زوجي يقول أكل بيتي ماله طعم ؟؟؟

[جوري وبنفسج]

السلام عليكم

أختي الغالية ما عليج من كلامه وخلي ثقتج بنفسج عالية :ggdw:

وصدقيني ترى وايد ريايل كله يعذربون بطبخ زوجاتهم مع أنهم طباخات درجة أولى والسبب أنه متعود على طبخ أهله

أقولج سالفة وحدة من أهلي طباخها يهبل وفنانة بالمجابيس والمطبق بس زوجها أول ما تزوجت كان يعذرب طبخها ويقول طبخ مرت أبوي أحلى من طبخج وتقول يوم ذاقت طبخ مرت أبوه وإلا الله يديم النعمة زفر . بس لأنه تعود عليه فهو يشوفه أحلى

أنتي أهم شيء ثقتج بنفسج ما تهتز وخليج على شغلج السنع ومع الأيام راح يتعود على طبخج وما يستغنى عنه

شرايج أنا أول ما تزوجت زوجي جنني لووول كله يتدخل بطبخي لين قلت له لو سمحت خلني أطبخ ولا تتدخل بطبخي والحمدلله كنت أضبط كل شيء حتى مرة مسوية عزيمة للديوانية الكل يمدح بأطباقي ويسألونه زوجتك لبنانية :dddds: حتى حماي أتصل علي يتشكر لي على العزيمة أما زوجي قال لهم أصلاً هالطبخات طالعة من خشمي لوووول شفتي شلون يحبون التدقر :krkrkr:

بس هو الحين يتمنى أن أطبخ له وأنا اللي رافضة وخليت الخدامة هي اللي تطبخ وأطباقي اللي أتفنن فيه أسويهم بس حق زوارة أهلي واهله لووووول :dddds:​

 

[ام سلومd]

حبيبتي اطاط ان شاء الله الله يسخركم لبعض و يهديه و انشاء الله نسمع يوم انه ريلج يمحد طباخ و بالتوفيق

 

[bibi]

أختي أط أط ، أنا برايي كل انسان ابن بيئته مثل مايقولون والشي اللي متعود عليه هو اللي يميل له ويشوفه الأفضل ومن ضمن الأشياء هذي الأكل وغالبية الرجال فموضوع الأكل تقليديين جدا مومثلنا نميل ونتذوق كل جديد ، يعني اذا ما عجبه أكلج مولأنه طباخج مو حلو لأ يمكن بالعكس أنتي أفضل من طباخ أهله بس هو متعود عليه ويشوفه حلو ، حاولي تقلدين أكلهم بالبداية وتدريجيا حاولي تضيفين لمساتج إلى أن يتعود على أكلج ، وصدقيني الموضوع مايقتصر عالأكل فاللبس فكل شي يعني لانحاول نفرض النموذج اللي احنا نشوفه أحسن بدون مراعاة رغبات الطرف الآخر حتى لو كان بحسن نية .

 

[فـديـت ^-^ روحـي]

يمكن نفس ماقالوا البنات مشتاق حق لمة أهله

الله يسخره لج ويعمي عيونه عن طباخج ويحس إنه حلو لو انه ما ينذاق

 

[أم علاوي 14]

اختي ذكرتيني بنفسي اول ما تزوجت

في بيت اهلي كنت انا الطباخة الماهرة ويقول لي هنيئا لزوجج

وتفاجأت بأول طبخة طبخت له قال لي وتمدحين عمرج ، قومي تعلمي الطبخ احسن لج
وعصب علي
مع الايام اكتشفت ان زوجي ما يحب البهارات الكثيرة في الاكل وما يحب الملح ، ولا ازيدج من الشعر بيت لا يحب اللحم ولا الدياي ولا المعكرونة ولا السلطات ولا الشوربات

ويموت على اكل المطاعم ، تدرين شارع المطاعم بالسالمية حفظوا صوته وبيتنا من كثر ما يطلب لهم

اول شي كنت اتضايق مع الايام تعودت
بس كنت اسأله وايد شو تحب واشلون تبغي الاكل
والحين بعد مرور 3 سنوات على زواجنا بديت اضبط له الاكل بالطريقة اللي يحبه وقام يستانس على اكلي
لكن كنت دايما اطبخ اللي احبه واطرشه حق خالتي واخواته عشان يعرفون اني اطبخ حلو وهم يستانسون على اكلي

انتي اصيري وشوفي شو يحب زوجج عشان ترضينه وترضين نفسج وسألي امه عن الاكل اللي يحبه واذا ما تعرفين الطريقة سأليها شلون يحبه

والله يعينج حبيبتي واذا تحبين زوجج بترضينه ان شاء الله

 

[سميرة و حلوة]

حبيبتي يمكن انتي اكلج حلو بس ريلج مو متعود عليه او يمكن انتي لازم تتعلمين اكلات فيها بهارات وايد (الاكل الكويتي ) انتي سألي خالتج ام ريلج اهو شنو يحب وعرفي الطريقة ترى مو عيب انج تسألين

 

[أط أط]

السلام عليكم ورحمة الله وبركاته ..

مشكورين بنات ما قصرتوا ..

كلامكم شنو ريحني ..

الله يعطيكم العافيه ..

والحل الوحيد صج .. لازم أعزم أهله ..

الله يوفق الجميع يارب ..