زوجي يبي قرض

[حبك سراب]

صباح الخير بنات زوجي جاء وطلب مني اخذ قرض لان عنده ديون وديونه بحاولي 3 الالف المهم قال انا اعطيج القسط الي ينخصم منج لان انا علي قرض مايصير اخذ قلت افكر بس انا ودي اقوله لا بس بسلوب

 

[Vaniela]

ارفضي عسى ماشر تاخذين قرض ..
قولي انا ماحب الارتباطات و لا احب اكون مديونه تبي حوش من راتبك ..
و على حسب القرض شيبي فيه << مع انه شكله يبي يسافر لانه موسم سفر .. ما علينااا
نصيحه لا تسحبين له قرض .. وموال اعطيج كل شهر تسددين ماخوذ خيره ..
يبيله قرض يسحب لعمره يروح يتسلف انتي شكووو .. مرته على العين والراس تربين العيال تحملين واتيبينهم تسون اكله تراعينه اما اتدين لحسابه خير ان شاء الله ..
لا يقص عليج و اطيح براسج ..
واستخيري عن الشك

 

[MissChoco]

والله على حسب ريلج ,, اذا صج مديون واهوا ريال والنعم فيه وقايم فيكم ومو مخلي عليكم قاصر كلش وطلباتج اوامر اي يستاهل
اما انه مايدري عنكم ومايصرف عليكم لا والله لا تاخذيله

 

[ميمي..]

والله على حسب ريلج ,, اذا صج مديون واهوا ريال والنعم فيه وقايم فيكم ومو مخلي عليكم قاصر كلش وطلباتج اوامر اي يستاهل
اما انه مايدري عنكم ومايصرف عليكم لا والله لا تاخذيله

معاهاااااااا
ولو انيم ااحبذ المره تعطي رجلها فلوس احس بتفتحون باب مشاكل على نفسكم

 

[happy january]

خليه ياخذ قرض حسن اذا فعلا مديون من الزكاه 3000 وقسطه 50 والله يفك عوقه ان شاء الله

 

[happy january]

وعني آنا اذا زوجي طلب قرض اعطيه وانا مغمضه لاني اعرف شنو اهوا ؟ وكل وحده وزوجها والله يغنيه عني وعن مالي

 

[جيكره(و)تتغلى25]

اممممممممممم اممممممممممممممممممم فكرت لو انا مكاااانج اول شي اخليه يسوي استقطاع بعدين اخذ له القرض

اذا كان رجاااال سنع ومومقصر معاج ولا له خرابيط وسوابق اخذ وانا مرتااااااحه

 

[*الشيـــهـانـة*]

على حسب زوجج انتي اكيد تعرفينه عدل وتعرفين طبعه وتصرفاته اذا يستاهل اوكي واذا لا لاتاخذين له
مع اني ضد انه المره تاخذ قرض لزوجها

 

[ام الحوراء زينب]

لو ريلج مو مقصر وياج ومعاشه بايدج اخذيله وانتي مرتاحه

 

[Mrs.Q]

بنات مادري اتخيل احسن اوتطلعين من هالسالفة
بس اذا ضمنتي مليون بالامية انه يرد فلوسج اوكي
قوليله حبيبي كلي فداك بس انا انسانة اخاف من الالتزامات ولا انت تستاهل اعطيك حياتي

 

[انسام الكويت]

لا تاخذين قرض باجر كل ما اعتاز ياج يركض يبيج تاحذين قرض ويتعود ياخذ منج ويسويها

زعله وسالفه اذا ما اخذيتي له قرض من اول مره رفضي طلعي اي عذر باسلوب حلو

قولي ودي أساعدك بس ماقدر أبوي محلفني أني ما أخذ قرض غير اللي اخذته ومابي اكسر كلمته

اي موقف قولي له حتى لو مو مقصر بس اهو ريال محتاج فلوس يقدر يطلع فلوس من تحت الارض لكن لا ادبسين عمرج بقرض ماهو لج

نفس المدرسه اللي خذت قرض لزوجها واخرتهم راح سافر فيهم سوريا ينقط فيهم عله ساريا والنور والمسكينه اللي خذت له قرض تدبست طول عمرها

 

[كويتية نايس]

اب اب اب

 

[منو انت]

ماادري بصراحه ماادري شنو اقولج بس انتي ماقلتي شنو طبعه عدل يعني هل اهو كريم معاج اذا تبين شي مايقصر او شنو

بس بشكل عام مااحب هالسالفه مع ان بعضهم يحقد على مرته اذا ماتعطيه بس ودج مايتعود على هالسالفه

 

[بيتي بوب بس كويتيه]

مادري علي حسب انتي تحسينه قد المسؤوليه وبردهم اخذيله

 

[Om_Ksha]

انتي معذوره عندج قرض بالاساس ،، لي خديتي قرض شيبقى من المعاش ؟؟؟؟


وترا شويهً٣ الاف بس مع الفوايد وغيره شوفي جم توصل ،، وهل الشي اللي محتاجله يستاهل ولا شي عادي ،، لازم تعرفين السبب
وانتي ادرى بزوجج ،، بس علا قوله البنات راح تفتحين باب مايتسكر

 

[aloooya]

انا ما اايد القروض

 

[مومهم الاسم]

انا اقول مدرى انتى ادرة بزوجك بس لو انا مكانج كان قالت لا بنت خالتى تموت بزوجها وخذت قرض عشانها والحين مومعترف بالقرض وهى الى قاعدة تدفعة وكل ماتكلمة يقولها انا مديون وماحيلتى شى وليش انتى زوجتى اجل وموظفة مدرى انا منها قالت لو اتوظف ويطلب زوجى مستحيل اعطيةوانتى بكيفج الله يعينج صج موقف صعب

 

[بخـــارى]

لاتعطينه وخلاص

 

[كـ غلا ــلي]

والله يا حبيبتي اخذيها قاعده مني لو ريلج زين ولا شين لا تاخذين قرض عشانه الدنيا هالايم تخرع

اللي اليوم حبيبج باجر يقلب عليج انا مو قاعده اخرعج ولا نظرتي متشائمه بس المثل يقول ابعد عن الشر وغنيله

وبعدين 3 الاف حق شنو عنده ديون خل يوفر من راتبه وبالاساس ليش تدين اذا مو قد الدين وبعدين ما يعرف انه

الدين عمات عين شوفي لا يكسر خاطرج ترا صارت فيني وبقيت اتهور بس الحمدالله بالاخير ما عطيته وهم سواها

فيلم وزعله بس قلت طقاق ليش انا امه ولا ابوه يزعل علي لين ما عطيته قلت لك ما اقدر وخلاص احترم رايي

ولا تبررين له وايد قولي مو حابه اخذ قرض بقولج انا بدفع القسط قوليله لكن بكون باسمي والله نفس السناريو مر علي

 

[حبك سراب]

بنات انا قلت لزوجي مااقدر مااحب احط على نفسي الديون قال كيفج على راحتج وراح يعرض سيارته للبيع