خواتنا الكبار نبي خبرتكم شلون نشتري بيت العمر

[روحي تحبك...]

انتي تقولين اذا البنك عطاج 70 ومع قروضكم بيصير 210

200 الف و10 الاف ... ما يجيبون بيت؟؟
الا اذا انتي تبين قصر

حبيبتي في بيوت بسعد العبدالله دورين وسرداب 195 الف شرايج؟؟ وبيووووت حلوة

210 تيبلج احلى بيت لو حسبتيها صح وفكرتي وجمعتي واخذي قرض

لا تقولين مني وين لي وما عندي وما يعطون

تفائلي وربج يفرجها

 

[الشيخه فطامي]

حبيبتي هذي اللي ريلها ما عنده قرض منو الحين فينا ريلها ما عنده قرض او اهي ماعندها

او البنك من قالج بيعطيج 70 هذا الا اذا انتي تشتغلين بقطاع خاص او معاشج فوق ال 1000

احنا اللي بالحكومه حدنا يعطونا 38000 انا داقه عليهم او فكرت قبلج

يعني الحسبه 70 الحكومه او 38 قرض يطلع 108

يلا منو عندها بيت بتبيعه ب 110 مو 108 بعد

الله كريم

 

[ام خدود ورديه]

العقارات صااااارت نااار وشرار حتى بيوت سعد العبدالله وصلت ميتين ألف وفوق انا حلمي اسكن بجنوب السره بس ادري مستحيل الله كريم لازم كل عايله يكون لها دخل ثاني المعاش يالله يكفي المصاريف والاجارات

 

[الحلوه القمريه]

انا كنت احاتي وايد والحين طلع دورنا بمنطقه صباح الاحمد بموقع مميز الحمدلله بالبدايه ماعجبني بس ريلي اقنعني بشغه قالي العيال مو بس يبون بيت باجر بيكبرون اللي يبي سياره واللي يبي يدرس بجامعه خاصه واللي بسافر يكمل دراسه بره واللي بيتزوج والبنات اذا كبرو يبون صالونات وماركات هذا كله من وين واخر شي احنا حاكين نفسنا بالقروض وحارمين نفسنا علشانهم واخرتهم بيتزوجون وبيطلعون وبنتجابل بهالبيت انا وريلي الله بحفظه لي ومااستفدنا شي قالي خلينا ناخذ البيت ونبنيه ونوسع على عمرنا ونسافر ونلبس ونستانس واذا ماحصلنا البيت اللي نبيه بالدنيا عسى الله يجمعنا مع بعض بالبيت اللي احسن منه بالجنه وهذي الحياة موكل شي نتمناه يصير ودايما نقول خيره وبركه من رب العالمين الانسان مايدري وين الخير له تفاؤلو بنات لانحبط بعض بعدين الناس اللي تعزني وتوجبني توصلني حتى لو كنت عالحدود ومافي شي بعيد الحين الكويت من اقصاها لي اقصاها ماتاخذ ساعتين الحمدلله ديرتنا صغيره عيل اللي بالسعوديه والامارات شقولون مساكين اللي كل واحد بديره بينهم بالثلاث ساعات واربع ساعات واكثر بعد ادري وايد قرقت عليكم وعورت راسكم بس قصدي ارفع معنوياكم معاي والحمدلله على كل حال

 

[ام خدود ورديه]

الف مبروك البيت عساكم تتهنون فيه ياارب وصح كلام ريلج

بس وين صايره صباح الاحمد يم شنو؟

 

[الحلوه القمريه]

الله يسلمج ورا ام الهيمان والله يسلمج ومشكوره على هالدعوه الحلوه

 

[MewMew]

أنا بقولكم طريقة جيرانا الله يذكرهم بالخير

مادري شكثر صارلهم متزوجين المهم ولدهم اولى او ثانية ابتدائي ما شاء الله

الحرمةموظفة بوزارة مادري كم معاشها وزوجها ضابط بو 3 نجوم

المهم دوروا لهم بيت لقطة وبسعر مناسب جدا لان صاحب البيت ( القسيمة ) كان محتاج وباعها بسعر مناسب

خذوا قروضهم وشروا القسيمة بمنطقة المنقف قسايم المنقف الجديدة

المهم

واجروها على اجانب نظام التاجير السنوي

والعام طلعوا من عندنا من الاجار وسكنو بيتهم

وماشاء الله كان عندهم مطعم صغيروووون بعد

يعني اتوقع بالفترة اللي اجروا بيتهم كانوا يسكرون القرض من فلوس اجار البيت

الموضوع يبيله حظ و شوية تفكير عدل

والله يرزقنا ويرزقكم

 

[رحيق]

ربي يرزقكم البيت وفوق ما تتصورون ان شاء الله

يمكن احيانا تفكرون ان الموضوع جدا صعب ومسدود

لكن الحل الاول إلجئو الى الله طلبي منه ان يرزقج بيت من حيث لا تحتسبين وانتهزي فرص الدعاء يكون مستجاب

ثانيا اكثروا من الاستغفار

ثالثا جمعوا فلوس لازم تمسكين نفسج علشان البيت في حريم يوصلون لمرحله من التوتر علشان ودها يكون عندها بيت وخاصه اذا مر على زواجهم 13 سنه واكثر فتكره السوق واتحاول اتجمع من راتبها بمشاركه الزوج طبعا

رابعا القناعه كنز لا يفنى والمثل يقول مد ريلك على قد إلحافك ولا تنظر الى من هو أعلى منك ولكن انظر الى من هو أدنى منك
الي عايش بس على المعاش لا يفكر ان يشتري بيت في العاصمه المفروض افكر في البيت فقط لا تفكرين ان تدفعين للبنك قرض لمده 15 سنه مثلا ترا كله من شبابج وصحتج ونفسيتج وايد حريم مرو بهذه التجارب ما استمتعت بفلوس المعاش وانحرمت من اشياء وايد خلي الموضوع يكون فيه نسبه وتناسب علشان يكون عندج قوة تحمل واتعدي فترة القرض على خير

خامسا اعتمدي على الجرايد الاعلانيه فيها وايد ناس يبون ابدلون يكون عنده بيت او ارض من الحكومه فيطلب مبلغ من المال منج مقابل انج تاخذين تخصيصه وهو ياخذ تخصيصج لان في ناس ما يهمها البيت يهمها انها تاخذ فلوس


ربي اوفق الجمع