درس تصوير: سرعة الغالق Shutter Speed

[فراولة^فوشيا]

بسم الله الرحمن الرحيم


تعرفنا في موضوعنا السابق عن التعريض (Exposure) ،، ومالمقصود فيه، وماهي عناصره الاساسيه

وقلنا عناصر مثلث التعريض هي الآيزو ،، سرعة الغالق ،، وفتحة العدسه

في هذا الموضوع راح نشرح الشتر (الغالق) واتمنى انه مايكون موضوع مكرر لأن هذه الامور تعتبر من اساسيات التصوير واكيد تم شرحها في قسمنا ، لكن حبيت أكمل هذه السلسلة من الدروس

 

[فراولة^فوشيا]

ماهو سرعة الغالق؟ Shutter Speed

هو مقدار الوقت المستغرق للشتر وهو مفتوح اثناء التصوير

تعالوا نشرحها بالعاميه
اكيد سمعتي صوت شتر الكاميرا لما تصورين ينفتح ويتسكر
مرات تكون حركته سريعه ومرات يطول شوي

هذا هو الوقت المستغرق،، اذا تسكر بسرعه معناته ان الشتر كان سريع، واذا اخذ وقت معناته ان سرعة الشتر بطيئه.

=============================

خلونا نلخص موضوع الشتر في نقاط مهمه:

- سرعة الشتر تقاس بالثواني،، أو اجزاء من الثانيه.
كلما زاد الرقم في المقام كلما زادت السرعه (مثال: 1/1000 اسرع من 1/30)

هذه الصوره توضح الاعدادات ونشوف داخل المربع الاحمر رقم الشتر 1/4000 (سريييع جدا)


- متوسط سرعة الشتر 1/60
اذا صار الشتر ابطىء (مثال: 1/30 أو 1/15) من الصعب التصوير والكاميرا محمولة باليد لان راح تتعرض للحركه والاهتزاز والكاميرا راح تلتقط هذه الحركه والشتر مفتوح
مثل ما حصل في هالصوره

- ففي حال استخدام شتر بطيء (1/30، 1/15، 1/8) انت في حاجه الا استخدام الحامل الثلاثي للكاميرا (الترايبود) حتى تكون الكاميرا ثابته اثناء التصوير والغالق مازال مفتوح

مثال هالصوره من تصوير المبدع الكويتي ابراهيم النصار



لاحظوا حركة السيارات شلون صايره هذا يدل انه استخدم شتر بطيء جدا وهالشي لايمكن يتم والكاميرا محموله باليد لازم تكون مثبته على الترايبود

- مثل ما ذكرنا في موضوعنا السابق ان عناصر مثلث التعريض (Exposure) ترتبط ببعضها البعض والمعروف ان زيادة سرعة الشتر ينتج عنه اضاءه خافته (كلما زاد الشتر كلما اصبحت الصوره مظلمه) وبالمقابل عرفنا ان زيادة حجم فتحة العدسه تزيد من كمية الاضاءه الداخله، فبذلك يمكن المعادلة بين الشتر وفتحة العدسة (راح نتكلم في هالموضوع بالتفصيل لاحقا ان شاء الله)


- ذكرنا ان الشتر البطيء يكون اقل من 1/60 يعني 1/30 1/15 1/8
وممكن يكون ابطىء من جذيه ويقاس بالثانيه وليس بأجزاء من الثانيه (مثال: 1ثانيه، 10ثوان، 30 ثانيه)
يعني العدسه تكون مفتوحه لمدة 30 ثانيه وهذا شتر بطيء جدا

متى نحتاج الى هذه الحاله؟ اذا اردنا المزيد من الضوء يعني مثلا في التصوير الليلي نخلي الشتر بطيء (أي مفتوح لمدة أطول) لاستيعاب كمية كبيره من الضوء وتشبع بالالوان مثل هذه الصوره

 

[فراولة^فوشيا]

الحين نسأل انفسنا هل نستخدم شتر بطيء ام سريع ؟؟

هذا الشيء راجع لج اختي المصوره،، اذا اردتي تصوير صوره فيها حركه.. هل تريدين تجميد الحركه؟ ام اظهار حركة الجسم المتحرك؟

في حال اردتي تجميد الحركه
مثال هذه الصوره



نختاار شتر سريع جدا
اما في حال اظهار الحركه نختار شتر بطيء

* أمثلة على الشتر البطيء

حركة الماء في الشلال

اول شي شوفوا هذه الصوره مأخوذه على شتر سريع نوعا ما لأن تمت تجميد حركة الشلال



وشوفوا صورة هذا الشلال



وهذه ايضا



تم اخذ هالصورتين الاخيرتين على شتر بطيء جدا فتظهر لنا حركة الماء بهذا الشكل

تجربتي المتواضعه في تصوير شتر بطيء

السباقات

صوره من تصوير المبدع الكويتي عمار العثمان



اذا ضغطتوا على الصوره ورحتوا للرابط الأصلي
اقروا الاعدادات اسفل الصوره
راح تلقونه انه حاط سرعة الشتر 1/40 يعني يعتبر بطيء بس مو وايد للاتقاط جزء من الحركه


حركة النجوم في السماء

من تصوير المبدع الكويتي جمال الأيوبي




في كل هذه الأمثله نحتاج الى تعريض طويل أي شتر بطيء أي مدة اطول للغالق

 

[فراولة^فوشيا]

علاقة الشتر بالFocal length أو مايسمى بالعربي البعد البؤري
والقصد فيه مدى زوم العدسه

اكيد جربتوا من قبل بكاميراتكم العاديه او حتى الموبايل اذا صورتوا صوره بزوم كبير تحسون ان الصوره مهتزه شوي

في عدسات ال slr المتنوعه في مثلا عدسات مداها 18mm 50mm 100mm 200mm
وهكذا
فكلما ما كان البعد كبير كلما زاد الاهتزاز فيكون الحل بزيادة الشتر لتجنب الاهتزاز

على سبيل المثال اذا كان البعد البؤري 50mm ممكن نكتفي بسرعة شتر 1/60
واذا كان 200mm نستخدم حوالي 1/250 من سرعة الشتر

======================

هذا بالنسبة للشتر بشكل عام

اما علاقته مع عناصر مثلث الاكسبوجر (الآيزو وفتحة العدسه)..

عرفنا ان زيادة سرعة الشتر تقلل من الاضاءة المتوفره للصوره فبالتالي نزيد من فتحة العدسه لاستيعاب ضوء اكبر

او بطريقة أخرى نزيد من قيمة الآيزو (مثل ما عرفنا كل ما زادت قيمة الآيزو زادت الاضاءه المتوفره)

ممكن تجربون تجربه صغيره بنفسكم تكونون في غرفه مظلمه وتصورون على آيزو قليل (100 مثلا) راح تلاحظون ان الشتر يتسكر ببطىءشديد
واذا رفعتوا من قيمة الأيزو الى 400 أو 800 أو 1600 راح يتسكر الشتر بسرعه اكبر

يعني كلما زادت قيمة الآيزو زادت سرعة الشتر

 

[فراولة^فوشيا]

هذا كل شي يتعلق بالشتر

اتمنى انه مايكون موضوع ممل وطويل

واتمنى انكم تستفيدون منه

ممكن تقرونه على اجزاء عشان ماتختلط عندكم المعلومات

ومثل ما قلت لكم مع الاستخدام والتجربه راح تكتشفون هذه الاشياء بنفسكم وممكن ترجعون للدروس فقط لتأكيد المعلومات

درسنا القادم ان شاء الله عن فتحة العدسه
وبعدها راح ننتقل الى وضعيات التصوير المتقدمه وتعرفون شلون تستخدمون الشتر وفتحة العدسه وتغيرون في قيمهم

شكرا لمتابعتكم ومع السلامه :tek:

 

[beauty]

يعطيج العافيه حياتي

درس مفيييييد ... ان شاء الله اطبقه

 

[اوركيدا]

ماشاءلله لااله الا الله عليج شرحج سلس او واضح او سهل او يوصل للجميع ..
مشكوووره على وقتج اللي قاعده تعطيني اياه او تشرحين لنا اساسيات التصوير اللي تفيدنا كلنا
يعطيج العافيه حبيبتي

 

[ChOcoLaTe 'n MarShMaLlOw]

مشكوره .. و يعطيج الف عافيه على الشرح المبسط

و ناطرين الدرس الياي )

 

[دهن عود مبخر]

فوشــــيا
حبيبتي الله يعطيج الف عافيه على الشرح الحلو
واخيرا عرفت شلون طريقة التصوير
والليتات صايرين مثل الخط
لووووووووووول
كنت اتمنى اتعلم هالحركه
وتجميد الصوره وشكل الماي والاضاءه الحلوه بالليل
شي شي

وان شاءالله بطبق المعلومات اللي شرحتيها لنا
وان ضبطت معاي الصوره بنزلها واوريج اياها


بس عندي سؤال..

مثل الصوره اللي فيها اضاءة السيارات اللي صايره خط
والصوره اللي فيها النجوم؟؟
شنو الوضعيه اللي اختارها هني؟؟
هل هي Sports Mode
او Night Mode




وثانكيوووو سوووو مجججج
قلبـــــــي​

 

[فراولة^فوشيا]

beauty

الله يعافيج حبيبتي
انشالله يارب تستفيدين منه ونشوف تطبيقج


اوركيدا

مشكووره حياتي و الله يعافيج
والله حتى انا قاعده استفيد معاكم بالدروس
وانشالله كلنا نستفيد من بعض
تسلمين ياقلبي :tek:


ChOcoLaTe 'n MarShMaLlOw

العفوو حبييبتي والله يعافييج
مشكوووره على متابعتج لي وانشالله ما اتأخر عليكم واكمل باجي الدروس


دهن عود مبخر

دهووووووووووونه هلا حياتي
والله وايد استانست ان الموضوع اعجبج انشالله نشوف تطبيقاتج وصورج

 

[فراولة^فوشيا]

بالنسبه حق سؤال دهن عود مبخر

اول شي الوضعيات اللي ذكرتيهم هذي اوضاع اوتوماتيكيه
ومثل ما ذكرت بالموضوع اللي شرحتهم فيه ان ما نقدر نتحكم في اعدادات الصوره
يعني ما نقدر نحط قيمه للشتر من عندنا كل شي راح يصير بشكل اوتوماتيكي من الكاميرا

بس ممكن تأدي جزء من الغرض

اذا تبين تجمدين الحركه استخدمي ال Sport Mode

لأن في هالوضع الكاميرا مضبطه اعداداتها على انها تكون على شتر سريع

اما اذا تبين صورة ضوء السيارات كأنها خطوط لازم يكون شتر بطيء جدا
وهالشي تلقينه في ال Night Mode

بسسسسسسسس على شرط

1- لازم تثبتين الكاميرا على الترايبود (الحامل الثلاثي)

2- تستخدمين خاصية التوقيت .. يعني ماتضغطين على زر التصوير وتصورين على طول لأ .. وقتي الكاميرا على ثانيتين مثلا وضغطي على زر التصوير ونطريها لما تصور بس لا تحركين الكاميرا ولا الترايبود
وطبعا لازم يكون الجو زين مافي هوا عشان ماتتحرك الكاميرا​

هذا بالنسبه اذا كان عندج كاميرا كومباكت صغيره

اما اذا عندج كاميرا احترافيه طبعا راح تنسين شي اسمه اوضاع اوتوماتيكيه اذا تبين صور دقيقه وواضحه

ناويه انشالله اشرح الاوضاع المتقدمه بس راح اذكر لج على السريع اللي يخص الشتر

راح توقفين على وضعية ال TV (في كاميرات الكانون) او S (في كاميرات النيكون)
وتغيرين قيمة الشتر اذا تبينه بطيء جدا خليه مثلا 3 ثوان بس مثل ماذكرت تكون الكاميرا مثبته
او شتر سريع على 1/125 أو 1/250 تقريبا

الشتر البطيء يعطي صوره ناعمه او بلور blur
والشتر السريع تبين التفاصيل في الصوره بشكل اكبر

اتمنى يكون شرحي واضح وأي سؤال حاضرين :tek:

 

[طوق البنفسج]

فراوله فوشيا .

يعطيج العافيه .. و ان شاء الله بحط لي نوت و اسجل فيه الدروس .. و يكون معاي وقت التطبيق اذا توهقت الا اكو مرجع

 

[دهن عود مبخر]

فديــــــــــت خشمج يالغاليه
والله كفيتي ووفيتي
الله يعطيج العافيه
ولا عدمناج ياقلبي

وبحاول اجرب التصوير بس من غير الترايبود
لان ماعندي :eh_s(1):
وللتجارب الاوليه بحط الكاميرا على اي جسم ثابت


وبانتظار شرحج للاوضاع المتقدمه
لان كامرتي اهي
canon 400d



ومشـــــكوره فوشيتنا
:tek:​

 

[smilmoon]

الله يعطيج العافيه على الشرح المفيد جدا
وانا متابعتج من الدرسين السابقين ، وان شاء الله متى ماشريت الكاميرا راح اطبقهم
ان شاء الله كلمة شكرا تووفيج حقج على جهدج :tek:

 

[فراولة^فوشيا]

مشكورين بنات على متابعتكم وتشجيعكم
تسلمون

 

[a7la tooota]

درس مفيد ,,,


up

 

[[ سيدالملاح ]]

موضوع قمـــــــــة
يعطيج العافية ع الافادة ،،

 

[Stylista_Q8]

من زمان كنت ابي اعرف عن ال shutter

ثانكيو ع الدرس ^^