رودي للاستشارات الهندسية

[روزه]

رودي بغيت استشيرج انا عندي في الطابق الارضي صالة الاستقبال مع حمام الضيوف معزوله بعدين المعيشه وايد عوده فيها المطبخ الرايسي ومطبخ التحضير المطل على الصاله مع الحمام تكرمون فش رايج ابي ملاحظاتج اخليها كبيره ولااحط فيها غرفه

 

[rudy]

والله يعتمد على الحجم اذا قدرتي اطلعين منها غرفة من غير ما اتاثر على حجم غرفة المعيشه ممتاز عشان لما يزورك احد معاه طفل وخدامه او اطفال صغار تقدرين اتخلينهم بهالغرفة مو مرتزين جدامك

 

[الكيكة]

السلام عليكم ... رودي اشلونج ..

انا الحين شريت اثاث لصالات الاستقبال و المحل دزولي مهندسة الديكور لبنانية خذت قياسات صالاتي وبترسم لي خريطه فيها توزيع الاثاث .. و عطتني رايها بصالاتي و الصبغ وقالت لي جم فكره لما زارتني ابيتي ... افكارها عجيبه بصراحه ... الحين مرحله الووول بيبر و عقبه الستاير .. عطتني بعد افكار للستاير وقالت لي اروح اشوف شغل جمال المير لانها تتعامل معاه

سحبتها لجناحي اللي فيه غرفة نومي و عطتني بعد رايها و جم فكره ... واحد من اقتراحاتها بغرفة نومي اني اغير النيون ( المخفي ) من الابيض للمصوفر .. و قالت وايد حلو ديكور السقف بس الصبغ الابيض مغطيه فقالت لي صبغي بس القيطان اللي بالسقف فضي بذهبي نفس اثاث غرفة النوم وصبغي المساحات اللي بالوسط نفس لون الطوفه ( بيج ) اما المساحات الخارجيه خليها مثل ما اهي ابيض ..

وايد استفدت من ملاحظاتها ابيتي .

 

[rudy]

انا عيزت اقول لكم بليييييييييز لاتحطون نيون ابيض حتى حق سور البيت خلوه مصوفر مو اصفر لا مصوفر وايد احلى من الابيض الي كانه بقاله
والله يوفقك كيكه وتهنين في بيتك

 

[fife4ever]

الكيكة منو مصمم الي تعاملتي وياها

 

[الكيكة]

ايي والله رودي صاجه ذكرتج لما قالت لي.

هلا فايف فور ايفر .. انا ماتعاملت مع مصممه
انا رحت رومانتك للاثاث و شريت منهم 3 اطقم قنفات و كرسيين ... فقالولي انهم بيدزولي مصممه ابلاش هديه من المحل علشان تعلمني اشلون ارتب الاثاث اللي شريته منهم و تعلمني عن الصبغ و الستاير و ديكور الصاله بشكل عام ... يقول هذي طريقتهم يهمهم ان الناس لما يدشون بيتي يعجبهم فيكون دعايه لمحلهم

ترا مو بس رومانتك .. حتى دومين و ايثن الن يدزون ديزاينر للبيوت اذا شريتي منهم .

 

[fife4ever]

ايه انتي صاجه الكل الحين حتى السراميك

 

[رقي]

رودي احاول انزل المخطط لاني ماعرف

 

[fife4ever]

بغيت منجره زينه بنات بسرعه

 

[rudy]

منجرة السنديان 9062341
يقولون شغلهم حلو

 

[روزه]

استشاريتنا العزيزة الله لا يحرمنا من استشاراتج الثمينة الي فاددتنا سؤالي اليوم المطبخ احطله وحدة تكييف ولا من التكييف المركزي وشنو الحل الي مايخلي الريحه تدخل الصاله وخصوصا اذا كان سمج:eh_s(4):

 

[fife4ever]

مشكوره رودي حبيبتي ما قصرتي لا خلا ولا عدم

 

[rudy]

استشاريتنا العزيزة الله لا يحرمنا من استشاراتج الثمينة الي فاددتنا سؤالي اليوم المطبخ احطله وحدة تكييف ولا من التكييف المركزي وشنو الحل الي مايخلي الريحه تدخل الصاله وخصوصا اذا كان سمج:eh_s(4):

والله اذا كان المطبخ متصل بالبيت خليه مع تكيف المركز ولكن خلي شفاط المطبخ قوي يعني خلي شفاط فوق الشولة وشفاط او 2 بالسقف ووقت السمك لاتفتحون باب المطبخ نهائيا واهم شي ان مكينة التكيف ما تصير يم شفاط المطبخ لان البعض يحط المكينه فوق سطح الملحق وتلقين ريحة الطبخ تدخل من التكيف المركزي حتى لو طبخ بيت الجيران اهم شي المكاين بالسطح فوق واتقوين الشفاط.
وفيه نقطه مهمة ذكرتها الحين لاتحطين راجع بالمطبخ خلي التكيف بس يدفع هوا مايسحب مثل باقي الغرف ولازم سقف المطبخ مسكر بالكامل عشان ما تعبر الريحة
​

 

[top 4 ever]

استشاريتنا العزيزه رودي الله لا يحرمنا من نصايحك المفيده
ودي اعرف شنو اخر موديلات الاسقف بالنسبه للغرف والصالات والنوم الرئيسيه انا بحثت ولقيت المخفي بس شنو الحديث منه ولك جزيل الشكر

 

[روزه]

الله يعينج علي اختي رودي شرايج بفكرة اثاث المطبخ لما يكون صبه ثم تلبس المنيوم وابي خبراتكم يلي سويتوها

 

[الكيكة]

قوه رودي اشلونج

رودي اشرايج بغرفة الملابس ينحط لها قطعة سجاد ولا ما ينحط شنو الاكشخ؟
انا اشوف صور القصور مايحطون سجاد بغرف الملابس

و اذا حطينا شنو حجمها بالنسبة للغرفه .. يعني صغيرونه ولا كبيره؟

مع العلم اني احب لما ابدل ماكون واقفه حافيه عالارض .. خصوصا اذا توني طالعه من شاور اخاف ازلق

 

[sara3]

الكيكة الف مبروك علي المطبخ اتهنين انشاالله . شكلش لفيتي وايد وتعبتي علية اذا ممكن اتفيدينا باسامي المحلات اللة لا يهينك

 

[الكيكة]

هلا ساره الله يبارك فيج و تسلمين عالدعوه

ايي والله و بدون مبالغه لفيت على كل المحلات بالكويت من ابل و الشايع وباجي المحلات اللي بحولي و اللي بالشويخ و اللي بالري مثل توب روك ورحت محلات تجهيزات فندقيه مثل الوزان.. وايد اشتطيت عالمطبخ .. لان الصور اللي اشوفهم بالنت يزوغون القلب و حبيت اسوي مطبخ مثلهم و باقل التكاليف.
طبعا مطابخ حولي وايد غاليه نار مادري على شنو.
لا واللي بدع عاد محل ورا ذي كاسل اسمه برازيليا يسوي مطابخ ستيل و راني مخطط و فاتورة مطبخ مسوينه لوحده بيتها بالبدع اب 15 الف .. الله لا يخفس فينا
طبعا عقب الفراره و عقب ما عرفت اسعار الستيل و الالمنيوم و الفينول .. و لان مطبخي ماشالله كبير .. قررت اخذ ارخصهم ونفس اللي ابالي .. وهو الفينول و اخترت لون الخشب الغامج و دخلت معاه الستيل ( المسكات و دار مدار الابواب) .. المتر اب 60 و طلع المطبخ اب 1890 دينار و حطيت الشفاط و الاجهزه الكهربائيه كلها ستيل و حطيت ثلاجه 3 ابواب ستيل و خليتهم يفصلون لها خزانه متصله مع المطبخ صارت جنها بلت ان built in و حطيت جزيره و سويت فيها جريل ( لوح ساخن ) للجاينيز فود و حطيت 4 كراسي رفاع مثل كراسي البار

مطبخي طلع طلعهههههههههههههه .

روحي المحلات اللي بالشويخ على امتداد شارع الرخام .. سطره يم بعض اولهم كيو كيتشن خوش شركه و معاملتهم راقيه.. و بعدين تمشين شويه تلقين السفير ( مو ذاك الزود مع انه سوالي مطبخ التحظير بس معاملته زفت ) و العالمية ( سوولي مطبخي الرئيسي ) ... و بعدين تكملين شويه تلقين واحد رابع ... تروحين تختارين اللون و تقوليلهم الموديل اللي تبينه و يرسمونه لج عالكمبيوتر و تشوفينه اذا اعجبج يروحون ياخذون القياسات و يفصلونه و يخلص عقب بالكثير شهر.
بس لما تروحين خلي ريلج يروح معاج علشان مايقصون و يخلصون مطبخج بوقته .
تعبوني مطابخي من سيراميكهم لتفصيلهم لاجهزتهم .... الله يعينكم و بالتوفيج

 

[الكيكة]

ظبية المطبخ الصبه وايد اقوى و وااااايد ارخص .. توكلي على الله و سويه

انا شاريه بيتي مو بانيته .. لو بانيته جان سويت المطبخ بنيان

 

[المتميزة*]

اختي رودي الله يعطيج العافية على هالجهد
عندي رفيجتي شفتها مرممة بيتها وتقول انها سوت شي في بيتها اول مرة اشوفه قالت اسألي لي يصير والا لا
تخيلي اول ماتدشين الصالة بعدين قبالج مدخل فيه قوس بالاعلى وبعد ماتدخلين هذا المدخل اللي يوديج حق غرفة ثانية على اليسار وسيدا طوفة فاضية بالوجه مسوية على الطوفة مالت هذا المدخل جرانيت تقول عشان الطوفة ماتتكسر قليلا مع الزمن لأن بيتها شاريته شوي قديم
فأنتي اشرايج بالجرانيت اللي ملبسته لنصف الطوله من الاسفل الى اقل من نصف الطوفة واشرايج لو اهي حطت عليه حركة بينه وبين الصبغ يعني على شكل حلو
اتمنى تكوني فهمتي قصدي .