راعية سفر؟ تعالي

[miamy]

هاااااااي

شلونكم؟

ابي كل وحده تدخل تحط شنو تاخذ معاها لي سافرت

يعني جم جنطه؟ تاخذ لبس كشخه واللا بس عملي

تاخذ معاها مثلا خواتم ساعات واللا تخاف ينباقون

فلوسج كاش، فيزا، شيكات!


يلا

تفننوا وعطونا رايكم

وفيدونااااااااا

 

[Hello_kitty]

حبيبتي مشكوره خوش موضوع

يعتمد على وين السفره وجم يوم؟؟

اذا بسافر بطول من عشر ايام واكثر

اخذ جنطتين وحده حقي وحده حق زوجي

احط فيها اهدومي واحاول اخلي فيها مكان زايد حق الأشياء اللي بشتريها

واحط داخلها جنطه صغيره للمكياج

وجيس اللي يصير جنه جنطه مال المصبغه حق الملابس الوصخه او اللي استعملناها

واحاول اخفف من الأغراض يعني اخذ معاي جوتي رياضه وانتي بكرامه واحد والا اثنين بس(يعني واحد البسه وواحد بالجنطه)


ما اخذ الا ساعه وحده وتكون سبورت عمليه تناسب كل الألوان

ما اخذ خواتم حتى دبلتي ما البسها

اسحب من الكويت مبلغ صغير يكفيني اول الأيام ميه او ميتين دينار بس

واذا احتجت اكثر ريلي ما يقصر واقدر اسحب من هناك

ما اشيل فيزا وماستر كارد لأن ما عندي

 

[كويتية أصيله]

خوش موضوع

آنا آخذ أربع جناط . وحده حق زوجي وحده حقي وحده بين أعيالي وحده زايده حق الأغراض إللي نشتريهم .آخذ غالبا الملابس الداخليه القديمه علشان أتخلص منهم بالسفر وبالرده أحط أغراض يديده بدالهم .آخذ معاي ساعه وحده ودبله مو ألماص ولا ذهب علشان آنا بالصراحه أخاف من الحراميه.
جوتي رياضه واحد بس إذا كنت في مكان فيه كويتيين أشتري من السوق وألبس على طول .لوووووول
العام رحت أستراليا خذيت معاي:


بنطلونيين جينز\ساعه ذهبيه سواتش\دبله من محل آلدو\8بلايز طويله\ملابس داخليه\5حجابات\ملمع شفايف وآي لاينروكحل\حذاء كروكس ولأن برد كنت ألبس دلاغ معاه\مشط\شامبو\كاميرات\فوط\عيالي كثرت لهم ملابس داخليه علشان ما أحب أغسل\أدويه للحراره للأطفال\جنطه وحده لليد لوي فيتون جينز\ شنطه سوده مذركير علشان اليهال


وفي المطار آخذ معاي شنطه رول كبيره أحط داخلها (شنطه إيدي\الكاميرات\الجوازات\ألوان وكراسات وقصص للأطفال\سناكس للأطفال\مناديل ديتول )علشان آنا وايد أرتبك بالسفر فأحب أني أكون مركزه يعني تركيزي بالمطارات على شنطه وحده بس...

أكون صارفه من المطار حوالي 400 دينار 200 في الشنطه و200 في بنطلوني الجينز (تحسبا لسرقه)وآخذ معاي الفيزا للتسوق ...وشكرا

 

[May81]

موضوع حلو :ggdw:

انا اخذ شنطتين متوسطين .. واحط لي تقريبا شنطتين من اللي يتصفطون داخلها عشان حق الاغراض بعدين _03BA:
اهم شيء اني احط ملابس نوم خفاف وفوط اللي ابي اتخلص منهم يعني عشان بالرده اقطهم اهناك .. وماأكثر بالملابس لاني احط في باللي اني راح اشتري اشياء يديده من اهناك والبسهم .. حق اعيالي بعد نفس الشيء اقسم اغراضهم بين الشنطتين اللي معاي وللنوم اخذ اللي مستهلكين عشان اتخلص منهم بالرده هذا اهم شيء بالنسبه لي ...
ثاني شيء حدي متوهقه هلمره لان ولدي صغير ويشرب حليب بورده الخاص بالاطفال فلازم يبيلي اخذ معاي ماادري جم علبه لان اهناك حليبهم يختلف اخاف اذا جربه مايحبه و اتوهف ..:tomato2:

باالنسبه حق الملابس فبحسب المناطق اللي بتروحين لها طبعا اوروبا تعب لازم تكشخين لان الناس طالعني واطالعك و الواحد مايبي يصير قاصر جدام احد :eh_s(14): وهذا السبب مايحببني باوروبا :cxxxp: اذا فكرت اروح لها مره ثانيه مابروح بالصيف... اما امريكا لو تطلعين ابجامه ماحد درى عنج:ggdw: اييييييييييه على امريكا...
الساعات العمليه اريح قلب حق السفر يعني لو ضاعت او انباقت مايعورج قلبج ... وانا بالنسبه لي لازم كاش + بطاقه لان تحتاجين في الاماكن لصغير والمطاعم السريع كاش اما البطاقه فهيا للتسوق _03BA:​

 

[Hambka Q8]

انا اسافر و يا امي و خواتي

وطبعا كل وحده لها جنطتها

و نودي ويانا جنطتين هاند باج كبار

و اذا كان في ترانزيت اودي وياي جنطه سحب و احط فيها البجامه و الملابس الداخليه حقي و حق امي
(خواتي مالي شغل فيهم خخخخ)






3 بنطلونات (بنطلون واحد و 2 برمودا)
تي شيرت وحده
3 بلوزات عاديه
جاكيت جينز
جاكيت مال تريننج
نفنوف
بلوفر (اذا كنا رايحين مكان بارد او فيه ثلج)
بجامتين للنوم (يكونون قدم عشان اقطهم عقب)
ملابس داخليه (لازم قدم عشان اقطهم بعد ;p)
جوتي رياضه
صندل
جنطين (وحده اكون لابستها من الكويت و الثانيه بالجنطه)
جنطه حق الرحلات تكون (Cross)
نظاره شمسيه
اكسسوارت (اساور و تراجي)
ساعه (سواتش فضيه)








الفلوس:
كاش (صارفه من الكويت)
+
فيزا

 

[أمانيQ8]

اممممممم
اولا اودي حق كل واحد فينا جنطه طبعا بناتي 3الله يحفظهم وياااااااااااااااااااكثر اهدومهم وزوجي يتحلطم من المطار كسرتي ظهري وذبحتينا بالهدوم قصده الشيل والحط مو الحجي مايسفرنا الا دول اجنبيه وماكو عمال بالمطار فاياكلها خنت حيلي
المهم
اليهال كل وحده جاكيت ثقيل والباجي اشياء عمليه طبعا الكبيره تاخذلابتوبها الثانيه تاخذ السكيتي رول والثالثه الجيم بوي او الدي في دي والجواتي الله يعزكم اثنين رياضه وواحد صندل
،،،،،،،،،،،،،،،،،،،،،،،،،،،،،،،،،،،،،،،
الحجي اخذ له مكينة حلاقه .... اي ذكرتوني مره وديييت المكينه مو ماوديتها بس اهم شي اني ناسيه الشاحن لووووووووووووول -واخذ يعني عدة الحلاقه الخاصه فيه والديودرنت وعطرين وساعتين وحده سبورت ووحده عاديه وجوتي رياضه وجوتي رسمي...واملابس الداخليه اكيد وااايد وبصراحه لبسه الخارجي كيفه اهو ينقي انا بس اصفط بالجنه وليتني اصفط عدل اسوي الهدوم بالجنطه جنهم جبل
ــــــــــــــــــــــــــ
آآآآآآآآآآآآآآآآآنا الداهيه العوده اثقل جنطه جنطتي
احط 3جينزات وقمصان وبلايز واخم كل الحجابات الي بالكبت وانا تدرون اموووت اذا ماكشخت فا اخذ معاي بدلتين كشخه احتياط...لان ساعات نتعشى بره انا وزوجي عقب ما انيم اليهال عرفتوا طبعا احب الكعب اخذ جواتي رياضه من السالميه فيهم كعب واخفاااااف وشكلهم حلو ماجنه لابسه شي بريولج
اخذ جنطتين ايد
ـــــــــــــــــــــــــــــــــــــــــــــــ
استشوار
مكياج للنهار ولليل (مو اقولكم بلوه)
مزيل مكياج للوجه والعين
عطرين ديودرنت بودر فاااازلين حق البوزليغه
ساعه وحده
نظارة الشمس ونظارة العميان
شااامبو وبلسم حق الكل
ادلاغات شفاف ورياضه
ملابس داخليه اقصد الغيارات بالذات اخذ ارخاص استخدم وقط لاغسيل ولاغيره
معجون اسنان
ثوب الصلاة وسياده
كلونية ام بنت عشان حق الفرش
كلينكسات ديتول
ورق اللي ينفرش الله يعزكم على المرحاض حق ااماكن العامه بالجمعيات امكود
اوتي صغير للضروره
ـــــــــــــــــــــــــــــــــــــــــــــــــــــــــــــــــــ
طبعا ان مر علي اسبوع اهناك راح يرجع يطلع شعر ويهي اللي حافته قبل السفر عاد انا لقيت حل

(اكسجييييييييين)اودي معاي متى ماطلع احط واشقر والشوارب اخذ لهم شمع من الجمعيه شفتوا؟؟؟ اشلون
يعد ملقط احتياط
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الأدويه
حق اليهال .. دوا الترجيع وانتوا بكرامه
زرتك للنشله
ادول خافظ حراره
كريم فنستيل مال اللسعات والبق
الفاكورت حق اي نفره ولا حبه ولاحساسيه في الجلد
مسكن الام بروفينال
مضاد حيوي المعروف ومشهور عندنا
ــــــــــــــــــــــــــــــــــــــــــــــــــــــــــــــــــــ
هم آآآآآآآآآآآآآآآآآآآآآآآنا
بونستان اقوى مسكن لان ضروسي تتسلط علي بالسفر
غسول للمناطق الحميمه
مضاد حيوي
كريم للاتهابات النسائيه ولإلتهابات البول امكرمين لان انا فظيعه بالالتهابات بسرعه اتأثر وكل سفره اكلها
واخذ تحاميل مهبليه
//////////////////////////////////////
الحجي
كريم عضلات او كريم مسكن
بندول
فيتامين سي
//////////////////////////////////////م
الكاميرات طبعا



بالنسبه حق الفلوس ما اخلي معاي شي كله عنده لاني اضيع وايد
ناخذ كاش وفيزا

وان تذكرت شي بعد برجع احطه
ياااااااااااكثر ماقرقت

 

[miamy]

يا حلوكم والله

ويا حلو مروركم

امااااااااااااااني لوووووووووووووووووووووول

ماخليتي شي، يحليلج

"بس عجبتيني حريصه"

كيدي عظيم، كويتيه اصيله، مي(سميتي)، همبكه

ماااااااا قصرتوا

والله افكاركم حلوه



ياللللللله اللي بعدو....

والله ترا مرات اضافه وحده تفيدين كويتيات واااايد

كويتيات ناطرتكممممممممم

 

[أم صالح]

انا عيل غيير .... مااحب تكود الجناط والخمشره والجواتي والقش بس هالمره غصبن علي بكود اعيالي ثلاثه كلهم باخذهم يعني الصغير لازم عربانه وهذا الهم الاول ماني عارفه ادخلها الطياره عشان استعملها بالمطار ولا اخليها مع القش .

ثانيا بروح مناطق بارده وفيها مطر يعني لازم اكثر ملابس حق اليهال

المهم باخذ 3اجناط وحده حقي انا وريلي (كبيره )
وحده كبيره حق اليهال
وحده حق ولدي الصغير فيها هدومه وبامبرز

هاند باق بحط فيها الجواتي صنادل حق اليهال كل واحد واحد ويروحون بجواتي الرياضه وجوتي رياضه حقي وحق ريلي

انا بحط لي 2جينز و4قمصان وجاكيت وملابس داخليه وجنطة المكياج والكريمات والمشط والسشوار والفوطه وسياده صلاة الصغيره وثوب صلاة وديودرنت وعطر وادويه الصداع والحبوب المانع ....ضروري وجم لفه عمليه

ريلي سهل ترينغات لازم رمادي وكحلي واسود وتي شيرتات 2 وجاكيت وعطر والساعة اللي يروح فيها ومشط ومكينه حلاقه وجل الشعر اوكريم \\

اليهال بس ملابسهم وبجامات وملابس داخليه ولازم شويه بسكوت وكاكاو وبطاط وجبن قلاص كرافت وانا لازم اخذ معاي علبه شاي ليبتون واخذمعاي قفاش وقلاصات وصحون بلاستيك لاني اقعد بشقق فندقيه ومدمنه شاي ونسكافيه واعيالي يبون حليب مالهم الا الكرنيشن

لازم اخذ الوان وكراسات والقيم بوي اتلهيهم عن الحنه وادول للحراره


ونسيت اقول انا ساعات ماكو مزاج الصبح نطلع نتريق او نكون حاجزين رحلات الصبح نتريق بالشقه اخذ معاي من الكويت
معلبات خفيفه مثل الفول والحمص وجيسين خبز حق اول يوم ولا وصلنا ناخذ بيض وزيت وملح من هناك

وبس اذا ذكرت شي ارد اكتب لكم

باي

 

[miamy]

ام صالح انا نفسج عندي بيبي عمره سنه

اللا يا كثر قشششششه والعربانه واللويه، انا اعتقد العربانه يفضل تكون بالطياره معاج عشان بالمطارما تتعبين

وصج صج ذكرتيني بحبوب المااااااااااانع (يعطيج العافيه)

انزين قوليلي وين بتروحون انشاءلله

 

[دمـوع الشـموع]

انا يوم ولدي صغير كنت اخاذ 3 شنط
وحده لي
وحده لولدي( عشان ملابسه والبامبرز والحليب والاكل ) بس الان كبر
وحده لزوجي

على حسب طول السفره

اخذ شنطتين

وحده لي ولودي
وحده للزوجي
وممكن اضيف شوية اغراض بشنطة زوجي

اما عن المحتويات

على حسب الديره
اذا الخليج والدول العربيه والمسلمة عبايتي اللي علي وعباية ثانية بالشنطه وملابس مريحه
واذا امريكا اخذ كم بلوزه طويلة يمكن 7 وكم بنطلون مريح ويكون واسع وحجابات ملونه

ملابس ولدي على حسب الديره اذا بنروح برد او حر
شنطة صغيره فيها العناية الشخصيه من شامبو - كريم - واقي شمس - مزيل العرق - عطر صغير - كحل وروج ( ماحب اكثر مكياج لاني ماحط بالطلعه ) فرشاة شعر وكم ربطة للشعر
فوطة لي لاني مااقبل حق الفنادق مهما كان نظيف وفوطه لولدي

طبعا الاحتياط واجب الفوط الصحيه

احط شنط اللي تكون من قماش وحده داخل شنطتي ووحده داخل شنطة زوجي عشان استفيد منهم بالاشياء اللي اشتريها

اكياس

المجوهرات ماحب اخذ او البس شي هناك عشان بصراحه اخاف
والساعه تكفي ساعة الجوال

طبعا شاحن للجوال

شنطة ثانيه للادويه ( مسكن - مضاد - دواء زكام - دوا للغثيان والدوار - مسحات طبيه - بلاستر - شاش طبي - مسكن للعضلات )

وناخذ عربيه لولدي بس انا اشتلايت وحد خاصه بالسفر من النوع الخفيف الي اذا سفطتيها تكون صغيره ونحيفه

بالطيارة ( لاب توب - شنطة صغيره فيها الفلوس - الجوال
شنطة لولدي فيها ملابس وغيارات واكل ودوا الكحه عشان ينام ولعبة مفضله له

 

[أمانيQ8]

ام صالح العربانه اذا تروح مع الشحن اريح لج واااايد

بس اذا انتي تعتمدين عليها خليها بالطياره اذا بتنزلون اترانزيت عادي المضيفه تاخذها منج اتخشها لج بالغرفه عندهم والله انا اول كنت اخذها بس الحين قمت اوديها شحن على قولة ريلي بلشتينا بأغراضج وحوستج وبصراحه هالمره مااااالي خلق احد يتنرفز علي ...

ملاحظه
خلي العربانه تكون من النوع الخفيف يعني سهله بالتسكر او التصفط لان عربانتي انا يايبتها من استراليا ام 3تواير الله لايوريج اشكبرها علللللللللللللللللللله وثقيله وفوق هذا اهناك بالتاكسي يقولون لنا مايصير6اشخاص يركبون انقولو لهم احنا خمس!! يقول اي العربانه نحسبها شخص سادس!! الحمدلله والشكر
عاد بس شريت عربانه قويه بس خفيفه وبسهوله تتسكر مايحتاج اجندس واتبهذل واحجابي يطيح واسحب فيه لووووووووووووووووووووووووووووووووول واي ويع ويع مابي اتذكر

 

[بنت العز والدلال]

مشكورين صراحة استفدت بس عندي سؤال الاب توب شسوي فية بالطيارة عندهم واير لس ولا شنو؟؟
جنة شقلة اغراض عالفاضي!!

 

[أم صالح]

مشكوره اماني عالنصيحه انا فعلا عندي خفيفه مالت مذركير اللي تتسفط بس جني بوديها بالشحن مع الشنط احسن وعلى قولتج العربانه الكبيره اذيه العام وحده جدامنا بلندن مشى عنها القطار وزوجها وولدها داخل مالحقت بسبب العربانه

 

[لوباساج]

والله وايد استفد منكم بنات بس انا قضيت نص عمري بالسفر مطار يشيلنى ومطار يحطنى من ايام ماكنت ادرس فى امريكا قبل الف سنه وتوصلت الى طريقه سهله وهى عمل لسته بالاغراض اللى تاخذينها للسفر وهاذى اللسته دايما تتغير حتى ترسين عليها وانا احتجت كذا سفره ليمن استقريت على لسته مكونه من 36 شغله اخذها معاى طبعا للسفره الطويله والغى منها شغلات اذا السفره قصيره وهى مكتوبه عندى فى ورقه لا استغنى عنها اما الفلوس فاخذ كاش والكروت...............وسفره سعيده

 

[manoola]

انا مادري احب اعيش نفس الديرة اللي رايحة لهاا يعني اوروبا مااحوس عند الخليجيين ويييع ابي النحشه منهم اختلط مع الاجانب ف تشوفين اخذ جم جينز وبرمودات وثري كوارترات وبديات يعني خفاف وجوتي رياضه نايس ونظارة شمسيه وماسكرا وغلوس واذا اشتهيت شهوة اكشخ اشتري من هناك شي والبسه عشان احب استانس مو اروح اتكشخ واترزز ماجتي سافرت @@ نفس اللي اشوفهم بالكافيهات بسويسرا امبيه اممممممممممم جنهم بالصالحيه يعني اخواناا الخليجيين نقول ماعليه مساكين يدد باللبس والتكشخ بس الكويتيين يعني المهم حلو تعيشين مرتاحه برة ولويه وحوسه وااااااااااااااي عورتوا قلبي متى يدخل شهر 7 المهم اما بالدول العربيه لا لازم اكشخ واتلبس لان العرب غير لووووووووووول نحب الكشخه مو عمليين نفس الاجانب
والملابس الداخليه كلها اللي مابيها اخذهاا عشان تنقط مع الفوط لوووووووووول تحسون الكويتيين كلهم نفس الحركات والماكينه وموس
وسلامتكم

لوسمحتي في وحده قالت تاخذ معاها دبله من الدو ممكن اعرف ليش دبله من الدو محيرتني السالفه !

 

[lolly]

لووووول .. مأذين الريل بالاغراض
انا جنطة كبيرة فاضية فيها بلوزتين وبنطلونين وملابس داخلية وفوطة وملابس ريلي نفس الشي يعني فاضية .. اروح هناك البس ومصبغة..
وهاند باك فيها عدة السفر من فرشة اسنان وصابون وعطورات ومكياج كله ميني خاص بالسفر .. وفيها غيار لي ولريلي اذا ترانزيت او ضمان لاي شي يصير مع قصة لي وكتاب لريلي.

اما الادوية ما انصح احد ياخذها لان يتغير طعمها من الطياره عن تجربة .. اذا ابي شي اشتري من الصيدلية كل اللي احتاجه.. وانشاء الله محد يحتاج شي ..
والكاميرا احطها بجنطتي العادية ويكون حجمها شوي كبير مو وايد يعني تكفي اغراضي .. وسلامتكم

 

[miamy]

لوسمحتي في وحده قالت تاخذ معاها دبله من الدو ممكن اعرف ليش دبله من الدو محيرتني السالفه !

ما نبيج محتاره

عشان جذي فكرتلج...

يمكن عشان اذا ضاعت واللا نستها تكرمين بحمام او مكان ماتتحسف عليها


(اعتقد جذي)

ويمكن اهيا من النوع اللي ما تحب ايدها خاليه

 

[miamy]

ام صالح العربانه اذا تروح مع الشحن اريح لج واااايد



ملاحظه
اهناك بالتاكسي يقولون لنا مايصير6اشخاص يركبون انقولو لهم احنا خمس!! يقول اي العربانه نحسبها شخص سادس!! الحمدلله والشكر

اماني .. ما تحتاجين العربانه بالطياره؟؟ سؤال وجيه علشان اعرف اشحنها واللا اخليها معاي

اما سالفه التاكسي وااااايد ضحكتيني

هذا يمكن لأن عربانتج وااااااايد عوده!!

 

[miamy]

اما الادوية ما انصح احد ياخذها لان يتغير طعمها من الطياره عن تجربة .. اذا ابي شي اشتري من الصيدلية

انتي متأكده؟؟

انزين مفعولها يتغبر واللا هذا اهو؟

 

[miamy]

والله وايد استفد منكم بنات بس انا قضيت نص عمري بالسفر مطار يشيلنى ومطار يحطنى من ايام ماكنت ادرس فى امريكا قبل الف سنه وتوصلت الى طريقه سهله وهى عمل لسته بالاغراض اللى تاخذينها للسفر وهاذى اللسته دايما تتغير حتى ترسين عليها وانا احتجت كذا سفره ليمن استقريت على لسته مكونه من 36 شغله اخذها معاى طبعا للسفره الطويله والغى منها شغلات اذا السفره قصيره وهى مكتوبه عندى فى ورقه لا استغنى عنها اما الفلوس فاخذ كاش والكروت...............وسفره سعيده

نبي اللسته

ممكن؟