دوانيه شلة منتظرات نتيجه عملية اطفال الانابيب والحقن المجهري

[كتكوته22]

واجد تعبت

لا أكل نفس العالم

لا تسبوح

لا حياة


تعبت واااااجد

وياريت ظليت على ما إني عليه في وظيفتي وحياتي وما رجعت فكرت في هالموضوع مره ثانية

لا لا تقولين جذي بعدين صج نتحسف لان يطوف العمر وفرصنا تقل الحمدلله ان نقدر نسويها لا نضيع سنين عمرنا بعدين نندم حتى الحين ريحي شهر شهرين وردي سويها لا توقفين والله اعرف ناس شخصيا عقب المحاوله السادسة ولا السابعه ولا الثامنة ليمن الله رزقهم وعوض صبرهم الله يمسح على صدرج وقلبج ويبرد قلبج ويرزقج بتوائم تذكرين فيهم هذي الأيام الهي اميييين
حطي بالج شغله ان الله مبتليج لان يحبج ويبي يشوف مدى صبرج وصدقيني ما بعد الضيق الا الفرج الله يفرجها عليج دنيا وآخره ويرزقج بالذريه الصالحه الباره الي تشيلج يارب

 

[ماي الورد]

صدمتيني الصراااحه لكن الحمدلله ع كل حال

كلنا مرينا بهالتجربه وشفنا الدنيا صغيره بعيوننا ربج كريم وبيبرد عليج ان شاءالله والاخيره ثابته باذن لله

مره ثانيه رجعي 3 اجنه بس يكفو نسبته نجاحها تكون اكبر ان شاءالله

 

[ملاك صغيرون]

كلش تعبت يا كتكوته...
وأني مو واجد متأثرة أن ما عندي عيال

بس فكرت قلت يمكن أيجي شي جديد في حياتي يغيرها ويضيف لها

لكن بصراحه كل مره أتعالج فيها تنتكس حياتي وحتى الأشياء الزينه فيها أكرهها

وبصراحه صبرت صبر
والكل يقول أدعي ونذري وسوي كأني ما دعيت ولا نذرت ولا ولا

والله أني أحرم روحي من كل شي عشان هالحمل

وآخر شي صدمه.. لدرجة حتى الدوام ما أعرف اشلون برجع بعد الإجازة
خصوصاً وظيفتي يبغي لها تركيز وقوة

 

[ملاك صغيرون]

هلا ماي ورد

الحمدلله على كل حال

ما بيدنا شي...الله كريم

خلاص ما أفكر أعيدها

 

[ملاك صغيرون]

واجد حزينه ودمعتي كل لحظة على خدي بدون ما أقصد...

ليش يعني تفشل كل شي تحذرت منه

 

[كتكوته22]

حبيبتي تعوذي من ابليس شي طبيعي الي الحين تحسين فيه وكلنا مرينا فيه ونتألم ونموت بداخلنا مليووووون مره بس لازم نكمل طريجنا ونعيد ونعيد لمن تضبط حطي بالج ان رب العالمين يبيلج الاحسن مو قاسملج الحين وراح يرزقج بالوقت الي اهو قاسملج فيه احنا نسوي كل الي علينا والباجي بيد رب العالمين واهو ارحم الراحمين مالومج انا ثلاث عمليات فشلت احس اشوف الدنيا سووووده بعيوني اكره كل شي كل شي بس ما أوقف لا لازم أسعى وأسعى لمن الله يقسملي الحين ريحي نفسج ويايلنا رمضان شهر الخير تدعين فيه والله مارح يردج خايبه صدقيني ويجبر بخاطرج الهي امين اذا عندج مجمد عيديها بعد رمضان على طول لا تخلين فجه والله تتحسفين بعدين اخذيها نصيحه من اخت خليت فجه 6 سنوات والحين ندمانه حييل عسى الله يبرد قلبج ويرزقج من أوسع ابوابه الهي امين شوفي موضوع بالصفحه الاولى اسمه واخيرا تحقق الحلم رفعته قبل جم يوم شوفيها عقب 7محاولات الثامنه نجحت ويابت توم بنت ولد الله عِوَض صبرها بعد 14 سنه الله يرزقج يارب بتوم الي يملون حياتج كلها يارب والله ادعيلج وحق كل خواتي من كل قلبي

 

[كتكوته22]

جم عمرج ملاك حبيبتي اذا مافي احراج

 

[ملاك صغيرون]

هلا كتكوته

عمري ٣٦

 

[mraamy]

ملاك صغيرون
الحمدلله الذي لايحمد على مكروه سواه خلي ايمانج بالله قوي
كلنا نتمنى الياهل وشي يديد بحياتنا يفرحنا وماراح نيأس
رحمة الله واسعه وطول ما احنا فينا حيل بنعيدها مره واثنين وثلاثه و١٠
وثقي ان ربج مايمنع عنج الخير وراح يعطيج الاحسن بالوقت المناسب
والله يرزقنا يارب كلنا وكل من تتمنى الياهل
وسعي صدرج وثقي ان ربج بيرزقج لو بجنين واحد مرجعته مو ٤

 

[mraamy]

شرايكم كلنا نراجع ورا رمضان ونعيدها ويارب مثل ماكلنا هالمره سلبي
نطلع كلنا حوامل يارب وننتقل حق تجمع ثاني مع بعض
خلكم متفائلين نفسي�� كل شي من ربي راضيه فيه
الحمدلله

 

[ماي الورد]

ملاااك يمكن تبين لج ممرخه

اعرف وحده 11 سنه ماحملت سوت اشكثر عمليات وتفشل في الاخير وحده وصفتها ع معالجه بالاعشاب وراحت مسكينه عندها قالت لها مستحيل تحملين مهما سويتي لين تتمرخين وعطتها اعشاب اول شهر جاتها الدوره وثاني شهر انتظرتها وماجاتها راحت حللت وطلعت حامل الحين جابت اول ولد وثاني ولد

وانتي لاتياسين

 

[ملاك صغيرون]

الحمدلله

ترى مو متشائمة

بس صدقوني ألي مسوي عملية فاشلة غير ألي مسوي أربع فاشلين

 

[ماي الورد]

انا قطيت المجمد رغم ان دكتوري زعل وقالي فكري يمكن تتراجعين قلت له خلاص والحين تندمت خاطري اجيب ياهل وماعندي المقدره اعيد كل شي من اول وجديد

مرامي وكتكوته وملاااك عيدوها وربي يخليني اسمع اخبار حلوة عنكم

 

[ماي الورد]

انا سويت 2 فاشلات

نفسيتي تعبت وكرهت نفسي خصوصا ف الاخيره لان ما كان معاي مجمد خلصو لازم ارجع اعيد كل شي

 

[ملاك صغيرون]

تمرخت أكثر من مره

لكن إني في الأساس بعد العملية الأولى والثانية شالوا مني قنوات فالوب

يعني طبياً بغير طفل الأنابيب ما أحمل


القهر إني كنت سليمة بداية العلاجات ومن بدأت العمليات بدأت الكوارث

ليمن الحين ما يصير الحمل إلا بالأنابيب
...
الله كريم
والحمدلله

 

[ملاك صغيرون]

وأني ولا مره كان عندي مجمد

يعني كل مره تعب المشوار كله

 

[ماي الورد]

بس الي سمعته انه بطلو يرجعو اكثر من 3 اجنه اقصى حد 3 بس

 

[ملاك صغيرون]

ما أفكر أعيدها
يمكن لين كلش انفجعت على الأطفال بعد سنه

بصراحه الموضوع ما كان في بالي ولا كنت حابه أسوي العملية بس أختي أصرت عليي

شان أسوي عمليتين ورى بعض

ههههههههه

جنون

 

[ماي الورد]

مشكله هالعمليات مخاسيرها وااايد

يارب تلقين دكتور شاطر وتتعالجين عنده بدون عمليات

 

[ملاك صغيرون]

ترى وأفكار متضاربة

لدرجة كثر ما أبين لكم أني خلاص ما بعيد هالقصة

كلمت دكتورتي وبعد يومين عندي موعد

واحتمال أعيدها

دام عندي شهر ونص إجازة