سالفتج بالغزو ! شنو كنتي تسوين ؟ وشنو سويتي لما سمعتي الخبر ؟؟ تعالوا

[دلوعة ملآكي]

حسبي الله علية . قصص تعور القلب الله يحفظ الخليج

 

[نادين العتيبي]

ما افتكر ولاشي (الله لأي عيدها من ايام علينا وعليكم)

 

[مـ ع ـزوفة حز*ن]

،،،


الله يحفظ الكويت والخليييج ويدووم علينآ نعمة الأمن والأمآن


............

.......


...

 

[ms_kakawa]

آنآ مآكنت وآلده ،
آمي كآن عمرهآ 18 ،
بيت يدتي يم مدرسه عبدالعزيز قآسم حمآده ،
تقول آهم قآعدين سمعو صوت بالمدرسه جنه صوت متفجرآت ،
وآلبيت آللي يمهم كآن تجمع حق آلمقآومه بس خلو نفسهم مآيدرون ،
​

 

[رجااوي]

انا سعوديه م اذكر شي كان عمري سنه ونص

 

[رنين الروح]

وي وي وي امووووووت على هالمواضيع
انا بصراحه ايام الغزو الله لا يعيده يارب ما كنت موجوده
بس اسمع السوالف من امي وعمامي وابوي وخوالي
يقولي ابوي ما كنا ندري ان بيكون غزو ويطلع الصبح وديرتنا محتله
يقول انصدمنا صدمه مابعدها صدمه ومستحيل تصير فينا صدمه مثل الغزو
واخوي العود بوقتها يقول كان سهران يقول على الفجر اسمع طلق ناري بس مادري وين
يقول طلعت والا اشوف دبابه تمشي بالشارع يقول ماتوقعت انها دبابه عراقيه يقول ولد جيرانا يأشر يقولي ادخل يقول انا مافهمته يقول جان يمر من عندي جندي عراقي قلت له انت شتبي وليش ياينا هالحزه جان يقول له عيني يابا احنا نريد نحرركم ونردكم للأصل يقول قلته انت شتقول مافهمتك يقول قالي ان الكويت جزء من العراق ونبي نردها لام يقول جيت بطقه الا حط السلاح على راسي قال لي ادخل داخل لا اثور فيك ودخل اخوي ويا عند امي وقالها وراحت امي قعدت ابوي وقالت له طبعا ايام الغزو كنا كلنا في بيت واحد عمامي كلهم ببيت واحد اللي اهو بيت ابوي العود الله يرحمه فأنتشار الخبر والكل قعد حتى كان عمامي وابوي بالجيش واستدعو عمي وكان توه معرس ماصار له شهر ومرته قعدت تبجي ما تبيه يروح بس راح ومارد الا بعد الغزو المهم عاد امي تقولي قعدنا بهاليوم نبجي وندعي وانقول ان شاء الله يكون حلم مو صج تقول لما وصل لنا استشهاد الشيخ فهد الاحمد تقول قعدنا نصارخ ونبجي وراحت امي عند ابوي تقوله خلنا نطلع قالها ليش خايفه من الموت هذا فهد راح اللي احسن مني ومنج ليش نطلع تقول صارخ عليها ابوي واول مره من تزوجوا يصارخ عليها المهم قعدو اهلي شهر بس وبهالشهر شافو الويل تقول عمتي كان عندنا جيرانا وما كان عندهم ولد كبير ما عندهم الا اربع بنات وولد صغير بالسن يمكن كان عمره ست او سبع سنين تقول دخلو العراقيين ببيتهم وقفلو الباب على امهم وابوهم واعتدو على البنات الاربع ويقولون ابوهم يته سكته قلبيه وتوفى ماقدر يعيش اما ولدهم مايدرون عنه وشنو صار فيه المهم عاد عمتي بعد السالفه هاذي صارخت على عمامي وابوي قالت لهم انتو اكثر ذريتكم بنات خلونا نطلع لا يصير فيهم مثل ماصار بعايلة فلان وابوي وعمي عندو مايبون يطلعون لين ياهم عمي الثاني وتهاوش معاهم ومادري شلون اقنعهم واطلعو حتى اختي العوده تقول لي واحنا طالعين ما قلنا لابوي العود ان الكويت انغزت لان توه قبل اسبوع من الغزو توفى عمي وماقدر يتقبل الصدمه فخافو عليه وماقالوا له الا بعد ما طلعو من الكويت وراح للسعوديه عند جماعتنا اللي انعرفهم وخوال ابوي وخوال امي ماشاء الله عليهم ماقصروا بشي كفوو ووفو المهم بعد ما طلعو من الكويت قالوا لابوي العود ويقول ابوي كنا خايفين انقوله ومانبيه يدري لين يا شايب وقال ليدي وانهار عليهم وقعد يسبهم ويحذف الصخر والتراب عليهم يقول لهم شلون طلعتو وخليتو ديرتكم انتو منتو ريايل شلون طاوعكم قلبكم تطلعون وتخلون الكويت قبر اخوكم فيها وانا مابي اموت بديره مو ديرتي طبعا يقولي عمي الصغير انهم يالله بالغصب سكتوه وماهد الا لما طقوه ابره خصوصا انه منهار بوفاة عمي اللي قبل الغزو وصارت المصيبه عنده مصيبتين وفوق هذا ماقالوا له ان عمي الثاني وابوي راحوا مع الجيش
عاد عمتي تقول لي بعد ماتحررت الكويت بيوم ردينا للديره على اساس ننظف البيت لان بعده بيومين بيرد الكل للديره تحلف تقول والله اول مادخلت البيت تقول كأنه محترق كل شي اسود الارضيه سوده الطوفه سوده هذا كله من النفط اللي حرقه هداموه عساه يحترق بنار جهنم قولوا امييين
المهم تقول قلت يمكن بالتنظيف يروح وتقول وتنظف البيت اهي وعمي وعيال عمامي وماكو فايده اللون اهو اهو ماتغير قال لها عمي خلي الارضيه روحي شوفي الغرف واللي فيه تحلف تقول امشي بالبيت اسمع صدى صوتي اثاري جيرانا العراقات اللي يم بيتنا سرقو وهفو كل شي اخذو الاكو والماكو عاد قالوا مايصير نرد اللحين لان البيت يبيله تنظيف انرد بعدين طبعا بجي الحريم والعيايز والبنات يبون يردون للديره مشتاقين لها وردو للديره بعد التحرير بأسبوعين عاد من مواليد الغزو ولد عمي انولد وكان ناقص كان بالشهر السابع لما ولدت مرة عمي قالها الدكتور اخذو ولدكم لا تحطونه بالمستشفى احتمال كبير انهم يا يذبحونه او يخطفونه عاد عمي اخذه للبيت وامي تقول لما يانا حطيناه بكرتون وغطينا عنه الضوء لانه كان ناقص بس تقول حييل تعبنا معاه حتى لما كنا بنطلع تقول اهو الوحيد اللي تعبنا واخوي وولد عمي تهاوشو مع ضابط عراقي راح الكاولي صك اخوي طراق ويا ولد عمي يعني بيفزع له وامسكوهم اثنينتهم وكفخوهم وراح عمي كلمهم ومادري شلون اقتنعو وطلعوهم تقول اختي لما يونا للبيت اشكالهم تبجي الدم من كل مكان يطلع وولد عمي تكسرت اسنانه اللي جدام وصار ما يعرف يتحجى بس ركب اسنان لما طلعو من الكويت
وخالي بعد يقولي كان من المقاومه يقول مره دخلنا عماره وقالوا اكو فيها عراقيين يقول خالي اول ما رفسنا الباب يحلف يقول شفنا بنات ما عليهم ملابس يعني كما خلقني ربي يقول معتدين عليهم ومعلقينهم ونصهم ميتات والنص الثاني ساكتين بس يقول احس مافيهم عقل يعني انجنو اللحين خالي يمكن عمره بالستينات يحلف يقول مستحيل تنمحي من خيالي صورة هالبنات يقول الميتات غطيناهم واللي عايشه عطيناها ملابس واخذنا ومادري شصار فيها ماقالي خالي
شقول بعد حتى ابوي يحلف يقول لي ان بابا جابر رحمة الله عليه ما قصر معاهم بشي يقول واحنا بالأزمه معاشاتنا تمشي ويقول كل شهر معاشنا نازل وما يتأخر حتى الله يرحمه امير القلوب سو منحه للفنادق اللي بالرياض عشان اي كويتي يدخلها يقعد ببلاش وييه شقول وشحجي عن بابا جابر وربي وربي لو نلف الدنيا كلها ما نحصل واحد يحمل ربع اخلاقه تدرون عاد بنات احمد ربي كل يوم واشكره ان الله سبحانه وتعالى فرح قلب ابونا جابر لما شاف هالجلب طالع من بالعوه ومنذل الحمدلله يارب انك عطيته عمر وخليته يشوف هاللحظه مثل ما نزل دمعته الغاليه خلاه يشوفه مذلول وشعره كله قمل يمال الماحي اللي يمحيه
وانا ما يبط جبدي ويقهرني الا اذا قالوا شهيد حسبي الله عليكم على كل اللي سواه فينا وتقولون شهيد اذا اهو شهيد عيل فهد الاحمد شنو ما اقول غير حشر الله كل محب بمن يحب ويالله عسى كل واحد يحب هالجلب هداموه ويدافع عنه ويترحم عليه تحشره وياه بقبره مو تقولون شهيد حرمت عيشتكم بلا عمى بعينهم بلا
والله اني مقهوره فيني كبت جم سنه بالمنتديات الثانيه حسبي الله عليهم الله لا يوفقهم حر قلوبنا الله يحر قلوبهم
قطيعه هالديره من الله خلقني ما احبها ولا اواطنها اللي شفناه منها مو شويه
ما عندس سوالف اذا تذكرت بقول وازعجكم
تسلمين حبيبتي على الموضوع الحلو
والله يرحم بابا جابر وبابا سعد والشهيد فهد الاحمد وبابا سالم والملك فهد والملك سلطان والشيخ زايد والشيخ عيسى ويحفظ كل حكام الخليج ويحفظ ديرتنا من كل مكروه وعماااااااااااار ياكويت
قلبي خفق ياكويت شلتج بيوفي وطن
انت الوطن بس انت
انت الاصل بس انت
انت الحياه بس انت
ترجع وطن من جديد
غصبن عن الآلام ترجع وطن
من جديد من جديد
وطني وطن النهار انت النهار بس انت ياوطني
​

 

[رنين الروح]

انا انولدتبعد بعد الغزو.
ههههههه
لا والله اذكر لحظه بلحظه. كان ليلة الخميس وباجر عرس رفيجة اختى الكبيره. والكل يسنع بالبدله الي بتلبسه. وشلون بنسوي شعرنا ومتى بنروح للعرس يعني مراهقات. وهذا تفكيرهم وسهرت انا وخواتى نسولف عن كل شي. حتى الصور طلعناهم وكانا نودعهم نضحك علي اشكالنا
كانت ليلة هااااديه سكون
والي اذكره عدل ان اختي الياصغر منىقالت تهقين الغراق يدخلون علينا وانا والله لشدة اعجابي بالطاغيه. بذلك الوقت قلتلها لا مستحيل. ونمنا بامان
لكن قعدنا او فزعنا من النوم ا الساعه اتوقع ٥ الفجر علي صوت طائرتان وكا ن صوتهم عاااااااالي. يعني كانت قومه علي خرعه طلعنابره غرفتنا ولقيت اخوى الى يكبرني بسنه وقال لا ماكو شي بس مناورات لكن اختي شغلت الراديو وكانت الصدمه. واغاني وطنيه. الى الان ماصدقت انالطاغيه يغزو الكويت وجذبت كل. شيئ اشوفه واسمعه وحطيتالمحطه علي العراق. وكان مذيعهم قبحه الله وين ماكان لابس غتره وعقال وشكله مثييير لضحك وقال انامعك يا كويتالاحرار وانا معكم ايهاالابطال فرحت وقلت الحمد الله العراق. معانا مو ضدنا لكن اكمل الذيع وبين كل شي وكذبهم ان فيه ثوار رايحين للعراق عشان يساعدهم لقلب الحكم وبدوايكذبون على انفسهم
وعندما تاكدنا من الخبر هنا انتقلت الى رحمة الله تعالي بالنسبه لى. الوحده العربيه واختفي الدم العربي ودفنت الهويه العربيه والميت لا يعود
تحياالكويت وكل من ساعدنا والباقي الو مزبلة التاريخ

يممممه فديتج اي والله اختفت الوحده العربيه اذا الجار يخون جاره شنو ترجين من الوحده العربيه
اللحين العرب كل واحد همه بطنه والفلوس ييمعها على قلبه
الله يحفظ لنا ديرتنا وما نحتاجهم بشي ربي يحفظنا من كل شر وعين الحسوود فيها عوود ياارب

​

 

[رنين الروح]

السلام عليكم موضوع حلو اني عراقية بس حبيت اشارك بالموضوع انا كان عمري ١٦ سنة وكانت منطقتنة حدودية مع الكويت يعني جيش صدام مرو بمنطقتنة قبل لايدخلون الكويت دبابات وسلاح فهموا الناس انهم عندهم تدريب والناس الي يعطيهم اكل والي يعطيهم مي لان محد مخلي في بالة انهم رايحين يغزون الكويت بعدين صحينة الصبح وفتحنة التلفزيون ونشوف الصدمة اول كلمة ابوي نطقهة الله ينتقم منك صدام فوك ما دمرتنة راح ادمر الكويت بعدين صارت تجمعات بالبيوت وصدام الى اذان بكل مكان والله لو اشوفون شلون يدخلون الفجر وياخذون الحريم والاطفال ويطلعون اغراضهم برة ويحركوهم يعني احنة شفنة ايام مع صدام الله لا يوريهة لاحد وبالنسبة للي يكولون الجنود العراقيين ياكلون الكريم عبالهم كيمر مستحيل لان صدام مدلل جيشة كانو ياكلون اكل ملوك لان فلوس العراقيين بس للجيش وللاسلحة واحنة مو على بالى تدرون مرة طلع بالتلفزيون كال الشايب ما الى لازمة لاتعطونة كمية وسوري لا تزعلون اني شاركت بموظوع خاص فيكم بس اكره صدام واعتقد ٩٠ بالمية من العراقيين مثلي

وي جان زين كل العراقيين مثلج جان احنا بخير
وشهد شاهد من اهله هذا اللي تقولون عنه شهيد مكسف بشعبه وظالمهم
حاكم طاغيه حكمه بعثي يخرب بيته حتى مذهب ماله ماندري شملته هذا
حسبي الله عليه بدنيا واخره وحسبي الله على كل من يدافع عنه
​

 

[gala q8]

gala q8
مشكورة حبيبتي وضحتيلي السالفه @_@ الحين فهمت

فديتج لا شكر ولا شيء حبيبتي ,

:eh_s(7)::eh_s(7)::eh_s(7):

ههههههه مو صج سالفة الجندي الي يبي زقاير هذا داش حرب ولا ديوانيه
اي صح ترى فيه جنود اييون بالغصب
الله لا يرحم صدام ان شاءالله ويعذبه مثل ماذبح اطفال وحريم مساكين ماسووا له شي
غلووي ‏ٱنـَYOUـِتَيٓ نفسي ‏ٲنـًٍM̶̲̥̅̊E̶̲̥̅̊ـًٍـآإٍ مالحقت ع الغزو الصلا امي وقتها كان عمرها عشرين ههع ايام الشباب هع
‏ٱنـَYOUـِتَيٓ امج كانت حامل باخوج وانا خالتي كانت حامل بولد خالتي يعني اخوج وولد خالتي كبر بعض ) هُهُهُهُهُـ( شقال صاحبنا الظريف =D)ـهُهُهُهُ ? العمر كلوو ان شاءالله
بالعكس غلوي ماقرقرتي ولا شي ونسني رددج حيل والله يعافيج حبيبتي تسلمين :eh_s(22):

لووول , إإي الحين بسم الله عليهم كبار خخخخ ,


واحنا بعد كبرنا هع < , باجر نقول لعيالنا سوالف اهلنا ايام الغزوو

الله لا يعووودها هالايااام ياااااااااااارب :yaaaaaarb:

 

[آرنـــــوبه ..]

اسال الله سبحانه ان يحفظ جمييع بلاد المسسلمين يااااااارب ..
وصدام تحت التراب لا تذكروا الميت الا محاسنه ..
والحمدلله ع كل حال .. وربي ماينسى حق احد ..

 

[رنين الروح]

اسال الله سبحانه ان يحفظ جمييع بلاد المسسلمين يااااااارب ..
وصدام تحت التراب لا تذكروا الميت الا محاسنه ..
والحمدلله ع كل حال .. وربي ماينسى حق احد ..

اهو خلا فيها محاسن دوريلي حسنه وحده عشان اذكره حسبي الله عليه من حكم والدم لعبه بأيده حتى شعبه ماسلم منه ماله محاسن اذا انتي تشوفين شي احنا ما نشوفه قوليه انا عن نفسي ما عمري شفت له حسنه تستاهل تنذكر حكمه بعثي ماله مذهب واحد يقول يدي رسول الله وتبينا نذكر له محاسن
عساه للنار اللي تاكل عظامه اكل حسبي الله عليه بدنيا واخره
​

 

[broor_20]

انا مواليد بعد الغزو

بس ما اقول الا حسبي الله ونعم الوكيل فيهم اللي مايخافون ربهم

....
ابوي كان حزتها بالدوام حزتتهاا "عسكري "
وفصخوهم هدومهم وركبوهم باص عاد الباص ماكفى ولا ينزلون ابوي طبعا ابوي يقول لا بركب بركب <يقوم مادري شسالفه خخخخخ
المهم تم اهو وواحد وتمو يمشون من الحدود وواحد شاافهم كان " بدون " ووداهم بالسياره وراحو مادري وين بالضبط المهم راحو خذوا ملابس لان كانوا على الملابس الداخليه ..
وحزتها خالي بالجيش وخالاتي يبجون وحالتهم حاله لان مارد البيت ومايدرون وينه
..
جدي ابو امي .. قال حق ابوي اخذ البنات " خالاتي " وخوالي الاثنين لانهم كانو صغار وامي ووروحوا السعوديه "عندنا اهل اهناك "وانا بتم اهني
وجدي الله يطول بعمره تم بالكويت وكان عنده غنم وكان يوزع على الجيران اكل وحتى بعد التحرير كرمو جدي ..
واذكر ان كان يقولنا ان كان يوقف بالسطح ويقول " الله واكبر " اهو والجيران بس هالحجي مادري متى اثناء الغزو ولا يوم التحرير
وابوي بحرب التحرير ستدعوهـ ورد الكويت وامي تمت بالسعوديه

ومرت خالي تقولي ان كان ولد جيرناهم عمر 19 ماطلع من الكويت اهله طلعوا واهو تم
المهم كان يحذف الجنود وعرفوا البيت
ودشوا البيت واهو انخش بالكبت واحد من الجنود فتح الكبت وشافه وسكر الكبت قال ماكو احد وطلعوا

المهم بعد مارودوا اهله الكويت شافوا الولد فيه ارتجاج بالمخ لان تعذب من العراقيين كانو يطقون راسه
حسبي الله عليهم الله الله لا يوفقهم

وصج اذكر مره كنا بدبي من 3 سنين واخوي كان قاعد ويمه واحد عراقي
طبعا اخوي اول ما عرف انه عراقي لاعت جبده
ولا يقول لعراقي لاخوي : احنا غزيناكم سامحونا ومادري شنو واحنا نحبكم واحنا انجبرناا
يقول اخوي والله كسر خاطري


بس للاسف اشباه صدام موجودين واكبر دليل الاغنيه الخايسه اللي يسبون الكويت فيهاااا
عممممممممىى بعينهم

الله يرحم شهداءنا يارب
ويحفظ الكويت
واللي يترحمون على صدام عسى ربي يحشرهم معاه يارب
​

 

[اماراتيه سنعه]

انا من دبي و من بعد مواليد الغزو
للاسف مااعرف تفاصيل الغزو بس رؤوس اقلام ..

بس اللي اسمعه ان كانو اهل الكويت في منهم موجودين عندنا ودرسو ويانا
اذكر جفت وحده كويتيه الله يذكرها بالخير من 3 اسابيع في تركيا تقولي سالفتها مع الغزو




بس مانقول غير حسبي الله ونعم الوكيل في كل من ظلم عبد من عباده
وعمر الحق مايضيع عند ربنا
بإذن الله مأجورين على مااصابكم


بس الواحد مايحمل الذنب شعب كامل ( الحق ينقال ) يعني هو شخص و فئة منهم كانو وياه والله ياخذ حقكم منهم
بس غلط نكره شعب كامل بسبب تصرفات شخص واحد

يعني نحن المسلمين بعد سالفة 11 سبتمبر يقولون عنا ارهابيين !!!!!!!
هل نحن لنا ايد فالموضوع ؟؟؟ لا !!! بس هم امعممين هالشي ع المسلمين لان شخص واحد غلط غلطة و نسبوها لنا كلنا




شي مؤلم و صدق وايد اتألمنا يوم شفنا المسلسل كنت اقول معقولة لهدرجة !!!!
يعني مافي فرق بين اللي استوى فالكويت واللي يالس يستوي الدول العربية حالياً !!!!!!!!!!



القلب يتألم والعين تدمع ومابيدنا غير ندعي حق اسراكم بالرحمة والمغفرة و ياخذ حقكم من كل ظالم ظلمكم


واسمحولي على الاطالة لان الموضوع صدق مؤثر عليه واكيد انتو كثر ماتشرحون مابتوصلون لنا باللي تحسون فيه

 

[معشوقتي امي]

انا كان عمري 11 سنه واتذكر بعض الاشياء
اول شي كنت اروح مع امي الجمعيه ونوقف بالساعات طابور طويل وملل وطقني وطقج وبس يفتحون الجمعيه وااااااااااااااي تصير فوضه جنه مفاجيع نبي بس ناخذ الاغراض
وفي مره كان في جندي جلب شكله وصخ يوم شاف الزحمه والفوضي جان يعصب علينا وامر جندي ان يرمينا بالرشاش طبعا احنا قمنا نبولع بريجنا والكل وقف ولاهمسه بعدين الله هداه وقال النسوان يظلون والزلم يطلعون من الجمعيه
هالموقف ما انساه بحياتي ؟؟؟؟؟؟؟؟؟؟؟
موقف ثاني كنت نايمه بالغرفه تحت طبعا بالغزو ممنوع ننام فوق لان نخاف من المدافع والله يابنات يومتها كنت نايمه عند الدريشه واسمع صوت المدافع واشوف الدريشه تهتز ونايمه بفراشي وارجف من الخوف
حتي صارت فيني عقده لما اسمع صوت طياره اخاف لغايه اليوم
شفت كل شي مهدم اسواق المباركيه كل شي محترق ومهدم
السما سوده من الدخان يوم احترقت الابار
الشوارع وصخه واخواني يوم يطقون الباب يشقحون من بيت لي بيت
لان كنا نخاف ياخذونهم اسري
هذا اللي اتذكره وحتي ساهر الليل ماشفت ولاحلقه لان اغلبها قصص حب
اي حب اللي عاش بالكويت بالغزو ماكان يفكر بحب ولاغيره
كنا عايشين صج برعب
مايحس بهالشعور غير اللي عاش فيها وصمد
بس الحمدلله رجعت ديرتنا والله الله الله لايعيد الشر
والحمدلله علي كل حال:yaaaaaarb:
وسلامتكم

 

[*وهج*]

اني عمانيه كان عمري 6سنوات كانت الحرب ماثره على اهلينا واجد
خواتي الكبار كانوا دايما احلامهم كوابيس دبابات وطيارات الحرب وبالنهار يخافون من صوت الطياره
وصديقاتي اذا بيطلعون من بيتهم ينزلون راسهم خوفا من القنابل ويجرون بسرعه
واذا تجمعوا الحريم ماعندهم سوالف الا سالفه الحرب
وامي الله يعطيها الصحه والعافيه اذا جيت الاخبار تعلي الصوت حتى الجيران يسمعون

وهذي كله ونحن بعمان مش في الكويت!!!
اللهم احفظ الخليج من كل شر اللهم من اراد بالخليج سوءا رده في كيده ونحره ضعف مايتمناه
الله يديم المحبه والموده بيننا
خليجنا واحد وارضنا واحد

​

 

[Shinexo]

آنآ آممي كآنت توهآ متزوجهه قييمت آبوي قآلت له قوم قوم صدآم دش آلكويت :eh_s(2): آبوي وقتهآ كآن ضآبط وريل خآلتي في آلقوآت آلمسلحه رآح ريل خآلتي آلكوييت وخلى خآلتي توهآ مربي ف بيت يدي , آمي تقوول كآنوآ يعطونآ آسلحه لآن صدآم قآل بيوزع آلخليج لليمن وفلسطيين وآلآردن وله !! كآنوآ خآيفين هآلجآليآت تسوي ثوره عندنآ وصج ! رفيجة آمي كآنت تدرس في مدرسه نموذجيه حقت صبيآن ! كآن عندهآ ولد فلسطيني يتكلم مع آلصبيآن في حصة آحتيآط وهي قآعده يقولهم آبوي يجمع ريآيل وآيد ومعآهم آسلحه :eh_s(2): نآدته تسآله شسآلفه آلولد تم يقولهآ آبوي وربعه ونآس وآيد آيونآ آلبيت ويآهم آسلحه ويقعدون فآلصآله :eh_s(1): ! رفيجة آمي مآسبشرت بخيير رآحت بلغت آلشرطه مآدري آلدآخليه ورآحووآ مسكوه وطلع صج كآنوآ بيسوون آنقلآب ف آلدوله وبيبوقون وحآله وآلله نجآنآ !! حسبي آلله على كل ظآلمم

 

[Ahlam Al]

انا ما لحقت على الغزو ، فـ ما اعرف التفاصيل بالضبط

بس عمامي ، كانوا بالكويت و صامدين لنهاية الغزو مع انه عماني كانوا صغار
و الحمدلله ما صار فيهم شي بس كان الوضع معاناه ، مافي شي ياكلونه الا خبز
و كل شوي تفتيش و انا ابوي اسير ، و كان مسجون في سجن الرمادي بالعراق
و رد مع اول دفعة وصلت مطار عرعر ، و يقول قاعدين و يمنا عظام جثث !!
و تعذيب و قتل جدامنا و ما ناكل الا عدس و خبز جنه طابوقه !!

و خوالي ، اقعدوا اول الايام و ما دروا الا من خالتي تفتح الراديو و تنام عليه
و على الفجر اسمعوا الخبر بالصدفه ، و انصدموا ما صدقوا .. بعدها سمعوا
صوت الطيارات و الدبابات لمن تمر تهز البيت و امي كانت تطل من السطح !!
و بعدين طلعوا للسعوديه لانه اقرب دوله لنا ، و لانه خوالي الكبار مسافرين
دق خالي الكبير قال خل يطلعون من الكويت بسرعه لانه اغلبيتهم حريم
و ما عندهم الا ولد توه بو 18 تقريبا ، فـ راحوا للسعوديه و ما قصروا معاهم .

و اظن اقعدوا بالدمام عقب راحوا للقطيف و امي تقول كانت ايام صعبه بس حلوه
شلون كلنا قلوبنا على بعض و انه الحكومه ما قصرت علينا قامت تصرف علينا
ولا خلت علينا قاصر و بعدها ردوا الكويت و الحمدلله لقوا البيت على حطته ،

و الله يحفظ الكويت و آل صباح و يخليهم لنا
و حسبي الله ونعم الوكيل : )
​

 

[rawabby]

الله يحفظ أهل الكويت و أهل الخليج كلنا يا رب...


آنا بحرينيه من مواليد 86 وكنت صغيرة وايد بس أتذكر صفارات الإنذار و أن في حرب و هاللون .. بس ما كنا ندري شالسالفه بالبحرين لأن كنا يهال .. كبرنا و عرفنا و دعينا عليه و وبعدنا بندعي عليه جليل الحيا ..

ما يقهروني الا اللي يسمون صدامو بطل .. هذا سطل و السطل مكرم عنه .. الحمد لله و الشكر ..

 

[مرمر]

يوم الغزو الله لايرده كنت بالشاليهنا مع ريلي وعندي 3 عيال

المهم الاربعا بليل متاخر في صوت تفجيرات قوية واحنا علي البحر نشوف ليتات قوية قلنا اكيد مناورات درع الجزيرة مع ان اول مرة نحس جذي

الساعة 5 الفجر كان عندنا الموبايلات القديمة الا مايسكت كل من يقول الكويت راحت العراقيين احتلونا

قمنا ركض علي التلفزيون ولا قران كريم وفجاة طلع المذيع يوسف مصطفي والله ماانساه ويعلن ان الكويت احتلت

انا صرت مينونة وركض نركب السيارات نروح الديرة حق اهلنا طبعا طول الطريج نشوف الدبابات متجهه الي السعودية وابجي واقول الله ينصركم

طلعوا الدبابات العراقية قاعدة تتجه للحدود السعودية علشان يحاوطون الكويت

احنا ماطلعنا وظلينا صامدين الي النهاية لله الحمد

وبعد التحرير ظلينا شهرين محد يدخل الكويت الا المصرح لهم او الصامدين يقدرون يطلعون ياخذون اللي يحتاجونة من البحرين والسعودية ويردون

 

[ايمان الغساني]

قريت الموضوع من اول صفحه والدمعه فعيني وادعي عليه هالطاغيه ..
الله يحفظ الكويت والخليج يارب..
ايام الغــزو عمري 5 شهــور وانا من سلطنه عمان ابوي الله يرحمه خبرني انه استقبل فبيتنا عايلات وايد كويتيه ...
وخال ابوي عايش فالكــويت ومارضي يطلع من الكويت