خلطه حق القهوه

[اربع وردات]

السلام عليكم ورحمة الله وبركاته

شلونكم كويتيات عساكم طيبين
بغيت اسألكم ،، عن خلطه حق القهوه حلوه
ماادري جربت خلطة القصيم ماعجبتني ،،،،
شرايكم ،،، في خلطه جاهزه حلوه والا في اعشاب انتوا تحطونها
بالقهوه ؟؟ اللي قهوتها حلوه تقولنا الطريقه
عساكم ع القوه حبايبي ناطرتكم

 

[انصاريه قمره]

انا قهوتي حلوه وعليها طلب
طبعا احط ماي لي نص الغوري 3 قفاش خلطة فرح مالت القهوه قفشتين خلطة القصيم طبعا قفاش الاكل

وبالنسبه للمطاره حطي داخلها 3 حبات مسمار وقفشتين صغار هيل مطحوون

خلي القهوه تفوور بعدين قصري عالنار خليها 3 دقايق

وبالعافيه

 

[مذهلة 78]

وشكثر قهوه حبيبتي انصاريه

 

[صفحه بيضه]

قهوة ام براهيم تهبل عند الي يبيعون تمر وقهوة

 

[صفحه بيضه]

اسمها قهوة ام ابراهيم

 

[@ام يوسف@]

انا احط خلطه القصيم حلوه

 

[اربع وردات]

مشكورين حبايبي ماقصرتوا كلكم سنع
عساكم ع القوة

 

[أبلة فاتن]

بنات ابي قهوه ،،​

 

[*ام فهودي*]

انصاريه قمره انتي تحطين خلطة القصيم بالغوري انا احطها بالمطاره اشرايج احطها بالغوري احلي والا اخليها بالمطاره

 

[أنفاسي دخون]

انا احط بالغوري قهوة شاعر المليون وكم حبه مسمار واخليهم يفورون واقصر النار لمده 10 دقايق تقريبا وقبل ما اطفي النار بدقيقتين احط خلطه القصيم وهيل بالمطاره ونتفه زنجبيل

والحمدلله مطارتي دايما خالصه وعليها طلب

 

[بنت النوخذا]

خلطات القصيم ترا وايد غلدوها
واذا تبين جربي مالت جمعيه الفيحاء

خنينه و حلوه
في محل صغير صوب قسم الخضار
داخل الجمعيه

جربي شمي ريحتها

 

[اطياب طيبه.أم عبدالله]

خلطة القصيم ممتازه وكافي بس خليها تفور ويا القهوه على النار وحطي لها هيل مطحون وشوية مسمار وخل تفور على نار هاديه 5 دقايق

 

[تتعب لومعي تلعب]

سلام حبيباااتي انا من اهل الجنوب وقهوتنا غير عن الي تسوونها ولي هي تجيبين براد القهوه حجم وسط وتحطين عليه فنجان قهوه قهوه وملعقه صغيره زنجبيل وملعقه صغيره نخوه وراس الملعقه الصغيره مسمار مطحون وتخلينها تغلي ربع ساااعه ع نار وسط وبعده بتحطين بالدله القهوه ملعقه صغيره هيل وشوي جوزه الطيب وملعقه صغيره من بهارات (خلطه القهوه اليمنيه الفاخره)عليها صورة نخله هذي تخلي القهوه مره خقق وبعد تحطين عليها شوي من الزعفران وبالعافيه (ملاحظه: لازم تخلون القهوه تغلي ربع ساعه عشان تقطع وهذا سر نجاااح القهوه ) واتنمى افدتكم ادعولي

 

[نـوت الحلا]

لا تفورون خلطة القصيم والهيل ع النار يخلي طعم القهوة ع مرارة الزعفران و الهيل و خلطة القصيم بالمطارة بس القهوة الي تغلي ع النار ​

 

[تتعب لومعي تلعب]

ايه اكيد حياتي لما تغلي القهوه بعد ربع ساعه تنصب ع الهيل والزعفران للتوضيح

 

[سيدة بيتي]

احسن خلطه حقت القصيم

 

[chole_84]

القصيم وبسسسس
احلى خلطه صج صج تضبط القهوووه

 

[سكره مالحه]

خلطة قهوة الصباح بالكيلو الصراحة حلوة بس انتى زيدى الزعفران شوى
والهيل يا بنات والخلطة ما تنحط على النار دايما بالمطارة
والنانخة والشيبه تحصلونهم عند الحواج لهم طريقة معينة بس صج يطلعون القهوة غير طعم ونكهة حلوة

 

[شذى الدعوه]

خلطة قهوة الصباح بالكيلو الصراحة حلوة بس انتى زيدى الزعفران شوى
والهيل يا بنات والخلطة ما تنحط على النار دايما بالمطارة
والنانخة والشيبه تحصلونهم عند الحواج لهم طريقة معينة بس صج يطلعون القهوة غير طعم ونكهة حلوة

يعنى شنو ناتخه وشيبه
وشلون نحطهم
ممكن الطريقه

والاخت ألى قالت النخوه وين القاها

 

[تتعب لومعي تلعب]

ياعزيزتي النخوه بتلقينها عند المحل الي تشترين منه القهوه ومادري يمكن لها مسمى ثاني عندكم بالكويت