طبعاً أمس بليل ما نمت إلا بصعوبة
و بعد صلاة الفير ما نمت
و رحت حللت بالمختبر
ما كنت أعرف الطريقة
لأن مرة كنت مسوية تلقيح صناعي و قالت لي السستر ، النتيجة بعد 3 ساعات لأن هرموني
المهم ف توقعت جذي يسحبون دم و أرد البيت بعدين يدقون علي
بس اللي صار إن قالت لي نطري و احنا نناديج النتيجة بعد ثلث ساعة
طبعاً نطرت و أنا على نار
بس قمت أذكر الله عشان أهدي
المهم نادتني بعدين سستر ثانية عاد أنا ما أحبها و كان ويهها جامد ما يبشر بالخير
قلت لها خير ان شاالله ؟ بشري؟
قالت : روحي تحت للدكتور اهو يقرا النتيجة
يعني كل الوضع كان يدل على إن ما في حمل
بس ظليت على أمل
طرت تحت عند الدكتور
جان يقولي : اهم مادام بعثوج لي معناته مافي حمل
لو في حمل جان ضحكوا و باركوا و استبشروا
فعلا كان في بلاستيكة داخل ملفي فيها خط واحد
قلت الحمد لله
المهم
الدكتور شرح لي الوضع و قالولي حددي موعد مع الدكتورة عشان تشوف أسباب عند النجاح
قال اهو أصلا انتي كنتي ماشية صح
يعني كل الخطوات ايجابية و زينة
لكن الله ما كتب
و انتي و زوجج تأخر حملكم غير مفسر
يعني ما نقدر نحط ايدنا على المشكلة و نعالجها
لأن أصلا مافي مشكلة ظاهرة لنا
المهم ، طبعا و أنا مندقرة رحت عند السكرتيرة عشان تحددلي موعد
عطتني موعد نص شهر 4
بس احس خلاص طاب خاطري
و مالي خلق عمليات
الحمد لله
كانت عندي أمنية صغيرة ، بس ما تحققت
إمنية إن أشوف البوزتف
لما كنت بمنتصف فترة العملية و دقوا علي و قالولي البويضة تلقحت استبشرت
بعدين لما قالوا انقسمت استبشرت أكثر
بس الخطوة الأخيرة ما تمت و ما ثبتت بالرحم
مادري شنو أحس فيه
بس ما لي حق إلا التسليم لحكم الله
و أقول الحمد لله
اللهم أأجرني في مصيبيتي و اخلفلي خيرا منها
الأيام تركض و السنين تمشي
و ما قول غير الحمد لله على كل حال
كان بخاطري أييب بيبي يملي علي حياتي
يارب أعطنا و لا تحرمنا إنك على شيء قدير
بلاء عظيم و كبير
يارب ترفعه عني و عن كل متأخرة
