلمى: امايه شوفي بعينج وسمعي عدل..وتقولين دومج ان سلمى هي الشرانيه...
ام خليفه: سكتن من بنتي بس خلاص حشموا ام سعود...
ابتسمت شمسه: فديت امايه يا ربي..
سلمى: وانا اقول مب عشان سواد عيوني..بسير اشتكي عليكن عند حامد...
ساره: دخيلج زغنا..
بدريه:ردينا انتي وحامد مالج هذا..اللي يسمع يقول هتلر..
انجلبت الصاله ضحك من سوالف بدريه وسلمى اخت ريلها..وشوي ودخلن بنات خليفه يايات من صوب فلتهم..
حمده: هلا هلا بعمتي شمسه عاش من شافج وعاشت ايامج وعاشت بلجيكا يوم انج ييتي منها..وعاشت الامارات يوم وصلتي لها سالمه..
وهوت على راسها وحبتها..وكملت رمستها..
حمده: وهالبوسه لج ع راسج يا اغلى عمه بلجيكيه..صدق انج اللي طلعتي فينا..اسميج انتي عمتي شيخة العمات..
شمسه ميته ضحك هي وكل اللي موجودين..
شمسه:عاشت ايامج يا ام لسانين ما تغيرتي..!!
بدريه: وين تتغير هذي..صناعه اصليه...
سلمى: هيه والله..لسانها عليه ضمان مدى الحياه...
ساره:عوذ بالله منكن اذكرن الله عند بنتي..
حمده: فديت روحي ما جد سمعتن المقوله العالميه اللي تقول" حمده ذهب لا تبليه الايام"...
حصه: مسكينه حمدوه بنت خويه طاحت في ايدين خواتي اليوم بتطيح وبينقص لسانها...
سمر: مب مشكله ما يحتاي ترمس..الكلام شي ثانوي في الحياة..
حصه: هيه صدج..شي ثانوي...اهم شي الواحد بس يقول نكت...صح اختي سمر..
سمر مبتسمه: يمكن...
حمده:زين عمتي شمسه..واخبارج بعد..قولي لي شو الحياه في بلجيكا ربج بعد محد يدري بالاقدار يمكن ادرس هناك او يطيح ولي عهدهم في غرامي..
شمسه تضحك: غربل الله بليسج من بنت..ليت لي بنت شراتج...
ساره: ودكن يكون عندكن شرات بناتي...
سلمى: انا لو تييني وحده شرات حمدوه اقص لسانها على طول...ونكن الحين هذي بنت ولا حيه...انا لو حد يختار بناته ما اختار الا عفاري علني افدا ويهها يا ربي ما خلت شي من مقومات الانوثه..ود البنات بربع عقلها ولا حلاتها...
ابتسمت عفرا بخجل وبنفس الوقت غرور...
وكملت سلمى: اما اخت حمده لو تييني بنت شراتها بقص لسانها وما بخليها مول تطلع من البيت لين ما تنسى ابجديات الكلام..
ام خليفه: يا هالاجرام اللي ما يطلع لج من لسان
سلمى:امايه هذا يسمونه الادب المفنتك في الدفاع عن النفس...قريت مره كتاب عنه انا وحماده..والحين قدمنا طلبيه لسويسرا عشان يطرشون لنا الجزء الثاني من الطبعه...
ام خليفه: وليش معبلين على اعماركم...الكتب ممزوره في البلاد...
تضحك سلمى على عفوية امها...
عفرا: أي دوله هذي عموه وشو من مؤلف منزل هالكتاب..ما جد سمعت عنه..ومن أي مطابع...؟
سلمى: اووه نسيت الاخت عفرا هني..تحريت عمري اروم اخورط على هالمساكين...طلعت ام الكتب هني..زين سمحولنا كانت كذبه بيضا..اختبر شطارتكن في القراءه..
عفرا: يعني مب صدج..والله تحريتج ترمسين صدق..قلت غريبه وين تقرا عمتي...بس الحمدلله غلبتج هالمره...
بدريه: فديت روحها هالبنت يا ربي..ليت كل البنات شراتها..ادب وجمال واخلاق..وشطاره لو عندي.
وسكتت بدريه وعرفوا انها قطعت رمستها بس ردت على طول ترمس بكل ثقه..
بدريه: عوذ بالله من ابليس كنت يايه اقول لو عندي ولد جان ما ابدي عليها شيخة البنات...
سكتوا كلهم وابتسمت شمسه لبدريه وحسدتها على قوتها وثقتها...
سلمى عشان تقتل حالة البرود: يالله يالله اذن المغرب قومن صلن...
شمسه: بعده ما اذن...
سلمى: يالله قومن تمسحن وعقب يصير خير يوم يأذن صلن...باقي عشر دقايق..
نشن كلهن يصلن..وطلعت حصه فوق مع خواتها سلمى وسمر ونوره وبنتها ميره...اما ام خليفه وشمسه سارن حجرة بو خليفه يصلن..وساره وبناتها عفرا وحمده مع بنات شمسه هنادي وافنان وريم ومها سارن فلة خليفه عشان يبدلن ثيابهن هناك...
بدريه الوحيده اللي تمت في الصاله بس عقب نشت وسارت صوب المطبخ القريب من الصاله..وشافت البشاكير يسولفن وقالت لهن ان المغرب اذن اذا بغن يصلن..وسارن عنها وهي يت بتطلع...وشافت اثنين شباب كبار يايين من بعيد..عدلت وقايتها وتحجبت...
سعود: السلام عليج خالوه...
بطي: سلام عليج خالتي..
ابتسمت بدريه: وعليكم السلام والرحمه..
واشرت على واحد منهم: انت سعود ..صح؟
سعود: لاء غلط هذا بطي..بس هو اطول عني ...مع اني اكبر عنه..
بدريه: امم زين شحالكم والحمد لله على السلامه..ما شاء الله مستانسين رديتوا البلاد...
بطي: يعني مب وايد...
بدريه: ليش..؟
سعود: فرحه مؤقته وعقب بنرد نسافر..
بطي: شكلي بشاور اهلي اتم في بيت حد من خوالي ولا عمامي وما بسافر وياهم وبكمل دراستي هني...
بدريه: بوظبي ولا دبي..؟
بطي وهو يطالعها بفخر: دبي طبعاً...انا ما اعيش بليا دبي...وما اتنفس الا فيها..
سعود: اشوفك تقدر تتنفس في بلجيكا ومصر والمغرب والسويد والنمسا..
بطي: لا اانا مجبور على هذيل لكن اقصد بالنسبه للامارات...
بدريه: زين شو رايك تشاور هلك وتعال اسكن عندي انا وخالك عبدالله..
بطي: اخاف اضايجكم...
سعود: ياللواته...!!
بدريه: لا بتضايجنا ولا شي ..انا ما عندي بنات بيستحن منك..بس اخافك تمل منا..بتكون لروحك
بطي: افا عليج خالوه بالعكس حلاته يوم اكون لروحي عشان اكون الولد المبزاي...
سعود: يالبنيه شو تبى بالبزا..؟؟
بدريه: كم باقي لك سنه..؟؟
بطي: رايح ثاني ثانوي...
سعود: وانا ثاني جامعه..
بدريه: وكيف ظهرتوا من مدارسكم ..؟
سعود: عادي بنكمل في دبي المنهج الامريكي في كل بقعه..
بدريه: زين بسير اصلي اخرتوني..سيروا صلوا ولا حياة الغرب غيرتكم وما تصلون..؟
سعود: الحمد لله انا اصلي..بس ناس لاء.
بدريه وهي سايره : بييكم عقب وبنسولف...
صلن المغرب ونزلن الصاله ودخل عبدالله وخليفه وعيال شمسه سعود وبطي وبدر ويوسف..وساروا بحجره جدام الصاله اللي حذا الصاله الاماميه..في الدور الارضي..
وكانوا اللي موجودين بو خليفه وحرمته وعبدالله وخليفه وعيال شمسه بس..وشمسه ونوره..
عبدالله: ما شاء الله شمسه اختي شو هالرياييل اللي ينشد بهم الظهر...
شمسه: فديت روحك طالعين على خوالهم..
بو خليفه: كم بتمون بنتي في البلاد..
شمسه: ما ادري ابويه ..يقول سالم اسبوعين..
خليفه: زين والله..
نوره: انتوا ما خذين اجازة لليهال..؟
شمسه: هيه ماخذين اجازة اسبوعين..
ويسلوا يسولفون ويتخبرون شمسه ويناقشونها في مواضيعهم...
.................
في الصاله الثانيه اللي جريبه منها...سلمى وبدريه وساره وبنات شمسه وبنات خليفه وحصه وسمر يالسات..
سملى: اكيد ريلي في الميلس بروحه..شو من مذهب عند اخواني..؟
بدريه: اقول سلامي ذبحتينا بريلج..شو ريلي وريلي..محد عندها ريل الا انتي..
ساره: خليها بعدها ما شافت شي..وايد مسويتله سالفه وعقب بيطلع عيونها وبتعافه...
سلمى تغني" لاموني اللي غاروا مني"..
تضحك ساره وبدريه ويتحمحم عبدالله عند الباب..ويعدلن شيلهن...
عبدالله: سلام عليكن..
كلهن : وعليك السلام...
عبدالله: وين حبيبتي..؟
سمر:كل هالنور وما تشوفني؟؟ بس ما عليه خويه مالومك انعميت من نوري..
عبدالله: علني ما حبيت جانج حبيبتي...!!
حمده يلست بطريقه مؤدبه وتغمض عيونها وتفتحها بطريقة دلع: فديته عمي..ادري بي مخبله به..علني ما خلى منك يا اغلى عم في الدنيا زين زين شوفوا هالعم ولا بلاش اللي ما يزقر بنت اخوه الا حبيبتي..حبتك العافيه يا فناتك على قولة خالتي ليلى..
عبدالله يضحك: وحتى لو ما كنت حبيبتي بس ما شي شراتج بين كل البنات..
حمده نشت من مكانها:انا رايحه باي...
كلهم يضحكون عليها ...
سلمى : على وين رايحه..
حمده: وين بعد ؟ اكيد بسير انتحر..كيف اعيش وانا اسمع كل هالرمسه..
ضحكوا على سوالف حمده...
عبدالله: بدريه حبيبتي تعالي اباج في موضوع ضروري..
ونشت بدريه وقبل يظهرون من الصاله..
سلمى وهي تتنهد: حصه وسمر وحريم خواني يالنحيسات لو انتن محد جان ريلي زقرني وظهرت وياه...
عبدالله يضحك: اختي سلامي..ريلج بروحه في الميلس سيري يلسي عنده..
وطلع عبدالله ويا بدريه وساروا الحديقه اللي ورا فلة خليفه ويلسوا هناك...
بدريه: شو من موضوع بغيتني فيه...؟
عبدالله: مليت من الحشره ..
بدريه: وليش ظهرت الحديقه؟؟ الجو بارد اخافك تمرض.
عبدالله: شسوي بعد ولهت عليج وما قدرت اصبر...
بدريه: كل هذا حقي انا؟
عبدالله: وشوي منه حق يدتي..
بدريه تضحك: وشو بعد..؟
عبدالله: ما شي..
بدريه: متى نرد دبي.؟
عبدالله: متى ما تامرين..
بدريه: ما ودي ارد..وايد مرتاحه هني..
عبدالله: عيل تمي لين ما تملين وقولي لي عشان اردج دبي..
بدريه: وانت وين بتروح؟
عبدالله: وين بعد؟ اكيد وياج..شو تتحريني اقدر اعيش لحظه بدونج...؟
بدريه تقلد حمده: باي باي بسير انتحر ما روم لكل هاه...
عبدالله يستهبل: لا يا زوجتي الحبيبه لا تذهبي..
يضحكون...
بدريه: جني اشوف سياره داخل الحوش..
عبدالله: يالله ردي داخل من باب المطبخ اكيد حد من الضيوف وصل...
وسارت بدريه داخل ومرت الصاله وسمعت الحشره....وضحكاتهن شاله المكان...
بدريه: يالله نشن الحريم وصلن ..
وقامن البنات وتمت ساره وسلمى وبدريه في الصاله واستقبلوهن ودخلوهن حجرة الضيوف...
في بيت ناصر في الصاله اللي خاري هاديه ومحد فيها..وكل حد مشغول في حجرته يرتبون ويخلصون عشان يظهرون مع بعض...
وفي غرفة ليلى ...امل وايمان ...
ايمان: ليش ما بتروحين عمتي..؟
امل: الله يخليج عمتي..
ليلى:مالي بارض...
امل: تعالي عموه وناسه...بسوي لج اللي تبين بس تعالي الله يخليج...
ليلى: ما ريد وخلاص...
امل: خالوه حصه بتزعل..
ليلى: لا تخافين نحن متفقات..
ويلست ايمان تتعدل وامل تسحي شعرها...
ودخلت مريم وكانت لابسه تنوره زرقا غامجه وقميص ابيض بكم قصير..وشعرها طايح على كتوفها..وشكلها يجنن..
ليلى: مريامي شو هالزين كله...
مريم بخجل: والله عمتي..؟
ايمان: مب احلى عني...
مريم: ليش ما لبستي للحين.؟
ايمان: الحين بلبس وببهركم..
امل: زين مريامي كيف شكلي الحين...؟
مريم: حلوه بس البسي عشان تحلوين اكثر...
شوي ودخلت ايمان وكانت لابسه تنوره ورديه قصيره وقميص ابيض بكم قصير نفس موديل مريم بس لون وردي فاتح..
مريم مبتسمه: ليش تقلديني..؟
ايمان وتوها منتبهه: اوووه ليش لابسه شراتي..يالله الحين بغيره...
وطلعت ايمان..
امل: برايها مريامي..انتي احلى..
ليلى: امل شو بتلبسين..؟
امل: عندي تنوره بيج بلبسها...
وطلعت امل...ويلست مريم عدال عمتها ليلى...
مريم: عمتي ليش ما تبين تروحين.؟
ليلى: بس جي..
مريم: يعني مب زعلانه من خالتي حصه..
ليلى مبتسمه: انا وحصه مثل الظفر باللحم..مالنا غنى عن بعض..انا وهي اكبر من هالتصرفات..
مريم: حلو يكون عندي ربيعه جي..
وقبل ترد ليلى دق تلفونها..
حصه: السلام عليكم...
ليلى بفرح: هلا والله ومليون غلا..بعمري وروحي هلا باللي اغلى من الغلا... من الخافق مليون ترحيبه اهلي بج...توني ارمس مريامي عنج...
ابتسمت مريم ونشت من مكانها بتطلع: عمتي سلمي عليها...
وصكت مريم الباب..
حصه: بتيين ولا لاء؟
ليلى:اعذريني...
حصه: سبب مقنع؟
ليلى: تعرفين ليش؟
حصه: عشان حمد.
ليلى: عشان يا عبيطه تاخذين راحتج...
حصه: ليلووه والله احس بضيج بكتمه احس بالموت مع ان البيت ممزور ناس..وخواتي وناسه وحشره...تعالي الله يخليج محد جريب مني كثرج..دخيلج....
ليلى تتنهد: حصه حبيبتي يوم يي حمد وين اروح انا..؟ ما تحمل نظرات العالم احس عمري مجرمه..دخيلج حسي فيني...
حصه: عيل انا شو اقول...احس بضيج من هالسالفه...
ليلى: ما ادري اكره هالسؤال..كلهم يتخبروني جني راعية البخت ولا امي دجاله...كرهت العرس وسنينه ...مالي ايد في اللي يصير...
حصه: على الاقل انتي محد عندج الا عايشه ومحد يقول لج شي في البيت...شو اقول انا اللي اكبر وحده في خواتي عرست وعمرها 19 سنه..
ليلى ما تبى تكدر خاطر حصه: حبيبتي انا ما احب هالتجمعات سيري استانسي ويا اهلج وافرحي وعقب رمسيني ...
حصه: زين متى بتزورين شموس اليوم تسألني عنج...
ليلى: يوم السبت عقب الدوام برد البيت ارقد والعصر بييكم..
حصه: اوكي فديتج اترياج...
ليلى: خلاص في وداعة الرحمن...
حصه: الله وياج..
..........
في صالة بيت بو راشد..كانت خلود حرمة راشد يالسه..مع ام راشد وجاهزين كلهم..ونزلت عندهن شمسه حرمة مبارك..
شمسه: ام حمدان وين سلامه..
خلود: مادريبها يمكن في البيت تلبس..
شمسه: متى بتظهرون؟
خلود: بدق لراشد الحين بشوفه...
شمسه: شو هالكشخه عمووه..؟
ام راشد: أي زين يا بنتي نحن خلينا الزين كله لكن انتن وبناتكن..
ودخل حمدان لابس ومتعصب..
ونزلت ايمان وامل واول ما شافته مريم رفعت وقايتها ع راسها...ودخل عقبهم راشد ومبارك يايين من برا...
راشد: يالله اذا جاهزين بنظهر رباعه في سياره وحده..
مبارك: اللي تشوفه يا خوي..بس مب جنه اليهال وايدين..؟
حمدان: هيه ابويه ضيج....
راشد: اللي تشوفونه...
خلود: حمداني فديتك..
حمدان: لبيه امايا..
خلود: سير ازقر سلامه اختك بتأخرنا..
امل: بسير وياك...
وطلع حمدان وامل ومن فلة يدهم العود لين فلة راشد..
امل: حمدان كان رقصك اليوم وايد حلو..
حمدان: مب رقص هذا اسمه رزيف...ولا يواله...
امل: ما شي فرق..
حمدان: فرق كبير...
امل تغني: فرق كبير بينك وبين غيرك فرق كبير...
حمدان: غني اغنيه عدله ولا سكتي..
امل بتغني:احم احم." ما يفيد بعد الفوت صوت..خلاص من قلبي انتهيت صاب الغلا والحب موت وانت على نفسك جنيت..وش فايدة كثر الكلام من بعد ما خنت العهود..روح وعلى الدنيا السلام دام الوفا ماله وجود"
فتح حمدان باب الفله وكانن الليتات مبنده وظلمه بس وقف وابتسم: بنت عمي صوتج يجنن والله..ما شاء الله عليج..من وين مطلعه كل هالمواهب..؟
امل بثقه: من احبالي الصوتيه..شو تتحراني شي سهل...انا امل بنت مبارك بن الشيخ المرحوم ناصر ..نحن هل دبي والاجر على الله ..في دمنا العزه وفي جبينا الشهامه عنوان..دومنا من جديم الزمان معتلين هامات السحب...
حمدان انفجر ضحك:الغرور مب زين اختي اموله..
دخل حمدان مع امل والصاله مظلمه ويشوف ليت من اخر حجره في الصاله بس الظاهر في حد هناك...كان حمدان شوي خايف..
امل: حمدان شغل الليت..
حمدان بهمس: سكتي ويا ويهج..
وقرب من الحجره وهو زايغ ومب مبين عليه... بس اول ما طل براسه..شاف سلامه ترمس تلفون واول ما رفعت راسها وشافته حطت ايدها على قلبها ونزلت السماعه..
سلامه بهمس: زيغتني غربلك الله...
حمدان: يالله نسير شو تسوين اخرتينا...؟
سلامه: زين ويا ويهك الحين بطلع اسبقوني...
وشلت السماعه:ريماني بعدين ارمسج يالله الحين بنسير بيت يدي بو خليفه...
وقبل يطلع حمدان بندت سلامه التلفون...
وظهر حمدان وامل رادين الفله العوده...
حركت سلامه شعرها الحريري اللي صابغه خصلات منه بالماروني بسرعه..وشافت عمرها بالمنظره..
سلامه ترمس عمرها : حلوه فديتني حلوه..شيخة البنات..وين الاقي مثل هالويه فديت روحي..مثيلي بالبشر نادر...صدج ان 7/ابريل ما كان يوم عادي..يوم امايا يابتني..كنت فخر للامه العربيه كلها...
ودارت على عمرها وكانت لابسه ثوب عنابي غامج ضيج من فوق لين الخصر وانسيابي لين تحت بكم قصير وشيله خفيفه...ومب رابطه شعرها لانه قصير بس لين تحت رقبتها شوي..
عقب لبست عباتها وساروا كلهم بيت بو خليفه...
..........
في بيت بو خليفه وصلوا اهل بدريه و دخلوا الحريم الصاله العوده...بدريه وامها وحريم اخوانها...وبنفس الوقت وصلوا اهل ليلى..وانمزرت الصاله عرب..
بدريه يالسه عدال سلمى وتهمس لها: سلامي ما شاء الله الصاله ممزوره عرب شو رايكن نخلي البنات ينزلن الصاله اللي خاري..والحريم يتمن هني...
سلمى: اللي تشوفينه بس رمسي امايه..
وسارت بدريه عند عمتها...وشاورتها وعقب ووافقت على طول..
ونشن البنات كلهن الصاله الثانيه اللي ما يفصلها عن صالة الحريم الا بوابه زجاجيه...وعقب حطوا العشا وتعشوا كل الناس وردن البنات الصاله والحريم صالتهن...
وفي صالة البنات..
حمده: سلاّمي شو هالحلاه اليوم مب من عوايدج..
سلامه: من يومي حلوه فديتني..ودّج بنص جمالي..
هنادي تهمس لعفرا: من بنته هذي؟
عفرا: سلامه بنت راشد بن يدي المرحوم ناصر..يدها ابو ابوها يستوي ولد عم يدووه عايشه...
هنادي: يدتي عايشه ام امايا..؟
عفرا: هيه..
هنادي: شو يستوون حق مبارك بن ناصر..؟
عفرا: عمها اخو ابوها بس هو ساكن في دبي...ليش تعرفونهم...؟
هنادي: لا بس ابوها وابويه يشتغلون بنفس المكان... اعرف بنت خالوه وياهن نفس المدرسه...مدرسة الاتحاد..
عفرا: زين والله اول مره تشوفيهن..؟
هنادي: هيه بس العوده شايفتنها قبل في عيد ميلاد بنت خالتي بس لمحتها وما كنت اعرف انها من الاهل...
عفرا: ما تشبه سلامه مول صح؟
هنادي: لا وين سلامه ما شاء الله عليها تخبل جنان..ولا الصبغه روعه عليها...ولبسها بسيط بس حلو
عفرا ابتسمت: ما شوفها حلوه هالزود..
هنادي: انتي من اللي حلو بعينج غير عمرج..؟
سلامه: شو اخت عفرا يالسه تتساسرين ويا بنت عمتج ولابستنا اليوم...
عفرا بغرور وبنظره بارده: يمكن...
سلامه: مب منج من اللي يسوي لج سالفه...
هنادي: الزين يفرض نفسه...
امل: والغالي اصله غالي والزين يفرض نفسه..
ضحكن ايمان ومريم خوات امل..يعرفنها على الريحه وبتغني..
حمده: سلاّمي خبرتي ابوج بنتايج الفصل...
سلامه تخزها بنظره وتبتسم انها تسكت عشان بنت عمها مريم موجوده ويمكن تقول لامها..
حمده مبتسمه وهي مفتشله: كلنا في الهوا سوا..
سلامه في خاطرها" الله لا يبارك فيج..غصب تبى تفضحنا.."
مها:سمر يالله نطلع ال Garden
سلامه: عشتوا...
ونشت سمر وميره بنت نوره وبنات خليفه مها وريم..
سمر: اموله ايمان تعالن ويانا..
امل بصوت واطي ترمس عمرها: فديتج يا سمر بنت مبارك ما تقصرين.. زين حد عبرنا..وانا اقول كلهن اللي اسماء اباءهن مبارك بنات اصول..
وقربت افنان من مريم ويلست تسولف وياها لو ان طبايعهن مختلفه بس بعد خذن على بعض ويلسن يسولفن وعقب اندمجن كلهن في السوالف..
سلامه: عفاري بتسيرين ويانا يوم الاربعاء ال skate ؟؟
عفرا: اكيد ان شاء الله..
هنادي: الله وانا بعد...
سلامه: للاسف رحله مدرسيه ما نروم ناخذج ويانا...
هنادي باسف: خساره..!!
ويلسن يسولفن بنات شمسه عن بلجيكا شو فيها ما فيها..ومريم يلست تسولف لهن عن نظام الدراسه في دبي والتغييرات اللي صارت في التربيه..وخذوا على بعض بسرعه...
..............
في حديقة البيت الكبيره..يالسات كلهن على الارض عدا ايمان ومها ...
سمر : يلسن...
ايمان: ما اقدر اخيس ثيابي...
ميره: عادي ما يخيس هاه عشب مب تراب...
امل: يلسي ايمان..
ريم: يالله مهايه يلسي..
مها: I can’t ما احب ايلس على الارض...
وسارت مها ويا ايمان ويابن كراسي من ورا الفله ويلسن عليها والباقين على الارض..
ريم: ونحن في المطار رادين دبي امايا اشترت لي باربي مع طقم يديد توه نازل..
سمر: الله انا اباه...
مها: Impossible وين تبين؟..هالطقم في بلجيكا وبس..في مصممه اسمها باميلا هارت مان هي مصممتنه ومخلتنه حصريا على بلجيكا..وممنوع أي دوله ثانيه تبيعه..
امل: يا ليت ابويه يودينا بلجيكا..يا ربييييه..زين ريم ممكن نشوفه...؟
ريم بدلع: امايه ما خلتني اييبه..بوظبي وقالت لي خليه في بيتنا في دبي..قالت لي ان بنات بوظبي غشيمات ما يفهمن في هالسوالف..
امل ترمس وجنها عيوز: في هذي صدقتي..
سمر: نعم نعم...!!! شو قلتي انتي وياها...؟ وانتن وين يالسات الحين..والله ان بنات بوظبي شيخات هل الامارات كلهن...
ميره: بنات دبي هن اصل وجذور الفن والموضه ما شي شراتهن..وبنات البلاد من طرفها للطرف الثاني يتسابقن عشان يقدلن بنات دبي في كل شي..
ريم: بنات دار الحي شيخات والكل يتمناهن...
سمر: ميره لا ترمسين جي..نحن هل العاصمه احسن ناس ما شي منا...
ايمان: شو اللي فيكم يا هل بوظبي...ما شي عندكم تنحسدون عليه..غير بابا زايد...
سمر: يسدج ويسد كل اهلج...
مها: Oh my God شكلكم بتتضاربون...؟
سمر: مهايه لوعتي بجبودنا اللي يسمع يقول ابوج رابي في ربوع شيكاغو..مب الا جنه رابي في عزبة امه...
انجلب المكان ضرابه وملاسن بين البنات الصغار..وكان بطي وحمدان وبدر ويوسف وعمر يتمشون في الصوب الثاني من الفله..وشافوا البنات من بعيد..
بطي:الله بنات..!!! تعالوا نسير صوبهن...
بدر(اخو بطي 11 سنه): يا مسوّد الويه...
حمدان: ههههه مب منك.. حنّيت لراعيات الشيله والمخور...
يوسف: خويه بطاي مليت من الشقر صار لك فتره مجابل راعيات ثياب فوق الركب..
بطي: خل عنكم الرمسه يالله نسير لهن...
وساروا صوبهن...
بطي : اوووه يهال قوم 10 سنوات لين 15 ما ينفعن..
حمدان: شكلهن يتضاربن...
وسمع بطي هواشتهن...
بطي: حوو شعندكن...؟
ريم: خويه بطي البنات تخبلن...
عمر: من يومهن مخبّل...
سمر: هيه احترم نفسك...
حمدان: اسكت عمر هذيل عقارب ما نروم لهن...
يوسف:لا ترمس عن خالتي جي...
حمدان مستحي: سوري...
بطي: زين يهالوه شو مستوي...؟شو فيكن خبرني انا بحل مشاكلكن من تساقط الشعر لين شد الوجه واضافة المساحيق..
يضحكن البنات على سوالف بطي...
امل تأشر على سمر: هذي تقول ان بنات دبي مب زينات وما فيهن شي حلو..
سمر:هي بدت تقول ان هل بوظبي ما فيهم شي زين وانهن خسفات بناتهم وعوفه..ولا يفتهمن في الموضه..
انفجروا الاولاد ضحك...
بطي: لا انتي ولا هي كل وحده اخسف عن الثانيه..شو فيهن بنات دبي وشو فيهن بنات بوظبي..مالت عليكن كلكن يا مال الميك اب وعمليات التجميل..علني ما خلى من بنات العين ما شي منهن ابد شيخات البلاد عقل وجمال وادب وثقافه...يا زين البداوه فيهن..يردن الروح..
حمدان: لا المثقفات بنات الشارجه...
يوسف: تحريت شي خطير...
بدر: سخافه!!!
حمدان: كل البنات سخيفات...
عمر: قلنا لكم محد سمع رمستنا...
بدر: الا خواتي ما شي منهن...
مها: فديتك Brother…
حمدان: امحق رمسه...
مها تطالع حمدان باحتقار وترمس بطي: Wat’s wrong with him ?...
بطي: جب انتي وياه يالله قومن سيرن داخل..عن يحدر ريال ويشوفكن تتضاربن ..
وساروا عنهن الشباب وتمن في الحديقه عنادا فيهم..وعقب شوي نزلن البنات الكبار...ويلسن في الحديقه وياهن
...........
جدام فلة خليفه كان حمد يالس في موتره يسمع ميحد ويرمس تلفون...
حمد: زين وبعدين..؟
لارا: شو بعدين إحنا حكينا كفايه..
حمد: شو حكينا ما حكينا انتي...اطر من عندج انا..كل شي بفلوس..لا تموتين علينا...
لارا بدلع: بموت عليك من يومي..بس انت ما بتأدر هالشي..
حمد: بأدروا يا عيني..
لارا: شو بيلبأ عليك الحكي اللبناني..
حمد: الله يخليكي يا ستي..
لارا تضحك: زين شو إلت...؟
حمد: الحين فارجي وعقب بينا تلفون بنزل اسلم على اهلي..
لارا: وانت فارج بعد..
حمد: اسمع يالهرمه ..انتي تفارجين مب انا...
لارا: وشو يعني تفارجين وليش اتخضيت هيك..يعني اكيد كلمه مش منيحه..
حمد: غبيه هاي الكلمه بس تنقال للحرمه يعني بما معناها انه يا حبيبتي او جي بس ما تنقال للريال مول..
لارا: تؤبر البي حبيبي لك انا بدي افارج العمر كله...
حمد يضحك ويرمس روحه: مب راكبه الجمله مول ما عرفت احبكها هالمره...
لارا: خلاص بحكيك بعدين...
وبند عنها حمد...
ونزل ودخل الفله من الباب الرئيسي اللي يودّي فلة بو خليفه...
وشاف بطي وباقي الاولاد...وأشر لهم ويوه بسرعه...
بطي:هلا خالي حمد..
حمد يطالع بطي من فوق لتحت: الحين يا مسوّد الويه يدّك مسوي هالعزيمه عشانك انت واهلك وانت مب في الميلس؟؟ ليش مب يالس ويا الرياييل..؟
بطي عصب بس مسك عمره: بسير الحين..
حمد يتمادى: وين المريله ولا شغل برا غسّل لك مخك..؟ يالس تدور لي في الحوي جنك بنيه..ومودّر ميلس الرياييل...
بطي عصب من الخاطر وشاف حمدان وبدر والباقين ساكتين وحس انه يتعمد يهينه....بس بعد تم ماسك عمره هذا مهما كان ولد عم امه وبنفس الوقت خاله...
حمد: يالله دامك الا ويا البنات سير ازقر امك بسلم عليها...
خلاص بطي ما قدر يتحمل اكثر...
بطي: ما بسير شو اشتغل عندك انا..تراني حشمتك بما فيه الكفايه وانت ما تستاهل حشيمه...وجاني سكت مب خوف فيني بس احتراما لقرابتك لامايه..ولا قبل تنصح الناس طالع عمرك...وين يالس انت؟؟ هاه...؟؟ في ريال بعمرك يودر الميلس وييلس في موتره ..؟ شو من مذهب هذا...
حمد اعتفس مزاجه ورفع ايده بس مسكها بدر...
بدر: هاللي ناقص بس...
وسار حمدان عنهم ومشى وراه يوسف وعقب بدر وبطي ساروا الميلس...وحمد تم واقف مكانه..ويته سمر من بعيد...
سمر: هاه حمد شو تسوي هني..
حمد: سيري ازقري اختج شمسه بسلم عليها..
سمر: بس شمسه...؟
حمد: كل خواتج وعمتي بعد...
سمر: بس...؟
حمد: ناقصنج انتي بعد...يعني اقولج شو رايج احدر ميلس الحريم..؟
سمر: محد غريب...
حمد: من اللي داخل...؟
سمر: خواتي وامايه وخالتي غاليه واهلك و حريم عيال بو راشد...
حمد: من خالتج غاليه هذي؟
سمر: ام راشد حرمة خالي ناصر الله يرحمه...
حمد: هيه ام ليلووه..
سمر: كيف تعرفها..؟
حمد: ويّانا في الدوام..
سمر: شو تبى الحين انته...
حمد: سيري زقري خواتج...
وسارت سمر البيت من صالة الحريم وزقرت بدريه...
بدريه: زين هو وين الحين..؟
سمر: في الحوش وشكله معصب..
بدريه: من متى يهدا هو اصلاً...
وسارت بدريه عند بنات عمها وخبرتهن وعدلن شيلهن وتحجبن ونزلن الصاله اللي خاري ويلسن شمسه ونوره وسلمى وحصه اللي كانت حالتها حاله..
ونزلت بدريه الحوش وسلمت على خوها ...
بدريه وهي تلوي عليه: فديت عمرك والله تولهت عليك...
حمد مبتسم: مبيّن.. عشان جي مسوي لج غسيل مخ الاستاذ عبدالله ما تيين بوظبي الا بيت اهله...
بدريه: حمد بزعل..؟
حمد: اسولف وياج...وين بنات عمج بسلم عليهن..؟
بدريه: تعال وياي..
وسار حمد ويا بدريه ودخل الصاله..ونشن البنات يسلمن عليه...
ويلس وياهن...وبدريه ردت عند الحريم...
حمد: الحمدلله على السلامه يا ام سعود..
شمسه: الله يسلمك...ويسلم غاليك..
سلمى: حمد ولد عمي..
حمد تنهد يعرف انها بتطيح فيه طيحه..دومها ماكلتنه..
سلمى: وليش تتنهد بعدني ما قلت شي...
نوره: يستعد للعاصفه القادمه..
سلمى: من متى يالاخ ما ييت تسلم علينا..من متى ما شفناك ولا اسفارك وشغلاتك مالها حد ولا عد..
حمد: مشغول دومي مشغول...
شمسه: بس سلاّمي خلّي الريال...
نوره: هاه حمد وعلومك بعد وش مسوي ..؟
حمد: بخير الله يسلّمج..الا اقول شمسه ..
شمسه: لبيه..
حمد: بطي ولدج ..
شمسه تغير شكلها: شو بلاه.؟
حمد: ما فيه ادب يالس يلاسن الرياييل ويغلط عليهم...
شمسه وشكلها صدق تغير وبدت تتضيج: ما عليك منه يا حمد برمسه اليوم ان شاء الله السموحه لو قالك شي والله هالولد لسانه متبري منه...
حمد في خاطره" الحين يا ولد امك بنشوف شو تسوي"
تموا يسولفون و شمسه ضاغطه على عمرها عشان ما تبين انها معصبه وحمد كان يتعمد انه ما يرمس حصه..يموت في نظرة الانكسار اللي في عيونها..وتعجبه نظراتها المتوسله...ويحس بعمره شي كبير وهي تستجدي كلمه منه...
كانت حصه تغلي من داخل ومعصبه ومحترقه وكل مشاعر القهر والكبت متجمعه داخلها...بس ما حبت تبين وطول الوقت ساكته...اخر شي قررت تقوم من الصاله..بس ردت مسكت عمرها وقالت" ما بظهر بيتحراني طالعه عشانه خلني اتم"
حمد كان يسولف ويطالعها ويبتسم ويتعمد يقهرها يدري بها تحترق من داخل..كان طول عمره نذل ما تدري شو اللي خلاها تحبه..وطول عمره منبوذ ومحد يحبه..وخواتها ياما حذرنها من اللي هي فيه..وان حمد ما يستاهل وانه صايع وراعي بنات وسوالف بطّاليه بس ما رضت وقالت ان كل شي يصير خارج عن ارادتها...
حمد: يالله انا استأذن بسير الميلس...سلّمن على عمتي ما حدرت ادري به ميلسها ممزور حريم...
نشن البنات...
وظهر حمد...وتمن في الميلس واقفات...
سلمى: ما ادانيه ولا احب شوفة ويهه الله يعين عمي وعمتي عليه...
نوره: شو تبين به صايع مقطوع الرجا فيه..
شمسه : شو مسوي بطاي...؟؟
نوره: لا تصدقينه تلاقينه متحرش في اليهال وسنعوه بكلمتين..
شمسه: بس انا اعرفه بطي ما بيرمس بشي مب زين الا اذا زاد الشي عن حده ومب أي شي يعصب ببطي...
نوره: عيل انشدي ولدج ولا تستعيلين وتهزبينه عشان هاللي ما يسوى...
حصه طلعت بدون ما ترمس ولا تقول شي...
نوره: الاخت تحب... برايها خلنها خبال في خبال..
سلمى: حرام عليج مب بإيدها...
شمسه: شو مب بإيدها كل هالانحراف اللي فيه وبعدها ما شافت..بعدين والله لو حمد اخر ريال في العالم ما خليها تاخذه يا حيا الله العنوسه ولا مجابل اشباه الرياييل...
وطلعن من الميلس وسارن الصاله ...
.................

اذا حبيتوا القصه راح اكملها لعيونكم​

 

[ام هباش]

مشكوره حبيبتى تسلمين ناطرين التكمله

 

[الرقادي]

لساعه 12:30 كانت ليلى في حجرتها يالسه وعقب سارت حجرة عايشه اختها ويلست فيها...حست بكبت بتعب وضيج..حست محد في العالم كله فاهمنها..."ليش ابويه مات..!! وليش اختي عايشه عرّست وراحت..ليش انا في البيت وحيده..وليش خويه سيف توفى وبنته شو ذنبها تعيش يتيمه العمر كله..انا مب معترضه يا ربي على قدرتك واللي كاتبنه في اقدارنا...بس سؤال في نفسي اللي ضعفت وعمري اللي بدا يمشي بدون هدف..ليش ما عرست للحين...ليش كل الاقدار ماشيه ضدي..باقي 4 سنين وكم شهر واوصل الثلاثين..."
نزلت دموعها بصمت وحراره..ما قدرت تتكلم...ودها تكلم حصه بس تدري به بيتهم ممزور ضيوف..دفنت ويهها في المخده....
"اختي عايشه ولهت عليج"...
حست ليلى عمرها تبى تصيح تطلع الكبت اللي يحرق حياتها..وحدتها تسبب لها تعب نفسي..تحس بعمرها ضايعه ما تلقى نفسها الا في عيون ناصر...ناصر اللي ربت وياه وشافت كل ايام الطفوله معاه..كان ناصر حياتها من يوم انولدت وشافت الدنيا، ناصر هو عيونها اللي تشوف بها..تذكرت يوم صغيره وتلعب معاه ويوم كبرت وصارت مراهقه وهي تموت عليه..ويوم تخرجت وبعدها تعشق الدنيا لان ناصر فيها..لين ما وصلت هالعمر وهي بعدها ما عرست للحين..وتذكرت اثنين خطبوها بس رفضتهم عشان ناصر..ناصر اللي تقنع عمرها انه لها لو شو ما صار..اكثر شي يعذبها انها تدري انها حبه الاول والاخير تدري ان ناصر يموت فيها....بس ناصر عاقل ويدري ان ليلى بالنسبه له مثل خيوط الشمس تنور له حياته بس ما يروم ييودها ..ليلى بالنسبه له نجمه يناجيها لين الفير بس عمره ما يوصل لها...
تعبت ليلى وهي على هالحال تفكر فيه وتدري انه سراب ..بس عواطفها قامت تسيّرها وحست عمرها ما تقدر توقف تفكير فيه..وصار هالشي من يوميات حياتها..وكيف ما تحبه وهالحب ربى في قلبها من الطفوله وتأكدت منه ونضج في قلبها من 12 سنه..
يلست تناجي نفسها بصمت...
"ناصر وينك..!! ليش الدنيا رخيصه..شو اللي اغلى من البني ادم..الحين صار الميراث وسوالف الفلوس هي اللي تفرق بين الناس...الله يرحمك يا بويه..لو تدري ان عمتي اللي هي اختك ما طبت بيتنا من يوم غاب حسك عن هالبيت..ليت الموت بالاختيار جان رجيت الله ياخذ روحي وانت تتم...بس بعد ما تهون عليه احرق لك قلبك...يكفي كيف حالتك ومرضك اللي مرضته عقب وفاة سوافي الله يرحمه.."
يلست ولوت على المخده وتربعت على الشبريه...وتنهدت بحراره تذوب لها اقسى القلوب...وبدون شعور كانن دموعها مفر لها من قسوة الايام..ويمكن شافت فيها تبريد لروحها المتعبه المثخنه بالجراح....
"ناصر لو ان ابويه وافق يوم خطبتني اول مره شو كان بيستوي حتى لو ما عرسنا ذاك الوقت...الله يسامحك يا بويه قلت اني صغيره...ما تدري ان الدنيا بتتغير وانك يوم بتموت بيفترقون هلك عشان ميراثك..وبيروح اللي حبه القلب وعشقته الروح...ليش يا بويه ما حسبت ان هالبنت اللي كانت صغيره بتكبر..ما ادري يا بويه اذا رمستيه تعذبك بس من اشكي له..ربي اصبر علي والهمني الصبر ما عاد في باقي العمر روح..."
نشت من مكانها ويلست تطالع المنظره...ورفعت ايدها لشعرها وفتحته...وطاح من فوق لين اخر ظهرها...ويابته شوي جدام ويلست تطالعه...وابتسمت بألم...وجدام المنظره..
" باجر يختلط سوادك بالبياض.."
ردت لفته وبندت الليت ومشت دموعها وطلعت من الحجره..كان الممر مظلم بقدر ظلمة الحياة في نظرها...سارت بخطوات ثقيله لحجرتها تجر معاها هم ووجع السنين...ويلست على الكرسي وسحبت الدفتر والقلم وسجلت على صدر الزمن صرخة الم...
" آآآآآآآهٌ من غربة الروح ومن هيجان أوجاعي"
ووقفت وردت شخبطت على الجمله وقطعت الورقه...وكتبت من اول ويديد..

"تعبت أكثر من التعب..أحترق...أحترق مثل الحطب مثل الخشب آه يا حرق اللهب كيف الصبر بين اللواضي والجمركيف الجبر؟؟هذا الكسر ما ينجبر من يجبر كسور الزجاج يارب عجّل بانفراج جل ّالمصاب القلب ذاب يكفي عذاب يالوعتي كبر الفيافي والقفركثر المطرأو كثر أمواج البحرحتى النهرأو كثر قطرات البحرحتى النهراوكثر من ودا البحر عنا وراح يكفي جراح أبعتذر..... يعني : يكفي إذا هذا مزاح؟؟؟؟ما عدت اميز صدقيني بين ضحكي والنواح بين صبري والكفاح بين رمشك والرماح الكل........سبب لي جراح..الكل أرث لي نواح هل يا ترى أصبح عذابي مستباح؟...أم ياترى ماضي أنا عدا وراح !!!!!!!!! وين العدل حتى الأمل عني غدا واصبح جُمَل فيها مواساتي غزل كيف العمل من بايداوي هالعلل يالله يعل اللي تجلا بي وحل أنه يصير مثل السراب ويضمحل أهل ورفاق ما عوضوني عن بعادك والفراق والله يعلم أن قلبي قده ضاق أرجوك يكفيني إحتراق"

صكت الدفتر ونشت بتنزل الصاله وكان الجو بارد...تترياهم...بس تعبت من كثر ما تتريا وقررت ترقد...حطت راسها على المخده ورقدت..
............
حصه على طول بعد اللي صار طلعت فوق وصكت الباب وعقت مخدة سمر ولحافها برا الحجره..ولحقتها سلمى على فوق بس ما قدرت تقنعها تفتح لها الباب....
سلمى: حصوه بطّلي الباب خلي الخبال اللي فيج...
حصه ما ردت...كانت تحترق وتحترق بس ما تقدر تكبت اكثر عن جي...داخلها براكين غضب...لو صاحت جدام اختها بتقول انها ضعيفه...وايد تسمع من نوره هالرمسه ودايما جملها ترن في اذنها..
" انتي دومج مستقويه على سمر وبنات خليفه..دومج تطولين لسانج علينا وعلى خوانج وحريمهم..وما تحشمين حد بس الله مبتليج في محبة ولد عمج اللي يسقي الناس كاس مذلته"
حصه بندت الليتات ويلست بكل ثقه على شبريتها وقاومت الدموع وكانت فعلا قويه...كانت تتنهد تبى تقهر العبره اللي خانقتنها..تكابر ولا تصيح...تدري انهم كلهم بيلومونها حتى بدريه اللي دومها وياها ممكن تلومها على دموعها...
سلمى: حصووه وغلاتي عندج بطلي الباب...او ارمسي على الاقل...
وملت سلمى وسارت عنها تدري بها عنيده ومستحيل تفتح الباب الا في الوقت اللي يرضيها..
نزلت سلمى تحت وشافت ان هل بدريه روحوا..وشافت ان بنات مبارك بن ناصر يلبسن عبيهن وشكلهم بعد هذيل بيروحون...
وهناك عند باب الصاله واقفه مريم وخواتها وسلامه وبنات خليفه وبنات شمسه...وياي من بعيد بطي وبدر ويوسف بيدخلون الصاله...
هنادي: لحظه بطي اصبر شوي...في بنات هني..
بطي يستهبل: احلى شي..
وتحجبن البنات ودخل بطي..وسارن سلامه ومريم شوي بعيد لين ما يمر...
ودخل هو واخوانه...
هنادي: وين ساير...؟
بطي: وين بعد اكيد بسير ارقد تعبان...
هنادي: وين..؟
بطي: اوهوو في حجرة خالي ذياب وين يعني..يالله يوسف.
وسار وياه يوسف ...وبدر تم يسولف ويا امل وايمان...
بدر: اقول من احلى بنات دبي ولا بوظبي..
ايمان: دمك ثجيل..
ريم: بنات دبي...
بدر: والله سوالفكن تييب المرض..اونه من احلى نحن ولا بنات دبي...مالت عليكم احلى شي بنات البحرين وبس..
وسار عنهن وهن يتحرطمن خواته وبنات مبارك الصغار...
وردت مريم وقامت شمسه حرمة مبارك هي وخلود وام راشد..وسلمن عليهم وقبل يظهرن وقفت افنان عدال مريم وطلبت رقمها في دبي..
مريم: هذا رقم الصاله اللي تحت وخذي هذا بعد للي فوق يمكن ما كون تحت دوم..
افنان: ما عندج موبايل..
مريم: يوم اخلص الثانويه العامه وادخل الجامعه ابويه وعدني...
افنان مبتسمه: ولا انا ..ما عندي بس خالي ذياب وعدني يوم اتخرج بييب لي واحد انا وهنادي..
مريم:احسن عقب مب الحين..شو نبى الموبايل الحين..؟
افنان: زين مريامي بدق لج عقب وان شاء الله بزورج قبل اسافر...
مريم مبتسمه: ان شاء الله..
سلامه: ما شاء الله الخوات تعارفن...
حمده: يهّال ما عليج منهن...
عفرا تطالع حمده بنظرات: من كبرج انتي؟
حمده ما ردت عليها..وهاللي قهر عفرا اكثر..
طلعوا بيت بو راشد سايرين بيتهم ودخلن الحريم في بيت بو خليفه وشافن البيت مجلوب فوق تحت والدنيا معتفسه..
نوره: الله يعينا على اعادة الاعمار...
سلمى: شكلنا بنتعب وايد...
عفراء: الشغل الجماعي يخلي كل شي يخلص بسرعه..بنتعاون وكل شي بيخلص بوقته...
ساره: شو نبدا الليله ولا باجر الصبح..؟
شمسه: شو الليله ساره..؟؟ تعبانين نحن خلهن لباجر..
بدريه: لا شموس انتي ما تسوين شي خله علينا نحن...
سلمى: عيب بعد ضيفه وتشتغل..
شمسه: وفرتن علي..
شمسه كان مزاجها معتفس عقب اللي صار..معروفه ومشهوره بتربيتها لعيالها احسن تربيه..والكل يشهد لها بهالشي..وكانت طول الوقت تفكر بطي شو مسوي...!!!!
وسارت شمسه فوق وخذت وياها ريم ومها..اما هنادي وافنان قالن انهن بيسيرن ويا عفرا وحمده فلة خالهن خليفه...
سلمى: انا برتب شوي ويا البشاكير والله يغمضني هن بشر شراتنا...
بدريه: وانا بعد...وياج سلامي..
نوره: انا بسير ارقد..
ساره: عيل بتم ويا بدريه وسلمى..
عفرا: امايه بسير اغير ثيابي وبييكن اساعدكن...
حمده: انا بسير ارقد..
هنادي وافنان: ونحن بعد....
وكل وحده سارت المكان اللي تباه...شمسه طلعت فوق على طول وفتحت باب حجرة ذياب وشغلت الليت وشافت بطي متلحف ورفعت اللحاف شوي من على ويهه..وشافته راقد...وخلته...وهي طالعه...بندت الليت وصكت الباب...
نش يوسف من مكانه: مب قلت لك انها بتيي تشيّك عليك رقدت ولا لاء...
بطي: والله انه مب ريال الهرم خبر امايا..يالوهقه عاد ام سعود هاي تصدق المشتكي الاول..
يوسف: ما عليك بنخلي بدر يشهد ويانا هي تصدقه...
بطي: بس بعد ما ابى امايا تهاوشني...وبدر خوك فتان يباها من الله على الضرب اللي يحصله مني...
يوسف: ما عليك منه ارقد الحين وباجر اغسل لك مخ بدر بسنكرز واي حلاوة ثانيه وتلاقيه عبد مأمور...
بطي: تصبح على خير..
يوسف: وانت من اهله...
.............
وصلوا قوم بو راشد بيتهم...وسار مبارك وحرمته وبناته البيت العود وراشد سار فلته ويا حرمته..وسلامه وحمدان وعمر ولد مبارك وياهم...وفي فلة راشد سلامه فوق في حجرتها قافله الباب...وتغير ثيابها..
وتغني بصوت مسموع" تقدر تروح وتبتعد ان كان يرضي مطمعك..لو حب قلبي ما صمد...عن حب غيري ما امنعك..الحب احلى من الشهد..ومن مثلي حب ودلعك..ولا تظن في قلبي احد يا كيف وهو نبضه معك..وسهيل نجم بلا عمد..ومن فوقه حبي رفعك"
مشطت شعرها وحاولت تلفه ولفت شوي منه مع انه قصير..و على طول وانسدحت على الشبريه...
وفي غرفة حمدان على طول رقد عمر من التعب اللي فيه...وحمدان بعد ما غير نزل الصاله بيسير بيت يده ناصر...بس شافه ابوه وهو نازل...
راشد: وين رايح...؟
حمدان مرتبك: بيت يدي ناصر..
راشد: وهاي حزة طلعات ..عمتك راقده..سير ارقد...ما شوفك فتحت لك كتاب من يوم الاربعاء...ارقد عشان اشوف الدراسه باجر ...وتعويض الوقت اللي قضيته في الهياته طول هالويكند...
حمدان نزل راسه: ان شاء الله ابويه...
ورد على طول حجرته وقفل الباب...
" اففف يا ربي ما شي رقاد شو ايلس اسوي هني..شو هالملل.."
وتم طول الليل يتجلب ما ياه رقاد من الملل مع انه من الصبح ناش...

وفي الدور الثاني في بيت بو راشد...وفي غرفة مبارك يالس ويا حرمته شمسه...
مبارك: نرد باجر...؟؟
شمسه: عيل نتم شو نسوي...عيالك وراهم مدارس يوم السبت ولا ناسي..
مبارك: زين على الله يصير خير...
شمسه: شكلك ما تبى ترد..
مبارك: من قال بالعكس..بس تعرفين ما احب ايلس في بوظبي وايد...
شمسه: من حقك والله...
مبارك: كرهني راشد اخويه فيها والله...
سكتت شمسه ما تريد تتدخل تعرف مبارك بيبدا في لوم اخوه ويعيد سوالف ما تحب تسمعها لان حلولها انتهت...
مبارك: فشلنا وفضحنا بين العرب..عيال عمتي يشوفوني ويا الشباب ولا يون يسلمون...يتخبروني الناس شو بينكم..شو ارد عليهم اقول اخويه ماكل حلال امهم...حتى عمتي لا سرت اسلم عليها تكلمني من ورا خاطرها...
شمسه: وانت شعليك ليش يحاسبونك على شي مالك ذنب فيه..
مبارك: هذي هي الناس كل حد يدخلونه في اللي له واللي عليه...
شمسه: رمست راشد.؟
مبارك: يحلف بالله ان ابويه معطيها حقها كامل وان عيال عمتي ناصر وفهد يألفون سوالف هم وابوهم...ويقول اكيد لاهفين حلالها وهي ما تدري..
شمسه: والله ام ناصر طيبه وعادي يكون حد قاص عليها...
مبارك: ما ادري بس عمتي ما بتصدقنا ضد ريلها وعيالها...
شمسه:زين ما رفعوا دعوى بالمحكمه...
مبارك: فال الله ولا فالج من حرمه...ناقصنا محاكم نحن...هاللي باقي الفضايح...عوذ بالله من فالج...
شمسه سكتت...وتلحفت: تصبح على خير...
مبارك: وانتي من اهله ولو ان الخير معدوم...
..................

وفي بيت بو خليفه..كانن البنات والحريم اللي ما رقدن يشتغلن...و ع الساعه وحده دخل بو خليفه بعصاه يتعكز عليها...وشافهن يرتبن الصاله ويودن وييبن...
بوخليفه: بناتي ليش ما رقدتن..؟
ساره: والله يا عمي بنرتب شوي ما نروم باجر لكل هالشغل...
بو خليفه: بنتي ساره سيري بيتج ..ريلج سار هناك من الساعه 12 ..بيتج الزم ما عليج الحريم هني يكفن ويوفن والبشاكير هب زينه في البيت..
ساره: ان شاء الله عمي...
وسار بو خليفه حجرته...
سلمى: وا عليه عليك يا حامد اكيد توله علي...
بدريه تتمصخر عليها: والدليل انه دق لج...
سلمى: اووه موبايلي ما شفته والله اكيد حرق التلفون دق...
بدريه: هذا ويهي لو لقيتي نص مس كول...
وتمن يرتبن وسارت سلمى حجرة نوره ويابت تلفونها ويت تربع المطبخ..
سلمى: قبل ادق التلفون ولا اسوي به شي يبته لين هني...شوفي كم مس كول...
بدريه: اشوف..
سلمى: فديت روحه 14 مس كول وثلاث مسجات...
بدريه: يالله فتحينه يمكن شي يعيبني طرشيه...
سلمى: وسعي عني يمكنه بيقول لي سالفه سريه..
قرت سلمى المسجات وعصبت وويهها تغير...
ساره: شو مستوي سلامي؟
سلمى مدت بوزها أونها بتصيح: مسوّد الويه....
بدريه: ليكون خذ الثانيه...
سلمى: بجتله..
ساره: سافر...؟
سلمى: يا ليت...
بدريه: عيل شو الشي الجايد اللي يخلي سلامي تقول عن ريلها مسود الويه..
سلمى: قال...
بدريه تسحب تلفونها: هاتي اشوف...
وانفجرت بدريه ضحك وساره تطالع: شو السالفه بدريه...؟
بدريه: اااه بطني ما روم والله...ساره اقري لروحج...
سلمى: ما يضحك..والله بيشوف..
ضحكت ساره لين ما قالت بس..
ساره: تستاهلين دواج وهذا غيض من فيض...
كان حامد كاتب لسلمى في المسج" دقيت وهلكت وانا ادق وما رديتي تمي في بيت اهلج انا راد دبي..يوم تشبعين وتفضين سوي لي تلفون اييج"
سلمى: بتشوف والله..
بدريه: سمعناها وايد...
وكملن شغلهن وسلمى يلست وياهن لين 2:30 عقب كلهن سارن يرقدن وراهن نشه باجر...
..................
سمر اول ما طلعت فوق وشافت اغراضها برا الحجره عصبت ونزلت عند ابوها بتواشي على حصه...وتخبره شو مستوي وتمت تدق الباب ولا حشمت ان ابوها راقد..
سمر: ابويه افتح الباب بسرعه...
ونش بو خليفه بسرعه: هاه بنتي شي مستوي عسى ما شر...
سمر وهي تصيح:حصه فرت مخدتي ولحافي في الممر..وين ارقد..
بو خليفه عصب: شو اسوي بج ريال شكبري وتعبان وهلكان الضيوف ما سارو الا اخر الليل موعيتني عشان مخدتج..انخمدي في أي حجره لا بارك الله فيج...
وصك الباب بسرعه...
سمر انصدمت من ردة فعل ابوها وتمت تصيح...ومرت بدريه وشافتها هي وسلمى وعرفن شو فيها..وشلتها سلمى وياها حجرتها ترقد عندها...
وبدريه سارت بتدق لعبدالله بس اكتشفت عقب ان تلفونها في حجرة حصه..بس ما تكلمت ونزلت الصاله ودقت لعبدالله..
بدريه: وينك غناتي...
عبدالله: في الميلس...
بدريه: ويا منوه؟
عبدالله: لروحي..راحوا ضيوفكم..؟
بدريه: من زمان والله اني تحريتك رقدت بس قلت بجرب وحظي انك واعي للحين..
عبدالله: فديت غناتي يا ربي..زين ثواني وانا على اسرع من بساط الريح عندج الحين...
بدريه مبتسمه: اوكي اترياك في الصاله...
يلست بدريه في الصاله ...شوي وتسمع دق على باب الصاله ونشت تبطله..وعقب ما دخل عبدالله بندت الباب...
عبدالله: بووووو انا ييت...
بدريه مبتسمه: يا هلا بك والله..
عبدالله يطالعها ومبتسم: يالله يالله شو هالزين كله يا بدوور..(ومد بوزه أونه زعلانه) الحين كل هالحلا للحريم وانا بس مالي الا بقاياه...
بدريه: بس عاد خل عنك هالرمسه...وايد تبالغ...
عبدالله: وين نرقد الحجر ممزوره عرب...
بدريه: لا في حجر فاضيه شو قالوا لك ساكنين خرابه فيها حجرتين..يالله تعال بنرقد..
عبدالله: وين..؟
بدريه وهي تأشر على اخر حجره في الصاله: هناك...
عبدالله: فاضيه..؟
بدريه: هيه يالله وفرشت وكل شي خلاص..
عبدالله: اكيد على الارض..؟
بدريه: ارجوك يا ولي العهد اللي متعود على ريش النعام..
عبدالله: ظهري يعورني ما روم ارقد على الارض وانتي تدرين بهالشي..
بدريه: وكيف انسى ؟ وليش كم عندي عبادي انا ..
عبدالله: عشان جي تبين ترقديني على الارض وتفتكين مني...
بدريه: امنت لك اللي تبى وفرشت لك فراش طبي كان عمي مبارك يرقد عليه... احسن عن الشبريه مليون مره..
عبدالله: بعد عمري والله ..كل حريم الارض ما يسونج يا بدريه...
بدريه: كل هاه عشان فراش..يالله يالله نسير..
عبدالله: يالله نسير..
وسار هو وياها ورقدوا في هذيك الحجره...
==========

 

[الرقادي]

وفي حجرة حصه ما رقدت للحين قاصه على عمرها أونها ما بتصيح لو شو ما صار...وقالت في خاطرها" ما شي الا اني ارمس ليلى اكيد هي الوحيده اللي بتفهمني"
ونشت تييب تلفونها....ودقت بدون تردد حق ليلى...
بس طوّل محد يرد وتمت تدق واخر شي ردت عليها ليلى...
حصه بهمس: ليلووه...
ليلى وصوتها رقاد: منو؟
حصه: من بعد انا حصه...
ليلى: شو مستوي..؟
حصه: ما شي بس ما ياني رقاد...
ليلى: وحد قالج اني منوّم..؟
حصه تضحك: يالله خل عنج انا مقهوره ليلوه نشي..بسج رقاد...
ليلى : شو تبين انتي الثانيه خليني ارقد ما فيج صبر لين باجر..
حصه: محد يدق لج تحريتج الوحيده اللي بتفهميني...
ليلى: زين شو فيج..
حصه: ما شي باي..
وصكت حصه التلفون قبل ترمس ليلى...
ليلى ردت ترقد..بس بعد عشر دقايق نشت..وسارت تشوف الساعه ولقتها 3:10 وغسلت ويهها..بطلت الليت وشافت اذا صدق حد متصل بها من شوي ولا كانت تحلم...ويوم فتحت المكالمات الوارده..شافت ان حصه متصله..وتذكرت اللي صار وتلومت وردت تدق لها..
حصه: خير شو تبين..؟
ليلى: اسفه حبيبتي والله ما كنت حاسه..
حصه: اففف ليلوه مضايجه والله..
ليلى: شو استوى بج ارمسي..
حصه: هو..
ليلى: حصوه والله اني مصطله رقاد منو...زين حمد شو سوا اليوم..
حصه: نذل كالعاده..
ليلى: يومج تدرين بهالشي ليش متقبضه فيه..؟
حصه: مثل يوم انج تدرين ان ناصر مستحيل ياخذج ..بعدج تحبينه ليش؟
ليلى بحزن: غصباً عني...
حصه: نفس الشعور..
وخبرت حصه ليلى كل شي صار..
ليلى: طول عمره خسيس وما ينبلع وكارهتنه من ايام زمان..
حصه: حرام عليكم..
ليلى: حصوه حبيبتي الساعه الحين 3:30 شو رايج ترتاحين شوي وترقدين فديت روحج..تدرين شموس عندكم وراج نشه من الصبح عشان تيلسون وياها قبل يردون دبي..وإلا شو رايج..؟؟
حصه: خلاص عيوني بسير ارقد..بس ابى ارمسج باجر...
ليلى: باذن الله...في وداعة الرحمن..
حصه: الله وياج.
ليلى: حصه...
حصه: هلا غناتي..
ليلى:احبج..
حصه بفرح: فديت قلبج وانا بعد..
ليلى مبتسمه: يالله فديت روحج باي..
حصه: مع السلامه..
ورقدن كلهن الثنتين...على طول..
...........

اليوم الثاني في بيت بو راشد..الساعه 8:30 نشت ليلى اول وحده...وحست بنشاط غريب رغم انها ما رقدت امس عدل ورغم الضيجه اللي فيها بس نشت بسرعه اليوم وعلى غير العاده....وسارت المطبخ وسوت لها شندويتش جبن وكوب شاي..ويلست بتاكل ..وتذكرت حمدان...وحطت الاكل وقالت بتتريا لين ما ينش هو وسلامه...
البيت كان هادي والبشاكير مبطلين بيبان الصاله وصوت العصافير يريح القلب وهوا بارد ياي من صوب الحديقه...وطلعت ليلى وكان الجو يجنن برا..وقبل تنزل من دري الصاله ....
امل: عمتي ليلى...
ليلى لفت صوبها: صباح الخير اموله..
امل مبتسمه: صباح النور...
ليلى: ليش ناشه من وقت...
امل: انا دومي جي اول وحده انش في بيتنا...
ليلى: شطوره..
امل: عمتي ما ريد ارد دبي..قولي حق ابويه بنيلس هني...
ليلى: والمدارس..؟ وين ومن بيكمل دروسج عنج...؟
امل: اففف ما ريد ارد...
ليلى: احيدج تموتين في دبي...شو ياج على هل بوظبي..؟
امل: حبيتهم..ابى اتم هني...زين عمتي وين سايره الحين...؟
ليلى وغيرت رايها:بيلس في الحديقه..تيين وياي؟
امل: هيه..
ويلست هي وياها...وتمت تسولف لها شو تسوي ما تسوي....وعن المدرسه وكل شي...وقالت لها امل انها كانت مشتركه بمسابقة افضل صوت في أي مجال على مستوى في المشاركات الصيفيه...وفازت بالمركز الاول محلياً...
ليلى: زين والله وليش ما شاركتي على مستوى الخليج...؟
امل: ابويه ما خلاني قال عيب...
ليلى: صح فديت بنت اخويه اللي تفهم..وفديت صوتها الحلو....
امل مستحيه:عمتي استحيت..
ضحكت ليلى..
امل بثقه: عمتي شو تبين تسمعين..؟
ليلى: امممم أي شي...على ذوقج...
امل : احم احم...
وغنت"الزين هذا حلو و زين..خصه الي لبس القلايد..فتان يسبي القلب والعين..فيه الحسن والزين زايد...ما شفت انا في وصفه اثنين...ذرف الصبا غض النهايد..من وين هذا الريم من وين..لي صار للغزلان قايد...مفنود عن كل المزايين..نوره لنور الشمس عايد في مبسمه در مثامين..مسك ودانات فرايد..عوده اذا هب الهوا يلين فارع ومياس ونايد..تحلى به الاوصاف وتزين..وتزين به حتى القصايد..."
ليلى منصدمه من صوتها: هذا وتوج ناشه من الرقاد جي..عيل لا صحصحتي شو بتسوين..؟
امل: قولي ما شاء الله عن تحسديني...
ليلى تضحك: فديت روحج والله صوتج جنان اموله...
امل: زين عيبج..امس غنيت للبنات في بيت يدي مبارك...
ليلى: منو اكثر وحده عيبتج ومن اللي ما حبيتيها...؟
امل: حبيت ميره وريم مع انها شوي خقاقه..بس ما حبيت مها ابدا ..لانها شرات ايمانوه اختي...
تضحك ليلى: خقاقه..؟
امل: ودلوعه...
وقبل ترمس ليلى سمعت صوت شيخه من بعيد...وقامت ودخلت البيت وشافتها واقفه في بداية الدري من فوق..ومبتسمه ابتسامه مشرقه من الصبح...وماسكه دب صغير..ولابسه قميص برتقالي فيه عصافير صفرا وبنطلون نفس الشي...
وبفرحه طفوليه اول ما شافت ليلى وعيونها بعدها ما بطلتها عدل مدت ايديها عشان ليلى تييها وقالت: امي..
ابتسمت ليلى وضحكت امل..وسارت لها فوق وشلتها..
ليلى وهي تحبها على خدها: فديت هالويه وفديت هالخدود يا ربي..
امل: عمتي وايد دبه..شو تأكلينها..؟
طالعتها ليلى بنظره حاده: قولي ما شاء الله..
امل مبتسمه: ما شاء الله..
شيخه ماسكه ثوبها وعفست ويهها وتطالع بدلتها باحتقار: ماليد ثليه..مث حلو..
ليلى طالعتها بخبث: نروح نتسبح.؟
شيخه بخوف: لا لا ماليد ثبح...
ليلى: زين تعالي بغسل ويهج حياتي..
وسارت الحجره وغيرت لها ونزلت الصاله ويلسن امل وليلى... وشيخه يالسه على ريول عمتها ليلى ..
ليلى: شواخي..
شيخه وهي طايحه براسها على كتف ليلى وبكسل: هاه..
ليلى: غني لي عشان امل تسمعج وانتي تغنين...؟
شيخه: ماليد..
ليلى: من يبى حلاوه...؟
امل تغايض شيخه: انا...
شيخه نشت بسرعه وبعصبيه: لا لا انا...
ليلى: ما يي معاج الا هالاسلوب..يالله غني يا علايه...
شيخه: يا علايه يا علايه ابوث ما عبلني يا علايه..
واستحت شيخه من امل وحطت ويهها في حضن ليلى وما قدرت تكمل...لوت عليها ليلى ويلست تتفداها ساعه..وقطعتها بوس..وامل ميته ضحك عليهن...
ويلست تسولف وياها لين ما نزلوا الباقين وسلموا وقربوا الريوق...وتريقوا كلهم..
................
الساعه 9:15 في بيت بو خليفه...الكل رقود هلكانين ومحد منهم نش للحين..وفي حد يبطل باب الصاله من برا بس مب رايم له...
" افففف شكله مصكر من داخل شو هالحاله...يا رب ان البشاكير نشن"
وسار من الباب اللي ورا الفله ولقى وحده من البشاكير تحط الحب للطيور في الحديقه اللي ورا...
ذياب ينادي بصوت مبحوح عشان محد يسمع: ناتالي ...
ناتالي: نعم بابا...
ذياب: قصري حسج.. علني ما صرت ابو جانج بنتي...
ناتالي: شو ريد...؟
ذياب: شو ابى من ويهج بعد...اقولج باب الصاله سيري بطليه ما اريد ادخل من باب المطبخ وتقبضني امايا..
ناتالي: ما في ولا واحد ينش لين الحين روح من هذا باب....
ذياب: بابا مبارك ما يسأل وين انا امس...؟
ناتالي: انا كيف يعرف..يمكن يسأل ماما..تعال تعال انا شوف طريق في حد ولا لاء..؟
ذياب: زين منج فايده..
وسارت البشكاره تشوف الصاله..واشرت له ان محد وعلى طول طلع فوق بسرعه لان ابوه يرقد تحت...واول ما وصل باب حجرته وبطلها...شاف ثلاثه رقود فيها..بطي ويوسف وبدر.
ذياب وايده على راسه" يالوهقه..عيل شموس اختيه يت وشيكت البارحه على عيالها واكيد بتقول اني ما رديت للفير...يا ربي شو اسوي."
ويلس في الحجره يفكر ويفكر...انه لازم ما يكون راقد في الحجره هذي..واحسن شي يفكر انه يرقد برا هالفله بس كيف..؟
"اووه كيف ما يت على بالي...هذي احسن فكره والله.."
وصك ذياب الباب وسار على طول وهو نازل على الدري سمع حد يرمس...
بو خليفه: جينا...جينا...
جينا: نعم بابا...
بو خليفه: ذياب رد من برا ولا بعده...
ذياب مات من الزيغه وقبض قلبه..وما عرف شو يسوي.."متى نش هذا..؟خلاص انكشفت انا شو دخلني هني يا ربييه شو هالمصيبه من الصبح.."
جينا: ما يعرف بابا بس باب الصاله من امس بند...يمكن هو في حجره فوق...
بو خليفه: وين اروم اطلع له الحين ..انا يالله يالله امشي..لو طلعت فوق اموت..بس بيلس له هني في الصاله...
ذياب" والله هاللي ناقص بعد"
ورد ذياب فوق...وسمع صوت حجرة تتبطل...وعرف انها شمسه وقبل يربع صوب حجرته...
سلمى بنبره حاده: وين شارد.؟
ذياب بعد ما طاح قلبه من الزيغه: الله يخسج موتيني من الرعب..تحريتج ام سعود..
سلمى: خس الله ويهك جي ترمس اختك اللي اكبر عنك...وين كنت ومتى ييت..الحين بنزل لابويه ارمسه...
ذياب: سلامي الله يخليج ابويه يالس في الصاله يترياني..حرام ساعديني ابى اظهر...
سلمى: وين بتروح..؟
ذياب: بسير انخمد في الميلس..جني راقد من البارحه وجي ما بيحس..
سلمى: اسفه ما اقص على ابويه...
ذياب: سلامي بس عاد..اوكي لا ترمسين ولا تقولين انج شفتيني ما في داعي تكذبين من الاساس..
سلمى نزلت وطنشته...ووقف على راس الدرج...وسمعها تسلم على ابوها اللي ينشدها عن ريلها وهي قالت له انه بييها اليوم...
سلمى: ابويه تعال نتريق في الحديقه...
بو خليفه: لا بنتي انا ما ريد باب الصاله يتبطل ما ادري به خوج وين يسير ما رد بعده للحين...
سلمى: ابويه خلك منه ذياب اكيد راقد في الميلس..
ذياب من فوق" فديتج سلامي والله انج اختي السنعه..."
بو خليفه: انا مب ناش من هني..اعرفه ذياب ما يداني يرقد على الارض...ومستحيل يرقد في غير حجرته...
ذياب يرمس روحه" احلف انت بس هاللي ناقص..انا مستعد ارقد على جمر بس انت اطلع من الصاله"
ويلس يفكر شو يسوي وكيف يطلع من الصاله واخر شي يته فكره..وطلع وكمل طريجه لين فوق ووصل باب السطح...وفتحه..ويلس فوق يفكر كيف ينزل وشاف سلم من السطح لين نص الفله مثبت في كل البيوت اللي لها هالديزاين.....وعقب نزل من فوقه...لين تحت..ويوم وصل صوب الدرايش تقبض فيهن ومسك عمود الماي وتزحلق عليه ونط الارض...وانطرت كندورته من تحت لين ركبته...وتخيست تراب وماي...
ذياب وبصوت عالي: عشت يا راعي المغامرات والله هوليوود لازم تعتبرني احد المغامرين بدون حبكه ولا خرابيط واكشن على الهوا وصدج بعد...
ونزل راسه يشوف كندورته وسولف لعمره"نفاد بدل الوحده عشر..بس وين ادسها من هالبشاكير الملاسين"
وسار يربع لين ما وصل الميلس...وشاف سعود راقد لروحه هناك..وسحب عنه اللحاف وتلحف وجلب وحده من مخدات الميلس ورقد على طول...
.
.
تعب بو خليفه من كثر ما يتريا..وبطل باب الصاله..وهو نازل الدري شاف نعال ذياب وانصدم كيف دخل والباب مبند..بعدين حس انه ظلمه وانه اكيد راقد فوق....
وسار ويلس في الحديقه ..وشوي نش بدر ويوسف وساروا عند يدهم في حديقة البيت....وسلموا عليه...
بو خليفه: حيا الله الرياييل...
بدر: الله يحييك يدي مبارك..
يوسف: ما شاء الله جو بوظبي هاليومين يفتح النفس...
بو خليفه يضحك: احسن من حرها...الا اقول يوسف خالك ذياب رقد عندكم ولا لاء...
يوسف ارتبك وتذكر ان خاله ذياب موصنه هو وبطي...
بدر: لا ما رقد ويانا...
يوسف" يالوهقه"
بو خليفه: زين ولدي قم بارك الله فيك شوف اذا راقد بالميلس ولا لاء...؟
بدر: ان شاء الله يدي...
وسار بدر الميلس ويوسف حس عمره مرتبك وايد...بس يلس يسولف ويا يده..لين ما ياهم بدر...
بو خليفه: هاه ولدي ؟
بدر: راقد في الميلس الصغير اللي ورا صالة الطعام مال الرياييل هو وسعود خويه...
بو خليفه بضيج: الهرم يتحراني ما بعرف سواد ويهه...
يوسف يرقع الموضوع: يمكن انه يا ولقى الباب مبند..
بو خليفه: انا قافل الباب الساعه ثنتين الا شي..وكل خالاتك رقدن بس ما عليه ان شاء الله انا بشوف لي صرفه ويا هالولد...
ويلس بدر يسولف ويا يده هو ويوسف ويتهم سلمى ويابت الريوق ويلست وياهم وتريقوا..
....................
الساعه 10:00 الصبح الموبايل يدق..ويدق بس محد يرد..يسكت ويرد يدق مره ثانيه...يتحرك من مكانه..وينجلب على الجهه الثانيه..ويعصب فجأة
"شو هالحاله محد يعرف يرقد في هالبيت.."
شل التلفون وتم يتحسسه..واغلقه على طول بدون ما يشوف من اللي يتصل...بس ما حط راسه الا وتلفون الحجره يدق..ونش معصب من مكانه..
شل السماعه وبكل غضب الكون اللي متيمع في نبرة صوته..
حمد: خير في شي ..ما تحسون الساعه 10 الصبح ما تعرفون تخلون الناس ترقد..؟
اليازيه:مب منك يا حمد من اللي تدق لك ..هذا ويهي ان شفت رقمي مره ثانيه..
حمد ارتبك وما عرف ويمع كلامه: يزوي سوري فديتج والله مب راقد عدل تحريته حد مغلط...
اليازيه: وليش منو بيدق لك غيري..؟ محد قريب منك الا انا بتدق لك في الوقت اللي تبى...
حمد وهو تعبان موت يلس على طرف الشبريه: زين غناتي ما شاء الله ناشه من وقت...
اليازيه بدلع: هيه بس حبيت اقولك ان اهلي اليوم سايرين العين..كلهم ومحد بيتم الا انا..
حمد مبتسم: ويعني...؟
اليازيه: حموود بس عاد ما يليق عليك الاستهبال...
حمد يضحك: فديت روحج حبيبتي..زين متى امرج...؟
اليازيه: بسوي لك مس كول يوم اكون جاهزه...
حمد: اوكي ..
اليازيه: عيل حبيبي كمل رقادك و خلاف ارمسك...
حمد وارتاحت نفسيته انه بيبند: زين حياتي الله وياج...
اليازيه: بباي...
وبند عنها حمد وسحب واير التلفون...
" مأذيتني هذي شو تبى..هالبنات محد يسوي لهن سالفه..والله انهن يابن لي المرض متى القى لي وحده افهمها وتفهمني.."
وانسدح بكل برود ورقد يتريا اليازيه الليله..
الساعه 10:30 الصبح يت سلامه بيت يدتها غاليه وكان وياها كم كتاب ودفتر..ودخلت الصاله وشافت شيخه منسدحه جدام التلفزيون وتشوف الفيديو وكانوا حاطين لها (شركة المرعبين المحدوده) ومحد كان في الصاله الا هي....يت سلامه وحطت كتبها على الطاوله وابتسمت بلعانه..وسارت وقفت جدام التلفزيون..وتمت شيخه تلف يمين ويسار عشان تشوف وسلامه تغايضها عشان ما تخليها تشوف التلفزيون...
شيخه: قومي قومي طفثه...
سلامه تضحك: انتي طفسه...
شيخه: ماليد وثعي وثعي..يالله..
سلامه ببرود: مابا اوسع كيفي...
وبندت سلامه التلفزيون..
وصاحت شيخه وتمت تضرب بريولها على الارض..وتصارخ..وتتجلب يمين ويسار..
شيخه: ماليد ماليد...ابى مالد وثوثني..ثلامه طفثه..خاثه..
سلامه تضحك على رمستها: انتي خايسه وطفسه..
يت شرملى بسرعه من الحوي يوم سمعت شيخه تصيح وشافت سلامه وعصبت..
شرملى بعصبيه: شو هدا انتي شو سوي...؟
سلامه: مالج خص..
شرملى وهي تشل شيخه: انتي مافي مخ بنت كبير سوي مشكله ويا بيبي صغير..عوز بالله منج..
سلامه: يالهرمه عوذ بالله منج انتي..يا ويه ابليس..
شرملى وهي معصبه: انا خبر بابا راشد...
سلامه بثقه: خبري..من درا عنج انتي وبابا راشد..
شرملى تمت تتحرطم: بنت مافي ادب..
وشيخه بعدها تصيح وما سكتت وتسحب شعر الخدامه..لين ما هدتها..ويلست على الارض...وتصارخ..
شيخه:مالد وثوثني...اليد مالد وثوثني...
سلامه تصارخ: بس سكتي ابى ادرس....
شرملى: روحي بيتكم شو يريد يقعد هني..
سلامه: بيتج هو يا مسودة الويه..؟
ودخلت ام راشد من باب الصاله لابسه عباتها يايه من بيت جيرانهم...
ام راشد: شو هالحشره اصواتكن واصله باب الشارع..
سلامه: امي غاليه شوفي هالشرملى مالتكم تسبني..
شرملى: كدابه ماما والله هي يضرب شيخه...
سلامه تشهق: يالجذابه ضربتها؟؟
ام راشد: بسم الله منكن.شو مستوي عليكن..؟
شيخه طوف الصاله بتتكسر من حسها وهي تصارخ من الخاطر...وشوي وتيي ليلى على صوتها من فوق...وتنزل مريم وايمان وامل..
ليلى بسرعه رايحه صوب شيخه: حياتي شو فيج حبيبتي ليش تصيحين؟
وشلتها ولوت عليها..وتقبضت فيها شيخه بقو...وتمت تصيح من خاطرها...
شيخه: مالد وثوثني...
ايمان: شو تقول..؟
ليلى: منو مبند التلفزيون عنها...؟
سلامه: شرملى..
ويلست على الكنبه وحطت ريل على ريل..وفتحت كتابها ويلست تلعب بشعرها...
ليلى: شويخ منو مبند عنج الرسوم..؟
شيخه وهي تشهق من كثر ما صاحت وتأشر على سلامه وماده بوزها شبرين: طفثه هذي..
ليلى:سلامه كم مره قلت لج لا تأذينها ما تستحين انتي حاطه راسج براس وحده ياهل ما تفهم شي...
سلامه: ما يخصني هي معليه صوت التلفزيون على الاخير...ما خلتني ادرس...
ليلى بعصبيه: خلصن الحجر ما شي الا الصاله تدرسين فيها..وبعدين من فلاحتج ولا درجاتج اللي تبيض الويه..
كانت ليلى ترمس جدام بنات مبارك وامها...وما حست بعمرها الا وقالت هالكلام...
سلامه نشت من مكانها وهي معصبه ما توقعت عمتها ابد بتقول هالكلام وفرت الكتاب تحت وتمت تطالعها وما نزلت عيونها من عيون ليلى وانترسن عيون سلامه بالدموع حست ان كبرياءها انطعن...وطلعت برا سايره صوب فلتهم على طول...
احترم الكل صمت ليلى..وسحبت مريم خواتها وطلعن فوق...وام راشد يلست حذالها ...حتى شيخه يوم شافت ليلى معصبه سكتت وشرملى طلعت برا الصاله...
كانت ليلى ساكته ما عرفت شو تسوي ولا شو تقول...وفكرت كيف سوت جي وبينها وبين نفسها بصمت..
" حبيبتي يا سلامه فديت روحج والله عورني قلبي بس كل شي ولا شيخه عاد"
ام راشد: بنتي هوني على عمرج هذيل يهال لازم يستوي بينهم جي..
ليلى: عادي امايا ما صار الا كل خير...
ونشت ام راشد سايره صوب حجرتها...
شيخه يلست تطالع ليلى وتنقل نظراتها بينها وبين كل شي في الصاله...يلست ليلى على الكنبه..وسندت راسها وتنهدت من القلب..وشيخه يلست على الارض وتمت ترسم بايدها على الارض وتخربش صور من خيالها..ورفعت راسها تطالع ليلى بس انتبهت انها ما تطالعها ويلست تتحرك تبى تلفت نظر ليلى بأي شي...بس كانت ليلى غرقانه في افكارها...
نشت شيخه من مكانها وحاولت بصعوبه انها تطلع على الكنبه وما قدرت..وتمت تستجدي ليلى بنظراتها انها ترفعها بس ليلى كانت مطنشه وما اهتمت من كثر ما هي ضايجه....
واخيراً..قدرت شيخه تطلع ووقفت على الكنبه..ويلست على ريول ليلى وبكل هدوء لوت عليها وحطت راسها في رقبة ليلى...
شيخه : حبيتي انتي..(حبيبتي انتي)...
وحطت شفايفها على خد ليلى ورصت بقو عليها وحبتها من الخاطر ووسعت عنها شوي..
شيخه بعد ما باست ليلى بقوه: ااححححح ..قوه..(كانت تقصد بوسه قويه)..
ابتسمت ليلى رغم كل الضيج اللي فيها..ولوت على شيخه...وباستها على خدها...
شيخه رفعت راسها بعد ما تأكدت ان عمتها هدت...
شيخه مبتسمه: مالد وثوثني...
ونشت ليلى وشغلت الفيديو..وحطته لها...وسارت عنها...
شيخه: يلثي ثوفي مالد وثوثني...
ليلى: لا غناتي انا بروح انتي شوفي مارد وشوشني لروحج انا برد بعد شوي..
شيخه وهي تسوي عمرها مؤدبه: ذين..
................
نشت حصه الساعه 11:20 وبطلت الباب..وقبل تنزل شافت باب حجرة ذياب مبطل وطلت براسها وشافت بطي يالس عدال يوسف ويرمسون بصوت واطي..وبدر عندهم بس بعيد شوي يالس على الكمبيوتر...ودخلت..ونشوا يسلمون عليها لانهم ما شافوها من يوم وصلوا..
حصه: شو تسوون هني ليش ما تنزلون..؟
بطي بتردد: ماريد انزل...
يوسف: محد في الصاله الاحريم وبنات..
بدر بعد ما رد للكمبيوتر ومعطنهم ظهره: ما يبون يشوفون امايه مسودين الويه..
حصه مبتسمه: ليش شو مسويين..؟
تنهد يوسف من قهره من اخوه بدر الملسون...
بطي: خالوه..بخبرج شي عن خالي حمد...
انتفضت حصه وحست شي بجسمها ..وشعرها كله وقف...
يوسف: ريال خربان..
حصه ما ردت بس مبطله عيونها وبينها وبين نفسها" يعني محد الا انا تقولون لي هالرمسه"
وخبرها بطي كل السالفه...
حصه بضيج: زين يوم انزل برمس شموس انا... خلكم عادي...طنشوا حمد ولد عمي دومه جي ما يداني حد..
وطلعت حصه من الحجره وهي متضيجه..ونزلت تحت وشافت ميره يالسه ويا سمر...حصه اول ما شافت سمر ابتسمت ابتسامه خبيثه...واول ما شافت سمر حصه طالعتها بنظره حاده...
حصه مبتسمه: يمدحونهم اللاجئين من حجره لحجره...
سلمى: شف عوذ بالله منج...ليش تتحرشين فيها وهي ساكته..؟
حصه:متفيجه ما عندي شغله...
سمر ساكته ما تقدر ترمس بعدها ما نست هزبة ابوها البارحه...
حصه: تريقتوا؟
سلمى: انا تريقت ويا ابويه وبطاي ويوسف وبدر...بس الباقين مادري..
حصه: وين شموس ونوره وبدريه؟
سلمى: بدريه بعدها راقده ونوره وشمسه مسيرات على خالتي فاطمه ما تروم تيي تسلم على شموس فيها روماتيزم وقالت امي نحن بنسير لها...
حصه: زين خلاص انا ابى اتريق..
سلمى تأشر على المطبخ : هناك الدرب سيري تدلينه بيتكم ما يحتاي...
حصه: سمر..
سمر رفعت راسها وتمت تطالعها بغضب:شو تبين.؟
حصه: دخيلج روحي قولي حق جينا تسوي لي ريوق ما فيني اسير لين هناك...
سمر: ماريد..
حصه: حرام سمر اول مره اطلب منج شي...
سمر: ليش طردتيني امس..ابويه هزبني في الليل..
حصه وهي تبى تمسك عمرها لا تضحك: خلاص حقج علي والله باجر بييب لج شي حلو وياي من الدوام..
سمر متأففه بعد ما لعبت حصه بعقلها شوي: زين بسير يالله ميره نروح...
وطلعن..
سلمى: يا ويلج من الله شو تسوين فيها..؟
حصه: كيفي محد عندي افرغ شحنات غضبي فيه الا هي...
سلمى: ما عليه يايينج الدور..
حصه: من منو...؟
سلمى: ما في شي يصعب على الله..
سكتت حصه ويلست على الكنبه وبطلت شعرها القصير الاسود وطاح على كتوفها وتمت تحرك راسها يمين ويسار بدلع...
حصه: سلامي حلوه انا؟
سلمى: مب اكثر عني..
حصه: زين حلوه ولا لاء؟
سلمى: يعني مب وايد...
حصه: عادي اتقبل غيرتج القاتله ما لومج...
تضحك سلمى...وتدخل ام خليفه ونوره وشمسه....وسلمن ويلسن...
شمسه وهي تيلس على الكنبه: اااخ يا ريولي والله تكسرن...
نوره: اااه يا عظامي والله بغيت اموت...قلت لج امايه بنسير بسياره بس الله يهداج ما طعتي..
ام خليفه: شو من حرمات انتن..العيازه في عظامكن ما فيكن شده تسون شي...مشيتن خطوتين وهلكتن عيل لا قلت لكن بنسير نمشي في الفريج بالليل شو بتسون..؟
شمسه: امايا انا كبرت عوده خلاص عيزت ما تحمل أي مجهود...
نوره: لا لا انا ما عيزت بس تعبانه هاليومين...
سلمى:الحين تبن سياره لين بيت خالوه فاطمه..؟ من بعده هو؟
شمسه: ما تشوفين ريولي والله بغن يتفطرن من التعب...
ودق تلفون حصه وقامت من عندهن وسارت الحديقه ويسلت ترمس...
حصه: هلا والله شو هالصباح المنور...من وين الشمس طالعه اليوم.؟
ليلى: فديت روحج من مكانها اللي كل يوم...
حصه: شحالج اليوم.؟
ليلى: بخير وانتي شو النفسيه اليوم ان شاء الله احسن..؟
حصه: حد يسمع هالحس ويتعب مستحيل...
ليلى: اقولج باي..
حصه: لا لا تعالي وين تبين مب الحين تنتحرين..
ليلى: خلاص حفظتي المنهج...؟
حصه: اكيد ما يبا له شي..حتى حمدوه قامت تطبق عملي...
ليلى مبتسمه:ولهت على ناصر...
حصه مبتسمه: يا ربييه على هالناصر اللي قالب لج الحياة فوق تحت...
ليلى: شسوي الله بلاني في حبه..
حصه: باجر بتشوفينه...
ليلى: وايد مستعيله ما داني هالويكند...
حصه: ما يستاهل محبتج..ما يسوي أي خطوات ايجابيه...
ليلى: ما طلبت رايج..يعني هو بكيفي احب ولا ما احب..
حصه: محد يروم لج ...شو سويتي اليوم؟؟
ليلى: حصه ابى اقول لج شي..
حصه: قولي فديتج...
ليلى: اليوم زعلت سلامي وجرحتها جدام بنات مبارك...
حصه ببرود: وخير يا طير..ياما هزبنا حمدوه وعفاري ولا سمر اختي في وجه المدفع اربع وعشرين ساعه...
ليلى: انا مب متعوده ازعل حد من عيال اخواني...
حصه: برايها هي بترضى وبعدين سلامي ويهها لوح ما تحس روحها ولاديه وتستاهل اللي ييها..
ليلى: حرام عليج والله انها ملكة جمال شو تقولين واحساس وانوثه بس شخصيتها وايد قويه...
حصه: زين برايها اذا ما رضت راضيها...عطيني شواخي برمسها...
ليلى: تشوف التلفزيون...
حصه: ازقريها...
وزقرت ليلى شيخه ويت تركض للتلفون...
شيخه: الوه...
حصه: ياااااااااي فديت حسج يا عمري...
شيخه: ........
حصه: شواخي..
شيخه:هاه..
حصه: تحبيني..؟
شيخه:لاء...
حصه: افا يا دبه...زين شو تشوفين في التلفزيون....
شيخه بفرح وتزاعج بصوت عالي: تأااالي ثوفي مالد وثوثني...
حصه تضحك: فديت روحج....
وخذت ليلى التلفون وسارت شيخه...
ليلى: شبعتي..؟
حصه:فديت روحها والله خبلت بي...عطيني اياها ليلوه..
ليلى: هاللي ناقص انتي حد يعطيج يهال عشان تجتلينها يا متوحشه...
حصه: حرام عليج ....ما حبج..
ليلى: احسن...
حصه: وشو بعد...يالله متى بيي باجر ابى اداوم...
ليلى: مادري بس حصوه ابى دفاتري ومذكراتي من عندج...
حصه: بالمشمش ...يوم تردين صوري مال الابتدائيه بردهن لج...
ليلى: يا هالصور..ما بردهن..عندج صور مثلهن حق شو تبين مالي انا...؟
حصه: كيفي مااداني شكلي يوم كنت في الابتدائيه واريد اقضي على كل الصور..
ليلى تضحك: اوكي بعطيج الصور وقطعيهن بس كيف بتقطعين باقي الصور اللي عند البنات...؟
حصه: مابا كيفي خلها عندهن اهم شي انتي ما ريدها عندج..
ليلى: عيل موتي والله ما تاخذينهن...
حصه: سخيفه..
ليلى: طالعه عليج..
حصه: زين ابى صور شواخي..
ليلى: اوكي بصورها وبعطيج..
حصه مبتسمه: فديتج والله..زين يا ويهج بسير لخواتي فضيحه يالسات لرواحهن وبيسيرن اليوم بيلس عندهن شوي خصوصا اخت نوره محد بيشوفها لين عقب رمضان..
ليلى تضحك: اوكي غناتي الله وياج..سلمي عليهن..
حصه:يبلغ فديتج..
................
الساعه12:00 سلامه في حجرتها شابه ضو ومعصبه وفيها قهر ما عرفت شو تسوي وفتحت الكبت وطلعت كل ملابسها وعقتهن على الارض..وخربت كل شي وطيرت الاوراق على الارض وعقت كتبها من فوق المكتب ولوت على مخدتها وصاحت..ما عرفت من قهرها شو تسوي ..ليش عمتها رمستها جي جدام بنات عمها مبارك وهي ما تدانيهن مول؟ ..كيف تجرح احساسها عشان ياهل صغيره ما تفهم شي..؟كيف تسمح عمتها لنفسها تخلي مريم والباقين يسكتون من الفشله يوم جي رمستها؟ زين هي مب شاطره وتدري بهالشي ليش عمتها تعايرها وتغايضها فيه؟
لاول مره سلامه تتقبل شي بحساسيه وطول عمرها قويه وما ترضى الا وترد الا يوم تكون ليلى في السالفه تسكت تستكثر منها كل شي مب متعوده منها غير البزا والحب الزايد...
وهناك في فلة ناصر ابو راشد...ليلى يالسه في الصاله وعقب ما بندت من عند حصه...سارت وشلت شيخه وبندت التلفزيون...
شيخه وليلى شالتنها: وين نلوح؟
ليلى وهي تحاول تغير الموضوع: بنلعب...
شيخه بفرح:عند وحث؟
ليلى:لاء ..
وبينها وبين نفسها" الله يعيني على حشرتج الحين لو تدرين وين بنروح؟؟"
وطلعت ليلى فوق ودخلت حجرتها ويلست شيخه على الشبريه وكانت شيخه تسمع صوت شي مشوش في الحجره وسارت صوب الحمام..وشافت الماي مفتوح في البانيو وينترس ماي...وردت بسرعه وشكلها متغير..
شيخه: ماي ماي من ثوي تش...؟
ليلى وهي تفتح كبت شيخه وتطلع لها لبس: خليه بنروح نتسبح..
هني الصاعقه حلت على راس شيخه اللي عرفت انها بتسوي الشي اللي ما تطيقه وشردت في الحجره وتمت تصيح ..
شيخه: ماليد اثبح ماليد..
ودخلت في كبت ليلى ونها بتنخش..وهي تصيح...
ليلى وهي تضحك: الحين محد قالج شي..اندسي في الكبت ومحد بيشوفج بس ليش تصيحين داخل ؟ جني ما بعرف انج هني..؟
فتحت شيخه الكبت ونظراتها تستجدي ليلى:مابا مابا...
ويت لها ليلى وشلتها وهي تمت تصيح وعرفت ليلى انها بتبدا مناحه يديده فيلستها على الشبريه قبل تشل ملابسها..
ليلى: ليش حياتي الماي حلو ليش تخافين؟
شيخه وهي تلوي على ليلى بقوه: ماليد ماليد ثبح...
ليلى: زين شواخي انتي حلوه وشعرج حلو وويهج حلو شوفي هالثوب اليديد انا اشتريته حقج..حلو حياتي...
ويلست ليلى تأشر على ثوب شيخه اللي هي لابستنه: شوفي هذا يع مب حلو وريحته مب حلوه..يالله عشان سلامي ما تضحك عليج بنروح نتسبح ونلبس ثياب حلوه وبنروح عند الوحث...
شيخه اللي سكتت: بنلوح عند وحث..؟
ليلى مبتسمه: هيه بنلوح عند وحث....
شيخه: انتي مالوحين..؟
ليلى: بلى بروح وياج..يالله حبيبتي تعالي بشل ثيابج عشان اسبحج...
وشلت ليلى ثيابها وودتها البانيو ويلستها فيه ويوم صبت الماي على راسها ...
شيخه بخوف: ما ثوي ثابون...؟
ليلى: لا حياتي ما بسوي صابون انتي بس يلسي...
وسبحتها عقب طلعتها ويابت لها عيش ابيض وروب واكلتها وعلى طول رقدتها....وصلت صلاة الظهر..وصكت الباب ونزلت تحت....
..........
حمدان لبس هو عمر وعمهم مبارك وساروا الحوش يشغل مبارك الموتر وشاف راشد ياي من بعيد...
مبارك: يالله يا بو حمدان اتأخرنا...
راشد: ياي انا خلاص..
وركبوا الموتر وساروا المسيد عشان يلحقون على صلاة الجمعه....
وفي البيت كانت خلود هي وشمسه اللي يسون الغدا وما خلن البشاكير يدقن شي...وام راشد سارت تصلي الظهر..محد تم الا ليلى هي و بنات مبارك اللي يالسات في الصاله يشوفن التلفزيون....
مريم: عمتي انا بسير اصلي في حجرتج...
امل: وانا...
ليلى: زين بس تحملن تنش شيخه توني رقدتها....
مريم: ان شاء الله عمووه..
ايمان: انا ابى شيلة صلاه نظيفه..
ليلى وهي تطالعها بطرف عينها: وليش اخت ايمان حد قالج ان نحن نصلي في شيل نجسه لا سمح الله...
ضحكت مريم وطلعت فوق هي وامل..
ايمان: ما قلت بس ابى شي نظيف..
ليلى: المشكله انج راده دبي اليوم ولا جان عرفت كيف تشوفين الشيل النظيفه...سيري حجرة عويش ورا الباب شيل الصاله تنقي انظف وحده والبسيها...
ايمان: زين
وسارت عنها وليلى طلعت سايره صوب فلة راشد وشلت كتب سلامه اللي خلتها في البيت...اول ما دخلت لقت البيت مظلم وشغلت الليتات وكانت ريحة البيت تجنن...
" ما شاء الله عليج يا حرمة اخويه كامله في كل شي بس عيبج هالعيال ما تنشدين عنهم"...
طلعت فوق ومرت الصاله وشافت حجرة حمدان مبطله ودقت ودخلت بس محد كان فيها وعرفت انه راح يصلي..طلعت وسارت حجرة سلامه وعرفت اكيد انها مبنده...بس يوم جربت تفتح الباب تبطل وكانت الحجره مثلجه ...بس مزبله من الاغراض اللي فيها..وشافت ليلى شكل الحجره وانصدمت مهما كان سلامه نظيفه ومرتبه عمرها ما سوت جي...
ليلى في خاطرها"الظاهر انها فرغت غضبها في اغراضها"
سارت ويلست على الشبريه وشلت لحافها وكانت سلامه شبه غافيه...ونشت اول ما سحبت عمتها اللحاف...
ليلى مبتسمه وبكل حنان: حبيبتي...
سلامه اول ما شافتها صدت وردت تتلحف...
ليلى قلبها عورها: سلامي غناتي...
وشلت اللحاف وحبتها على خدها...هني سلامه ما قدرت تتحمل ويلست تصيح...وليلى حست عمرها ميته ما قدرت تتحمل...تشوف شيخه وعيال اخوها راشد كل شي بحياتها ولا تحب حد يهزهم ابد..وقوتهم وثقتهم في انفسهم كلها مستمدينها منها...ومن طريقة تعاملها معاهم...
ليلى: سلامي ما اباج تحطين راسج براس شيخه..تعرفين انها ما تهون علي..واني بزعل حتى امايا عشانها...
وانا اسفه على اللي قلته بس صدج كنت معصبه من خاطري...قومي غناتي والله ما تهونين علي فديت روحج..والله اذا ما نشيتي ما برد البيت برقد هني...
ما نشت سلامه وكانت متضيجه صدق...عقب قامت ليلى تعدل الحجره وترتب اوراقها وملفاتها وتدخل الملابس في الكبت..وفي هالوقت سلامه سارت الحمام وغسلت ويهها...ويلست تطالع كتابها...ويت ليلى ويلست عدالها على الشبريه ولوت عليها...
ليلى: سلامي سوري بس عاد ما يسوى عليج..اول مره نزعل من بعض..
سلامه: مب زعلانه بس قهرتني نظرات مريم وخواتها...
ليلى: ما عليج منهم شو يسوون فيج..انتي محد يروم يوصل لج...
ابتسمت سلامه...ولوت على عمتها...
سلامه: عمتي حبيبتي والله صدج خفت اني ما رمسج مول..
ليلى وهي تمسح على شعرها: بكفيج هو..؟ اذا تستغنين عني انا مالي غنى عنج...بعدين منو بيتدلع علي..؟
سلامه وهي بعدها في حضنها: شيخه الخايسه..
ليلى: تحطين عقلج بعقل يتيمه..
سلامه سكتت وردت ترمس : مبزايه وايد...
ليلى تضحك: مشكله اللي ما يشوفون عمارهم...
ويلست تسولف لها سلامه وتخبرها عن المدرسه وليلى يلست تراجع لها دروسها وتحل واجباتها وياها...لين ما وصل حمدان وغير ثيابه ..ومر عليهن...
حمدان: عمتي هني ولا تمر علي والله زعلت...
ليلى: لحوول شو فيكم اليوم..جنه يوم الزعل العالمي...
حمدان: زين يالمبزايه قومي
سلامه وهي حاطه راسها على ريول ليلى: مابا كيفي...
ليلى مبتسمه: وين راشد.؟
حمدان :دخل يغير يالله بنسير بيت امي غاليه اكيد حطوا الغدا...
ليلى: يالله سلامي فديتج..
ونشت ليلى وسلامه وسارن مع حمدان بيت ام راشد...
................
الساعه 1:30 حطوا الغدا في بيت مبارك بو خليفه...ويلسوا الكل يعني عيال مبارك كلهم الاولاد والبنات وحريم العيال وكانت لمه ولا اروع...
وكانت عفرا وبدريه يحطن الاكل على السفره...ويوم خلصن سارت عفرا داخل المطبخ بتييب شي.. وبدريه يلست عدال عبدالله..
عبدالله يهمس لبدريه: فديت ايدينج اللي يابن هالاكل..
بدريه مستحيه: مسود الويه نحن مب لرواحنا...
عبدالله يهمس: زين حبيبتي كيفي ادلعها شو اللي حارنهم..؟
بدريه: حرام لازم نراعي مشاعر ناس..
عبدالله قبل يضحك: وحليلها سلامي اختي بتنفجر من حامد..
بدريه:هيه والله...
سلمى وهي تطالع بدريه ومبتسمه مع انها ما سمعت شي: بدريه حبيبتي كلي قبل يبرد الاكل ولاحقه على ريلج..
عبدالله ما قدر يمسك عمره وانفجر ضحك: ما قلت لج يا بدور والله انها ساس البلى..مب سهله يالسه تسمع وتراقب...
سلمى: يا سلام يعني حشيتوا فيني...
وتموا يسولفون بس لاحظوا ان خليفه ما كان ياكل...
ام خليفه: ولدي خليفه بلاك ما تاكل...؟
خليفه: ما يهنى لي اكل بدون عفاري بنتي..
حمده: احم احم...
ويت عفرا...
خليفه يوسع لها شوي:عفاري تعالي عند ابوج يا حبيبته...
عفاري ابتسمت لابوها: علني افدا روحك...
ويلست حذاله...
حمده: والله يمدحونهم بنات البطه السودا وايد سمعت عنهن...
يضحكون...بس محد انتبه ان بو خليفه متضيج ومعصب..وشمسه مب في المود العدل...وكانوا مشغولين بالسوالف...
كان سعود طول الوقت يطالع عفرا..بس ما سوت له سالفه وكانت كل ما رفعت راسها شافت عينه في عينها ..وكانت تلف عنه بكل برود..ويوم شافته مصخها وكل شوي يطالع..عطته نظره من الخاطر خلته ينزل راسه...
سلمى: ولهت على دبي..
بدريه ضحكت..
عبدالله: يمدحونها الشرده انصاص الليالي..
سلمى : اسكت الله يخليك..
ساره تطالع بدريه وتبتسم...
حمده: اقول تعرفون ان باقي على الامتحانات النهائيه شهر و اسبوعين...
حصه مبتسمه: لا تنسين الكريمه فوق الكيك..
حمده تضحك: ودج اني ارسب حلمكم كلكم..
عبدالله: ودي افهم كيف هالبنت ترسب طول السنه وتنجح اخرها...
نوره: اخوي خليفه ليكون بس عندك واسطه بالوزاره..
خليفه: لو عندي جان خليتها شرات اختها اولى على المنطقه..
حمده: هذا سر المهنه..اصلا انا اشطر عن عفاري بس ما ريد ابين عشان ما يحشروني اغششهم ولا حد يصكني بعين واخلي شغلي المبهر للامتحان النهائي..
يضحكون كلهم عليها..وينفتح باب الصاله ويدخل بدر ويوسف وبطي وخالهم ذياب...
ذياب: السلام عليكم..
كلهم ردوا السلام وابوه خزه بنظره...
ويلسوا يتغدون وبطي يلس يطالع امه اللي في نظرتها الف سؤال وسؤال...
بو خليفه: مسود الويه عقب الغدا تعال حجرتي اباك..
ذياب يستهبل: عبدالله سمعت ابويه شو قال...
عبدالله يطالعه باستغراب: ابويه انا..؟؟
بو خليفه:عارف نفسه..ذياب ودر الشغل الماصخ وين المريله..عنبوك عمرك 20 سنه وبدر اعقل عنك...
يوسف يهمس لبدر: شف يدي يالس يشبه خالي ذياب فيك يعني انت خبل ويقولون انك اللي ما عليك لوم وانك ...
بدر بصوت عالي: يدي انا خبل...؟؟
بو خليفه طالعه: لا ولدي ودي ذياب يستوي شراتك انت ريال وريال عود بعد..وين ييك الخبال..
بدر: يوسف قال...
شمسه طالعت عيالها بنظره غريبه وفي نفسها
" ابويه الحين معصب وانا ناقصه خبال عيالي"
شمسه: بدر ويوسف تغدوا واسكتوا..
وطالعت بطي بنظره...ونزل راسه وكمل غداه..
سمر: ابويه ..
ما رد بو خليفه...ونش من على الغدا وسار حجرته ...
حصه بهمس تضحك: يا سلام على القفطه اللي تشد الويه...
سمر بضيج: خايسه والله...امايه شوفيها...
ام خليفه: بس يا حصه خلي اختج تتغدا..
حصه: شو امايه انا ساكته ما قلت شي هي تفج حرتها فيني عشان ابوي مب مسوي لها سالفه....
سلمى ترمس ذياب: مسود الويه انت من يوم تدش نحن ما نشوف خير..
خليفه: وين راقد البارحه..؟
عبدالله: والله لولا ان امي يالسه جان بالعقال في ظهرك..ابوي روحه تعبان وانت ما يحتاي تغط الراس في التراب..
ذياب نش من مكانه قبل يذوق لقمه وحده وطير صحنه على السفره: اشبعوا بغداكم..
وسار فوق...
ام خليفه: حرام عليكم ما ذاق شي الولد...
خليفه بعصبيه: والله يا امايه لولا حشمتج جان كسرت راسه..
نوره: هالاسلوب بيدمره اكثر وبيخليه يعاند اكثر...
نشت شمسه وعيالها وبناتها وقالت لهم يجهزون اغراضهم عشان ابوهم بيي عقب المغرب ياخذهم...
ونشت نوره عقبها وسلمى وخليفه وساره وبناتها وردوا فلتهم...وام خليفه سارت عند ريلها..وبدريه يلست تساعد الباقين وشلت وياهم السفره هي وحصه ...وسمر سارت حجرتهم..
كان الجو متكهرب في البيت عقب ما دش ذياب اللي مسبب لابوه ازمه..لا يداوم ولا راضي يشتغل وكل اللي في باله ذهب ادراج الرياح عقب ما وصلته نتايج القبول في كلية خليفه بن زايد الجويه..وطبعا ما انقبل ..ومن هاك اليوم والولد منحرف واللي براسه يسويه...وهالشي مسبب لابوه ازمه لانه صدق مب عارف كيف يحكم سيطرته على ذياب ابدا....
..................
في الحجره...يلست سمر على المكتب وفتحت كتابها ويلست تقرا وتراجع دروسها حق باجر..ودخلت حصه الغرفه وانسدحت...ما تعرف شو تسوي..عقب نشت وبطلت الكمبيوتر...ويلست تتسمع اغاني وتتصفح المواقع...
سمر بدت تحل واجباتها ويوم خلصت فتحت كتاب العربي تبى تسمع لعمرها كم شي عشان عندها تسميع باجر...
وبدت تسمع بصوت عالي...
حصه طفرانه وتباها من الله..
حصه: ممكن تقصرين حسج..؟
سمر: عندي تسميع باجر شو اسوي ما احفظ عشانج..؟
حصه: زين طلعي برا ابى اشتغل مب متفيجه لويهج...
سمر: انا ييت قبل..
حصه: اوكي يلسي بس اسكتي..
سمر: ماريد لازم اسمع لروحي..
حصه: ان شاء الله ترسبين...
سمر: ان شاء الله تدعمين باجر..
حصه ونشت من مكانها وسمر شردت تبى تبطل الباب تشرد بس حصه كانت قافلتنه اول ما دخلت بالمفتاح...
سمر وهي تترجاها: خلاص والله اسفه ان شاء الله عبود ولد ييرانا ولا انتي..
حصه وهي تيودها من كتفها : ليش شو ذنبه عبود.؟ ان شاء الله انتي ولا هو...
وفرتها حصه بعيد وعقت كتبها في الممر...وصكت الباب..بس سمر تمت في الحجره..
انسدحت سمر في الحجره عناد علىشبريتها...
سمر: عادي بس ما بطلع...
حصه كانت محترقه ومب عارفه كيف تقتل سمر من القهر...وحطت اغنيه سمر تكرهها وهي اغنية علي عبد الستار "نظرة عينه"...
سمر عشان تقهرها اكثر: الله حصووه علي الصوت وايد احبها..
حصه ونشت مره ثانيه من مكانها وصارخت في ويهها: طلعي برا يا سمر لا تقهريني...
سمر: شو فيج اريد ادرس حشى جني حرمة ابوج مسويه فيني كل هذا...
حصه: زين طلعي يالله..
ونشت سمر من مكانها وشلت كم كتاب وياها وطلعت من الحجره وسارت الصاله اللي فوق عشان تدرس..
...............
الساعه 3:15 كانت ام راشد في الصاله مع شمسه حرمة ولدها مبارك وهم خلاص جاهزين بيروحون...
ام راشد: الله الله بنفسج يا بنتي وبعيالج وريلج..
شمسه متبسمه: ان شاء الله عمتي فديت روحج...
مبارك: يالله تأخرنا...
ليلى: والله يا مبارك يا خوي محد يطلع وقت القايله الا انتوا جان صبرتوا للعصر..
مبارك: لا ليلى لازم نظهر الحين عشان نوصل بدري اليهال وراهم مدارس وانا وراي دوام وكم شغله يبا لي اخلصها في البيت..
شمسه: هيه غناتي والله البيت طلعنا وهو معتفس والبشاكير ما يندرى بهن ينظفن ولا لاء...
قربوا العيال يسلمون على يدتهم ويحبونها على راسها...
ام راشد: الله الله بالمدارس علني فداكم...
مريم: لا توصين يدووه ان شاء الله كل شي بيكون مثل ما تبين...
سلامه كانت يالسه في الصاله...وام حمدان كانت يايه من عند المطبخ...وياييبه شي وياها مغطى عدل...
خلود: شمسه خذي هالكيك لليهال يتسلون فيه في الدرب...توني مسوتنه...
شمسه مستحيه: تسلم ايدج يا ام حمدان ما قصرتي علني فداج والله...
مبارك: مشكوره يا ام حمدان...
مريم سارت تحب عمتها ام حمدان: مشكوره عمتي...
خلود: قليل من قدركم..
يت امل ولوت على ليلى...
امل: عمووتي بتوله على بوظبي...
ليلى: خلصوا المدرسه وتعالوا وبتشبعون منها....
ايمان: لا لا عقب المدرسه نبى نسافر عشان في وايد اشياء بتفوتنا برا لو ما سافرنا...
ليلى وهي تطالعها باستغراب: خاطري اعرف هالبنت طالعه على منو..لا امها ولا ابوها جي..
مبارك: والله محد مطلع لي قرون غيرها....
شمسه: يوم انها مفتهمه بكل شي مب عايبتنكم..
ايمان: مب مشكله امايا الغيره تسوي اكثر عن جذي...
ضحكوا كلهم...وظهروا قوم مبارك رادين دبي...
ويلست ام حمدان مع ام راشد...
سلامه: اففف ما بغوا يسيرون...
خلود بنظره حاده: سلامه عيب..
سلامه بتأفف: زين..
ام راشد: بارك الله فيج يا بنتي والله مادري كيف بيكون هالبيت بلياج...
خلود مبتسمه: افا عليج يا عمتي وين اروح انا هني تامه عندكم وين اروم اصبر بدونج...
ليلى: سلامه وين حمدان؟
سلامه تقلب القنوات: مادري يمكن راقد...
خلود: مريت عليه يوم سرت الفله وكان يدرس...وراشد رقد..
ام راشد: زين بنتي سيري ارقدي من الصبح وانتي في المطبخ...
ليلى: اووه صح تسلم ايدينج حرمة اخوي على هالغدا السنع..
خلود: هني وعافيه..
ونشت بتسير بيتها..
خلود: عمتي اترخص الحين فديتج بسير احط راسي شوي..
ام راشد وهي تنش بصعوبه: يالله فديتج وانا بعد بسير حجرتي..
وتمت ليلى وسلامه...في الصاله
لساعه 4:00حمدان في حجرته يالس يحاول يحل مسألة في الرياضيات ومب عارف كيف...وما عرف شو يسوي..ونش الصاله اللي فوق وشاف امه داخله حجرتها وقفلت الباب بترقد...
شل سماعة التلفون واتصل....
حمدان: السلام عليكم ...
حمده: هلا حمدان وعليكم السلام...
حمدان: شحالج
حمده: بخير شحالك انت...؟
حمدان: حمدووه وين عفرا..؟
حمده: شو تباها...؟
حمدان: شعليج...روحي قولي لها حمدان يباج...
حمده : زين اصبر شوي ودق بعد خمس دقايق ابويه وامي راقدين بفصل التلفون وبشله حجرة عفاري...
حمدان: اوكي...
شلت حمده التلفون ودقت الباب..
عفرا: ادخلي...
حمده مبتسمه بهدوء: عفاري...
عفرا ونزلت نظارتها وهي تقرا في واحد من كتبها وتحل مسائل ومشغوله على الاخر..
عفرا: خير في شي...وليش يايبه التلفون وياج...؟؟…
حمده: ما في شي بس حمدان ولد راشد كان يبغيج مادري في شو وقلت له يصبر شوي...
عفرا بطلت عيونها وعقدت حياتها: شو..؟ شو يبى فيني حمدان...؟؟
حمده وهي تركب واير التلفون: مدري والله...تخبريه يوم يدق...
عفرا نشت من مكانها وسحبت الواير...وابتسمت بثقه...
عفرا: حبيبتي شو يستوي لي حمدان عشان ارمسه..؟ قولي له اذا دق مره ثانيه بعدني ما فصخت الحيا اسولف وياه...
حمده: خيبه شو بيقول لج...؟
عفرا: خلاص انتهى الكلام...
حمده: بس انتي تكلمينه في المدرسه...
عفرا: هناك اللي بينا علاقة زماله ما تتعدى حدود الدراسه وتنتهي بمجرد ما اطلع من سور المدرسه...
حمده: رمسيه بسج عاد عن الخبال يمكن يحتاي شي...
عفرا: يكفي انتي يا اخت حمده...شو تتوقعين امايا بتقول لو تدري انج ترمسينه بالتلفون شرات أي وحده من ربعج...؟
حمده: ما فيها شي صديقي في المدرسه...
عفرا: ما شاء الله ومن متى نرابع الاولاد نحن...حمده انا مالي شغل فيج طلعي بدرس..
حمده: واذا دق...؟
عفرا بثقه: شو اذا دق قولي له اللي قلت لج...قولي له ماريد ارمسه شو بيني وبينه عشان ارمسه خله يحشم عمره اول وقولي لها تقولك عفرا لو دق سعود ولد خالوتي شمسه على سلامي اختك بيكون عادي عنده...؟؟
حمده: زين شمعنى سعود ترمسينه بالتلفون...؟؟
عفرا ارتبكت بس ردت بثقه اكبر: حبيبتي امايا تعرف هالشي وانا بس رمسته مرتين يوم كان يباني افهمه شي في كتاب الmath مال الجامعه وكانت امي عندي في الصاله وانتي سويتيها سالفه..وبعدين سعود ولد خالتي وحمدان ما يستوي لي مول..
حمده: بس امي تقول انه من اهلنا يعني يستوي لنا..
عفرا: قرابه بعيده مب شرات هل البيت...يعني يده يستوي ليدتي وبس ...
حمده طلعت من الحجره وقفلت الباب...وعفرا تنهدت وردت لبست نظارتها ويلست تقرا في كتابها...
وفي الصاله اول ما حطت حمده الواير رن التلفون...
حمده: مرحبا...
حمدان: هلا حمده..
حمده: عفرا راقده...
حمدان: مستحيل علينا باجر امتحان math وعفرا ترقد لا يمكن...على العموم قولي لها بس كنت اباها تفهمني شي ومب لازم الحين الف طريقه للجذب يا اخت حمده...وما فيها شي لو قلتي الصدق..
حمده مستحيه: شو تقول انت...؟؟
حمدان: اللي سمعتيه ..يالله باي وراي دراسه..
حمده مستغربه: باي
...........
الساعه 5:30 العصر نش حمد وسار سبح وتلبس وفتح تلفونه..وعلى طول وصلنه اكثر عن 16 مسج.. وقبل يفتح المسج الاول رن تلفونه...وابتسم..
سالم: وينك ياخي من ساعتين وتلفونك مغلق..
حمد: انا غالقنه من الصبح..الحين بييكم...
سالم: انت في البيت ولا الشقه..؟
حمد: الشقه ...بس بييكم انتوا وين.؟
سالم: في هافانا كافيه...
حمد: خسكم الله اوكي ياي الحين..
سالم: وليش تسب..
حمد: كيفي شيخ يالله مع السلامه..
وبند عنه سالم...ويلس حمد يطالع مسجاته وعقب تسفر وطلع..وهو يشغل السياره تذكر اليازيه وشاف الساعه..
"اووه بعده وقت لين الليل..."
ودخل الشريط وحط محمد عبده "اعترفلك.."
وفي الدرب رن تلفونه ..
"لا حوول نحن ما بنخلص من هالتلفونات..؟؟"..
حمد: الووه..
بدريه: هلا حمود..
حمد: هلا الغاليه..شحالج...
بدريه: بخير والله شحالك انت...؟
حمد : الحمد لله..هذا موبايلج؟
بدريه: هيه..ما وصيك عاد في المسجات...
حمد: وشو الداعي للموبايل من بيتصل بج..ريلج لو يباج يدق على البيت..
بدريه : الله يهديك ما تبطل طبايعك ابد..انا من متى معرسه وانتهى شورك علي الا اذا مسويه شي غلط..بس الحمد لله ريلي راضي علي..
حمد: بس التلفون ماله داعي..شو تبين بالمشاكل..؟
بدريه: وليش حد قالك اني متعرفه على شباب ..؟
حمد: هاللي ناقص..يعني نترياه يصير..وعقب نمنع التلفون...
بدريه: حمد استح على ويهك على العموم برايك انا بخليك...الله وياك..
حمد: ونج زعلتي..؟
بدريه: برايك انا بس بغيت اسألك ليش اهلي ما يردون علي..؟
حمد: يمكن حد ساحب الواير...شو تبين بهم.؟
بدريه: بسير عند امايا يومين..
حمد: اخيرا وافق ريلج يستغني عنج يومين..
بدريه بضيق: مع السلامه حمد...
حمد يضحك: باي الغاليه..
كان حمد نذل لابعد الحدود وما يحشم صغير ولا كبير..ويتم يجرح في الناس ومحد متحملنه غير بدريه اخته اللي ما يقصر فيها ويسمعها من كلامه اللي يسم البدن...بس هي تطنش وتعرف ان حمد ملسون بس قلبه طيب...
............
عقب المغرب كانت ام راشد في حجرتها تصلي ودخلت عندها سلامه وانسدحت على شبريتها لين ما تخلص..وعقب ما سلمت ام راشد..
ام راشد: بنتي سلامه...صليتي..؟
سلامه وهي منسدحه: لاء...
ام راشد: ليش يا بنتي قومي صلي قبل تفوتج الصلاه وتعرفين صلاة المغرب وقتها قصير...
سلامه: زين يدوه بقولج شي..
ام راشد: ماريد اسمع منج شي قبل تصلين..هكوه الحمام سيري تمسحي وصلي عقب يلسي رمسيني..
ونشت سلامه وتمسحت وام راشد يلست ترتب ثيابها وتحطهن في الكبت..وخلصت سلامه وسارت وانسدحت وحطت راسها على ريول يدتها...
ام راشد: شو هالصلاه يا بنتي..؟
سلامه مستغربه: شو بلاها..؟
ام راشد: ما تعرفين تصلين...متى اخر مره صليتي..؟
سلامه مستحيه: مدري..
ام راشد: خاف انج مصليه من سنه...؟؟لحوول يا بنتي شو من تربيه هذي اللي ما تخلي الاوادم يصلون...تعوذي بالله من ابليس وصلي عشان الله يبارك فيج..
سلامه: ان شاء الله...
ويلست ام راشد تتمسح وتسحي شعرها...
سلامه: يدووه..ابى اقولج شي..
ام راشد: شو بنتي...؟
سلامه: انتي ما تزيغين يوم ترقدين بروحج؟
ام راشد: من شو ازيغ الحمد لله الامان موجود...ما شي نزيغ منه الا رب العالمين...
سلامه: لا يدوه انا اقصد في الظلام..
ام راشد ولا في الظلام بعد..
سلامه: زين ابى ارقد عندج اليوم...
ام راشد: حياج الله بنتي ارقدي في أي وقت..بس انا ما روم للمكيف وما شغله مول هلكني وياب لي المرض في ريولي...
سلامه: عيل كيف تتحملين الجو ايام الصيف..
ام راشد: لي يا الصيف يصير خير بس الحمد لله الجو هاليومين ابدع ما يكون...
سلامه: يدووه..
ام راشد: هاه بنتي..
سلامه: قولي لي كيف مات عمي سيف الله يرحمه...؟
ام راشد تنهدت...وسكتت شوي ..وسرحت شوي بعيد..ولاحت صورة سيف في خيالها..
ام راشد: بنتي سيري لذاك الدرج وهاتي الالبوم اللي فيه بروايج شي..
ونشت سلامه ويابته...وبطلته لها ام راشد..وشافت صور عمها سيف من ايام قبل المدرسه وصورته وهو في الروضه..وصور وايده له وهو في المدرسه..واخر صوره له وهو يدرس كانت ايام الثانويه العامه وهو لابس لبس الجويه..وفي صور له في امريكا ويا ربعه..يوم سار يكمل دراسته..واخر شي صوره وهو خريج وصورته ليلة عرسه..وكانت هذي اخر صوره تصورها وعطاها امه...وشافت سلامه سعاد حرمته...
رفعت سلامه راسها بتتخبرها اذا هذي سعاد وشافت يدتها تمسح دموعها في شيلتها...
سلامه مرتبكه: يدوه ليش تصيحين..؟
ام راشد تتنهد بحرقه: لا يا بنتي ما شي ..عمج سيف الله يرحمه..ما شي منه في الرياييل..الله يرحمه يا سلامه..
سلامه وهي تطالع الصور: الله يرحمه...
كانت صورة سيف تجنن وملامحه جميله ويشبه ليلى وايد..بس شيخه ابد ما كانت تشبه ابوها..كانت نسخه مطبوعه من امها سعاد..اللي نفس الشي كانت حلوة الملامح..ومملوحه بعد...وحتى بياضها ماخذتنه من امها...
سلامه تسأل ويدتها تتكلم وهي محترقه...
سلامه: زين كيف مات..؟
ام راشد حست بشي قبض فوادها...رغم البرود اللي تسألها فيه سلامه..بس ام راشد كانت شابه ضو من داخل..وتحس انها تموت الف مره كلما طروا سيف جدامها..وكانت ما تحب ترمس عنه في أي مكان..بس ما حبت ترد سلامه ولا تبين لها شي...ورمست ام راشد وحسها تغير ومبين انها مخنوقه وهي ترمس...
ام راشد:في رمضان كان ساير يعزي واحد من ربعه في وفاة اخوه ..وكان عمر شيخه 7 شهور..وقالت له سعاد انها بتسير وياه..لان حرمة ربيعه جد يتها كذا مره للبيت..وخلوا شيخه عند ليلى وكانت هاديه ما تصيح ولا تقول شي...
سكتت ام راشد..
سلامه: كملي يدوه..
ام راشد تتنهد وبدا الضيج اكثر على ويهها..تحس بشي يحترق داخلها..ودها تقول لسلامه تسكت بس ما عرفت ليش ما قدرت..تحس هم الكون ياكل روحها...وتحس ان في صدرها حطب كلما رمست سلامه شب ضو اكثر...تحس التنفس صاير اصعب والدنيا ممكن في أي لحظه تاخذ أي انسان تحبه..تذكرت على طول ضحكات سيف وخفة دمه..وكيف كان مالي البيت ضحكات ..وكل شي فيه يذكرها به...حتى لو كوبها اللي تشرب فيه كان سيف مشتري طقم منه..وبعدها للحين محتفظه فيه..ما استوعبت للحين انه توفى..وكانت دوم تستغفر ربها على قلة صبرها..بس ما قدرت تتحمل انها تفقد ضناها وقطعه منها...حتى تعرف ان البيت تغير عقب ما مات..قبل الناس كلها تضحك في وجود سيف ..واليوم البيت مظلم كئيب عقب غيابه...
واللي زاد همها اكثر ان بو راشد لحق بو سيف على طول...وحست بعمرها وحيده رغم وجود عيالها...بس هذي حكمة الله في خلقه...

كملت ام راشد وبدت العبره تخنقها: وعقبها ما ردوا الا اخر الليل ع الساعه 2 ومن العين لين بوظبي وقريب من الوثبه ...البقعه كلها بر ومحد فيها ومادري يا بنتي كيف ما يود عمره وهو يسوق ودعم في اطراف الحديد اللي ع الشارع...واصتكت عليهم السياره..وابطوا فيها محد ياهم ..واختارهم الله يا بنتي..
سلامه نزلت راسها: الله يرحمهم...
ام راشد ابتسمت عشان تقتل حالة الالم اللي في نفسها وكابرت وتمخضت شفاتها عن ابتسامه تجمع هم السنين والم الكون..وفاجعه فقدان اقرب الناس..رسمتها بكل صعوبه وهي تعلن تحدي جديد لمآسي الله يعلم اخرتها...
وبكل حنان الدنيا الممزوج بألم الرحيل : يالله بنتي قومي ادرسي انا ما شفتج يودتي الكتاب من اسبوع..
سلامه تضحك: شو اسبوع يدوه...!! عاد هذي مبالغه عوده...
ام راشد: يالله نشي..
وقبل تطلع سلامه كان باب الحجره يتحرك ومسكة الباب ترتفع وتنزل وحد يحاول يبطله بس مب رايم..
ام راشد: انتي قفلتي الباب بالمفتاح..؟
سلامه: لا والله...
ام راشد: قومي شوفي من عند الباب...
وسارت سلامه واول ما بطلت الباب شافت شيخه وويهها كله رقاد...وفي عيونها نظرة غضب..وخدودها حمرا وشكلها شوي وتنفجر صياح...
تمت تنقل نظراتها في الحجره تدور حد تباه بس ما لقته...
مدت بوزها شبرين وبصوت مخنوق والعبره خانقتنها: وين ماما...؟
سلامه ابتسمت: محد..
ام راشد: تعالي بنتي تعالي شيخه فديتج..وين ليلى عنها..؟
سلامه تمد ايدها : تعالي شواخي..
صاحت شيخه: ماليد وين امي..اليد امي...
وبدت شيخه المناحه وشلت البيت بصياحها وما طاعت تسكت..ونشت لها ام راشد بس ما خلتها تمسكها وتمت تصيح من قلبها..ولا طاعت تسكت..
سلامه متأففه: لا حووول متى بتسكت هذي اذتنا اففف منها صوتها حشره...
ام راشد وهي تلوي على شيخه: بس غناتي فديت روحج..
شيخه وهي تبعد نفسها عن يدتها وتصارخ: اليد امي..امي...
ام راشد متحسره: لا حول ولا قوة الا بالله..من وين اييب لج امج الحين يا بنتي..الله يرحمها..
سلامه منصدمه: يدووه لا تخبرينها حرام هي تتحرى ليلى امها...
ام راشد: وهي اشدراها شو اقول..؟
سلامه: يدووه شو تتحرينها غبيه ما تفهم...؟
ويتها شرملى يايبه لها الحليب..وحاولت تشلها بس ما رضت وسارت عنها شرملى ما قدرت تراضيها....شيخه معصبه ومسكت مرضاعتها..وسارت تيلس عدال طاوله في الصاله وحاضنتنها..وتصيح من قلبها...وتصارخ: اليد امي...
ام راشد: وين ليلى ؟
سلامه: سكتوها حشرتنا...
وسارت شرملى فوق تدور ليلى بس ما لقتها ودخلت حجرتها وليلى طلعت من الحمام وكانت متسبحه...
ليلى: عوذ بالله منج زيغتيني..
شرملى: شيخه صيح يريد انتي...