سؤال عن طليقة المتقدم للزواج؟

[حنانك سر حبي]

مشكورين

 

[Mrs.Q]

بالعكس سئلي ضروري لأن في بلاوي تكون مخشوشة
في واحد كان خاطب بنوتة عقب ماطلق فالبنت حبت تعرف الاسباب مالت الطلاق فقالها ان زوجته كانت مو حلوة وماكو شخصية
لمن اهل البنية استفسروا من طليقته مارضت تقول شالسبب بس لمن قالولها انه خاطب وحدة من بناتهم وهالسبب يخليهم يصرون ع معرفة السبب اغترفت وقالتلهم انه وصخ ومدمن افلام سكس ويسوي عمره محترم جدام الناس ومشكلته الاعظم انه وقح وعينه قوية يعني مو بس يشوف افلام لا يحطهم بالصالة جدام مرته ويمارس العادة السرية جدامها ويقولها كيفي انا ريال وادوس ع راسج ان تكلمتي!!!!
ضروري اصلا تسأل البنت

 

[دانة_ دبي]

لا عيب تتصلين بطليقته

اسألي عنه و خلاص

 

[Um Tuki]

شدعو طليقته بتقول لج الصج .. ؟؟

رفيج ريلي كان مع مرته الأولى بليد .. مهمل .. و كله طالع عنها

و لما خذ الثانية شوي و يبوس الارض اللي تمشي عليه .. تغير وايد واااااااااايد

يعني كلللللللللش ماله داعي تروح تسأل مرته الأولى عنه

لان اكيد مابتقول شي عدل عنه

 

[miss.unique]

ماتظمنين انه طليقته رح تقولج الصج 100% ماكو ضمان

واذا قالت الاسباب .. يمكن اهية ماتحملت شغلة فيه وما توالمو مع بعض .. بس الريال ممكن انه يتوالم معاج وممكن تتحملين هالشغلة
( يعتمد على كل مرة وشخصيتها )

ثاني شي .. طليقته مهمن كان فإهي مرأة .. فلو رحتي سألتها رح تحتر من الريال عقب ماطلقها يروح يتزوج بكل سهولة و يبدي حياته من جديد و اهية صارت مطلقة

المرة معروفة بغيرتها حتى لو ما كانت تبيه وكارهته رح تحتر على نفسها و تذم فيه

 

[Perfume]

مع ام خزامى

 

[Royof]

اسالي طليقته مو شرط تذمه وكل شي راح يبين

الله يوفقج

 

[د-سوسه]

بغض النظر عن الشك بنوايا الناس وانها بتجذب أو بتالف ..ا

لطلاق له اسباب عديده شخصيه وخاصه ...

برايي مالج شغل فيها ...شوفي الريال الي جدامج وسالو عنه وطلبي ان تتكلمين معاه ومن كلامه بتعرفين اشياء وايد وبصراحه اذا كان كفو مراح اييب طاري بنت الناس الي كانت زوجته باي شي ..

واصلا المفروض يكون ناسي تفاصيل حياته السابقه وناوي يبدي حياه يديده وإذا كانت ادق التفاصيل على باله ياإما يكون جذاب أو إنه ليلحين مانساها وما طلع من العلاقه السابقه وبتعيشين معاه تجارب وخبرات غيرج .

أي شي بالدنيا محتاج لشخصين والطرفين شافو ان من الاصلح ان هالزواج مايستمر وقررو إنهائه ... الطبيعي أن يكون طلع من هالتجربه بخلاصه خبره بمساوئها وإيجابياتها ونسى آلام التجربه وقسوتها ومستعد يبدي بدايه يديده .....
وسلامتج ...

 

[M!SS.LOBY]

الله يوفقج حبيبتي

ضروري اسأل عنه المتقدم بالدوام وسيرته الذاتيه والجيران يصلي او لا ملفه بوزارة الصحة
وأأكيد بسأل عن اسباب الطلاق شنو سبب الاختلاف واطرش ناس عالطليقته يعرفون السبب واطلع الحقيقة

في موقف صار حق وحده من معارفنا تقدم ريال حق بنتها قعد مع ابوها و أمها بالبيت وارتاحو حقه واسلوب وكلام ويمدح نفسه وان اهو ماله حظ بالحريم وسبب طلاقه ان زوجته السابقه تبي تمسي باريس وتصبح الصبح اسطنبول ولبسها ماركات وساعات ألماس حدها مصرفه وهذا سبب فشله والمساكين اهل البنت صدقو وقبلو حق بنتهم الريال

وبالاخير بعد الزواج انصدمو متزوج 3 اثنين زواج سري رسمي وحده بالاشهار وبنتهم طلعت رقم أربعه
وللأسف أخلاقه زفت وبخيل ومايقدر الحياة الزوجيه وخبيث بالاخير تطلقت من عنده

 

[1001]

ماتسالين طليقته

بس المفروض تسالون الناس الي حوالينهم
الي يعرفون طليقته مثل الجيران او اصدقائهم

مع ان اختي تزوجة مطلق وسالناه ماعطانا أي معلومات غير انه تزوج شهر وطلقها لاكن تصدقين الحين اختي صارلها ثلاث سنوات معاه ماتعرف اسباب طلاقه وماتعرف حتى اسم المطلقه غير من اخته انها سوريه وتزوج عن قصة حب ايام الدراسه وبس وطق اخته لانها علمت يقول انه يكرها حييل مع انه تزوج السوريه عن حب بس ما استمرو شهر كله مشاكل

 

[1001]

بس حبيت اضيف شغله
بغض النظر راح تكذب او لا
لا تسالين طليقته لان حرام ممكن تجرحين مشاعرها حتى لو ماتحبه مو حلوه تسالين عن شخص عاشت معاه عشرة عمر وانتي راح تاخذينه
ممكن تسالون اخوها او ابوها

 

[عيني عليه]

بقولج عن تجربه...

اول شي شوفي عنده عيال من طليقته والا ماعنده? .. اذا عنده عيال رفضيه على طول.. او كوني متقبله فكره انه يرجع لها في يوم من الايام عشان عياله...

ثاني شي لاااازم تكلمين طليقته وتعرفين اسباب الطلاق.. لان الرجال لابغى يتزوج وحده غير زوجته خط فيها العدل والمايل.. وبعد الزواج يكتشف انه النسوان كلها واحد ويقوم يحن لحياته الاولى اللي تعود عليها وبدا فيها...

ثالث شي الرجال نفسه الرجال مع المره الاولى والا الثانيه والا العاشره.. واللي يسويه مع وحده بيسويه مع عشر غيرها... لاتقولين يمكن بيتغير بعد تجربته الاولى وخذ منها دروس... لانه بيتحذر في اول شهر زواج ثاني شهر عاشر شهر.. بس في النهايه بيمل وبيصير يتعامل معاج ع طبيعته..

ماانصحج تاخذين مطلق.. لانه تجربه طلاقه هاذي اكيد خلفت فيه عقد من اشياء وجروح وتعب وحيله منهد من المشاكل ونفسه قصير وصبره قليل..او انج تدخلين حياته وانتي حاطه في بالج انه هالانسان محتاج معامله خاصه وتنازلات كثيره واهتمام اكثر من الطبيعي..
الله يوفقج حبيبتي ويسوي اللي فيه صالح لج

 

[حنانك سر حبي]

صح كلامج بالفقره الاخيره محتاج معامله خاصه وتنازلات وراح يكون باله قصير ومهدود حيله

 

[Mrs_Orchidia]

السؤال ما وراه الا كثرة الحجي و المشاكل .. نصيحة سألوا عن الريال عااادي و اكيد اهله بيقولون شالسالفة او ممكن البنت وقت الخطبة تقعد مع الريال و تسمع منه كل شي

 

[حنانك سر حبي]

مشكورييين
اذا سالتي الخاطب اصلا ماكو ريال يطلع العيب فيه اكيد بيخلي الغلط عالمره