روايتي الجديدة مثل ما وعدتكم " حبيب الأمس" ..حياكم

[rawona]

بدوره 22


ام_خلودي


وين^العهود



shushii



a7la 3rbaweya



fatma



n00ni



مذهلهــ



مرت ريلها








مشكورين كلكم على المتابعة والحضور.. والردود الحلوة .. واعتذر عن التأخيــــــــــــر ..


ان شاءالله تعجبكم البارتات اليايه ..
​

 

[rawona]

فرحة أهل خالد ما وقفت عند اللوية اللي سووها بالمطار وبس!! لا كل اهله راحوا معاه البيت و أهله اللي ما اقدروا ايونه بالمطار كانوا ناطرينه بالبيت واولهم "زيونه" بنت نوره ..

كانوا الخالات والعمات مسوين له عشى .. وسلمو عليه كلهم و غنوا له و في منهم رقص!! ليش لا؟ واهو اول دكتور بالعايلة و فرحة امه وابوه الاولى!! ادمعت عيون بوخالد من الفرح .. وحس بفخر وهو يطالع ولده .. نسى خالد كل التعب بهاللحظات الحلوه اللي مع أهله .. وحس ان سنين الغربة ما ضاعت جذي على الفاضي! بعد فتره بدوا أهله ينسحبون ويردون بيوتهم واحد ورا الثاني .. والكل كان يعتذر على التأخير بالقعدة خصوصا انه خالد راد من السفر تعبان .. ظل خالد وابوه وامه ونوره بالصاله .. بعد ما انسحبت حصه لغرفتها .. وطلع بدر مع عيال عمته ..

بوخالد: وشناوي عليه الحين يابوك؟

خالد: والله يبا مادري.. بس مو حاب اشتغل بوزارة الصحة خاطري اشتغل بالشركة .. دكتور اهناك .. اول سنتين وتالي راح ارجع اسافر واكمل التخصص بره..
ام خالد: سفر بعد!! بس هالمره مو على كيفك ما تروح الا وريلك على ريل مرتك!

ابتسم خالد شوي وقال: الله كريم..

ام خالد: انت بس أشر و انا ازوجك احلى بنت .. ماشاءالله وايد بنات حلوين عندنا بالعايله واخلاقهم عالية و مثقفات .. وان بغيت برا العايله هم مو مشكله بنات الحمايل وايد ..

بوخالد: بسج يامره!! شوي شوي على الصبي.. على اولج كليتيه بلسانج!

ام خالد: شدعوه يا حافظ!

خالد: ههههههه لا عادي يبا خلها الوالده ماقالت شي غلط .. انا صج ناوي اتزوج..

نوره اهني سكتت وهي تبولع بريجها وتترقب اللي بيقوله اخوها..

ام خالد: صج يمه؟! ومنو هذي؟ اعرفها؟؟

خالد: لا يمه ما تعرفينها .. بس اهي خوش بنت و اهلها ناس طيبين ..

ام خالد: زين فكيتني من الحواسة وانا ادور لك على عروس مناسبه ! ياحلو عيال هالوقت مريحنا بهالشغله!

الكل: هههههههه

ام خالد: عاد ما قلتلي منو بنته..؟؟

نوره: يمه!! بسج عاد لا اتحنين عليه اهوا لو بيقول جان قال ..

ام خالد: هاو! وانا شقلت ؟ اهوا تحجه وانا سألته...

قام خالد.. وراح باس راس امه وقالها: بتعرفينها ان شاءالله .. بس خليني بالاول اشتغل و استقر و تالي باقولج روحي خطبيها لي..

بوخالد: الله يكتب مافيه الخير ..

خالد: يالله عن اذنكم باروح ارتاح شوي ..

ام خالد: روح حبيبي واحنا بعد بنقوم انام .. تكسرت ضلوعي من كراسي الطياره..

نوره: وانا؟؟ بتخلوني بروحي؟؟

بوخالد: بعد روحي بيتج شمقعدج اهني؟؟

خالد: هههه الا صج تعالي ما سكنتي بيتج اليديد؟؟

نوره: امممممممم اذا الله سهل ان شاءالله نهاية هالشهر انقل اغراضي .. الحين قاعده أأثثه ..

خالد: زين .. منزل مبارك مقدما!

تبتسم نوره: الله يبارك فيك .. اكيد بس اخلص باعزمك تيي وتشوف ذوق اختك ..

خالد: اكيـــــــــــــــد! ذوق النوري ماعليه كلام! .. يالله تصبحون على خير ..

الكل: وانت من اهله..

***************************************

سكرت ألاء السماعه من خالد واهي تبتسم .. ياربي شكثر اشتقت لصوته و كلامه! طالعت الساعه والا قريبه من 4 الفجر.. "بعد عمري ياخالد .. سهرتك وبروحك ياي من السفر تعبان.. عسى الله لا يخليني منك" .. وقامت راحت تتوضا وتصلي الفير قبل لا تحط راسها وتنام ..




​

 

[rawona]

مرت الشهور بسرعة .. نوره اسكنت بيتها اليديد .. وألاء باجيلها كورس وتتخرج من الجامعه (الصيفي) .. وبدر تخرج من الثانوية بنسبة زينه عكس ماكان متوقع .. وتعين خالد بشركة النفط كدكتور اسنان بمستشفى الشركة و تعين معاه رفيجه فيصل .. حصة وبدرية عطلوا و استعدوا للإجازة الصيفية ..



كانت ألاء زايرة سارة في بيت أهلها ..

ساره: ها ما قلتيلي .. شالاخبار؟؟

ألاء: والله ماشي الحال ..

ساره: وخالد .. شلونه معاج؟؟

ألاء: حبيبي والله .. اتصدقين .. اول ما تعرفت عليه خفت منه .. وخفت لا يطلع مثل باجي هالشباب اللي يضحكون على البنات .. بس طول هالسنتين اللي طافوا اثبتلي انه غير .. وانه زين الرجال! تخيلي ما يطلب يشوفني الا ما ندر!! واذا شافني بمكان عام و من بعيد لي بعيد .. حتى ايدي ما لمسها!! متصوره هالشي؟؟ وايد يحترمني و يعزني .. وما يرضى علي .. واااااااااااااااي صج امووووووووت فيه!!

سكتت ساره شوي واهي تفكر.. وتالي انطقت..

ساره: وانتي شدراج انه ما يقص عليج وبس وده يتسلى و يقضي وقت؟؟

بققت ألاء عيونها واهي اطالع رفيجتها باستغراب ..

ألاء: انتي من صجج تقصدين خالد بهالكلام؟؟

ساره: اي من صجي! اكيد بس يبي يتسلى!

ألاء: يتسلى بالهوى يعني؟؟ اقولج ايدي ما لمسها شاللي يتسلى؟؟

ساره: ما تدرين يمكن محتاج لاحد يفضفض له و يسولف له وانه يسمع كلام حلو بس ..

ألاء: قولي غير هالحجي .. خالد واعرفه زين مستحيل يفكر جذي .. واهو شاريني و يبيني!

ساره: دام انه شاريج ويبيج ليش ما تقدم لج للحين؟؟

انصدمت ألاء من سؤال رفيجتها و انعقد لسانها ما عرفت ترد..

ساره: يالله فهميني .. شناطر؟؟ بالاول قلنا طالب و ظروفه ما تسمح .. والحين توظف بقطاع النفط .. وصارله 3 اشهر من تعين ومعاشه زين .. يعني قادر يفتح بيت ويتزوج .. شناطر ما يتحرك؟؟

سكتت ألاء شوي و اهي تحس ان كلام رفيجتها ضربها بالصميم مثل ما يقولون .. وان الكلام اللي قالته ساره اهي نفسها فكرت فيه ..

ألاء: بس يا ساره انتي عارفة المشكله اللي تواجهنا .. يمكن خايف لا اهله يرفضون..

ساره: ولي متى بيظل خايف يعني؟؟ متى ناوي او مفكر يفاتحهم ان شاءالله؟؟ يا ألاء يا حبيبتي .. لا تزعلين من كلامي .. بس انا ابي مصلحتج .. البنت غير عن الريال .. مو كل يوم تلاقي لها واحد يخطبها او يبيها .. و لا تنسين الوحده منا تكبر ما تصغر .. شوفيني انا .. عرفت فهد وخلال جم شهر بس خليته يطق بابنا ويخطبني.. وما سمحت له يطولها معاي .. فكري بكلامي عدل .. وبتلقين كل اللي قلته لج صح .. واني ابي مصلحتج ..

ساره: لازم تفاتحين خالد بالموضوع .. ولازم يتحرك ويحط حد للوضع اللي انتوا فيه .. واذا يبيج وشاريج .. صدقيني راح يتحدى الكل علشانج!

كانت ألاء تفكر بكلام رفيجتها الى تسلل داخل نفسها لين تمكن منها .. وقعدت تفكر شلون تفاتح خالد بالموضوع؟ وشلون راح توصل له وجهة نظرها!


​

 

[بدوره 22]

واااااااااااااااااااي


بطني عورني الله يستر

القصه صارت مثييييييييييييييييييييييره

 

[rawona]

بيت طلال ونوره ..

ام خالد: ماشاءالله تبارك الرحمن .. منزل مبارك.. والله يسعدكم ويهنيكم فيه ..

نوره: تسلمين لي يالغاليه .. ها شرايج بذوق بنتج؟؟

ام خالد: يهبل .. كلج سنع و منع! ما ينلام طلال فيج ..!

نوره: ههههههه يمه!

ام خالد: اقول نوره ..

نوره: هلا يمه .. آمري ..

ام خالد: ما يامر عليج عدو .. تعرفين من اللي يبيها خالد اخوج؟؟ قالج شي عنها؟

نوره: امممممممم يعني .. قالي و ماقالي .. ليش ؟ انتي تعرفين شي؟؟

ام خالد: والله يمه سمعت من ابدير ذاك اليوم .. ومادري اهو صاج والا يجذب!

نوره: بدر ؟؟ وبدر اشدراه؟؟

ام خالد: يقول انه طايح على خالد جم مره يكلمها بالماسنجر .. بس اتصدقين خلاني احاتي..

نوره: ليش يمه؟؟

ام خالد: شكلها مو اصيله..

نوره بقلبها (جان زين وقفت على انها اصيله والا مو اصيله .. السالفه اكبر من جذي)!!

نوره: يعني؟؟ واذا كانت مو اصيله شاللي يهم بالموضوع؟؟

ام خالد اطالع نوره واهي مستغربه: شلون ما يهم ؟! مو لازم نعرف اصلها و فصلها ومن بنته ومنو اللي بيصورون خوالي احفادي؟؟

نوره: واهوا يتزوج البنت والا اخوانها؟؟

ام خالد: شنو يعني؟؟

نوره: يعني يا يمه يا حبيبتي .. الحين احنا باي عصر؟؟؟ شخباري منو اللي بيسأل اصيله والا لا؟؟ شباب خذوا اجنبيات وعربيات واسيويات محد قالهم شي ومن عمر الدنيا ! وكا عيالهم ما عابهم شي وكويتيين .. يعني يمه الحين اذا تزوج خالد عياله بيتسمون باسمه والا باسم امهم وخوالهم؟؟

ام خالد: اكيد باسمه .. بس تدرين يمه الناس ما تخلي احد ..

تقاطع نوره كلام امها: وشعلينا بكلام الناس؟؟ يا سلاااااام!! يعني اخوي ياخذ وحده "اصيله" على قولتج و يشوف معاها الويل ولا هو اللي مرتاح بحياته ولا هو اللي سعيد ومتهني؟؟ والا ياخذ وحده "ايش ماكانت" بس تسعده وتهنيه واهم شي ان اهلها ناس طيبين و اهو حابها و اهي حابته؟؟

ام خالد: والله يا بنيتي كلامج عدل .. والله يكتب اللي فيه الخير ..

نوره بقلبها " الله يستر ياخالد .. سالفة اصيله ومو اصيله وانحلت!! ياخوفي من اللي ياي"!!


​

 

[rawona]

واااااااااااااااااااي


بطني عورني الله يستر

القصه صارت مثييييييييييييييييييييييره

لوووووووووول بدوره سلامتج .. اشفيه بطنج؟؟ لا تولدين بس بسبة قصتي ههههه

​

 

[rawona]

كان خالد بالعياده لما دق تلفونه ..

خالد: هلا بهالحس والله!

ألاء تبتسم: هلا فيك .. شلونك؟؟

خالد: بخير دام حبيبتي بخير .. ها شلون استعداداتج للفاينل؟؟ ابيج عاد تبيضين الويه!

ألاء: ان شاءالله .. قلت اسمع صوتك واتفائل فيه قبل الامتحان .. عاد اذا قوعت... فبسبتك!!

خالد: أفا!!! الحين انا صرت قبس؟؟ الله يسامحج .. (يسوي روحه زعلان)

ألاء: اتغشمر معاج شفيك حبيبي؟؟

خالد: وانا بعد اتغشمر!

ألاء: اوكي عيل اخليك الحين .. ادعيلي اقدم عدل بالامتحان واتخرج وافتك!

خالد: آميـــــــــــــــــن!! انا ناطر اليوم هذا اكثر منج!

ضحكت ألاء: ماشي يالله عيل باي ..

خالد: شدي حيلج والله يوفقج .. ركزي وانتي تحلين الاسئلة ..
ألاء: ان شاءالله!

خالد: يالله باي!

ألاء: ههه باي!



​

 

[بدوره 22]

لووووووووول رونه

انا جذي اذا تفاعلت قولوني يتفاعل معاي

 

[rawona]

هههههههه بدوره ضحكتيني !!


الله يعينج قولون وحماااااااااااااال :0bee2e8d89:
​

 

[ضي2007]

واااو بدت الأحداااث المثيره ناطرتج .. واخذي راحتج حبيبتي

 

[بدوره 22]

هههههههه بدوره ضحكتيني !!


الله يعينج قولون وحماااااااااااااال :0bee2e8d89:
​

امين يارب الله يعين الجميع

المهم وين تكملة القصه خخخخخخخخخخ

 

[عشيقة ريلها]

قصه روعه
تسلم بنات أفكارج
يا ريت ماتطولين علينا
معااااج الى النهايه
••••••> ثاني رد

 

[rawona]

بيت بوخالد ..

خالد وامه وخواته نوره وحصه قاعدين بالصاله .. وعيال نوره يلعبون بالحديقة ..

خالد: يمه ..

ام خالد: هلا حبيبي ..

خالد: يمه .. أنا .. بتزوج!

ام خالد: هذي الساعة المباركة حبيبي .. قلت لك من قبل انت أشر بس و بتلقى اللي يسرك و يرضيك ..

نوره اطالع خالد و هي متوتره وهو فهم نظرتها .. بس وخر عيونه وكمل كلامه ..

خالد: يمه البنت موجوده .. وهي خوش بنيه .. ادب واخلاق وجمال .. توها متخرجه من الهندسة ..

ام خالد: ماشاءالله .. من بنته؟

مرت لحظة سكوت بالغرفة .. اللي لو الواحد يقط فيها ابره على الارض جان سمع حسها!

خالد: اسمها ألاء محمد ال..

صرخت ام خالد: شنوووووووووووووووووووو؟؟؟ بتاخذلي بنت ال.... انت ينيت!!!

خالد: يمه شفيج الله يهداج!! ليش ينيت؟؟ اشفيها يعني لو اتزوجها؟؟

ام خالد: تسألني شفيها؟؟ اسأل نفسك!! انت الظاهر بتضحك علينا الناس تالي عمرنا!!

عصب خالد ورفع صوته شوي: وشعلينا احنا من الناس!!! كل ما قلنا شي قلتوا الناس والناس!! بالعنه تلعنهم!! انا مالي شغل باحد.. انا علي من نفسي وبس!!

ام خالد: اي عليك من نفسك وبس.. وامك وابوك بالطقااااااااااق!! انت فكرت باهلها؟؟ بجماعتها؟؟ اطباعهم غير عن اطباعنا!! وعاداتهم غير عنا .. شلون بتقنعني انك بتندمج معاهم؟؟ ها؟؟ يالله قولي .. فهمني!!

خالد: وانا شعلي من اهلها !! انا راح اتزوجها اهي مو اهلها!

ام خالد: لا حبيبي غلطااااااااااااااان..!! السالفه مو سالفة ريال ومرته وبس! السالفه فيها نسب و عوايل ..امها بتصير عمتك و ابوها عمك .. واخوانها نسايبك!! يعني اهل عيالك .. اجدادهم وخوالهم .. شلون بتعيش عيالك بجو متناقض؟؟ الام غير .. والابو غير .. والخوال غير.. هااااااا قولي شلون؟؟

نوره وحصه ساكتين وما قالوا شي بس قاعدين يسمعون..

خالد بعصبيه: والله عاد انا مالي شغل .. بأخذ ألاء يعني باخذها وماراح ارضى بغيرها زوجه .. واذا ما تزوجتها ماراح اتزوج غيرها!! وانا قلت لكم عاد وانتوا بكيفكم!!

وطلع معصب صعد داره..

التفتت ام خالد صوب نوره واهي تقول: شفتي بالله عليج اخوج؟؟ شفتي سوالفه؟؟ هالشي اللي ابد ماكان لا على البال و لا عل الخاطر!! الحين شأسوي معاه؟؟

سكتت نوره شوي تبي امها تهدى ..

نوره: زوجيه اياها!!

بققت ام خالد عيونها: نعممممممم؟؟؟ شقلتي؟؟ ازوج ولدي لوحده مثل هذي؟؟

نوره: يمه انتي شفتيها والا عرفتيها؟؟

ام خالد: بعد اشوفها؟؟ لا ابيها ولا ابي شوفتها .. واخوج هذا انا اعلمه ان ما خليته يعقل .. خل يرد ابوج وانا اوريه!

****************************

دخلت نوره غرفة خالد بعد ما فتح لها الباب .. وقعدت ساكته على سريره .. وكان اهو حاط حرته بالكومبيوتر وقاعد يشتغل عليه و يبرمجه..

نوره: هديت الحين؟

خالد:لا! ولا راح اهدا لين يسوون اللي ابيه!

نوره: طول بالك حبيبي انت الحين معصب بعدين لا تلومهم.. انت كلش ما مهدت لهم و انصدموا مساكين..

سكت خالد شوي حس ان اخته معاها حق .. كان تلفونه يرن ألاء تتصل فيه من ساعه ومو قاعد يرد عليها .. خذا الجهاز وحطه صامت ..

نوره: الحين شبتسوي؟؟

خالد: راح اصر على موقفي ..

سكتت نوره وتالي قالت: وانا راح احاول اقنع اهلي بزواجك .. صج اني مو مقتنعه بس هذي حياتك ياخوي ومن حقك تعيشها مثل ما تبي وتسوي اللي يريحك..

ابتسم لها خالد وتالي قام وحضنها: الله لا يخليني منج يا احلى اخت بالدنيا ..

نوره: ولا منك يا احلى اخو بالعالم!!

خالد: هههههههه لا يسمعنا خالد ريلج ..بيطيح فيني تطنز لي باجر..

نوره: ويييييي حاصله اخو نفس اخوي حبيبي! الا صج على طاري طلال .. شرايك تزورنا باجر.. منها نقعد مع بعض ومنها تشوف بيت اختك اليديد؟؟

خالد: صاااااااار !



​

 

[rawona]

واااو بدت الأحداااث المثيره ناطرتج .. واخذي راحتج حبيبتي

مشكوره حبيبتي .. وكاني قاعده انزل اللي اقدر عليه واللي يطلع من مخي انزله لكم اول باول لوووووووول

​

امين يارب الله يعين الجميع

المهم وين تكملة القصه خخخخخخخخخخ

تبون بعد والا كافي جذي لليوم؟؟ ​

قصه روعه
تسلم بنات أفكارج
يا ريت ماتطولين علينا
معااااج الى النهايه
••••••> ثاني رد

تسلمين حبيبتي .. وان شاءالله دوم اشوف ردودج منوره موضوعي ​

 

[بدوره 22]

طبعا نبي بعد

 

[TuTTi^FruTTi]

امبيه ماشالله حدها عجيبه قريت كل البارتات توني

ومن اول شي من الاسماء اكتشفت الغمنده لوول ان اختلاف بالمذاهب

صج مشكله مادري لي متى جذي الله يعين اللي بهالحاله صج ..

يعطيج العافيه حبيبتي وسجليني متابعه معاج من اليوم وبتابعج اول باول

وصج عندي سؤال وين قصة طلال وشيخه ؟؟

اشوف يتكلمون عنها بس ماقريتها !!

وودي اقراها شوقووني البنات عليها ..

ومشكووره حبيبتي

 

[rawona]

بعد يومين في بيت طلال ونوره

طلال: حياك بووليدان .. ادخل البيت بيتك ..

دخل خالد ورا طلال

خالد: ماشاءالله .. منزل مبارك.. تتهنون فيه يارب ..

طلال : الله يسلمك .. حياك .. مانت غريب ...

راحوا الصاله و اقعدوا .. شوي والا ايي عزوز يركض وتلحقه زيونه..

خالد: أهلا بالبطل .. وباس عزوز شلونك؟

عزيز: زين .. حالي حالد ..

ضحك خالد: هلا خالي ..

عزيز: شفت زيونه؟؟ حذت علمي!

خالد واهو يشيل الزين ..: زيونه ليش خذيتي علم عزيزان؟ ها؟! باااااد..

طلال : ههههههههه مو علمه .. تدري مشكلة ولدي مع النقط فوق الحروف! "علمه" يعني قلمه ..

خالد: لووووووووووووووووووول وانا اشدراني عن عيالكم .. ههههه

تدخل نوره: السلام عليكم ..

الكل: وعليكم السلاااااااام ..

خالد: هلا بام عزوز .. شلونج؟؟

نوره: بخير الله يسلمك .. حيالله من يانا ..

خالد: الله يحييج .. شهالزين ماشاءالله ..

نوره: عجبتك الديكورات والالوان؟؟

خالد: عجيبه ماشاءالله ..

نوره: تعال اوريك باجي البيت..

طلال: ضيفيه اول وتالي فرفري فيه!

نوره: محتر.. لانه كل شي من اختياري وعلى ذوقي!

طلال: افا!! صارت السالفه اختيار .. وذوقي؟؟!! روحي بس روحي!

نوره: ههههههه عن اذمك شوي باخذ اخوي اوريه البيت .. ديربالك على اليهال بليز ..

طلال: اجا ماما !

خالد: ههههههه اسمحلي يالنسيب .. بعد النوري وما نقدر نزعلها!!

طلال: معذور ياخوي .. الله يعينك على قرقتها..

نوره: طلااااااااااال!!

طلال: هههههههههه

وراحت نوره توري اخوها البيت .. الغرف .. المطبخ ... الحمامات.. غرف الضيوف .. والصالات .. والمعيشه.. وحمام السباحة ..الخ

نوره: ها شرايك؟؟

خالد: نوروووووووووووووه .. كل هذا يطلع منج؟؟

نوره: امممممممممممممم 80% مني والباجي من طلال لا بعد مشترك !!

خالد: ههههههههه مسكين..

خالد: لا خلاص مالي شغل فيج .. ان شاءالله لي تزوجت باخليج تأثثين شقتي؟؟

نوره: ان شاءالله .. شصار على موضوعك صج؟؟

خالد: ولا شي .. الوالد عصب و قلب الدنيا فوق تحت مثل ما تدرين .. رجعت كلمت امي نفس الشي .. وما يندرى والله .. حدي متضايق..

نوره: يالله ماعليه .. تصبر .. ان شاءالله ربك يفرجها ..

خالد: اللهم آمين .. حرام ألاء كاسره خاطري .. ماودي اعلقها واوقف بنصيبها .. قلت لها تصبر علشاني..

نوره: ليش واهي ماكانت ناويه تصبر؟؟

خالد: امبلا .. بس ليش انه تقدمولها خطاب بهالفتره وردتهم أخاف السالفه اطول مع امج وابوج وتطير البنت من ايدي..

نوره: والله اذا تحبك صج تصبر شوي علشانك!

خالد: ما تنلام البنت بعد يانوره.. شوفي الوضع من صوبها .. صارلها سنتين متعلقة .. تحب شاب مواعدها بالزواج .. اول شي تعذر علشان دراسته .. والحين تخرج وتوظف.. وتعذر لها لين خلصت اهي دراستها وقدمت على الوظيفه .. وصارلي جم شهر متوظف .. يعني ليش النطره بعد؟؟ اكيد بتخاف لا اكون اقص عليها وقاعد اتسلى!

نوره: يعني سالفة الخطاطيب تأليف؟؟

خالد: مااقدر اقول جذي يمكن صج تقدمولها ويمكن لا بس مو هذا المهم .. المهم ان اهلج يحنون علي شوي ويرضون اخطبها!

نوره: الله كريم.. انا راح اكلم امي وابوي وبعد وباحاول اقنعهم .. وان شاءالله ما يصير الا كل خير ..

خالد: ان شاءالله ..

ياهم صوت طلال ينادي من تحت ..

طلال: مطولين بالوقفه على الدرج وايد؟؟ تعالي شوفي عيالج لا اقطهم بالمسبح الحين!!

نوره: ويي ياحسرتي !! كاني نازله!!

ونزلت اهي وخالد .. وقعدوا يسولفون مع بعض وتعشى خالد عند اخته و تشكر منها ومن طلال ورد البيت على طول .. قط راسه ونام .. من التعب حتى ماقدر يرد على مسجات ألاء..


​

 

[rawona]

بدوره نزلت بارت علشانج بعد شتبين

​

امبيه ماشالله حدها عجيبه قريت كل البارتات توني

ومن اول شي من الاسماء اكتشفت الغمنده لوول ان اختلاف بالمذاهب

صج مشكله مادري لي متى جذي الله يعين اللي بهالحاله صج ..

يعطيج العافيه حبيبتي وسجليني متابعه معاج من اليوم وبتابعج اول باول

وصج عندي سؤال وين قصة طلال وشيخه ؟؟

اشوف يتكلمون عنها بس ماقريتها !!

وودي اقراها شوقووني البنات عليها ..

ومشكووره حبيبتي

هلا حبيبتي نورتي الموضوع و القصة .. ومشكوره على المتابعة ..


هذا رابط قصة طلال وشيخه وان شاءالله تعجبج



http://www.q8yat.net/showthread.php?t=342447

​

 

[TuTTi^FruTTi]

خووش بارت حبيبتي يعطيج العافيه << متابعه اول باول لول تسلم ايدج

 

[TuTTi^FruTTi]

يعطيج العافيه حبيبتي عالرااابط برووح اقراها الحين اشوه كامله عشان ما اتعلق يسلمووو حبيبتي بقراها وبعطيج رايي حدج مبدعه مبين