خلاص تعبت من حياتي ونفسي

[الشهد كله]

حبيبتي susuu انتي صار لج سنتين ثلاث ما تغيرتي

حياتج كلها نكد بنكد وهم وغم ومشاكل

تبينه أهو يتغير بساعات !!!!!!!!!!!!

انتي عودتيه على نمط معين بحياتج

الصراخ والهواش والحنة والرنة

فجي شوي عن الريال

لا تشتكين

لا تتحلطمين

لا تلاسنينه

لا تغلطين عليه


بصراحة كل اللي يسويه فيج ما ينلام من اللي يشوفه

انتي لو عندي جان أحطج بالغسالة مع شوية إيريل وقطرتين كلوركس وديتول

عشان أغسل مخج من الأفكار اللي تسويها فيه !!!!!!!!!!

أهله لا تييبين طاريهم جدامه ، لا أم ولا أخت ولا مرت أخوه ولا أحد

تحبين تروحين تزورين أهلاً وسهلاً

ما تبين تزورين ما تشوفين شر

وإذا كنتي مجبورة الزوارة روحي بدون مشاكل

اختلطي بالناس

حتى إذا ابتعدوا عنج روحي لهم ( حشر مع الناس عيد )

لا تتكلمين عن المشاكل وإذا ما تعرفين خليج ساكتة بس سمعي الكلام

خليج مرحة ، ونيسة ، خلي مقعدج حلو مع الريال

دايماً تذكري أشياء حلوة بحياتج

انتي لازم تبدين من نفسج بعدين راح تشوفين اليال يتغير شوي شوي

عسى الله يهديج ويصلحج ​

 

[ثريا الكون]

ها حلو كلامي زعلج يعني هذا انتي لمن تسوين جذيه حق ريلج شفتي شلون هذا اسلوبج انا سويت مثلج خليت ردي حاد مثل انفعالج عرفتي الحين انتي شنوو ؟؟؟؟

حاولي اتصلحين نفسج قبل لا تصلحين زوجج حاولي التفكير السلبي ما يطغي عليج كلش كلش اشتركي بنادي صحي الرياضه تصفي الذهن يقولج العقل السليم في الجسم السليم حاولي تسووين يوغا تريح الاعصاب تعرفي على ناس يدد حاولي كل ما يطري على بالج النكد والتفكير السلبي بادري بشئ يلهيج عنه شوي شوي نفسيتج تغير كل شئ بيدج بنات المنتدى مو معاهم عصا سحريه يغيرون حالج انتي بيدج كل شئ وحطي تحتها مليون خط هذا الي عندي بلشي بنفسج اول شئ بعدها راح تشوفين الابواب كلها اافتحت لج وبالنهايه الله يمهل ولا يهمل

 

[sh_mashael]

الصراحه طريقتج اتنرفز !!!
و حيل متحامله على زوجج
اشدعواااا يُبآ؟

هدي هدي اختي
و ترا مايستاهل اللي سويتيه
و لازم اتحبين الحياه ,, وتونسين عمرج و تهتمين بنفسج
و راح تلقين اهتمام زوجج فيج

 

[*E.B.D.A.3*]

ما اكذب لو قلت قعدت ابكي على كل كلمة منكم
ثريا الكون ..خليتيني ابجي من خاطري لين قلت بس على كل كلمة كتبتيها

ما ابي ابرر بس يمكن وصفت بطريقة خطا بس انا ما اغار من مرت حماي ابدا وربي يشهد ابدا ما اسال شو عندها ولا احقدها استغفر الله ربي يهنيها
بس هي خربت علي عند اهل ريلي وخاصة عايلتهم وايد كبيرة ومترابطة
تخيلوا في وايد بنات اعمارنا يوم اقعد تشلهم مكان ثاني واتم بروحي او يوم نروح بيت حد تاخذ طاولة وتنادي كلهم الا انا اتم منحرجة وتكلم من وراي بس بطريقة جدا ذكية ودبلماسية اهم شي تخرب اسمي

وخالتي تاثرت شوية لاني كل شي اسوي من خاطري بس مادري ليش كان يصير كذا

وريلي ياربي انا وصفت وخبرتكم وانتوا طلعتوني وحشية ونكدية
صدق اتهاوش واسوي بس ما ابدا بدون سبب ..ودايما له دور وخاصة يوم يوعدني ويخلف
بس الحين مب وقت ارجع ماضي واقول كذي ولا كذي
الحين بجد ابي اغير من نفسي ماعرف شو اسوي ولا كيف ابدا

كل ما اشوفه اتذكر مواقف وايد سوا معاي ومن اقل شي ما امسك لساني
وهاي الي ابي اغيره

كيف امسك اعصابي ..كيف اغير من نفسي من انسانة مرحة وحبوبة صرت نكدية وحزينة واهم من كل هاي مريضة كل شوية امرض ومناعتي قلت اقل شي يصبني واطيح بالفراش
علما ان ما اتهواش ابدا جدام عيالي وابجي واكل نفسي يوم ادش الغرفة
وتعبانة نفسيا وجسديا لاني كل شي اسوي لهم بروحي ومن نوع الي اخاف واقلق وايد لو طلعت لربع ساعة حتى

ياربي ابي اشوف حياتي ونفسي شو اسوي حتى كم مرة سافرت مع ريلي بدون يهال كله اتم اصيح واتصل كل شوية احاتيهم ريلي يقولي عيل ليش جيتي يوم تحاتيهم

بليز بنات انصحوني

سوسو يا بعد عمري ،،
الحياة فن ..
اقسملج انها مجرد فن ،،

اشلون تتعاملين مع زوجج المتقاعس
اشلون تتعاملين مع حمولتج الي ضاغطه عليج
واشلون تتعاملين مع بهارات الحياة الزوجية بشكل عام !!!


زوجج ، لطالما انه " تسويفي" ، ويأجل وايد ، يوعد ومايوفي ،
خلاص! تعلمي اشلون تتعاملين معاه بطريقه انج انتي الي تاخذين القرار مو اهوه !!
ليش تحطين قرارج بيد ريال ، دايما يقول باجر وباجر ، ومايوفي !!

على سبيل المثال خل اصورلج انتي شنو واهوه شنو ،،
تبين نفنوف معين حلو ؟؟ قالج باجر ، وطبعا اخلف بوعده
انتي كالعاده شنو تصيرين؟ تعصبين وتقلبين الدنيا او تخشين بقلبج وتستمرين بهالشي ليمه تصير مشكله حقيقية بينكم وفجأة تنفجرين بويهه !!!

ليش جذي ؟؟؟
الحل ياحبيبتي، طلبي منه المبلغ، وتوكلي وروحي السوق واشتريلج نفنوف وردي!!
بس انتهى الموضوع!!
بعد يكون احسن لو ماتعتمدين عليه وانتي تشترينه من مصروفج الخاص وخلاص !!!

انتي الي مشي امورج لطالما اهوه من النوع الكسول ..
خليه اهوه مجرد "موافقه" ، يعني بس تاخذين موافقته على الاشياء الي بتسوينها !!
وانتي سوي كل الي تبينه !!


اما بالنسبه حق حمولتج
ياخي ليش ماتواجهين !!!!! انا حمولتي نفس الطبع كله عزايم ولوية ..
واذا صارلي ظرف وماحضرت يقلبون الدنيا علي ويسوون مافيني خير
عبالج اسكت مثلا ؟؟
لا يبه اتكلم واقولهم "على ضحك" افا هذا وانا يايتكم امس ويايبه لكم كيكة! واليوم مرضت ومابي منكم الا تعذروني جذي تسوون؟
يعني انقدهم على نفسهم اشوي !!!
استمريت على هالاسلوب ليمه خلاص، انرفع عني القلم، وبالعكس، والله العظيم اني مازليت عليج بكلمه صرت لمه ازوورهم
يثمنون الزيارة، ولمه ادش كلهم يقطعون سوالفهم ويصارخون " ياااااااااهلااااااااااااا حيالله من يانااااااا"
والي تشيل عني الكيكة والي تشيل عني القهوة والجاي!!
صاروا يستقبلوني بحرارة الي احس كل زوجات عيالهم يغارون !!
والله العظيم ثم والله العظيم، انهم تغيروا وصاروا من ناس تتحطلم ومايبين بعينها شي
ليمه ناس تقدر زوارتي !!!!

شفتي اشلون لمه اقولج الحياة مجرد فن ؟؟؟
بس فن تعامل !!!!

اما تكتمين بقلبج وتحطين الحرة باللي عندج
اسمحيلي هذا ضعف !!
وصج على فكرة، لمه يتحلطمون مني ... ماكنت ازعل نفسي بشي لطالما انا واثقه اني مو مقصره!!
وانتي الي مثلج المفروض تذكرين خالتج انج ماقصرتي معاها بشي وقت الي تتشره عليج!!
مو مرة ولا مرتين لاااااااااا بكل مره تتحلطم عليج ردي عليهااااا لا تسكتين وتشيلين بقلبج!!


انتي مشكلتج ياقلبي، خصوصا مع زوجج
انج تبينيه يتغير 180 درجة .. مستحيل!! هالشي تعبج وتعبه معاج!
خلج واقعيه وتعاملي مع الموجود ،، زوجج مراح يتغير .. انتي مريتي باصعب الظروف الي المفروض الريال فيها يحس غصبن عنه
الا اهوه ماتغير !!!!!
فخلج واقعيه وتعاملي مع كسله بذكاء ... شوفي الجانب المشرق قد ماتقدرين
زوجج انتي تغلطين عليه وما ياخذ بثاره منج ترى !!!!
ضغطتي عليه باكثر من مناسبه ، وكل الي يسويه انه يسكت !!
حمدي ربج انه زوجج طاخ من الله جذي ، عودي نفسج انج تشوفين ايجابياته
تلقائيا راح تتحولين حق انسانه ايجابيه ترى !!
اما اذا بس شفتي سلبياته ، بيزيد احباطج وتصيرين سلبيه اكثر واكثر !!!

زوجج مو من النوع الاقشر ولا من النوع المتملك والي صاك عليج بين اربع اطوف
استغلي هالنقطه، وانتي الي اديري حياتج بنفسج !!

 

[السهم الصويب]

سووووسووو يا سوووسوووو

ريلج مافيه شي وانتي مافيج الا العافيه

شوفي انتي قاعده تتسولين الحب مثل ما تقول فوزية الدريع وهذا اكبر غلط !!
ابي تسويلي يوم مميز ! لازم تبارك لي بيوم زواجنا واذا ماسوى تقلبين الدنيا على راسه
ويوم سوالج مفاجأة هم قلبتي الدنيا على راسه
ترى امرج يحير !

انتي اللي باركي وانتي اللي سوي اليوم المييز وعطي عطي عطي كثر ما تقدرين ولا تنطرين المقابل ابد
وراح اتشوفين بعدين اهوا شكثر راح يعطي من نفسه بدون لا احد يحن عليه
ولمه يعطي من قلبه احلا من ما تكونين انتي اللي طالبة منه ....

وحمولتج مالج شغل فيهم سوي اللي يرضي الله ويرضي ريلج
يعني وجبيهم وقومي فيهم عشان زوجج مو عشانهم واذا شفتي شي ما يرضيج
قوليله حصل كيت وكيت ( خلي عنده خبر ) بس ما انا ما تكلمت ولا رديت علشانك ولجل عين تكرم الف عين
جذيه بتكبرين بعينه وبحبج

ومرت حماج شعليج منها بالله ؟ عساها سعيده واهيا بعيده .. عندها بيت ولا سيارة شنو يعني الله يهنيها
وعلى نيتج الله بيرزقج .. ماتدرين شاللي الله خاشه لج ؟ يمكن شي احلا وشي اكبر

دام زوجج طيب ويحيج وخذتوا بعض عن حب لا تضيعين كل هذا بغيرتج و مقارنة حياتج بالناس

ابدي صفحة يديدة بسوسو المرحة اللي تونس مو سوسو النكدية

وشوفي حياتج شلون راح تتغير

 

[susuu]

خواتي بدون ما اذكر اسم
اشكر وحدة وحدة ردت علي ودعيت لها من خاطري بعد ماقريت ردها

وصج وصج بارحة بكيت بكيت لين قلت بس بس هالمرة دموع ندم
احس ضيعت سني وحياتي ورا اشياء تافهة
يمكن لاني وايد انسانة حساسة واعيش في الاحلام اكثر من واقع فما قادرة اتحمل الي شفته عكس الي تصورته

مهم بارحة اتاسفت من ريلي ووعدته اني بتغير وبحاول امسك لساني وما اصارخ وهو بعد قلتله ماتصارخ علي لو شفتني معصبة

انزين الحين خطوة ثانية كيف اتغير وارد مثل قبل ايجابية ومرحة

باختصار تزوجت وعمري 19 عن حب اخذت ريلي ..كنت ادرس برع وتخرجت رديت اسكن بيت حمولتي وعمي اشترا بيت مقابل بيتهم وعطانا مع اني ما طلبت ولما تزوج حماي مرته ماتحبني مادري ليش مع اني كنت طيبة معاها
وانتقلت وهي صارت المهمة ولان عايلة ريلي وايد كبيرة ومترابطة وهي ماتاخذ مسوولية عيالها من صبح لين الليل عند ام ريلي وهي من جامعة للزيارات وطلعات وماتفوت شي وانا ماكنت اروح وايد فصارت محبوبة وتقصد تخرب اسمي بطريقة غير مباشرة

مهم انا وايد طيبة وعلى نياتي اصدق كل شي على طول حساسة وحنونة والحين نكدية بعد :krkrkr: عندي شغالتين بس كل شي اسوي بروحي لعيالي حتى يوم اطلع اخذهم بالسيارة بدون شغالة وكل شي قاطة على راسي وعندي عادة قلق فضيعة لو اتركهم ربع ساعة عند والدة اتصل مليون مرة
تركت شغلي بسبب ماقدرت اداوم ومخي مشغول في عيالي وكله احاتي اكلوا وشربوا ونامو ترا حتى اهلي ملوا وقالوا لو ناموا او اكلوا ربع ساعة متاخر شو صار وشو هاي كله تحاتين

الحين عندي رضيع عمره شهرين ونص ومحاتاة بدت مرة ثانية
كنت امارس مشروع تزين هدايا بس انا من نوع وايد عندي خطط واحلام بس اتكسل وانخمد ويروح حماس فجاءة فصار لي كم فترة بطلت مع انه كان خاطري افتح محلي من كثر ماكان اقبال على شغلي بس ماشي حماس

خبروني شو اسوي وكيف اغير هالاشياء وكيف اقسم وقتي علما عيالي اثنينة يروحوا مدرسة وحدة 4سنوات ونص وثاني سنتين ونص ويردوا ساعة 12:30

 

[الشهد كله]

حبيبتي susuu اشغلي نفسج بأي شي

إما وظيفة أو محلج اللي قلتي عنه

لا يصير عندج فراغ

لأن الفراغ عندج يولد عاصفة ومن عقبها تصيرين :rgewrg: نار وشرار

لازم تلهين نفسج شوي

خلي نفسج بالمقدمة ، بعدين ريلج وعيالج

حبي نفسج ، بعدين ريلج وعيالج

بليز susuu الموضوع الياي أبيج تقولين ريلي سفرني وتغيرت حياتي معاه 180 درجة


ماااااااااااااااااااااانبي نكد الله يخليج

نبي susuu فرفشة

اللي ما تبجي

اللي ما تصرخ

اللي ما تحن وتنكد على ريلها

حاولي صدقيني راح تتغيرين

الله يتمم عليج ​

 

[الملاك المدلل]

الصراحه بدون زعل
انا اجوفج انتي الغلطانه فـ الموضوع كامل .. انتي ماتعرفين تتعاملين وتتفاهمين معاه وماعرفتي شلون تكسبينه يوم انج تقولين يسمع كلامج .. ومشاكلج انتي بيدج بنيتيها " تغارين من مرت حماج " وتقارنين نفسج فيها وايد !
وحاطتها فبالج وتعبتي نفسيتج وتعبتي ريلج وعيالج معاج .. زهق الريال الصراحه ماينلام في كل شي مسوية له سين وجيم وهو ماله خص اصلن , و بدت تبني لها فيلا ! عليهم بالعافيه الله رازقهم وفاتحها بوجههم تلومينه وتهاوشينه وتضربينه شدخله هو
وتقولين يوعد ولا يوفي , اعذريه ماتدرين شنو ظروفه حطي اسباب ( مايقدر - مب مقتدر - ناسي - مشغول - الله مب كاتب )
وعلى كل شي تصيحين وتسوين سالفه وتضربين عمرج وتضربينه !!!!! وين قاعدين الصراحه انصعقت يوم قريت انج تضربينه
انتي بـ كامل قواج العقليه .. ! عييييب عليج ماينلام انحاش كسرتي رجولته وهيبته ! من متى المره تضرب الرجال !
راجعي نفسج وجوفي اخطائج شقد ..
وانصحج بـ طبيبه نفسيه لأن اللي تسوينه مش طبيعي !
" و تقـربـي لـ ربـج " وقوي ايمانج .. وشيلي الافكار السلبيه
والله يهديج ويصلحج ..

والسموحه *.*

 

[صادقة بكلمتي]

حبوبة الله يهديج ويسعدج ادري شنو تعانين مرت علي مرحله كنت مثلج والحمدلله الله رازقني بريال صبور كنت اعاني عقب الولادة من اكتئاب انا اقول خلج على صلاتج وتكلمي مع نفسج قولي لازم كا اخلي عيالي يسمعون صراخي وبكبرون على دموعي اللي يشوفونها هذا اول واهم شي عقبها دوم لا تحطين ثقتج بان كل شي جميل وزين وكل الناس صادقه وما تخون توقعي انه في فئه عكس كل شي ولكن لازم ما اسمحلهم يخربون او ياثرون على حياتي الاسريه فكري الحين انج تهملين كل شي الا نفسج انا احاتي عيالي اكثر منج بكل شي واخاف من كل شي عليهم عندي فوبيا حتى الخدامه ما اخليها تجيسهم ولا تلعب معاهم وانا مو يمها بس هذا شي مو بيدنا ادري مثل ماكو امهات ما يدرون عن هوا دار عيالهم احنا عكسهم بس لازم نعطي مساحه حق حياتنا الخصيه بعد شنو تسوين شوفي شنو تبين تغيرين بنفسج تضعفين او تمتنين اشتركي بنادي صحي يبي وحده تسويلج كل فترة منكير وبدكير وووو اهتمي بنفسج لا تخلين الشيطان ياثر عليج الهم والغم منه عيالج بالمدرسه حطي قران في البيت اقرا لو صفحة وحده باليوم انتي بصوتج سمعي نفسج ادعي الله يكون بعونج والحين ريلج قعدي معاه قوليله انا احبك وابيك وانتي لي كل شي انا اعاني من كوني انسانة صادقه انصدم بالناس انت لاوم تكون سندي ادري تتجحمل مني اشياء وايد بس هم انا بعد اتحمل منك نبي نفتح صفحه يديدة مع بعض نحط هري الامور اللي تنقصني ونبي نعدلها بنفسناا بالبيت نسوي برنامج لطلعاتنا لزواراتنا نشتري ملابس نلعب عيالنا لا نفكر بالناس لان صعب ترضينهم وفكري ان اغلب لناس ما يضلون على حالهم الزين ممكن يقلب شين والعكس الا من رحم ربي واخذي هالبيت وحفظيه يقول:
احبب حبيبك هونا ما عسى ان يكون بغيضك يوما ما
وابغض عدوك هونا ما عسى ان يكون بغيضك يوما ما..
يعني شنو لا تحبين احد لدرجه ان تغير عليج تنصدمين والعكس صحيح
عدلي فبيتج حسسي ريلج انج بتتغيرين قبل لا تيي وحده وتغيره عليج وعلى عيالج وتعيشين تعيسه طول عمرج بعد ما يمل من نكدج فكري بعيالج يبون جو اسري لا تفكرين بحمولتج سوي الواجب اللي عليج وان تقدرين اخذي عيالج وريلج وروحوا عمره ان شاء الله تكون فاتحه خير عليج واهم شي ريلج لا تقولين هم اهو ما يتغير ممل ما يساعد ترا الريال انتي اللي تعودينه علي اي شي و ولدج على ما تربينه فكري يكلامي عدل لو انه ملخبط بس اتمنى تاخذين منه مقصدي بشكل واضح واحنا هني نساعد بعض على الخير اي شي تحتاجينه حياج ان لي باقي عمر

 

[susuu]

الشهد كله..ياربي مادري من ابدا اشكرج ولا شو اكتبلج احس مهما قلت ودعيتلج ما اوفي الي قلتي
احس كل كلمة طالعة منج فيها نصيحة ثمينة

ومثلما قلت بديت الخطوة الاولى وعسى اقدر اكملها وان شاء الله بتشوفي موضوعي السعيد قريبا


الملاك مدلل..مشكورة عزيزتي
ما الومج على الي قلتيه يمكن فهمتي كذا
بس انا ما اغار من مرت حماي ابدا ولا ابدا سالت شو اشترت ولا شو عندها بس كان قصدي ابين انها تغيضني بحركاتها
تخيلي وحدة فجاءة دخلت حياتج وتلغي وجودج وتشارك الكل وطلعتج برع

عيالي اشطر من عيالها وبنفس العمر بس ولدي مشى وتكلم وولدها لين الحين مع ان عمره قريب الثلاثة بس تخيلي تذم عيالي جدام الناس يعنى بالمزاح تقول ليش هاي ماي يضحك وتقوله حبيبي ليش دايم مكشر احسك من بؤساء او تقول وحليلك بعدك ما طولت شوف ولدي اطول
وبنتي لانها حلوة ودايما ناس يمدحوها تسوي اي شي عسب تقولها شي جدام ناس
والحين ولدي رضيع يوم انا محد تقول ليش جي عيونه يمكن فيه شي ودوه دكتور او اي شي تقول بس بطريقة دبلوماسية
ادري بتقولون خليها تولي دام عيالج مميزين بس انا ام واتاثر

بس عموما تسلمي وان شاء الله ما احتاج لدكتورة نفسية دام شي خوات مثلكم ينصحوني

صادقة بكلمتي.. مشكورة وربي يحفظ عيالج
كلامج وايد مفيد واقدر حرصك على نصيحتي

انزين بسالك كيف اقلل من القلق الي فيني يعنى انت شو تسوين اذا طلعتي وتركتيهم
وصدقج وايد اشياء لازم تتغير وببداها من نفسي

ربي يعطيكم الي تبون

 

[صادقة بكلمتي]

حبيبتي عيالج الحين بالمدرسه او بالروضه انتي اهم شي اكدي انهم بروضه زينه ثقه ولا بغيتي تطلعين كلمه وحده قولي يارب استودعت نفسي وعيالي فلان وفلان وزوجي وعندك ما تضيع الودائع ثقتج بالله لازم كبيرة تدرين اللي يستودع امانته عند ربه يامر الملائكة تراعيهم انتي شيكي عليهم بس مو للهوس انا كنت مثلج بس الحمدلله مع الوقت خف خوفي لاني اقعد معاهم افهمهم من عمرهم سنه هذا زين وهذا شين هذا الله يحبه هذا الله ما يرضى عنه لا تقولين ما يفهمون الكلام يسكن بذاكرتهم ولا صاروا سنتين وزود وثلاث واربع تشوفين فعلهم وترا انا ما انيمه الا على صوت القران انا ملتزمة لكن مو دينا للاسف وايد اصلي واصوم واخاف الله بكل شي بس هم لي سلبيات اسمع احيانا اغاني ووووو الامر ما يخلي بس ادعي الله يهدينا للاسف و مخافه الله بين عيوني والله يهدي كل المسلمين بكل شي يرضيه صدقي بالله انه الله بيكون معاج بس انوي وشوفي حبيبتي فكري انج تكونين قدريه مو تشائومية يعني قولي الله كتبلي متىبولد وان بتزوج وجم ياهل بييب بس هم كتب الاعمار لازم اعيش يومي بلي يرضيه ويرضيني لازم اترك اثر زين بحياتي وحياة عيالي وزوجي ما ادري متى بياخذ امانته لكن ادعيه انه يطول بعمري لانه قادر مثل ماكتب قدري يغيره قولي ليش اخاف اللي كاتبه اللله بيكون بس لازم احرص واسوي واجبي اتجاه عيالي ليش اخليهم يتاثرون ليش اخلي نفسي بنكد وريلي معي لازم انجح واسعد نفسي واسعدهم ياقلبي كان عندي خاله الله يرحمها ويسكنه الجنه مافي احن منها على عيالها تحرم نفسها علشانهم وريلها الله يسامحه ماكان ذاك الزود بس تتقي الله فيه تقول الدنيا زواله دوم عاشت كانت مريضة بالقلب والسكر بس عاشت ما عمرها تالمت جدام عيالها من واهم يهال ما عمرها فضحت ابوهم تقول باجر بيكبرون ويميزون المهم سبحان الله من حبها للحياة عاشت ليما الله اذن ياخذ امانته توفت وعيالها اصغرهم 8سنوات واكبرهم بنية بدش اولى جامعه كنت صدمه عليهم من تعلقهم بخالتي بس قالو امنا كانت صابره كانت سعيده كانت تسويلنا ووووواحنا الحين نبي نقدملها ليما تخرجو وكبروا كلهم يعني الام اهي اساس كل شي لا تقولين نجره مع ريل علشان اين ولا طلعه عيشي يومج خل عيالج يستفيدون من وجودك بفرح معاهم كوني سند لهم باجر لا كبروا مو باجر تهتز صورة ابوهم وصورتج من كثرة مشاكلكم ويضيعون تنعكس سلبي عليهم لا تقولين صغار وما يفتهمون والله للحين وانا يييييييييييييييييياهل اذكر امي لا بجت ومتاثرة فيها وما انسسسسسسسسسسسسسسسسسى علشان جذي اصبر على اي شي ولا اهتم بالناس واقول في رب يتولى اي ظالم اعمل باصلي وانسى واعيش لنفسي واهلي وعيالي وريلي ومهما شفت منه اكيد داخله في خير لاااااااازم اطلعه منه واغيره وهذا اللي قاعد الحين يصير ولا تقولين حماتي وخالتي ومرت حماي الله يعطيهم على نيتهم واضعاف اللي يتمنوه لي قولي جذي والله انا اقول حدام اللي يظلمني الله يعطيني على نيتي ويعطيج او يعطيك على نيتك قسما بالله اغلبهم تعدلوا لان الانسان بطبعه مهما ظلم يخاف من عقاب الله والله قاموا يقولون لي تكفين لا تقولين لو ب الوضع العادي حتى الله يعطينا علة نيتنا تخيلي لانهم يدرون بنفسهم وظلمهم فما عليج شنو تقول فلانه عن عيالج او ليش حبوها اكثر منج او او او لا يبقى على هو الا الله ومهما الانسان مثل بالجذب والخداع مرده بينكشف وحوبتج ما اضيع من عند الله والله يوفقج بس انوي واسعي خلهم يقولون والله فلانه متغيرة والله فلان يمدح بمرته واللح اليهال مستانسين لا ادورين على اللي يضايقج او يبين جدام حد انج مكسورة ويستفزونج بسرعه والله يرزقج ويكتبلج كل خير اللهم امين

 

[ثريا الكون]

خلاص سوسو الحين انا راضيه عنج كفو والله كفو اي هذي الاخبار الطيبه جذيه انتي اوكي الله يوفقج صج وحاولي كل يوم تقولين وترددين كلمات ايجابيه علشان ينعكس على حياتج وانا بعد ادعيلج من كل قلبي الله يوفقج ان شاءالله

 

[susuu]

صادقة بكلمتي..بجد انتي اسم على مسمى
كل كلمة ركزت واعدت قرايتها 100 مرة

وبحاول اكون ايجابية اكثر مما اكون سلبية
تسلمي ويارب في ميزان حسناتك


ثريا الكون..فديتج ربي يرضى عليج
لين اليوم الامور طيبة وحمدلله على كل حال
وشكرا على دعوة الحلوة ولج بالمثل يارب

 

[الملاك المدلل]

حبيبتي اعذريني اذا قلت كلام زعلج

*
كان قصدي ابين انها تغيضني بحركاتها
تخيلي وحدة فجاءة دخلت حياتج وتلغي وجودج وتشارك الكل وطلعتج برع

*
كان المفروض اللي تسوينه انج تكسرين راسها وثبتين وجودج اكثر , وتخلينهم كلهم مايلاحظون انها قدرت تلغيج
ارجعي لهم واثبتي وجودج .. وقوي علاقتج معاهم ومعاها بالذات وخلج دايماً معاهم فـ جمعاتهم روحي لهم , اتصلي لهم اعتذري اذا ماقدرتي تروحين / عيالج وديهم لهم علطول وخليهم دوم مميزين بتعليمهم و بـ كل شي ! شكلها هي اللي منقهره ولا تبينين لها انج تنقهرين
اذا قالت انا خذت وسوت وبتسوي , افرحي لها بيني لها العكس انج فرحانه لها .. احرجيها بردودج ( عليكم بالعافيه , الله يهنيكم ... وتحاوري معاها ان الموضوع هامج وبتساعدينها ..
* الخطوه الثانيه : كلامها سخيف شنو ولدي اطول من ولدج خلقة ربي لك الحمد ! احسها تصرفات ياهل ..
ذمت عيالج / ابتسمي لها بس .
ولدج يبيله دكتور / ردي : ماشوف فيه شي بسم الله عليه !
ولدج مكشر / مش مشكله للحينه مب متأقلم شوي وبياخذ وبيضحك ..
لا تعطينها المجال انها تجرحج او تضايقج بطريقه غير مباشره , ردي عليها بـ رد محترم يحرجهاا وتسكت ..

وان شاء الله بينفع معاها وبترتاحين ..

* نفسيتج / حاولي تطردين الافكار السلبيه من بالج واهم شي الوسواس
على عيالج / تعوذي من الشيطان عيالي الله حافظهم ان شاءالله وماعليهم شر
تحسين انج متضايقه ومهمومه / كلمي نفسج بالمنظره .. ( انا مب متضايقه الحمدالله مافيني شي , انا مب مهمومه احسن من غيري ربي لك الحمد ) ترى صدقيني تنفع هالطريقه وتزيد الثقه بالنفس
( سورة البقره ) علطول خليها تشتغل فـ بيتج .. صلاة الليل ادعي فيها واطلبي ربج بكل شي تتمنينه
والاستغفار سحححححر استغفري بـ نية شي

وتأكدي ان القرأن وذكر الله شفاء من كل داء

واتمنى انج استفدتي لـو بـ كلمه .. وجزاج الله خير
والله يوفقج ويصلح امورج ويرزقج كل شي تتمنينه ويكتب لج في كل خطوه خير ^_^

الملاك المدلل

 

[ثريا الكون]

تسلمين كلج ذوق جم سوسو عندنا وحده )))​