الحمدلله على سلامتج مذهله
وشلونج ان شاء الله طيبه
وشلون كل البنات المتكمكمات
والمتكمكمات المستقبليات
بنصحكم بكذا نصيحة
وما ابي منكم الا الدعا
انا صار لي ٩ شهور من سويت العملية
كنت ١٠٩ و صرت ما شاء الله ٧٥
طولي ١٥٧
كنت احلم بهذا الوزن حلم
واصبح حقيقة ولله الحمد والشكر
اول شهرين نزلت تقريبا ١٢ كيلو
سويت فيلرز حق خطين الحزن على قولتم
الخطين اللي بين الانف والخد
وطقيت بوتكس لرفع الحواجب نسبه بسيطة
فوق منتصف الحاجب و بطرف الحاجب الخارجي
يعني يفتح شوي العين
تعدل وترتب شكل وجهي ولا كإني ضعفت
بس جسمي ضعف
بمعنى ان ما بين علي علامات الذبول والنحول
صرت احلى وبينت ملامحي اجمل
بعد هذا اللي سويته ب خمس شهور
ضعفت تقريبا ١٤ كيلو
يعني المجموع من بدايه العمليه صار ٢٦ ميلو
ورجعت سويت فيلرز لخطوط الحزن وبوتكس للحواجب خفيف
تغيرت حيل وترتب وجهي
مع انه ماكان باين عليه التعب لاني كنت قبل فتره مضبطته بفيلرز
لكن صار ارتب واجمل ومرتاح اكثر
الحين صار لي من سويت فيلرز اخر مره تقريبا اربع شهور
ونازله تقريبا سته كيلو عن اخر مره ف مومبين علي التعب الحمدلله
وقبل العيد برد اسوي اذا احتجت
خلاصة الكلام ان لا تنطرون تنزلون كمية كبيره مره وحده
وبعدين ترتبون وجهكم بالفيلرز
خليكن اول باول لانه يكون افضل وطبيعي
وطول فتره نزولكم تكونون مرتاحين وشكلكم حلو
والكميه اللي يحقنونكم فيها تكون قليلة
والوجه يكون مرتاح ولا يترهل
مايمديه ينزل وترفعينه وتعبينه
طبعا انا ما اتكلم عن الخدود او حقن الخدود
انا اتكلم عن خطين الحزن اللي بين الانف والخد
مجرد ما تعبينهم بالمواد المالئة "فيلرز" طبعا لازم تكون المادة مؤقته "احماض الفواكة"
مجرد ما تعبينهم ماراح يطيح الخد ويسيح ويصير شكله موحلو
يعني تعبين الخطين .. (ينسمت) الخد يعني يشد
بعدين عاد لا ضعفتي ووقف وزنج وثبت على الوزن النهائي
وحابه تتفخين خدودج هذا شي ثاني وبراحتج
الاهم ان توصلين للنهاية بوجه غير مترهل وظبيعي غير مجهد
تبين تتفخين خدود والا شفايف والا تشيلين ليزر عاد هذا شي راجع لج
وشغله ثانية مهمه
اكلوا روب يوميا اما علبه او علبتين
لانه مكثف في التغذية
وفيه فيتامين د للعظام
وحبه تمره يوميا لا تنسونها
والماي هو المسئول الاول عن نزول الوزن
لان الخلايا الدهنيه اللي تفتتت وتبي تطلع من الجسم
تبي ماي يغسلها ويشيلها ويطلعها من الجسم
بدون الماي ماراح تنزلون وراح تتعبون الكلى والكبد
لازم تتغصبون على الماي
لانه مهم جدا جدا
داخليا وخارجيا
والحبوب اللي حق الشعر ( برايورين )
اخذو حبتين يوميا مو حبه وحده
انا من بديت اخذ حبتين يوميا خف التساقط
الحين باقي لي بضبغ شعري واقصه
عاد ابي نصايحكم
وين وعند منو وشنو اخر الالوان والقصات
