دوانيه شلة منتظرات نتيجه عملية اطفال الانابيب والحقن المجهري

[ورد ياسمين]

ماي الورد هاذي اول مرة تسوينها

 

[ثنايا الورد]

انا بخير احلامي عاد تصدقين مو حاسة اني حامل ماغير عوار الظهر حييييييييييييل قوي
واغلب اوقاتي منسدحه وانتي يري يهونها عليج لحظات الانتظار هذي صعبة بس معليش
نصبر ونتحمل وربي ماراح يضيع صبرج حبيبتي
ماي الورد طمنينا عليج يقلبي ذكرتج بعوار الظهر والله بس عشان البيبي نتحمل مو؟
وهم اختنا سمسومه وينها؟؟؟مالها حس؟
ورد ياسمين الفال لج عزيزتي

 

[الفريده]

انا سويت انابيب اول مره حملت وبعد شهرين وقف النبض واضريت اجهضه والحين ثاني مره من الأجنه المفرزنه وباجر تحليلي ونفسيتى حييييل تعبانه والله كريم

 

[احلامي الامومه]

انشالله تفرحين وتفرحينا الفريده ثانيا والله لما قريت مشاركتج بجيت ودعيت بالمطر لي ولج وحق كل البنات الله يسترها معانا يارب

 

[ورد ياسمين]

السلام عليكم
سويتها 6 مرات اول 3 مرات مافي حمل في طيبه وبعدين رحت مستشفى لندن من اول مره رزقني بتوام وبعدين بعدها سويتها مرتين الاولي مافي حمل والثانيه حملت بس بعد ثلاث اشهر توفى الجنين والحمدالله علي كل شي

 

[احلامي الامومه]

بنات اشلونكم انا اليوم نفس الوضع وعوار ظهر نفس عوار الدوره وانتو شنو الاخبار

 

[سمسومه الحبوبه]

مساكم الله بالخير شخباركم حبايبي
يقولون عندكم امطار عليكم بالعافيه حبايبي عقبالنا

ثنايا بعد قلبي جعل ربي يتمم لك على خير
امس واليوم لاهيه شوي مع بنتي سخونه واستفراغ تكرمون بس الحمدلله الحين احسن
يالله ياكريم تعطيني وتعطي كل من تمنى الذريه الصالحه المتعافيه انك على كل شي قدير

بنات بسألكم عن الإبر التحضيريه لازم في لحقن ووش وظيفتها وكم مدتها

 

[ورد ياسمين]

السلام عليكم بنات شلونكم
ماتشوف شر ابنيتج وما عندي فكره عن الابرواذا نفس الابر اللي اخذتهم مدتهم 21 يوم اللي هم بالفخذ

 

[احلامي الامومه]

اخييييي عوار الدوره بظهري وبطني يالله سترك

 

[ماي الورد]

هلا والملة بنات اي أنا جربتها ثلاث مرات مرتين عند حازم الرميح وفشلت وهويتها عند أسامه صالحه ايام ما كان في دار شفا ورب العالمين كرمين بولد عمره سنة ونص والحين عند توكسون والملة كريم بس احس نفسي تعب انه خمول فيني. أحلامي ما علوج خوف يا قلبي تحملي اشوي وربج كريم

 

[ورد ياسمين]

ماي الورد الله يرزقج ان شاء الله وتجيبين اخت او اخو لولدج والله كريم
احلام الامومه لاتفكرين واجد وخلي ايمانج بربج وادعيه باليوم هذا انه سميع الدعاء وان شاء الله تبشرينا بالحمال اللهم امين

 

[ماي الورد]

ورد مساج الله بالنور. شخبارك ايش عامله

 

[المشاعرالصامتة]

السلام عليكم شخباركم حبيت اقولكم ان اليوم تم سحب البويضات يسلام ولله الحمد والمنهه بس المشكله يوم طلعت من المشتشفي دقت علي الدكتوره وقالتلي اجيها بعد يومين تشيك علي بطانة الرحم تقولي ان بطانة الرحم مو ذاك الزود ومو عاجبتها بسبب الافرازات البنيه اللي تنزل معاي وعطتني حبوب تعدلها وتقول نشوف هاليومين اذا مافيه تحسن بناجل الشهر الجاي والصراحه قمت احاتي وشلت هم بس الحمدلله علي كل شي والله الموفق ابي رايكم حبيباتي والله يتم علينا بالحمل السليم 

 

[نكهةالبرتقال]

السلام عليكم بنات شلونكم

بنات كالعادة اليوم نزلت علي الدورة ، و أنا صارلي 3سنين و نص أنطر الحمل

ماتدرون شلون أقعد بحالة حيرة إذا نزلت الدورة ، راسي أحسه بينفجر ، و أقعد أفكر و أفكر

و أقول لو تكيس عندي أعالجه ، لو ضعف عند زوجي يعالجه ، لو ضعف تبويض أعالجه

لكن المشكلة إن ولا شي


ماكو شي يمنع الحمل
البويضة مهيأة و اللرحم زين و كل شي يبشر بالحمل
آخر شي تنزل الدورة

مادري ما قدر اوصف اللوعة و الحزن اللي تجتاحني

لكن ما قول إلا الله كريم
الله كريم

 

[نكهةالبرتقال]

بنات تقهون أقدم على الحقن المجهري

المشكلة أن انا افكر ، اقول اذا ما الله مو كاتب لي طبيعي رغم توافر الظروف ، شلون بصير حمل مع المجهري، ممكن يفشل

احس شي له علاقة برزقي الخاص، يعني اذا الله مو كاتب ، حتى المجهري ماراح ينفع

و اذا الله كاتب ، ممكن أحمل طبيعي و ما احتاج المجهري

 

[نكهةالبرتقال]

صباح الخير
صباح التفاؤل بالله
صباح الثقه بالله
صباح المعنويات المرتفعه
امس زرت حماتي نفاس جلست ١٦سنه تحمل وتسقط
والحمدلله ربي رزقها ببنت قبل سنتين وألحين توها جايبه بنوته ثانيه
ماشاءالله تبارك الرحمن الله يحفظهم لها ويرزقنا
في شغله استفدتها من حالتها طبعا كل شي بيد الله اذكر اول لما تحمل ماتتحرك على طول راااااحه تاااااامه ومسكينه شهر ونص شهرين وتسقط بس يوم حمالها في البنيه الأوله والثانيه عادي تطلع وتتحرك بس على الخفيف وتحظر جمعات اهلها وتتسدح اذا تعبت من القعده والحمدلله
اتوقع ان الجلسه تأثر على النفسيه فتتأثر الحاله الصحيه

ماشا الله الحمد لله عل البلاغ ، الله يرزقها بالولد الصالح

و يرزقج يا سمسومة الغالية


و الكل يارب

 

[احلامي الامومه]

نكهة البرتقال اشلونج انا نفسً تفكيرج بس اقول في بنات وايد الله رزقهم بالحقن اذا كان هذا الامل ليشً مانسويه

 

[سمسومه الحبوبه]

مساء الخير
نكهة برتقال جربتي حبيبتي الرقيه الشرعيه انتي وزوجك
انتي أرقي نفسك وارقي زوجك

أنا احس بشي غريب من بدينا علاج وزوجي كل ماجاء موعدنا تجيه إنفلونزا حاده وحراره ولازم ياخذ مضاد وادويه وطبعا هو ياخذ ادويه عشان الضعف
والدكتوره تقول الإنفلونزا تخرب كل شي سويتوه من ادويه وعلاجات يعني يوم اسوي التلقيح الصناعي ماكان فيه شي قبل العمليه العدد عنده سبعه وعشرين مليون قبل العمليه بيومين جته الإنفلونزا يوم عطاهم العينه قالتلي دكتورة المختبر عينة زوجك سيئه العدد بس مليون واحد بسويها والرزق على الله
وأمس رجعت له وموعدنا السبت ضاق صدري مره مع ان محد يدري عن سالفه علاجنا 

 

[احلامي الامومه]

الله كريم ماي الورد وينج اليوم انا اليوم نفس الشي مااحس باي شي واحس مشيتي خفيفه احول امشي اشوي اشوي بس انا اصلا ماحس بثقل ولا شي مادري يمكن هالمره لاني اتحرك طبيعي ولا عشان مافي شي والعلم عند الله

 

[ماي الورد]

انا نزلت م ني قطرات دم اليوم مع افرازات بنيه شكلي بوقف العلاج خلاص بس زوجي مصر الا اكمل لين يوم التحليل

شنو تشورون علي بنات

احلامي اتوقع انج حامل انا كذا بولدي ما حسيت باي شي احس نفسي خفيفة وايد الله يتمم لج بالخير ان شاءالله