زوجة اخوي ناشبت لي بحملي

[REOOM]

السلام بنات كيفكم

راح اخش بالموضوع
انا حامل بالرابع هذا اول حمل لي
وانا ساكنه ببيت اهلي عشان الدراسه وكذا وزوجي بعيد عني
المهم عندي زوجة اخو قلق وتحب الاسئله فضوليه من الدرجه الاولى والله يرزقها يارب ميته ميته ع الحمل سيرتها قايمه قاعده الحمل عندها بنت عمرها سنه و6 اشهر وتبي تحمل من اول ماطلعت من الاربعين تبي ولد وتسوي نفسها ماتبي ولد وانه عادي عندها الله يرزقها يارب

اي وحده تحمل بجماعتنا تنهبل وتجلس طول اليوم متنرفزه
المهم انها نشبت لي بحملي
درت اليوم اني
حامل من بكره جات قالت انا حلمت لك حلم وفسرته قال انك بتجيبين بنت انا متاكده ان فيك بنت
وكل يوم عند اخوي تقول انا حاسه انها بتجيب بنت
وكل يوم يوه متنتي نحفتي سمرتي بيضتي صدرك كبر شفايفك انتفخت
تجيني تقول وش تشتهين بحملك تاكلين واذا قلت لها قالت ايوا انا بحثت بالنت قالوا اللي تحب الحامض فيها بنت

حتى اذا جات تحكي عن اللي بطني تتكلم بصيغة المؤنث نشيلها ونوديها ووشش حلاتها ومدري ايش
بجد لوعت كبدي والله يابنات عينها ماتطيح مني بس تشووووووووووووفني طول الوقت

وش اسوي يابنات احس انضغطت منها
انا عادي عندي بنت ولد بس هي اقلقتني تبي محد يجيب ولد قبلها استغفر الله يارب
شلون اتعامل معها هذي
احيان يجيني الشيطان ويخليني اقول يارب اجيب ولد عشان اقول لها احساسك غلط
واحلامك كذب تدرون وش شككني ان حلمها كذب لانها قالت ترى انا مو مفسره من راسي ترى الشيخ قايل
وهي قبل مااتزوج قالت لي نفس الحلم لما كانت حامل وانها بتجيب بنت بس الظاهر نست


والله مسببه لي قلق وخوف اخاف من عينها بسم الله تخوووووووووووف

ردوا علي تكفووووووووووووون بنات:eh_s(2):​

 

[نورعيني أنا]

الله يكون بعونج من هالاشكال اللي عيونهم مبققه على غيرهم الله يعينج على مرت اخوج هذا اللي فيها حسد اعوذبالله تبي اللي عند غيرها لها لوترضى باللي الله قاسمه لها جان الله عطاها على قد نيتها انا هالنوعيه حيل اخاف منها لانها لوبكيفها جان حتى الهوا تحبسه عني بس انا دايم ارقي نفسي وانتي بعد رقي نفسج والله يكافيج شر نفسها وعيونها واللهم من اراد بي سوء فااشغله في نفسه اجعل تدبيره في تدميره ردديه والله يصلحها ويحفظج يارب

 

[نوووور الشمس]

اللة يكفيج شرهااااااااااااا

والنوعية هاذي وااااااجد

 

[احبس دموعي]

الله يعينج عليها ارقي نفسج وعطيها طاف

 

[بحرينيه كوول21]

وييي استغفر الله
اذا جفتيها قومي عنها لا تخلينها اتطالعج واقري ايات من اتجوفينها
ودايما قولي في خاطرج وجعلنا من بين ايديهم سدا ومن خلفهم سدا فاغشيناهم وهم لا يبصرون
واذا تسالت غاوري عنها وغيري المووضوع
انتي باي شهر ؟حللي ولا تقولين حق احد شنو فيج
اللهم ياكافي على هالاشكال

 

[مضيعة برقعها]

طنش تعش

 

[*الغاليه*]

لاتشغلين بالج بكلامها

هذا طبع بأغلب الحريم

ويمكن اهي صج مهتمه فيج مو غيره اختي احسني الظن فيها

واذا خاايفه من عينها على قولتج دااايم حصني روحج واللي ابطنج منها او من غيرها

ربي يتمم عليج حملج ويقومج بالسلامه ويرزقج ماتتمنين
​

 

[الغاليه ام احمد]

خليها تقول اللي تبيه اشعليج منها وحده فاضيه وبتسولف

واذا انتي ماله منها روحي بيت ريلج اريح لج

 

[أماني عمري]

كل ما تقبل عليج قولي بقلبج اللهم اكفنيهم بما شئت و ادعي بعد بقلبج رب اجعل ما بيني و بينها بردا و سلاما علي كما جعلت النار بردا و سلاما على سيدنا إبراهيم و انتي ادعي لها بالهداية و الصلاح

 

[عتيبيه رزه]

وااااااااااي اذكريني في مرت اخوي
بس انا على اخف منج يعني متنتي ضعفتي شعرج فيه شيب شعرج خفيف شعر ايدج طلع حواجبج يبيلهم حف واهي تدري اني ماحف ولا اجيسهم ظهرج فيه شعر واااااااي شلون تاكلين جذيه شلون تشربين القهوة التركية واذا بنطلع ومالي خلق ابدل البس عبايه ليش عبايه تبدلي تاكل قلبي وبعدها تقولي عباتج حلوه بس ليش جذيه وليش جذيه جان حطيتي جذيه جان سويتي فيها جذيه واتعلق ههههههههه على كل شي اسويه والبسه اتعلق يعني انا بالذات حاااااااااطه علي زووووووووووم وانا طااااااااااف عارفه نفسي وواثقه بنفسي خلاص مالي شغل فيها اضحك عليها وامشي هذا دليل اني ناجحه واني محضر الانظار وكله لااااااااازقه فيني انا اكثر وحده هههههههههههههه

 

[ام - وهابي]

الله يعينج عليها حبيبتي
واقري على نفسج ترى العين حق

 

[سارة ة]

طاااااااااااااف

 

[Babies setter]

حبيبتي خليها تبربر لما تشبع
ورقي نفسج والله يرزقج باللي فيه خير وكل ماسألتج بنت وسولفت بنت وبنت قولي اللي من الله حياه الله
وااااي نفس طريقة حماة اختي چذي بعد واذا كلش مافيه مفر قولي لها كل شي بوقته حلو وساعات يعني جنج ماسمعتي
واذا سألتج متى ولادتج ولزمت تعرف بالحشرية قولي بالشتا انشااالله لاتعطينها وقت محدد وصدقيني بتظل تحسب لجججج ههههه
الله لايبلانا استغفر الله

 

[منو انت]

الله يعينج تصدقين انا عمري ماسالت احد عن هالسوالف يعني انتي اي شهر ومتى الولاده وشنو قالج الدكتور عن السونار ؟ حتى لو رفيجتي او مرت اخوي او اي احد مستحيييييييييييييل اذا تبي تقول تقول اذا ماتبي شي مايخصني واذا على مرت اخوج اسمحيلي اقولج ان ماعندها ذوق اهي شكو وبعدين اذا سويتي سونار ورديتي قولي زوجي قال حق الدكتور مانبي نعرف علشان تموت حررره علشان تحرم تسال في شي مايخصها وبالذات الحيين انا اشوف الكل مايقول السونار شنو او متى الولاده يعني مو بس انتي صار الغلط تقولين الكل متفق الحيين على الخش

 

[حبي بيرين]

حافظي ع الاذكار اهم شيء واذا جابت طاري الحمل والبنت والولد قولي كله من رب العالمين كله واحد وش الفائدة اذا جبت ولد فية توحد او تخلف عقلي المهم العافية والصلاح

 

[ألايانفس......]

أقري على نفسج على طول

ولاتعطينهاِ المجال أنها تفتحلج هالسيرة

وإذا قدرتي شربي من غسولها من دون ماتشوفج ....

وعسئ الله يهون عليج ،،،

 

[ملوكة الامورة]

الله يعينك وعطيها طاففف

 

[سارووه الاموره]

ويع قوليلهااا بويهها لوعتي جبدي خلاص احد الج اني ميته ع العيال ؟؟ قولي ياريت يطلع كلامج صح واييب بنت سكتيها

 

[حمامة مكه]

اهم شي حصني نفسك يوميا
الصباح والمساء

وان شاالله تجيبي ولد

 

[أم نواف غير]

الله يهديها انشالله واللي كا تبه الله يصير والله يرزقج الذريه الصالحه يارب ويبعد عنج كل حاسد
الله يعينج​