زينة وحمد .. قصة حب كويتية واقعية

[kity]

waiting

 

[*FaRaWlA*]

ايي رواابي ت=نبيها كامله واحنا ناطريينج حبوبه

 

[Bionic Girl]

نبيها كاملة ..

 

[rawabi]

بنات انشالله دقايق وتنزل القصه كامله لاني خلصتها ... انشالله انها تعجبكم ... وسامحوني عالقصور

 

[3rbawia 7lwa]

واي ناطرينج مشكورة وايد <<<<<<<<<<<<ينت البنت
واي فديتج بتنزلين القصة كاملة

 

[3rbawia 7lwa]

ما منج قصور تاتي

 

[rawabi]

البارت 17 :
دلال وصالح حالتهم حاله تغيروا ماعادوا مثل أول صارت النجره تصير بسهولة بينهم والصوت صاير يعلا ... دلال انهزت ثقتها بنفسها وبعلاقتهم ... وصالح موعارف شالوضع وحس ان خيب ظن دلال فيه
صالح: دلول ... شفيج ؟ شاللي غيرج ... صايره زعول وعصبيه
دلال : انا الزعول والعصبيه .... انت اللي كله منفس
صالح: والله الدوام متعبني .... "(يجذب)
دلال ( تدري ان السالفه مو سالفة دوام ) : الله يعينك ... حتى انا الامتحانات وايد مسويه لي ضغط نفسي
صالح: بس حتى وانا تعبان احبج
دلال: ............ حتى انا ....... صالح ترا صج طولت السالفه
صالح: لاطولت ولا شي غيرنا ينطرون بالسنين ... انا امي ماقالت شي عادي بس كل السالفه انها لاهية مع ناصر وانشالله اول ما يملج ناصر اخطبج
دلال: انت مو قلت ان امك موموافقه
صالح: اي وقتها بس انا واثق انها اذا عرفتج بتوافق
دلال: يعني مو موافقه
صالح: انا قلت بالاول ماكانت موافقه..... بس الحين ماكو الا العافيه

صالح محتار شرد على دلال ... شقول لها مايبي يجرحها وهو كلش مو مبين ان كل يوم بنجرة مع امة

صالح: حبيبتي تعالي قولي لي خلصتي شغلج حق عزيمة بيت خالتج مادري خالج مادري بنتهم ؟ والله ضيعت
دلال : اي من زمان
صالح: ماقلتي لي شنو شريتي ... شنو بتلبسين .... ( صالح كان يبي يلهي دلال عن السالفة ويغير مودها ) ... قولي بالتفصيل
دلال ( مستانسه ) : صج ...
وصارت دلال تسولف له عن بدلتها والتسريحه اللي بتسويها والطقم اللي بتلبسها وطبعا صالح نص الكلام مو فاهمة بس مسوي روحه مهتم

-----------------------------------------------------------------------------------------------

المكان : شقة حمد ولولو
حمد : لولوة قعدي شوي بكلمج
لولوة ( استانست ) : اوكي ... امر
قعد حمد ولولوة بصالتهم حمد تم ساكت شوي تالي قال : لولوة ... انا اسف على اللي كنت اسوية فيج ادري اني وايد مرات كنت عسر واضايقج ( بس لازم يخربط مايصير يكمل صح ) بس صراحة انتي تغثين وتستاهلين من يغثج
لولوة: الحين انت مقعدني عشان تقولي جذي ؟
حمد: لا والله ... بس مابي نفترق وانتي شايله بخاطرج
لولوة اخنقتها العبرة للحظة كانت حاسه ان براضيها
حمد: بس ابيج تعرفين اني والله مابيوم خنتج وماكنت اقصد اني اقصر معاج او اضايقج ... انا ماخطبتج الا لانج عاجبتني وداشه خاطري ... بس احنا ماتفاهمنا ومشاكلنا كثرت والاحسن ان نفترق ... وان كل واحد يدور راحته
لولوة (دموعها على خدها ) : بس كل اثنين متزوجين بينهم مشاكل ولو كل اللي بينهم مشاكل انفصلوا جان ماتم احد متزوج
حمد: كلامج عدل بس انا وياج مومتفاهمين وانتي عنيدة
لولوة : لو مو متفاهمين جان ماتمينا 3 سنين ... شاللي خلاك تتحمل 3 سنين ومابينا ياهل ولا شي يربطك فيني ... لا تظلمني وتظلم نفسك .... ولا تحملني الغلط وتقول اني عنيدة هم انت فيك حقك وايد عسر وعصبي ومن خذيتك وانت كله بتكفخني
حمد : ودي اكفج لانج تحريني
لولوة : وشدعوة انت ماتحر .......
حمد ( قطع كلام لولوة ) : خلاص لولو ماله داعي كل واحد يقط الغلط عالثاني ... اللي بينا انتهى
لولوة : وانت قاعد تقول هالكلام تبيني احللك والا شنو بالضبط
حمد: شكو تحليليني ... شمسوي انا ... كل السالفة اني مابيج تتضايقين
لولوة: مطلقني وماتبيني اتضايق
حمد: اووووووووووو ... هذا اللي مااحبة فيج من ايي اكلمج عدل واصير زين تصيرين دعله
حست لولوة ان الكلام مامنة فايدة ولا بييب نتيجه ... قامت عن حمد وقبل لا تطلع من باب الشقة : حمد انت راح تتزوج زينة .. صح؟
حمد: اي


----------------------------------------------------------------------------------------------------

كان صالح قاعد بالصالة تحت يشوف تلفزيون مع امه وابوه ( ابو صالح كلش ماعنده خبر بسالفة صالح ودلال ... سالفة زواج عياله مسلمها حق ام صالح بس الشور الاخير .. لانة وايد مشغول مايدخل بكل شي )

ام صالح: بو صالح بعد اذنك ترا انا باجر معزومة ببيت ال ........... عالعشا .. اقدر اروح
بو صالح: اي روحي بس مو اطولين ... البنات بروحون معاج ؟
ام صالح : مااهقى جنة عندهم امتحانات

صالح اول ما سمع وين امة معزومة فز قلبة ... ام صالح كانت معزومة ببيت بنت خال ام دلال ... نطر صالح ابوه يمشي : يماااااا انت معزومة ببيت ال .............. اللي بالمنصورية
ام صالح: اي ... تعرفهم ؟
صالح( وهو مستانس ) : يماا هذا بيت بنت خال ام دلال
ام صالح( من غير اهتمام) : ... صج ؟
صالح: اي والله يما مو قلت لج البنت اهلها زينييين
ام صالح: انا ماقلت ش عن اهلها ... انا قلت عنها وعن اخوها ... الاخو سكير والبنت مايندرا عنها
صالح: يماااا حرام عليج ... رحميني والله حرام اللي قاعده تسوينه فيني وتقولينه
ام صالح: شنو ذابحتك انا
صالح: يما مايجوز اللي تقولينا عن البنت هذة باجر بتكون ام احفادج
ام صالح: مشالله حلاص تزوجتها وحملتها
صالح : انشالله بتزوجها برضاج


صعد صالح دارة وعلى طول دق على دلال : حبيبتي دلوله
دلال : هلا حبيبي .. شفيك ؟
صالح: اموااااااااااااااااااااااااااااااااااااااااااه
دلال : يابختي والله ... عسى دوم مستانس جذي ... شفيك ونسني معاك ؟
صالح : دلول ابيج باجر تكونين احلى وحدة بالعزيمة مابي وحده تكون احلا منج
دلال : ليش ناوي تيي ؟
صالح : لا امي بتييي
دلال (طلعت عينها ) : شنو ,,, ليش ؟
صالح : شنو شنو ...... وليش؟ امي معزومة شكلها تعرف اللي تصير لكم
دلال (عرفت من وين ام صالح عرفت عن اخوها يوسف ) : حياها الله
صالح: دلول عاد مااوصيج
دلال : توصيني على شنو ؟
صالح: ماادري .. على امي ... يعني جابلها خل تشوفج
دلال : يعني شسوي لها ؟ ارقص ؟
صالح: انا ماقلت جذي ... اقولج جابليها تتطنزين
دلال ( متنرفزة ) : شنو يعني اجابلها ؟ اخدم عليها مثلا
صالح : اي خدمي عليها مو تبين اتزوجج ...
دلال ( انصدمت من رد صالح) : ... ليش انت ماتبي ؟ والا بس انا اللي ابي؟
صالح ( متنرفز ويصارخ) : دلول لا تقلبينها نجره ... ترا زهقت من نجراتج ... كافي نجراتي مع امي على زواجنا تيين انت تكملين ... يعني انا كل يوم طاقها نجرة وحنه مع امي عالاقل انتي سوي شي انا ماقلت لا تتحركين من عندها بس عالاقل خل تعرفج ... لاني تعبت من الهوشه والحنه معاها عليج .
دلال ( انصدمت هي تدري ان امه موموافقة بس ماهقت لهدرجه .. ماهقت ان بينهم نجرات وهواش ) : وانشالله امك ليش ماتبيني .. مو من مستواكم والا ماني من مواخيذكم ؟ لايكون مو عاجبتها
صالح: والله من سوات اخوج اللي تفشل !!!!!!!!!!
دلال : والله اخوي يشرفك ويشرف امك ...... وامك شكو باخوي لايكون بتقعد عنده هي .... دام امك مو راضيه وطايح معاها نجره ليش ماقلت لي

----------------------------------------------------------------------------------------------

ناصر وفرح بدنيا ثانية حدهم لاهييييين بالتجهيزات
ناصر : هلا بام عبدالرحمن
فرح : منو ام عبد الرحمن
ناصر : انتي ياقلبي
فرح : شكو ... لا انا بسمي ولدي مشاري
ناصر : نعم يماااااااااا .. باذن منو بتسمين مشاري ؟
فرح: مو ولدي ... كيفي
ناصر : لا حبيبتي انت بس عليج تحملين وتولدين التسمي لي انا
فرح : ليش انشالله .. شنو شايفني الة تفريخ
ناصر : هههههههه لا بس انا الابو وبيشيلون اسمي انا اسميهم
فرح: بس انا خاطري اسمي مشاري .... والله بخاطري
ناصر : سمعي الولد البجر حمني مو بكيفج
فرح : الله يخليك واللي يعافيك ... عشان خاطري والله بخاطري الاسم
ناصر : خلاص انسمي مشاري بس مو الاول
فرح : اوكي الثاني
ناصر : لا الثاني فيصل
فرح: الثالث ؟
ناصر : لا الثالث سعود
فرح : انت بتسمي على ربعك .... عيل متى بسمي انا؟
ناصر : انتي الولد السادس تسمينه
فرح: شنوووووووووووووووووووو ليش جم واحد بيييب انا ؟
ناصر : 12ولد ناوي اسوي فريق كرة قدم .................و12 بنت عشان يشجعون اخوانهم

-----------------------------------------------------------------------------------------------



يوم عزيمة اهل دلال صالح كان بالديوانيه قاعد يكلم دلال .... دلال كانت حدها كاشخة ومخترعة : صالح ... تصدق خايفة
صالح: من شنو ؟ ماهي ماكلتج ... اصلا هي اول ماتشوفج بتحبج على طول
دلال : لا مو عن جذي مادري ليش خايفة وقلبي مقموت احس بشي خايس
صالح: تعوذي من ابليس ...... ماكو الا العافية
دلال : صالح والله احبك
صالح: حبيبتي شفيج؟
دلال : شفيني قلت احبك ماقلت شي ؟
صالح: مادري قلتيها بطريقة غريبة
دلال: مادري عادي

راحت دلال العزيمة وكل مادشت مرا تقعد اطالعها هي ماتعرف شكل ام صالح ... بس حطت ببالها ان ام صالح اكيد بدور عليها وحتى لو مادورت ... اصلا بنت خالة امها قاعدة تعرف المعازيم ببعض يعني اكيد اول وتالي بتعرف ام صالح..... دلال كانت تحس ان قلبها بيوقف واللي زادتها توتر ان صالح كل شوي داز مسج يسأل شصار كانت دلال ترد علية لينا صار يدز مسجات وما صارت دلال ترد عليه طار عقل صالح ليش دلال ماترد دق اكثر من مرة بس ماردت دلال .... صالح : وينها ماترد شصار يخليها ماترد علي ؟
طلع صالح من الديوانية وهو طول الدرب يدق بس ماكان في جواب

اول مارد صالح البيت لقى امه وابوة بالصاله : يمااااا تعالي شوي ابيج
بوصالح: شتبي بامك ... تكلم ؟
صالح: لا يبا سلامتك ... بس جم ورقة حاطهم بداري و مو لاقيهم ابي اسال عنهم
قامت ام صالح واول ماقربت حق صالح : مشالله تعلمت الجذب على ايدها
صالح: يمااااااا شصار ؟
ام صالح: ماصار شي
صالح: يماااا قولي شصار البنت كسرت تلفونها ماترد
ام صالح : وانا شدراني عنها
صالح: يمااااااا صار شي بالعزيمة
ام صالح : شدراني انا مارحت
صالح ( ويهة قلب وعيونه طلعت وهو مكسور ) : مارحتي ليش ؟
ام صالح: راسي يعورني
صالح : يمااااااا حرااام عليج ... انا مو ولدج ليش تسوين فيني جذي ؟ والله تعبت والله يايما تعبت
ام صالح: انت اللي يايب حق نفسك التعب ... وكل ماشفت ويهي قلت حرااااااام عليج ... بدال لاتقولي سلامة راسج

تم صالح طول الليل يدق ويدز مسجات بس ملقى اي رد من دلال ... تعب من التفكير وتعب من حقران دلال وتعب من عناد امه ... وهم تعب من نفسه ... صاربين ناريين نار امه ونار قلبه

--------------------------------------------------------------------------------------------

المكان : شقة حمد
الوقت : 7:30 الصبح
حمد قالب الشقة يدور اوراقه مالوت الدوام صارله اكثر من ساعة ومو لاقيهم ... : شكلي لازم ادق على لولوة اسالها اكيد تدري وينهم
حمد: السلام عيكم
لولوة : هلا وعليكم السلام
حمد : اسف اني داق هالحزة ... بس انا قاعد ادور اوراقي مالت الدوام ومو لاقيهم... ماعندج خبر وينهم ؟
لولوة :مالوت شنو بالضبط .... شمكتوب فيهم ؟
حمد: مالوت مشروع بمنطقة شويخ الصناعية
لولوة : اي تلقاهم بدرج المكتبه الثالث ... صوب اليمين
حمد : مشكورة ماقصرتي
لولوة : حياك
فتح حمد الدرج والا صج يلقى الاوراق موجودة عاليمين .... صار يدور ملف يحطهم فيه مالقى
حمد : السلام .... اذيتج؟
لولوة : عادي تمون ؟
حمد: ابي ملف مالقيت
لولوة : بالدرج الاول .....

تذكرون لما يت لولوة تاخذ اغراضها موقلت لكم انها تعبثت بأغراض حمد جنها ادور شي ... لولوة ماكانت ادور شي كانت تغير مكان اغراض حمد عشان يضيعهم ... كانت تبي تحسس حمد ان من غيرها مايعرف يسوي شي .


---------------------------------------------------------------------------------------------------


قعد صالح من النوم حايشه صداع مو طبيعي وماراح الشركة ولا يبي يروح .. شاف تلفونه مالقى فية لا missed calls ولا مسج من دلال : اكيد مطنقرة .... دز لها مسج :
حبيبتي ادري انج معصبة ومطفرة بس كلميني مايصير جذي

نطر رد ماكو رد ... دز مسج ثاني :
دلال تعوذي من ابليس وردي ... ابي اكلمج
نطر للعصر كان داق وايد ونفس الشي ماكو رد

مسج : ( لهدرجة مالي قدر عندج تحقريني جذي )
ودق ردت دلال : وينج من امس ادق ماتردين ؟
دلال : نايمة
صالح: كل هذا نوم .. شايفتني ياهل بصدقج ... ردي علي ليش من امس ماتردين؟
دلال : نايمة
صالح: دلول لا تطفريني ... تكلمي عدل وبلا تنفس
دلال : ........................
صالح: احاجي منو انا ؟
دلال : شقول ؟
صالح : شفيج
دلال : سلامة عمرك مافيني شي
صالح: قبل لا تضايقين وتتنرفزين .. امي ماقدرت تيي لان راسها يعورها
دلال : سلامتها
صالح: جنج مو مصدقه
دلال : ليش انت مصدق
صالح ( يدري ان امه مافيها شي بس شسوي ) : يعني امي جذابه
دلال: والله امك وانت ادرا
صالح: دلول ... تراج تتكلمين عن امي ... حاسبي على كلامج
دلال : انا ماقلت شي
صالح: بتمين منفسه لمتى ؟
دلال : ماني منفسه
ونموا الاثنين ساكتين قريب ال 10 دقايق
صالح : لمتى يعني ؟
دلال : صالح .... اخليك الحين انا مشغوله
صالح( يصرخ ) : الحين صارلنا ساعة ساكتين اخر شي تقولين بتسكرينة
دلال : قلت لك مشغولة
صالح: بشنو ... انتي شفيج صايرة ماصخة ؟
دلال : ناوي تتهاوش ؟
صالح: دلول ... ترا حدج سخيفه صايره ... شتبيني اسوي ... شاللي بيدي ؟
دلال (خانقتها العبرة ) : تسالني انا شتسوي ... روح تهاوش وياها ... عصب ... ازعل سو اي شي ... وينها المدام امس مايت لايكون صدقت ان راسها يعورها ... امس طول العزيمه مااستانست ولاعرفت اقعد بس انطرها ... كل مادشت وحده قعدت اخزها ....... لاقاعدرة انام ولاقادره افكر بشي غير امك
صالح: شنو اتهاوش وياها واحد من الربع هي ... عيب عليج هالكلام ... شفيج انتي ؟
دلال : صالح .... شتبي ؟
صالح: ابيج
دلال : لمتى هالكلام اللي مامنه فايدة
صالح: صار كلامي مامنة فايده
دلال : انا تعبت ومافيني اعصاب زيادة
صالح: انا هم تعبت ... بس مابقى شي
دلال : متى ... شكله مالي نصيب فيك
صالح: عن الكلام البايخ
دلال : والله مو كلامي اللي بايخ ... امك البايخه
صالح : دلاااااااااااااااااااااال ... مو كل ساعة اقولج تكلمي عدل
دلال : ماني متكلمه شبتسوي ... مو انت ماتقدر الا علي
صالح ( يصرخ ) : دلووووووووووول وويعه لا طلعيني من طوري
دلال : خرعتني شبتسوي ؟
صالح: والله وبالله لا اكسر راسج يالحيواااااااااااااااااااااااااااااااااااااااااااااااااااانه
دلال ( صج حست ان احد عطاها كف ) : ........................................
صالح (حس بنفسه ): دلول ؟
دلال : .............
صالح: دلال اسف
دلال : ............................
صالح : دلول ردي علي
دلال : ........................
صالح : انتي طلعتيني من طوري .... عليج الله تكلمي .. قولي اي شي ... اذا لي خاطر ردي
دلال : باي
صالح ( ضاق خلقه بس قال يخليها شوي تالي يدق ) : باي حبيبتي

-----------------------------------------------------------------------------------------------


حمد قرر ان يخطب زينة بس قرر ان قبل لا يكلم اهله يشاور زينة زهو متاكد انها تحبه بس قال هم يبي يبلغها اول دز لها مسج :
والله اشتقت لج.... وابيج ... للحين احبج وشاريج
زينة كانت بالجامعه مع رفيجاتها اول ماقرت المسج عيونها غورقت وقلبها قام يرقع كتبت مسج :

والله اني اشتقت لك اكثر ...ومابيوم نسيتك ....وحتى انا للحين احبك وابيك
ومن الشطة والتدوده دزت المسج حق محمد مو حمد
محمد اللي كان بمحاضرة اول ماشاف مسج من زينة طار من الفرحة .....على طول فتح المسج لما قرا الكلام طار عقلة على طول استاذن من الدكتور وطلع من الكلاس ... يدق على زينة

زينة : اوووووووووووووووو شيبي هذا ... حده لوع جبدي ... بحقره
محمد دق مرة ثانية ماردت ..... محمد طلع برا هو يدري وين زينة تقعد اذا عندها بريييييييييك
دز لها مسج والله اذا مارديتي لا ايي عندج واتلج من بين رفيجاتج ياحيوان
زينة حدها اخترعت من المسج ماكانت تدري انها دازة المسج حق محمد بدال حمد : شفيه هذا ؟
دقت عليه : شفيك
محمد) يصرخ ): منو هذا اللي تحبينه وتبينه ؟
زينة ( مو مستوعبه ) : شنو ؟
محمد : المسج كنتي دازته حق منو يالوصخه الحقيرة ... ومسويه روحج شريفه علي ... انا اراويج والله ان ماخليتج تتحسفين على اليوم اللي نولدتي فية مااكون انا محمد
زينة : محمد اسمعني ...
محمد : جب ولا كلمه ياحيوانه ... هذا وانا رازج وعازج وناوي اخذج ... طلعتي زباله ومن تحت لتحت ... بس واللي رفع سابع سما لاهد الدنيا فوق راسج ... انتي ناسيه اني عندي صورج
زينة( وهي تبجي ) : لا محمد تكفى.... لا تسوي شي الله يخليك
محمد: لا والله قاصه علي وكاسره قلبي ... والله لا اكسر قلبج مثل ماكسرتي قلبي .... عمري ماقصرت عنج كنت صج احبج ... بس الحين انا اعلمج

وصك محمد التلفون بويه زينة اللي كانت حدها مهسترة وتبجي زينه ماكملت دوامها ردت البيت وقعدت بدارها بس تبجي : يارب يارب استر علي ... يارب لا تفضحني

حمد اللي كان ناطر رد من زينه هقى انها ماردت لانها استحت منة : ماكان لازم ادز لها مسج ... والله فشله ماجنها بنت عمي ... وييييييييييييه ماكو الا اني اروح لهم البيت بس خل ادز مسج اول اعتذر لها
مسج ...( زيون والله اسف ماكان قصدي احرجج ... بس من كثر ماانا مشتطت ما فكرت)
زينة قرت المسج وقامت تبجي زووود


-------------------------------------------------------------------------------------------


صالح كان قاعد بديوانية بيتهم بروحه ينطر حمد وباجي الشباب ودق على دلال يبي يكلمها على مااييون الشباب
صالح: هلا حبيبتي ... هلا عمري
دلال (صوتها حييل تعبان ) : هلا فيك
صالح: عسى ماشر شفيج ؟ صوتج متغير ؟
دلال : تعبانه
صالح : امواااااااااااااااااااااااااااااااااااااااااااااااه عشان اطيبين حبيبتي
دلال: صالح
صالح : عيونة
دلال : انت تدري ان انا احبك حييل
صالح: وانا اموت فيج
دلال : اسم الله عليك ..... صالح ابي اطلب منك طلب
صالح: امريني
دلال : ابي نترك بعض
صالح ( توقع اي شي الا هالشي ) : شنو ؟
دلال : ماابي اكمل معاك
صالح: دلول اذا على سالفة هذاك اليوم انا اعتذرت لج ... صج اسف فقدت اعصابي معاج بس ماكنت اقصد شي
دلال : ........... صالح اقولك ابي نهد بعض
صالح : دلول انتي مو من صجج ... يعني تبين تبينين انج زعلانه والا تبين تعاقبيني ؟
دلال : انا مو زعلانة انا تعبت وبس خلاص.... مااقدر اكمل
صالح: تهديني تخليني حق منو انا مالي بالدنيا الا انتي ... دلول انا صج باخذج والله اني باخذج امي مردها ترضا
دلال : حتى لو رضت ... انا مابي
صالح: ماتبيني
دلال : اي
صالح: انتي مو من صجج ؟ انت تحبيني
دلال : خلاص صالح
صالح: لا مو خلاص فهميني
دلال : تبيني اخذ واحد امه ماتبيني وكارهتني ... حتى لو رضت بترضى غصب عنها مو لانها تبيني ... شلون بتعاملني طول عمرها ماراح تنسى اني خذيتك غصب
صالح: هذا بالاول تالي بتحبج
دلال : من قالك ... شدراك ... تبيني ادش بيتكم مكسورة ... ترضاها علي يا صالح ؟
صالح: .................
دلال : صالح انا فكرت وايد ... وخلاص انا الحين بنسحب وماني مكملة .... وحتى لو تقدمت لي وصدقني هالشي ماراح يصير
صالح ( قطع كلامها ) : شدراج ان ماراح يصير ... انشالله بتزوجج بس انتي صبري
دلال : لمتى ... صالح امك لو صج تبي او ناوية انها تغير رايها جان يت العزيمة
صالح: راسها كان يعورها
دلال : لا تحرني واللي يعافييييك كافي اللي فيني .... بعدين انا مااحب امك اكرهها ... صج كسرتني ولابيوم بحبها ولو اخذك هم ماراح احبها ... ولا اهقى انك ترضى ان زوجتك تكون كارهه امك ... الله يخليك صالح لا تعب نفسك وتعبني معاك ... هذي اخر مكالمه بينا عفية لا تحرج نفسك وتحرجني ... مع السلامه

سكرت دلال التلفون من غير ما تنطر اي رد من صالح ............... صالح ركب سيارتة مايدري وين يروح لقى نفسة جدام بيت دلال ... قام كل شي بينهم يمر جدام عينه ... يوم دعهمها ونزل معصب شلون ويها كان يكسر الخاطر ... يوم راح لها ستار بكس كيفان .... الاكواريوم وهي قاعدة معاه ... لما ركبت معاه السيارة

قام يذكر كلامهم
صالح : تدرين اني احبج
دلال : لا ماادري محد قالي
صالح : كا انا اقولج احببببببببببببببببببببببببببببج
دلال : حياتي انت

-----------------------------------------------

دلال : انا واييييييييييييد احبك
صالح: مو اكثر مني والله .... اصلا انتي دنيتي
دلال : الله يخليك لي
صالح: يخليج لي
نزلت دموع صالح حس ان روحه بتطلع كان ييدري ان دلال من صجها وكان يدري ان صج كل واحد راح بطريج ... حاول يدق حاول يدز مسجات بس ماقدر يدق شقول ... يدز مسج شقول ... دلال كانت اقوى من صالح دلال خذت قرار ... صالح ماقدر عليه صج انها خسرت حبها بس كسبت نفسها ... مارضت على نفسها الاهانه من ام صالح .
--------------------------------------------------------------------------------------
-----------------------------------------------------------------------------------

وصل حمد بيت عمة مبجر لان كان ناوي يكلم زينة بس اول شي دش الديوانية مالقى احد وهو طالع من الديوانية والا يلقى واحد ينزل من سيارته ياي صوبه ... ماكان حمد يعرف هالشخص

محمد : السلام عليكم اخوي
حمد : وعليكم السلام .... امر
محمد: مايامر عليك ظالم .... انت صالح اخو زينة
حمد استغرب من طريقة السؤال منو هذا اللي يعرف زينة وصالح لو هو واحد من ربع صالح جان ماقال صالح اخو زينة شكو هو بزينة .... نقزة قلبة واشتغل فيه الفضول
حمد: اي انا صالح ..... امر ؟ منو حضرتك
محمد : انا اعرف زينة اختك
حمد( طلعت عينة ) : نعمممممممممممم شنو يعني
محمد : يعني اكلمها
حمد هجم على محمد بيطقة : ايا الوصخ صج ماتستحي وياي لهني بعد
محمد مسك ايد حمد : نزل ايدك لا اكسرها لك ... انا ياي اتفاهم معاك ... لا تخليني اسوي فضيحة
حمد: اتفاهم على شنو يا جليل الحيا ياالوصخ
محمد: لو انا وصخ وجليل حيا جان قعدت اتكلم عن اختك بالديواوين بس انا ييت اتفاهم معاك واقولك اقضب اختك
والله يعلم اني ماكنت ابيها الا بالحلال بس هي ما قدرت حبي ولا حشمتني .... لو مو خوفي عليها وعليكم وانا ادري انكم عايلة لها اسمها جان ماييت لعندك اكلمك تمسكها الله ستر عليها معاي وماتكلمت فيها ولا لعبت عليها ... بس اللي الحين تعرفه مايندرا شبسوي لها والا شقاص عليها في

حمد : ليش هي جم واحد تعرف
محمد: وانا شدراني عنها ... انا مادريت عن سوالفها الا لما وصلت لي مسجات منها بالغلط
حمد: مسجات شنو ؟
محمد: مسجات شنو بعد؟ انت شتهقى وحدة بدز حق صاحبها مسج شبتقوله

محمد كان ولد اصل مافضح زينة ولا شهر بصورها واول ما مشى من حمد اللي محمد كان يحسبه صالح مسح صورها .... كان يقدر يفضحها لو يقول اسمها باي ديوانية سمعتها بتصير بالقاع بس محمد صج حب زينة وصج كان يخاف عليها وقبل هذا وذاك يخاف ربه
حمد اللي حس ان الدنيا تلف فيه وموقادر يشوف شي دق على زينة
حمد(يبجي ) : انتي شنو والله انا ماعندج احساس ... انتي مستحيل تكونين ادمية ... ضيعتيني لا ارتحت بقربج ولا ارتحت ببعدج ... خربتي عيشتي ........انت شنو ...... شهالقلب اللي عندج .. قلوب الناس لعبة عندج ... عسى الله لايوفقج ... عساج ماتتهنين بدنيتج ... انشالله اشوف حوبتي وحوبة محمد فيج ... نفس اللي سويتيه فيني سويتيه في ... انتي واطية .... عسى الله لايوفقج يابنت عمي
زينة بالبداية كانت مستغربه شفيه حمد بس اول ماسمعت اسم محمد فهمت السالفه ماعرفت ترد ماعرفت شتقول حتى البجي ماقدرت عليه ...

حمد بجى من قلب ماكان يبجي على زينة كان يبجي على نفسة كل عمرة اللي فات كان يحب ويفكر بوحدة ماتستاهلة والبنت اللي حبته وحشمته ضيعها من ايدة تم بروحه الحين ... ماحس بقيمة اللي عنده كان حب زينة عامي عينه عن كل شي .



بنات بس اللي بقوله ان اللي يلعب الله ما يوفقه فيصل لعب ببنات الناس ويوم ما نوا يتزوج حط شروط ومواصفات عشان لا تكون زوجتة وحدة من البنات اللي لعب عليهم وفيهم وتلعب علية بس بالاخر خذا وحدة مرت على كل ربعة....... وسعود مافكر يدور الحب الصادق وكان دايم وحيد ..... ولا كل انسان يخلص ويحب ياخذ اللي يحبه ... صالح حب دلال وهي خلصت له بس الظروف ماجمعتهم ... وزينة حبت حمد حبته من كل قلبها وعمرها ماحبت غيرة بس مشكلتها انها مافكرت بقرارتها والنتايج اللي مترتبه عليها ... حمد عطى حبه حق بنت عمة وخسر البنت اللي قدرته وحافظت عليه وفوق كل هذا خسر راحة باله ... لولوة حبت ريلها بس ماحاولت تكسبة وادافع عن بيتها...... يمكن اللي طلع حظهم حلو ناصر وفرح بس مايندرا الايام شنو خاشه لهم .

اللي بوصله ان الحب مو كفاية ... هو مهم بس مو الاهم ... ياما ناس على كثر ماحبوا وعلى كثر مااخلصوا ماكملوا ... مشكلتنا ان دابم نعيش بالماضي ونحسب ان احلا ايام عمرنا هي الايام اللي راحت مانعطي نفسنا فرصة نذوق حلاوة الايام اليايه .... وننسى ان محد ياخذ الا نصيبه واللي كاتبه له رب العالمين ... وننسى الاية الكريمة اللي تقول ( ولسوف يعطيك ربك فترضى )
وانه ان ضاع منا الحب مرة اكيد راح نلقى غيرة مرات

انشالله ان قصتي تكون اعجبتكم ومشكورين عالمتابعه

 

[الاحاسيس المبهمه]

واااااااااااااااااااااااااااااااااااي لا ما ابي تخلص

ليييييش النهاايه جذي .؟؟.

تسلمييين انتي وربي خطييره حدج اسلووووب

ونااطرين جدييدج حبيبتي

 

[ريوق بلاش]

يعطيج العافية وماقصرتي

 

[3rbawia 7lwa]

مشكورة على القصة
بس النهاية كانت تعيسة اهي اهي اهي
ليش حمد وزينة ما تزوجو

 

[3rbawia 7lwa]

ناطرين يديدج تاتي

 

[عالمي المجنون]

قطعتي قلبي صج

متابعة قصتج اليديدة

اسلوبج يهبل

^_^

 

[kity]

قصتج روعه مو بس حلوه الا احلى من الحلووو

تينن وربي

ونبي روايه ثانيه لأنه طرحج للروايات عجيب


بس حسافه كنت ابي حمد يتزوج زينه


وزينه مهما كان المفروض انها ماتصور وتعطي صورها حق احد غريب

 

[shaja]

واااي صج صج بدعتي حبيبتي يعطيج العافيه واتمنى اتكملين على هالمجال
لانه قصتج هذي فيها وااايد اشياء الكل يستفيد منها
يسلموووو حياتي

 

[rawabi]

انشالله اكون وفيت وكفيت بالقصه ... وتكون عجبتكم ... وكل وحدة قرت قصتي مشكوووووووووووورة

 

[rawabi]

بنات ترا النهايه صج تعيسة بالقصة بس ترا بالواقع كل واحد منهم مرتاح ... والله رزقهم عيال ومرتاحين بحياتهم ... فلا يضيق خلقكم وايد
ومشكورين عالمدح ... وانشالله اذا كتبت قصه يديده تتابعونها

 

[*FaRaWlA*]

روابي لا تحرمينا من قصصج

واسلوبج الاروع

تسلمين ويعطيج الف عافيه على هالسرد

واحنا بانتظار قصصج القادمه

 

[ترووفه]

نبيهااا كااااااامله

والله تعبت من القصه

مااطلع ومخربه نووومي

وكل يووووم انطر


يالله نبي نعرررررررررررررف النهاااايه وباااجي القصه كااااااااااااااامله

 

[زينة الأب]

واايد حلوة وأكيد نستفيد و يامة غلطنة بحياتنة بس الله عزوجل ما يكتب حق عبيدة إلا الخير. الحمدالله على كل حال. قصتج روعة

 

[ترووفه]

ياااااااااااااااااااااي

صرااااااحه النهاااااااااااااايه ماتوقعتهاا جذي

توقعت

حمد يرد لولو وايبوون يااهل وينسى زينه الخاينه

وصالح يقنع امه وترضى وتعجب بدلال وتاخذهااا

بس والله خووووووووووووووووووووووووووووش قصه وحيييييييييل اعجبتني

تسلم الايادي ياروابي

يعطيييييج العافيه

قصه رووووووووعه

والحين ترتحت بعد ماعرفت النهااااايه

وناطرين يديدج يااغلااا