روايتي الجديدة مثل ما وعدتكم " حبيب الأمس" ..حياكم

[rawona]

ام _خلودي, rawona

طحت عليج قاعده تكتبين مووو

نااطره ابداعاتج

ههههههه


اي الحين اكتب وانزل البارت ان شاءالله ..

تعالي انتي فاصله خطج؟؟ :tomato2:

​

 

[rawona]

مرت على العطله على خالد وألاء بسرعه .. صج الأيام الحلوه بسرعه تخلص .. وقربت ردت خالد لبريطانيا .. قبل السفر بليلة ..

خالد: ألاء ..

ألاء: هلا ..

خالد: أحبج ..

ألاء ابتسمت واسكتت ..

خالد: تدرين ألوئتي .. ودي أغمض عيني وأفتحها وألاقي نفسي خالص من دراستي .. ومتوظف .. وشايل نفسي ..

ألاء: ان شاءالله حبيبي .. انت بس شد حيلك و خلص و ارجعلي ..

خالد: ان شاءالله .. شكلي ماراح يكون فيني صبر من المطار لي بيت أهلج
ألاء: هههه الله كريم ..

خالد: إلا صج ألاء .. تتزوجيني؟؟

ارتبكت ألاء شوي ... سكتت ما عرفت شتقول..

خالد : شاللي أفهمه من هالسكوت؟؟

ألاء: مو يقولون السكوت علامة الرضا؟

خالد: ههههههه مدام جذي عيل خلج ساكته على طول ..

ألاء: لا والله؟

خالد: راح أشتاق لج يالخايسه ..

ألاء: وانا بعد .. الله يردج بالسلامه لي يارب ..

خالد: عاد ما أوصيج .. ديري بالج على نفسج علشاني .. وشدي حيلج بدراستج .. لا تخليني أنطر وايد ترى أنا أبي وحده مخلصة دراستها وجاهزه .. ههههه

ألاء: صجججججج؟؟؟ وشنو بعد؟

خالد: امممممممم و ياحبذا لو يحججونج أهلج بعد يكون أحسن ! هههههههه

ألاء: هههههههه وبعد؟

خالد: وبس ..

وظلوا يسولفون لي الصبح لين طلعت الشمس .. وراح خالد ينام ويريح شوي قبل موعد طيارته العصر ..





​

 

[rawona]

ما قدرت ألاء تروح للمطار وتودع خالد من بعيد لأنها ما تقدر تروح بروحها خصوصاً بعد زواج ساره وسفرها لشهر العسل .. ومحد من رفيجاتها يعرف عن خالد إلا ساره .. كلمته بالتليفون قبل لا يطلع من البيت وظلت تدزله مسجات و يدزلها لين طارت الطياره..

بوخالد وام خالد و حصه وبدر .. راحوا كلهم مع خالد المطار يوصلونه ويسلمون عليه .. ونوره وطلال قالوا انهم بيلحقونهم ويشوفونهم اهناك ..

ستاربكس –المطار ..

ام خالد: خالد يمه ما أوصيك دير بالك على نفسك .. والبس عدل عن البرد الحين شهر 8 الجو يبتدي يبرد اشوي عندكم ..

خالد: ان شاءالله يمه .. لا تحاتين

بوخالد: راح ترجع شهر 12 ان شاءالله ؟

خالد: ما اعتقد يبه .. معطينا اجازة قصيره وتالي بنشتغل بالعيادات نتمرن .. ان شاءالله اذا الله سهل على الصيف الياي

بوخالد: باذن الله .. يمكن اذا حصلنا نمر عليك مرينا ..

ام خالد: انا يمكن ايي مع خالتك عايشه شهر 12

بهاللحظه وصلت حصه و معاها بدر اللي كانوا يتمشون بديبنهامز المطار ..

بدر: يبه طلال ريل نوره اتصل .. ماراح يقدرون يمرون ..

ام خالد: هاو ليش؟؟ شفيهم ؟؟

حصه: مافيهم شي يمه .. امشي نسلم على خالد ونروح مع بدر يودينا المستشفى .. نوره ودوها للولاده ..

ام خالد واهي شوي وتبجي: صج والله؟؟ يالا امشوا نروح ..

بوخالد: علامج يامره .. نطري شوي! ماتبين تسلمين على خالد؟

خالد: هههههههه لا عادي يبه خلها ما تنلام.. وهالخايسه ما اطلعت الا باليوم اللي سافرت فيه؟؟

بدر: ههه حظك بعد شتسوي ..

خالد: ههههه خلاص يمه قومي روحيلها وسلمو عليها وايد .. احصيص دزيلي صورها مو تنسين ..

حصه: ان شاءالله ..

وسلمو عليه ووصلوه للبوابه وراحوا كلهم لمستشفى المواساة يشوفون نوره والصغيره..



​

 

[baronkyh]

روووعه كملي كملي فديتججججججججج

طلال وشيخه حدي تأثرت فيهم
وشكل هالقصه بالطريح اهي اهي

 

[ام _خلودي]

بدعتى الباارت عجيب

ناطرينج وبما انه اليوم اجاازه

ننطر منج باارت ثانى

 

[rawona]

مرت سنه ونص .. ألاء وساره صاروا بسنتهم الاخيره .. بس ساره راح تتأخر كورس عن ألاء بسبب ولادتها لولدها مبارك .. زيونه بنت نوره كبرت و عزوز دش الروضه .. بدر باخر سنه بالثانوية .. وحصه وبدريه بثالثه ثانوي ..

خالد زار الكويت مرتين بهالفتره .. و اشترا قطو من سنه وسماه "مخاوي الليل" << يتحرش بفهد .. وكان دايماً يسولف حق ألاء عنه ويدزلها صوره .. وألاء كانت تدزله بعد صور بنت أخوها جاسم ياسمين وتقوله عن سوالفها ..

ألاء: واااااااااي متى الكورس يخلص أبي أفتك واتخرج ..

خالد: هانت حبيبتي .. عيل أنا شأقول اللي ناطر هاليوم على أحر من جمر ..

ألاء: يالا ماعليه صبرنا وايد .. ومابقى الا القليل مثل ما يقولون ..

خالد: الله كريم .. أنا كلمت نوره عن موضوع زواجنا ..

سكتت ألاء شوي .. وقالت: ودرت عن كل شي ..

خالد: ايي .. فهمتها الوضع بالكامل ..

ألاء: وشقالت؟
خالد: ماقالت ..

ألاء: لا والله صج .. شقالت؟ شكلها عصبت..

خالد: لا والله .. قالت "يصير خير" ..

سكتت ألاء شوي وهي تفكر بالموضوع وتالي غيرت الموضوع وقعدت تسولف مع خالد شوي لين استأذنت و طلعت من الماسنجر ..

قعد خالد يفكر شوي بروحه و تذكر كلامه أخر مره مع نوره ..

نوره: خالد انت شقاعد تقول؟؟ تدري انه اهلي مستحيل بيوافقون على هالزواج!!

خالد: بس يانوره ...

نوره: انت تدري شاللي قاعد تتكلم عنه؟؟ جان زين السالفه فيها بدو وحضر .. والا انها تطلع غريبه او مثلاً عايلتها مو معروفه جان هانت اشوي .. بس اختلاف بالمذهب؟؟ هذي مصيبه!!

خالد: يااااااااه .. وليش عاد مصيبه؟؟ اهي مو مسلمه حالها من حالنا؟؟ مو تعرف الله و تعبده؟؟ مو تصلي وتصوم؟ ليش مصيبه؟؟

نوره: يا خالد يا حبيبي افهمني .. المشكله مو الحين .. اهي عادي ممكن تغير مذهبها وتصير عليك .. المشكله باجر .. بالعيااااااااااااال .. لي شافوا خوالهم وانت عارف انه مذهبهم يختلف عنا بأشياء وايده .. مافكرت حزتها شراح يقولون؟؟ ماراح يسألون امهم ليش خالنا سوى جذي والا جذي؟؟ ولنفرض انها ظلت على مذهبها .. باجر بيسألونك باب ليش انت غير وماما غير؟؟ مافكرت بهالشي؟؟

خالد: الله واكبر..!!! الحين عادي ترضون الواحد ياخذله غريبه والا مسيحيه والا يهوديه مافيها مشكله .. بس ياخذ بنت ديرته وعلى دينه و مسلمسه تصير مصيبه!! قولي غير هالحجي!

نوره: شوف ياخالد .. انا مو معترضه على البنت .. ومبين ان اخلاقها عاليه واهلها ناس طيبين .. بس المشكله ..

خالد: ايي شالمشكله؟؟؟

نوره: اختلاف المذاهب مو هين .. والله صعب ياخالد صعب .. والمشكله ان اهلي ماراح يوافقون !

سكت خالد شوي ..

خالد: خلي اهلي علي .. انا ابي اعرف رايج انتي ..

عفست نوره ويهها شوي .. وفكرت .. وتالي تنهدت وقالت: خلودي حبيبي انت تدري اني ابيلك السعاده .. وصدقني لو علي انا فاتمنى لك كل خير .. واكيد ابيلك السعاده وين ماكانت..

خالد: خلاص وهذا اللي ابي اسمعه .. ابي بس وقفتج معاي اذا كلمت اهلي

نوره: يصير خير


​

 

[rawona]

روووعه كملي كملي فديتججججججججج

طلال وشيخه حدي تأثرت فيهم
وشكل هالقصه بالطريح اهي اهي

مشكووووووووووره حبيبتي .. وان شاءالله تعجبج هذي بعد ..
​

 

[rawona]

بدعتى الباارت عجيب

ناطرينج وبما انه اليوم اجاازه

ننطر منج باارت ثانى

كاني نزلت بارت ..


صايره بطيئة بالتفكير لووووول

ان شاءالله باكتب بعد بارتات .. عاد اللي أقدر عليه

​

 

[ma3boocha]

وييييييييييييييييييييييييييي.....

حلاته اخر القصه ما يتزوجون.....

اذبحج رووووونه


اتغشمر




يالله ناطره البارتات اللي وراه

 

[MeeMeeYoo_2]

وااااي اختلاف المذااهب قامت تصير صج مشكله

يعطيج العافيه حبيبتي

 

[كيكه ترفه]

وااااااااااي ليششششش عااااااااااد شفيها نوررررره ليش جذي
اهما يحبون بعض شكو المذاهب وصج كلام خالد مسلمه وتصوم وتصلي شالمشكله يعني
كسرت خاطري الاء مسكينا ماتدري شبيصير
الله يستر من البارت الياي
< حدهااااااا تأثرت
كملي ياحياتي

 

[rawona]

وااااي اختلاف المذااهب قامت تصير صج مشكله

يعطيج العافيه حبيبتي

اي والله اختلاف المذاهب مشكله .. ويصير .. في ناس تحدوها وتزوجوا وعن كبر اكتشفوا انهم غلط وان الحب مو كل شي .. وفي ناس عاشوا متهنين ولا عليهم من احد والحمدلله الله وفقهم وهناهم .. وفي ناس اصلا رفض اهلهم منعهم من انهم يكونون مع بعض ..

فكل واحد وظروفه .. وتظل لي اليوم مشكله ازليه! :0bee2e8d89:


​

 

[rawona]

معبوجه


كيكه ترفه







ان شاءالله النهاية بتكون حلوه ومرضيه .. لا تحاتووووووووون

​

 

[عالمي المجنون]

مع ان كلام نورة عدل ومنطقي

بس يضرب الحب شو بزل

تسلم ايدج ع البارت

^_^

 

[rawona]

مع ان كلام نورة عدل ومنطقي

بس يضرب الحب شو بزل

تسلم ايدج ع البارت

^_^

الله يسلمج حبيبتي .. ان شاءالله يعجبج الياي

​

 

[rawona]

وصلوا أهل خالد لندن قبل حفلة تخرجه بعشر أيام، ماعدا نوره وريلها وعيالها لأنهم كانوا شارين أرض من سنتين ولاهين في البنيان.. .. خالد خلص امتحاناته من يومين .. بس بهالفتره حاول يصفي كل شي .. فضى الشقه .. وباع أثاثه .. وكان متردد ياخذ " مخاوي" القطو ماله معاه والا يخليه .. واخر شي حز بخاطره بس قرر انه يعطيه لواحد من ربعه أحسن .. خصوصا انه بيقعد بلندن بفندق مع اهله لين حفلة تخرجه وما يبي يتوهق فيه .. شحن أغلب أغراضه بس خلى معاه جنطه وحده للرجعه ..

كانوا ساكنين في ماريوت لندن ميديا فالي .. يم الريجنت بارك ..

حصه: وناسه الجو عجيب .. اشوه اني قدرت الحق وامتحاناتي خلصتها قبل السفره..

بدر: والحمدلله انهم سواو حفل تخرجنا قبل الامتحانات والا جان ماقدرت ايي وياكم انا بعد ..

بوخالد: الله يكثر أفراحنا يارب .. هالسنه فرحتنا انت وخالد وان شاءالله نفرح بتخرجك من الجامعه يارب..

بدر: لاااااااااااا .. انا مالكم شغل فيني .. عندكم دكتور خالد .. وعندكم صيدلانيه نوره.. وان شاءالله حصه ناوية تدخل هندسه .. انا ماعليكم مني ..

ام خالد: شنو ماعلينا منك .. مو ولدنا؟؟

بدر: امبلااااااااااا

بو خالد: شناوي تصير عيل؟؟

حصه: هايت !

بدر: انطمي انتي بس!

بوخالد: احصيص!!

حصه: اسفه يبا..

بدر: لا يبا لا اتخاف مو لي هالدرجه ما احب الدراسه .. انا ابي ادخل المعهد التجاري و اشتغل في بنك ..

بوخالد: هم زين..

ام خالد: الله يهديك ويوفقك يارب .. كاهو خالد اسم الله عليه وصل ..

خالد: السلام عليكم ..

الكل: وعليكم السلام ..

بوخالد: ها يبا شسويت؟؟

خالد: بس خلاص ضبطت الحجوزات و سفرتنا ان شاءالله بعد 13 يوم من اليوم!

حصه: عادهم بعد!

ام خالد: يالله مدام كل شي اوكي امشوا نروح نتمشى .. بدال قعدتنا باللوبي جذي ..

خالد: ياله مشينا .. وين ودكم تروحون؟

بدر: انا ابي البيكاديلي
حصه: وانا ابي متحف الشمع ..

ام خالد تضحك: وانا ابي السوق أكيد ..

بوخالد: وانا ابي انحاااااااااش

الكل: ههههههههههههههه

بهالعشر ايام سوا خالد لأهله برنامج حلو وكل يوم يوديهم مكان .. وكان على طول مسجات مع ألاء .. وايد اشتاقلها ..



​

 

[n00ni]

يعني دايم تطلع بكل قصه حب مشكله
في أهل يتفهمون الموضوع

يعطيج الف عافيه

 

[rawona]

بنات انا اكتفي بهالبارتات الحين ..تدرون بعد ويك اند مو كل البنات قروا اللي نزلته .. فرصه انتظر ردودهم وأرائهم اهم بعد ..
والتقي معاكم على خير باذن الله ..


ناطرة رايكم بسير احداث القصه للحين


​

 

[rawona]

يعني دايم تطلع بكل قصه حب مشكله
في أهل يتفهمون الموضوع

يعطيج الف عافيه

الله يعافيج حبيبتي ..

وهذي الدنيا .. مو دايما كل شي يمشي على هوانا ولا على كيفنا ولابد من المصاعب اللي تعترض الانسان بكل شي سواء بعمله او دراسته او زواجه او عياله او اهله يعني هذي الحياة ..

بس قصة طلال وشيخه "غير" مافيها مشاكل لوووووول

​

 

[كيكه ترفه]

لاااااااااااااااااااااا
امبييييييه حدي اندمجت
انا ناطرتج انا حاطه الموضوع بالفيفوريت كل شوي ادشه
انا ناطرتج لما تنزلين البارتات اليدد
<شكلها بتقرا القصصه من اول لوووول وناسا ماتنمل