روايتِي الاولى: { مُنـــاي } بِ قَلمي- دِميرة

[واثقة بجمالها]

وناصر بنوديه عند المفقودات <<< عجبتني حيييييل

والباررتين ررروعه

تسلم اناملج الذهبيه وافكارج الرااقيه

ناطرين ابداعاتج يا مبدعه

 

[دنيا رديا]

رد : روايتِي الاولى: { مُنـــاي } بِ قَلمي- دِميرة

لآآآآآ نصووووور كسر خآآآآآطريييي
حرآآآم علييييهم ;@:eh_s(14):

وسآآلم حقيييييييير آكرههآآآآآآآ :eh_s(14):

بدت شوي تبتسم بعدها قعدت تضحك بـ شكل هستيري !!

منى: هههههههههههههههههه
وقعدت على الدرج واهي تضحك ..

عبآآلي انيييينت ;|
مسكينه
بس آستآنست لهآ إنهآ تحرص
تصلي فروضهآ ومآ آطوف شي :>
آلله يثبتهآآآآآآآآ :ggdw:


عيسى : آلله يصبررررره :eh_s(2):


* :eh_s(22): : بليز كثري آلآحدآث حق نوآل :eh_s(22):

ويعطيـج مليــون عآآفيــه ..
على آلبآرتآآت إلي تينن .. :eh_s(17):
قــوآج آلله :>


ويـتنق نيــو بـــآرت :eh_s(9):

 

[Mazyoona]

*
..... *​

till now, بس بقول
Up Up

بس حبيت الآحدآآث
لي عودهّ​

* .....
*​

 

[super model]

واآآآي حرآآآم نصوور
متاابعينج حبيبتي

 

[loloالحلوة]

البارت الاخير روووووووووووووعة
اب
اب
اب

 

[sweet.sanfoora]

منااه ! ! كاسرة خاطري

ابي بارت

 

[đeɱɛɼɑ™]

السَلام عَليكُم بنات
ان شاء الله راح ارِد عَليكُم بعد ما انزِل لكم اجزاء اليوم
هَ الفصِل فيه 3 اجزاء وان شاء الله راح انزِلهُم ورا بعض بس صبروا عَلي بين جِزء وجِزء على ما اصحِح الاغلاط والبَدليَات كثر ما اقدَر


الفصل الحادي عَشر
الجِزء الاول

عيسى ضحك : بسم الله الرحمن الرحيم سكنهم مساكنهم .. شمسوين بروحكم انتوا !


الكل ضحك الا خولة كانت معصبة على عيسى .. لان هذي
دايما ً حركته معاها .. يخلي قلبها يحترق عليه .. وستين مليون فكرة سلبية تمر بـ راسها
واهو ولا هامة .. و فوق هذا ما يرد على تلفوناتها ولاحتى يطمنها ..

عيسى كان حَاس بزعل امه ..
التفت على ناصر وقاله يروح ويبدل ملابسه حق الصلاة ..

عيسى دش الصالة وراح صوبهم ..

عيسى : السلااااام عَليكم .. شلووونكم .. ان شاء الله طيبين؟

كلهم ردوا السَلام اما خولة فكانت قاعدة تطالع عيسى بنظرات " عدم رِضى "

طيبة : هلا والله حبيبي بخير و صِحة الحمدالله .. وينك بطيت عليننا ؟

عيسى قعد على الغنفة ورد : والله خالتي خذتنا السوالف ويا الربع ...
والتفتت على ايمان وقَط سويجه عليها .. ايمان بسرعة لقفته واهي تضحك ..

عيسى: هاااج .. روحي شغلي السيارة وركبوا بسرعة عشان نلحق ..

ايمان: ان شااء الله .. يالله قوموا

نوال وسهيلة وايمان عدلوا حجاباتهم .. وبسرعة طلعوا عشان
يشغلون السيارة وينطرون الباجي .. .

عيسى قام من مكانه و قعد يم امه وحب راسها .. طيبة كانت تطالعهم و اهي مستانسة على حركات عيسى ..
بس بـ نفس الوقت تذكرت ولدها محمد ..
اللي من يوم ما سافر واهو ما يدق عليه الا من مناسبة ليه مناسبة ..
ناسيها موليه ..

عيسى: افااا والله .. تزعلين مني .. انا نظر عينج ( وغمز حق خالته )

خولة دزته : وخر وخر يالله .. لا تحاجيني ..

عيسى: ههههههههههه ماا اقدر اوخر عنج امووت .. تبيني اموت يعني ؟
و حضن امه غصب واهي لافة وجهها وتتبوسم بس ما تبي تبين له ..

طيبة قامت من مكانها وعدلت لفتها: ووه خوولة بس عاد لعوزتي الولد .. عن الدلع الزايد وترى اذا ما قمتي بنمشي عنج .. يالله عيسى .. ما سوى علينا هالجيام

عيسى: هههههههههههه
خولة كانت بتضحك بس مسكت نفسهَا ..

عيسى باس راس امه وقالها: احبج احبببببببج احبببببج ...
خولة ابتسمت وامسكت راسه وحبته بين عيونه ،

طيبة : وااي مو زين اشوف جذي ... بطلع بطلع انطركم بالسيارة ( ومشت صوب البَاب )

عيسى وخولة : هههههههههههه

عيسى الفتت على امه: يمه دشداشتي الكحلية يابتها جاندرا من المصبغة ولا لا ؟


//

طيبة طلعت حق البنات
اللي كانوا مبطلين بيبان السيارة ويتناجرون على منو اللي راح تقعد بالكراسي الآخيرة ..

نوال: مااااااابي ماابي .. ليييش كله انا اللي تحذفووني بالدبة

ايمان: يغربل ابلييسج شنو بالدبة ما تشوفين صفة الكراسي اللي ورا

نوال: مبلى اشووفهم ... خلاص انتي قعدي عليهم

ايمان: صج ما تستحين .. انتي اصغرنا و بتنثبرين هناك مع نصور

سهيلة كانت قاعدة بـ الكرسي اللي جدام وتطالع سيديات عيسى
ومالها شغل بالنجرة اللي صايرة ورا .. لانها تدري انه مكانها راح
يكون بالصفة الثانية مع خالتها طيبة و اما مع ايمان او نوال ..

طيبة: هَو شفيكم شصاير .. ؟

سهيلة التفتت على خالتها وتضحك: خالتي ما عليج كله جذي نجرة هالثنتين

ايمان طالعت سهيلة وشبصت عيونها: الحين انا وياها كله نجرة ؟!

سهيلة طالعت ايمان وضحكت ..
وردت تسنع السيديات بـالجنطة و ترتبهم ..

طيبة: ههههههههه انزين يالله بنات ركبوا ترى امكم واخوانكم الحين ياايين ..مانبي نتاخر اكثر

ايمان: خالتي ما تشوفين هالنزغة مو راضية تركب

طيبة طبطبت على جتف نوال: نوال حبيبتي سمعي كلام اختج وخلينا نركب
ترى ريولي تعورني ما اعبر على الوقفة اكثر من جذي

ايمان بقلبها " شدعوه توج ياية " ..

ايمان: ايييي يالله سمعي الحجي ( وتطالعها بـ طرف عين )

نوال : اوووووووف ...
ونزلت الكشن عشان تركب ورا ..

ايمان : اووو نسينا ناصر لازم ننطره ليمه ايي

سهيلة التفتت عليهم وقالت حق خالتها: خاالتي تعالي من الصوب الثاني احسسن .. اذا بتنطرينهم ليه باجر ترى

طيبة: وانتي الصاجه سهيلة راح عن بالي الباب الثاني ..شكلي دايخة .. هالحزة انا المفروض بـ فراشي نايمة

كلهم ضحكوا: ههههههههههههههههه

//

سهيلة واهي ترتب السيديات ..
لقت سي دي مكتوب عليه باللون الاحمر بـ خط الايد " الى حبيبي " ..
عقدت حواجبها وحطت السي دي بـ آخر جنطة السيديآت .. عشان كانت
تبي تاخذه بعدين وتعرف شنو هالاهداء.!


//

بطريجهم حق المسجد الكبير ..
خولة قعدت جدام يم عيسى .. و ورا كانوا طيبة .. و ايمان وسهيلة ..
وبالكراسي اللي ورا كلش .. ناصر ونوال ... نوال كانت مبوزة وموعاجبها مكانها ..
ناصر كان سرحان بـ اللي صار اليوم .. وزعلان ومستانس بـ نفس الوقت انه اثبت لـ نفسه
انه ريال بـ مفهوم " غيره "!

اول ما وصلوا هناك .. كان المسجد الكبير زحمـــــــــــــة
وصوب الحريم كان ما يبين من السوآد ...

نوال: امبيه جنهم نمل
كلهم ضحكوا: ههههههههه

عيسى كان لابس دشداشته الكحلية.. ولابس بس قحفيته .... غترته الحَمرا حاطها على جتفه ..
اما عقاله فـ كان بـ ايد خولة...

طول الطريج كان فيه دوريآت .. وبما انه عيسى معاه اهله
فكان كل ما يوصل عند نقطة تفتيش يمشونه بـ جملتهم الشهيرة " توكل على الله " ..

لما وصلوا عند المسجد الكبير ..
عيسى كان يبي يوصل اهله صوب الجزء النسائي .. ما كان يبيهم يمشون من المصافط ليه هناك ..

حاول يدش صوب الشارع المؤدي لـ قسم الحريم من المسجد ..
وقفه الشرطي وآآشر له انه يلف ويرجع لان ممنوع ..

عيسى بطل الجام وطلع راسه شوي وصرخ عليه من بعيد عشان يسمعه ..

عيسى: معااااااي الاهل حبيبي .. بس انزلهم

الشرطي عَلى صوته و اشر له بيده انه يرجع : ممنوووع ارجع .. ارجع

عيسى دشش راسه وطاالع امه: يمه ما اقدر ادش اكثر .. نزلوا هني احسن لكم والله

ايمان: لااااااايمه شنو فشلة ... جذي ننزل بنص الشارع

خولة: اووص انتي .. خلاص عيسى ننزل من هني مثل ما قلت احسن لنا .. وكا الباب مو بعيد

ايمان بوزت: ماااني ناازلة يمه ماابي

طيبة: امونه كلنا نازلين مو بروحج انتي ..

سهيلة: خالتي اهي كله جذي ترى .. تشوفنا الحين نازلين تلحقنا

وكلهم ضحكوا على ايمان الا اهي كانت دمعتها بطرف عينهآ ..

كلهم انزلوا الا ايمان اللي كانت معاندة ومبوزة وشابكه ايدها ومعصبة ...

عيسى: بتنزلين ولا شلون؟

ايمان: مااااااااابي

عيسى: ايمان ترى والله ما عِندج سالفة .. كاهم انزلوا ما صار فيهم شي خلصيني يالله بروحنا متاخرين

ايمان: ماااابي مااااااابي

السيايير ورا عيسى قاموا يطقون هرنات عشان يمشي ..

عيسى نفذ صَبره : يالله عاد عن المصاخة !! .. قسما ً بالله ان ما نزلتي الحين لا انزل من السيارة و ايرج جدام العالم .. يالله !!

ايمان خافت .. وعدلت قعدتها واهي مترددة طلعت من السيارة ..
نزلت واهي منزلة راسها وبسرعة مششت ولحقت علي خولة وطيبة والبنات ..
واهم يضحكون عليها ..

سهيلة: موو قلت لج خااالتي

ايمان طقت سهيلة على ايدها: حماااره

دخلوا المسجد .. و طقتهم البوهة بالعدد الكبير من الحريم اللي يايين ..
من مختلف الجنسيات ، الكويتية والمصرية والخليجية و الهندية والبنغالية
الى آخره من امة لا إله إلا الله ..
غصب لقوا لهم مكان .. بس ما لقوا اماكن يم بعض ...
طيبة و خولة ونوال لقوا مكان ضيج في السطرة اللي قبل الاخيرة ..
اما سهيلة وايمان .. فلقوا مكان بالطرف الاخير من السطرة اللي جدام سطرة امهم وخالتهم ونوال ..

ايمان تساسر سهيلة: اللي يمي ريحتها آآرف .. بطت راسي !

سهيلة طقة ايمان بكوعها : اووش شفيج لا تسمعنا

ايمان: خل تسمع .. اكو احد ايي الصلاة واهو مو متنظف..قطيعة

//

طيبة راحت يابت قرآن من الارفف اللي وراهم .. وقعدت تقره فيه ..
خولة كانت قاعدة تسبح باصابع ايدهآ ..

اما نوال فكانت منبهرة من الناس وكل دقيقة تركز على وحدة من الحريم وتشوفها شنو تسوي وتفصلها من راسها ليه ريولها ...

مرت ربع سآعة .. وبعدهآ بده الامام
كان الشيخ فهد الكندري .. مثل ما تمنت سهيلة بذاك اليوم ... وصار اللي تبيه
استانست لما عرفت انه اهو اليوم راح يقييم فيهم ..

بده الشيخ باقامة الصلاة و قرآءة الفاتحة بـ صوت ساحر ... يرقق القلوب ...

http://www.youtube.com/watch?v=d8xnDhdB08c


كل البنات اخشعوا مع صوت الامام .. . .
والآيآت اللي كان يرتلها بكل حرفنة خلت دموع طيبة وخولة وسهيلة تنزل ..
اما ايمان ونوال فـ ما وصلوا ليه
هالمرحلة من الخشوع الروحاني .. اللي كل من وصل له عجز عن وصفه بـ دقه.!

طيبة كانت اتمتم ورا الامام عند كل آية و سورة حافظتهم من القرآن .. .
اما نوال فـ كانت عند كل آية تتكلم عن غضب الله وعصيآنه .. تفكر بـ كل سوالفها مع مريم ..
وضحكها ولبسها وطلعاتها اللي من ورا اهلها ..
كانت صج متحسرة ومتحسفة على كل لحظة سوت فيها شي يزعل اهلها وبالاخص ربها –سبحانه- منها ..
وبـ وقت ما كل انسان بهالمسجد هايم بـ ملكوته الخآص

فجاة وبدون سابق انذار ..
صار كل شي حولهم ظلآم .. !! سمعَوا صوت انفجَار وطِفت الكَهربا !!
كل اللي بالمسجد اخترعوا واختبصوا
وكالعادة في مِثل هَ المواقف .. كل من قام يتراكض بـ صوب وبِدت الفوضى .. !


​

 

[Mazyoona]

*
..... *​

وآآآآآآوَ آكشِن آكشِن!! نآآآآطرّه آلتَكمِلَه‘ دمورَه :eh_s(22):
​

* .....
*​

 

[đeɱɛɼɑ™]

الفصِل الحادي عَشر
الجِزء الثاني

فجاة وبدون سابق انذار ..
صار كل شي حولهم ظلآم .. !! سمعَوا صوت انفجَار وطِفت الكَهربا !!
كل اللي بالمسجد اخترعوا واختبصوا
وكالعادة في مِثل هَ المواقف .. كل من قام يتراكض بـ صوب وبِدت الفوضى
.. !
كاآن فيه ضغط صاير على المحولات بالمنطقة ، خَله محول الكهرباء اللي تَابع له المسجد ينفِجر !!

الناس خافت وقاموا يركضون ويدزون بعض .. امه لا إله الا الله كانت متواجدة بالمسجد الكبير ذاك اليوم ..
خولة بسرعة مسكت نوال ..

خولة: طيييبة وييينج انتي يمي ؟

طيبة مسكت خولة من ايدها: كااني كااني .. نوال معاج؟

خولة : اييي يمي ماسكتها

الناس حوالينهم كانوا قاعدين يدزونهم لان يبون يطلعون من المكان ..

خولة رفعت صوتها وقعدت تنادي على بناتها..
و كانت لامة نوال وماسكتها حييل: ايمااااااان سهييييييييلة ..سهيييلة .. ايماااااان

ضاااع صوتها بين اصوات باقي الحريم والرياييل اللي ينادون على بعض ..
كان صوت الناس " مدوي "
اللي معصبة واللي تضحك.!! .. واليهال اللي جايين مع اهاليهم يبجون ! ..
واللي ضاعت منها بنتها ... واللي طاح ولدها ..
واللي اغمى عليهم من ضغط الاوادم وضيق النفس!! .. كان المُكان فوضى في فوضى ..


//

ايمان وسهيلة كانوا ماسكين بعض ومو عارفين شيسوون .. يروحون حق امهم
او يطلعون من الباب لانه اقرب لهم ..

ايمان كانت متوترة: سهييييلة اميي ويينهاا .. خلينا نروح لهاا
الناس دزوهم و رجعوهم ليه ورا .. تعوروا شوي .. بس كانوا صامدين ..
رجعوا ليه ورا ولصقوا بالطوفة ...

سهيلة: ايمان مسكيني حييل لا تهدييني !
قاموا يتنفسون بطريقة سريعة انحشروا !! مو قادرين يتحركون
البآب كان اقرب لهم من انهم يدشون ليه داخل ..

ايمان: سهييلة خلينا نطلع ما اقدر اتنفس ( وكانت تتنفس بـ صعوبة )

سهيلة: مييخالف ايماان .. صبري بس شوي خل يخفون الاوادم

ايمان ردت عليها ب صعوبة : سهيييلة مااا اقدر ... ( وتااخذ نفسس ) ... ماا قدر .. طلعيني .. ابي اطلع !!

وهدت ايد سهيلة .. و جاهدت على ما طلعت من الباب ..
ايمان كانت رايحة صوب الباب واهي تتخبط .. وشوي وتطييح
غير الحريم اللي يمها ومتسابقين على الباب ..

سهيلة خاافت حست انها بروحهآ ..
وفكرت شوي و بسرعَة لحقت ايمآن ليه برآ ...

لما طلعت من الباب .. قامت عيونها تتلاقط وتدور اهلها ..
شافت الحريم مطشرين ..
البعض قاعدين يتلمسون بعضهم ويتطمنون انهم بخير.. والبعض الثاني قاعدين على الارض ويحاولون يلقطون نفسهم ..والبعض الثالث يدورون اهاليهم مِثل حالة سهيلة ..

سهيلة شافت ايمان قاعدة على واحد من الكرآسي وتتنفس بسرعة ..

ركضت لها وقعدت على ركبتها وتحاول تهدي ايمان ..

سهيلة: ايمان ! . . شوي شوي .. اخذي نسسسم

ايمان معاها الربو .. وهالسنة خاف عليها آكثر من السنين اللي قبل ..
لانها واخيرا ً قدرت تتعالج عن واحد من الدكآترة اللي كان جاي زيارة من المآنيا لـ مستشفى من المستشفيآت الخاصة ..
بس الحين مع الخوف والتوتر و ضيق المكان يات لهآ ازمة ربو خفيفة ..

ايمان كانت تنااهت وحاطه ايدها على صدرها ..

سهيلة: تبين ادق على الاسعااف .. قوليلي انتي زيينة ولا ادق عليهم ؟

ايمان هزت بـ راسها يمين وشمال طمنت اختها انها بخير ..

نوال: يمه كااااااااهم
وركضت صوب خواتها . ..

نوال: امبيييييييه شنوو هذاا .( كانت مصدومة من اللي صار .. ولاحظت الحالة اللي فيه ايمان) ... شفيها ايماان ؟!!

سهيلة: ماا فيها شي ..بس تضايقت شوي من الزحمة

والتفتت صوب امها وخالتها ..
خولة شافت ايمان قاعدة على الكرسي وايدها على صدرها
بسرعة مشت صوبها .. وطيبة كانت مو ملحقة على خطواتها ..

وصلت خولة عند ايمان ..
ومسكت ايد ايمان ومسحت على ظهرها ..

خولة: شفييها اختج ؟

سهيلة قامت من على الارض ..

سهيلة: ما فيها شي يمه بس الظاهر تنك صدرها شوي ..

خولة حبت راس ايمان وظلت تمسح على ظهرها وتسمي عليها ..
كلهم بعدين قعدوا بره مع مجاميع الحريم ..
اللي كانوا ينطرون ريايييلهم يطلعون من المسجد ..
صوت الاسعاف و سيايير الشرطة كان مالي المكان .. ..
وكان في شوية حريم مطلعين تلفوناتهم ويصورون الوضع اللي صاير.!!!


تلفون خولة كان قاعد يرن ..
خولة كانت ماسكة ايمان بـ ايدينها الثنتين .. ايد حوالين جتوفها وايدها الثانية ماسكة ايد ايمان فيهآ ..

خولة: طيبة واللي يعافيج مدي ايدج بـ مخباتي ردي عَ التلفون اخاف عيسى

طيبة مدت ايدها داخل مخباة عباة خولة وطلعت تلفونها ..
وشافت الشاشة تشب بـ اسم " عيسى " ..

طيبة شالته: الووو هلا امي

ناصر: يماااه

طيبة: هوو منو ناصر؟

ناصر: خالتي طيبة!!

طيبة: ههههه ايي .. تبي امك ؟ انتوا وينكم ان شاء الله قدرتوا تطلعون من هاللوية ؟

ناصر كان متوتر مو عارف شيقول: خالتي طيبة قولي حق امي ترى انا . .. انا وعيسى .. اقصد احنا بالاسعاف

طيبة انصدمت: اسعااف !!

//

في بيت محمد بوريشة ،

منى قعدت من النوم
حطت ايدها على صدرها واهي تتنفس حيل ومعرقة من الخوف ..
مسحت على شعرها و قعدت تسمي بالرحمن وتبلع ريجها ..

منى : بسم الله الرحمن الرحيم .. بسسم الله الرحمن الرحيم .. ان شاء الله خير

وردت انسدحت مرة ثانية على مخدتها و اهي اتمتم بـ كل آية حافظتها ..

منى شافت حلم ، او بالاحرى كابوس ..
بالحلم شافت عيسى .. ميت.! .. ويبون يدفنونه بالمقبرة ..
بس منى ما كانت راضية وتحاول تبعدهم عن جسمه ..
لما شافوا ماكو فايدة .. خذوها .. و ادفنوها وِياه !

//

عيسى وناصر لما طفت الكهربا ...
حاولوا يطلعون مع اللي طالعين .. بس الرياييل من قوة اجسامهم قاموا يتدااززون و واحد يطيح الثاني!..
صوت الحريم و اصوات اليهال خلاهم يتدودهون لانه كل واحد يبي يروح يلحق على اهله ..
كان ظنهم ان في شي جايد صاير غير صكة الكهربا !!

عيسى وناصر كانوا ماسكين بعض ..
ويحاولون كثر ما يقدرون يتحملون قوة التدافع اللي حاصلة ..

عيسى واهو يتدافع معاهم ريوله داست على شايب طايح ع الارض ..
بسرعة نزل على حيله . . حاول يقومه بس لقاه مغمى عليه ..

عيسى : نااصر اطلع ناااد لي احد يششيله معاي بسرعة

ناصر تردد بس سمع كلام اخووه و طلع مع اللي طلعوا ..
لما اخيرا وصل برة ..
قعد يدور احد ..
بس كلهم كانوا مشغوليين ..
شاف سياييير الشرطة مطشرة بكل مكان ..
راح بسرعة حق دورية من الدوريآت ..

//

عيسى نطر واايد والناس حوالينه كل مالهم ويحاوطونه اكثر ..
صار النفس عنده ضيق .. قرر انه يشيل هالشخص بـ نفسه ..
والحمد الله انه هَ الشخص كان شايب وضعيف ..
شاله على جتفه ..
وبده يتدافع مع الناس وكثر ما يقدر يوخرهم عن طريجه .. انهد حييله بس كان مقاوم ..
لما تقريبا وصل عند الباب ..
تعرجبت ريولة بالزولية اللي كانت شبه مصفوطة
وطاح اهو واللي شايله على الارض ..
عيسى طاح على ظهره و طق الجانب الخلفي مِن راسه بِ ـالطابوقة اللي كانوا حاطينها عند باب المسجد عشان ما يتصكر
راسه ماااا نِزف .... . بس ... عيسى فقـــــــــد الوعي !

،

ناصر كان راجع ومعاه الشرطي ....

واهم رايحين صوب الباب ..
شافوا الناس متميعة ...
وصلوا وناصر شاف عيسى طايح عَ الارض .. اخترع وخاف على اخوه
بس الشرطي حاول يطمنه وقاله الحين الاسعاف بالطريج .. ورفع الجهاز اللي معاه وقال: حول حول محتاجين نقالتين عند الباب الرئيسي !

ما صارت دقيقتين إلا نَقالتين واصلين عندهم مع المسعفين ..
شالوا عيسى و الشايب اللي معاه بكل حذر على النقالة ..
ناصر ركب الاسعاف مع اخوه ودق على امه .. وقالهم اللي صَار ..

//

خولة خافت على عيسى حييل ةاللي مَعاها خافوا عليها اكثر !
لانها تعتبر عيسى عزوتها بهالدنيا ..
خذت التلفون من طيبة وحاولت تعرف كل شي من ناصر ..
وزفته لانه ما ياهم وقالهم عشان ياخذون سويج السيارة ويلحقونهم ..توهقوا !!

//


ايمان ونوال كانوا قاعدين يم بعض ..
نوال حاطه ايدها على خدها وتفكر بـ اخوها
وايمان بعد راحت عنها الازمة .. ظل وجهها منصفق من اللي صار وتاثرت زيادة من
طيحة اخوها ...

سهيلة : يمه خلاص خلينا ندق على خالي سعود

خولة والعبرة خانقتها: ما ادري سهيلة دبريني (وطالعت طيبة بـ نظرة استعطاف ومؤازرة بـ سبة اللي بينها وبين سعود)

طيبة حست بـ قبضة بصدرها لما سمعت اسم اخوها سعود اللي لي الحين مقاطعها وما يكلمها
عقب سالفة الورث ..
بس تمالكت نفسها وقدرت الوضع اللي اهم فيه وحالة خولة والبنات وخوفهم على اخوهم ..

طيبة تصنعت الابتسامة: سهيلة ميخالف دقي على خالج حبيبتي..

:

.

سعود كان قاعد بهالوقت ب صَالة بيتهُم ..
وجدامه لابتوبه المَاك السلفر .. يراقب اوضاع البورصة في لندن.. ..

اهو له اسهُم ب البورصة البريطآنية .. لان حسب رايه .. بورصة الكويت ما تسوى! ..
كان دايما ً يمدح الغرب وتطورهم .. ويذم الحَالة اللي وصلوا لها العرب من تدني
في جميع المجالات ْ ..

زوجته أمل كانت نايمة بـ غرفتهم ..
سعود اصغر خواته .. وعمره الحين 38 سنة ..
سعود وامل .. الله ما رزقهم عيال طول عمرهم مع بعض .. صآرلهم 12 سنة ..
حآولوا اول 5 سنين من حياتهم وبعدين رضوا بـ قسمتهم ونصيبهم بهالدنيا
سعود شغل نفسه بالاسهم والبورصة والعقآرآت ...
اما امل فـ كان معظم وقتها تقضيه عند اهلها او مع صديقاتها ..
حتى السفر ساعات تسافر معاهم بدون سعود ..

رن تلفون سعود ..
سعود هد الكيبورد ومسك تلفونه ونزل نظارته شوي على طرف خشمه ..
رفع تلفونه وشاف الرقم اللي داق ..
كان مكتوب " خولة "
فصخ نظارته وشال التلفون ..
ما مداه يتكلم ويقول الوو ..

سهيلة بـ نبرة رجى : الووووو خالي سعود الحقنا .. عيسى ودوه المستشفى و ما عندنا احد يوصلنا

سعود قام من على الغنفة ..

سعود : م .. ممــ .. منووو معاي ... سهيييلة ؟!!

سهيلة: اييي اييي .. انا سهيلة .. تكفى تعال لنا الحين خالي .. احنا بِ المسجد الكبير ..
عيسى طاح وناصر راح معااه ... ما عندنا احد ياخذنا الله يخليك بسرعة

سعود : خلاص خلاص زين .. 10 دقايق و اكون عندكم .. مع السلامة

سعود صكر الخط من عند سهيلة و حرص انه يصكر لابتوبه ..
كان حاط رقم سري لـ لابتوبه وما يرضى امل تبطله او تجيسه بـ عذر انه
ما يبيها تخرب عليه شغله و " تعفس " ملفاته
.. وانه اهي عندها لابتوبها .. فما تحتاج تجيس لابتوبه ...

دخل الدار ..
وحاول كثر ما يقدر انه ما يسبب ازعاج حق امل ..
بس دعم الفراش وتعور شوي و قال : " آآخ
وبما انه امل نومها خفيف .. قعدت .. وبطلت الابجورة الدانتيل اللي يم راسها ..
وشافت سعود واهو قاعد يلبس تي شيرته

امل كانت مشبصه عيونها
و قالت له بـ صوتها المبحوح
اللي خله سعود يموت عليها لما راح خطبها: سعود شفيك.. وين بتروح ؟

سعود التفت عليها: خولة والبنات .. رايحين الجيام وعيسى الظاهر طاح عليهم او شي وما عندهم احد اييبهُم

امل واهي مخترعة : ويييي!! ... شلون طاح؟!

سعود: شدراني لازم اروح لهم الحين

امل رفعت عنها الكفر اللي كان مغطيها : زين لحظه خلني ايي وياك

سعود: بسرعة لبسي امل .. لا تاخريني .. ناطرج بالسيارة . ( وطلع من الدَار )

..​

 

[đeɱɛɼɑ™]

هَ الجِزء طِويل شوي
اقروه على اقل مِن مهلكُم



:


.


الفصل الحادي عَشر
الجِزء الثالث والاخير من هَ الفصِل

سعود وصل عند المسجد الكبير ..
نزل من السيارة ودق على خولة ..
... سيارته خلاها شغالة .. وامل ظلت بالسيارة تنطرهم ..

اول ما وصل عندهم ..
شاف طيبة من بعيد .. ما عرفها اول شي .. لانها كانت مغطية شعرها..
لما قرب اكثر عرفها ..
اعتفس وجهه .. وتردد شوي بـ خطواته .. بس بعدين كمل ..
وصل لهم ..

سعود: السلام علييكم .. هاا سلامات شفيه عيسى ؟ شصاير وياكم ؟

كلهم ردوا له السلام ..

خولة: ما ادري والله يا سعود شصاير .. اخذني له قلبي مشاغبني عليه وهالناصر مو راضي يرد على تلفونه .. والله انا قايلة اني بموت ناقصة عُمر !

سعود حاول يطمنها: لا لا ان شاء الله ما فيه الا كل العافية.. لا تقولين جذي يا ام عيسى الله يطول لنا بعمرج وتشوفين عيال عيالج حوالينج ...

سهيلة وايمان ونوال .. راحوا يسلمون على خالهم ويبوسونه خد بـ خد

سعود واهو يسلم عليهم : هلا هلا بنات شلونكم ؟ ..

والتفت على خولة وكان متجآهل طيبة تماما ً ..
كانها مو موجودة .. طيبة كانت متضايقة حيييل ..

سعود: زين يالله عيل مشينا ؟

خولة التفتت على طيبة وابتسمت لها .. مسكت ايدها ومشوا كلهم
ليمه سيارة سعود البي آم السودآ ..

امل كانت قاعدة جدام .. وتطالع من الجامة ..
اول ما شافتهم جايين صوبها ..
نزلت وسلمت عليهم كلهم .. حتى طيبة .. استحت انها تطنشها ..
بس لما سلمت شافت سعود اللي كان معصب ..
وركب السيارة وصكر الباب حييل ..

نوال قعدت جدام مع امل لانه ورا ما يكفيهم كلهم .. فـ بما انه نوال اضعفهم واصغرهم ..
راحت قعدت مع امل ..

خولة دنت شوي وحطت ايدها على جتف سعود: حبيبي والله .. تعبناك معانا

سعود: افاا عليج يا يباا لا تعب ولا شي .. اصلا انا كنت قاعد مو نايم ...

امل : خولة شهالكلام .. و حتى لو كان نايم انا بنفسي اقعده لج

سعود طالع امل بـ طرف عينه: ايييه واضح .. لا تصدقونها بنات .. اموول ترى انا اللي اقعدها للدوام ..


البنات ضحكوا .. خولة ابتسمت كان قلبها ماكلها على ولدها
.. اما طيبة فـ كانت متضايقة و بنفس الوقت غيرانه من
العلاقة الحلوة اللي جامعة سعود وخولة ..
حست انها دخيلة بينهم .. وما جنها اختهم خليصتهم ..

سعود: دقوا على ناصر عشان يطلع لنا .. . ما بقى شي ونوصل المستشفى

//

عيسى وصل المستشفى وعلى طول
سووا له اشعة لـ راسه ورقبته ..
كانوا حذرين حييل واهم يتعاملون معاه
لانه اي حركة غلط ممكن اتاثر على عاموده الفقري ..
.. صعدوه لِ جناح العناية المُركزة ..وحطوه تحت المراقبة ...

الاشعة اثبتت انه عيسى حاشه ارتجاج خفيف بِ المخ ولازم ينام بالمستشفى ويتابعون حالته ..
كانوا ناطرينه يصحى .. يبون يتطمون ان حالته بالفعل مستقرة .. بس ما صحى .. دَش ب غيبوبَة !

//

كلهم وصلوا المستشفى وناصر طلع لهم .. قالهم اللي صار ..
دشوا كلهم عند الطبيب عشان يتطمنون على حالة عيسى ..
بعد ما خذوا اخباره وتاكدوا انه حالته الحين مستقرة ...
خولة طلبت من اخوها سعود ان يوصل نوال وناصر البيت ..
نوال وناصر اول شي ما رضوا بس خولة غصبتهم وما قدروا يعصون لها امر
خاصة انها كانت بـ حالة ما تسمح بِ المناجر والعناد.!

:

.


قعدت منى الصبح ..
وعلى طول راحت صوب الدريشة ..
طلت وشافت انه سيارة عيسى لي الحين مو موجودة .. !

حطت ايدها على قلبها ..
حست انه عيسى صاير له شي .. خاصة بعد الحلم اللي شافته امس ..
راحت صوب كوميدينتها ..تلفونها كان قاعد يشحن ..
شالت تلفونها من الشحن .. ومسكته وقربته صوب شفايفهآ واهي تفكر .. غمضت عيونها وبلعت ريجها
منى : ادق ولا لا .. ادق ولا لا ؟

كانت مِحتارة !
بطلت عيونها وطالعت تلفونها ..
طلعت رقم عيسى من سجل التلفون
واضغطت العلامة الخضرآ ..: بسم الله

قربت التلفون من اذنها ..

التلفون بدى يرن ..
رن وايـــــــــــد .. ومحد رد ..

قعدت على فراشها ورجعت شعرها ورا اذنها ..
ودقت مرة ثآنية ..
رن ثلاث رنات .. وبعدين صوت حريمي رد : الووه ؟ الوووه !

منى خافت وبسرعة صكت التلفون ..
استغربت .. اول مرة شخص غير عيسى يرد عليها ..
وصوت بنت بعد !!

كلتها الغيرة .. والافكار السلبية قامت تدور بـ راسها ..
" سيارته مو هني " " وبنت رادة علي من فونه " " يعني اهو نايم عندها ! "

فجاة رن تلفونها بيدها ..
.. شافت شاشة تلفونها تشب بـ اسم " عيسى " .. ! ..
(غيرته من " زوجي حبيبي " ليه " عيسى " عُقب سالفة المستوصِف ..
كانت تبي تمسح رَقمه موليه .. بس ما طاوعها قلبها ! )

منى: اذا اهي .. بتكون سج وقحه !!
وردت عالتلفون : الوووو

سهيلة بـ صوت واطي: الوو السلام عليكم ... انتي منى؟

منى بـ نرفزة: وعليكم السلام .. اييي انا مني .. انتي منو ؟

سهيلة: انا سهيلة .. اخت عيسى

منى اخترعت .. شتبي منها سهيلة وليش تلفون عيسى عندها ! ..

سهيلة: الووو منى انتي معاي

منى بـ توتر : اآآ .. إييي معاج

سهيلة: منى انا ماني عارفة شنو اقولج بِ الضبط

منى قلبها قام يدق حيييل: شنو ؟ صايِر شي ؟

سهيلة: عيسى .. عيسى اخوي ... دش المستشفى امس و لي الحين ما قعد

منى قامت من على الفراش وقلبها يرقع حييييل: شنوووووووووو


//

سهيلة لمآ شافت حآل عيسى ..
اخوها سندها وعزوتها بهالدنيآ واهو لا حول ولا قوة..
شكله و كل هَ الوايرات عليه ورقبته اللي مثبتينها لان اي حركة ممكن تسبب له شلل ! حست بـ تانيب الضمير ..و انه هَ الدنيآ فانية .. وبعدها موت وقبر ..

و ان اخوها كان ممكن يصير فيه شي اقوى .. حادث .. مرض !! .. او حَتى موت !!
و ان الواحد ما يدري شنو ممكن يصير له باجِر او بعد دقيقة ! ..

.. .. حست بِ الفعل بـ جملة " الدنيآ ما تسوى !! "
ما تسوى كل هالتعقيدآت اللي حاطتها امها ..
اخوها المفروض ما ينحرم من اللي يبيه ..
ويستآهل ان يرتبط بِ الانسآنة الوحيدة اللي حبهآ و بغاها من هالدنيآ

//

لمآ رن تلفون عيسى بـ ايد سهيلة .. و اللي كانت مخليته عندها
بعد ما سلموهم المستشفى اغراضه ..
حست سهيلة انه رنة التلفون بيدها بهالوقت اهو تنبيه لها
.. و انها لازم تصلح غلطتها و غلطة امهآ و ايمان من ناحية عيسى لما منعوه عن منى ..
سهيلة اتخذت قرارها بـ انها تدق على منى ..
وصِج دقت عليهآ وصار الحوار التلفوني بينهم ..

،

منى كانت واقفة
على حيلها و مصدومة ..
منى كانت العَبرة خانقتها: يعني شنو قصدج لي الحين ما قعد ؟ .. يــ .. يــ .. يقعد من شنو ؟!

سهيلة كانت مترددة
و بنفس الوقت معورها قلبها على منى والخوف اللي مبين من صوتها بالتلفون ..

سهيلة: لاااا تحاتيين اهوه الحين بخير الحمد الله .. امس طاح علينا كنا رايحين الجيام وتعور.. اوووو .. .. صار فيه شوية ارتجاج بس الحين حالته مستقرة و الـمستــشـ

منى قاطعتها واهي ترجف: ارتجاااج ! . .. .انتوااا بـ آي مستشفى ؟!


:

المكآلمة انتهت بينهم بعد ما سهيلة اتفقت مع منى انها تجي عقب الساعة 4 العصر
لانه اهلها بهالوقت بـ يردون البيت يرتاحون و اييبون ملابس يديدة حق عيسى ..
وشغلات ضرورية ثانية ..
كانوا ناوين ايبون فطورهم معاهم المستشفى ويتفطرون كلهم هني ومعاهم نوال وناصر طبعا ً ..
سهيلة استغلت هالفرصة وقالت لهم انها بتقعد مع عيسى
وما تبي تخليه بروحه لانه يمكن يقعد ويحتاج شي واهي بتكون موجودة عشان تساعده .. . .

صارت الساعة أربع وعشر،
خولة وايمان طلعوا من باب المستشفى ،
منى كانت قاعدة داخل سيارتها و صافطة بعييد شوي عن البوابة ..
لمحتهم لما طلعوا .. و اول ما طلعوا رن تلفونها ..

منى بـ سرعة شالته ..

منى: الووو

سهيلة: الووو .. ترى امي وايمان طلعوا .. تعالي بسرعة ماكو وقت

منى كانت مستحية : اآ .. أنا هني .. تحت عند المسافط ..

سهيلة استغربت ..
بس استانست انه في انسانة تحب اخوها ليه هالدرجة ..

سهيلة ابتسمت: عيل يالله تعالي .. الطابق الثالث جناح سبعة .. غرفة 11 اوكي؟

منى: اوكي خلاس كاني ياية ..

صكرت منى التلفون .. وحطته بـ جنطتها ..
البست نظارتها الشمسية الكبيرة .. عشان ما تبين ملامحها ولا تنعرف ..
مسكت منى الباقة اللي كانت حاطتها بالكرسي اللي يمها .. وابتسمت . .
كانت شارية باقة من الروز الاحمر ..
خاصة الروز الاحمر ..
اول باقة ورد تلقتهآ بـ حياتها من شاب .. كانت هَ الباقة الحَمرة ..وكانت من عيسى ..

،

قبل سنتين ، لما ايمان سوت الحادث ب ذاك اليوم ..
ومنى عرفت بالموضوع عن طريق بلال ..
ودار حوار السيارة بينهم ... وبعد ماعيسى بين لها انه مو زعلان منها لا يمكن يزعل ..
منى تطمنت وارتآحت بعد ما كانت متوترة وتعبانه من رفضه لـ حلم حياتها بـ انها تكون مذيعة .. وتطلع بالتلفزيون .. وتكون مشهورة !

عيسى كان لي الحين حاط في باله انها عصت له امر مهم مِثل هذا .. كان ماخذ بخاطره شوي ..
بس حادث ايمان خلاه ينسى هَ الزعل شوي و ينشغل مع اهله بالمستشفى

،

السآعة كانت 1 ونص الظهر ،
ابو منى كان قاعد بالصالة ويتكلم بالتلفون مع مدير شركته في لندن ..

زكريا: ايووه يا فندم .. كول حآقة اوكي .. تمام التمام

محمد: شوور يا زكريا ؟

زكريا ضحك: اوماال شوووور طبعا .. على ضمانتي يا آبو منى ..
مستر فيليبيه حاقة تانية خاااااااالص عن مسسز ليييج

محمد: موو انته الله يهداك لخبطت حسبتنا و ورطتنا مع ليييج

منى كانت قاعدة تسمع حوارهم وتبتسم ..
قربت منها صينية الجآي والقهوة ..
مسكت مطارة الجآي الزرقآ المزينة بـ مخمل مخرم بيج مشكوك بـ لولو وشوآرفسكي ..
و صبت حق ابوها استكآنة جاي ..
وقربتها منه ..

محمد عدل قعدته ..
وابتسم حق منى
مسك استكآنة الجاي بدون ما يشربهآ .. وكمل سالفته مع زكريا ..

محمد: طيب زكريا .. انته تييك الابونتمينت ويذ هير وخلص لي الموضوع .. انا راح اكون ناطر اتصال منك

زكريا: انا دلوئتي حالا ً حتصل على هيير سكرتيري و اخلص لك عالموضوع

محمد كان حاس انه منى عندها سالفة و بـ تقولها ..
فـ انهى مكالمته مع زكريآ عقب ما عطاه عَ السريع الخطوات اللي يبيه ينفذها مع المستثمرين الاجانب
والصفقة اللي المفروض يخلصها مع مسز لييج ويحولها حق مستر فيليبيه ..

صكر التلفون ورشف رشفة
من الاستكآنة وحطها عالطاولة ..
طالع منى وابتسم لها ..

محمد: هاا بنيتي ..

منى طالعته وابتسمت: هلا بابا

محمد: من مساع اشوفج تحوسين عندي ..
مرة قاصة لي كيكة ومرة يايبة لي عصير ..
والحين صابة لي جاي .. عندج شي انتي َمنتي خالية

منى احمر ويهها و بـ دلع : هههههه .. شدرااااك ؟

محمد : هههههههههه ( حاوطها بذرآعه وقربها من صدره وطبطب عليها ) ..
بنووتي انتي .. ادري واحس فيج قبل لا اتقولين

منى رفعت نفسها ..و ابتسمت وطالعت ابوها : بابا .. ـممم .. تعرف جيراننا سح؟

محمد: ايييييه اكييد .. شلون ما اعرفهم ..

منى بـ تردد:.. و .. و بيت بوقصب

محمد: والنعم وثلات تنعاام فيهم .... بسسس ليش هَ الاسئلة؟!

منى استانست : ... آآ .. تدري انا طلعت مساع برة .. كنت ابي من جوي اييب لي عسيري اللي احبه من الجمعية ...
وشفته واقف مع سايقهم بلال ... و .. وو وعرفت منه انه بنتهم ايمان مسوية حادث!

محمد : آآفآآآآء .. ومتى حصل هالشي ؟

منى:... امسس بالليل .. ضاق خلقي والله لما دريت.. فـ .. انا بابا .. أقول ... يعني ..
شرايك اروح لها اتطمن عليها .. واتحمد لهم بالسلامة

محمد: اييي معلوم... اكييد ليش لا .. روحي وتطمني عليها وسوي الواجب

منى: عيل توديني بعد شوي ..بليييز .. لانه مو حلوة اروح بروحي ..

محمد: يا منى يا حبيبتي .. شوف عينج هه ( واشر على تلفونه ) ..
توني مصكره من زكريا .. مواعده انه يدق علي بكلم مسزز ليج واتفاهم معاها ..
وتعرفين مواعيد هَ الانجليز ما ادري شلون قايلة . لازم بِ الدقيقة والثانية.. ومن وين ليه وين تصيدينهم ..
و انا ودي افتك من هالعيووز واخلص!

منى حز بـ خاطرها شوي ..
كان ودها ابوها يكون معاها وتفتخر فيه جدام بيت بوقصب ..
كانت تتمنى الطلعات مع ابوها .. اللي كان اغلب الوقت مسافر ..
حتى وقت تخرجها من الثآنوية .. ماكان موجود .. يا مسافر
او عنده اجتماع او حتى ناسي ! .. ا
لا وقت تخرجها من الجامعة فرحت حيل انه تذكر ..
بس تضايقت لما درت انه عمتها سارة اهي اللي داقة عليه ومذكرته.!
صج ابوها كان يحبها واايد ومدلعها .. بس كانت تحسه دايما ً يتهرب انه يتواجد معاها ..
سواءا هالشعور كان صحيح او لا .. ب
س هذا اللي منى كانت تحس فيه وعمرها ما قالته حق احد ..

منى اصطنعت الابتسامة: اوكي خلاس ما عليه .. انا بدق على هبة وو .. و.. اروح معاها احسن

محمد: اييي زيييييين .. اخذي هبة وروحوا .. ولا تنسين وصلي لهم سلامي وتعذري لي منهم ها يبا ( وكمل استكآنته الجآي ) ..

منى ابتسمت وهزت راسها ...
بعدهآ بـ 10 دقايق صعدت فوق لـ غرفتها .. ومسكت تلفون دارها الابيض اللي موجود دايم على الكوميدينة اليمين من سريرها .. بالضبط يم البرواز المذهب صورتها واهي بيبي مع ابوها وامها ..

دقت منى بكل خفة أرقام موبايل هبة اللي حآفظته صم من كثر ما تدق عليه ..
اول ما شالته هبة .. منى قالت لها سالفة حادث ايمان وانها ودها تزورها ..
اتفقت معاها انه يتقابلون بالمستشفى ..
هبة اول شي ما رضت واستحت انها تروح مع منى ..
بس منى اقنعتها و "رشتها "! :

منى: هبوووي عشان خاطري لا تسيرين جذي عاد .. يعني تبيني اروح بروحي ما يسير ... سمعي لما نخلس .. عازمتج على ابل بيز .. غرامج ههههههههه

هبة ضحكت واهي مستحية : واي لااااء نقطة ضعفي .. ..( تنهدت ) .. ( وبـ تردد واضح )
خلاص انزين بييي معاج .. بس خليني اقول حق ابوي قبل ..

منى: انتي روحي قولي له الحين .. وانا بروح اخذ لي شاور وازهب .. ناطره منج فون اوكي

هبة: خلاص اوكي يالله باي .. اموااه

منى: اموااه .. بباي

،

بالمستشفى ،
عيسى كان قاعد على الكرسي الجلد الاخضر اللي يم سرير ايمان ..
خولة كانت بالحمام تتوضى ..
اما سهيلة فكانت واقفة يم راس ايمان وتمسح على شعرها ..

ايمان تكلمت بـ صعوبة: شكلي غلط مو ؟

عيسى ضحك بـ صمت على تفكير اخته ..
اللي كان كل همها شكلها عقب الحادث ..

سهيلة: اموون حرام عليج استغفري ربج شنو شكلج غلط .. شحلوج تهبلين مافيج الا العافية

ايمان بـ حزن ودلع: ايي قصي علي .. اصلا حتى براطمي احسهم طاقين السقف

سهيلة وعيسى ضحكوا : ههههههههههه

ايمان تتدلع: لا والله .. شفتي حتى عيسى قاعد يضحك علي

عيسى قام من مكانه وراح صوب ايمان ..
عيسى طالع ايمآن وشبص عيونه جنه قاعد يشرب الزقآرة

عيسى: ايماانوو .. تصدقين؟ .. حلو عليج الدلع والتنهووص ..
جان زييين من زمان مسويه الحادث .. بدل الدفاشة اللي كنتي فيها

ايمان ابتسمت بـ صعوبة : هيهيهي سخيييف تدري

عيسى رفع حواجبه: هاااااااا !!

ايمان استحت و حست انها زودتها مع اخوها
وسكتت واهي تطالع سهيلة اللي كانت ماسكة ضحكتها ..
خولة طلعت من الحمام واهي تقوطر ماي ..

خولة: سهيلة زتج عطيني الفوطة يمه ... تلقيين الفوط بِ الكبت .. انا توني مصفطتهم هناك

سهيلة راحت بسرعة وطلعت الفوطة الزرقا المطرزة بابيض .. وعطتها خولة ..
خولة خذتها ومسحت ويهها وايدها .. وطالعت ايمان

خولة : لاا ماشاء الله ويهج رااد .. اشووَه الحِمدالله

عيسى وسهيلة يطالعون بعض ويبتسمون ..

ايمان: يماااااااه .. اذا صج اللي تقولونه عيل وين المنظرة .. من مساع اقولكم عطوني اياها و موراضين

عيسى: هههههههههه عطوها يبا خل ترتاح دوختنا

سهيلة: لااااااا لااا لاا

ايمان: يمه شفتيييهم

خولة : هههههههههه .. ايمااانوو عن الدلع يالله .. ماكو منظرة الحيين ..
لما تطلعين من هني بِ السلامة ان شاء الله اخذي كل المناظر وتمقلي كثر ما تبين

ايمان عقدت حواجبها بـ صعوبة و ألم ..

خولة ابتسمت و دزت الطاولة صوب زاوية الغرفة ..
وفرشت السيادة مكان ما كانت موجودة الطآولة .. لبست عباتها وحجابها وبدت تصلي ..

عيسى أشَر حق البنات انه بيطلع شوي برة عشان يدخن ،
طلع عيسى من الغرفة ..
وعلى طول طلع تلفونه من مخباه .. ومشى صوب الاصنصير ..جَيك على تلفونه
لقى مسج ومس كول من منى ..

المسج:

"حبيبي انتوا بأي مستشفى؟ عشان انا وهبة بنزوركم
ونتحمد حق ايمان بالسلامة رد على بسرعة ناطرتك "

عيسى انصدم ..
ما توقع انه منى تتجرأ وتجي عندهم
بس بعدين فكر انه اهي بنت جيرانهم .. ولزوم عليها تسوي الواجب وتزورهم بهالوقت ...

اول ما وصل الدور الارضي ..
ومشى بِ الممر .. مروا مجموعة بنات كاشخين و كل وحدة شايلة باقة ورد نفس لون حجابها ..
كان شكلهم جذاب ومرتب ..

عيسى لا شعوريا ً طالعهم بس بعدين رد نزل راسه ..
البنات ابتسموا واقعدوا يتساسرون واهم مستحين ويتلفتون عليه من تحت ليه تحت ..
عيسى مشى عنهم .. ابتسم وهز رآسه ..

دايما ً عيسى تصادفه هَ المواقف مع البنات ..
وجم مرة يتناغزون ليه مَر يمهم .. وجم مرة بعد يتحرشون ! ..

كاريزمة ْ عيسى الطاغية كانت تخلي بعض البنات ينجذبون له ..
ويتمنون نظرة منه . . .
اما عيسى فـ كانت وحدة اللي شاغله تفكيره وباله .. منى وبس ..

،

طلع عيسى برة .. و وقف عند الباب المتحرك للـ مستشفى ..
طلع له زقارة .. حطها بين شفايفه و ولعهآ ... اخذ نفس واحد ..
وبعدين حط سماعة التلفون ودق على منى ..

منى كانت توها طالعة من الحمام ..
ولافة جسمها وشعرها بـ فوطة بيضا ..
سمعت تلفونها يرن ..
بسرعة شالت الفوطة اللي على شعرها ... تناثر شعرها الرطب على ظهرها وجتوفها ..
مسحت ايدها الرطبة بالفوطة اللي على جسمها .. وشالت التلفون ..

منى ردت عليه بـ لهفة : هلا حبيبي

عيسى: هلا .. صج ناوية تزورين ايمان ؟

منى قعدت على الفراش : ايي صج ليش ؟.. ما تبيني ايي ؟

عيسى : لااااه مو قصدي... بسسسس ..... ما ادري .. يعني .. ( واخذ نفس ثاني من الزقاره )

منى مسكت شعرها الرطب ويابته على جنب: افهم انك مو حاب اني ايي المستشفى؟ ..
اذا جذي السالفة خلاس مو إله عيل

عيسى حس انها زعلت : لا يبا شفيج لا تصيرين رقلة .. اكيد ابييج تيين .. بس مابي احد يلاحظ انه في شي بيني وبينج

منى رفعت حاجب واحد: عيسى! .. واذا احد لاحظ؟ .. احنا بِ النهاية بنكون حق بعض وراح نتزوج مو؟
.. وهذي فرسة عشان اتقرـ ..

عيسى قاطعها: بعدين اكلمج اوكي

منى استغربت: عيسى لحظة شفيك !

عيسى صكر اسنانه على بعض وقال: منى بعدين في ناس عندي ..

منى ضحكت : زين زين .. يالله باي ..

صكرت فونها و راحت صوب التسريحة وطلعت الاستشوار من الدرج الثاني ..
وركبته بِ البلآك .. بعدين مشت ناحية كبتها وطلعت لها بدلة بيضة مخططة بـ اسود وقميص شيفون ابيض .. وعطتهم لوسي عشان تضربهم اوتي ..

عقب ما خلصت من شعرها ..
رفعته بـ كلبسه .. ولبست قميص نص جم قطن وردي ليه تحت الركبة بشوي ..
وقعدت جبال تسريحتها تتمكيج ..

طق طق ،
منى كانت قاعدة تحدد شفايفها بـ قلم الحمرا اللحمي ..

منى: منوو ؟

لوسي: يور كلووذز مسس

منى: كم ان لوسي ..

دخلت لوسي وحطت بدلة منى على الفراش بـ حذر عشان ما تتعفس ..

منى التفتت على لوسي وابتسمت: ثاانكيو لوسي .. اند بلييز كان يو برنق مي سم بخور

لوسي : اوكي مس ...

منى ابتسمت : ثانكيوو

و ردت تتمكيج مرة ثانية ..
تتن تتن ..
كان مسج من هبة تقولهآ ان َ تم الحصول على الموآفقة
من الجهآت العليا ( ابوهآ ) انهآ تروح معاها ابل بيز ..

،

وقت تصكيره التلفون،

عيسى صكر بسرعة من منى
لانه شاف خاله سعود ومرته امل
جايين صوبه ..

سعود و امل شافوا عيسى ومشوا ناحيته ..

عيسى مد ايده وسلم على خاله : هلااا خالي شلونك ؟ شخبارك ؟ ... هاا مغتر اليوم ؟
( قالها على غشمرة لانه سعود دايما ً لبسه بدل ونادر ما يلبس دشاديش )

سعود رد عليه واهو يسنع غترته: هههههه اييي قلنا نغيير شوي
وطالع امل اللي كانت تبتسم

عيسى ابتسم و التفت على امل: شخبارج امل ؟ شمسوية ؟

امل: بخير تمااام .. خطاكم السو .. ما تستاهل اموووونه والله

عيسى: خطاج اللاش تسلمين بعد هذا امر الله .. الحمد الله ...... عارفين اي غرفة صح؟

سعود : ايي قايلة لنا خولة ..
( وشاف تلفون عيسى اللي كان قاعد يشب بـ ايده وقاله واهو يتحرش فيه ) بس ليش؟ منت داش ويانا ؟

عيسى ضحك على نغزة خاله: خالي سعود يا بعد راسي والله ... منشغل مع صاحبي بسالفة .. . هه حتى زقارتي ما كملتها

سعود: ههههههه اوكي خالو .. احنا داخلين .. ( وطبطب على جتفه ) مو تطول انا ناطرك.. ابيك بسالفة ..(التفت على امل ) ... يالله اموله

و دخلوا امل وسعود المستشفى ..
عيسى قعد يطالعهم واهم داشين .. كان شكلهم حلو ..
تخيل نفسه بدالهم .. اهو ومعاه منى ..
مع بعض بدون لا احد يراقبهم
ولا يحاسبهم على الطلعة والدشة ..
بدون خوف منى ولا خوفه اهو ان احد من اهله يعرف عن علاقته معاها ..


//

بـ غرفة منى ،
كانت الساعة 3 ونص العصر ..

منى لبست بدلتها ..
كانت عبارة عن بنطرون خام ابيض مخطط بالطول بالاسود ..
وقميص ابيض شيفون وفوقهم جاكيته ذربة ومرتبة .. نفس الوان البنطرون ضبط ..
رفعت شعرها ذيل حصان
مكيآجها كان خفيف .. حاطة حمرة لحمية .. وبس ماسكرا مع شوية بودرة مشمشية للخدود ..
.. وخذت جنطتها الفندي السودا .. ولبست كعب اسود ..

تبخرت من البخور اللي يابته لها لوسي ..
وقفت جبآل منظرتها الطويلة .. عدلت من نفسها
شافت عمرها من جميع النواحي ..
وتاكدت انه شكلها كان حلو ومرتب .. ورسمي إلى حد ٍ ما ..
كانت حابة تطلع جدام بيت بو قصب على انها بنت جدية وتحترم المكان اللي زايرته
بس ما يمنع انها تكون بـ نفس الوقت انيقــة ..

رن تلفون منى ،
بسرعة طلعته من جنطتها ..
وخلته عالسبيكر وحطته عالكوميدينه ..

منى كانت قاعده تعدل ترجيتها اليمين: هلااا هبوي ... هاا زاهبة ؟

هبة واهي تطلع لها قميص من كبتها: ايي ايي زاهبة .. انتي جم يبيلج على ما تخلصين؟

منى: انا خالسة .. الحين بطلع من بيتنا

هبة : ابيه من صجج !! يالله عيل بااااي خليني اخلص

منى ابتسمت : مو توج تقولين لي زاهبة

هبة: شسوي فيج عاد انتي سريعة

منى:هههههه انزين يَ البطيئة ... مدامج لي الحين ما خلستي ..
انا بروح اول اشتري بوكيه ورد وبعدين امرج .. اوكي

هبة: ايييي زاييي .. ين عيل عشان يمديني

وصكروا من بعض ،
منى طلعت من البيت وركبت سيارتها ..
حطت جنطتها على الكرسي اللي يمها .. وقصرت على الرادو ..
طلعت من فريجهم ..
ومسكت تلفونها وحطت سماعة الاذون ..
دقت على عيسى ..

عيسى كان تلفونه يشب بـ اسم مُناي ،
شاله بعد ما رن اكثر من مرة ..
و رَد عليها ب لهجة كويتية بحتَة .. لهجة تذوب !!

عيسى: هلا

مني استحت .. وردت بـ دلع : هلا فيك .. جنك نسيتني

عيسى بـ نبرة هآدية: لا ما نسيتِج .. انتي وينج فيه الحيِن ؟

منى: كاني بروح اشتري ورد وبعدين بمر هبووي و نيييلكم ..
بس على فكرة ترى انته لي الحين ما قلت لي
اي مستشفى ؟ واي طابق ؟و اي غرفة؟ واي جناح ؟واي كل "ابو" شي ؟

عيسى: هههههههههههههه زين زين .. شوي شوي كليتيني

منى انحرجت وبـ دلع ومياعة: عيساااه

عيسى: آآآه يا عيون عيسى .. تكفين ناديني مرة ثانية

منى استحت وما ردت ..

عيسى بـ لهجة خباثة: ياا الله ! .. هالبنات عسى ما قلنا لهم كلمة حلوة خقوا

منى : لاااا ؟؟ .. ومنو هَ البنات اللي مجرب فيهم بَ الله؟

عيسى: اووووو عدي وخربطي .. وايد

منى: هييييييء جد والله اتكلم؟

عيسى: يعني يهمِج تعرفين ؟

منى: اكييد يهمني

عيسي: و ليش يهمج ؟

منى رفعت حاجبها: تستعبط سح

عيسى: هااا ! شنو تستعبط كلميني عَدل

مُنى انحرجت ما ردت عليه ..
عيسى: لا يكون زعلتي؟ .. ترى والله مالي مزاج اقعد اراضيج

منى بـ نرفزه : انتتتتتته ...همممم .. تدري صاير مليق وسخيف ووووو تبط الجبد بعد

عيسى :ههههههههههههههههههههااااي احب اطفرج شسوي

منى وصلت عند مصافط الجمعية ..
اللي فيها محل يبيع ورد .. منى زبونته الدايمة و على طول
تتعامل معاه وتشتري منه ..

منى ابتسمت: .. يالله ترى انا وسلت عند محل الورد .. قولي اي مستشفى .. نشف ريجي وانا اسئلك هَ السؤال ..

عيسى: شتسوين اذا الحين قلت لج مابيج تيين ؟

منى كانت قاعدة تدور مصفط .. لما سمعت هالجملة
رزمت بريك خفيف وانصدمت

منى: مو من سجك ؟!

عيسى: هههخخخخخ قلت لج احب اطفرج

منى: واااااااااااي مننننننك .. لو سمحت استاذ عيسي .. اذا ممكن .. بليييز قولي اي مستشفى

عيسى: خلاص خلاص يبا كسرتي خاطري .. الاميري .. ( وبـ استهزاء ) تدلينه ؟

منى رفعت حاجب واحد: ايي ادله .. شايفني عليمية ؟

عيسى: تبين الصراحة ايي..
انتوا يالبنآت خبرتكم على قولتكم اييي شي .. خاصة بِ السياقة ... والدليل ايمانوو اختي

منى: ياااربي .. انته شفيك علي اليوم .. بس تدري شلون ؟ .. ما راح اناقششك الحين لانه كلشش مو وقته ..

عيسى ضحك: احاجييج

منى: نعم

عيسى : أحبِج

منى حست بـ حرورة وخجل: حبتك العافية

عيسى: بس انا ابي وحدة غير العافية تحبني

منى: هههههه ييووز

عيسى ضحك و بعدين قالها عن رقم الغرفة و بـ اي طابق ..
طبعا عطاها جم توصية من ناحية تصرفها لما تشوفه بالمستشفى ..
عشان ما يبين انه بينهم حاصل اي نوع
من انواع العلاقات .. اللهم علاقة الجار بـ الجار .. ولو انه يدري انه جدامها راح ينسى نفسه !​

 

[لافه شعرها]

رد : روايتِي الاولى: { مُنـــاي } بِ قَلمي- دِميرة

رووووووووعه القصه

انا بروح اتدلع عند زوجي مثل منى خخخخخ

 

[MISS DaL3]

تسسسسلم لنآ الآنآآآمل دميــــره
الروايه وآآيد حلوه

 

[واثقة بجمالها]

يا قلبي قلب عيسى الله يستر عليه ان شاءالله

والله والله والله نزلت دمعتي من كلام سهيله وموقفهااا حييل عجبني انها دقت ع منى وقالتلهاا

صج صج صج الدنيا ما تسوووى


مميزة واتحفتيناا مششاءالله عليج

 

[كويتية و النعم]

الله يسترر شبيصير بعييسى
ثانكس حبيبتي
و ناطرين

 

[DeeMa-]

واااااااااااي مو صج ينن هالبااااااااااااارت


تكفيييييييين دميرة ماعليج امر كل يوم نزلي بااارت بليييييييز


وبعدين نبيج تكثرين من احدااث نوال وعزوز لوول واحمد وايمان


مشكوورة

 

[" غـادهـ "]

.

وآحشتني موووووت موووووووووت :eh_s(22):
وآآآآي طآآفني شي وشويآآت غميضه ..
>> كنت قآآطعه مرقده بآلطبيب كآآنت حيآتي مريره وآآآي آلله لآ يعيدهآ من تجربه
<< تمووووت إذآ مآآ بشرت مآ بقى آحد مآ علمته خخخخخخ من حلآت آلخبر عشتوووو ..

بقرآ إلي طآآفني وعقب بعلق
<< آمبي عآآيشه دوور يعني كلش در در هههههههه

بس آكييييد آكو شي رآح يبهرني كآلعاده طبعآ

آمووآآآآآآآآآآه فديتج تقبلي ودي
:eh_s(17):

.

 

[Sayounara]

رد : روايتِي الاولى: { مُنـــاي } بِ قَلمي- دِميرة

عيسسسسسسى

 

[loloالحلوة]

يوم عن يوم تحلى القصة
الله يحلي ايامج دموووور
و البارت عجيب
يعطيج العافية

 

[noynoy]

واي كسر خاطري عيسى
و تينن سهيله حبيت حركتها
بس سؤال الحين خالهم سعود وايد مع خوله ؟
لان ماكو مواقف بين عايله خوله و بين سعود الا يوم الحادث

 

[قطيووه^_^]

حيااااااااااتي عيسى كسر خاطري


ناطرينج دموور