روآيتي الأولى : [ و يبقى خـــآلد ] بقلمي sweet memy

[المتألقة]

للحين ماكو باااااارت

 

[KUWAITIYA72]

يعطيج العافية قصة روعة بس بليززززززززززززززززززززززززززززززززز بليزززززززززززززززززززززززززز بليززززززززززززز
مانبي نهاية حزينة وعفية لاتسويين شي مو زين في خالد ولا تموتينه طلبتج ترى والله ببجي وايد الله يخليج ما صدقنا ان رجع حق اسراء

 

[قلب نواف]

بـليــيـييـز نبـي باررت

 

[sweet_memy]

قوة بنـآت ..


سوري والله ماقدرت أنزل لكم بـآرتآت ..
كـآن عندي ظروف و الحين الحمدلله ..

و ان شاء الله بعوضكمـ و بنزل اليوم 3 بارتآت ..

 

[sweet_memy]

البارت الخامس و العشرون :


بيت بو عبدالعزيز :


دخلت عليهم اسراء و باين عليها الضيق
وبصوت واطي : السلام عليكم
ام عبدالعزيز : وعليكم السلام ، هلا والله بـ بنيتي ،
قربت اسراء من امها وباستها على راسها : شلونج يمه ؟
ام عبدالعزيز : انا بخير دامج جدامي ، انتي شلونج ؟ و شلون هالشيطان ( وتشوف وليد )
وليد : اوداا
ام عبدالعزيز : يحليييله
اسراء تنهدت : الحمدلله
ام عبدالعزيز : ها ؟ شلونج الحين ؟ ليلحينج تعبانه ؟
اسراء : اي يا يمه ليلحين ، مادري شفيني كله مالي خلق شي ومالي نفس آكل ولا لي نفس اداوم
ام عبدالعزيز : اي يمه يمكن عشان ريلج مسافر ، لاتخافين مافيج شي .. و المفروض تتعودين يعني ، خالد صارله الحين اسبوع بلندن
تتنهد : الله يصبرني ..
ام عبدالعزيز : كلها جم اسبوع و بيي ، شغلي وقتج بـ وليد لعبيه ونسيه و بمر الوقت
اسراء : وليد ماخذ حياتي كلها
وليد : ماماا وينا نووون
اسراء : نور مو موجودة حبيبي
ام عبدالعزيز : الحين بتيي نور ،
سندت اسراء راسها ع القنفه و غمضت عيونها و خذت شهيق و طردت زفير قوي
اسراء : يمه انا بروح فوق ارتاح ، احس تعبانه حييل ، ديري بالج على وليد
ام عبدالعزيز : روحي ارتاحي ولا تحاتين ولدج ..

ظل وليد يلعب بروحه و يحوس و يشوف تلفزيون و ما فقد امه ، و بعدين حس ..
وليد : دوداا وينا ماما ؟
ام عبدالعزيز : ماما نامت لولوو
وليد : لولو ؟
ام عبدالعزيز : اي
وليد : ويناا نوون ؟
ام عبدالعزيز : حبيبي الحين بتيي نور
وعقب ربع ساعه دخلت اسماء و نور
وليد بصوت عالي : نوووون
نور : وليييد
و لموا بعض حييل و قعدوا يلعبون و يسولفون ..
اسماء : يحليييله ولييد ، شوفييه شلون مستانس مع نور
ام عبدالعزيز : اي حبيبي من مساع ينطرها
اسماء : عيل وين اسورة ؟
ام عبدالعزيز : تعبانه و راحت فوق تنام
اسماء : شفيها ؟
ام عبدالعزيز : تدرين بعد ، خالد مسافر و اهيا مالها خلق احد و ماتشتهي تاكل و لا شي
اسماء : واي الله يعينها ، خل اروح اقعدها ..
ام عبدالعزيز : خليها نايمه ليش تقعدينها
اسماء : ولهانه عليها بروح اقعدها ..

وراحت لها فوق ..

كانت نايمه و مبين عليها التعب و ويهها اصفر ، قربت منها اسماء و قعدت يمها
اسماء بصوت واطي : اسورة حبيبتي ؟
تحركت شوي من مكانها و تنهدت
اسراء بصوت نعسان و عيونها نص مفتوحه : هلا اسماء
اسماء : شفيج ؟ تعبانه ؟
تسند راسها ع السرير : اي
اسماء : قومي معاي الطبيب
اسراء : اسوم مالي خلق ، خليني مافيني شي
اسماء : مو معقوله صارلج اسبوع على هالحال و تقولين مافيج شي ، يلا قومي معاي عشان نطمن على صحتج بس
تنهدت اسراء : انزين ، نطريني على ما اخلص واييج
اسماء ابتسمت لها : يلا ناطرتج
نزلت اسراء و راحت مع اسماء الطبيب ،


الدكتور : خير يا اختي؟
اسراء : احس بدوخة و تعب و مالي شهيه آكل ومالي خلق اسوي شي ،
الدكتور : اممم ، يمكن ضغطج نازل ؟
و قاس الدكتور ضغطها ،
الدكتور : مثل ما قلتلج ، ضغطج نازل .. احتاج اسويلج تحليل
انقبض قلبها يوم سمعت كلمة تحليل
اسراء بصوت واطي : اسوم مابي اسوي تحليل ، خايفه
اسماء : اسوور ليلحينج على سوالف اليهال ؟ كله تحليل ترا
اسراء : متعودة على خالد يكون يمي و يمسكني
اسماء : لاتخافين انا معاج ،
وسوت التحليل و حست بعده بـ الدوخه ..
الدكتور : ان شاء الله عقب باجر تطلع نتيجة التحليل ، الف سلامة


و يوم رجعت ،

ام عبدالعزيز : ها شقالج الدكتور ؟
اسراء : ضغطي نازل
ام عبدالعزيز : اسم الله عليج ! تعالي اسويلج عصير برتقال و خيار و ملح
اسراء : يمه ما اشتهي شي لاتسوين
ام عبدالعزيز : مو زيين لازم تاكلين ، يلا خـ اروح اسويلج
اسماء : شفيج لازم تاكلين ، شلون بترجعين البيت و انتي بهالحالة ؟ ماتقدرين تسوقين
اسراء :--
اسماء : انا اقول نامي عند امي اليوم ، ليش ترجعين البيت ؟ دام ريلج مسافر نامي هني
اسراء : لا بروح بيتنا ، وراي دوام ، و ماعندي ملابس هني
اسماء : اممم ، كيفج
نور : خالتي اسلاء عادي وليد ينام عندي ؟
اسراء : لا حبيبتي وليد صغير وكله يبجي يبيني
نور : عيل كل يوم ييبيه العب معاه
اسراء : ان شاء الله
اسماء : يحليله وايد مندمج معاها باللعب
اسراء : ايي ملاحظة
ام عبدالعزيز : يلا يمه تعالي شربي العصير و اكلي

كلت اسراء و ارتاحت شوي ،

اسراء : يلا وليد ماما بنروح البيت
وليد : مااا ( مابي )
اسراء : قوم يلاا بروح
وليد : مااا (مابي )
اسراء : يالله حبيبي قوم دخت بروح انام وراي دوام
وليد : نووون
اسراء : باجر نيي عشان تلعب مع نور ، يالله ماما قوم
و شالته جان يبجي : نووون
اسراء : بس حبيبي حتى نور بتروح ، يالله امش نروح البيت عشان تلعب مع ناصر
وليد : نانن ( ناصر )
اسراء : اي حبيبي ، يلا


و بالسيارة ،

كان تسوق و بالها مشغول ، تفكر بـ خالد ، خصوصا ان اليوم ما دق عليها ، ولهت عليه وايد .. و وليد كان ساكت يتعبث بـ جنطتها و اغراضها ،
ورن فونها من غير ماتسمعه ، خذاه وليد ورد
وليد : الو
خالد : وليدان ؟ شلووونك
وليد : باباااا
سمعت كلمة ( باباا) وفزز قلبها ، وخذت الفون من وليد
اسراء : هلا حبيبي
خالد : هلا بـ قلبي انتي
اسراء بلهفه: شلونك خالد ؟ شخبارك ؟
خالد : انا بخير دام سمعت صوتج
اسراء : ولهت عليك وايد ، ليش تسوي فيني جذي ، ليش ما دقيت اليوم مبجر ؟
خالد : شسوي حبيبتي كنت مشغول وماحصلت وقت ، انتي شلونج ؟ ياني مشتاقلج حييل
تنهدت : انا الحمدلله
خالد : جنه صوتج متغير ؟ فيج شي ؟
اسراء : لا خالد مافيني شي
خالد : تخشين علي ؟ مبين ان فيج شي ، قوليلي شفيج ؟
اسراء : توني راده من الطبيب ، الدكتور يقول ان ضغطي نازل
خالد( تنرفز ) :وليش تخشين علي ؟! مو انا ريلج و المفروض تقوليلي كل شي ؟
اسراء : آسفه حبيبي ما اقصد
خالد : مو اول مرة تسوينها ، اذا فيج قوليلي علميني مو تخليني اخر من يعلم !
اسراء : خالد شفيك عصبت علي ، ماقلت شي انا
خالد : انزين انزين ، يلا انا بروح تبين شي ؟
اسراء و الدمعه على عينها : وين حبيبي تو الناس
خالد : مشغول ، اكملج وقت ثاني ، مع السلامه ! ( و سكر الخط )
اسراء: شفيييه عصب علي !! شسويت له ! كله مني بعد ليش ما اقوله شنو فيني ، صج اهوه ريلي ، متى بغير هالطبع الي فيني ، ( تتنهد )
ونامت و اهيا مو مرتاحه ، حست انها غلطانه و خالد معصب عليها ..
اسراء : لازم اراضيه باجر و اعتذر منه ،


بيت بو عبدالله :


اسراء : شفيه خالد ، صارله يومين مادق علي ، من يوم عصب علي مادق ، اخاف صج زعل و مايبي يكلمني ؟ ( تنهدت ) الله يصبرني عليك يا خالد
رن فونها شافت الاسم ( اسماء )
اسراء : هلا اسماء
اسماء : قوة
اسراء : يقويج
اسماء : اسور خذيتي تحاليلج ؟
اسراء : لا والله لي الحين
اسماء : انزين الحين بمرج و نروح نشوفج اوكي ؟
اسراء : اوكي يلا ناطرتج ..


و عند الدكتور :

قعدت اسراء ساكته و تشوف الدكتور لما قالها الخبر المفـآجئ
الدكتور : مبروك ، حامل
انصدمت اسراء حيييل وما توقعت تكون حامل !!
اسماء و الفرحه باينة عليها : الف مبرووك
سكتت من الصدمه
اسماء : شفيج ؟ جنج مو مستانسة ؟
بلعت ريجها : مادري ،

قامت من مكانها و طلعت مع اختها ،
وبالسيارة :

اسماء : اسور شفيج ؟
اسراء : ماني مصدقه اني حامل !
اسماء : وليش مو مصدقه ؟ صدقي انتي حامل !
اسراء : ماكنت ابي هالشي يصير
اسماء : ليش ؟
اسراء : وليد توه صغير ، ماراح اقدر اتحمل مسؤولية ياهل ثاني الحين !
اسماء : وليد ولدج اسم الله عليه كبر عمره جريب السنتين الحين ، و على ما تولدين الا صاير كبير مو ياهل وماراح يتعبج
اسراء : مادري مو مستوعبه الوضع ..
اسماء : ماعندج سالفه ، ضحكي بس ضحكي ، و بشري خالد
اسراء : ماراح اقوله ، لي وصل بالسلامة ان شاء الله بقوله
اسماء : كيفج ..
اسراء بقلبها : وينك يا خالد ، وينك .. مادري شـخبارك و شنو الي يصيرلك .. الله يصبر قلبي على فراقك ،


ردت البيت و قعدت مع وليد تلعبه و تونس نفسها ..
وليد : ماماا
اسراء : نعم ماما
وليد : وينا باباا
اسراء تنهدت : بابا سافر حبيبي ، راح طيارة
وليد : تياله ؟
اسراء : اي ماما طيارة
وليد : ويناا تيالة ؟
اسراء : طيارة فووق
سكتت و ظلت تشوف وليد شلون يلعب ،

وحست بـ نغزة بقلبها !
اسراء : خالد !!
غمضت عيونها حييل و حطت ايدها على قلبها ،
اسراء : خالد في شي ! قلبي يقول ان خالد في شي ! الله يستر بسس ..!
خافت حييل و خذت فونها و اتصلت على خالد ...
اسراء تعظ على شفايفها : رد يا خالد رد .. ( ماكو رد )
اسراء متوترة : اكيد صار فيه شي .. الله يستر ، يارب مافيه الا العافيه

ظلت طول الليل تحاتي خالد و تفكر فيه و تتصل عليه ، لكن ماكو رد .!
حاولت تنام و تنسى خالد وتغمض عينها ، لكن ماقدرت تنام و بالها مشغول بـ خالد ..

،،

فززت من النوم مفزووعه و ميته من الخوف و تتنفس بصعوبة ! رفعت نفسها شوي شوي و فتحت الابجورة و سمت بـ اسم الله و بـ حروف متقطعه : خ خخـاللد
ماتحملت اكثرر و فتحت الدرج و طلعت فونها و اتصلت بـ خالد و دقات قلبها سريعه و نفسها حيل قوي من الخوف ..
اسراء و دموعها تنزل على خدها : تكفى خالد اذا تحبني رد علي ، لاتخليني جذي احاتي
تمت دموعها تنزل لين سمعت صوت رجولي خشن يرد عليها
اسراء : الو !!
الطرف الثاني : السلام عليكم
دققت اسراء و عرفت ان هذا مو صوت خالد : هذا مو تلفون خالد ؟
الطرف الثاني : هذا تلفون خالد .. انا رفيجه جاسم
اسراء : هلا جاسم .. وين خالد ؟
تنهد جاسم : والله مادري شقولج ..
اسراء و الخوف واضح عليها و دموعها تنزل : خالد فيه شي ؟ صاير له شي ؟ تكفى قولي لاتخليني احاتي اكثرر !
جاسم : مابي اضيقج خلقج بهالوقت
اسراء: خالد شفيييه ؟ شصايرله تكفى قولي !


sweet memy​

 

[zizo0ou]

البارت عجيب يسلمو
كمليييييييييييييييييييييييييييه بسرعة بليييييييييز

 

[بيـــشو17]

ولكم ولكم باك حبي ماتشوفين شر:wqedqw:

عجيب البارت الله يصبرها امبي اكيد صار فيه شي:gr4uu:

 

[KUWAITIYA72]

بعد قلبي خالد واسراء الله يخليج كملي ترى مانمت الظهر عشان قصتج من رحعت من الدوام وآنا مجابلة القصة حدي ببجي تكفين كملي وعفية مانبي يصير في خالد شي جايد ناطرينج

 

[KUWAITIYA72]

ما تشوفين شر ياميمي وانشالله ظروفج تتحسن وتصير مثل ماتبين واحسن

 

[قلب نواف]

يسلمؤؤؤ ميمي

ناطرين البارت الجاي

 

[sweet_memy]

تسلمون حبآيبي :$

 

[sweet_memy]

البارت السادس و العشرون :


جاسم : لا حول ولا قوة الا بالله .. خالد تعرض حق اصابة بـ ظهره ، دشت بـ ظهره رصاصة و اهوه الحين بالمستشفى وحالته خطره حيل
انصدمت اسراء حيل !! و فجاة تجمدت الدموع بـ ويهها و انكتم نفسها ، ظلت ساكتة ماتدري شتقول من الصدمه !!
جاسم : معاي ؟
اسراء مصدومه : الي انا سمعته صج ؟ لا انتا اكيد تجذب علي ! خالد مافي شي مافي شي صح !! قولي انه مافي شي !
جاسم : لا حول ولا قوة الا بالله
ماصدقت الخبر الي سمعته و طاح فونها من ايدها و انهارت من البجي ...
جاسم : الو ؟ الو ؟
طوط طوط طوط ..
اسراء ( بصوت انمزج مع دموعها ) يارب تشفي خالد و تعطيه الصحه و العافيه و ترجعه لي سالم معافى ..

،،

رن فونها الصبح ردت بسرعه و بـ لهفه يوم شافت الرقم : الو !!
خالد ( بصوت تعبان و خشن ) : قوة حبيبتي
ماتعودت تسمع خالد بهالصوت ، حسته تعبان حييل ، ماقدرت تمسك دموعها و بجت : الله يقويك حبيبي ، شلونك ؟؟
خالد بـ تعب : الحمدلله على كل حال
اسراء : حبيبي شـ الي صار ! شسالفه و وينك الحين ؟
خالد : انا الحين بـ المستشفى ، الدكتور يقول ان حالتي خطرة و احتاج عملية بسرعه .. باجر راح ارجع الكويت ، جهزي نفس لأن عقب باجر بنسافر انا معاج عشان نكمل العلاج
اسراء ( منصدمه و مو مستوعبه الي قاعد يقوله و الي قاعد يصير ) : سلامتك حبيبي ، ليش جذي شنو الي صار بـ الضبط !
خالد : حبيبتي لا تذكريني بـ الي صار .. يلا حبيبتي لازم اخليج الحين ما اقدر اتكلم وايد ، تبين شي ؟
اسراء : وين حبيبي ! ماشبعت منك ؟
خالد : حبيبتي تعبان شوي ، يلا مع السلامة ( عطاها بوسة بـ الفون و سكره )

ماكانت مستوعبة الوضع ومشاعرها مجهوله ماتدري اذا اهيا زعلانه و متضايقه من الي صار حق خالد او فرحانه لانها سمعت صوته و بيرجع باجر و بتشوفه .. سمعت صوت وليد يبجي خذته من سريره و لمته حييل لين لصقت انفاسه بـ انفاسها ، شمت فيه ريحه خالد و حست بـ الراحه ..


يوم وصل خالد ،

الكل استقبل خالد بـ المطار و الفرح باين عليهم الا اسراء الي كانت متضايقه و ماتدري شلون بتشوف خالد عقب الاصابة .. سرحت تفكر فيه ماوعت الا فاطمه تناديها
فاطمه : اسراااء ؟ تسمعيني ؟
انتبهت اسراء : هلا ؟
فاطمه : شوفي خالد طلع ! شوفيه !
ماصدقت الي سمعته و لفت ويهها شافت خالد جدامها ، نزلت دموعها من غير استئذان ، قرب منها خالد و لمها حييل و دفنت راسها بصدره و باسها على راسها
اسراء : الحمدلله على السلامه حبيبي
خالد : الله يسسلمج حبيبتي
اسراء : ولهت عليك وااايد
خالد : مو كثري ،
حست بـ الفرح يتسلل قلبها و مسك خالد ايدها و مشوا
خالد : وليدان وينه ؟
اسراء : نايم حبيبي خليته بـ البيت
خالد : مشتاق له وايد


بيت بو عبدالعزيز

الكل متيمع بـ الصالة و مستانس لأن خالد رجع من السفر ، صحته كانت احسن من امس شوي و صوته احسن ، و يحاول يبان طبيعي و مافيه شي ..

ام عبدالله : تو ما نور البيت والله
خالد : منور بوجودج يمه
فاطمه : اشتقنالك وايد ، خصوصا اسراء .. مسكينة كانت كاسرة خاطري وايد
استحت اسراء و نزلت راسها
لف خالد ويهه و شافها : صج حبيبتي ؟
اسراء بصوت واطي : صج
عبدالله : عيل باجر السفره ؟
تنهد خالد : اي
عبدالله : ماتشوف شر ، سهالات ان شاء الله
خالد : الله يسمع منك .. يلا حبيبتي قومي معاي فوق
ام عبدالله : وين خالد تو الناس ماشبعنا منك
خالد : برتاح شوي ، و بشوف وليدان ماشفته
ام عبدالله : الله معاك يمه


صعدت معاه فوق و اول ما دخل الغرفه لقى وليدان جدامه شكله توه قاعد من النوم
فررح وليد حييل و صرررخ : بابااااا
فرح خالد يوم شاف رده فعل وليد و خذاه بـ شوق و لمه حييل و باسه على خده : شلوونك وليدان ؟ ولهت علييك
وليد أبـّه ( بوسه )
اسراء : خالد حبيبي تعال ارتاح ، لاتشيله وايد مو زين عليك
تنهد خالد و راح انسدح على الفراش
اسراء : خالد .. قولي شلون صار جذي ؟
تنهد و سكت شوي .. و قالها كل السالفه ..
ماقدرت تمسك دموعها اكثر و بجت على حال خالد
قرب منها و مد ايده و مسح دموعها
خالد : لاتبجين انا مافيني شي
حست بـ الم في بطنها و اللوعه و حطت ايدها على بطنها و ايدها الثانية على حلجها و قامت بسرعه راحت للحمام ( وانتوا بكرامه )
استغرب منها خالد و نطرها لما يت و سألها
خالد : شفيج ؟
ارتبكت شوي : مافيني شي
تنهد : انا شقلت ؟ اذا فيج شي قولي انا ريلج ولازم اعرف كل شي
اسراء : بقولك ، بس عقب ما افتح جنطتك و ارتبها
و قامت بسرعه راحت فتحت الجنطه و طلعت الملابس الي تحتاج غسيل و رتبت الجنطه ، اما خالد فـ ظل يلعب مع وليد و يسولف معاه
خالد : يبتلك العاب واايد
وليد : ويناا أعاب ( العاب )
خالد : يلا الحين تخلص ماما و اطلعلك الالعاب
وليد : ماماا اتي
اسراء : شنو تبي حبيبي ؟
خالد : يقولج يلا خلصي عشان ياخذ العابه
اسراء : اممم .. يلا خلصت
قامت اسراء و راحت الفراش و انسدحت ، و خالد راح يعطي وليد العابه
استانس وليد حييل يوم شاف الالعاب و فتح له خالد لعبتين و خذاهم و قعد فوق بطن اسراء
اسراء : وليييد قوم بطنييي !
وليد مشغول بـ اللعب : مااا ( مابي )
اسراء : آآآآي ! خالد شييله بطنييي
خالد : وليد بابا قووم
وليد بصوت عالي : مااااااا (مابي )
شاله خالد بالغصب و قعد يبجي ..
خالد : ماقلتيلي ليلحين شفيج ؟
سكتت و شافت خالد و خذت ايده و حطتها على بطنها
و قالتله بصوت واطي : انا حامل
ارتسمت البسمه على شفاته و فرح حيييل : حامل !
اسراء : اي ، حامل
خالد : وهذا خبر ينخش ؟ اقولج شفيج تقوليلي مافيني شي ؟
اسراء : كنت بسويلك مفاجأة
خالد : احلى مفاجأة .. المهم ، تدرين الحين شتسوين ، حوسه و حركه وايد مابي حافظي على صحه الجنين
اسراء : ان شاء الله حبيبي ، من عيوني
قعد خالد يفكر بـ السفرة باجر و شلون اسراء بتروح معاه و اهيا حامل
خالد : شلون بتسافرين باجر و انتي حامل ؟
اسراء : شفيها ؟ عادي
خالد : راح تتعبين ، وانا مابي شي يتعبج
اسراء : خالد حبيبي ، انا بـ أول شهور الحمل ، يعني عادي
خالد : اكيد ؟ انا خايف يصير بـ الياهل شي
اسراء : لا ان شاء الله ماراح يصير شي
خالد : عاد هالمرة ابي بنت
اسراء : الي ايي من الله حياه الله
خالد : ابي توأم بنتين
اسراء : توأم  خالد شناوي علي ؟؟
خالد : هههه ، احب اليهال
اسراء : ايي بعدين لما اييب اليهال تقولي انتي مو فاضيتلي و كله قاعده معاهم و تغار منهم .. صح ؟
خالد : لا لاا بس تبناا
اسراء : نشوف

و يوم السفر ..

الكل كان بـ المطار يودع خالد و اسراء ، اسراء الي كانت تحاول تمسك نفسها من البجي ، ماتدري شلون بتسافر و تخلي وليد .. ماتصورت بـ يوم من الايام تخلي وليد بروحه و تبتعد عنه ..
اسراء : يمه ديري بالج عليه و طمنيني عليه من وقت لي ثاني
ام عبدالعزيز : لاتوصين حريص ، ولدج بعيوني
تنهدت اسراء ..
خالد : يالله ترا تأخرنا ..
لمت وليد لمه اخيرة و باسته و نزلت دموعها لما شافته يبجي و يقول ماماا
خالد : يالله ترا اذا كل شوي بتلمينه و تبوسينه ماراح نخلص .. بتطير عنا الطيارة
اسراء ( تمسح دموعها ) : يالله كاني ..
و ودعتهم وداع اخير و مشت مع خالد


ركبت الطيارة و حست نفسها دايخه ، سندت راسها و غمضت عينها و حاولت تاخذ لها غفوة ..
خالد : دايخه ؟
اسراء بتعب : اي
خالد : نامي عيل
سندت راسها ع الكرسي و غمضت و خذت شهيق و طردت زفير قوي ..


وبعد ساعات ..

كان الجو روعه بمعنى الكلمه بـ المانيا ، مطر خفيف و نسمات هوا بارده ..

اسراء ( تتكلم و يطلع من حلجها شوي دخان من البرد ) : خالد برررد
خالد ( ماسكها حييل و يحاول يدفيها ) : الحين نروح الفندق و تدفين
و بعد دقايق وصلوا الفندق ..

عقب ما ارتاحوا و ناموا راحوا المستشفى عشان ياخذون الاجراءات اللازمه قبل العمليه ،

اسراء : خالد
خالد : هلا
اسراء : انا خايفه
خالد : خايفه ؟ من شنو خايفه ؟
اسراء : خايفه من العمليه
خالد : هه ، انا الي بسوي العمليه مو خايف و مو حاس بـ شي
اسراء : العمليه مو سهله ، انا خايفه عليك وايد
خالد : خلاص عاد ، العمليه مافيها شي .. ادعي انتي بس و ماكو شي صعب على ربج
اسراء : ان شاء الله تكون العمليه سهله و تقوم بالسلامه

وطول الليل قعدت تدعي ربها تنجح العمليه و يتشافى خالد و يرجع مثل اول و احسن ..


و يوم العمليه ،

كانت اسراء بره قاعده ع الكرسي تنطر الدكتور يطلع يبشرها .. حالتها صعبه و التوتر باين عليها و حركه ريلها كل شوي تزيد تزيد ، تحاول تهدي نفسها و تمسك دموعها و تقرا آيآت من القرآن عشان تهدى .. ظلت على هالحال 4 ساعات و حالتها تزيد تزيد لما طلع الدكتور ، شافته و بسرعه قامت من مكانها !

اسراء : ها دكتور ؟ بشرر ؟
الدكتور : الحمدلله نجحت العمليه ، و صحته احسن الحين
فرررحت حييل و حست بالدورة : الحمدلله يارب !
الدكتور : بس تعبان الحين من العملية ، يحتاج راحه لمدة طويلة
اسراء : يصير اشوفه ؟
الدكتور : بس من غير صوت ، لانه يحتاج راحه

اسراء هزت راسها يعني ان شاء الله و راحت غرفه خالد شافته حسته تعبان و شكله حييل حلوو ، قربت منه و باسته على خده و قالتله الحمدلله على السلامه و قعدت يمه تمسح على شعره و تقرا عليه قرآن ، حست بـ الراحه و الامان لما قربت منه ،
اسراء : الله لا يحرمني منك يا خالد
تذكرت وليد و بدت دموعها تنزل ، مو متعودة تبتعد عن ولدها ، خذت الفون واتصلت على امها ..


و بـ الكويت في بيت بو عبدالعزيز :

ام عبدالعزيز : عزييييز رد على التلفون انا بالمطبخ
عبدالعزيز : ان شاء الله .. الو ؟
اسراء : قوة
عبدالعزيز : يقويييييج هلا اسوور
اسراء : هلاا عزييز ، شلونكم ؟
عبدالعزيز : بخيرر عسساج بخير ! وانتي شلونج ؟ شلون خالد ؟
اسراء : الحمدلله بخير ، و نجحت عملية خالد
عبدالعزيز :زين زين الحمدلله على سلامته
اسراء : الله يسسلمك ، شلون وليد ؟
عبدالعزيز : اي ادري ، مو مطاوعج قلبج تخلينه و تسافرين .. زين
اسراء : عطني اياه بكلمه
عبدالعزيز : مادري وينه ولدج
اسراء : وين وديتوا ولدي !
عبدالعزيز : ايي كاا قاعد يلعب هني .. وليد هاك ماما
وليد بصوت طفولي بريء : ماماا
اسراء دموعها تنزل : هلا يمه شلونك حبيبي
قعد يسولف معاها و يخربط ، استانست لما سمعت صوته و ارتاحت و تعدل مزاجها ..
خذا عزيز السماعه من وليد : يلا ماشبعتي قرقه مع ولدج
اسراء :لا والله ماشبعت منه ، عزيز ديروا بالكم عليه
عبدالعزيز : والله ماراح ناكله ، امي مسويته يا دهينه لا تنكتين لاتخافين عليه
اسراء : بعد عمري امي ، وينها بكلمها
عبدالعزيز : بالمطبخ
اسراء : نادلي اياها
عبدالعزيز : يمااا تعالي اسور تبي تكلمج
ام عبدالعزيز بلهفه : هلااا يمه هلاا اسوورة حبيبتي !
اسراء : هلا يمه
.......


سمعت صوت حركه خفيفه لفت راسها بسرعه لقت خالد تحرك من مكانه قرربت منه و بـ ابتسامه كبيرة : الحمدلله على السلامة حبيبي
خالد بتعب و بـ كلمات متقطعه : الله يسسلمج
اسراء و الضحكه مرسومه على ويهها : الحمدلله ، نجحت العمليه
خالد : الحمدلله
اسراء سكتت شوي : امي و عزيز يسلمون عليك ،
خالد : الله يسسلمهم .. شلون وليد ؟
اسراء تنهدت : الحمدلله ،
خالد : ادري فيج مو مرتاحه ،
اسراء : يا خالد صعب اخلي ولدي بروحه و اهوه صغير بعيد عني ، حييل اشتقت له
غمض خالد عيونه و سكت ، سمعت صوت الباب و راحت فتحته و شافت الدكتور
دش الدكتور و شاف خالد قاعد : الحمدلله على السلامه
خالد : الله يسلمك
الدكتور : لا احسن الحمدلله ( ينادي السستر ) غيري المغذي
السستر : اوكي
حطت السستر لـ خالد مغذي و قاس الدكتور الضغط و الحرارة ، كان خالد طبيعي و مو حاس بالالم او يحاول يبان طبيعي عشان لا يضعف جدام زوجته ، اما اسراء فكانت تشوف خالد و قلبها يعورها عليه ، ماتوقعت بيوم من الايام بتشوف خالد طايح بالفراش بالمستشفى ، لكن القدر ..

sweet_memy​

 

[zizo0ou]

يسلموو على البارت ويتنغ الياي

 

[كاسبرينوو]

يسلمووو حبيبتي البارتات رووعه
ناطرينج

 

[بيـــشو17]

:wqedqw:حلو البارت عجيب وناطرين الللي وراه مشكوره حبيبتي :aha:
sweet_memy

 

[sweet_memy]

البارت السابع و العشرون :


وعقب العمليه بـ 3 ايام بدا خالد العلاج الطبيعي ، عشان تلين عضلات ظهره ..
كانت اسراء معاه 24 ساعه تمشيه و توكله و تشربه ، و خالد يتدلع عليها مستانس لان وليد مو معاهم ، و اسراء المسكينه موفرة له كل شي و تلبي كل طلباته ،
خالد : آآآي آآآي ، ظهري بينكسررر شوي شوي !
اسراء : ماعليه خالد تحمل شوي ،
خالد : كسر ظهري هذا !
اسراء : لا حبيبي تحمل شوي العلاج
خالد يتنهد : بتحمل ، بتحمل
شافته اسراء بـ ابتسامه حلوة ..
خالد : قربي مني
اسراء : كاني قربت
خالد : عطيني حواوة
عرفت قصده و شافته بنظرة : خالد شفيك
خالد : شفيني مافيني شي
اسراء : مو هني ، مو يم الدكاترة
خالد : وانا شكو فيهم
اسراء : واي خالد .. قلت مو هني
تنهد خالد : خلاص بعدين لما اروح الغرفه
اسراء تنهدت : يصير خير ..
ظلوا تقريبا ساعتين لما حس خالد بالنوم من المساج
خالد : يلا بس بقوم ماصارت مساج
اسراء : خالد بسس لاتحن الحين بتقوم
خالد : يلا عطيني ايدج بقوم
مدت اسراء ايدها و مسكت خالد و قام معاها و راحوا للغرفه و انسدح خالد على الفراش شوي ..
خالد : تصدقين ؟
اسراء : شنو ؟
خالد : مليت من القعده بالمستشفى ، بقول حق الدكتور بطلع خلاص العملية و خلصت
اسراء : خالد حبيبي شفيك ، انتا ليلحينك مريض و لازم تقعد بالمستشفى
خالد : انا مافيني شي ، العمليه و سويتها و نجحت ، شنو بعد ؟
اسراء : ماكملت علاجك عشان تطلع
خالد : يولي زيين العلاج ، خلاص انا مافيني شي الحين ، بقول حق الدكتور بطلع مليت من هني ، و بعدين انتي ما مليتي ؟ صارلج اسبوع معاي قاعده بالمستشفى ما استانستي ولا ارتحتي ، كاسرة خاطري والله
اسراء : انا مرتك ، وهذا واجبي اقعد معاك و اساعدك .. و ماراح امل دام اني معاك ، راحتي بقربك حبيبي
خالد : يا بعد عمري انتي والله ،
ابتسمت له و ابتسم لها
خالد : المهم ، الي اعرفه ان لازم اليوم اطلع ، نبي نطلع نستانس شوي مو كله مستشفى
اسراء تتنهد : لا حول ولا قوة الا بالله .. يصير خير
و دش الدكتور و قاله خالد انه يبي يطلع و قعدته بالمستشفى مالها داعي ، و وافق الدكتور بشرط ان كل يوم ايي ياخذ العلاج الطبيعي ساعتين و يطلع ، و وافق خالد و وقع على اوراق خروجه ،خذا شور و جهز اغراضه و رش عطر رجالي قوي و طلع من المستشفى و حس بحريه و تنفس هوا نقي ، كان الجو عجييب حييل حلو بـ المانيا هـ الوقت ، نسمات هوا باردة على مطر خفيف ..
خالد : الله ، الجو حلو
اسراء : اي ماشاء الله وايد حلو ، بس انا بردانه
خالد : جذي الواحد يتنفس هوا ، مو بالمستشفى جو مقموت
اسراء : خالد انا بردااانه ، امش ندخل الفندق
خالد : قربي مني
قربت منه و لمها حيييل عشان تدفى ، حست براحه مو طبيعيه و شمت عطر خالد و حست بالدوخه ، حطت راسها على صدره و غمضت عيونها .. ظلت على هالحال 3 دقايق تقريبا
خالد : دفيتي ؟
اسراء : ايي ، دفااا


بالكويت بيت بو عبدالله :

ام عبدالله : والله البيت فاضي ، ناقصه خالد و غشمرته
ودخلت فاطمه مع محمد
فاطمه : قوووة يمه !
ام عبدالله : هلا هلا فطومه حبيبتي
قربت من امها و باستها على راسها : شلونج يمه ؟
ام عبدالله : الحمدلله يمه انا بخير
محمد باسها على راسها : شلونج عمتي ؟
ام عبدالله : هلا يمه وليدي ، بخير عساك بخير
محمد : الحمدلله
فاطمه : شسالفه ؟ صخه ماكو احد ؟
ام عبدالله : اي والله ماكو احد ، عبدالله طالع مع ريم و عياله و انا بروحي ماعندي احد ، زين ييتي تونسيني شوي
فاطمه : اممم ، خالد شلونه ؟ ما اتصل ؟
ام عبدالله : لا والله ما اتصل ، مادري عنه ماكلمني الا مرتين
فاطمه : تلقينه الحين بالمستشفى لاهي
ام عبدالله : لا والله ما اعتقد ، خالد ما يحب قعده المستشفى و اكيد طلع
فاطمه : ما يتوب هالخالد .. عنيد
محمد : عمتي عندنا لج خبر حلو
ام عبدالله : خير ياوليدي ؟ بشروني ؟
محمد : فاطمه حامل
ام عبدالله : صج والله ! الف مبرووك فطوووم
فاطمه بحيا : الله يبارك فيج
ام عبدالله : وليش ماتتكلمين ؟ ماتبين تفرحيني ؟
محمد : كانت بتسويها لج مفاجأة



بـ المانيا بـ الفندق :


خالد : يالله ماصارت لبس ، بنروح السوق
اسراء : انزين يلا كاني يايه
و طلع خالد مع اسراء و راحوا السوق ، ما ظل سوق الا و راح له خالد ، ما خله شي الا و شراله لـ اسراء و وليد ،
خالد : شرايج نشتري حق البيبي اليديد ؟
اسراء : ما ادري اذا بنت او ولد ؟
خالد : انا عندي احساس انها بنت
اسراء : و اذا احساسك غلط ؟
خالد : خليهم ، يمكن تحملين مرة ثانية و تطلع بنت
اسراء : لا يا معود ! 2 كافي بس مابي عيال وايد
خالد شافها بنظرة : اي يصير خير
ماخذت للبيبي اليديد شي ، لكن خذت حق وليد ملابس و العاب وايد ،
و بعد ما تعبوا ، راحوا مطعم تغدوا و ردوا الفندق يرتاحون شوي

انسدحت اسراء ع الفراش بعد ما حست بالتعب
خالد : شفيج ؟
اسراء : بطني ، يعورني شوي
خالد : بطنج ؟ من شنو ؟
اسراء : مادري خالد .. الظاهر من المشي الي مشيناه مساع
خالد : خلاص خليج بالفندق ارتاحي ،
اسراء : وين بتروح و بتخليني !
خالد : ما يهون علي اخليج ، بس لازم اروح المستشفى بعدين عشان المساج و التدليك ، تقدرين تيين ؟
اسراء : اي خالد بيي معاك ، مابي اقعد بروحي هني
خالد : اممم ، خلاص عيل ارتاحي الحين عشان بعد ساعه بروح ..
ارتاحت و عقب راحت مع خالد المستشفى و خذا المساج ، كانت اسراء تعاني من الالم في بطنها بس ساكته و متحمله عشان خالد ، تشوفه و تبتسم و لا تبين له انها تعبانه او فيها شي .. و اول ما ردت الفندق خذت لها شور و قطت نفسها ع الفراش و نامت بسرعه من التعب و الالم ..

ظل خالد على هالحال شهر ، كل يوم يروح المستشفى ياخذ العلاج ، مساج و تدليك و سباحه لما تحسنت حالته و تعافى كليا ، حنت اسراء على الكويت و ودها ترجع ، اشتاقت لـ وليد حييل و ولهت اهلها و بيتها و مكانها ، ماحبت الغربه لكن كانت مجبورة عشان خالد ، اما خالد فـ كان مستانس و ما يبي يرجع الكويت ، شنو احلى من تكون مع زوجتك 24 ساعه و تكون مجابلتك و مدلعتك و موفرة لك كل شي ! مدد خالد السفرة اسبوع يرتاح و يستانس فيهم مع اسراء و يروح اماكن سياحيه و يرفه عن نفسه و يطلع من منطقه العلاج ، كانت اسراء معاه و مستانسه حييل بس الي معذبها و شاغل قلبها ولدها وليد ، كانت دوم تحن على خالد و تقوله ان ودها ترجع الكويت اشتاقت حق وليد لكن خالد يصبرها و يطمنها عليه ..


و يوم الرده حق الكويت ،

ماحب خالد يقول حق احد انه بيرجع الكويت ، حب يسويها مفاجأة و يفاجئ الكل بقدومه ،
اسراء : خالد ليش ماقلت لهم انا بنرجع اليوم ؟
خالد : بخليها مفاجأة
اسراء : يا حبك للمفاجآت ، تدري لو كنت مسافر وماتقولي متى بترجع و تسويها لي مفاجأة ازعل ؟
خالد : وليش تزعلين ؟
اسراء : مفاجآتك تخرع و توقف القلب بصرآحه ! و بعدين شلون حبيب قلبي يرجع و انا مادري ؟ اكيد بزعل
خالد : اممم ، بس هالشي ماراح يصير ، لان مستحيل اسافر و اخليج بروحج
شافته اسراء و ابتسمت ،



بـ الكويت :


و اخيرا رجعوا الكويت ، حست اسراء بـ الدوخه و التعب من الطيارة ، كانت حيل تعبانه و مبين عليها التعب و متحمله ألم بطنها و ماقالت حق خالد و لا حس فيها خالد ..
دخل خالد البيت مالقى احد بالصالة ، خذا الجناط شوي شوي و صعدهم فوق و نام مع اسراء و ارتاحوا .. و عقب 3 ساعات قعد خالد وشاف اسراء نايمه و باين عليها التعب ، قام خالد خذا شور دافي و قعد يشوف تلفزيون على ما تقعد اسراء ، و اخيرا قعدت و التعب ملازمها ، قامت من الفراش شوي شوي و ايدها على بطنها و الثانية ورا ظهرها
خالد : يالله ماصار نوم ، نبي ننزل تحت
اسراء : ان شاء الله ، بس آخذلي شور و ننزل
خذت لها شور دافي و صحصحت شوي ، و نزلت مع خالد تحت
و اول ما نزلوا لقوا ام عبدالله و عبدالله بالصالة ،
مشى خالد على اطراف اصابعه و اسراء حاولت تمشي بهدوء لما وصلوا عندهم
ام عبدالله : خالد !! اسراء !!
خالد : شرايج بالمفاجأة !
ام عبدالله : الحمدلله على السلامه يمه !
قرب منها و باسها على راسها
خالد : الله يسلمج يمه
عبدالله : الحمدلله على السلامه ! شهالمفاجأة
خالد : الله يسسلمك عبييد
ام عبدالله : شلونج اسراء ؟! الحمدلله على السلامه
اسراء : الله يسسلمج خالتي
ام عبدالله : خالد ليش ما قلت لنا انك بتوصل اليوم ؟!
خالد : تدرين فيني احب المفاجآت
ام عبدالله : يا يمه قلبي ماقام يتحمل مفاجآتك ، اخاف يصير فيني شي و السبه مفاجآتك
خالد : اسم الله عليج يمه
ام عبدالله : شلونك الحين ؟ و شلون ظهرك ؟
خالد : لا الحمدلله ، صرت مثل اول و احسن بعد
ام عبدالله : الحمدلله
عبدالله : شدعوة حتى ما تتصل و لاتسأل ،
خالد : والله دقيت اكثر من مرة ، بس ولا مرة حصلتك .. كلمت امي بس
ام عبدالله : ها اسراء ؟ شلون الحمال معاج ؟ عسى ما تعبتي هناك ؟
اسراء : والله تعبت شوي من المشي
ام عبدالله : يالله الله يسهل عليج
اسراء : ان شاء الله
ام عبدالله : انتي حامل و فطوم حامل بعد
اسراء : ماشاء الله ، الله يسهل عليها
خالد : يحليلها فطوم ، والله و كبرت و صارت حامل
حست اسراء بـ الالم يزيد عليها و غمضت عينها شوي
اسراء : خالد ، انا بروح فوق شوي
خالد هز راسه : اوكي
صعدت اسراء بسرعه و راحت الحمام حست ان جبدها تلوع والالم كل شوي يزيد عليها ، انسدحت ع الفراش و حست بالنوم و نامت ، و عقب ما قعد خالد مع امه و اخوه صعد يشوف اسراء لقاها نايمه ! انصدم يوم شافها نايمه و حس ان فيها شي و حاول يصحيها من نومها
خالد بصوت واطي : اسورة ؟ اسورة حبيبتي ؟
فتحت اسراء عيونها شوي شوي و شافت خالد
خالد : شفيج حبيبتي ؟ تعبانه ؟
اسراء ماقدرت تتكلم ، هزت راسها و عرف خالد انها تعبانه
خالد : قومي اوديج المستشفى
اسراء بـ تعب : مافيني شي خالد ، مابي اروح المستشفى
خالد : انتي تعبانه لازم تروحين !
اسراء : مافيني شي خالد ، مابي اروح ..
خالد تنهد : انزين ، ماتبين تروحين عند امج تسلمين عليها و تاخذين وليد ؟
اسراء : امبلا ،
خالد : انزين يلا قومي نروح
قامت بصعوبه و غيرت ملابسها ، خذت لها حبتين بندول و كلتهم و حست بتحسن شوي و راحت عند امها ..


sweet memy​

 

[كاسبرينوو]

ثااانكس حياتي
ويتنج البارت الياي

 

[بيـــشو17]

مشكووووره الله يعطيج العافيه خووش بارتات يسلمووووو:wqedqw: :balo:
وننطر البارت الياي اليوم تعبناج يلا خلي البارت باجر:aha::bye22:

 

[zizo0ou]

يسلمو على البارت و يعطيج العافية

ويتنغ البارت الياي

 

[بيـــشو17]

صباح الخير:aha: