ساعدوني بنات

[perfection2012]

السلام عليكم بنات ​

شلوونكم ؟؟ ​

بنات مشكلتي ان انا اكلم واحد وهذا اول شخص اكلمه بحياتي
والله لا عرفت قبله ولا ابي اعرف بعده ​

انا خوافه حيل وكنت اشمئز من البنات اللي يكلمون
وكنت وآيد انصح رفيجاتي لا تكلمون حرام الله مايرضى ​

وبعدها طحت بالغلط شلون مادري ​

ع العموم انا اكلم هالشخص من سنتين
وطول ما انا اكلمه احس بالذنب
اخاف من ربي ومن اهلي ومن كلشي ​

انا اصلي كل الصلوات المفروضه والسنن
وكل يوم اقرأ قرأن وربي ماجذبت بكلمه
وصلواتي كلها بوقتها ما أأخر فيها دآيم
ولا اقطعها وحتى صلاة الفجر اقعد اهلي عليها .. يمكن عشان جذي لمن اكلمه احس بالذنب ​

هذاك اليوم ابوي قال كلمه اثرت فيني وآيد
قال انتي واخوانج مثل الفاكهه اذا وحده خربت
تخرب ع الباجي
عقبها ظليت ابجي ,, حسيت كل الكلام علي ​

مشكلتي انا ماقدر اترك هالشخص دآيم احاول
وارجع اكلمه مره ثانيه ضعيفه حيل انا
ابي اسوي اي شي عشان انسى هالشخص ​

حتى اذا يبي يتزوجني مايقدر لأن هو مو كويتي
ومستحيل اهلي يوافقون وهم اكبر مني ب 10 سنين
انا عمري 19 سنه ,, ​

تعبت بنات ساعدوني وريحوني الله يريحكم ​

 

[what's up]

الصلاة الصحيحه اهيا الصلاة الي اذا صليتيها تنهيج عن الفحشاء و المنكر .. من الحين دزي مسج حق الريال قولي انا حاسه بال
ذنب و ما ابي اكلمك و امسحي رقمه و عيري خطج من هاللحظه و ربي يثبتج

 

[شمس 20]

خلاص دامه مو كويتي ومستحيل تتزوجينه اتركيييه اول شي صعبه بس بعدين تنسينه

 

[miss fantastic]

ابوج معاه حق وخايف عليكم وعلى مصلحتكم وسمعتكم فحرآم لاتكسرين بخاطر ابوج واعتبريها تذكير

ودزي للولد مسج وقوليله انا اسفه ماقدر اتواصل معاك واكلمك من هذي اللحظه وهو اذا يحبج بقدر موقفج

وعلى قولتج زواج صعبه اذا اهوا بدون واكبر منج وفكري فيها بالعقل مو بالقلب .=)​

 

[am faisal]

شوفى العبادة حتى بالسر
لاتخونين ربك ولا ابوج
وكلام ابوج جد مؤثر
وحرام ابو مثل هذا ينذل وتوطين راسة

 

[Patcholli]

لي متى حاطه فبالج بتستمرين معاه وانتي تقولين مالج امل تاخذينه ؟؟
حبيبتي انت انسانه عاقله وتقدرين تتجكمين بقرارتج
ربج مايستاهل ان تتعذبين عشانه ؟؟
اهلج مايستاهلون ؟؟
من راي اقول وخري عنه ولاتضيعين وقتج ترى يمكن عذاب السنتين يكون اهون من عذاب فراقه اذا استمريتي معاه اكثر
واهو صدقيني مو زينلج لو يحبج مايعلقج معاه واهو يدي ان ماراح ياخذج
بس بيعذب قلبج ويضيع وقتج

 

[العفاسيه وبس]

كلام أبوج عين العقل ومؤثر بعد ....... حبيبتي دزيله مسج وظحي له الموضوع ...... وبعدين انتي توج صغيرة لاحقه على سوالف الحب وخرابيطه .....وحطي اهلج بااول الموظوع خاااافي على باجي اهلج وخواتج يعني (السمعة) وخيرة لج لو انتي تبعدين عنه وهذا انتي مصليه الخمس الله يكون بعونج وصدقيني ترى الحل بريدج ( الأهل ....او اللي تحبينه )؟؟؟؟؟؟؟

 

[Mملامح]

الله يهديك ويبعد هالشخص عنك لاتقولين مااقدر اذا تبين مصلحة نفسك لازم تتركينه
والله لو يحلف من اليوم الى قيام الساعه انه يحبك وبيتزوجك كــــــــــــــــــــــــذاب وقت الجد قال ماابيها هذي كلمتني اكيد تكلم غيري وغييييييرة ...
اهم شي سمعتك انتبهي لهااااااااا لاتضيعنها على شخص مايستاهل اهلك هم الي يحبونك ويخافون عليك اما هذا والله كذاب
وانتي قلتي مايقدر يتزوجك لانه مو كويتي خلاص اتركيه والله بيعوضك بزوج احسسسسسسسسسسن منه بس ادعي الله ينزع محبتة من قلبك ولازم تكونين صااااادقه مع الله قبل ثم مع نفسك

 

[لقيمات وزلابيا]

والله انت صغيرة والمستقبل جدامج لا تخربين حياتك بايدك

الزواج له شروط كثيرة عشان يستمر ويدوم مو بس الحب
وانت تدرين انه ماكو اي تكافؤ بينكم ومثل ماقالو لك طرشي له مسج تبلغينه بقطع العلاقة وافضل انه ماتكلمينه لانك راح تضعفين ان سمعتي صوته وكلامه المعسول واذا حاول يتواصل معاك لاتردين
غيري رقمك وابدئي حياة جديدة

 

[غداً القاك]

ياحياتي
وقفي مع نفسك وقفه صارمه بالبدايه بيكون الأمر صعب بس بالنهايه بتقدرين
هذا ابتلاء من الله عز وجل لك ومن ترك شي لله عوظه الله خير منه
وزين انك من الحين عارفه ان نهايتكم مو زواج
ابتري هالعلاقه اقطعيها وارتاحي لانها بنيت على حرام وكلام ابوك صحيح وانتي فيك خير وكلامك اكبر دليل

من الليله عاهدي الله انك بتتركينه واطلبي من الله انه يعينك على هالشي
وربي يوفقك يارب ويفرج عنك ويبعدك عنه سالمه

 

[حلمي وامالي]

انتي توج صغيرة
ربي بيختبرك تبين تتوبين ولا تكملين والشيطان يضحك عليج ويغويج بطريج نهايته ندامة
نصيحة استغفري ربج وادعيه يرزقج بالزوج الصالح اللي يحبج وتحبينه

 

[perfection2012]

بنات انا الحمدلله ملتزمه ولا احب الغلط
ودايماً انصح الناس ,, بس ساعات احس ان
انا منافقه شلون انا انصح وانا مسويه غلط كبيير

الحمدلله للحين انا تاركته ولا ابي ارجع
ولا لي نيه بالرجعه
ابي ابدي حياة جديده لأن تعبت حييل تعبت والله


بس ساعات اضعف واحاول اتصل وارجع
واحس بحرقه بس اضغط على نفسي

اللي عندها ادعيه تقولي عليهم
ابي ارتاح

وجزاكم الله الف خيير حبايبي​

 

[Mملامح]

ياقلبي ادعي اي دعاء بس اهم شي يكون طالع من قلب
كرري اللهم باعد بيني وبينه كما باعدت بين المشرق والمغرب وقولي باستمرار اللهم اجعل همي الاخره
وفكري بدراستك لانك توك صغيره
اشغلي وقت مع اهلك وخواتك سوالف وحاولي ماتفكرين بالموضوع
ومهم جداااااااااااا الاستغفار اذا جاء على بالك صلي ركعتين واستغفري باذن الله راح تنسينه
وانتبهي تقولين لاحد موضوعك ولا حتى مع نفسك تفكرين فيه خلاص انسييييييييه نهائيااا
والله يوفقك ويرزقك الزوج الصالح الي يخاف الله فيك ويجعلك قرة عينه امين يارب

 

[perfection2012]

ملامح تسلمين على الدعوه يا قلبي
ربي يعطيج على قد نيتج
وانا قاعده احاول قد ماقدر
وكل ماحسيت اني برجع لنفس الغلط

افتح الموضوع واشغل قرآن
واترآجع ,, لأن مو حابه اغلط
واغضب ربي على شي مؤقت
واكيييد هالشي مسألة وقت وبنسى
بأذن الله​

 

[قمر بيت أبوها]

الله يستر عليك وعلي بنات المسلمين بصراحه كلمة ابوك تكسر الخاطر المفروض من عقبها تعتبرين نفسك خاينه اذا كلمتي هالرجال ابوك اهم واغلي واعز من اي رجل يتلاعب بك والشيطان شاطر تقولين اصلي واسوي واسوي لا تغترين والله ان الواحد يحس انه مهما سواء ماسوا شي لاخرته نسال الله الجنه

 

[زهرة دلقينيوم]

((ان الله لايغير مابقوم حتى يغيروا مابانفسهم )) صدق الله العظيم
تقدرين باذن الله حطي ربج بين عيونج ولازم تعرفين انه العلاقه المحرمه غير مثمره غير الغم والهم
وفكري بابوج شنو راح يكون موقفه اذا درا بالسالفه وبعدين ترا الديره الصغيره ديري بالج ديري بالج شدراج بطينة هالشخص في واحد يكلم وحده من غير مايمسك عليها شي سواء تسجيل صوت او او انقذي نفسج والله المستعان ان شاء الله راح تقدرين

 

[البرنسيسه77]

والله يا اختي انتي الحل بايدج ولازم تكونين فعلا تبين تتركينه من نفسج وتكونين مقتنعه بهالشي وانتي الوحيده اللي راح تعرفين الطريقه الصحيحه اقعدي شوي مع نفسج وفكري عدل وراح تلقين الحل بس كوني جديه بالتفكير وبسرعه

 

[)بنت أبو متعب(]

غيري رقمك انسي الموووضوووع

 

[خشف الشمال]

حبيبتي اول شي تسوينه انچ تكسرين الخط علشان لايدق عليج وبعدها حطي ايدج على المصحف وحلفي انچ ماتكلمينه او ادقين عليه من الخط اليديد او اي. خط ثاني

وبس وسمعي قرآن لأحمد العجمي واشرطة اسلاميه خصوصا شريط وغارت الحور شي عجيب يخليج تبجين ولاتفكرين بهالخرابيط مرة ثانيه وسمعي عن عذاب القبر علشان قلبچ يحس ويخاف

وتخيلي لو ابوج يدري بهالعلاقة يمكن يوقف قلبه ويموت شلون بنته الغاليه تسوي جذي وتوطي راسه بين الناس وتسود وجه وتفضحه الا الشرف وانا اختج ديربالج على نفسج وباين عليج ماشاء الله انسانه محترمة بس الشيطان قص عليج انهي هالعلاقة بسرعة لان محد حس بشي مو لما تطيح الفاس بالراس تنهينها كافي سنتين وربج ساتر عليج اهم شي مثل ماقلتلج كسري الكرت ومو تدزين له ترى بنهي العلاقه ومن هالخرابيط خلج جادة مع نفسج كسريه وخلاص بدون اي تفكير الله يمسح على قلبه ويفكه من هالشر

 

[perfection2012]

مشكورين بنات ماقصرتوا
جزاكم الله الف خيير

كل ماحسيت بضيق او فكرت فيه
ارجع واقرأ الموضوع احس يعطيني دافع
اني اتركه

مشكورين وآيد
وان شاء الله السالفه مسألة وقت لا اكثر
وانا مقتنعه بالشي اللي قاعده اسويه
لأن حآسه بالذنب اتجاه ربي ونفسي واهلي