روايتي الرابعه ~ قـَرين فجر ~ واقعية 100% .. اللي يخااف لا يدش ReRez

[zooz92]

اهليييييييين زوووز ولهت على طلتج العسل ^_^ اشلوونج حبيبتي
ومشكووره عالمتابعه والتعليق اللطيف الخفيف ^_^

وانا ولهت علييج حبيبتي

تماام الحمدالله

نبي البااارت الحييين :eh_s(9):​

 

[Zozαĺiиaђ]

اوووووووكي

ناطرييينه

 

[spongebob93]

وااي القصه مبين انها عجييبه .. كنت اتمنى اني امس اقراها وارد بس شسمه اللاب مو عندي لووول
ترا متردده اقرا ولا لا لاني اخاف =\ بس البارت الاول عدا على خير .. واذا شفت من البارتات اليايه انها تخرع وجذي راح اقولج اني ماراح اقراها بس صدقيني ماراح ادعلي عليج او شي رايتج بيضه ;*** لانه يعني انتي من البدايه حذرتينا
--------------
بالنسبه حق ابو فجر الصراحه ما يصير جذي يعني ظلم هم اهيه بنته .. و ام فجر كاسره خاطري الله يصبرها .. فجر غلطت لم كلمت امها جذي هم اهيه مالها ذنب :eh_s(2): ..
ومشكووه عالباارت وناطرينج :***

 

[@أحلاهم وأتحداهم@]

صباح الخير
المنتدى نور بوجود قصتج والله انا من اشد المعجبين بقصصج الحلوه وموفقه ريريز
ونشالله انشوفج من اكبر الكاتبات الي بالكويت

 

[ReRez]

أول شي حابه اقولكم ان هالقصه لأن نوعها غير عن كل مره فما راح تكون طويله مثل باجي قصصي
لأن الرعب لو طال وايد يمصخ و يبرد

تفضلوا

- 2 -

رحت مع امي واهي طول الطريج تحاول تقنعني نرجع البيت .. بس انا كنت مصره اروح .. وصلنا عند بيت ابوي .. عفوا وصلنا عند فــلـــة ابووي .. كانت فعلا قصر مصغـّر بمنطقة من أرقى مناطق الكويت

سعاد : يمه الله يخليج بلاها
فجر : ( قعدت اطالع الفلة و قلبي يعورني اكثر ) لا يمه دام وصلت خل انزل واقوله اللي عندي
سعاد : عيل بنزل معاج .. ماراح اخليج تنزلين بروحج
فجر : لا مابي يقولون انتي اللي شيشتيني .. بنزل بروحي نطريني ماراح اطول
سعاد : ( واهي خايفه علي ) ديري بالج
فجر : ان شاءالله
( خليتها ونزلت وانا كل ما اقرّب خطوه من البوابه قلبي يرقع حيل .. انا ليش ييت ؟؟ دام اهو مايبينه ولا حاس فينا ليش ييت ؟ كان ودي بهاللحظة ارجع .. بس حسافه كنت عنيده .. حتى نفسي اعاندها .. وقفت عند الباب و طقيت الجرس .. و اطلعتلي خدامة فلبينية لابسة اليونيفورم )

الخدامه : يس مس ؟
فجر : ( بتردد ) بابا سالم موجود ؟
الخدامه : يس .. مدام اند سير موجود منو قول ؟
فجر : قولي حق بابا فجر بره
الخدامه : اوكي
( راحت وخلتني قلبي كان يعزف كل انواع الطبول .. شوي جان ترجع و قالتلي الحقها .. دشيت داخل .. وكان البيت فخم بشكل عجيب .. قعدت اطالع الطوف كلها لوحات .. وبكل زاويه في تماثيل .. استغفرالله مايدرون ان التماثيل ماتخلي الملائكة تدخل البيت ؟ .. لحقت الخدامه دخلتني على صالة داخلية .. شفته اهناك لأول مره اشوفه عالطبيعة من بعد 8 سنين .. كان آخر مره زارنا فيها وآنا بعمر 10 سنين .. والحين بعد هالسنين شفته قاعد و ويهه فيه عصبيه ويمه قاعده مرته )

فجر : ( قلبي يرقع حيل ) السلام عليكم
ابوي : ( يخزني ) اشلونج فجر
فجر : بخير يبه انت اشلونك ( رحت يمه سلمت عليه وحطيت ايدي بيده .. ماقدرت ابوس خده او راسه .. شلتني نظرته و نظرة مرته )
ابوي : الحمدلله .. ها فيكم شي ؟
فجر : ( كانت نظرات مرت ابوي تحرقني بس حاولت ما اطالعها وانا اتكلم ) اي يبه انا صار عمري 18 من جم شهر
مرت ابوي : و خير يا طير ؟؟ اول وحده يصير عمرها 18 ؟ تبين نسويلج عيد ميلاد ولا نييبلج سياره مثلا ؟
ابوي : ام عبدالله شوي بس خل اشوف اشتبي .. و اشبغيتي يعني ؟
( لاحظوا اني للحين ماقعدت انا واقفه بمكاني جدامهم .. و محد قالي تفضلي )
فجر : ( بلعت ريجي ) اي يبه انا ابي سياره
مرت ابوي : ( واهي تضحك ) طاع بنت سعاد واحلييلها دمها خفيف
فجر : ( حيل عصبت يوم طرت أمي ) خالتي لو سمحتي امي مالها شغل بالموضوع
مرت ابوي : مالها شغل ؟؟ اقطع ايدي اذا مو اهي يايبتج لي اهني عشان اتطرّين السياره
فجر : أطر ؟؟؟ ( التفت على ابوي بعصبيه ) ليش انا مو بنتك يبه مثل ما نوف بنتك ؟؟
مرت ابوي : هييي انتي .. لا تقارنين نفسج ببنتي .. بنتي تسوى عشره من امثالكم بعد هذا اللي ناقص بنات سعاد
ابوي : ام عبدالله لحظه انا بكلمها .. ليش الفلوس اللي اقطها عليكم شهريا حق شنو ؟ مو حق مصرفكم وحاجياتكم ؟؟
فجر : ( مت قهر ) يبه هالجم دينار شتسوي ؟ ماجله و ملابس وطلبات البيت .. غير معاش الخدامه .. اكيد ماراح يكفي افتحلي سياره
ابوي : بلى يكفي موشرط تييبون موديل السنة
مرت ابوي : و موشرط تحطون خدامه
فجر : ( حقرت مرت ابوي و رديت على كلام ابوي ) بس يبه مايصير انا اخذلي سياره قديمه و اعيالك كل واحد سياره احلى من الثانيه زين هم انا بنتك
ابوي : راح ازيد عالفلوس 30 دينار شهريا غير جذي انا ماعندي
فجر : ( قلبي عورني و عيوني دمعت ) يبه انت مستوعب اللي قاعد تقوله .. يبه حرام عليك
مرت ابوي : احرمت عيشتج قولي آمين .. والله ماراح يقط عليكم فلس واحد زياده ويللا طلعي بره .. بيتي يتعذر اشكالج
( ماهزني كلامها كثر ما هزني ابووي .. ابوي اللي ساكت و عينه عالتلفزيون و لا جني موجوده ولا جني انهنت وانطردت واهو قاعد جنه واحد من هالتماثيل اللي تارسه البيت )

فجر : ( بلعت الغصة ) ساكت وهذي تطردني من بيتك ؟؟ يسلم راسك يبه
مرت ابوي : ينقطع راسج قولي آمين .. شنو هذي ؟؟ صج تربية وصخه قومي طلعي بره يللا
ابوي : فجر خلاص قلتلج راح ازيدكم 30 توكلي الحين
مرت ابوي : ذلفي من بيتي ليش واقفه ماتفهمين عربي؟؟؟
( قعدت اخزها بنظرة فيها كل الحقد اللي بقلبي )
مرت ابوي : اشفيج اتطالعيني جذي ويعه حتى ويعه
( مارديت عليها بس تميت اطالعها بنفس النظرات )
مرت ابوي : هيي انتي غبيه ولا شنو ؟؟ ولا يمكن سعادوو ماتخليج تطلعين الا اذا سويتي اللي طرشتج عليه بعد معروفه بنت فقر هالسعاد
فجر : ( ماقدرت اتحمل اكثر جان انفجر ) لا تييبين سيرة امي على السانج .. امي تاج راسج
ابوي : ( يصرخ بصوت عالي ) فجر!!!!
( بنفس الوقت قامت مرت ابوي و عطتني أول طراق احصلة بحياتي .. طراق قوي لدرجة ان اذني طنت من قوته .. من الصدمه ماقدرت اسوي شي .. طالعت ابوي لقيته واقف يخزني .. مسكت خدي و طالعت مرت ابوي و انا حابسه دموعي )
فجر : عساج تشوفين كل شي شين بحياتج .. عساج ماتتهنين بلحظة حلوه
( خليتهم و عطيتهم ظهري و دموعي تحرق خدي .. كنت ابي اطلع من البيت بأسرع وقت )
مرت ابوي : ( تصرخ ) شنوووو؟؟؟ تدعين علي ياللي مو متربية ؟؟ هيّن .. هيّن يا فجر يا بنت سعاد
--

( مسحت دموعي و صعدت السيارة )
سعاد : اشقالج ؟
فجر : ولا شي
سعاد : قولي اشقالج ؟؟ كنتي تبجين ؟؟
فجر : ( غصب ماسكه دموعي ) لا مافي شي يستاهل ابجي عشانه .. امشي يمه لاتوقفين اهني وايد
سعاد : ما امشي الا اعرف اشقالولج ؟
فجر : قالي بيزيد 30 دينار على اللي يعطينه اياه وغيره ماعنده
سعاد : استغفرالله العلي العظيم
( حركت السياره ومحد منا نطق بحرف وانا طول الطريج كنت اطالع الشارع خدي كان شاب نار و مابغيت امي تدري باللي صار )
- وصلت البيت و سيدة على غرفتي قفلت الباب علي و بجيت بحرقة قلب -
--

مر شهرين وماشفنا ولا 30 فلس زيادة عالمعاش و حالتي النفسية كانت من سيئ إلى أسوء .. كنت ما آكل معاهم .. كنت قالبه نومتي اذا اهم قاعدين انا نايمه واذا نايمين انا قاعده وهذي حالتي .. و بيوم كالعادة كنت توني قاعده من النوم الساعه 11 بالليل .. كان الكل يبي ينام .. طلعت لقيت يدتي بالصالة

ماما آمنة : ها قمتي يمه ؟
فجر : اي توني اقوم
ماما آمنة : وانتي كل يوم جذي مانشوفج الا جم دقيقة ؟
فجر : بعد شسوي ملل و زهقه
ماما آمنة : ( مدتلي ايدها ) تعالي يمه قعدي يمي
فجر : أغسل وارجع
ماما آمنة : عيل بعدين تعاليلي غرفتي ومنها تدهنين رويلاتي
فجر : ان شاءالله

( حمامنا - عزكم الله - صاير بره بالحوش .. احنا مثل ماقلت ساكنين بدور أرضي .. دخلت الحمام غسلت ويهي و فرشت اسناني و انا اغسل حسيت بشي غريب .. حسيت ببروده قوية عند ارقبتي .. جنه في هوا ياي دايركت على ارقبتي .. التفت بشوف باب الحمام مبطل ولا لأ .. بس كان مسكر .. ومادري من وين يه هالهوا .. خلصت غسلت بسرعه و طلعت رحت غرفة يدتي )

فجر : ( دخلت عليها ) ها يمه نمتي ؟
ماما آمنة : لا يمه قاعده ناطرتج .. قعدي يمي
( قعدت يمها على السرير واهي منسدحه )
ماما آمنة : يمه امج مو عاجبها حالج ولا احد فينا عاجبه الحاله اللي انتي فيها .. كل ما اييون خوالج تكونين نايمه مايصير جذي
فجر : مالي خلق اقعد مع احد .. يمه نفسيتي وايد تعبانه هاليومين
ماما آمنة : ادري يمه والله ادري بس لازم تعدلين نومتج عشان تقعدين معانا مايصير هالحاله اللي انتي فيها
فجر : ( اخنقتني العبره مادري اشفيني صايره بسرعة احس اني ببجي ) ان شاءالله
ماما آمنة : عفية عالشاطره .. يللا اخذي الدهن ودلكيني
فجر : ان شاءالله
( قمت يبت زيت العضلات وقعدت ادلك ريولها و ايدها و اهي تسولف معاي وانا ارد بكلمات بسيطة .. لين نامت وانا ادلكها .. تهبل يدتي اذا شفتوها تحسون انها ياهل مو عيوز .. سكرت العلبه اللي بيدي وحطيتها عالميز و طلعت من غرفتها رحت غرفة فاطمة بطلت الباب لقيت ليت غرفتها مسكر )
فاطمة : فجر ؟
فجر : اي انتي نايمه ؟
فاطمة : لا بس سوما نايمه ( الخدامه تنام بغرفة فاطمة )
فجر : اتيين غرفتي شوي نسولف ؟
فاطمة : اوكي
( نطرتها بره غرفتها .. اطلعت ورحنا حق غرفتي )
فجر : ( قعدنا عالسرير ) فطوم انا احس اني مختنقه
فاطمة : من نومتج المعفوسه
فجر : لا والله صج مادري اشفيني احس اني مختنقه ومالي خلق شي
فاطمة : اي صج والله عدلي نومتج وبتصيرين احسن مو كل يوم شابكه لي الصبح وبعدها تنامين وتقومين الليل و كله تسهرين بروحج
فجر : يعني تهقين نفسيتي تتعدل لو عدلت نومتي؟
فاطمة : اكييد .. جم مره يونا شيّوخ و شيوم و كله انتي نايمه (شيخه وشيماء بنات خالي فهد )
فجر : لو تقعدوني جان قمت
فاطمة : ( تضحك ) حلفي بس؟؟
فجر : اشفيج تضحكين ؟
فاطمة : زفيتي شيوم زف والله اكسرت خاطري طردتيها من غرفتج
فجر : ويي فشله والله ماذكر
فاطمة : ( تثاوبت ) اي والله حده فشله انقص ويهها .. المهم انا بروح انام وانتي لاتنامين قعدي لي باجر الليل عشان تعدلين نومتج
فجر : اوكي بحاول
فاطمة : ( قامت ) تصبحين على خير
فجر : وانتي من اهله ( اطلعت من الغرفه وخلتني )

قمت خذيت اللاب توب من الصاله .. طبعا هاللاب توب شراكة بيني وبين فاطمة و بين امي بعد .. شلت واير التلفون و خذيته معاي الغرفه .. قعدت على سريري و بطلت اللاب توب طبعا لازم اول شي اسمع سنفونية طرّاد تطلع من المروحه .. ركبت واير التلفون و شبكت .. و دشيت المسنجر .. وقعدت اسولف مع ربعي .. مر الوقت و صارت الساعه 3 .. ردلي الاحساس اللي حسيته بالحمام .. حسيت في هوا صوب ارقبتي .. شعر يمبي وقف هديت الكي بورد وقعدت اتلفت .. تعوذت من ابليس ورديت اسولف بالمسنجر .. أذن الفير قمت اتيدد طلعت الحوش مادري ليش قلبي بدى يرقع .. متعوده اروح الحمام هالحزه بس مادري ليش خفت .. دشيت تيددت و بسرعه طلعت .. فرشت السيادة و صليت .. وبعدها رديت عالنت مره ثانيه .. قعدت اسولف بالمسنجر مع واحد من اسمه حسن .. علاقتي فيه صداقة وماتتعدى المسنجر .. البيت كان كله هدووء .. فجأه سمعت صوت بالصاله صوت احد يمشي .. وصل صوت الخطوات لي باب غرفتي .. رفعت راسي عالباب بنطر احد يدش علي بس محد دش .. قلت (برب) حق اللي اكلمه و نطرت فتره بعدها سميت بالرحمن و بطلت باب غرفتي بس مالقيت احد .. تعوذت من ابليس و رحت أشوف منو اللي قعد ؟؟ بس الكل نايم .. خفت جان اروح اقعّد امي حق الصلاة .. منها تصلي ومنها اقعد معاها لأني خايفة .. قعدت بالصالة نطرت امي تطلع من الحمام و كنت اتعوذ من ابليس وقلبي يرقع .. بعد فترة رديت اسمع خطوات حدي خفت وقمت اتعوذ بس هالمره اطلعت خطوات امي خلصت من الحمام ويت تصلي .. ماتدرون اشكثر ارتحت يوم شفتها .. قعدت يمها ناطرتها تخلص
سعاد : ( بعد ماخلصت صلاتها ) ها حبيبتي اشفيج قاعده اهني
فجر : يمه سمعت قبل شوي صوت خطوات يم داري بس محد كان قاعد
سعاد : تعوذي من ابليس ماكو شي لا تخوفين نفسج
فجر : والله يمه سمعت خطوات واضحه بعد
سعاد : يمكن يدتج قامت تعرفينها اهي و عكازاتها
فجر : لا يمه والله الصوت وصل لي باب داري بعدين وقف بطلت الباب ماكو احد
سعاد : ( ابتسمت و ماهتمت للموضوع ) تعالي يمي
( رحت يمها جان تلمني وتحط راسي على صدرها )
سعاد : لا تخافين مافي شي يخوف هذا بيتنا من عمر ومافيه الا العافية
( سكت و حاولت اتناسى اللي صار )
سعاد : ( باست راسي واقعدت تمسح على شعري )
فجر : احبج يمه .. واسفه اذا ضايقتج معاي الايام اللي طافت
سعاد : يمه انتي واختج عندي بالدنيا و ما ازعل منكم
فجر : ( رفعت راسي وطالعتها ) و ماما آمنة ؟
سعاد : ( تضحك ) لا عاد هذي امي .. اقطكم بالشارع انتي واختج واخلي امي عندي
فجر : ( ضحكت ) شفتي اطلعت الصجية عيل لا تقولين احنا عندج بالدنيا
سعاد : ( باست راسي مره ثانية ) يا بعد عمري

( كنت حيل مرتاحه وانا حاطه راسي على صدرها .. فعلا حنان الام شي مايتعوض )
سعاد : انا بروح انام ماراح تنامين ؟
فجر : لا قلت بعدل نومتي .. يمه لاتنامين قعدي معاي عالأقل لين يقوم احد
سعاد : مابقى شي وتقوم سوما
فجر : ميخالف قعدي معاي عفية
سعاد : فجور بسج حنه .. انا دايخه وبروح انام
( قامت و راحت غرفتها و خلتني .. قمت رجعت حق اللاب توب نسيت حسن شابك مسكين قلتله شوي و ارجع .. قعدت عالسرير و لقيته اوف لاين )
فجر : هذا راح نام .. والحين محد شابك .. اقزر الوقت مع منو الحين ؟

( قررت اتناسى مخاوفي و دخلت موقع < كوت بو سته > اذا تعرفونه .. دشيت العب و مع الوقت لهيت باللعب جان اسمعه .. والله العظيم سمعت صوت نسم .. نسم قوي يم اذني .. صوت احد خذا شهيق وزفير قوي و مع الزفير كنت احس بهوا باارد على ارقبتي .. رفعت ايدي وحطيتها على ارقبتي و كل اشعره بجسمي اوقفت كان ودي اقوم بس ماقدرت اتحرك حسيت بهالوقت اني انشليت .. فجأه بهاللحظة طاحت الشمّاعة اللي بغرفتي .. شمّاعة اشكبرها صارلها سنين واقفه مكانها فجأه طاحت وطلع صوت قووي .. يوم صار جذي لا شعوريا ارجعتلي القوه و قمت ركضت بره الغرفه .. ركضت رحت حق امي .. انسدحت يمها وانا ارجف )
سعاد : ( افتحت عينها ) فجور ؟ اشفيج ؟
فجر : ( كنت ارجف حييل ) سمعت سمعت
سعاد : ( قامت اقعدت ) اشفيج يمه ؟؟ شنو سمعتي ؟
فجر : نسم يم اذني
سعاد : شنو ؟
فجر : ( صرخت ) اقولج سمعت صوت نسم يم اذني
سعاد : اعوذ بالله اشهالحجي
فجر : والله العظيم سمعته وهم شماعة الملابس طاحت بروحها
سعاد : يمه الشماعه قديمه طبيعي بييها يوم وتطيح
فجر : ( عصبت حييل ليش مو راضيه تفهمني ) يمه اشفييج اقولج في شي مو طبيعي بغرفتي والله فيها شي
سعاد : خلاص يمه بنشغل قرآن 24 ساعه بالبيت .. واذا تبين اخذ غرفتج وتاخذين غرفتي ماعندي مانع
فجر : لا ابي انام عندج اهني مابي انام بروحي
سعاد : خلاص ماشي بس هدّي نفسج

( لميت امي حييل واقعدت تقرى علي .. كنت وايد خايفه .. لأن الصوت اللي سمعته صوت واحد قاعد يتنفس بصعوبه و كان عند اذني على طول .. هالصوت كلش ماراح انساه .. وياليت السالفه استمرت على مجرد اصوات هذي مقدمة عن اللي صارلي و الياي اعظم )
---

بنات لاتقولون قصير انا والله للحين سهرانه حطيت لكم هالبارت عشان اخاف انام وما اقوم الا بالليل فما ابي أعلقكم معاي

تمسوون على خيير
:bye22:

______________


واقعية 100% اللي تخاف من ( العالم الآخر ) لا تقراها
البارتات صفحة 1 , 6
--


-

 

[catalonya_q8]

يعطيج العافيه بعرف شصار لما راحت بيت بوهااا بموووووووت

 

[الاحاسيس المبهمه]

رد: روايتي الرابعه ~ قرين فجر ~ واقعية 100% .. اللي يخااف لا يدش ReRez

ههههههههههههههههه ردودج تضحكني ساارووونه لوول يحليلج فديتج وفديت طلتج .. اشلوووونج شخبااارج
وتره نوووفووو على قولتج مالها دور انا بحصر كل السوالف عالعايله نفسها يعني ماراح اطلع عنهم

:gathering:

ومشكوووره على متابعتج سوووسوو

فديييت ضحكتج والله ...
وفديييت إلي فدااني والله ...
اناا بخييير داااامي شفتج انااا بخييير ...
إييييي الحمدلله مااراااح تبطيين جبدي خوو انتووو من اكره احد تحطوونه بكل بااارت جنكم تبووني اتواعد معاه بالجمعيه واعطييه من ذيك الراشدياات إلي يحبهاا خده ^_*
بس الحمدلله راح ترأفين بجبدي وماراح تبطينهاا ^_^ ... بس عاد الله يستر إذا فييه إنساان ثاني ببطهاا ...
بس مااوصييج بس حين والاخر خل نشوووف جم خبر عن نوفووو ^_^ لووووووووووووول عشاان اطلع حرتي وكبتي فيهاا لووووووول ...

حاااضريييين للطيبيييين جم رييرووووزه عندناااا ؟.؟

 

[MISS.D&G]

هااي ريري القصة شكلها وااااااايد حلوة :eh_s(15):

ناطرين الباجي حدها تشوق ​

 

[cute princess]

انتي قايلتلي هالسالفه من قبل :× بس لما قريتها الحين خفت مره ثانيه لوووووووول
عموما كل ما زدتي جرعة الخرعه انتي الي بتاكلينها وبتسهرين معاي بليل :$ نشوفج باجر لول

 

[catalonya_q8]

يمه يمه بس معروف بعد اذان الفير يقولون ماكو شي الظاهر هذا مارد يبوووووووي يعطيج العافيه حبي

 

[الاحاسيس المبهمه]

وااااااااااااي يمااا ... ( بس ترى مااخفت لووووول )

رييرووزه شنوو يعني شماااعه .؟.

ويعل إن شاااء الله اييد مرت ابوووهاا الكسر ... وشفيييييه ابوووهاااا جذي تدريين بمنو يذكرني .؟.
تعرفيين مسلسل على الدنيا السلاام ... شفتي عم محظوظه ومبروكه ... هذااا اهواااا ... هيفااؤوووو تسوي المصايب وتطقهم وتطردهم واهوااا يطاالعهم ويسكت ... هذااا نفس ابوو فجر... ( خووش تشبييه ^_^ ماشاء الله علي لووول )

بس مااعليييييج الفجري ( دلعهاا ) رااااح اشترييلج سياااره اجاار ( شلون مادري ) ولاا احطهاا بخاااطرج عييل نوفووو العله تااخذ وانتي ماتاخذين ( مادري شدخلهاا نوفوو )

نااااطرييينج رييروووزه ... ونووم العوافي وحلمي فيني ^_^

 

[zooz92]

مسكييينة فجر صج هذا مو ابوو

والله يستر من الي ياااي :s

يعطييج العااافية على الباااارت

نووم العواافي

نااطرينج :**

 

[الاحاسيس المبهمه]

انتي قايلتلي هالسالفه من قبل :× بس لما قريتها الحين خفت مره ثانيه لوووووووول
عموما كل ما زدتي جرعة الخرعه انتي الي بتاكلينها وبتسهرين معاي بليل :$ نشوفج باجر لول

كيوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووت ...



لج وحششششششششششه

حددددددددج

من زمااااااااااااااااااااان عنج والله :*******

اشتأنااااا ( يعني اشتقنااا باللبناني قمت اكتب لبناني عشاانج شعليييج شعلييج ^_* )

وااالله لج وحششه ....

شلووونج شالدنياا فيييييييج .؟. عسااج بخييير .؟.

 

[ReRez]

سارو تفضلي هذي شماعة مديل حلو بس شماعة فجر كانت خشب متيين لونه بني

كانت شبيهه بهذا النوع بس على خشب لول

يسمونها الناس علاقة ملابس بس يدة فجر قديمة وتسميها شماعة

ووو بس ^_^

 

[Zozαĺiиaђ]

وي شصاير :s
الله يستر شنو بصير
امممم
مادري شقول بعد لوول

خوش بارت
ثينكس يعطيج العافية حبيبتي
ناطرين البارت الي وراه

انزين الرواية اذا قصيرة يعني جم بارت ؟؟

 

[Q8iYa'87]

ناااااايس بارت ريزريز عجييييب واو قعدت اتخيل خو انا الخيال عندي فل اوبشن لوول و حبيت شخصية فجر عنادية على طيبة تينن ذكرتني بروحي ناطرين بارت 3 :**

 

[Ro7ii T7bk!]

ناااايس بارت ناطرينج حبيييي ;****

 

[@ احلى عروس @]

تسلم ايدج حبيبتي
ناطرينج

 

[P!NKia]

مسكينه صج شي يخوف
الله يعينها

 

[cute princess]

كيوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووت ...



لج وحششششششششششه

حددددددددج

من زمااااااااااااااااااااان عنج والله :*******

اشتأنااااا ( يعني اشتقنااا باللبناني قمت اكتب لبناني عشاانج شعليييج شعلييج ^_* )

وااالله لج وحششه ....

شلووونج شالدنياا فيييييييج .؟. عسااج بخييير .؟.

اهلا اهلا انا تمام انتي شلونج ؟
من زمان ما شفتج :$