زوج المستقبل ماعنده ثقافة انجليزية

[أروح فدوه لك]

مرحبـا بـنـات (كـويتـيات) ..
يسعدلي صباحـكم يالحـلـوات ...

عسى ربي الجميع بخير وصحة وعافيـة ان شاءالله ..
موضوعي شوي عفيسة ودخلت هالقسم لانه موضوعي احس هالقسم يناسبة
مو قسم الحلول والمشاكل الاجتماعية ...


بدخل بالموووووضووووع

انا طبعا من قبل طرحت موضوعي عن محتاره بين شخصين اللي يحبني واللي متقدم لي
وطبعا اكثر البنات عارضوا وقالوا شنو اللي يثبت لج انه يحبج وفعلا كان يتهرب وحتى قالي
الله يسعدج وياه وهو مومهتم وسمحت نصيحتهم واستانست يوم اكتشفت حقيقة الحبيب الكذاب
المهم مو هاي سالفتي سالفتي عن المتقدم لي الحمدلله انا بدلت رقمي وافقت على الرجال
وتم كتب الكتاب وحتى ابوي وامي وايد مستانسين به واهو معاي بنفس الداوم وايد يحبني
بس حب من طرف واحد ماكان يعلمني ولا ادري الا يوم تقدم لي واعترف لي ...

بس المشكلة وين الحين مو عارفة شلون اقول لكم اهو مو دارس ماعنده شهاده الا المتوسط (اعدادي)

اول يمكن او ثاني ..

ومن اروح مطعم او مكان راقي اللهجه كلها انجليزي واهو ولا كلمة اعرف ولو ان منصبة زين فالدوام انا مستغرربة .. بس خبركم كل شي واسطة قويه ودخل الدوام

مادري احس بكره لو تزوجنا شلون بيتصرف بسفر ولا بمستشفى ولا بمطعم او فندق او اي مكان
ماتعودت اانا اللي اتصرف بعد هو رجال انا ابي اعتمد على رجال الثقافه صارت مهمه

صج يحبني ويحترمني ويقدرني وعنده بيت وقاعدين الحين نأثثه مع بعض وكله على ذوقي مو مقصر بس حتى بالمفروشات يتكلم عربي !!

اقولة ادخل معهد يقول وين ادخل عمري مو مناسب الحين خلاص فات الاوان...

حتى اللي اعمارهم فوق ال40 ماشاءالله بلبل انجليزي

امس اخر مره رحنا مطعم بفندق راقي قالي مافي مانيو عربي قلت له لا قولي شتبي بطلب
قال لا انا ريال وانا اللي اطلب عفس الدنيا يابو لنا اوردر غلط

يعني خرايط راسي دايره بصراحة هو زين وبنفس الوقت شين بهالشي ..

والحل مو عارفة المشكلة اللي محببني فيه انه وايد متمسك فيني لي درجة حتى ثيابه قبل مايي بيتنا ياخذني يشغل لي الكام ورويني شنو البس لا والله تختارين لي شوي فقير اهو بس ذكي بنفس الوقت مايحب يعتمد على احد وهاي للحين ماصرت في بيته وراتبه كله بيدي اقوله مايصير عندي فلوسي يقول لا لازم تتعودين من الحين من ينزل الراتب انتي تعطيني النص والنص الباجي لج انتو البنات تحتاجون اكثر انا ادري لانه يحس انه مهري قليل 3000 دينار يقول احسه قليل بحقج

انا عادي ماهتم للفلوس او للي قاعد يسوية اهم شي عندي راحة بالي واكون مستوره وبس
بس والله يا بنات ماتتمنون يكون زوجكم مثقف على الاقل شي بسيط يعني انا وحده تعودت كل صيف اسافر مع اهلي مره تركيا ومره لندن مااتم فالديره شلون اذا وياه واهو مو راضي انطق يقول انا الريال وانا اتصرف والحل يعني ...

وخبرت اختي تقول انتي حره بحياتج دامج الحين على البر فكري زين ولا تتسرعين وبصراحة خايفة ...


ياليت تردون علي ولا تخاذون على كلامي خربطة داير راسي عدل عدل ومن امس افكر بالموضوع

 

[yam_yam]

و الله ياقلبي اقولج شي

قولي الف الف الف الحمدالله اللي ربي عطاج زوج جذي
بعد شنو تبين اسمحي لي بكون صريحة معاج لا تزعلين
الواحد يحمد ربه عالنعمه
زوجج مبين انه على ويهه و يبي يرضيج باي طريقة
و بعدين بقولج شغله ياما ناس عندهم مناصب و يسولفون و يتكلمون و تشوفينهم ثقافة و خلفية سياسية و حضارية و اجتماعية و اسم و سمعة و هم عالطل لا اسلوب و لا كلام و لا شي
و شدراج يمكن تاخذين واحد مثقف و يعرف يتكلم انجليزي بس راعي سفرات و خرابيط و لانه يعرف انجليزي مايقعد بالديرة

يمكن ضعف اللغة عنده هو سبب انه على نيته
و انتي هني لازم ماتتعمدين تحرجينه يعني تروحون مطاعم بوفيهات او اماكن فيها ناس يتكلمون عربي و اعتقد اغلب مطاعم الكويت يتكلمون عربي
و اذا سافرتوا روحوا دولة عربيه - دبي - لبنان - مصر وايد فيه دول يتكلمون عربي

و لازم تحطين في بالج شغله انه كل زوج فيه عيوب و بصراحه ماشوف ان هذا عيب في زوجج صدقيني حبيبتي


انا بمكانج اخذ واحد جذي على نيته و طيب و يحط لي و يفرش لي شقتي و يحسسني اني معززة و مكرمة عنده و ملكة بحياته
و لا شهادة و اسم و ثقافة عالطل مايحترم المره ولا يقدرها

اسمحي لي بس و الله احبج في الله و انتي نفس اختي عشان جذي شوي ردي قاسي عليج بس اتمنى تتقبلينه

تحياتي

 

[Perfume]

حبيبتي انا بالنسبة لي التكافؤ الدراسي والفكري مهم
الاخلاق مهمة صح بس حتى الشهادة مهمة
الحين انتي وافقتي وملجتي والحمد لله طلع خوش ريال
اللغة يقدر يكتسبها من الشغل والسفر او يدش معهد
حاولي تقنعينه بس لا تحسسينه انج مفتشلة منه
الله يخليكم لبعض ويسخره لج

 

[أروح فدوه لك]

اكيد اتقبل كلامج بوساعة صدر بعد واشكرج على مرورج الله يجازيج خير

بس مادري ليش متخوفه خصوصا لما اطلع اكثر الاماكن كل الموظفين يتكلمون انجليزي

ياربي مو عارفه اللهم مره كلمته بخصوص اللغه يدخل معهد يقول عمري مايسمح لي ولا افكر ..

 

[بنك بااستا]

اول شي الف مبروك حبووبه شوفي اهوا لزام يتعلم انجلش لانه اللي مومتعلم انجلش يعتبر متخلف وجاهل ومن العصر الحجري اشكره حاولي تقنعينه يدش معهد موعيب ماكو احد طلع من بطن امه يتكلم انجلش من كيفه حتى الاجانب تعلموها بالمدراس فمابالج احناا ورب العالمين قال وقل ربي زدني علما - والاموحاب يروح معهد يبليه مدرس ليه البيت ويتعلم واذامايبي هذه مشكلته لاتقدرون ترحون فلم اجنبي ولاتسافرون دول اجنبيه لانه الا راح دوله اجنبيه ومايعرف يتكلم انجلش ضااع من جيس اهله نصيحه الامايبي يتعلم خليه احسن لج

 

[RowTow]

مالها علاقه الثقافه بالإنجليزي, مو ثقافه إن الواحد يقدر يطلب من المطعم بالإنجليزي.
آنا بلبل بالإنجليزي و الكتب الإنجليزيه عندي مصففه ما أتكلم إلا عربي, و إذا ما فهمني الجرسون ساعتها بس أتكلم انجليزي. اهو بديرتنا اهو ملزوم يتكلم لغتنا, مو آنا اللي أتعلم عشانه.

أما إذا خايفه عالسفرات أصلا مو شرط بتروحين دوله أجنبيه بيكونون اللي هناك يتكلمون إنجليزي, ممكن ما يتكلمون إلا لغتهم أو إنجليزي مكسر و ما تفهمون على بعض.

كل شي بأوانه حلو.
و إنه ما يعرف لغه ثانيه و عارف نفسه و عادي عنده أحسن من اللي ما يعرف بالإنجليزي إلا يس و نو و تشيزبرغر و غاث الناس فيهم إلا يقولهم بكل مناسبه.

 

[ناتشوو]

بنك باستا
تنكتين
ولا من صجج تنصحين؟
لا توافقون ع اللي مايعرف انجليزي !!

ع العموم الموضوع
من المواضيع اللي لما اقراها
تطري علي مقولة
في كل علاقة بين رجل وامرأة طرف لا يستحق الاخر

 

[أروح فدوه لك]

زين خبرووووني على الاقل يعني ازواجكم شلون يتصرفون بهالامور

ومن فيكم زوجها مايعرف انجليزي شلون يتصرف شجوفينه انتي ماشيه حياتج وياه اوكي ...؟

 

[أروح فدوه لك]

لا والله اختي ناتشوو من صجي ليش انكت مافيها شي اخذ خبرات الاخوات ونصايحهم تهمني

لاني وايد افكر في بكره شلون حياتي بتكون معاه ..
بتكون ماشيه مثل ما انا ابيها ؟؟
بقدر اعتمد عليه ؟؟

احنا فالبحرين غير عنكم بالكويت اكثر الاماكن اللي نتعامل فيها انجليزي اكثر من العربي

فالمطاعم , فالمستشفيات , فالأسواق , فالفنادق ..والخ

بس حبيت اطرح الموضوع اريح بالي في حريم ازواجهم مثل خطيبي ماعنده لغه

وشلون يتصرف وجي حابه اعرف يعني

 

[ناتشوو]

مااشوف فيها شي اذا الزوجة تكلمت وتفاهمت
وأكيد يعرف يطقطق يمشي نفسه
اشلون عايش كل هالسنين بنفس الديرة؟

 

[سيماا]

الله يتمم لكم على خير ويكتب لكم اللي فيه الخير والبركه يارب والله انا اشوف ولد خالتي مايتكلم انجليزي ابد ومافي ديره ماراح لها والامور ماشيه
وبهالزمن ندور الستر واللي يحبنا مو ارفضه على اساس كماليات ،،،،
وانت قبل كل شي استخيري والله يكون بعونك

 

[صمت المرافئ]

ما أشوفها مشكلة
زوجج ايجابياته وااااايد
وما في انسان كامل
الكمال لله وحده
​

 

[عذبة السجآيآ]

عشان مايتكلم انجليزي اخليه واتردد فيه

بالعكس انتي بيدج تقدرين تخلينه يتعلم اشتري كتب له المعربه واشتري مجلات فيه كلمات سهله وانتي علميه الكلمات اللي تستخدم اكثر شي بالطلعات

انا زوجي موحيل بالانجليزي يطقطق ولم نطلع مكان عام يطقطق ويفهمون عليه واحيانا ماعليه منهم يتكلم عربي مصيرهم بيفهمون

بس كلش ما اييدج توقفين حياتج عشان لغه

 

[شادن33]

والله اضحكين انتي !!!!

الريال حبوب وحليو وياج في كككل شي نقزتي عل اللغه الانجليزيه

ياختي عنه ما تكلم انجليزي مابيدخل الجنه اذا اهو بلبل بالانجليزي استغفر الله

الله يهداج بس

 

[شادن33]

وخليله يطقطق بالانجليزي لاتحرجينه وبالاخير ليطلب منج تتفاهمين معاهم عشان لايبتلش
وكان الله غفورا رحيما

 

[أروح فدوه لك]

اشكر ردودكم والله بس خبركم متوتره وصايره بكل شي دقيقة عليه وكل شي ابيه يكون زين وتمام ادري الكمال لله سبحانة

بس كل واحد يتمنى الافضل له انا صح ماشوف فيه شي بالعكس حبوب وطيب ويحبني وايد بس كنت افكر هل هالشي بكون فالمستقبل صعب علينا خصوصا انا اعرف امشيه اموري بس خبركم الريايل بعضهم عيب المره تتصرف كله يبون اهمه


اشكركم مره ثانية وربي يوفقكم ووفقني مع نصيبي

 

[لمى الهاجري]

اممممممممم ممكن تعلمينه انتي كم من كلمة الي يستخدومنها بالمطعم وبالسفرات فقط باقي اللهجة ما تحتاجونها

 

[مدّهره !]

مااأشوف إنهاا سبب لرفض الزواج خيتو ...’

وخليه يتصرف نفس ماايبي لأنه لو إحتاج لك جد رااح يقول تكلمي ...~

لاتحطين مشكله من لاشيء ...’

 

[Patcholli]

عادي اهم شي يكون عنده معلومات عامه حتى لو بكل مجال جم معلومه مو شرط يكون بروفيسور بس عالاقل مايكون ميح مره وحده مخه فاضي واللغه ماعتبرها مقياس للثقافه حتى باوروبا في ناس مايتكلمون الا لغتهم الرسميه مايعرفون انقليزي وتتوهقين معاهم يعني مو معقوله باجر لي سافرتو لازم يتعلم لغه لغه عشان يقدر ينسق اموركم خليه على راحته وخل يشرحلهم بالعربي اذا مايعرف انقليزي .. لان اغلب المطاعم بالكويت دايما يكون في واحد يتكلم عربي حتى الفنادق والمطاعم الراقيه
وبخصوص اللبس هم عادي خصوصا اول ايام تلاقينه معجب بستايلج وايد من جذي يسالج ..

 

[Patcholli]

وحبيبتي ترى اهم شي بين الريال ومرته لي صرتو فبيت واحد انتو الاثنين تكونون متفقين وفاهمين على بعض ومرتاحين باجي الاشياء كلها كماليات
وعادي اصلا اخذيها على ظحك ..
اعطيج موقف يظحك مره بهولندا دشينا مطعم نبي نتريق والمطعم كان ريفي مايتكلمون انقليزي لوول
ريلي يبي يطلب بيض قام سوالنا زمبليطه سوا روحه ديايه تبيض وقام يسوي حركات بس عشان يفهمهم ان نبي بيض
الي بالمطعم كلهم ماتو ظحك علينا وانا عادي خذيتها على ظحك ووناسه واختنقت من الظحك بعد .. ليش اظيق خلقي واسويها مشكله بالعكس اعتبرته موقف يظحك و مافتشلت ولا شي

عيشي حياتج يبه واستانسي واهم شي لاتحسسينه انه مايعرف او انج منحرجه منه او مو عاجبج تقدرين توضحينله بطريقه غير مباشره وبدون ماتجرحين مشاعره او انتي علميه الاساسيات البسيطه