دقه قديمه

[~عشق المطر..~]

اختي الغاليه>>>>ابعدي عن الحزن والهموم

وبدلي توقيعج>>>>بالامل والتفاؤل والدنيا ماتسوى نحزن عليها

لاننا ننطر من الكريم الرحمن الغفور>>>>الجنه عرضها السماوات والارض

اما بالنسبه للعبايه>>>>راح يجي يوم ناس فيه تضحك وناس تبكي

فتجهزي لهذا اليوم >>>>وجوه يومئذ ضاحكة مستبشره

والعباه قال عنهم الرسول عليه الصلاة والسلام>>>>>نساء اهل الجنه كالغربان

يعني مثل لون الغراب من السواد والستر

خليج فخوره انج اطعتي الله ورسوله

واهم خليهم يتبكون الكفره>>>>روبيرتو كافالي وشانيل وجفنشي

النهايه منو اللي يفوز

ياليت لو تنصحينهم >>>>>>حتى تجتمعون في الجنه>>>>على سرر متقابلين

اللهم آمين

عدل كلامها معاها ميه بالميه :rerrerek:

 

[sara999]

من راقب الناس مات هما


مالج شغل بحد منو يقول العبات قديمه في عبي اتينن
ترى انا ما البس عبات بس اعتبر العبات بدله لانه في عبي مستوره مو ترصرص وحاله بس عليها كلفه حلوه فيها حركه حلوه البسها والله عادي كل مكان الروح فيها وتبين الصج والله اني لي لبست العبايه والله ان شكلي كله انوثه وارتاح اكثر من يوم اني البس البدله

 

[يوآش يوآش]

عبايه مو عبايه كل وحده لها رايهاا وذوقها وستايلها

وبعدين عااادي ردي عليهم قوليلهم انا مع الموضه بس موضة العبي : )

 

[وهج الحب]

اختي البسي اللي تبينه وترتاحين له الناس ما عنده الا الانتقاد ..لانها يا خربانه وتريد تخرب الناس ..يا حاسدينك على اللي فيه ..
اتذكر مرة اختي شاريه بادي ماركة غالي وكان حلو ..وقعدوا لها بالشغل وخاصة واحدة منهم تدعي الدين وتعيب عليها ليش انها شاريته بالغالي ..وبعدين طلعت فيه انه فيه ملائكة وصليب ..احنا نقول لها ما عليك هذا مش ملاك وهذا مش صليب ..والمهم كرهوا اختي بالبادي ..وما صارت تلبسة والسنه الثانية الا المطوعة لابسة نفس البادي وهي كانت بوسيع وغيرة لان الاسهم ضربت معاها الا تقول تصدقين انا كنت اشوفه عليك كنت ميته عليه وما صدقت لقيته خذيته حتى لو كان مال السنه الماضية ؟؟
ويوم قالت لها اختي والملاك قالت لا هذا مش ملاك هذا الطفل اللي يرسمونه الاجانب على طوفهم ..والصليب طلع علامة + مش صليب ..
اختي انا عارفة ان القصة بعيد شوي بس حبيت اقولك ان الناس احيانا تعليقها من حسد ممكن تشوفك احسن منها ويريدون يكونون مثلك وما يقدرون لا تستغربين انا اذا خرجت برع بلادي ارمي العباية ولا احبها حتى داخل بلادي بس العاداتوالبس جنز مع قميص الى الركبة وحجاب طبعا ..بس لو شفت واحدة ما رمت عبايتها من اقتناع مش غصب اقول بقلبي يا خظها هي افضل مني وحتى لو زوجي او اخية انتقدهم ما ارضى اقول هم الافضل لانهم تمسكوا شئ امنوا به ..واقنعوا به ولا اخفيك اني احيانا احس اني منافقة رغم اني انا لا احب العباية بس العادات هي اللي مخليتني البسها ..والله لو شفت متدينة اجنبية لابسة الحجاب وجلباب استحي من نفسي ..
اختي البسي اللي مقتنعة فيه ولا يهمك احد لا هم افضل منك وانهم على الموظة ولا انتي متأخرة عنهم كل انسان ينام على الجنب اللي يريحة وكل انسان يلبس اللي مقتنع فيه ..ايش فايدة التمدن وانا البس حجاب والبس بدي وتنورة قصيرة وعليها بووت واذا جلست طلع الساق ..

 

[اميرة-الاحجار]

بالعكس الحين ردة موضة العباة احس ثلاث ترباع الكويتيات يلبسون عبي واحس موضة العبي صارت اوسع واكبر من الملابس العاديه ماشاء الله كل شهر موديل يديد والبنات هبه
مالج شغل بكلامهم شكو دقة قديمه بالعكس العباة صارت لبس رسمي

 

[ما كو اسم]

مع اني اشوف الناس قامت تلبس العبي بكثرة واكبر دليل محلات العبي اللي بكثرة

على كل هذولي محترين منج 100%. فديري بالج كل ساع راح يسوولج سالفة اذا كنت ضعيفة رحت فيها

وصدقيني مل راح ترتاحين لمن تخلينهم ... لان علشان يطيحون من قيمتج شوفي شنو راح يسوون ..والله اعلم .


بعدين العبي الحين على 250 د.ك وانت ماشية .

 

[Čut!e Quèéи]

والله صارلي ساعه اكتب والمنتدى اخر شي يقولي ضغط زوار


بختصر كلامي لج

احنا في زمن الي يتكلم عن الدين والستر يقولون عنه متخلف و رجعي

حبيبتي انا كنت راعيه جينزات و نفانيف واموت على البنطلونات وانا متحجبه

سبحان الله ياني يوم اشتهيت البس عبايه ومن لبستها لي يومج ما قطيتها يختي احس بستري اكثر

صج قبل مستوره بس الحين اكثر واكثر ملامح جسمي ضايعه بالعبايه لا رسمة الفخذ باينه ولا الصدر ولا الورك واحس روحي كلاس اكثر

والله يوم اقول حق زوجي خلاص بلبس عبايه اشرايك ؟ قالي في ريال مرته تلبس عبايه ويقول لا ؟ الا اكيد بستانس حيل اشرايج انتي

هذا كان كلامه والله انتي عطيهم العين الحمرا عشان لا كل اشوي يفتحون الموضوع

قولي لهم كل واحد ينام على الجنب الي يريحه محد له شغل بالثاني لبسي وانا مستانسه فيه انتو شنو الي حاركم ؟ لاحد يفتح معاي هالموضوع

جذي كلميهم عشان يسكتون عيل عاجبج لبس المحجبات هالايام ؟؟ كله سترجات ومصخره افتخري بعبايتج ولا عليج منهم

انا كنت مثلهم من صغري لين صار عمري 21 وكاني الحين عمري 25 ما افصخ العبايه واكشخ فيها مثل ما ابي ولا احد قالي شي ولو احد قال ماراح اسكت له