السلام عليكم و رحمه الله و بركاته
حبيبتي المشكله اللي انتي فيها صعبه وايد ,, انا ادري
و اختج غلطانه بسلوكها هذا ,,
لكن بنفس الوقت , المشكله هذي يبي لها ذكاء في التعامل معاها ,, و يبي لها حذر , والا انقلبت العواقب
اول شي : انا ابي افهم و استوعب
اختكم صار عمرها 35 سنه , و ما تزوجت , انتو بالله شنو دوركم يالخوات ؟؟؟
اذا كل وحده فيكم تزوجت و لله الحمد , معقوله ما تذكرون اختكم عند اهل حمولتكم ؟؟
معقوله اهالي رياييلكم ما فيهم و لا واحد بعمرها يبي يتزوج , ولو على مره ؟؟؟
انا ما ابي اظن انكم من الخوات اللي كل وحده يالله يا عمري , و هذيك خل تعنس , نسوي روحنا ما ندري و مالنا شغل , ما بي اظن .
بس معقوله و لا وحده فيكم سعت لها بالخير ؟
ما فكرتوا تحطون اسمها عند خطابه ؟؟ و لو من وراها ؟؟
امج وينها بالمناسبه ؟؟؟
ما فكرت تتحرك ؟ تذكرها عند الخطابات و توصيهم ؟؟
شنو فايده الام و الخوات و الابو اذا كل واحد مطنش و مو حاس بمشاكل اللي بالبيت , ؟؟
و الا بس عرفتوا اشلون تتناقلون خبرها يوم غلطت ؟؟؟
انتي مو اختها ؟؟ ليش ما سعيتي لها ؟ ترا لا هي عيب و لا حرام
ليش ما ذكرتوها عند اهالي رياييلكم ,, جناينهم , حمواتكم و اهلهم ؟؟
بدواماتكم ؟؟
و الا بس نكتب عنها بالمنتدى انها حسوده و حقوده لانها مو متزوجه و مستانسه مثلكم ؟؟
شي اكيد ,,, ( ناسين انها انسان تحس و تشعر , و اكيد مو مقصرين وياها بالحركات و التنغز )
و الا ماكو وحده حارقه عمرها بالدين و الالتزام و تصير تغار من غير سبب ,,
قولي الحمد لله ما غلطت ويا ريال و يابت لكم بلوى !! ترا تصير !
و تصير في بنات عمرهم بالــ 18 و العشرين و العمر جدامهم , اشلون هي ؟ كل واحد مع شريك حياته و هي محرومه ؟؟
انا ما اقول لكم انها بضاعه و الا سياره و دوروا لها على مشتري , لا , ( بس اكيد فيه طريقه لتيسير نصيبها ) صح و الا لا ؟؟
يعني انتو جزء من المشكله و الورطه اللي هي فيها الحين , خصوصا انها بنت مصليه و حاجه و ما تحط مكياج يعني ملتزمه
و احسن من وايد بنات غيرها .
يعني هي الاولى ان الكل يوقف معاها و يساعدها , هي ما تقول لكم بالويه ( ابي ريل ) بس هي انسانه و عندها حاجات . صح و الا لا ؟؟
اللي صار لها انحراف , صح , و هي غلطانه , بس انتو تتحملون جزء ( كبير وايد ) من غلطها , و السبه انكم لا مبالين فيها ابدااا .
و هذا اللي واضح من كلامج .
آسفه على كلامي الجارح ,
الحين حل المشكله
1- تأكدوا من الكلام . و لا تصدقون اخوكم بكل شي .
و لا تييبون لها سيره اي شي , و لا تعاملونها كأنها في وضع ريبه , او متهمه , تصرفوا عادي .
2- حطوا اسمها عند خطّابه ,, فيه مراكز التنميه الاسريه
انا و الله ما تعاملت معاهم ,, بس انها مراكز موثوقه و حضاريه , مو مثل بعض الخطابات
خل امج اول شي تحتويها و تشاورها بالشي هذا ,, انها تحط اسمها عند خطابه او اي مركز أسري موثوق .
و طبعا انتو اذا هي حطت اسمها , خلوكم صما بكما , مو تعلمون الابو و الاخوان و السين و الصاد و الناس كلها .
4- سافروا معاها , اطلعوا سفره , او عمره ,, احتووها و خلوها تنسى الخرابيط و الحرام اذا ثبت فعلا ان الشيء هذا صحيح .
و اصبرواعليها و عسى الله يحل هالمشكله و يكتب لها النصيب ان شاء الله .
