زوجـي و الميـزانية !!

[t0o0fa]

السلام عليكم

شلونكم كويتيات وحشتوني من زمان عن المنتدى

يايتكم اليوم ابي اقولكم مشكلتي الي كل يوم قاعده احسها تزيد و تسبب خلافات بيني و بين زوجي

اللي اهي الميزانيـــة .. صارلنا سنة و نص مو عارفين نضبطها ومافي توفير كللللش

بداية زواجنا كان زوجي مو مثبت بشغله فـ ما كنت اطالبه بغير مصروفي الاساسي 60 دينار باقي الكماليات من معاشي .. و بعدها حملت و قسمنا المصاريف بينا اهو عليه تكاليف الولادة و المستشفى و انا علي ملابس البيبي

الموضوع اللي سبب أزمة اني خذيت قرض ياكل نص معاشي فـ ما قمت اتهنى فيه وبسرعه يطير

و الحين انا مو عارفه اتاقلم مع هالشي و لما اطلب من زوجي زيادة يقول ماعندي انا اصرف على البيت و كل الي عندي لكم واهو فعلا ما يبقى من معاشه شي

بس الي يحز بخاطري يقولي انتتي الخلل منج مو عارفه تصرفين و انا من خذتج ما شريت شي حق نفسي وانا فعلاا اشوفه جذي ما يصرف شي على نفسه الا ما ندر

قلتله حبيبي انا ما قلتلك لا تصرف على نفسك ولا تتهمني انا بس بالتقصير .. كونك ما تصرف شي على نفسك معناتها انته بعد مو عارف تنظم ميزانيتك

و يااب لي برنامج ينظم الميزانيه وقدرنا المصروفات و هم ماكو فايده

سؤاالي الحيين .. هل هالشي طبيعي ولا انا مبذره ولا ريلي بخييل

وشلوون انظم ميزانيتي ​

 

[om MaRyooM]

في نفس حالتج وايد


والغلط من الاساس يكون بالقروض والديون والاقساط لالي تقص المعاش قص ..
واساسا الحياة غالية حتى لو معاشج 2000 والله بيطير نص الشهر !!
فمابالج اللي معاشاتهم عالقد !!

انشالله ربج بيفرجها واستمري عالدعاء ولاتنسين الصدقاااات عشان معاشاتكم يكون فيها بركة

وسالفة ان ريلج بخيل مو بخيل هذي انتي اللي تقررينها لأن انتي ادرى بوضع بيتج
بس على الوصف اللي تقولينه احس اهو مو بيده عالتقصير غصبا عليه



والله يعينكم

 

[ام عفراء]

الله يعينكم صراحة لانه الميزانية مشكلة

ومعاناة كل اسرة في هالزمن الغالي

...

انا بحاول اعطيج نقاط مختصرة يمكن تفيدج

١* تحددون الاستقطاعات اللي عليكم ( قسط البنك - قسط السيارة - معاش الخدامة - اشتراكات التلفونات والانترنت - اشتراك جريدة مثلا ... الخ )

٢* تحددون مصاريفكم الاساسية ( مشتروات الجمعية - المصبغة - البنزين .... الخ ، عموما المصاريف اللي موجودة كل شهر يتحدد لكل شي مبلغ معقول )

٣* كل واحد منكم انتي وزوجج يحدد له مصروف اسبوعي هذا ينحط في البوك لاي شي بالخاطر برا المصاريف الاساسية

٤* المبلغ اللي يبقى حسب قيمته يتحدد جزء منه للتوفير وجزء للسوق او الطلعات .. ومو شرط كل شهر تصرفونه كله اللي يبقى خليه بروحه ممكن تستخدمينه الشهر اللي بعده

طبعا هذي مجرد كم نقطة تذكرتها واكيد الامر يحتاج تفصيل اكثر حسب كل عايلة وعددهم ومصاريفهم

لكن دايما اللي يتكلمون عن الميزانيات يشددون على اهمية وجود مبلغ للتوفير حتى لو بسيط
وانا بعد اقول زيادة على هذا احنا مسلمين .. و المفروض ماننسى الصدقات حتى باقل شي (( قليل دائم خير من كثير منقطع )) حاولي لو كل شهر تتصدقين حتى لو ٥ دنانير صرفيهم ارباع و خليهم كل مارحتي مكان تصدقي منهم عالمحتاجين


ودايم ادعي انه الله يبارك لكم في رزقكم
وابتعدوا عن الربا والبنوك الربوية

عشان تزيد بركة المال


واسفة عالاطالة

تحياتي

 

[ماتغير شي]

^^^


معاهاا

 

[al-musk]

لا طبعا مو بخيل مدام كل شي عنده لكم .. بيني وبينج الحياة غاليه بالكويت ومو نفس أول .. أنا أقول حاولو تقسمون كل شي بالضبط وحاولو تتحايلون بالموضوع وخصوصا بالطلعات يعني مو 24 ساعه قازين وطالعين( طبعا ذا كنتو تطلعون حيل) وممكن تقللون روحاتكم للمطاعم والأكل برا البيت اذا كنتو دايم تطلعون يعني مو شرط كل أسبوع مطعم .. يعني حالو تقسمون المعاش بأظرف وكل ظرف مايتعدا عالثاني ..

الله يعينج .. هي يبيلها تنظيم شوي

 

[Patcholli]

تقولين مايبالقه شي ..!! بعد شنو بخيل واعليا ..!
تقولين مايلحق يشتري شي حق روحه ومعاشه طاير ..
لا ريلج مو بخيل حرام لاتظلمينه بس انتي خذيتيه وانتي عارفه وضعه وظروفه
وشوفي بالنسبه لنا احنا الحريم لو معاشنا 100000000000 هم لي اخر الشهر مايبقالنا شي
حبيبتي نظمي امورج
وقسمي معاشج
ولاتطلعين وايد
خلي الطلعه مره وحده بالاسبوع وخلي مبلغ مخصص معاج بالبوك تصرفينه وماتصرفين غيره
وحاولي تيمعين حتى لو 50 دينار كل شهر

 

[الأميرة جوري]

حاولي تنظمين كل شي ليمن تعدل ظروفج

 

[غلاي رورو]

نفس المشكلهبس انا زوجي المشكله فيه مايمسك فلوس بيده ويطيرها

 

[فرزاشيهـ]

مع ام عفراء ماشالله عليها كفت و ووفت .،

 

[لمى الهاجري]

المفروض انكم تحطون رواتبكم مع بعضها البعض وتحطون لكل شي ميزانية والبيبي المفروض اول ما ينولد له حساب بالبنك او حصالة تحطون له كل شهر دينار وللحاجات الاساسية ميزانية معينة خل نقول بفلوسكم 500 دينار بالقطري 5000 هاي فقط الاشياء الاساسية اما الفرعية من ملابس كشخة اشتروها فقط بالمناسبات عيد ورمضان وهكذا حطي جدول للحاجيتج الاساسية وجدول لاشياء الفرعية لا تشترون شي انتوا مو محتاجينه

 

[زوجة عزيز]

اذا على قولتج كل اللي عنده لكم وانتي واثقه من هالشي بعد وين بخيل !!! البخيل اللي يخش فلوسه ولايصرف منه ولا يطلع منه الفلس الا بالعسر

 

[حرم_الغلا]

مع ام عفراء

 

[مولاي الفرج]

موبخييييييل بالعكس مومقصر ماشاءالله

واتوقع لان عندج اقساط متوهقه

الله كريم كلنا نعاني

 

[مناير ...!]

مو بخيل ويمكن انتي مبذره
لانه الفقير قاط فلوسه كلها عليكم وانتي تخلصين من معاشج وتلفين عليه

 

[(*ام عهــــد *)]

ماقصرو البنات

 

[@ براءة طفوله @]

و الي زوجها يصرف اكثر منها مايصير نص الشهر الا على الحديده
شتسوي

 

[ليتهم يدرون]

مشكلتج نفس مشكلتي بالضبط ننطر المعاش على احر من الجنر ولما نستلم يطير بسررعهالله يطرح فينا وبفلوسنا البركه قولوا آميييين

 

[مطيريه ماركه]

والله انا مستغربة من الامور اللي يقولون عنها مفروض ومفروض ومفروض
كل نفس على الله رزقها شخليتو لافريقيا
اختي العزيزة انتي وزوجج تعانون من مشكلة بكل بيت وهي سوء التدبير موو اكثر
انا لو اقدر اقدم لج نصيحة نصحت نفسي