ساعدوني يا بنات هذا أول حمل لي ولا أعرف شي أبد

[عروسة داجه]

السلام عليكم
شلونكم عساكم بخير :d
بصراحة بنات الاسبوع الجاي بدخل شهري الرابع
و انا لي الحين ما تغير شي بنظامي
البنات خوفوني يقولون لازم تمشين على نظام معين عشان تكون صحة الجنين مية بالمية
وأنا الصراحة مادري شسوي

هل عندكم نصايح بخصوص الجسم؟ لاني خايفة جسمي يتغير بعد الولادة خصوصا الخطوط و التشققات
هل صحيح ان الثدي يتفطر و يتقطع ويطلع منه دم وقت الرضاعة <<< ميتة رعب من هالسالفة مادري صج او لا

عندكم نصايح عن الاكل اللي اكله عشان اغذي الجنين
لان اكلي كله دهون و حليب و شوية خضرا


هل صحيح ان الرقبة تصير سمرا اذا المولود كان بنت؟ :d
الله يجزيكم خير من الحين

 

[الريشة]

روحي حق طبيب تغذية و يعطيك نظام غذائي للحامل.
و منو قال لك لازم ينزل دم من الثدي وقت الرضاعة؟؟؟ ماله علاقة.
مو شرط رقبتك تصير سودة اذا كنتي حامل في بنت، أحياناً الولد يخلي الرقبة سودة.

 

[الشوق رجعنا]

لا من قال انه الثدي يتقطع شالخرابيط مو كل الحريم انا الحمد لله رضعت عيالي وعادي وبالنسبة للغذاء اكلي من كل المجموعات الغذائية شكلي يعني مع الفيتامينات اللي تكتبهم لج الدكتورة وبالتوفيق

 

[ديانا سبنسر]

اولا مبروك الحمل >>>>تو الناس

ثاني شي لازم تابعين مع دكتور نسا وولادة ويعطيج المكملات الغذائية والحديد

وبالنسبة للاكل اهم شي اللحوم والفواكه والحليب وابتعدي على قد ماتقدرين عن الوجبات السريعة والحلويات

وموشرط التغيرات اللي تصير بالحريم تصير لج بالظبط يعني موكل الحريم يصير فيها كلف الحمل موكل الحريم يحوشها وحام موكل الحريم تسود رقبتها ترا بعضهن تالف علشان تخرعج وتبينلج انها فاهمة

 

[عروسة داجه]

الله يعطيكم العافية على هالنصايح يا بنات

 

[انجبر قلبي]

انا مثلج بجر
بس الدكتورة عطتني حبوب الفوليك أسيد أول ثلاث شهور من الحمل وقالت ظروري اخذه
و كثري من الفواكه والخضار حتى لو ما تحبينها و اهم شي الكالسيوم يعني حليب ولبن اجبان
و بقدونس فيه كالسيوم انا وايد اكثر منه لاني ما اشرب حليب
وقالت لي اهم الشهور اهي الشهور الثلاث الاولى لان اهيا الاساس اللي ينبني عليها الجنين
بس انتي الحين بالرابع للحين ما وصلت هالمرحله انا اقول راجعي الدكتورة اهي تعطيج نصايح احسن بالمرحله اللي انتي فيها
والله يهون عليج يا رب

 

[HoOoriah]

أول شي لا تحاتين وايد الحمدلله كل شي ممكن يرد الى وضعه الطبيعي اذا انتي حافظتي على جسمج ومو شرط الاعراض اللي صارت حق غيرج تصير لج.
وبما انج بالشهر الرابع لازم تسوين تحليل دم وتشوفين نسبه الحديد وعلى اساس نتيجه التحليل الدكتوره راح توصفلج حبوب حديد وكالسيوم وفيتامينات اذا فيج نقص لاسمح الله . بس لازم تاخذين حبة ملتي فايتمن مره باليوم وتكثرين من اكل الفواكه والخضروات والبروتينات وخففي من الدهون عشان لايزيد وزنج وايد خلال فتره الحمل واذا عندج اي استفسار في تغذيه الحامل طرشيلي عالخاص .

وإذا على السواد عادي راح يروح انشالله, وبخصوص الجسم والتشققات دايما رطبي جسمج وابدي من اليوم لاتقولين تو الناس يعني عقب ماتسبحين دهن يجسمج ببيبي اويل (وفي كريمات لمنع ظهور التشققات تنباع بالصيدليه اذا حابه تستعملينها بس الافضل انج تستشيرين دكتورتج واهي راح توصف لج الكريم المناسب انشالله) حتى الحلمه دهنيها عشان لا تجف واطلع دم وقت الرضاعه.


والله يتمم عليج انشالله وتولدين بالسلامه

 

[مارغريتا]

الله يهون عليج سمعي كلام البنات

 

[الأميرة كيرارا]

بالنسبة لتشققات البطن و الصدر مولها الدرجة
بس الأحسن تهتمين من الحين و دهنين عشان يقلل و هم يرد بسرعة في كريمات في مذركير
أو بالصيدليات كل يوم دهني
أما الأكل إكلي أكل مفيد ولا تاخذين راحتج و تاكلين عن 2 إكلي حاجتج وبس
يارب يسهل عليج