خلصوني من هالعقده

[NaDer.wjoOody]

السلام عليكم ورحمة الله وبركاته

حبايبي منتدي كويتيات الغالي انا عضوه جديده كان عندي عضويه هنيه او بالاصح عضوية اختي :eh_s(22)::eh_s(22):بس كنت ادخل اتفرج ماكنت اشارك والحين قررت اشارك معاكم فأن شاءلله تفيدوني وتستفيدون

ولله الحمد والمنه انا شاطره بكل شي بالاسلوب وبالنظافه والاناقه والكل يشهدلي بدالك بس عقدتي الا وهي المحادثه باللغه النجليزيه يعني جد مسببتلي احراج بالمجمعات والفنادق والمطاعم مثل مانتم عارفين الحين كل المحلات يتحجون بالنجليزي فلازم تاخدين وتعطين معاهم عساس تقوليلهم الي تبين انا انحرج فاقعد اتبلع وانادي اختي او اي احد معاي وادا كنت رايحه مع زوجي هم اتفشل واتحشي هالمواقف مثلا كنت بالافنيوز اتغرض قبل العيد ودخلت محل كنت ابي ادفع كي نت وقالولي بيزي وعطيتهم كاش وانا طالعه انصدمت انهم سحبين مني بالبنك دازيلي رساله فنحرجت اتعامل مع العامله لانها ماتكلم عربي ومابي يطلع شكلي قدام زوجي غلط فسكت وطلعت واطريت اروح من بكره مع اختي حياتي وصارتلي مواقف كثيره لدرجه ان العامل تضحك ادا جيت اوصلها شنو ابي والله اصير جني انتصار الشراح بمسرحية بيباي لندن :eh_s(11):حتي بدوامي انحرج مع المراجعين حتي مره شافني شايب بس شكله مثقف قالي يبنيتي انا بقدملج نصيحه انتي ادا بغيتي اتكلمين بالنجليزي تكلمي بثقه ماعليج من الي حولج انا سكت وتفشلة قدام رفيجاتي انا حاولت اتكلم بس جد ماعرف وادري ان المحادثه يبيلها ممارسه بس اتكلم مع منو خدامتي سلانيه وتعرف عربي اكثر من السيلاني بنفسه والنجليزي ماتعرف وانا مرتاحه معها ومابي اغيرها
الحين الي ابيه منكم تساعدوني باقرب معهد او ياليت مدرسه تجي للبيت واكون شاكره لكم لان جد احراج حتي قدام اعيالي باجر ادا اكبروا مابي يقولون امي ماتعرف وهالنظام انا ادري انا لغتنا مالنا عنها غناه بس هادي لغة العصر والشكوي لله
واسمحولي علي هالقرقره بس الشخص يفش خلئه لوووول وترا عندي الدال ام نقطه فوق مو مضبوطه فصايره دال
وشكرا واتمني ترحبون فيني واكون خفيفه عليكم ان شالله

 

[دلع^_^]

صاجه حبيبتي الانجليزي لغه ضروريه بهالزمن
واهم شي قبل تتعلمين اي لغه تكونين حابه التعليم وراغبه فيه لانج راح تدرسين لغه جديده بكل شي وشوي هالموضوع صعب وفي ناس اعرفهم وايد ماقدرو يكملون لان ماعندهم اصرار
روحي لاي معهد عندهم دورات انجليزي للمبتدئين وابدي معاهم حبه حبه
في معهد امريكي ناسيه اسمه اختي تمدحه جنه بالقادسيه مكانهم مو متأكده
وبالتوفيق

 

[NaDer.wjoOody]

هلا وغلا دلع
انا مو شرط عندي اتعمق باللغه انا راضيه بالتعليم الي يخلي الي قدامي يفهمني بس
وتسلمين يالغلا علي الرد وماقصرتي

 

[om deaj]

باي منطقة انتي؟؟؟؟ راسليني بالخاص

 

[FeShinGoOo]

حبيبتي مو شرط انج تكونين بلبل المهم توصلينلها المعلومه وانتي اساسا تكلمي عربي ترى اغلبهم يفهمون عربي بس يستعبطون

والله انا اذا توهقت ماستحي الصراحه هاذي ديرتي ولغتنا عربيه مافتشل اذا ماعرف اتكلم لغتهم اهم المفروض يتعلمون لغتي :)

 

[NaDer.wjoOody]

هلا ام ادعيج
انا بالمنطقه الرابعه
واسمحيلي ماقدر اراسلج توني مشاركه بالمنتدي عدد المشاركات مايسمح

 

[NaDer.wjoOody]

هلا فاشن كوا
حاولت اتكلم معاهم عربي بس يردون علي يقولون نوت اسبيك انجليش فتوهق
وانا ماقلت اتفشل لغتنا حشا بس الصراحه هاذي لغة العصر
اذا كنت بمحل وحاسبت اتحجي العماله مادري شتقول واطالعها واطلع
مادري الا لحقيني معطيني كبونات اوشغله
وانا ماحب اكون جذيه ماحب اضطر لحد واصلا كل رفيجاتي وخواتي يقولون انتي محتاجه اتعلمين لان حدج ماتعرفين
ماقولكم اهم فلته لا بس علي الاقل يقدرون يوصلون الفكره
وانا ماعرف اتحجا وبنفس الوقت انحرج اتجرئ وتحجي اتمني فهمتوني
وابشركم لقيت الذال:eh_s(15)::eh_s(15):

 

[NEW WOMEN]

ربي اغفر وارحم شقوتا بلغت مداها
دشي معهد وبتتعلمين غناتي

 

[غداً القاك]

^
صح كلامها معاها

 

[بنت الناس ما تنداس]

مو الا تعمقين بالانقلش اهم شي تعرفين الاساسيات والاشياء المهمه
مع الممارسه بتعرفين تكلمين
حاولي او دشي معهد

 

[سكوتي بذوقي]

ادخلي معهد بس يكون التعليم عندهم زين

تعرفين بالخليج عندنا نادر مايعلمونا انجليزي صح

موفقه يارب

 

[ترف بابا]

شوي شوي على نفسج

دشي معهد شوفي باليوتيوب دروس يمكن تفيدج

بس لا تستعجلين النتيجه واللغه ممارسه ياقلبي

 

[NaDer.wjoOody]

نيو ومن مشكوره يالغلا
بس ابي معهد معروف وزين

 

[NaDer.wjoOody]

غدا لقياك تسلمين علي الرد حياتي

 

[NaDer.wjoOody]

بنت الناس ماتنداس صاجه والله وهذا الي انا ابيه
بس موعارفه معهد ثقه
يسلمووووو يالغلا

 

[HoOoney]

نصيحه طالعي افلام اجنبيةم بي سي ٢ وم بي سي٤
تتمرنين تقرين الترجمه وتسمعين الكلمه فتحفظينها
تتعرفين عل الجمل السهله اللي تساعدج

 

[NaDer.wjoOody]

ترف بابا
مشكوره علي الرد
بس دخلت علي اليوتيوب فتره وقعدت احفظ جمل لووول
والحين نسيتهم انا ابي معهد يعلمني صح اما الحفظ ماينفع
لان اليوتيوب يتعامل بالحفظ
صاجه اهي ممارسه بس امارسها علي منو خخخخخ مافي الا اهاجر

انا سافرت فترة اسبوعين مع زوجي ماليزيا والله اخر الايام قمت اطقطق وعرفت كلمات بس الحين نسيت

 

[أعشقه]

اما انا تخرجت والله وانا مفهيه ومدري شلون تخرجت
انجليزي ماعرف فيه شي ابد كاني صنم .. والله حتى القواعد الاساسيه الي يدرسونها للابتدائي انا ماعرفهاا ولا اعرف وش ذا يعني
وبعدين قلت خل ادخل معهد دخلت وانا مدري وين الله حاطني اشوي اشوي تعلمت الاساسيات بس درست 4 مستويات وثمن وقفت ماحب شي اسمه اختبار .. ابي افهم وتمشي الامور هذا الاهم
والحين رجعت ماعرف شي .. لان اذا درستي لازم تمارسين اللغه
حاولي تروحين اي معهد او اشتري لك اي كتاب احفضي كلمااات واعرفي القواعد ودخلي ع مواقع تكون صوتيه وان شاء الله تضبط امورك وبالتوفيق

 

[NaDer.wjoOody]

هوني والله هذا انا احاول ومجابله التلفزيون بس علي ماركز بالترجمه واربطها باي كلمه قالها البطل
الا انا دايخه هههه
وانا عندي عقده ثانيه ماحب اطالع الفلم الا البطل والبطله مزين ولايقين علي بعض ....طلعت كلها عقد خخخ
مشكوره حبوبه

 

[NaDer.wjoOody]

بنات بليييييييييز ابي معهد ثقه واسلوبه بالتدريس حلو