رجيمي مع د.عبدالله المطوع (13)

[عنيّد]

صباح الخير

بحط لكم اليوم صورتي :

ادري ادري اني مغبره وتلفت المنتدى بغباري مايحتاج تقولون :krkrkr:

صجججج زمااااااااااان من قلببببببببببب عن العُبـــد وسلسلة رجيمي

يالله خلاص مانبي مقدمه زايده تكفي المقدمه الي بتقرونها بلقائي مع العُبد


.
.

اوووه لحظه ، نسيت خلأحط لكم مسيرتي الرجيميه

رجيمي مع د.عبدالله المطوع (1)

رجيمي مع د.عبدالله المطوع (2)

رجيمي مع د.عبدالله المطوع (3)

رجيمي مع د.عبدالله المطوع (4)

رجيمي مع د.عبدالله المطوع (5)

رجيمي مع د.عبدالله المطوع (6)

رجيمي مع د.عبدالله المطوع (7)

رجيمي مع د.عبدالله المطوع (8)

رجيمي مع د.عبدالله المطوع (9)

رجيمي مع د.عبدالله المطوع (10)

رجيمي مع د.عبدالله المطوع (11)

رجيمي مع د.عبدالله المطوع (12)


.
.


أمــس الثلاثـا كانت مراجعتي عند الدكتور عبدالله المطوع من بعد انقطاع اكثر من 9 اشهر ، حشى حامل ! خخخخخخ


دخلت وسلمت وقعدت ، جان يقولي انتـي ويييييييين عااااش من شاااافج
قلت له عاشت ايامك ادري مافيني خير :bbbiu:
قالي ايـــــــه والله مافيج خير << قهرني حسيته قالها من قلب لووول

المهم مني مناك بعد هالمقدمات معاه دخلت بالموضوع وقلت له الظاهر عين ماصلت ع النبي << مسكينه هالعين كل شي حاذفينه عليها :23_asmilies-com: طبعا محاوله مني للترقيع لا اكثر ;p

وقلت له الي صار معاي بهالفتره ، هممممم انا كنت بين رجيم وتبررررررربس ، وقلت له للاسف الشديد اني لجأت للاشتراك بشركة للوجبات الغذائيه
وهذا موضوعي يومياتي مع شركة هيلث كومباني وقلت له سبب الاشتراك اني بغيت شي يلزمني ومن هالكلام الي بتحصلونه بالموضوع ^ـ^


شاف كرتي قالي زايده تقريبا 5 كيلوات ونص يعني معقول بهالفتره

قلت له اي انت ماتدري شسالفه << على قولة بوردح بلاااااكت انت ماتدري شسالفه يخليك ربي
نهاية شهر 12 سافرت ورجعت من السفر وبكل ثقه آخر الليل جيكت وزني ياربي مادري شهالثقه بس يمكن حزتها بغيت الميزان يعطيني كــــــف وأصحى من نوبة التبربس ;@

آخر مراجعه عنده كنت 72.5 ولما شفت الميزان وزني 89

صوووودوووق جذووووب !! لا صدوووق عيني صوودوووق هـــع

نقول ماشي كان آخر اليوم وطافحه اكل الدنيا ، يعني بقط كيلوين ثلاث ؟ 87 ؟ سواد ويه هم مو شويه ;\

عاد انا لما قلت له هالرقم ويهه انصدم اول مره بحياتي اشوفه مخترع جذي لوووووووووووول كسر خاطريييييييي وبعدين رد شاف وزني بالكرت وقالي ماشااااالله وماعليه كنتي 89 وبنقول اربع كيلوات سوائل يعني 85
واليــــــــوم وزنـــج ........ وزني بهاليوم كان 78.5​

:eh_s(22):
خوش اشفيكم شي احسن من شي يه

ومن بعد هالهذره دخلنا باليــديـــد .........


.
.


قالي شوفي خلينا من سالفة الانظمه وبعطيج شي يديد تعودين نفسج عليه ، وهي حسبة السعرات الحرارية للوجبات بكل يوم ، لان خلاص هذا نظام حياة وبتبقين طول عمرج بصراع بين الاكل والمحافظه على الوزن ، فلازم تتعودين عليه

المهم هالطريقه اهو معطينياها من قبل ولكن اليوم اختلفت بعدد السعرات ، قالي انا قسمت لج هالسعرات على اساس وزنج وطولج وطبعا يختلف من شخص للثاني

عــطـــــــانـي ...
​

الـريــــوق : 350 سعرة حرارية


سنــاك الظهـــر : 150 سعرة حرارية


الغـــــداء : 350 سعرة حرارية


سنــاك العصــــر : 150 سعرة حرارية


العشــــــاء : 300 سعرة حرارية (500 سعرة حرارية إذا بالمطعم)


-----

وقالي يمكن تتعبين بالبداية ولكن بعدين بيصير الشي عندج سهل وبتعرفين أغلب السعرات الحرارية بالأكل ، وهالشي مو صعب واحنا درسونا حساب السعرات الحرارية بالجامعه بأول سنه <<< يعني بيعطيني درس خصوصي

المهم ، قالي السعرات الحرارية لأي نوع أكل بالعالم بتحصلينه بالنت ، عاد قلت له انا مجربه هالطريقه من قبل باني احسب عدد سعراتي بالذات ان وايد من انواع الاكل اشوف عدد السعرات المكتوبه عليه ، وفعلا هالطريقه حليوه من بعد ما كتب لي عدد السعرات بيومي بوحده من المراجعات الي طافت مثل ماقلت لكم

وعلمني طريقة معرفة عدد السعرات من النت ، وراواني على الكمبيوتر عنده الطريقه
مثلا نبي نعرف عدد سعرات البيض ، فكتب Calories in egg
وطلعت مواقع وايد نصحني اني آخذ من موقع اسمه caloriecount ، يقول هالموقع سهل وبسيط والمعلومات فيه واضحه ، وبعد موقع calorieking معلوماته مرتبه ، وقالي اذا شفتي الموقع معقد روحي لأي موقع معلوماته واضحه
قالي طبعا بعض الاكلات بتكون السعرات بالتقريب ، يعني مثلا البيض مكتوب فيه 80 سعره بس يقول هذا البيض الكبيــر الاجنبي لكن بيضنا بالكويت معروف ان فيه 70 سعره
وقالي عادي بالوجبه تزيد السعرات عشره او بهالحول ماكو مشكله طوفي


وعلمني طريقة ثانية لمعرفة عدد السعرات الحرارية بأكل المطاعم ، وهي نفس الطريقة الي كان حاطها بحلقة من حلقات برنامجه "سعرات في لحظات" الي بقناة الراي ، وقلت له انا جربتها وحليوه صح :rerrerek:
ندخل google ونكتب اسم المطعم وبعده Nutriotion Information
راح تطلع لنا مواقع وايد نصحني بموقع livestrong يقول معلوماته مرتبه وفيها صور << طلعت مو بس انا احب منيو الصور خخخخخ


طبعاً البعض بيشوف هالسالفه عسره ، لكن شخصياً جربتها أكثر من مره وحبيتها ، يعني مو شي يديد بالنسبه لي ومع الايام حفظت بعض الشغلات لانها تتكرر والاهم ان مافيها حرمااان ^ـ^
وانتبهوا ان المواقع تحط عدد السعرات مقارنه بالكميه أو وزن الأكل
بس برايي ان الي توهم بادين بالرجيم لا يستخدمون هالطريقه لانهم بيتمللون


هذا كان كل شي بالنسبه للنظام اليديد أو المفروض انه يكون يديد بس اهو مو يديد يديد


.
.


وبعدها انتقلنا لفقرة الاسئله

قلت له عندي اسالة 9 اشهر خخخخخخخ ، شكله اخترع جان يقولي حاضر بس بسرعه عشان لا يطقوني الي بره LOL



قلت له اني سامعه بالنسبه للخضار المسلوق انه يفقد فوايده اذا انطبخ اكثر من اللازم ، فشنو احسن مده له ؟
قالي صحيح انه يفقد فيتامين سي ولكن هذا مومهم ، وطبخيه بالوقت الي تبينه ماكو مشكله

سألته عن العيش "عشقي الاول والاخير <3" اشلون اعرف عدد سعراته ؟
قالي اذا كان مجبوس او مطبق يعني فيه دسومه فالخمس قفاش فيهم تقريبا 150 سعره "يعني كل قفشه 30"
قلت له بس احنا نسويه بدووون ولا قطرة دهن ، فقالي تقريبا 90 سعره بالخمس قفاش

قلت له ملاحظه عندي شي بالفتره الاخيره وهو ان الساق صاير متين !! << فعلا انا ملاحظه على نفسي هالشي ، مادري صج ولا يتهيأ لي بس ساقي صاير يلفت نظري @_@
فقالي طبيعي العضله تكبر لما تمارسين الرياضه ، وعادي لان مع ممارسة الرياضه الجسم يشد ، خلي رياضتج متنوعه مابين الهوائيه والغير هوائيه ، وبأجهزة شد الجسم مثل الاثقال لا تخلين عدد الكيلوات عادي وتسوين شويه ، لا ، خلي الوزن نازل وعدد المرات وايد جذي أحسن

سألته عن الفاصوليا الخضره الطويله ؟
قالي هي بدل اليدام تاخذين كوب منها
طبعا بعدها استوعبت ان الفاصوليا من البقوليات وهو قايلي من قبل بدل اليدام كوب بقوليات << الله بالخير عنيّد

سألته عن عصير البرتقال اذا أبيه ع الريوق بدل الحليب ؟ قالي ممكن بس مانصحج لان اذا بتاكلين خبز او توست فهذيل كربوهيدرات ، والعصير بعد كربوهيدرات فبيصير وايد بوجبه وحده
قلت له ممكن بدل الحيب اشرب كبجينو لاني ماحب الحليب ;\
قالي يصير بس الحليب صحي اكثر وتقدرين تخلطين معاه قفشة قهوه

قلت له بسألك آخر سؤال بس لا تستغرب ولا تضحك
قالي الله يستر
قلت له أنا أحــــــب السيـريـــلاك :eh_s(6):
جان يضحك ويقولي اناااا اعطيييييه لليهااااال عشان يمتنووووووون اشلج فيييييييه <<< لوووووووووووول
قلت له والله من صجي احبه ماينفع سناك ؟ ;p
قالي مره بالاسبوع ماشي لكن تركيه عنج :tongue22:

.
.


أخيراً قلت له متى مراجعتي اليايه ؟ قالي اذا تبين رايي فبعد شهر ، عاد قلتله هذا الي كان ببالي

وانشالله مراجعتي اليايه بتاريخ 5/4/2011
بناااااات دعوااااااتكم من قلببببببببببببببببب ، خلاص مليت من بورصة الرجيم الي يوم فوق ويوم تحت ، ابي اخلصصصصصص وتستقر امووووري ، وانا حاطه لنفسي فرصه للصيف انشالله​

[/COLOR]​

 

[عنيّد]

تعليق الدكتور على نتيجة تحاليلي


قالي طبعاً نسبة فيتامين دال نازله ، اخذتي ابر او حبوب ؟
قلت له بصراحه لا
قالي ليش مفيدين وانا مخلي زوجتي تاخذ حبوب ومامنهم اضرار
قلت له بالمستوصف الدكتوره قالت لي انهم يسببون آثار جانبيه للمعده
قالي حبه وحده باليوم بعد الوجبه مامنها مضره ، ونصحني بماركة حبوب موجوده بمحل بسوق شرق فوق جدام نوكيا ، قالي ماذكر شسم المحل ولا اذكر اسم الحبوب ولكن اهو فيتامين دال 4000 .... << مادري شنو بعد الرقم ماذكر التكمله بس انشالله اذا شريته بحط صورته ، عاد نطروني اشتريه موتروحون تخلصونه
بس بعد قالي ان هالحبوب مردها بتخلص ولازم تعرضين جسمج للشمس ، اي جزء من الجسم وقالي -حسب الي اذكره- مهم ان منطقة الرقبه او بين الرقبه والصدر تتعرض للشمس ، يعني مو شرط الايد والريل ، ممكن هالمنطقه والايد ..... عاد انا ناويه على هالشي والله يعافي السطح

انصحكم تشوفون هالحلقه برنامج سعرات في لحظات - عبدالله المطوع - فيتامين دال مع د.عبدالناصر العثمان



سألني تعانين من الصداع ؟
طبعا انا ماصدددقت على الله سألني هالسؤال فجأأأأه وبدون ما أقوله لاني بالفتره الاخيره صجججج صداااااااع موطبيعي
قالي روحي تبرعي بالدم
قلت له ليش !
قالي لانه نسبة دمج ماشالله زينه ، وهالشي يسبب صداع لان الدم يكون ثقيل <<< جنها مسبه ؟ خخخخخ
قلت له أهــــــا عيل يبيلي اروح والله لانه فعلا الصداع ذابحني بهالفتره
قالي اي روحي وراح تلاحظين الفرق بالراحه ومنها تفيدين الناس وانتي تستفيدين


.
.


طبعا الي مايعرفه الدكتور ولا انتوا تعرفونه ان انا عندي فووووبيااااا من الابررررره
يعني عادي لما يسحبون مني دم اطيح عليهم خخخخ فشيييلوووووه بس هذا واقع
فسألت رفيجتي دكتوره قلت لها شالعلاقه بين الدم والصداع !!!!
قالت لي تخيلي الشرايين الدمويه مثل الانبوبه فمرات تنضغط من الدم وتسبب صداع
فـ وضحت لي الصوره :rerrerek:
والله يستر ابي اروح قريبا جدا جدا بس خايفه من الابره :eh_s(2): جاااازوووووورااااااااا :krkrkr:


​

 

[أحلى الجياكر]

الله يوفقج عنيد ..و استمرى على رجيمه و نظامه ..حرام انتى قاطعة شوط كبير ترا ..الله يتمم عليج

 

[لافه شعرها]

رد : رجيمي مع د.عبدالله المطوع (13)

احنا نركض ورا الضعف مراكض ومن نشوف الاكل ندب دب تقولين قاعدين بمجاعه

والله اني حبيت هالدكتور واسمحيلي ابي انقل رجيماتج لاني ماقدر اروح للدكتور

وان شاءالله تصيرين منيكان

 

[بطة رشيقة]

عنيييييد هلا وغلا وموووفقه خووش خوووش كلام وخوش لقاااء بس تبين الصج انصدمت ان وزنج وصل جذى وحسااافه حساااافه عليه بس الحمدلله انتى تخطيتى هالمرحله التعيسه وعفيه عليج بسس تبين الصج انا حاليا امر بمرحلتج النحيسه هذه كنت بالسبعونات والحين طاقه العبارات باخر الثمانونات ما تدرين شكثر متحسفه وما تدرين شكثر الهدوووم تلوع الجبد علي بس معانده وما ابى اشترى شي لانى ان شالله راجعه راجعه باذن الله واتمنى التشجيع من اللى يحبنى عشان ارد للسبعونات اخ يا قلبى والله يوفقج ويوفقنا طلنا يارب

 

[واثقة بجمالها]

كملي عنييد وان شاءالله ينزل وزنج بصحه وعافيه


موووفقه

 

[love.7ayate]

بصراحة شجعتيني ارجع للرجيم بدون تخبيص

انا كنت بالسبعين وبعدين وصلت 60

ورجعت 67 للاسف الشديد

واللي 3 اشهر كل يوم بقول بكرا رجيم

وطبعا تخبيص ورا تخبيص تقولي عايشين بمجاعه

بتمنالك التوفيق وشدي الهمة واذا بدك تشجيع انا معك بما انه اليوم اول يوم اللي رجيم لله الحمد

تحياتي

 

[غراااام]

كنت انتظرتج ابي اشوف بتروحين له مره ثانيه
وزين رحتي
مشكوره للرجيم شجعتيني معك

 

[غراااام]

كنت انتظرتج ابي اشوف بتروحين له مره ثانيه
وزين رحتي
مشكوره للرجيم شجعتيني معك
بس احب الرجيمات مكتوبه مو اختباري

 

[كيكه توفي]

الله يوفقج

 

[اميره الوردى]

هههههههههههههههههههههههههههههه والله انج نكته وباين حبوبه ماشالله عليج يالله ناطره تفاصيلج ترى معتمده عليج مواعيد الدكتور اتطول وانا بسوى نفسج لاتبخلين عليها ونبى صور الحبوب ياحلوه ناطرين جديدج الفنى

 

[الحــــالمة]

موفقة عنيد

واناااااااا بعد برجع للرجيم

بس الالهااااااام للحين ماااااا وصل

 

[الإسراء]

لا يوقف لا يوقف لا يوقف ..
حبيبتي استمري ولا يهزج الأكل موجود ومو هو طاااير ..
والله يوفقج وتصيرين ضعيفووونه واحنا معاج .. يارب ..

 

[ZajiL]

هلا وغلا عنوده
موفقه ياقلبي
بس صج صدمتيني شلون هديتي عمرج جذي
ماعليه الي راح راح واحنا عيال اليوم والي وصلتج 72 قادره يوصلج انزل بعد من جذي
الله يوفقج يارب وتوصلين للوزن المثالي باسرع وقت وتثبتين عليه

 

[eng.zainab]

رد : رجيمي مع د.عبدالله المطوع (13)

مشكوووره حبيبتي على هالمعلومااات الحلوووه...
بس حبيبتي ماعليه طلب ؟؟ بما انج شاطره بحسبة الوجبااات ياليت تحطين لنا تقرير يومي عن وجباتج عشان نقلدج ( طبعااا اذا تقدرين ) راااح اكوون شاكره لج..عالاقل مدة اسبوع نتعلم منج شلون نكون وجباات بهذي السعرات الحراريه ..

ويعطيج ألف عافيه و ان شاءالله تنزلين بصحة وعافيه ياارب

 

[soosa88]

ثااااااااانكس
والله الكل يمدح نظام السعرات
بس خليني بنظام معيين احسسن لي

موفقه خيتوو

 

[عنيّد]

صباح الخير

يسلمكم ربي ع التشجيع الدايم الي احصله منكم :eh_s(7):

قبل لا أرد ع الكل .... احب اوضح شغله وضحتها بالاجزاء الي طافت
أي وحده عندها اي استفسار اتمنى انها تحطه بالموضوع ، عشان الكل يستفيد ، ولان رسايلي مفوله غالبا
واكيد بحاول باااااسرع وقت اني ارد بالموضوع ومن عيوني الثنتين ، يعني خدمة الرسايل مو اسرع

وكالعاده ، بسوي كوبي للمسج الي وصلني واحطه بالموضوع واحط اجابته

.. مرحبا اختي عنيده شلوونج وشلوون الريجيم معااج ..
.. انا من قتره قريت موضوعج عن الدكتور عبدالله المطوع واخذت الرقم من موضوعج واتصل ومحد يرد ثلاث اياام وانا اتصل ومحد يرد اذا عندج رقم ثااني يالية تعطيني واكوون لج شاااكره ... :eh_s(7):

مراحب هلا فيج ، طبعا شي معروف ان عيادة دكتور عبدالله المطوع عسااااره بالرد ع التلفونات
عندهم رقم موبايل للعيادة 99778303 ولكن نفس الشي مايردون على احد ، حتى انا لما باخذ موعد الحل الوحيد اني ادز مسج واكتب اسمي واني اراجع عند الدكتور عبدالله ، والسكرتيره تتصل فيني
فانتي جربي هالطريقه وانشالله تنفع ، او انج تروحين للعيادة وتاخذين موعد

بالتوفيـــق :eh_s(15):

 

[للعلا]

رد : رجيمي مع د.عبدالله المطوع (13)

حبوبه ممكن تحطين صورة الحبوب فيتامين د. ومشكوره على المعلومات الحلوه والله يوفقك دنيا واخره

 

[vooom]

عنيد ماشاءالله عليج وااايد زدتي
عاد انا نفس حالتج وهم اراجع عنده بس مفتشله اروحله تخيلي من شهر 8
وزني يا زاايد 3 كيلو يا نازل 3 كيلو يعني بالحالتييييييييييين ثااااااااابت وشلع قلبي
من الثبات

 

[dl3sl]

قوه حبوبه حبيت اسالج عن اسعاره بالمراجعات وفتح الملف وعنوانه
صارلي شهرين والد مانزل وزني قبل كان وزني 62 الحين 85